| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
ကုသသင္ကာမနဝတ္ထုကထာဝဏ္ဏနာ
Kusasaṅkāmanavatthukathāvaṇṇanā
၁၃၈. မဟာပစ္စရိယာဒီသု ယံ ဝုတ္တံ ‘‘ပဒုဒ္ဓာရေနေဝ ကာရေတဗ္ဗော’’တိ, တံ သုဝုတ္တံ။ ကိန္တု တသ္သ ပရိကပ္ပာဝဟာရကမတ္တံ န ဒိသ္သတီတိ ဒသ္သနတ္ထံ ဣဒံ ဝုတ္တံ။ ဥဒ္ဓာရေ ဝာယံ အာပန္နော, တသ္မာ ဒိသ္ဝာ ဂစ္ဆန္တော ‘‘ပဒုဒ္ဓာရေနေဝ ကာရေတဗ္ဗော’’တိ ဣဒံ တတ္ထ ဒုဝုတ္တန္တိ ဝုတ္တံ ဟောတိ။ ကထံ? ‘‘သာဋကတ္ထိကော သာဋကပသိဗ္ဗကမေဝ ဂဟေတ္ဝာ ဗဟိ နိက္ခမိတ္ဝာ သာဋကဘာဝံ ဉတ္ဝာ ‘ပစ္ဆာ ဂဏ္ဟိသ္သာမီ’တိ ဧဝံ ပရိကပ္ပေတ္ဝာ ဂဏ္ဟတိ, န ဥဒ္ဓာရေ ဧဝာပဇ္ဇတိ။ ယဒာ ဗဟိ ဌတ္ဝာ ‘သာဋကော အယ’န္တိ ဒိသ္ဝာ ဂစ္ဆတိ, တဒာ ပဒုဒ္ဓာရေနေဝ ကာရေတဗ္ဗော’’တိ န ဝုတ္တမေတံ, ကိန္တု ကိဉ္စာပိ ပရိကပ္ပော ဒိသ္သတိ, ပုဗ္ဗဘာဂေ အဝဟာရက္ခဏေ န ဒိသ္သတီတိ န သော ပရိကပ္ပာဝဟာရော, အယမတ္ထော မဟာအဋ္ဌကထာယံ ဝုတ္တောဝ, တသ္မာ ‘‘ဉာယမေဝာ’’တိ ဝဒန္တိ။ ကမ္မန္တသာလာ နာမ ကသ္သကာနံ ဝနစ္ဆေဒကာနံ ဂေဟာနိ။ အယံ တာဝာတိ သစေ ဥပစာရသီမန္တိအာဒိ ယာဝ ထေရဝာဒော မဟာအဋ္ဌကထာနယော, တတ္ထ ကေစိ ပနာတိအာဒိ န ဂဟေတဗ္ဗံ ထေရဝာဒတ္တာ ယုတ္တိအဘာဝတော, န ဟိ သာဟတ္ထိကေ ဧဝံဝိဓာ အတ္ထသာဓကစေတနာ ဟောတိ။ အာဏတ္တိကေ ဧဝ အတ္ထသာဓကစေတနာ။ ‘‘သေသံ မဟာပစ္စရိယံ ဝုတ္တေနတ္ထေန သမေတီ’’တိ ဝုတ္တံ။
138.Mahāpaccariyādīsu yaṃ vuttaṃ ‘‘paduddhāreneva kāretabbo’’ti, taṃ suvuttaṃ. Kintu tassa parikappāvahārakamattaṃ na dissatīti dassanatthaṃ idaṃ vuttaṃ. Uddhāre vāyaṃ āpanno, tasmā disvā gacchanto ‘‘paduddhāreneva kāretabbo’’ti idaṃ tattha duvuttanti vuttaṃ hoti. Kathaṃ? ‘‘Sāṭakatthiko sāṭakapasibbakameva gahetvā bahi nikkhamitvā sāṭakabhāvaṃ ñatvā ‘pacchā gaṇhissāmī’ti evaṃ parikappetvā gaṇhati, na uddhāre evāpajjati. Yadā bahi ṭhatvā ‘sāṭako aya’nti disvā gacchati, tadā paduddhāreneva kāretabbo’’ti na vuttametaṃ, kintu kiñcāpi parikappo dissati, pubbabhāge avahārakkhaṇe na dissatīti na so parikappāvahāro, ayamattho mahāaṭṭhakathāyaṃ vuttova, tasmā ‘‘ñāyamevā’’ti vadanti. Kammantasālā nāma kassakānaṃ vanacchedakānaṃ gehāni. Ayaṃ tāvāti sace upacārasīmantiādi yāva theravādo mahāaṭṭhakathānayo, tattha keci panātiādi na gahetabbaṃ theravādattā yuttiabhāvato, na hi sāhatthike evaṃvidhā atthasādhakacetanā hoti. Āṇattike eva atthasādhakacetanā. ‘‘Sesaṃ mahāpaccariyaṃ vuttenatthena sametī’’ti vuttaṃ.
ကုသသင္ကာမနကရဏေ သစေ ပရော ‘‘နာယံ မမ သန္တကော’’တိ ဇာနာတိ, ဣတရသ္သ ဟတ္ထတော မုတ္တမတ္တေ ပာရာဇိကာပတ္တိ ခီလသင္ကာမနေ ဝိယ။ ‘‘အတ္တနော သန္တကံ သစေ ဇာနာတိ, န ဟောတီ’’တိ ဝဒန္တိ။ ဧဝံ သန္တေ ပဉ္စကာနိ သင္ကရာနိ ဟောန္တီတိ ဥပပရိက္ခိတဗ္ဗံ။
Kusasaṅkāmanakaraṇe sace paro ‘‘nāyaṃ mama santako’’ti jānāti, itarassa hatthato muttamatte pārājikāpatti khīlasaṅkāmane viya. ‘‘Attano santakaṃ sace jānāti, na hotī’’ti vadanti. Evaṃ sante pañcakāni saṅkarāni hontīti upaparikkhitabbaṃ.
၁၄၀. ပရာနုဒ္ဒယတာယာတိ ဧတ္ထ ပရာနုဒ္ဒယတာယ ကောဋိပ္ပတ္တေန ဘဂဝတာ ကသ္မာ ‘‘အနာပတ္တိ ပေတပရိဂ္ဂဟေ တိရစ္ဆာနဂတပရိဂ္ဂဟေ’’တိ (ပာရာ. ၁၃၁) ဝုတ္တန္တိ စေ? ပရာနုဒ္ဒယတာယ ဧဝ။ ယသ္သ ဟိ ပရိက္ခာရသ္သ အာဒာနေ ရာဇာနော စောရံ ဂဟေတ္ဝာ န ဟနနာဒီနိ ကရေယ္ယုံ, တသ္မိမ္ပိ နာမ သမဏော ဂောတမော ပာရာဇိကံ ပညပေတ္ဝာ ဘိက္ခုံ အဘိက္ခုံ ကရောတီတိ မဟာဇနော ဘဂဝတိ ပသာဒညထတ္တံ အာပဇ္ဇိတ္ဝာ အပာယုပဂော ဟောတိ။ အပေတပရိဂ္ဂဟိတာ ရုက္ခာဒီ စ ဒုလ္လဘာ, န စ သက္ကာ ဉာတုန္တိ ရုက္ခာဒီဟိ ပာပဘီရုကော ဥပာသကဇနော ပဋိမာဃရစေတိယဗောဓိဃရဝိဟာရာဒီနိ အကတ္ဝာ မဟတော ပုညက္ခန္ဓတော ပရိဟာယေယ္ယ။ ‘‘ရုက္ခမူလသေနာသနံ ပံသုကူလစီဝရံ နိသ္သာယ ပဗ္ဗဇ္ဇာ’’တိ (မဟာဝ. ၁၂၈) ဝုတ္တနိသ္သယာ စ အနိသ္သယာ ဟောန္တိ။ ပရပရိဂ္ဂဟိတသညိနော ဟိ ဘိက္ခူ ရုက္ခမူလပံသုကူလာနိ န သာဒိယိသ္သန္တီတိ, ပဗ္ဗဇ္ဇာ စ န သမ္ဘဝေယ္ယုံ, သပ္ပဒဋ္ဌကာလေ ဆာရိကတ္ထာယ ရုက္ခံ အဂ္ဂဟေတ္ဝာ မရဏံ ဝာ နိဂစ္ဆေယ္ယုံ, အစ္ဆိန္နစီဝရာဒိကာလေ သာခာဘင္ဂာဒိံ အဂ္ဂဟေတ္ဝာ နဂ္ဂာ ဟုတ္ဝာ တိတ္ထိယလဒ္ဓိမေဝ သုလဒ္ဓိ ဝိယ ဒီပေန္တာ ဝိစရေယ္ယုံ, တတော တိတ္ထိယေသ္ဝေဝ လောကော ပသီဒိတ္ဝာ ဒိဋ္ဌိဂ္ဂဟဏံ ပတ္ဝာ သံသာရခာဏုကော ဘဝေယ္ယ, တသ္မာ ဘဂဝာ ပရာနုဒ္ဒယတာယ ဧဝ ‘‘အနာပတ္တိ ပေတပရိဂ္ဂဟေ’’တိအာဒိမာဟာတိ ဝေဒိတဗ္ဗံ။
140.Parānuddayatāyāti ettha parānuddayatāya koṭippattena bhagavatā kasmā ‘‘anāpatti petapariggahe tiracchānagatapariggahe’’ti (pārā. 131) vuttanti ce? Parānuddayatāya eva. Yassa hi parikkhārassa ādāne rājāno coraṃ gahetvā na hananādīni kareyyuṃ, tasmimpi nāma samaṇo gotamo pārājikaṃ paññapetvā bhikkhuṃ abhikkhuṃ karotīti mahājano bhagavati pasādaññathattaṃ āpajjitvā apāyupago hoti. Apetapariggahitā rukkhādī ca dullabhā, na ca sakkā ñātunti rukkhādīhi pāpabhīruko upāsakajano paṭimāgharacetiyabodhigharavihārādīni akatvā mahato puññakkhandhato parihāyeyya. ‘‘Rukkhamūlasenāsanaṃ paṃsukūlacīvaraṃ nissāya pabbajjā’’ti (mahāva. 128) vuttanissayā ca anissayā honti. Parapariggahitasaññino hi bhikkhū rukkhamūlapaṃsukūlāni na sādiyissantīti, pabbajjā ca na sambhaveyyuṃ, sappadaṭṭhakāle chārikatthāya rukkhaṃ aggahetvā maraṇaṃ vā nigaccheyyuṃ, acchinnacīvarādikāle sākhābhaṅgādiṃ aggahetvā naggā hutvā titthiyaladdhimeva suladdhi viya dīpentā vicareyyuṃ, tato titthiyesveva loko pasīditvā diṭṭhiggahaṇaṃ patvā saṃsārakhāṇuko bhaveyya, tasmā bhagavā parānuddayatāya eva ‘‘anāpatti petapariggahe’’tiādimāhāti veditabbaṃ.
၁၄၁. အပရမ္ပိ ဘာဂံ ဒေဟီတိ ‘‘ဂဟိတံ ဝိညတ္တိသဒိသတ္တာ နေဝ ဘဏ္ဍဒေယ္ယံ န ပာရာဇိက’’န္တိ လိခိတံ, ဣဒံ ပကတိဇနေ ယုဇ္ဇတိ။ ‘‘သစေ ပန သာမိကော ဝာ တေန အာဏတ္တော ဝာ ‘အပရသ္သ သဟာယဘိက္ခုသ္သ ဘာဂံ ဧသ ဂဏ္ဟာတိ ယာစတိ ဝာ’တိ ယံ အပရဘာဂံ ဒေတိ, တံ ဘဏ္ဍဒေယ္ယ’’န္တိ ဝဒန္တိ။
141.Aparampibhāgaṃ dehīti ‘‘gahitaṃ viññattisadisattā neva bhaṇḍadeyyaṃ na pārājika’’nti likhitaṃ, idaṃ pakatijane yujjati. ‘‘Sace pana sāmiko vā tena āṇatto vā ‘aparassa sahāyabhikkhussa bhāgaṃ esa gaṇhāti yācati vā’ti yaṃ aparabhāgaṃ deti, taṃ bhaṇḍadeyya’’nti vadanti.
၁၄၈-၉. ခာဒန္တသ္သ ဘဏ္ဍဒေယ္ယန္တိ စောရသ္သ ဝာ သာမိကသ္သ ဝာ သမ္ပတ္တသ္သ ဒိန္နံ သုဒိန္နမေဝ ကိရ။ အဝိသေသေနာတိ ‘‘ဥသ္သာဟဂတာနံ ဝာ’’တိ အဝတ္ဝာ ဝုတ္တံ, န ဟိ ကတိပယာနံ အနုသ္သာဟတာယ သင္ဃိကမသင္ဃိကံ ဟောတိ။ မဟာအဋ္ဌကထာယမ္ပိ ‘‘ယဒိ သဥသ္သာဟာဝ ဂစ္ဆန္တိ, ထေယ္ယစိတ္တေန ပရိဘုဉ္ဇတော အဝဟာရော ဟောတီ’’တိ ဝုတ္တတ္တာ တဒုဘယမေကံ။ ဆဍ္ဍိတဝိဟာရေ ဥပစာရသီမာယ ပမာဏံ ဇာနိတုံ န သက္ကာ, အယံ ပန ဘိက္ခု ဥပစာရသီမာယ ဗဟိ ဌတ္ဝာ ဃဏ္ဋိပဟရဏာဒိံ ကတ္ဝာ ပရိဘုဉ္ဇတိ ခာဒတိ, တေန ဧဝံ ခာဒိတံ သုခာဒိတန္တိ အတ္ထော။ ‘‘ဣတရဝိဟာရေ တတ္ထ ဒိတ္တဝိဓိနာဝ ပဋိပဇ္ဇိတဗ္ဗ’’န္တိ ဝုတ္တံ။ ‘‘သုခာဒိတံ အန္တောဝိဟာရတ္တာ’’တိ လိခိတံ, အာဂတာနာဂတာနံ သန္တကတ္တာတိ ‘‘စာတုဒ္ဒိသသ္သ သင္ဃသ္သ ဒေမီ’’တိ ဒိန္နတ္တာ ဝုတ္တံ။ ဧဝံ အဝတ္ဝာ ‘‘သင္ဃသ္သ ဒေမီ’’တိ ဒိန္နမ္ပိ တာဒိသမေဝ။ တထာ ဟိ ဗဟိ ဌိတော လာဘံ န လဘတိ ဘဂဝတော ဝစနေနာတိ ဝေဒိတဗ္ဗံ။
148-9.Khādantassa bhaṇḍadeyyanti corassa vā sāmikassa vā sampattassa dinnaṃ sudinnameva kira. Avisesenāti ‘‘ussāhagatānaṃ vā’’ti avatvā vuttaṃ, na hi katipayānaṃ anussāhatāya saṅghikamasaṅghikaṃ hoti. Mahāaṭṭhakathāyampi ‘‘yadi saussāhāva gacchanti, theyyacittena paribhuñjato avahāro hotī’’ti vuttattā tadubhayamekaṃ. Chaḍḍitavihāre upacārasīmāya pamāṇaṃ jānituṃ na sakkā, ayaṃ pana bhikkhu upacārasīmāya bahi ṭhatvā ghaṇṭipaharaṇādiṃ katvā paribhuñjati khādati, tena evaṃ khāditaṃ sukhāditanti attho. ‘‘Itaravihāre tattha dittavidhināva paṭipajjitabba’’nti vuttaṃ. ‘‘Sukhāditaṃ antovihārattā’’ti likhitaṃ, āgatānāgatānaṃ santakattāti ‘‘cātuddisassa saṅghassa demī’’ti dinnattā vuttaṃ. Evaṃ avatvā ‘‘saṅghassa demī’’ti dinnampi tādisameva. Tathā hi bahi ṭhito lābhaṃ na labhati bhagavato vacanenāti veditabbaṃ.
၁၅၃. ‘‘မတသူကရော’’တိ ဝစနတော တမေဝ ဇီဝန္တံ ဘဏ္ဍဒေယ္ယန္တိ ကတ္ဝာ ဒာတုံ န လဘတိ။ ဝဇ္ဈံ ဝဋ္ဋတီတိ ဒီပိတံ ဟောတိ။ မဒ္ဒန္တော ဂစ္ဆတိ, ဘဏ္ဍဒေယ္ယန္တိ ဧတ္ထ ကိတ္တကံ ဘဏ္ဍဒေယ္ယံ, န ဟိ သက္ကာ ‘‘ဧတ္တကာ သူကရာ မဒ္ဒိတ္ဝာ ဂတာ ဂမိသ္သန္တီ’’တိ ဇာနိတုန္တိ? ယတ္တကေ သာမိကာနံ ဒိန္နေ တေ ‘‘ဒိန္နံ မမ ဘဏ္ဍ’’န္တိ တုသ္သန္တိ, တတ္တကံ ဒာတဗ္ဗံ။ နော စေ တုသ္သန္တိ, အတိက္ကန္တသူကရမူလံ ဒတ္ဝာ ကိံ ဩပာတော ခဏိတ္ဝာ ဒာတဗ္ဗောတိ? န ဒာတဗ္ဗော။ အထ ကိံ စောဒိယမာနသ္သ ဥဘိန္နံ ဓုရနိက္ခေပေန ပာရာဇိကံ ဟောတီတိ? န ဟောတိ, ကေဝလံ ကပ္ပိယပရိက္ခာရံ ဒတ္ဝာ တောသေတဗ္ဗောဝ သာမိကော, ဧသေဝ နယော အညေသုပိ ဧဝရူပေသူတိ နော တက္ကောတိ အာစရိယော။ ‘‘တဒဟေဝ ဝာ ဒုတိယဒိဝသေ ဝာ မဒ္ဒန္တော ဂစ္ဆတီ’’တိ ဝုတ္တံ။ ဂုမ္ဗေ ခိပတိ, ဘဏ္ဍဒေယ္ယမေဝာတိ အဝသ္သံ ပဝိသနကေ သန္ဓာယ ဝုတ္တံ။ ဧတ္ထ ဧကသ္မိံ ဝိဟာရေ ပရစက္ကာဒိဘယံ အာဂတံ။ မူလဝတ္ထုစ္ဆေဒန္တိ ‘‘သဗ္ဗသေနာသနံ ဧတေ ဣသ္သရာ’’တိ ဝစနတော ဣတရေ အနိသ္သရာတိ ဒီပိတံ ဟောတိ။
153.‘‘Matasūkaro’’ti vacanato tameva jīvantaṃ bhaṇḍadeyyanti katvā dātuṃ na labhati. Vajjhaṃ vaṭṭatīti dīpitaṃ hoti. Maddanto gacchati, bhaṇḍadeyyanti ettha kittakaṃ bhaṇḍadeyyaṃ, na hi sakkā ‘‘ettakā sūkarā madditvā gatā gamissantī’’ti jānitunti? Yattake sāmikānaṃ dinne te ‘‘dinnaṃ mama bhaṇḍa’’nti tussanti, tattakaṃ dātabbaṃ. No ce tussanti, atikkantasūkaramūlaṃ datvā kiṃ opāto khaṇitvā dātabboti? Na dātabbo. Atha kiṃ codiyamānassa ubhinnaṃ dhuranikkhepena pārājikaṃ hotīti? Na hoti, kevalaṃ kappiyaparikkhāraṃ datvā tosetabbova sāmiko, eseva nayo aññesupi evarūpesūti no takkoti ācariyo. ‘‘Tadaheva vā dutiyadivase vā maddanto gacchatī’’ti vuttaṃ. Gumbe khipati, bhaṇḍadeyyamevāti avassaṃ pavisanake sandhāya vuttaṃ. Ettha ekasmiṃ vihāre paracakkādibhayaṃ āgataṃ. Mūlavatthucchedanti ‘‘sabbasenāsanaṃ ete issarā’’ti vacanato itare anissarāti dīpitaṃ hoti.
၁၅၆. အာရာမရက္ခကာတိ ဝိသ္သဋ္ဌဝသေန ဂဟေတဗ္ဗံ။ အဓိပ္ပာယံ ဉတ္ဝာတိ ဧတ္ထ ယသ္သ ဒာနံ ပဋိဂ္ဂဏ္ဟန္တံ ဘိက္ခုံ, ဘာဂံ ဝာ သာမိကာ န ရက္ခန္တိ န ဒဏ္ဍေန္တိ, တသ္သ ဒာနံ အပ္ပဋိစ္ဆာဒေတ္ဝာ ဂဟေတုံ ဝဋ္ဋတီတိ ဣဓ သန္နိဋ္ဌာနံ။ တမ္ပိ ‘‘န ဝဋ္ဋတိ သင္ဃိကေ’’တိ ဝုတ္တံ။ အယမေဝ ဘိက္ခု ဣသ္သရောတိ ယတ္ထ သော ဣစ္ဆတိ, တတ္ထ အတ္တဉာတဟေတုံ လဘတိ ကိရ အတ္ထော။ အပိစ ‘‘ဒဟရော’’တိ ဝဒန္တိ။ သဝတ္ထုကန္တိ သဟ ဘူမိယာတိ ဝုတ္တံ ဟောတိ။ ‘‘ဂရုဘဏ္ဍံ ဟောတီ’’တိ ဝတ္ဝာ ‘‘တိဏမတ္တံ ပန န ဒာတဗ္ဗ’’န္တိ ဝုတ္တံ, တံ ကိန္တု ဂရုဘဏ္ဍန္တိ စေ, အရက္ခိယအဂောပိယဋ္ဌာနေ, ဝိနသ္သနကဘာဝေ စ ဌိတံ သန္ဓာယ ဝုတ္တံ။ ကပ္ပိယေပိ စာတိ ဝတ္ဝာ, အဝတ္ဝာ ဝာ ဂဟဏယုတ္တေ မာတာဒိသန္တကေပိ ထေယ္ယစိတ္တုပ္ပာဒေန။ ဣဒံ ပန သိက္ခာပဒံ ‘‘ရာဇာပိမေသံ အဘိပ္ပသန္နော’’တိ (ပာရာ. ၈၆) ဝစနတော လာဘဂ္ဂမဟတ္တံ, ဝေပုလ္လမဟတ္တဉ္စ ပတ္တကာလေ ပညတ္တန္တိ သိဒ္ဓံ။
156.Ārāmarakkhakāti vissaṭṭhavasena gahetabbaṃ. Adhippāyaṃ ñatvāti ettha yassa dānaṃ paṭiggaṇhantaṃ bhikkhuṃ, bhāgaṃ vā sāmikā na rakkhanti na daṇḍenti, tassa dānaṃ appaṭicchādetvā gahetuṃ vaṭṭatīti idha sanniṭṭhānaṃ. Tampi ‘‘na vaṭṭati saṅghike’’ti vuttaṃ. Ayameva bhikkhu issaroti yattha so icchati, tattha attañātahetuṃ labhati kira attho. Apica ‘‘daharo’’ti vadanti. Savatthukanti saha bhūmiyāti vuttaṃ hoti. ‘‘Garubhaṇḍaṃ hotī’’ti vatvā ‘‘tiṇamattaṃ pana na dātabba’’nti vuttaṃ, taṃ kintu garubhaṇḍanti ce, arakkhiyaagopiyaṭṭhāne, vinassanakabhāve ca ṭhitaṃ sandhāya vuttaṃ. Kappiyepi cāti vatvā, avatvā vā gahaṇayutte mātādisantakepi theyyacittuppādena. Idaṃ pana sikkhāpadaṃ ‘‘rājāpimesaṃ abhippasanno’’ti (pārā. 86) vacanato lābhaggamahattaṃ, vepullamahattañca pattakāle paññattanti siddhaṃ.
ဒုတိယပာရာဇိကဝဏ္ဏနာ နိဋ္ဌိတာ။
Dutiyapārājikavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဒုတိယပာရာဇိကံ • 2. Dutiyapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဒုတိယပာရာဇိကံ • 2. Dutiyapārājikaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဝိနီတဝတ္ထုဝဏ္ဏနာ • Vinītavatthuvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ကုသသင္ကာမနဝတ္ထုကထာဝဏ္ဏနာ • Kusasaṅkāmanavatthukathāvaṇṇanā
