| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. குஸினாரஸுத்தவண்ணனா
6. Kusinārasuttavaṇṇanā
76. ச²ட்டே² உபவத்தனேதி பாசீனக³தாய ஸாலபந்தியா உத்தரேன நிவத்தித்வா டி²தாய வேமஜ்ஜ²ட்டா²னே. அந்தரேன யமகஸாலானந்தி த்³வின்னங் ஸாலருக்கா²னங் அந்தரே. கங்கா²தி த்³வெள்ஹகங். விமதீதி வினிச்சி²துங் அஸமத்த²தா. ‘‘பு³த்³தோ⁴ நு கோ² ந பு³த்³தோ⁴ நு கோ², த⁴ம்மோ நு கோ² ந த⁴ம்மோ நு கோ², ஸங்கோ⁴ நு கோ² ந ஸங்கோ⁴ நு கோ², மக்³கோ³ நு கோ² ந மக்³கோ³ நு கோ², படிபதா³ நு கோ² ந படிபதா³ நு கோ²’’தி யஸ்ஸ ஸங்ஸயோ உப்பஜ்ஜெய்ய, தங் வோ வதா³மி புச்ச²த², பி⁴க்க²வேதி அயமெத்த² ஸங்கே²பத்தோ². ஸத்து²கா³ரவேனபி ந புச்செ²ய்யாதா²தி ‘‘மயங் ஸத்து² ஸந்திகே பப்³ப³ஜிம்ஹ, சத்தாரோ பச்சயாபி நோ ஸத்து² ஸந்தகாவ. தே மயங் எத்தகங் காலங் கங்க²ங் அகத்வா ந அரஹாம அஜ்ஜ பச்சி²மே காலே கங்க²ங் காது’’ந்தி ஸசே ஏவங் ஸத்த²ரி கா³ரவேன ந புச்ச²த². ஸஹாயகோபி, பி⁴க்க²வே, ஸஹாயகஸ்ஸ ஆரோசேதூதி தும்ஹாகங் யோ யஸ்ஸ பி⁴க்கு²ஸ்ஸ ஸந்தி³ட்டோ² ஸம்ப⁴த்தோ, ஸோ தஸ்ஸ ஆரோசேது, அஹங் ஏகஸ்ஸ பி⁴க்கு²ஸ்ஸ கதெ²ஸ்ஸாமி, தஸ்ஸ கத²ங் ஸுத்வா ஸப்³பே³ நிக்கங்கா² ப⁴வதா²தி த³ஸ்ஸேதி. ஏவங் பஸன்னோதி ஏவங் ஸத்³த³ஹாமி அஹந்தி அத்தோ². ஞாணமேவாதி நிக்கங்க²பா⁴வபச்சக்க²கரணஞாணங்யேவ எத்த² ததா²க³தஸ்ஸ, ந ஸத்³தா⁴மத்தந்தி அத்தோ². இமேஸஞ்ஹி, ஆனந்தா³தி இமேஸங் அந்தோஸாணியங் நிஸின்னானங் பஞ்சன்னங் பி⁴க்கு²ஸதானங். யோ பச்சி²மகோதி யோ கு³ணவஸேன பச்சி²மகோ, ஆனந்த³த்தே²ரங்யேவ ஸந்தா⁴யாஹ.
76. Chaṭṭhe upavattaneti pācīnagatāya sālapantiyā uttarena nivattitvā ṭhitāya vemajjhaṭṭhāne. Antarena yamakasālānanti dvinnaṃ sālarukkhānaṃ antare. Kaṅkhāti dveḷhakaṃ. Vimatīti vinicchituṃ asamatthatā. ‘‘Buddho nu kho na buddho nu kho, dhammo nu kho na dhammo nu kho, saṅgho nu kho na saṅgho nu kho, maggo nu kho na maggo nu kho, paṭipadā nu kho na paṭipadā nu kho’’ti yassa saṃsayo uppajjeyya, taṃ vo vadāmi pucchatha, bhikkhaveti ayamettha saṅkhepattho. Satthugāravenapi na puccheyyāthāti ‘‘mayaṃ satthu santike pabbajimha, cattāro paccayāpi no satthu santakāva. Te mayaṃ ettakaṃ kālaṃ kaṅkhaṃ akatvā na arahāma ajja pacchime kāle kaṅkhaṃ kātu’’nti sace evaṃ satthari gāravena na pucchatha. Sahāyakopi, bhikkhave, sahāyakassa ārocetūti tumhākaṃ yo yassa bhikkhussa sandiṭṭho sambhatto, so tassa ārocetu, ahaṃ ekassa bhikkhussa kathessāmi, tassa kathaṃ sutvā sabbe nikkaṅkhā bhavathāti dasseti. Evaṃ pasannoti evaṃ saddahāmi ahanti attho. Ñāṇamevāti nikkaṅkhabhāvapaccakkhakaraṇañāṇaṃyeva ettha tathāgatassa, na saddhāmattanti attho. Imesañhi, ānandāti imesaṃ antosāṇiyaṃ nisinnānaṃ pañcannaṃ bhikkhusatānaṃ. Yo pacchimakoti yo guṇavasena pacchimako, ānandattheraṃyeva sandhāyāha.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. குஸினாரஸுத்தங் • 6. Kusinārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. குஸினாரஸுத்தவண்ணனா • 6. Kusinārasuttavaṇṇanā
