| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၆. ကုသိနာရသုတ္တဝဏ္ဏနာ
6. Kusinārasuttavaṇṇanā
၇၆. ဆဋ္ဌေ နဂရံ ပဝိသိတုကာမာ ဥယ္ယာနတော ဥပေစ္စ ဝတ္တန္တိ ဂစ္ဆန္တိ ဧတေနာတိ ဥပဝတ္တနံ။ ယထေဝ ဟိ ကလမ္ဗနဒိတီရတော ရာဇမာတုဝိဟာရဒ္ဝာရေန ထူပာရာမံ ဂန္တဗ္ဗံ ဟောတိ, ဧဝံ ဟိရညဝတိကာယ ပာရိမတီရတော သာလဝနံ ဥယ္ယာနံ, ယထာ အနုရာဓပုရသ္သ ထူပာရာမော ဒက္ခိဏပစ္ဆိမဒိသာယ, ဧဝံ တံ ဥယ္ယာနံ ကုသိနာရာယ ဒက္ခိဏပစ္ဆိမဒိသာယ ဟောတိ။ ယထာ ထူပာရာမတော ဒက္ခိဏဒ္ဝာရေန နဂရံ ပဝိသနမဂ္ဂော ပာစီနမုခော ဂန္တ္ဝာ ဥတ္တရေန နိဝတ္တတိ, ဧဝံ ဥယ္ယာနတော သာလပန္တိ ပာစီနမုခာ ဂန္တ္ဝာ ဥတ္တရေန နိဝတ္တာ, တသ္မာ တံ ‘‘ဥပဝတ္တန’’န္တိ ဝုစ္စတိ။ အန္တရေတိ ဒ္ဝိန္နံ သာလရုက္ခာနံ ဝေမဇ္ဈေ။ တတ္ထ ဟိ ပညာပိယမာနသ္သ မဉ္စသ္သ ဧကာ သာလပန္တိ သီသဘာဂေ ဟောတိ, ဧကာ ပာဒဘာဂေ။ တတ္ရပိ ဧကော တရုဏသာလော သီသဘာဂသ္သ အာသန္နော ဟောတိ, ဧကော ပာဒဘာဂသ္သ။ အပိစ ယမကသာလာ နာမ မူလခန္ဓဝိဋပပတ္တေဟိ အညမညံ သံသိဗ္ဗိတ္ဝာ ဌိတသာလာတိပိ ဝဒန္တိ။
76. Chaṭṭhe nagaraṃ pavisitukāmā uyyānato upecca vattanti gacchanti etenāti upavattanaṃ. Yatheva hi kalambanaditīrato rājamātuvihāradvārena thūpārāmaṃ gantabbaṃ hoti, evaṃ hiraññavatikāya pārimatīrato sālavanaṃ uyyānaṃ, yathā anurādhapurassa thūpārāmo dakkhiṇapacchimadisāya, evaṃ taṃ uyyānaṃ kusinārāya dakkhiṇapacchimadisāya hoti. Yathā thūpārāmato dakkhiṇadvārena nagaraṃ pavisanamaggo pācīnamukho gantvā uttarena nivattati, evaṃ uyyānato sālapanti pācīnamukhā gantvā uttarena nivattā, tasmā taṃ ‘‘upavattana’’nti vuccati. Antareti dvinnaṃ sālarukkhānaṃ vemajjhe. Tattha hi paññāpiyamānassa mañcassa ekā sālapanti sīsabhāge hoti, ekā pādabhāge. Tatrapi eko taruṇasālo sīsabhāgassa āsanno hoti, eko pādabhāgassa. Apica yamakasālā nāma mūlakhandhaviṭapapattehi aññamaññaṃ saṃsibbitvā ṭhitasālātipi vadanti.
ဒ္ဝေဠ္ဟကန္တိ ဒ္ဝိဓာဂာဟော, အနေကံသဂ္ဂာဟောတိ အတ္ထော။ ဝိမတီတိ သံသယာပတ္တီတိ အာဟ ‘‘ဝိနိစ္ဆိတုံ အသမတ္ထတာ’’တိ။ တံ ဝော ဝဒာမီတိ တံ သံသယဝန္တံ ဘိက္ခုံ သန္ဓာယ ဝော တုမ္ဟေ ဝဒာမီတိ။ နိက္ကင္ခဘာဝပစ္စက္ခကရဏန္တိ ဗုဒ္ဓာဒီသု တေသံ ဘိက္ခူနံ နိက္ကင္ခဘာဝသ္သ ပစ္စက္ခကာရိယာ ယာထာဝတော တမတ္ထံ ပဋိဝိဇ္ဈိတ္ဝာ ဌိတံ သဗ္ဗညုတညာဏမေဝ။ ဧတ္ထာတိ ဧတသ္မိံ အတ္ထေ။
Dveḷhakanti dvidhāgāho, anekaṃsaggāhoti attho. Vimatīti saṃsayāpattīti āha ‘‘vinicchituṃ asamatthatā’’ti. Taṃ vo vadāmīti taṃ saṃsayavantaṃ bhikkhuṃ sandhāya vo tumhe vadāmīti. Nikkaṅkhabhāvapaccakkhakaraṇanti buddhādīsu tesaṃ bhikkhūnaṃ nikkaṅkhabhāvassa paccakkhakāriyā yāthāvato tamatthaṃ paṭivijjhitvā ṭhitaṃ sabbaññutaññāṇameva. Etthāti etasmiṃ atthe.
ကုသိနာရသုတ္တဝဏ္ဏနာ နိဋ္ဌိတာ။
Kusinārasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. ကုသိနာရသုတ္တံ • 6. Kusinārasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၆. ကုသိနာရသုတ္တဝဏ္ဏနာ • 6. Kusinārasuttavaṇṇanā
