| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. குடிகாரஸிக்கா²பத³வண்ணனா
6. Kuṭikārasikkhāpadavaṇṇanā
342. தேன ஸமயேனாதி குடிகாரஸிக்கா²பத³ங். தத்த² ஆளவகாதி ஆளவிரட்டே² ஜாதா தா³ரகா ஆளவகா நாம, தே பப்³ப³ஜிதகாலேபி ‘‘ஆளவகா’’த்வேவ பஞ்ஞாயிங்ஸு. தே ஸந்தா⁴ய வுத்தங் ‘‘ஆளவகா பி⁴க்கூ²’’தி. ஸஞ்ஞாசிகாயோதி ஸயங் யாசித்வா க³ஹிதூபகரணாயோ. காராபெந்தீதி கரொந்திபி காராபெந்திபி, தே கிர ஸாஸனே விபஸ்ஸனாது⁴ரஞ்ச க³ந்த²து⁴ரஞ்சாதி த்³வேபி து⁴ரானி ச²ட்³டெ³த்வா நவகம்மமேவ து⁴ரங் கத்வா பக்³க³ண்ஹிங்ஸு. அஸ்ஸாமிகாயோதி அனிஸ்ஸராயோ, காரேதா தா³யகேன விரஹிதாயோதி அத்தோ². அத்துத்³தே³ஸிகாயோதி அத்தானங் உத்³தி³ஸ்ஸ அத்தனோ அத்தா²ய ஆரத்³தா⁴யோதி அத்தோ². அப்பமாணிகாயோதி ‘‘எத்தகேன நிட்ட²ங் க³ச்சி²ஸ்ஸந்தீ’’தி ஏவங் அபரிச்சி²ன்னப்பமாணாயோ, வுத்³தி⁴ப்பமாணாயோ வா மஹந்தப்பமாணாயோதி அத்தோ².
342.Tena samayenāti kuṭikārasikkhāpadaṃ. Tattha āḷavakāti āḷaviraṭṭhe jātā dārakā āḷavakā nāma, te pabbajitakālepi ‘‘āḷavakā’’tveva paññāyiṃsu. Te sandhāya vuttaṃ ‘‘āḷavakā bhikkhū’’ti. Saññācikāyoti sayaṃ yācitvā gahitūpakaraṇāyo. Kārāpentīti karontipi kārāpentipi, te kira sāsane vipassanādhurañca ganthadhurañcāti dvepi dhurāni chaḍḍetvā navakammameva dhuraṃ katvā paggaṇhiṃsu. Assāmikāyoti anissarāyo, kāretā dāyakena virahitāyoti attho. Attuddesikāyoti attānaṃ uddissa attano atthāya āraddhāyoti attho. Appamāṇikāyoti ‘‘ettakena niṭṭhaṃ gacchissantī’’ti evaṃ aparicchinnappamāṇāyo, vuddhippamāṇāyo vā mahantappamāṇāyoti attho.
யாசனா ஏவ ப³ஹுலா ஏதேஸங் மந்த³ங் அஞ்ஞங் கம்மந்தி யாசனப³ஹுலா. ஏவங் விஞ்ஞத்திப³ஹுலா வேதி³தப்³பா³. அத்த²தோ பனெத்த² நானாகரணங் நத்தி², அனேகக்க²த்துங் ‘‘புரிஸங் தே³த², புரிஸத்த²கரங் தே³தா²’’தி யாசந்தானமேதங் அதி⁴வசனங். தத்த² மூலச்சே²ஜ்ஜாய புரிஸங் யாசிதுங் ந வட்டதி, ஸஹாயத்தா²ய கம்மகரணத்தா²ய ‘‘புரிஸங் தே³தா²’’தி யாசிதுங் வட்டதி. புரிஸத்த²கரந்தி புரிஸேன காதப்³ப³ங் ஹத்த²கம்மங் வுச்சதி, தங் யாசிதுங் வட்டதி. ஹத்த²கம்மங் நாம கிஞ்சி வத்து² ந ஹோதி, தஸ்மா ட²பெத்வா மிக³லுத்³த³கமச்ச²ப³ந்த⁴காதீ³னங் ஸககம்மங் அவஸேஸங் ஸப்³ப³ங் கப்பியங். ‘‘கிங், ப⁴ந்தே, ஆக³தத்த² கேன கம்ம’’ந்தி புச்சி²தே வா அபுச்சி²தே வா யாசிதுங் வட்டதி, விஞ்ஞத்திபச்சயா தோ³ஸோ நத்தி². தஸ்மா மிக³லுத்³த³காத³யோ ஸககம்மங் ந யாசிதப்³பா³, ‘‘ஹத்த²கம்மங் தே³தா²’’தி அனியமெத்வாபி ந யாசிதப்³பா³; ஏவங் யாசிதா ஹி தே ‘‘ஸாது⁴, ப⁴ந்தே’’தி பி⁴க்கூ² உய்யோஜெத்வா மிகே³பி மாரெத்வா ஆஹரெய்யுங். நியமெத்வா பன ‘‘விஹாரே கிஞ்சி கத்தப்³ப³ங் அத்தி², தத்த² ஹத்த²கம்மங் தே³தா²’’தி யாசிதப்³பா³. பா²லனங்க³லாதீ³னி உபகரணானி க³ஹெத்வா கஸிதுங் வா வபிதுங் வா லாயிதுங் வா க³ச்ச²ந்தங் ஸகிச்சபஸுதம்பி கஸ்ஸகங் வா அஞ்ஞங் வா கிஞ்சி ஹத்த²கம்மங் யாசிதுங் வட்டதேவ. யோ பன விகா⁴ஸாதோ³ வா அஞ்ஞோ வா கோசி நிக்கம்மோ நிரத்த²ககத²ங் கதெ²ந்தோ நித்³தா³யந்தோ வா விஹரதி, ஏவரூபங் அயாசித்வாபி ‘‘ஏஹி ரே இத³ங் வா இத³ங் வா கரோஹீ’’தி யதி³ச்ச²கங் காராபேதுங் வட்டதி.
Yācanā eva bahulā etesaṃ mandaṃ aññaṃ kammanti yācanabahulā. Evaṃ viññattibahulā veditabbā. Atthato panettha nānākaraṇaṃ natthi, anekakkhattuṃ ‘‘purisaṃ detha, purisatthakaraṃ dethā’’ti yācantānametaṃ adhivacanaṃ. Tattha mūlacchejjāya purisaṃ yācituṃ na vaṭṭati, sahāyatthāya kammakaraṇatthāya ‘‘purisaṃ dethā’’ti yācituṃ vaṭṭati. Purisatthakaranti purisena kātabbaṃ hatthakammaṃ vuccati, taṃ yācituṃ vaṭṭati. Hatthakammaṃ nāma kiñci vatthu na hoti, tasmā ṭhapetvā migaluddakamacchabandhakādīnaṃ sakakammaṃ avasesaṃ sabbaṃ kappiyaṃ. ‘‘Kiṃ, bhante, āgatattha kena kamma’’nti pucchite vā apucchite vā yācituṃ vaṭṭati, viññattipaccayā doso natthi. Tasmā migaluddakādayo sakakammaṃ na yācitabbā, ‘‘hatthakammaṃ dethā’’ti aniyametvāpi na yācitabbā; evaṃ yācitā hi te ‘‘sādhu, bhante’’ti bhikkhū uyyojetvā migepi māretvā āhareyyuṃ. Niyametvā pana ‘‘vihāre kiñci kattabbaṃ atthi, tattha hatthakammaṃ dethā’’ti yācitabbā. Phālanaṅgalādīni upakaraṇāni gahetvā kasituṃ vā vapituṃ vā lāyituṃ vā gacchantaṃ sakiccapasutampi kassakaṃ vā aññaṃ vā kiñci hatthakammaṃ yācituṃ vaṭṭateva. Yo pana vighāsādo vā añño vā koci nikkammo niratthakakathaṃ kathento niddāyanto vā viharati, evarūpaṃ ayācitvāpi ‘‘ehi re idaṃ vā idaṃ vā karohī’’ti yadicchakaṃ kārāpetuṃ vaṭṭati.
ஹத்த²கம்மஸ்ஸ பன ஸப்³ப³கப்பியபா⁴வதீ³பனத்த²ங் இமங் நயங் கதெ²ந்தி. ஸசே ஹி பி⁴க்கு² பாஸாத³ங் காரேதுகாமோ ஹோதி, த²ம்ப⁴த்தா²ய பாஸாணகொட்டகானங் க⁴ரங் க³ந்த்வா வத்தப்³ப³ங் ‘‘ஹத்த²கம்மங் லத்³து⁴ங் வட்டதி உபாஸகா’’தி. கிங் காதப்³ப³ங், ப⁴ந்தே,தி? பாஸாணத்த²ம்பா⁴ உத்³த⁴ரித்வா தா³தப்³பா³தி. ஸசே தே உத்³த⁴ரித்வா வா தெ³ந்தி, உத்³த⁴ரித்வா நிக்கி²த்தே அத்தனோ த²ம்பே⁴ வா தெ³ந்தி, வட்டதி. அதா²பி வத³ந்தி – ‘‘அம்ஹாகங், ப⁴ந்தே, ஹத்த²கம்மங் காதுங் க²ணோ நத்தி², அஞ்ஞங் உத்³த⁴ராபேத², தஸ்ஸ மூலங் த³ஸ்ஸாமா’’தி உத்³த⁴ராபெத்வா ‘‘பாஸாணத்த²ம்பே⁴ உத்³த⁴டமனுஸ்ஸானங் மூலங் தே³தா²’’தி வத்துங் வட்டதி. ஏதேனேவுபாயேன பாஸாத³தா³ரூனங் அத்தா²ய வட்³ட⁴கீனங் ஸந்திகங் இட்ட²கத்தா²ய இட்ட²கவட்³ட⁴கீனங் ச²த³னத்தா²ய கே³ஹச்சா²த³கானங் சித்தகம்மத்தா²ய சித்தகாரானந்தி யேன யேன அத்தோ² ஹோதி, தஸ்ஸ தஸ்ஸ அத்தா²ய தேஸங் தேஸங் ஸிப்பகாரகானங் ஸந்திகங் க³ந்த்வா ஹத்த²கம்மங் யாசிதுங் வட்டதி. ஹத்த²கம்மயாசனவஸேன ச மூலச்சே²ஜ்ஜாய வா ப⁴த்தவேதனானுப்பதா³னேன வா லத்³த⁴ம்பி ஸப்³ப³ங் க³ஹேதுங் வட்டதி. அரஞ்ஞதோ ஆஹராபெந்தேன ச ஸப்³ப³ங் அனஜ்ஜா²வுத்த²கங் ஆஹராபேதப்³ப³ங்.
Hatthakammassa pana sabbakappiyabhāvadīpanatthaṃ imaṃ nayaṃ kathenti. Sace hi bhikkhu pāsādaṃ kāretukāmo hoti, thambhatthāya pāsāṇakoṭṭakānaṃ gharaṃ gantvā vattabbaṃ ‘‘hatthakammaṃ laddhuṃ vaṭṭati upāsakā’’ti. Kiṃ kātabbaṃ, bhante,ti? Pāsāṇatthambhā uddharitvā dātabbāti. Sace te uddharitvā vā denti, uddharitvā nikkhitte attano thambhe vā denti, vaṭṭati. Athāpi vadanti – ‘‘amhākaṃ, bhante, hatthakammaṃ kātuṃ khaṇo natthi, aññaṃ uddharāpetha, tassa mūlaṃ dassāmā’’ti uddharāpetvā ‘‘pāsāṇatthambhe uddhaṭamanussānaṃ mūlaṃ dethā’’ti vattuṃ vaṭṭati. Etenevupāyena pāsādadārūnaṃ atthāya vaḍḍhakīnaṃ santikaṃ iṭṭhakatthāya iṭṭhakavaḍḍhakīnaṃ chadanatthāya gehacchādakānaṃ cittakammatthāya cittakārānanti yena yena attho hoti, tassa tassa atthāya tesaṃ tesaṃ sippakārakānaṃ santikaṃ gantvā hatthakammaṃ yācituṃ vaṭṭati. Hatthakammayācanavasena ca mūlacchejjāya vā bhattavetanānuppadānena vā laddhampi sabbaṃ gahetuṃ vaṭṭati. Araññato āharāpentena ca sabbaṃ anajjhāvutthakaṃ āharāpetabbaṃ.
ந கேவலஞ்ச பாஸாத³ங் காரேதுகாமேன மஞ்சபீட²பத்தபரிஸ்ஸாவனத⁴மகரகசீவராதீ³னி காராபேதுகாமேனாபி தா³ருலோஹஸுத்தாதீ³னி லபி⁴த்வா தே தே ஸிப்பகாரகே உபஸங்கமித்வா வுத்தனயேனேவ ஹத்த²கம்மங் யாசிதப்³ப³ங். ஹத்த²கம்மயாசனவஸேன ச மூலச்சே²ஜ்ஜாய வா ப⁴த்தவேதனானுப்பதா³னேன வா லத்³த⁴ம்பி ஸப்³ப³ங் க³ஹேதப்³ப³ங். ஸசே பன காதுங் ந இச்ச²ந்தி, ப⁴த்தவேதனங் பச்சாஸீஸந்தி, அகப்பியகஹாபணாதி³ ந தா³தப்³ப³ங். பி⁴க்கா²சாரவத்தேன தண்டு³லாதீ³னி பரியேஸித்வா தா³துங் வட்டதி.
Na kevalañca pāsādaṃ kāretukāmena mañcapīṭhapattaparissāvanadhamakarakacīvarādīni kārāpetukāmenāpi dārulohasuttādīni labhitvā te te sippakārake upasaṅkamitvā vuttanayeneva hatthakammaṃ yācitabbaṃ. Hatthakammayācanavasena ca mūlacchejjāya vā bhattavetanānuppadānena vā laddhampi sabbaṃ gahetabbaṃ. Sace pana kātuṃ na icchanti, bhattavetanaṃ paccāsīsanti, akappiyakahāpaṇādi na dātabbaṃ. Bhikkhācāravattena taṇḍulādīni pariyesitvā dātuṃ vaṭṭati.
ஹத்த²கம்மவஸேன பத்தங் காரெத்வா ததே²வ பாசெத்வா நவபக்கஸ்ஸ பத்தஸ்ஸ புஞ்ச²னதேலத்தா²ய அந்தோகா³மங் பவிட்டே²ன ‘‘பி⁴க்கா²ய ஆக³தோ’’தி ஸல்லக்கெ²த்வா யாகு³யா வா ப⁴த்தே வா ஆனீதே ஹத்தே²ன பத்தோ பிதா⁴தப்³போ³. ஸசே உபாஸிகா ‘‘கிங், ப⁴ந்தே’’தி புச்ச²தி, ‘‘நவபக்கோ பத்தோ புஞ்ச²னதேலேன அத்தோ²’’தி வத்தப்³ப³ங். ஸசே ஸா ‘‘தே³ஹி, ப⁴ந்தே’’தி பத்தங் க³ஹெத்வா தேலேன புஞ்சி²த்வா யாகு³யா வா ப⁴த்தஸ்ஸ வா பூரெத்வா தே³தி, விஞ்ஞத்தி நாம ந ஹோதி, க³ஹேதுங் வட்டதீதி.
Hatthakammavasena pattaṃ kāretvā tatheva pācetvā navapakkassa pattassa puñchanatelatthāya antogāmaṃ paviṭṭhena ‘‘bhikkhāya āgato’’ti sallakkhetvā yāguyā vā bhatte vā ānīte hatthena patto pidhātabbo. Sace upāsikā ‘‘kiṃ, bhante’’ti pucchati, ‘‘navapakko patto puñchanatelena attho’’ti vattabbaṃ. Sace sā ‘‘dehi, bhante’’ti pattaṃ gahetvā telena puñchitvā yāguyā vā bhattassa vā pūretvā deti, viññatti nāma na hoti, gahetuṃ vaṭṭatīti.
பி⁴க்கூ² பகே³வ பிண்டா³ய சரித்வா ஆஸனஸாலங் க³ந்த்வா ஆஸனங் அபஸ்ஸந்தா திட்ட²ந்தி. தத்ர சே உபாஸகா பி⁴க்கூ² டி²தே தி³ஸ்வா ஸயமேவ ஆஸனானி ஆஹராபெந்தி, நிஸீதி³த்வா க³ச்ச²ந்தேஹி ஆபுச்சி²த்வா க³ந்தப்³ப³ங். அனாபுச்சா² க³தானம்பி நட்ட²ங் கீ³வா ந ஹோதி, ஆபுச்சி²த்வா க³மனங் பன வத்தங். ஸசே பி⁴க்கூ²ஹி ‘‘ஆஸனானி ஆஹரதா²’’தி வுத்தேஹி ஆஹடானி ஹொந்தி, ஆபுச்சி²த்வாவ க³ந்தப்³ப³ங். அனாபுச்சா² க³தானங் வத்தபே⁴தோ³ ச நட்ட²ஞ்ச கீ³வாதி. அத்த²ரணகோஜவாதீ³ஸுபி ஏஸேவ நயோ.
Bhikkhū pageva piṇḍāya caritvā āsanasālaṃ gantvā āsanaṃ apassantā tiṭṭhanti. Tatra ce upāsakā bhikkhū ṭhite disvā sayameva āsanāni āharāpenti, nisīditvā gacchantehi āpucchitvā gantabbaṃ. Anāpucchā gatānampi naṭṭhaṃ gīvā na hoti, āpucchitvā gamanaṃ pana vattaṃ. Sace bhikkhūhi ‘‘āsanāni āharathā’’ti vuttehi āhaṭāni honti, āpucchitvāva gantabbaṃ. Anāpucchā gatānaṃ vattabhedo ca naṭṭhañca gīvāti. Attharaṇakojavādīsupi eseva nayo.
மக்கி²காயோ ப³ஹுகா ஹொந்தி, ‘‘மக்கி²காபீ³ஜனிங் ஆஹரதா²’’தி வத்தப்³ப³ங். புசிமந்த³ஸாகா²தீ³னி ஆஹரந்தி, கப்பியங் காராபெத்வா படிக்³க³ஹேதப்³பா³னி. ஆஸனஸாலாய உத³கபா⁴ஜனங் ரித்தங் ஹோதி, ‘‘த⁴மகரணங் க³ண்ஹா’’தி ந வத்தப்³ப³ங். த⁴மகரகஞ்ஹி ரித்தபா⁴ஜனே பக்கி²பந்தோ பி⁴ந்தெ³ய்ய ‘‘நதி³ங் வா தளாகங் வா க³ந்த்வா பன உத³கங் ஆஹரா’’தி வத்துங் வட்டதி. ‘‘கே³ஹதோ ஆஹரா’’தி நேவ வத்துங் வட்டதி, ந ஆஹடங் பரிபு⁴ஞ்ஜிதப்³ப³ங். ஆஸனஸாலாயங் வா அரஞ்ஞகே வா ப⁴த்தகிச்சங் கரொந்தேஹி தத்த²ஜாதகங் அனஜ்ஜா²வுத்த²கங் யங்கிஞ்சி உத்தரிப⁴ங்கா³ரஹங் பத்தங் வா ப²லங் வா ஸசே கிஞ்சி கம்மங் கரொந்தங் ஆஹராபேதி, ஹத்த²கம்மவஸேன ஆஹராபெத்வா பரிபு⁴ஞ்ஜிதுங் வட்டதி. அலஜ்ஜீஹி பன பி⁴க்கூ²ஹி வா ஸாமணேரேஹி வா ஹத்த²கம்மங் ந காரேதப்³ப³ங். அயங் தாவ புரிஸத்த²கரே நயோ.
Makkhikāyo bahukā honti, ‘‘makkhikābījaniṃ āharathā’’ti vattabbaṃ. Pucimandasākhādīni āharanti, kappiyaṃ kārāpetvā paṭiggahetabbāni. Āsanasālāya udakabhājanaṃ rittaṃ hoti, ‘‘dhamakaraṇaṃ gaṇhā’’ti na vattabbaṃ. Dhamakarakañhi rittabhājane pakkhipanto bhindeyya ‘‘nadiṃ vā taḷākaṃ vā gantvā pana udakaṃ āharā’’ti vattuṃ vaṭṭati. ‘‘Gehato āharā’’ti neva vattuṃ vaṭṭati, na āhaṭaṃ paribhuñjitabbaṃ. Āsanasālāyaṃ vā araññake vā bhattakiccaṃ karontehi tatthajātakaṃ anajjhāvutthakaṃ yaṃkiñci uttaribhaṅgārahaṃ pattaṃ vā phalaṃ vā sace kiñci kammaṃ karontaṃ āharāpeti, hatthakammavasena āharāpetvā paribhuñjituṃ vaṭṭati. Alajjīhi pana bhikkhūhi vā sāmaṇerehi vā hatthakammaṃ na kāretabbaṃ. Ayaṃ tāva purisatthakare nayo.
கோ³ணங் பன அஞ்ஞாதகஅப்பவாரிதட்டா²னதோ ஆஹராபேதுங் ந வட்டதி, ஆஹராபெந்தஸ்ஸ து³க்கடங். ஞாதிபவாரிதட்டா²னதோபி மூலச்சே²ஜ்ஜாய யாசிதுங் ந வட்டதி, தாவகாலிகனயேன ஸப்³ப³த்த² வட்டதி. ஏவங் ஆஹராபிதஞ்ச கோ³ணங் ரக்கி²த்வா ஜக்³கி³த்வா ஸாமிகா படிச்சா²பேதப்³பா³. ஸசஸ்ஸ பாதோ³ வா ஸிங்க³ங் வா பி⁴ஜ்ஜதி வா நஸ்ஸதி வா ஸாமிகா சே ஸம்படிச்ச²ந்தி, இச்சேதங் குஸலங். நோ சே ஸம்படிச்ச²ந்தி, கீ³வா ஹோதி. ஸசே ‘‘தும்ஹாகங்யேவ தே³மா’’தி வத³ந்தி ந ஸம்படிச்சி²தப்³ப³ங். ‘‘விஹாரஸ்ஸ தே³மா’’தி வுத்தே பன ‘‘ஆராமிகானங் ஆசிக்க²த² ஜக்³க³னத்தா²யா’’தி வத்தப்³ப³ங்.
Goṇaṃ pana aññātakaappavāritaṭṭhānato āharāpetuṃ na vaṭṭati, āharāpentassa dukkaṭaṃ. Ñātipavāritaṭṭhānatopi mūlacchejjāya yācituṃ na vaṭṭati, tāvakālikanayena sabbattha vaṭṭati. Evaṃ āharāpitañca goṇaṃ rakkhitvā jaggitvā sāmikā paṭicchāpetabbā. Sacassa pādo vā siṅgaṃ vā bhijjati vā nassati vā sāmikā ce sampaṭicchanti, iccetaṃ kusalaṃ. No ce sampaṭicchanti, gīvā hoti. Sace ‘‘tumhākaṃyeva demā’’ti vadanti na sampaṭicchitabbaṃ. ‘‘Vihārassa demā’’ti vutte pana ‘‘ārāmikānaṃ ācikkhatha jagganatthāyā’’ti vattabbaṃ.
‘‘ஸகடங் தே³தா²’’திபி அஞ்ஞாதகஅப்பவாரிதே வத்துங் ந வட்டதி, விஞ்ஞத்திஏவ ஹோதி து³க்கடங் ஆபஜ்ஜதி. ஞாதிபவாரிதட்டா²னே பன வட்டதி, தாவகாலிகங் வட்டதி கம்மங் கத்வா புன தா³தப்³ப³ங். ஸசே நேமியாதீ³னி பி⁴ஜ்ஜந்தி பாகதிகானி கத்வா தா³தப்³ப³ங். நட்டே² கீ³வா ஹோதி. ‘‘தும்ஹாகமேவ தே³மா’’தி வுத்தே தா³ருப⁴ண்ட³ங் நாம ஸம்படிச்சி²துங் வட்டதி. ஏஸ நயோ வாஸிப²ரஸுகுடா²ரீகுதா³லனிகா²த³னேஸு. வல்லிஆதீ³ஸு ச பரபரிக்³க³ஹிதேஸு. க³ருப⁴ண்ட³ப்பஹோனகேஸுயேவ ச வல்லிஆதீ³ஸு விஞ்ஞத்தி ஹோதி, ந ததோ ஓரங்.
‘‘Sakaṭaṃ dethā’’tipi aññātakaappavārite vattuṃ na vaṭṭati, viññattieva hoti dukkaṭaṃ āpajjati. Ñātipavāritaṭṭhāne pana vaṭṭati, tāvakālikaṃ vaṭṭati kammaṃ katvā puna dātabbaṃ. Sace nemiyādīni bhijjanti pākatikāni katvā dātabbaṃ. Naṭṭhe gīvā hoti. ‘‘Tumhākameva demā’’ti vutte dārubhaṇḍaṃ nāma sampaṭicchituṃ vaṭṭati. Esa nayo vāsipharasukuṭhārīkudālanikhādanesu. Valliādīsu ca parapariggahitesu. Garubhaṇḍappahonakesuyeva ca valliādīsu viññatti hoti, na tato oraṃ.
அனஜ்ஜா²வுத்த²கங் பன யங்கிஞ்சி ஆஹராபேதுங் வட்டதி. ரக்கி²தகோ³பிதட்டா²னேயேவ ஹி விஞ்ஞத்தி நாம வுச்சதி. ஸா த்³வீஸு பச்சயேஸு ஸப்³பே³ன ஸப்³ப³ங் ந வட்டதி, ஸேனாஸனபச்சயே பன ‘‘ஆஹர தே³ஹீ’’தி விஞ்ஞத்திமத்தமேவ ந வட்டதி , பரிகதோ²பா⁴ஸனிமித்தகம்மானி வட்டந்தி. தத்த² உபோஸதா²கா³ரங் வா போ⁴ஜனஸாலங் வா அஞ்ஞங் வா யங்கிஞ்சி ஸேனாஸனங் இச்ச²தோ ‘‘இமஸ்மிங் வத ஓகாஸே ஏவரூபங் ஸேனாஸனங் காதுங் வட்டதீ’’தி வா ‘‘யுத்த’’ந்தி வா ‘‘அனுரூப’’ந்தி வாதிஆதி³னா நயேன வசனங் பரிகதா² நாம. ‘‘உபாஸகா தும்ஹே குஹிங் வஸதா²’’தி? ‘‘பாஸாதே³, ப⁴ந்தே’’தி. ‘‘கிங் பி⁴க்கூ²னங் பன உபாஸகா பாஸாதோ³ ந வட்டதீ’’தி ஏவமாதி³வசனங் ஓபா⁴ஸோ நாம. மனுஸ்ஸே தி³ஸ்வா ரஜ்ஜுங் பஸாரேதி, கீ²லே ஆகோடாபேதி. ‘‘கிங் இத³ங், ப⁴ந்தே’’தி வுத்தே ‘‘இத⁴ ஆவாஸங் கரிஸ்ஸாமா’’தி ஏவமாதி³கரணங் பன நிமித்தகம்மங் நாம. கி³லானபச்சயே பன விஞ்ஞத்திபி வட்டதி, பகே³வ பரிகதா²தீ³னி.
Anajjhāvutthakaṃ pana yaṃkiñci āharāpetuṃ vaṭṭati. Rakkhitagopitaṭṭhāneyeva hi viññatti nāma vuccati. Sā dvīsu paccayesu sabbena sabbaṃ na vaṭṭati, senāsanapaccaye pana ‘‘āhara dehī’’ti viññattimattameva na vaṭṭati , parikathobhāsanimittakammāni vaṭṭanti. Tattha uposathāgāraṃ vā bhojanasālaṃ vā aññaṃ vā yaṃkiñci senāsanaṃ icchato ‘‘imasmiṃ vata okāse evarūpaṃ senāsanaṃ kātuṃ vaṭṭatī’’ti vā ‘‘yutta’’nti vā ‘‘anurūpa’’nti vātiādinā nayena vacanaṃ parikathā nāma. ‘‘Upāsakā tumhe kuhiṃ vasathā’’ti? ‘‘Pāsāde, bhante’’ti. ‘‘Kiṃ bhikkhūnaṃ pana upāsakā pāsādo na vaṭṭatī’’ti evamādivacanaṃ obhāso nāma. Manusse disvā rajjuṃ pasāreti, khīle ākoṭāpeti. ‘‘Kiṃ idaṃ, bhante’’ti vutte ‘‘idha āvāsaṃ karissāmā’’ti evamādikaraṇaṃ pana nimittakammaṃ nāma. Gilānapaccaye pana viññattipi vaṭṭati, pageva parikathādīni.
மனுஸ்ஸா உபத்³து³தா யாசனாய உபத்³து³தா விஞ்ஞத்தியாதி தேஸங் பி⁴க்கூ²னங் தாய யாசனாய ச விஞ்ஞத்தியா ச பீளிதா. உப்³பி³ஜ்ஜந்திபீதி ‘‘கிங் நு ஆஹராபெஸ்ஸந்தீ’’தி உப்³பே³க³ங் இஞ்ஜனங் சலனங் படிலப⁴ந்தி. உத்தஸந்திபீதி அஹிங் விய தி³ஸ்வா ஸஹஸா தஸித்வா உக்கமந்தி. பலாயந்திபீதி தூ³ரதோவ யேன வா தேன வா பலாயந்தி. அஞ்ஞேனபி க³ச்ச²ந்தீதி யங் மக்³க³ங் படிபன்னா தங் பஹாய நிவத்தித்வா வாமங் வா த³க்கி²ணங் வா க³ஹெத்வா க³ச்ச²ந்தி, த்³வாரம்பி த²கெந்தி.
Manussā upaddutā yācanāya upaddutā viññattiyāti tesaṃ bhikkhūnaṃ tāya yācanāya ca viññattiyā ca pīḷitā. Ubbijjantipīti ‘‘kiṃ nu āharāpessantī’’ti ubbegaṃ iñjanaṃ calanaṃ paṭilabhanti. Uttasantipīti ahiṃ viya disvā sahasā tasitvā ukkamanti. Palāyantipīti dūratova yena vā tena vā palāyanti. Aññenapi gacchantīti yaṃ maggaṃ paṭipannā taṃ pahāya nivattitvā vāmaṃ vā dakkhiṇaṃ vā gahetvā gacchanti, dvārampi thakenti.
344. பூ⁴தபுப்³ப³ங் பி⁴க்க²வேதி இதி ப⁴க³வா தே பி⁴க்கூ² க³ரஹித்வா தத³னுரூபஞ்ச த⁴ம்மிங் கத²ங் கத்வா புனபி விஞ்ஞத்தியா தோ³ஸங் பாகடங் குருமானோ இமினா ‘‘பூ⁴தபுப்³ப³ங் பி⁴க்க²வே’’திஆதி³னா நயேன தீணி வத்தூ²னி த³ஸ்ஸேஸி. தத்த² மணிகண்டோ²தி ஸோ கிர நாக³ராஜா ஸப்³ப³காமத³த³ங் மஹக்³க⁴ங் மணிங் கண்டே² பிலந்தி⁴த்வா சரதி, தஸ்மா ‘‘மணிகண்டோ²’’ த்வேவ பஞ்ஞாயித்த². உபரிமுத்³த⁴னி மஹந்தங் ப²ணங் கரித்வா அட்டா²ஸீதி ஸோ கிர தேஸங் த்³வின்னங் இஸீனங் கனிட்டோ² இஸி மெத்தாவிஹாரீ அஹோஸி, தஸ்மா நாக³ராஜா நதி³தோ உத்தரித்வா தே³வவண்ணங் நிம்மினித்வா தஸ்ஸ ஸந்திகே நிஸீதி³த்வா ஸம்மோத³னீயங் கத²ங் கத்வா தங் தே³வவண்ணங் பஹாய ஸகவண்ணமேவ உபக³ந்த்வா தங் இஸிங் பரிக்கி²பித்வா பஸன்னாகாரங் கரொந்தோ உபரிமுத்³த⁴னி மஹந்தங் ப²ணங் கரித்வா ச²த்தங் விய தா⁴ரயமானோ முஹுத்தங் ட²த்வா பக்கமதி, தேன வுத்தங் ‘‘உபரிமுத்³த⁴னி மஹந்தங் ப²ணங் கரித்வா அட்டா²ஸீ’’தி. மணிமஸ்ஸ கண்டே² பிலந்த⁴னந்தி மணிங் அஸ்ஸ கண்டே² பிலந்தி⁴தங், ஆமுக்கந்தி அத்தோ². ஏகமந்தங் அட்டா²ஸீதி தேன தே³வவண்ணேன ஆக³ந்த்வா தாபஸேன ஸத்³தி⁴ங் ஸம்மோத³மானோ ஏகஸ்மிங் பதே³ஸே அட்டா²ஸி.
344.Bhūtapubbaṃ bhikkhaveti iti bhagavā te bhikkhū garahitvā tadanurūpañca dhammiṃ kathaṃ katvā punapi viññattiyā dosaṃ pākaṭaṃ kurumāno iminā ‘‘bhūtapubbaṃ bhikkhave’’tiādinā nayena tīṇi vatthūni dassesi. Tattha maṇikaṇṭhoti so kira nāgarājā sabbakāmadadaṃ mahagghaṃ maṇiṃ kaṇṭhe pilandhitvā carati, tasmā ‘‘maṇikaṇṭho’’ tveva paññāyittha. Uparimuddhani mahantaṃ phaṇaṃ karitvā aṭṭhāsīti so kira tesaṃ dvinnaṃ isīnaṃ kaniṭṭho isi mettāvihārī ahosi, tasmā nāgarājā nadito uttaritvā devavaṇṇaṃ nimminitvā tassa santike nisīditvā sammodanīyaṃ kathaṃ katvā taṃ devavaṇṇaṃ pahāya sakavaṇṇameva upagantvā taṃ isiṃ parikkhipitvā pasannākāraṃ karonto uparimuddhani mahantaṃ phaṇaṃ karitvā chattaṃ viya dhārayamāno muhuttaṃ ṭhatvā pakkamati, tena vuttaṃ ‘‘uparimuddhani mahantaṃ phaṇaṃ karitvā aṭṭhāsī’’ti. Maṇimassa kaṇṭhe pilandhananti maṇiṃ assa kaṇṭhe pilandhitaṃ, āmukkanti attho. Ekamantaṃ aṭṭhāsīti tena devavaṇṇena āgantvā tāpasena saddhiṃ sammodamāno ekasmiṃ padese aṭṭhāsi.
மமன்னபானந்தி மம அன்னஞ்ச பானஞ்ச. விபுலந்தி ப³ஹுலங். உளாரந்தி பணீதங் . அதியாசகோஸீதி அதிவிய யாசகோ, அஸி புனப்புனங் யாசஸீதி வுத்தங் ஹோதி. ஸுஸூதி தருணோ, தா²மஸம்பன்னோ யொப்³ப³னப்பத்தபுரிஸோ. ஸக்க²ரா வுச்சதி காளஸிலா, தத்த² தோ⁴தோ அஸி ‘‘ஸக்க²ரதோ⁴தோ நாமா’’தி வுச்சதி, ஸக்க²ரதோ⁴தோ பாணிம்ஹி அஸ்ஸாதி ஸக்க²ரதோ⁴தபாணி, பாஸாணே தோ⁴தனிஸிதக²க்³க³ஹத்தோ²தி அத்தோ². யதா² ஸோ அஸிஹத்தோ² புரிஸோ தாஸெய்ய, ஏவங் தாஸேஸி மங் ஸேலங் யாசமானோ, மணிங் யாசந்தோதி அத்தோ².
Mamannapānanti mama annañca pānañca. Vipulanti bahulaṃ. Uḷāranti paṇītaṃ . Atiyācakosīti ativiya yācako, asi punappunaṃ yācasīti vuttaṃ hoti. Susūti taruṇo, thāmasampanno yobbanappattapuriso. Sakkharā vuccati kāḷasilā, tattha dhoto asi ‘‘sakkharadhoto nāmā’’ti vuccati, sakkharadhoto pāṇimhi assāti sakkharadhotapāṇi, pāsāṇe dhotanisitakhaggahatthoti attho. Yathā so asihattho puriso tāseyya, evaṃ tāsesi maṃ selaṃ yācamāno, maṇiṃ yācantoti attho.
ந தங் யாசேதி தங் ந யாசெய்ய. கதரங்? யஸ்ஸ பியங் ஜிகீ³ஸேதி யங் அஸ்ஸ ஸத்தஸ்ஸ பியந்தி ஜானெய்ய.
Na taṃ yāceti taṃ na yāceyya. Kataraṃ? Yassa piyaṃ jigīseti yaṃ assa sattassa piyanti jāneyya.
கிமங்க³ங் பன மனுஸ்ஸபூ⁴தானந்தி மனுஸ்ஸபூ⁴தானங் அமனாபாதி கிமேவெத்த² வத்தப்³ப³ங்.
Kimaṅgaṃ pana manussabhūtānanti manussabhūtānaṃ amanāpāti kimevettha vattabbaṃ.
345. ஸகுணஸங்க⁴ஸ்ஸ ஸத்³தே³ன உப்³பா³ள்ஹோதி ஸோ கிர ஸகுணஸங்கோ⁴ பட²மயாமஞ்ச பச்சி²மயாமஞ்ச நிரந்தரங் ஸத்³த³மேவ கரோதி, ஸோ பி⁴க்கு² தேன ஸத்³தே³ன பீளிதோ ஹுத்வா ப⁴க³வதோ ஸந்திகங் அக³மாஸி. தேனாஹ – ‘‘யேனாஹங் தேனுபஸங்கமீ’’தி.
345.Sakuṇasaṅghassa saddena ubbāḷhoti so kira sakuṇasaṅgho paṭhamayāmañca pacchimayāmañca nirantaraṃ saddameva karoti, so bhikkhu tena saddena pīḷito hutvā bhagavato santikaṃ agamāsi. Tenāha – ‘‘yenāhaṃ tenupasaṅkamī’’ti.
குதோ ச த்வங் பி⁴க்கு² ஆக³ச்ச²ஸீதி எத்த² நிஸின்னோ ஸோ பி⁴க்கு² ந ஆக³ச்ச²தி வத்தமானஸமீபே பன ஏவங் வத்துங் லப்³ப⁴தி. தேனாஹ – ‘‘குதோ ச த்வங் பி⁴க்கு² ஆக³ச்ச²ஸீ’’தி, குதோ ஆக³தோஸீதி அத்தோ². ததோ அஹங் ப⁴க³வா ஆக³ச்சா²மீதி எத்தா²பி ஸோ ஏவ நயோ. உப்³பா³ள்ஹோதி பீளிதோ, உக்கண்டா²பிதோ ஹுத்வாதி அத்தோ².
Kuto ca tvaṃ bhikkhu āgacchasīti ettha nisinno so bhikkhu na āgacchati vattamānasamīpe pana evaṃ vattuṃ labbhati. Tenāha – ‘‘kuto ca tvaṃ bhikkhu āgacchasī’’ti, kuto āgatosīti attho. Tato ahaṃ bhagavā āgacchāmīti etthāpi so eva nayo. Ubbāḷhoti pīḷito, ukkaṇṭhāpito hutvāti attho.
ஸோ ஸகுணஸங்கோ⁴ ‘‘பி⁴க்கு² பத்தங் யாசதீ’’தி எத்த² ந தே ஸகுணா பி⁴க்கு²னோ வசனங் ஜானந்தி, ப⁴க³வா பன அத்தனோ ஆனுபா⁴வேன யதா² ஜானந்தி ததா² அகாஸி.
So sakuṇasaṅgho ‘‘bhikkhu pattaṃ yācatī’’ti ettha na te sakuṇā bhikkhuno vacanaṃ jānanti, bhagavā pana attano ānubhāvena yathā jānanti tathā akāsi.
346. அபாஹங் தே ந ஜானாமீதி அபி அஹங் தே ஜனே ‘‘கே வா இமே, கஸ்ஸ வா இமே’’தி ந ஜானாமி. ஸங்க³ம்ம யாசந்தீதி ஸமாக³ந்த்வா வக்³க³வக்³கா³ ஹுத்வா யாசந்தி. யாசகோ அப்பியோ ஹோதீதி யோ யாசதி ஸோ அப்பியோ ஹோதி. யாசங் அத³த³மப்பியோதி யாசந்தி யாசிதங் வுச்சதி, யாசிதமத்த²ங் அத³த³ந்தோபி அப்பியோ ஹோதி. அத² வா யாசந்தி யாசந்தஸ்ஸ, அத³த³மப்பியோதி அதெ³ந்தோ அப்பியோ ஹோதி. மா மே விதெ³ஸ்ஸனா அஹூதி மா மே அப்பியபா⁴வோ அஹு, அஹங் வா தவ, த்வங் வா மம விதெ³ஸ்ஸோ அப்பியோ மா அஹோஸீதி அத்தோ².
346.Apāhaṃ te na jānāmīti api ahaṃ te jane ‘‘ke vā ime, kassa vā ime’’ti na jānāmi. Saṅgamma yācantīti samāgantvā vaggavaggā hutvā yācanti. Yācako appiyo hotīti yo yācati so appiyo hoti. Yācaṃ adadamappiyoti yācanti yācitaṃ vuccati, yācitamatthaṃ adadantopi appiyo hoti. Atha vā yācanti yācantassa, adadamappiyoti adento appiyo hoti. Mā me videssanā ahūti mā me appiyabhāvo ahu, ahaṃ vā tava, tvaṃ vā mama videsso appiyo mā ahosīti attho.
347. து³ஸ்ஸங்ஹரானீதி கஸிகோ³ரக்கா²தீ³ஹி உபாயேஹி து³க்கே²ன ஸங்ஹரணீயானி.
347.Dussaṃharānīti kasigorakkhādīhi upāyehi dukkhena saṃharaṇīyāni.
348-9. ஸஞ்ஞாசிகாய பன பி⁴க்கு²னாதி எத்த² ஸஞ்ஞாசிகா நாம ஸயங் பவத்திதயாசனா வுச்சதி, தஸ்மா ‘‘ஸஞ்ஞாசிகாயா’’தி அத்தனோ யாசனாயாதி வுத்தங் ஹோதி, ஸயங் யாசிதகேஹி உபகரணேஹீதி அத்தோ². யஸ்மா பன ஸா ஸயங்யாசிதகேஹி கயிரமானா ஸயங் யாசித்வா கயிரமானா ஹோதி, தஸ்மா தங் அத்த²பரியாயங் த³ஸ்ஸேதுங் ‘‘ஸயங் யாசித்வா புரிஸம்பீ’’தி ஏவமஸ்ஸ பத³பா⁴ஜனங் வுத்தங்.
348-9.Saññācikāya pana bhikkhunāti ettha saññācikā nāma sayaṃ pavattitayācanā vuccati, tasmā ‘‘saññācikāyā’’ti attano yācanāyāti vuttaṃ hoti, sayaṃ yācitakehi upakaraṇehīti attho. Yasmā pana sā sayaṃyācitakehi kayiramānā sayaṃ yācitvā kayiramānā hoti, tasmā taṃ atthapariyāyaṃ dassetuṃ ‘‘sayaṃ yācitvā purisampī’’ti evamassa padabhājanaṃ vuttaṃ.
உல்லித்தாதி அந்தோலித்தா. அவலித்தாதி ப³ஹிலித்தா. உல்லித்தாவலித்தாதி அந்தரபா³ஹிரலித்தாதி வுத்தங் ஹோதி.
Ullittāti antolittā. Avalittāti bahilittā. Ullittāvalittāti antarabāhiralittāti vuttaṃ hoti.
காரயமானேனாதி இமஸ்ஸ பத³பா⁴ஜனே ‘‘காராபெந்தேனா’’தி எத்தகமேவ வத்தப்³ப³ங் ஸியா, ஏவஞ்ஹி ப்³யஞ்ஜனங் ஸமேதி. யஸ்மா பன ஸஞ்ஞாசிகாய குடிங் கரொந்தேனாபி இத⁴ வுத்தனயேனேவ படிபஜ்ஜிதப்³ப³ங், தஸ்மா கரொந்தோ வா ஹோது காராபெந்தோ வா உபோ⁴பேதே ‘‘காரயமானேனா’’தி இமினாவ பதே³ன ஸங்க³ஹிதாதி ஏதமத்த²ங் த³ஸ்ஸேதுங் ‘‘கரொந்தோ வா காராபெந்தோ வா’’தி வுத்தங். யதி³ பன கரொந்தேன வா காராபெந்தேன வாதி வதெ³ய்ய, ப்³யஞ்ஜனங் விலோமிதங் ப⁴வெய்ய, ந ஹி காராபெந்தோ கரொந்தோ நாம ஹோதி, தஸ்மா அத்த²மத்தமேவெத்த² த³ஸ்ஸிதந்தி வேதி³தப்³ப³ங்.
Kārayamānenāti imassa padabhājane ‘‘kārāpentenā’’ti ettakameva vattabbaṃ siyā, evañhi byañjanaṃ sameti. Yasmā pana saññācikāya kuṭiṃ karontenāpi idha vuttanayeneva paṭipajjitabbaṃ, tasmā karonto vā hotu kārāpento vā ubhopete ‘‘kārayamānenā’’ti imināva padena saṅgahitāti etamatthaṃ dassetuṃ ‘‘karonto vā kārāpento vā’’ti vuttaṃ. Yadi pana karontena vā kārāpentena vāti vadeyya, byañjanaṃ vilomitaṃ bhaveyya, na hi kārāpento karonto nāma hoti, tasmā atthamattamevettha dassitanti veditabbaṃ.
அத்துத்³தே³ஸந்தி ‘‘மய்ஹங் ஏஸா’’தி ஏவங் அத்தா உத்³தே³ஸோ அஸ்ஸாதி அத்துத்³தே³ஸா, தங் அத்துத்³தே³ஸங். யஸ்மா பன யஸ்ஸா அத்தா உத்³தே³ஸோ ஸா அத்தனோ அத்தா²ய ஹோதி, தஸ்மா அத்த²பரியாயங் த³ஸ்ஸெந்தோ ‘‘அத்துத்³தே³ஸந்தி அத்தனோ அத்தா²யா’’தி ஆஹ. பமாணிகா காரேதப்³பா³தி பமாணயுத்தா காரேதப்³பா³. தத்ரித³ங் பமாணந்தி தஸ்ஸா குடியா இத³ங் பமாணங். ஸுக³தவித³த்தி²யாதி ஸுக³தவித³த்தி² நாம இதா³னி மஜ்ஜி²மஸ்ஸ புரிஸஸ்ஸ திஸ்ஸோ வித³த்தி²யோ வட்³ட⁴கீஹத்தே²ன தி³யட்³டோ⁴ ஹத்தோ² ஹோதி. பா³ஹிரிமேன மானேனாதி குடியா ப³ஹிகுட்டமானேன த்³வாத³ஸ வித³த்தி²யோ, மினந்தேன பன ஸப்³ப³பட²மங் தி³ன்னோ மஹாமத்திகபரியந்தோ ந க³ஹேதப்³போ³. து²ஸபிண்ட³பரியந்தேன மினிதப்³ப³ங். து²ஸபிண்ட³ஸ்ஸஉபரி ஸேதகம்மங் அப்³போ³ஹாரிகங். ஸசே து²ஸபிண்டே³ன அனத்தி²கோ மஹாமத்திகாய ஏவ நிட்டா²பேதி, மஹாமத்திகாவ பரிச்சே²தோ³.
Attuddesanti ‘‘mayhaṃ esā’’ti evaṃ attā uddeso assāti attuddesā, taṃ attuddesaṃ. Yasmā pana yassā attā uddeso sā attano atthāya hoti, tasmā atthapariyāyaṃ dassento ‘‘attuddesanti attano atthāyā’’ti āha. Pamāṇikā kāretabbāti pamāṇayuttā kāretabbā. Tatridaṃ pamāṇanti tassā kuṭiyā idaṃ pamāṇaṃ. Sugatavidatthiyāti sugatavidatthi nāma idāni majjhimassa purisassa tisso vidatthiyo vaḍḍhakīhatthena diyaḍḍho hattho hoti. Bāhirimena mānenāti kuṭiyā bahikuṭṭamānena dvādasa vidatthiyo, minantena pana sabbapaṭhamaṃ dinno mahāmattikapariyanto na gahetabbo. Thusapiṇḍapariyantena minitabbaṃ. Thusapiṇḍassaupari setakammaṃ abbohārikaṃ. Sace thusapiṇḍena anatthiko mahāmattikāya eva niṭṭhāpeti, mahāmattikāva paricchedo.
திரியந்தி வித்தா²ரதோ. ஸத்தாதி ஸத்த ஸுக³தவித³த்தி²யோ. அந்தராதி இமஸ்ஸ பன அயங் நித்³தே³ஸோ , ‘‘அப்³ப⁴ந்தரிமேன மானேனா’’தி, குட்டஸ்ஸ ப³ஹி அந்தங் அக்³க³ஹெத்வா அப்³ப⁴ந்தரிமேன அந்தேன மினியமானே திரியங் ஸத்த ஸுக³தவித³த்தி²யோ பமாணந்தி வுத்தங் ஹோதி.
Tiriyanti vitthārato. Sattāti satta sugatavidatthiyo. Antarāti imassa pana ayaṃ niddeso , ‘‘abbhantarimena mānenā’’ti, kuṭṭassa bahi antaṃ aggahetvā abbhantarimena antena miniyamāne tiriyaṃ satta sugatavidatthiyo pamāṇanti vuttaṃ hoti.
யோ பன லேஸங் ஒட்³டெ³ந்தோ யதா²வுத்தப்பமாணமேவ கரிஸ்ஸாமீதி தீ³க⁴தோ ஏகாத³ஸ வித³த்தி²யோ திரியங் அட்ட² வித³த்தி²யோ, தீ³க⁴தோ வா தேரஸ வித³த்தி²யோ திரியங் ச² வித³த்தி²யோ கரெய்ய, ந வட்டதி. ஏகதோபா⁴கே³ன அதிக்கந்தம்பி ஹி பமாணங் அதிக்கந்தமேவ ஹோதி. திட்ட²து வித³த்தி², கேஸக்³க³மத்தம்பி தீ³க⁴தோ வா ஹாபெத்வா திரியங் திரியதோ வா ஹாபெத்வா தீ³க⁴ங் வட்³டே⁴துங் ந வட்டதி, கோ பன வாதோ³ உப⁴தோ வட்³ட⁴னே? வுத்தஞ்ஹேதங் – ‘‘ஆயாமதோ வா வித்தா²ரதோ வா அந்தமஸோ கேஸக்³க³மத்தம்பி அதிக்கமித்வா கரோதி வா காராபேதி வா பயோகே³ து³க்கட’’ந்திஆதி³ (பாரா॰ 353). யதா²வுத்தப்பமாணா ஏவ பன வட்டதி. யா பன தீ³க⁴தோ ஸட்டி²ஹத்தா²பி ஹோதி திரியங் திஹத்தா² வா ஊனகசதுஹத்தா² வா யத்த² பமாணயுத்தோ மஞ்சோ இதோ சிதோ ச ந பரிவத்ததி, அயங் குடீதி ஸங்க்²யங் ந க³ச்ச²தி, தஸ்மா அயம்பி வட்டதி. மஹாபச்சரியங் பன பச்சி²மகோடியா சதுஹத்த²வித்தா²ரா வுத்தா, ததோ ஹெட்டா² அகுடி. பமாணிகாபி பன அதே³ஸிதவத்து²கா வா ஸாரம்பா⁴ வா அபரிக்கமனா வா ந வட்டதி. பமாணிகா தே³ஸிதவத்து²கா அனாரம்பா⁴ ஸபரிக்கமனாவ வட்டதி. பமாணதோ ஊனதரம்பி சதுஹத்த²ங் பஞ்சஹத்த²ம்பி கரொந்தேன தே³ஸிதவத்து²காவ காரேதப்³பா³. பமாணாதிக்கந்தஞ்ச பன கரொந்தோ லேபபரியோஸானே க³ருகங் ஆபத்திங் ஆபஜ்ஜதி.
Yo pana lesaṃ oḍḍento yathāvuttappamāṇameva karissāmīti dīghato ekādasa vidatthiyo tiriyaṃ aṭṭha vidatthiyo, dīghato vā terasa vidatthiyo tiriyaṃ cha vidatthiyo kareyya, na vaṭṭati. Ekatobhāgena atikkantampi hi pamāṇaṃ atikkantameva hoti. Tiṭṭhatu vidatthi, kesaggamattampi dīghato vā hāpetvā tiriyaṃ tiriyato vā hāpetvā dīghaṃ vaḍḍhetuṃ na vaṭṭati, ko pana vādo ubhato vaḍḍhane? Vuttañhetaṃ – ‘‘āyāmato vā vitthārato vā antamaso kesaggamattampi atikkamitvā karoti vā kārāpeti vā payoge dukkaṭa’’ntiādi (pārā. 353). Yathāvuttappamāṇā eva pana vaṭṭati. Yā pana dīghato saṭṭhihatthāpi hoti tiriyaṃ tihatthā vā ūnakacatuhatthā vā yattha pamāṇayutto mañco ito cito ca na parivattati, ayaṃ kuṭīti saṅkhyaṃ na gacchati, tasmā ayampi vaṭṭati. Mahāpaccariyaṃ pana pacchimakoṭiyā catuhatthavitthārā vuttā, tato heṭṭhā akuṭi. Pamāṇikāpi pana adesitavatthukā vā sārambhā vā aparikkamanā vā na vaṭṭati. Pamāṇikā desitavatthukā anārambhā saparikkamanāva vaṭṭati. Pamāṇato ūnatarampi catuhatthaṃ pañcahatthampi karontena desitavatthukāva kāretabbā. Pamāṇātikkantañca pana karonto lepapariyosāne garukaṃ āpattiṃ āpajjati.
தத்த² லேபோ ச அலேபோ ச லேபோகாஸோ ச அலேபோகாஸோ ச வேதி³தப்³போ³. ஸெய்யதி²த³ங் – லேபோதி த்³வே லேபா – மத்திகாலேபோ ச ஸுதா⁴லேபோ ச. ட²பெத்வா பன இமே த்³வே லேபே அவஸேஸோ ப⁴ஸ்மகோ³மயாதி³பே⁴தோ³ லேபோ, அலேபோ. ஸசேபி கலலலேபோ ஹோதி, அலபோ ஏவ. லேபோகாஸோதி பி⁴த்தியோ சேவ ச²த³னஞ்ச, ட²பெத்வா பன பி⁴த்திச்ச²த³னே அவஸேஸோ த²ம்ப⁴துலாபிட்ட²ஸங்கா⁴டவாதபானதூ⁴மச்சி²த்³தா³தி³ அலேபாரஹோ ஓகாஸோ ஸப்³போ³பி அலேபோகாஸோதி வேதி³தப்³போ³.
Tattha lepo ca alepo ca lepokāso ca alepokāso ca veditabbo. Seyyathidaṃ – lepoti dve lepā – mattikālepo ca sudhālepo ca. Ṭhapetvā pana ime dve lepe avaseso bhasmagomayādibhedo lepo, alepo. Sacepi kalalalepo hoti, alapo eva. Lepokāsoti bhittiyo ceva chadanañca, ṭhapetvā pana bhitticchadane avaseso thambhatulāpiṭṭhasaṅghāṭavātapānadhūmacchiddādi alepāraho okāso sabbopi alepokāsoti veditabbo.
பி⁴க்கூ² அபி⁴னேதப்³பா³ வத்து²தே³ஸனாயாதி யஸ்மிங் டா²னே குடிங் காரேதுகாமோ ஹோதி, தத்த² வத்து²தே³ஸனத்தா²ய பி⁴க்கூ² நேதப்³பா³. தேன குடிகாரகேனாதிஆதி³ பன யேன விதி⁴னா தே பி⁴க்கூ² அபி⁴னேதப்³பா³, தஸ்ஸ த³ஸ்ஸனத்த²ங் வுத்தங். தத்த² குடிவத்து²ங் ஸோதெ⁴த்வாதி ந விஸமங் அரஞ்ஞங் பி⁴க்கூ² க³ஹெத்வா க³ந்தப்³ப³ங் , குடிவத்து²ங் பன பட²மமேவ ஸோதெ⁴த்வா ஸமதலங் ஸீமமண்ட³லஸதி³ஸங் கத்வா பச்சா² ஸங்க⁴ங் உபஸங்கமித்வா யாசித்வா நேதப்³பா³தி த³ஸ்ஸேதி. ஏவமஸ்ஸ வசனீயோதி ஸங்கோ⁴ ஏவங் வத்தப்³போ³ அஸ்ஸ. பரதோ பன ‘‘து³தியம்பி யாசிதப்³பா³’’தி பி⁴க்கூ² ஸந்தா⁴ய ப³ஹுவசனங் வுத்தங். நோ சே ஸப்³போ³ ஸங்கோ⁴ உஸ்ஸஹதீதி ஸசே ஸப்³போ³ ஸங்கோ⁴ ந இச்ச²தி, ஸஜ்ஜா²யமனஸிகாராதீ³ஸு உய்யுத்தா தே தே பி⁴க்கூ² ஹொந்தி. ஸாரம்ப⁴ங் அனாரம்ப⁴ந்தி ஸஉபத்³த³வங் அனுபத்³த³வங். ஸபரிக்கமனங் அபரிக்கமனந்தி ஸஉபசாரங் அனுபசாரங்.
Bhikkhū abhinetabbā vatthudesanāyāti yasmiṃ ṭhāne kuṭiṃ kāretukāmo hoti, tattha vatthudesanatthāya bhikkhū netabbā. Tena kuṭikārakenātiādi pana yena vidhinā te bhikkhū abhinetabbā, tassa dassanatthaṃ vuttaṃ. Tattha kuṭivatthuṃ sodhetvāti na visamaṃ araññaṃ bhikkhū gahetvā gantabbaṃ , kuṭivatthuṃ pana paṭhamameva sodhetvā samatalaṃ sīmamaṇḍalasadisaṃ katvā pacchā saṅghaṃ upasaṅkamitvā yācitvā netabbāti dasseti. Evamassa vacanīyoti saṅgho evaṃ vattabbo assa. Parato pana ‘‘dutiyampi yācitabbā’’ti bhikkhū sandhāya bahuvacanaṃ vuttaṃ. No ce sabbo saṅgho ussahatīti sace sabbo saṅgho na icchati, sajjhāyamanasikārādīsu uyyuttā te te bhikkhū honti. Sārambhaṃ anārambhanti saupaddavaṃ anupaddavaṃ. Saparikkamanaṃ aparikkamananti saupacāraṃ anupacāraṃ.
பத்தகல்லந்தி பத்தோ காலோ இமஸ்ஸ ஓலோகனஸ்ஸாதி பத்தகாலங், பத்தகாலமேவ பத்தகல்லங். இத³ஞ்ச வத்து²ங்ஓலோகனத்தா²ய ஸம்முதிகம்மங் அனுஸாவனானயேன ஓலோகெத்வாபி காதுங் வட்டதி. பரதோ பன வத்து²தே³ஸனாகம்மங் யதா²வுத்தாய ஏவ ஞத்தியா ச அனுஸாவனாய ச காதப்³ப³ங், ஓலோகெத்வா காதுங் ந வட்டதி.
Pattakallanti patto kālo imassa olokanassāti pattakālaṃ, pattakālameva pattakallaṃ. Idañca vatthuṃolokanatthāya sammutikammaṃ anusāvanānayena oloketvāpi kātuṃ vaṭṭati. Parato pana vatthudesanākammaṃ yathāvuttāya eva ñattiyā ca anusāvanāya ca kātabbaṃ, oloketvā kātuṃ na vaṭṭati.
353. கிபில்லிகானந்தி ரத்தகாளபிங்க³லாதி³பே⁴தா³னங் யாஸங் காஸஞ்சி கிபில்லிகானங். கிபீல்லகானந்திபி பாடோ². ஆஸயோதி நிப³த்³த⁴வஸனட்டா²னங், யதா² ச கிபில்லிகானங் ஏவங் உபசிகாதீ³னம்பி நிப³த்³த⁴வஸனட்டா²னங்யேவ ஆஸயோ வேதி³தப்³போ³. யத்த² பன தே கோ³சரத்தா²ய ஆக³ந்த்வா க³ச்ச²ந்தி, ஸப்³பே³ஸம்பி தாதி³ஸோ ஸஞ்சரணப்பதே³ஸோ அவாரிதோ, தஸ்மா தத்த² அபனெத்வா ஸோதெ⁴த்வா காதுங் வட்டதி. இமானி தாவ ச² டா²னானிஸத்தானுத்³த³யாய படிக்கி²த்தானி.
353.Kipillikānanti rattakāḷapiṅgalādibhedānaṃ yāsaṃ kāsañci kipillikānaṃ. Kipīllakānantipi pāṭho. Āsayoti nibaddhavasanaṭṭhānaṃ, yathā ca kipillikānaṃ evaṃ upacikādīnampi nibaddhavasanaṭṭhānaṃyeva āsayo veditabbo. Yattha pana te gocaratthāya āgantvā gacchanti, sabbesampi tādiso sañcaraṇappadeso avārito, tasmā tattha apanetvā sodhetvā kātuṃ vaṭṭati. Imāni tāva cha ṭhānānisattānuddayāya paṭikkhittāni.
ஹத்தீ²னங் வாதி ஹத்தீ²னங் பன நிப³த்³த⁴வஸனட்டா²னம்பி நிப³த்³த⁴கோ³சரட்டா²னம்பி ந வட்டதி, ஸீஹாதீ³னங் ஆஸயோ ச கோ³சராய பக்கமந்தானங் நிப³த்³த⁴க³மனமக்³கோ³ ச ந வட்டதி. ஏதேஸங் கோ³சரபூ⁴மி ந க³ஹிதா. யேஸங் கேஸஞ்சீதி அஞ்ஞேஸம்பி வாளானங் திரச்சா²னக³தானங் . இமானி ஸத்த டா²னானி ஸப்படிப⁴யானி பி⁴க்கூ²னங் ஆரொக்³யத்தா²ய படிக்கி²த்தானி. ஸேஸானி நானாஉபத்³த³வேஹி ஸஉபத்³த³வானி. தத்த² புப்³ப³ண்ணனிஸ்ஸிதந்தி புப்³ப³ண்ணங் நிஸ்ஸிதங் ஸத்தன்னங் த⁴ஞ்ஞானங் விருஹனககெ²த்தஸாமந்தா டி²தங். ஏஸேவ நயோ அபரண்ணனிஸ்ஸிதாதீ³ஸுபி. எத்த² பன அப்³பா⁴கா⁴தந்தி காரணாக⁴ரங் வேரிக⁴ரங், சோரானங் மாரணத்தா²ய கதந்தி குருந்தி³ஆதீ³ஸு.
Hatthīnaṃ vāti hatthīnaṃ pana nibaddhavasanaṭṭhānampi nibaddhagocaraṭṭhānampi na vaṭṭati, sīhādīnaṃ āsayo ca gocarāya pakkamantānaṃ nibaddhagamanamaggo ca na vaṭṭati. Etesaṃ gocarabhūmi na gahitā. Yesaṃ kesañcīti aññesampi vāḷānaṃ tiracchānagatānaṃ . Imāni satta ṭhānāni sappaṭibhayāni bhikkhūnaṃ ārogyatthāya paṭikkhittāni. Sesāni nānāupaddavehi saupaddavāni. Tattha pubbaṇṇanissitanti pubbaṇṇaṃ nissitaṃ sattannaṃ dhaññānaṃ viruhanakakhettasāmantā ṭhitaṃ. Eseva nayo aparaṇṇanissitādīsupi. Ettha pana abbhāghātanti kāraṇāgharaṃ verigharaṃ, corānaṃ māraṇatthāya katanti kurundiādīsu.
ஆகா⁴தனந்தி த⁴ம்மக³ந்தி⁴கா வுச்சதி. ஸுஸானந்தி மஹாஸுஸானங். ஸங்ஸரணந்தி அனிப்³பி³ஜ்ஜ²க³மனீயோ க³தபச்சாக³தமக்³கோ³ வுச்சதி. ஸேஸங் உத்தானமேவ.
Āghātananti dhammagandhikā vuccati. Susānanti mahāsusānaṃ. Saṃsaraṇanti anibbijjhagamanīyo gatapaccāgatamaggo vuccati. Sesaṃ uttānameva.
ந ஸக்கா ஹோதி யதா²யுத்தேன ஸகடேனாதி த்³வீஹி ப³லிப³த்³தே³ஹி யுத்தேன ஸகடேன ஏகங் சக்கங் நிப்³போ³த³கபதனட்டா²னே ஏகங் ப³ஹி கத்வா ஆவிஜ்ஜிதுங் ந ஸக்கா ஹோதி. குருந்தி³யங் பன ‘‘சதூஹி யுத்தேனா’’தி வுத்தங். ஸமந்தா நிஸ்ஸேணியா அனுபரிக³ந்துந்தி நிஸ்ஸேணியங் ட²த்வா கே³ஹங் சா²தெ³ந்தேஹி ந ஸக்கா ஹோதி ஸமந்தா நிஸ்ஸேணியா ஆவிஜ்ஜிதுங். இதி ஏவரூபே ஸாரம்பே⁴ ச அபரிக்கமனே ச டா²னே ந காரேதப்³பா³. அனாரம்பே⁴ பன ஸபரிக்கமனே காரேதப்³பா³, தங் வுத்தபடிபக்க²னயேன பாளியங் ஆக³தமேவ.
Na sakkā hoti yathāyuttena sakaṭenāti dvīhi balibaddehi yuttena sakaṭena ekaṃ cakkaṃ nibbodakapatanaṭṭhāne ekaṃ bahi katvā āvijjituṃ na sakkā hoti. Kurundiyaṃ pana ‘‘catūhi yuttenā’’ti vuttaṃ. Samantā nisseṇiyā anuparigantunti nisseṇiyaṃ ṭhatvā gehaṃ chādentehi na sakkā hoti samantā nisseṇiyā āvijjituṃ. Iti evarūpe sārambhe ca aparikkamane ca ṭhāne na kāretabbā. Anārambhe pana saparikkamane kāretabbā, taṃ vuttapaṭipakkhanayena pāḷiyaṃ āgatameva.
புன ஸஞ்ஞாசிகா நாமாதி ஏவமாதி³ ‘‘ஸாரம்பே⁴ சே பி⁴க்கு² வத்து²ஸ்மிங் அபரிக்கமனே ஸஞ்ஞாசிகாய குடிங் காரெய்யா’’தி ஏவங் வுத்தஸங்யாசிகாதீ³னங் அத்த²ப்பகாஸனத்த²ங் வுத்தங்.
Puna saññācikā nāmāti evamādi ‘‘sārambhe ce bhikkhu vatthusmiṃ aparikkamane saññācikāya kuṭiṃ kāreyyā’’ti evaṃ vuttasaṃyācikādīnaṃ atthappakāsanatthaṃ vuttaṃ.
பயோகே³ து³க்கடந்தி ஏவங் அதே³ஸிதவத்து²கங் வா பமாணாதிக்கந்தங் வா குடிங் காரெஸ்ஸாமீதி அரஞ்ஞதோ ருக்கா² ஹரணத்தா²ய வாஸிங் வா ப²ரஸுங் வா நிஸேதி து³க்கடங், அரஞ்ஞங் பவிஸதி து³க்கடங், தத்த² அல்லதிணானி சி²ந்த³தி து³க்கடேன ஸத்³தி⁴ங் பாசித்தியங், ஸுக்கா²னி சி²ந்த³தி து³க்கடங். ருக்கே²ஸுபி ஏஸேவ நயோ. பூ⁴மிங் ஸோதே⁴தி க²ணதி, பங்ஸுங் உத்³த⁴ரதி, சினாதி; ஏவங் யாவ பாசீரங் ப³ந்த⁴தி தாவ புப்³ப³பயோகோ³ நாம ஹோதி. தஸ்மிங் புப்³ப³பயோகே³ ஸப்³ப³த்த² பாசித்தியட்டா²னே து³க்கடேன ஸத்³தி⁴ங் பாசித்தியங், து³க்கடட்டா²னே து³க்கடங், ததோ பட்டா²ய ஸஹபயோகோ³ நாம. தத்த² த²ம்பே⁴ஹி காதப்³பா³ய த²ம்ப⁴ங் உஸ்ஸாபேதி, து³க்கடங். இட்ட²காஹி சினிதப்³பா³ய இட்ட²கங் ஆசினாதி, து³க்கடங். ஏவங் யங் யங் உபகரணங் யோஜேதி, ஸப்³ப³த்த² பயோகே³ பயோகே³ து³க்கடங். தச்ச²ந்தஸ்ஸ ஹத்த²வாரே ஹத்த²வாரே தத³த்தா²ய க³ச்ச²ந்தஸ்ஸ பதே³ பதே³ து³க்கடங். ஏவங் கதங் பன தா³ருகுட்டிகங் வா இட்ட²ககுட்டிகங் வா ஸிலாகுட்டிகங் வா அந்தமஸோ பண்ணஸாலம்பி ஸபி⁴த்திச்ச²த³னங் லிம்பிஸ்ஸாமீதி ஸுதா⁴ய வா மத்திகாய வா லிம்பந்தஸ்ஸ பயோகே³ பயோகே³ யாவ து²ல்லச்சயங் ந ஹோதி, தாவ து³க்கடங். ஏதங் பன து³க்கடங் மஹாலேபேனேவ வட்டதி, ஸேதரத்தவண்ணகரணே வா சித்தகம்மே வா அனாபத்தி.
Payoge dukkaṭanti evaṃ adesitavatthukaṃ vā pamāṇātikkantaṃ vā kuṭiṃ kāressāmīti araññato rukkhā haraṇatthāya vāsiṃ vā pharasuṃ vā niseti dukkaṭaṃ, araññaṃ pavisati dukkaṭaṃ, tattha allatiṇāni chindati dukkaṭena saddhiṃ pācittiyaṃ, sukkhāni chindati dukkaṭaṃ. Rukkhesupi eseva nayo. Bhūmiṃ sodheti khaṇati, paṃsuṃ uddharati, cināti; evaṃ yāva pācīraṃ bandhati tāva pubbapayogo nāma hoti. Tasmiṃ pubbapayoge sabbattha pācittiyaṭṭhāne dukkaṭena saddhiṃ pācittiyaṃ, dukkaṭaṭṭhāne dukkaṭaṃ, tato paṭṭhāya sahapayogo nāma. Tattha thambhehi kātabbāya thambhaṃ ussāpeti, dukkaṭaṃ. Iṭṭhakāhi cinitabbāya iṭṭhakaṃ ācināti, dukkaṭaṃ. Evaṃ yaṃ yaṃ upakaraṇaṃ yojeti, sabbattha payoge payoge dukkaṭaṃ. Tacchantassa hatthavāre hatthavāre tadatthāya gacchantassa pade pade dukkaṭaṃ. Evaṃ kataṃ pana dārukuṭṭikaṃ vā iṭṭhakakuṭṭikaṃ vā silākuṭṭikaṃ vā antamaso paṇṇasālampi sabhitticchadanaṃ limpissāmīti sudhāya vā mattikāya vā limpantassa payoge payoge yāva thullaccayaṃ na hoti, tāva dukkaṭaṃ. Etaṃ pana dukkaṭaṃ mahālepeneva vaṭṭati, setarattavaṇṇakaraṇe vā cittakamme vā anāpatti.
ஏகங் பிண்ட³ங் அனாக³தேதி யோ ஸப்³ப³பச்சி²மோ ஏகோ லேபபிண்டோ³, தங் ஏகங் பிண்ட³ங் அஸம்பத்தே குடிகம்மே. இத³ங் வுத்தங் ஹோதி, இதா³னி த்³வீஹி பிண்டே³ஹி நிட்டா²னங் க³மிஸ்ஸதீதி தேஸு பட²மபிண்ட³தா³னே து²ல்லச்சயந்தி.
Ekaṃ piṇḍaṃ anāgateti yo sabbapacchimo eko lepapiṇḍo, taṃ ekaṃ piṇḍaṃ asampatte kuṭikamme. Idaṃ vuttaṃ hoti, idāni dvīhi piṇḍehi niṭṭhānaṃ gamissatīti tesu paṭhamapiṇḍadāne thullaccayanti.
தஸ்மிங் பிண்டே³ ஆக³தேதி யங் ஏகங் பிண்ட³ங் அனாக³தே குடிகம்மே து²ல்லச்சயங் ஹோதி, தஸ்மிங் அவஸானபிண்டே³ ஆக³தே தி³ன்னே ட²பிதே லேபஸ்ஸ க⁴டிதத்தா ஆபத்தி ஸங்கா⁴தி³ஸேஸஸ்ஸ. ஏவங் லெம்பந்தஸ்ஸ ச அந்தோலேபே வா அந்தோலேபேன ஸத்³தி⁴ங் பி⁴த்திஞ்ச ச²த³னஞ்ச ஏகாப³த்³த⁴ங் கத்வா க⁴டிதே ப³ஹிலேபே வா ப³ஹிலேபேன ஸத்³தி⁴ங் க⁴டிதே ஸங்கா⁴தி³ஸேஸோ. ஸசே பன த்³வாரப³த்³த⁴ங் வா வாதபானங் வா அட்ட²பெத்வாவ மத்திகாய லிம்பதி, தஸ்மிஞ்ச தஸ்ஸோகாஸங் புன வட்³டெ⁴த்வா வா அவட்³டெ⁴த்வா வா ட²பிதே லேபோ ந க⁴டீயதி ரக்க²தி தாவ, புன லிம்பந்தஸ்ஸ பன க⁴டிதமத்தே ஸங்கா⁴தி³ஸேஸோ. ஸசே தங் ட²பியமானங் பட²மங் தி³ன்னலேபேன ஸத்³தி⁴ங் நிரந்தரமேவ ஹுத்வா திட்ட²தி, பட²மமேவ ஸங்கா⁴தி³ஸேஸோ. உபசிகாமோசனத்த²ங் அட்ட²ங்கு³லமத்தேன அப்பத்தச்ச²த³னங் கத்வா பி⁴த்திங் லிம்பதி, அனாபத்தி. உபசிகாமோசனத்த²மேவ ஹெட்டா² பாஸாணகுட்டங் கத்வா தங் அலிம்பித்வா உபரி லிம்பதி, லேபோ ந க⁴டியதி நாம, அனாபத்தியேவ.
Tasmiṃ piṇḍe āgateti yaṃ ekaṃ piṇḍaṃ anāgate kuṭikamme thullaccayaṃ hoti, tasmiṃ avasānapiṇḍe āgate dinne ṭhapite lepassa ghaṭitattā āpatti saṅghādisesassa. Evaṃ lempantassa ca antolepe vā antolepena saddhiṃ bhittiñca chadanañca ekābaddhaṃ katvā ghaṭite bahilepe vā bahilepena saddhiṃ ghaṭite saṅghādiseso. Sace pana dvārabaddhaṃ vā vātapānaṃ vā aṭṭhapetvāva mattikāya limpati, tasmiñca tassokāsaṃ puna vaḍḍhetvā vā avaḍḍhetvā vā ṭhapite lepo na ghaṭīyati rakkhati tāva, puna limpantassa pana ghaṭitamatte saṅghādiseso. Sace taṃ ṭhapiyamānaṃ paṭhamaṃ dinnalepena saddhiṃ nirantarameva hutvā tiṭṭhati, paṭhamameva saṅghādiseso. Upacikāmocanatthaṃ aṭṭhaṅgulamattena appattacchadanaṃ katvā bhittiṃ limpati, anāpatti. Upacikāmocanatthameva heṭṭhā pāsāṇakuṭṭaṃ katvā taṃ alimpitvā upari limpati, lepo na ghaṭiyati nāma, anāpattiyeva.
இட்ட²ககுட்டிகாய இட்ட²காஹியேவ வாதபானே ச தூ⁴மனெத்தானி ச கரோதி, லேபக⁴டனேனேவ ஆபத்தி. பண்ணஸாலங் லிம்பதி, லேபக⁴டனேனேவ ஆபத்தி. தத்த² ஆலோகத்தா²ய அட்ட²ங்கு³லமத்தங் ட²பெத்வா லிம்பதி, லேபோ ந க⁴டீயதி நாம, அனாபத்தியேவ. ஸசே ‘‘வாதபானங் லத்³தா⁴ எத்த² ட²பெஸ்ஸாமீ’’தி கரோதி, வாதபானே ட²பிதே லேபக⁴டனேன ஆபத்தி. ஸசே மத்திகாய குட்டங் கரோதி, ச²த³னலேபேன ஸத்³தி⁴ங் க⁴டனே ஆபத்தி. ஏகோ ஏகபிண்டா³வஸேஸங் கத்வா ட²பேதி, அஞ்ஞோ தங் தி³ஸ்வா ‘‘து³க்கதங் இத³’’ந்தி வத்தஸீஸேன லிம்பதி உபி⁴ன்னம்பி அனாபத்தி.
Iṭṭhakakuṭṭikāya iṭṭhakāhiyeva vātapāne ca dhūmanettāni ca karoti, lepaghaṭaneneva āpatti. Paṇṇasālaṃ limpati, lepaghaṭaneneva āpatti. Tattha ālokatthāya aṭṭhaṅgulamattaṃ ṭhapetvā limpati, lepo na ghaṭīyati nāma, anāpattiyeva. Sace ‘‘vātapānaṃ laddhā ettha ṭhapessāmī’’ti karoti, vātapāne ṭhapite lepaghaṭanena āpatti. Sace mattikāya kuṭṭaṃ karoti, chadanalepena saddhiṃ ghaṭane āpatti. Eko ekapiṇḍāvasesaṃ katvā ṭhapeti, añño taṃ disvā ‘‘dukkataṃ ida’’nti vattasīsena limpati ubhinnampi anāpatti.
354. பி⁴க்கு² குடிங் கரோதீதி ஏவமாதீ³னி ச²த்திங்ஸ சதுக்கானி ஆபத்திபே⁴த³த³ஸ்ஸனத்த²ங் வுத்தானி, தத்த² ஸாரம்பா⁴ய து³க்கடங், அபரிக்கமனாய து³க்கடங் , பமாணாதிக்கந்தாய ஸங்கா⁴தி³ஸேஸோ, அதே³ஸிதவத்து²காய ஸங்கா⁴தி³ஸேஸோ, ஏதேஸங் வஸேன வோமிஸ்ஸகாபத்தியோ வேதி³தப்³பா³.
354.Bhikkhu kuṭiṃ karotīti evamādīni chattiṃsa catukkāni āpattibhedadassanatthaṃ vuttāni, tattha sārambhāya dukkaṭaṃ, aparikkamanāya dukkaṭaṃ , pamāṇātikkantāya saṅghādiseso, adesitavatthukāya saṅghādiseso, etesaṃ vasena vomissakāpattiyo veditabbā.
355. ஆபத்தி த்³வின்னங் ஸங்கா⁴தி³ஸேஸேன த்³வின்னங் து³க்கடானந்திஆதீ³ஸு ச த்³வீஹி ஸங்கா⁴தி³ஸேஸேஹி ஸத்³தி⁴ங் த்³வின்னங் து³க்கடானந்திஆதி³னா நயேன அத்தோ² வேதி³தப்³போ³.
355.Āpatti dvinnaṃ saṅghādisesena dvinnaṃ dukkaṭānantiādīsu ca dvīhi saṅghādisesehi saddhiṃ dvinnaṃ dukkaṭānantiādinā nayena attho veditabbo.
361. ஸோ சே விப்பகதே ஆக³ச்ச²தீதிஆதீ³ஸு பன அயங் அத்த²வினிச்ச²யோ. ஸோதி ஸமாதி³ஸித்வா பக்கந்தபி⁴க்கு². விப்பகதேதி அனிட்டி²தே குடிகம்மே. அஞ்ஞஸ்ஸ வா தா³தப்³பா³தி அஞ்ஞஸ்ஸ புக்³க³லஸ்ஸ வா ஸங்க⁴ஸ்ஸ வா சஜித்வா தா³தப்³பா³. பி⁴ந்தி³த்வா வா புன காதப்³பா³தி கித்தகேன பி⁴ன்னா ஹோதி, ஸசே த²ம்பா⁴ பூ⁴மியங் நிகா²தா, உத்³த⁴ரிதப்³பா³. ஸசே பாஸாணானங் உபரி ட²பிதா, அபனேதப்³பா³. இட்ட²கசிதாய யாவ மங்க³லிட்ட²கா தாவ குட்டா அபசினிதப்³பா³. ஸங்கே²பதோ பூ⁴மிஸமங் கத்வா வினாஸிதா பி⁴ன்னா ஹோதி, பூ⁴மிதோ உபரி சதுரங்கு³லமத்தேபி டி²தே அபி⁴ன்னாவ. ஸேஸங் ஸப்³ப³சதுக்கேஸு பாகடமேவ. ந ஹெத்த² அஞ்ஞங் கிஞ்சி அத்தி², யங் பாளிஅனுஸாரேனேவ து³ப்³பி³ஞ்ஞெய்யங் ஸியா.
361.So ce vippakate āgacchatītiādīsu pana ayaṃ atthavinicchayo. Soti samādisitvā pakkantabhikkhu. Vippakateti aniṭṭhite kuṭikamme. Aññassa vā dātabbāti aññassa puggalassa vā saṅghassa vā cajitvā dātabbā. Bhinditvā vā puna kātabbāti kittakena bhinnā hoti, sace thambhā bhūmiyaṃ nikhātā, uddharitabbā. Sace pāsāṇānaṃ upari ṭhapitā, apanetabbā. Iṭṭhakacitāya yāva maṅgaliṭṭhakā tāva kuṭṭā apacinitabbā. Saṅkhepato bhūmisamaṃ katvā vināsitā bhinnā hoti, bhūmito upari caturaṅgulamattepi ṭhite abhinnāva. Sesaṃ sabbacatukkesu pākaṭameva. Na hettha aññaṃ kiñci atthi, yaṃ pāḷianusāreneva dubbiññeyyaṃ siyā.
363. அத்தனா விப்பகதந்திஆதீ³ஸு பன அத்தனா ஆரத்³த⁴ங் குடிங். அத்தனா பரியோஸாபேதீதி மஹாமத்திகாய வா து²ஸமத்திகாய வா யாய கதங் பரியோஸிதபா⁴வங் பாபேதுகாமோ ஹோதி, தாய அவஸானபிண்ட³ங் தெ³ந்தோ பரியோஸாபேதி .
363.Attanā vippakatantiādīsu pana attanā āraddhaṃ kuṭiṃ. Attanā pariyosāpetīti mahāmattikāya vā thusamattikāya vā yāya kataṃ pariyositabhāvaṃ pāpetukāmo hoti, tāya avasānapiṇḍaṃ dento pariyosāpeti .
பரேஹி பரியோஸாபேதீதி அத்தனோவ அத்தா²ய பரேஹி பரியோஸாபேதி. அத்தனா வா ஹி விப்பகதா ஹோது பரேஹி வா உப⁴யேஹி வா, தங் சே அத்தனோ அத்தா²ய அத்தனா வா பரியோஸாபேதி, பரேஹி வா பரியோஸாபேதி, அத்தனா ச பரேஹி சாதி யுக³னத்³த⁴ங் வா பரியோஸாபேதி, ஸங்கா⁴தி³ஸேஸோயேவாதி அயமெத்த² வினிச்ச²யோ.
Parehi pariyosāpetīti attanova atthāya parehi pariyosāpeti. Attanā vā hi vippakatā hotu parehi vā ubhayehi vā, taṃ ce attano atthāya attanā vā pariyosāpeti, parehi vā pariyosāpeti, attanā ca parehi cāti yuganaddhaṃ vā pariyosāpeti, saṅghādisesoyevāti ayamettha vinicchayo.
குருந்தி³யங்பன வுத்தங் – ‘‘த்³வே தயோ பி⁴க்கூ² ‘ஏகதோ வஸிஸ்ஸாமா’தி கரொந்தி, ரக்க²தி தாவ, அவிப⁴த்தத்தா அனாபத்தி. ‘இத³ங் டா²னங் தவ, இத³ங் மமா’தி விப⁴ஜித்வா கரொந்தி ஆபத்தி. ஸாமணேரோ ச பி⁴க்கு² ச ஏகதோ கரொந்தி, யாவ அவிப⁴த்தா தாவ ரக்க²தி. புரிமனயேன விப⁴ஜித்வா கரொந்தி, பி⁴க்கு²ஸ்ஸ ஆபத்தீ’’தி.
Kurundiyaṃpana vuttaṃ – ‘‘dve tayo bhikkhū ‘ekato vasissāmā’ti karonti, rakkhati tāva, avibhattattā anāpatti. ‘Idaṃ ṭhānaṃ tava, idaṃ mamā’ti vibhajitvā karonti āpatti. Sāmaṇero ca bhikkhu ca ekato karonti, yāva avibhattā tāva rakkhati. Purimanayena vibhajitvā karonti, bhikkhussa āpattī’’ti.
364. அனாபத்தி லேணேதிஆதீ³ஸு லேணங் மஹந்தம்பி கரொந்தஸ்ஸ அனாபத்தி. ந ஹெத்த² லேபோ க⁴டீயதி. கு³ஹம்பி இட்ட²காகு³ஹங் வா ஸிலாகு³ஹங் வா தா³ருகு³ஹங் வா பூ⁴மிகு³ஹங் வா மஹந்தம்பி கரொந்தஸ்ஸ அனாபத்தி.
364.Anāpattileṇetiādīsu leṇaṃ mahantampi karontassa anāpatti. Na hettha lepo ghaṭīyati. Guhampi iṭṭhakāguhaṃ vā silāguhaṃ vā dāruguhaṃ vā bhūmiguhaṃ vā mahantampi karontassa anāpatti.
திணகுடிகாயாதி ஸத்தபூ⁴மிகோபி பாஸாதோ³ திணபண்ணச்ச²த³னோ ‘‘திணகுடிகா’’தி வுச்சதி. அட்ட²கதா²ஸு பன குக்குடச்சி²ககே³ஹந்தி ச²த³னங் த³ண்ட³கேஹி ஜாலப³த்³த⁴ங் கத்வா திணேஹி வா பண்ணேஹி வா சா²தி³தகுடிகாவ வுத்தா, தத்த² அனாபத்தி. மஹந்தம்பி திணச்ச²த³னகே³ஹங் காதுங் வட்டதி, உல்லித்தாதி³பா⁴வோ ஏவ ஹி குடியா லக்க²ணங், ஸோ ச ச²த³னமேவ ஸந்தா⁴ய வுத்தோதி வேதி³தப்³போ³. சங்கமனஸாலாயங் திணசுண்ணங் பரிபததி ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காது’’ந்திஆதீ³னி (சூளவ॰ 260) செத்த² ஸாத⁴கானி, தஸ்மா உப⁴தோ பக்க²ங் வா கூடப³த்³த⁴ங் வா வட்டங் வா சதுரஸ்ஸங் வா யங் ‘‘இமங் ஏதஸ்ஸ கே³ஹஸ்ஸ ச²த³ன’’ந்தி ச²த³னஸங்கே²பேன கதங் ஹோதி, தஸ்ஸ பி⁴த்திலேபேன ஸத்³தி⁴ங் லேபே க⁴டிதே ஆபத்தி. ஸசே பன உல்லித்தாவலித்தச்ச²த³னஸ்ஸ கே³ஹஸ்ஸ லேபரக்க²ணத்த²ங் உபரி திணேன சா²தெ³ந்தி, எத்தாவதா திணகுடி நாம ந ஹோதி. கிங் பனெத்த² அதே³ஸிதவத்து²கப்பமாணாதிக்கந்தபச்சயாவ அனாபத்தி, உதா³ஹு ஸாரம்ப⁴அபரிக்கமனபச்சயாபீதி ஸப்³ப³த்தா²பி அனாபத்தி. ததா² ஹி தாதி³ஸங் குடிங் ஸந்தா⁴ய பரிவாரே வுத்தங் –
Tiṇakuṭikāyāti sattabhūmikopi pāsādo tiṇapaṇṇacchadano ‘‘tiṇakuṭikā’’ti vuccati. Aṭṭhakathāsu pana kukkuṭacchikagehanti chadanaṃ daṇḍakehi jālabaddhaṃ katvā tiṇehi vā paṇṇehi vā chāditakuṭikāva vuttā, tattha anāpatti. Mahantampi tiṇacchadanagehaṃ kātuṃ vaṭṭati, ullittādibhāvo eva hi kuṭiyā lakkhaṇaṃ, so ca chadanameva sandhāya vuttoti veditabbo. Caṅkamanasālāyaṃ tiṇacuṇṇaṃ paripatati ‘‘anujānāmi, bhikkhave, ogumphetvā ullittāvalittaṃ kātu’’ntiādīni (cūḷava. 260) cettha sādhakāni, tasmā ubhato pakkhaṃ vā kūṭabaddhaṃ vā vaṭṭaṃ vā caturassaṃ vā yaṃ ‘‘imaṃ etassa gehassa chadana’’nti chadanasaṅkhepena kataṃ hoti, tassa bhittilepena saddhiṃ lepe ghaṭite āpatti. Sace pana ullittāvalittacchadanassa gehassa leparakkhaṇatthaṃ upari tiṇena chādenti, ettāvatā tiṇakuṭi nāma na hoti. Kiṃ panettha adesitavatthukappamāṇātikkantapaccayāva anāpatti, udāhu sārambhaaparikkamanapaccayāpīti sabbatthāpi anāpatti. Tathā hi tādisaṃ kuṭiṃ sandhāya parivāre vuttaṃ –
‘‘பி⁴க்கு² ஸஞ்ஞாசிகாய குடிங் கரோதி;
‘‘Bhikkhu saññācikāya kuṭiṃ karoti;
அதே³ஸிதவத்து²கங் பமாணாதிக்கந்தங்;
Adesitavatthukaṃ pamāṇātikkantaṃ;
ஸாரம்ப⁴ங் அபரிக்கமனங் அனாபத்தி;
Sārambhaṃ aparikkamanaṃ anāpatti;
பஞ்ஹா மேஸா குஸலேஹி சிந்திதா’’தி. (பரி॰ 479);
Pañhā mesā kusalehi cintitā’’ti. (pari. 479);
அஞ்ஞஸ்ஸத்தா²யாதி குடிலக்க²ணப்பத்தம்பி குடிங் அஞ்ஞஸ்ஸ உபஜ்ஜா²யஸ்ஸ வா ஆசரியஸ்ஸ வா ஸங்க⁴ஸ்ஸ வா அத்தா²ய கரொந்தஸ்ஸ அனாபத்தி. யங் பன ‘‘ஆபத்தி காருகானங் திண்ணங் து³க்கடான’’ந்திஆதி³ பாளியங் வுத்தங், தங் யதா²ஸமாதி³ட்டா²ய அகரணபச்சயா வுத்தங்.
Aññassatthāyāti kuṭilakkhaṇappattampi kuṭiṃ aññassa upajjhāyassa vā ācariyassa vā saṅghassa vā atthāya karontassa anāpatti. Yaṃ pana ‘‘āpatti kārukānaṃ tiṇṇaṃ dukkaṭāna’’ntiādi pāḷiyaṃ vuttaṃ, taṃ yathāsamādiṭṭhāya akaraṇapaccayā vuttaṃ.
வாஸாகா³ரங் ட²பெத்வா ஸப்³ப³த்தா²தி அத்தனோ வஸனத்தா²ய அகா³ரங் ட²பெத்வா அஞ்ஞங் உபோஸதா²கா³ரங் வா ஜந்தாக⁴ரங் வா போ⁴ஜனஸாலா வா அக்³கி³ஸாலா வா ப⁴விஸ்ஸதீதி காரேதி, ஸப்³ப³த்த² அனாபத்தி. ஸசேபிஸ்ஸ ஹோதி ‘‘உபோஸதா²கா³ரஞ்ச ப⁴விஸ்ஸதி, அஹஞ்ச வஸிஸ்ஸாமி ஜந்தாக⁴ரஞ்ச போ⁴ஜனஸாலா ச அக்³கி³ஸாலா ச ப⁴விஸ்ஸதி, அஹஞ்ச வஸிஸ்ஸாமீ’’தி காரிதேபி ஆனாபத்தியேவ. மஹாபச்சரியங் பன ‘‘அனாபத்தீ’’தி வத்வா ‘‘அத்தனோ வாஸாகா³ரத்தா²ய கரொந்தஸ்ஸேவ ஆபத்தீ’’தி வுத்தங். உம்மத்தகஸ்ஸ ஆதி³கம்மிகானஞ்ச ஆளவகானங் பி⁴க்கூ²னங் அனாபத்தி.
Vāsāgāraṃ ṭhapetvā sabbatthāti attano vasanatthāya agāraṃ ṭhapetvā aññaṃ uposathāgāraṃ vā jantāgharaṃ vā bhojanasālā vā aggisālā vā bhavissatīti kāreti, sabbattha anāpatti. Sacepissa hoti ‘‘uposathāgārañca bhavissati, ahañca vasissāmi jantāgharañca bhojanasālā ca aggisālā ca bhavissati, ahañca vasissāmī’’ti kāritepi ānāpattiyeva. Mahāpaccariyaṃ pana ‘‘anāpattī’’ti vatvā ‘‘attano vāsāgāratthāya karontasseva āpattī’’ti vuttaṃ. Ummattakassa ādikammikānañca āḷavakānaṃ bhikkhūnaṃ anāpatti.
ஸமுட்டா²னாதீ³ஸு ச²ஸமுட்டா²னங் கிரியஞ்ச கிரியாகிரியஞ்ச, இத³ஞ்ஹி வத்து²ங் தே³ஸாபெத்வா பமாணாதிக்கந்தங் கரோதோ கிரியதோ ஸமுட்டா²தி, வத்து²ங் அதே³ஸாபெத்வா கரோதோ கிரியாகிரியதோ, நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Samuṭṭhānādīsu chasamuṭṭhānaṃ kiriyañca kiriyākiriyañca, idañhi vatthuṃ desāpetvā pamāṇātikkantaṃ karoto kiriyato samuṭṭhāti, vatthuṃ adesāpetvā karoto kiriyākiriyato, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
குடிகாரஸிக்கா²பத³வண்ணனா நிட்டி²தா.
Kuṭikārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. குடிகாரஸிக்கா²பத³ங் • 6. Kuṭikārasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
