| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
6. குடிகாரஸிக்கா²பத³வண்ணனா
6. Kuṭikārasikkhāpadavaṇṇanā
342. ச²ட்டே² எத்தகேனாதி எத்தகேன தா³ருஆதி³னா. அபரிச்சி²ன்னப்பமாணாயோதி அபரிச்சி²ன்னதா³ருஆதி³ப்பமாணாயோ. மூலச்சே²ஜ்ஜாய புரிஸங் யாசிதுங் ந வட்டதீதி பரஸந்தகபா⁴வதோ மோசெத்வா அத்தனோயேவ ஸந்தகங் கத்வா யாசிதுங் ந வட்டதி. ஏவங் மூலச்சே²ஜ்ஜாய அஞ்ஞாதகஅப்பவாரிதட்டா²னதோ யாசந்தஸ்ஸ அஞ்ஞாதகவிஞ்ஞத்தியா து³க்கடங். தா³ஸங் அத்தனோ அத்தா²ய ஸாதி³யந்தஸ்ஸபி து³க்கடமேவ ‘‘தா³ஸிதா³ஸபடிக்³க³ஹணா படிவிரதோ ஹோதீ’’தி (தீ³॰ நி॰ 1.10, 194) வசனதோ. ஞாதகபவாரிதட்டா²னதோ பன தா³ஸங் மூலச்சே²ஜ்ஜாய யாசந்தஸ்ஸ ஸாதி³யனவஸேன து³க்கடங். ஸககம்மங் ந யாசிதப்³பா³தி பாணாதிபாதஸிக்கா²பத³ரக்க²ணத்த²ங் வுத்தங். அனியமெத்வாபி ந யாசிதப்³பா³தி மனுஸ்ஸானங் அஞ்ஞதா² கா³ஹஸ்ஸபி ஸம்ப⁴வதோ வுத்தங், ஸுத்³த⁴சித்தேன பன ஹத்த²கம்மங் யாசந்தஸ்ஸ ஆபத்தி நாம நத்தி².
342. Chaṭṭhe ettakenāti ettakena dāruādinā. Aparicchinnappamāṇāyoti aparicchinnadāruādippamāṇāyo. Mūlacchejjāya purisaṃ yācituṃ na vaṭṭatīti parasantakabhāvato mocetvā attanoyeva santakaṃ katvā yācituṃ na vaṭṭati. Evaṃ mūlacchejjāya aññātakaappavāritaṭṭhānato yācantassa aññātakaviññattiyā dukkaṭaṃ. Dāsaṃ attano atthāya sādiyantassapi dukkaṭameva ‘‘dāsidāsapaṭiggahaṇā paṭivirato hotī’’ti (dī. ni. 1.10, 194) vacanato. Ñātakapavāritaṭṭhānato pana dāsaṃ mūlacchejjāya yācantassa sādiyanavasena dukkaṭaṃ. Sakakammaṃ na yācitabbāti pāṇātipātasikkhāpadarakkhaṇatthaṃ vuttaṃ. Aniyametvāpi na yācitabbāti manussānaṃ aññathā gāhassapi sambhavato vuttaṃ, suddhacittena pana hatthakammaṃ yācantassa āpatti nāma natthi.
ஸப்³ப³கப்பியபா⁴வதீ³பனத்த²ந்தி ஸப்³ப³ஸோ கப்பியபா⁴வதீ³பனத்த²ங். மூலங் தே³தா²தி வத்துங் வட்டதீதி யஸ்மா மூலங் த³ஸ்ஸாமாதி தேஹி பட²மங் வுத்தத்தா விஞ்ஞத்தி ந ஹோதி, யஸ்மா ச மூலந்தி ப⁴ணிதங் ஸாமஞ்ஞவசனதோ அகப்பியவசனங் ந ஹோதி, தஸ்மா மூலங் தே³தா²தி வத்துங் வட்டதி. அனஜ்ஜா²வுத்த²கந்தி அபரிக்³க³ஹிதங். அகப்பியகஹாபணாதி³ ந தா³தப்³ப³ந்தி கிஞ்சாபி அகப்பியகஹாபணாதி³ங் அஸாதி³யந்தேன கப்பியவோஹாரதோ தா³துங் வட்டதி, ததா²பி ஸாருப்பங் ந ஹோதி. மனுஸ்ஸா ச ஏதஸ்ஸ ஸந்தகங் கிஞ்சி அத்தீ²தி விஹேடே²தப்³ப³ங் மஞ்ஞந்தீதி அகப்பியகஹாபணாதி³தா³னங் படிக்கி²த்தங். ததே²வ பாசெத்வாதி ஹத்த²கம்மவஸேனேவ பாசெத்வா. ‘‘கிங், ப⁴ந்தே’’தி எத்தகேபி புச்சி²தே யத³த்தா²ய பவிட்டோ², தங் கதே²துங் வட்டதி புச்சி²தபஞ்ஹத்தா.
Sabbakappiyabhāvadīpanatthanti sabbaso kappiyabhāvadīpanatthaṃ. Mūlaṃ dethāti vattuṃ vaṭṭatīti yasmā mūlaṃ dassāmāti tehi paṭhamaṃ vuttattā viññatti na hoti, yasmā ca mūlanti bhaṇitaṃ sāmaññavacanato akappiyavacanaṃ na hoti, tasmā mūlaṃ dethāti vattuṃ vaṭṭati. Anajjhāvutthakanti apariggahitaṃ. Akappiyakahāpaṇādi na dātabbanti kiñcāpi akappiyakahāpaṇādiṃ asādiyantena kappiyavohārato dātuṃ vaṭṭati, tathāpi sāruppaṃ na hoti. Manussā ca etassa santakaṃ kiñci atthīti viheṭhetabbaṃ maññantīti akappiyakahāpaṇādidānaṃ paṭikkhittaṃ. Tatheva pācetvāti hatthakammavaseneva pācetvā. ‘‘Kiṃ, bhante’’ti ettakepi pucchite yadatthāya paviṭṭho, taṃ kathetuṃ vaṭṭati pucchitapañhattā.
வத்தந்தி சாரித்தங், ஆபத்தி பன ந ஹோதீதி அதி⁴ப்பாயோ. கப்பியங் காராபெத்வா படிக்³க³ஹேதப்³பா³னீதி ஸாகா²ய லக்³க³ரஜஸ்மிங் பத்தே பதிதேபி ஸாக²ங் சி²ந்தி³த்வா கா²தி³துகாமதாயபி ஸதி ஸுக²பரிபோ⁴க³த்த²ங் வுத்தங். ‘‘நதி³ங் வா…பே॰… ஆஹரா’’தி வத்து²ங் வட்டதீதி அபரிக்³க³ஹிதத்தா வுத்தங். கே³ஹதோ…பே॰… பரிபு⁴ஞ்ஜிதப்³ப³ந்தி பரிக்³க³ஹிதஉத³கத்தா விஞ்ஞத்தியா து³க்கடங் ஹோதீதி அதி⁴ப்பாயோ. அலஜ்ஜீஹி…பே॰… ந காரேதப்³ப³ந்தி இத³ங் உத்தரிப⁴ங்கா³தி⁴காரத்தா அஜ்ஜோ²ஹரணீயங் ஸந்தா⁴ய வுத்தங். பா³ஹிரபரிபோ⁴கே³ஸு பன அலஜ்ஜீஹிபி ஹத்த²கம்மங் காரேதுங் வட்டதீதி.
Vattanti cārittaṃ, āpatti pana na hotīti adhippāyo. Kappiyaṃ kārāpetvā paṭiggahetabbānīti sākhāya laggarajasmiṃ patte patitepi sākhaṃ chinditvā khāditukāmatāyapi sati sukhaparibhogatthaṃ vuttaṃ. ‘‘Nadiṃ vā…pe… āharā’’ti vatthuṃ vaṭṭatīti apariggahitattā vuttaṃ. Gehato…pe… paribhuñjitabbanti pariggahitaudakattā viññattiyā dukkaṭaṃ hotīti adhippāyo. Alajjīhi…pe… na kāretabbanti idaṃ uttaribhaṅgādhikārattā ajjhoharaṇīyaṃ sandhāya vuttaṃ. Bāhiraparibhogesu pana alajjīhipi hatthakammaṃ kāretuṃ vaṭṭatīti.
கோ³ணங் பன…பே॰… ஆஹராபேதுங் ந வட்டதீதி அத்தனோ அத்தா²ய மூலச்சே²ஜ்ஜவஸேன ஆஹராபேதுங் ந வட்டதி. ஆஹராபெந்தஸ்ஸ து³க்கடந்தி அஞ்ஞாதகவிஞ்ஞத்தியா து³க்கடங். அத்தனோ அத்தா²ய ஸாதி³யனேபி து³க்கடமேவ ‘‘ஹத்தி²க³வாஸ்ஸவளவபடிக்³க³ஹணா படிவிரதோ ஹோதீ’’தி (தீ³॰ நி॰ 1.10, 194) வுத்தத்தா. தேனேவாஹ ‘‘ஞாதகபவாரிதட்டா²னதோபி மூலச்சே²ஜ்ஜாய யாசிதுங் ந வட்டதீ’’தி. ரக்கி²த்வாதி யதா² சோரா ந ஹரந்தி, ஏவங் ரக்கி²த்வா. ஜக்³கி³த்வாதி திணதா³னாதீ³ஹி ஜக்³கி³த்வா. ந ஸம்படிச்சி²தப்³ப³ந்தி அத்தனோ அத்தா²ய கோ³ணே ஸாதி³யனஸ்ஸ படிக்கி²த்தத்தா வுத்தங்.
Goṇaṃ pana…pe… āharāpetuṃ na vaṭṭatīti attano atthāya mūlacchejjavasena āharāpetuṃ na vaṭṭati. Āharāpentassa dukkaṭanti aññātakaviññattiyā dukkaṭaṃ. Attano atthāya sādiyanepi dukkaṭameva ‘‘hatthigavāssavaḷavapaṭiggahaṇā paṭivirato hotī’’ti (dī. ni. 1.10, 194) vuttattā. Tenevāha ‘‘ñātakapavāritaṭṭhānatopi mūlacchejjāya yācituṃ na vaṭṭatī’’ti. Rakkhitvāti yathā corā na haranti, evaṃ rakkhitvā. Jaggitvāti tiṇadānādīhi jaggitvā. Na sampaṭicchitabbanti attano atthāya goṇe sādiyanassa paṭikkhittattā vuttaṃ.
ஸகடங் தே³தா²தி…பே॰… வட்டதீதி மூலச்சே²ஜ்ஜவஸேன ஸகடங் தே³தா²தி வத்துங் ந வட்டதி. தாவகாலிகங் வட்டதீதி தாவகாலிகங் கத்வா ஸப்³ப³த்த² யாசிதுங் வட்டதி. வல்லிஆதீ³ஸு ச பரபரிக்³க³ஹிதேஸு ஏஸேவ நயோதி யோஜேதப்³ப³ங் . க³ருப⁴ண்ட³ப்பஹோனகேஸுயேவ ச வல்லிஆதீ³ஸூதி எத்த² ஆதி³-ஸத்³தே³ன வேளுமுஞ்ஜபப்³ப³ஜதிணமத்திகானங் ஸங்க³ஹோ த³ட்ட²ப்³போ³. யங் பன வத்து²வஸேன அப்பங் ஹுத்வா அக்³க⁴வஸேன மஹந்தங் ஹரிதாலஹிங்கு³லகாதி³, தங் க³ருப⁴ண்ட³ங் அப்பஹொந்தம்பி யாசிதுங் ந வட்டதீதி வத³ந்தி.
Sakaṭaṃ dethāti…pe… vaṭṭatīti mūlacchejjavasena sakaṭaṃ dethāti vattuṃ na vaṭṭati. Tāvakālikaṃ vaṭṭatīti tāvakālikaṃ katvā sabbattha yācituṃ vaṭṭati. Valliādīsu ca parapariggahitesu eseva nayoti yojetabbaṃ . Garubhaṇḍappahonakesuyeva ca valliādīsūti ettha ādi-saddena veḷumuñjapabbajatiṇamattikānaṃ saṅgaho daṭṭhabbo. Yaṃ pana vatthuvasena appaṃ hutvā agghavasena mahantaṃ haritālahiṅgulakādi, taṃ garubhaṇḍaṃ appahontampi yācituṃ na vaṭṭatīti vadanti.
ஸாதி விஞ்ஞத்திங் பராமஸதி. ஸா ச இத⁴ பரிகதா²தி³னா யேன கேனசி அதி⁴ப்பாயவிஞ்ஞாபனங் விஞ்ஞத்தீதி க³ஹேதப்³பா³. தேனாஹ ‘‘ஸப்³பே³ன ஸப்³ப³’’ந்தி, ஸப்³ப³ப்பகாரேனாதி அத்தோ². தேன ‘‘பரிகதா²தி³வஸேனபி விஞ்ஞாபனங் ந வட்டதீ’’தி தீ³பேதி. பரிகதோ²பா⁴ஸனிமித்தகம்மம்பி ஹி சீவரபிண்ட³பாதேஸு த்³வீஸு பச்சயேஸு ந வட்டதி. இதா³னி ஸேனாஸனபச்சயே அதி⁴ப்பேதங் விஞ்ஞத்திங் பரிகதா²தீ³ஹி விஸேஸெத்வா த³ஸ்ஸெந்தோ ‘‘ஆஹர தே³ஹீதி விஞ்ஞத்திமத்தமேவ ந வட்டதீ’’தி ஆஹ. பரிகதோ²பா⁴ஸனிமித்தகம்மானி வட்டந்தீதி எத்த² பரிகதா² நாம பரியாயேன கத²னங் பி⁴க்கு²ஸங்க⁴ஸ்ஸ ஸேனாஸனங் ஸம்பா³த⁴ந்திஆதி³வசனங். ஓபா⁴ஸோ நாம உஜுகமேவ அகதெ²த்வா யதா² அதி⁴ப்பாயோ விபூ⁴தோ ஹோதி, ஏவங் ஓபா⁴ஸனங், உபாஸகா, தும்ஹே குஹிங் வஸதா²தி? பாஸாதே³, ப⁴ந்தேதி. பி⁴க்கூ²னங் பன, உபாஸகா, பாஸாதோ³ ந வட்டதீதிஆதி³வசனங். நிமித்தகம்மங் நாம பச்சயே உத்³தி³ஸ்ஸ யதா² அதி⁴ப்பாயோ விஞ்ஞாயதி, ஏவங் நிமித்தகம்மங், ஸேனாஸனத்த²ங் பூ⁴மிபரிகம்மாதீ³னி கரொந்தஸ்ஸ ‘‘கிங், ப⁴ந்தே, கரோஸி, கோ காராபேதீ’’தி வுத்தே ‘‘ந கோசீ’’திஆதி³வசனங்.
Sāti viññattiṃ parāmasati. Sā ca idha parikathādinā yena kenaci adhippāyaviññāpanaṃ viññattīti gahetabbā. Tenāha ‘‘sabbena sabba’’nti, sabbappakārenāti attho. Tena ‘‘parikathādivasenapi viññāpanaṃ na vaṭṭatī’’ti dīpeti. Parikathobhāsanimittakammampi hi cīvarapiṇḍapātesu dvīsu paccayesu na vaṭṭati. Idāni senāsanapaccaye adhippetaṃ viññattiṃ parikathādīhi visesetvā dassento ‘‘āhara dehīti viññattimattameva na vaṭṭatī’’ti āha. Parikathobhāsanimittakammāni vaṭṭantīti ettha parikathā nāma pariyāyena kathanaṃ bhikkhusaṅghassa senāsanaṃ sambādhantiādivacanaṃ. Obhāso nāma ujukameva akathetvā yathā adhippāyo vibhūto hoti, evaṃ obhāsanaṃ, upāsakā, tumhe kuhiṃ vasathāti? Pāsāde, bhanteti. Bhikkhūnaṃ pana, upāsakā, pāsādo na vaṭṭatītiādivacanaṃ. Nimittakammaṃ nāma paccaye uddissa yathā adhippāyo viññāyati, evaṃ nimittakammaṃ, senāsanatthaṃ bhūmiparikammādīni karontassa ‘‘kiṃ, bhante, karosi, ko kārāpetī’’ti vutte ‘‘na kocī’’tiādivacanaṃ.
இதா³னி கி³லானபச்சயே விஞ்ஞத்திஆதி³கங் ஸப்³ப³ம்பி வட்டதீதி த³ஸ்ஸெந்தோ ஆஹ ‘‘கி³லானபச்சயே பனா’’திஆதி³. ததா² உப்பன்னங் பன பே⁴ஸஜ்ஜங் ரோகே³ வூபஸந்தே பரிபு⁴ஞ்ஜிதுங் வட்டதி, ந வட்டதீதி? தத்த² வினயத⁴ரா ‘‘ப⁴க³வதா ரோக³ஸீஸேன பரிபோ⁴க³ஸ்ஸ த்³வாரங் தி³ன்னங், தஸ்மா அரோக³காலேபி பரிபு⁴ஞ்ஜிதுங் வட்டதி, ஆபத்தி ந ஹோதீ’’தி வத³ந்தி. ஸுத்தந்திகா பன ‘‘கிஞ்சாபி ஆபத்தி ந ஹோதி, ஆஜீவங் பன கோபேதி, தஸ்மா ஸல்லேக²ப்படிபத்தியங் டி²தஸ்ஸ ந வட்டதி, ஸல்லேக²ங் கோபேதீ’’தி வத³ந்தி. உக்கமந்தீதி அபக³ச்ச²ந்தி.
Idāni gilānapaccaye viññattiādikaṃ sabbampi vaṭṭatīti dassento āha ‘‘gilānapaccaye panā’’tiādi. Tathā uppannaṃ pana bhesajjaṃ roge vūpasante paribhuñjituṃ vaṭṭati, na vaṭṭatīti? Tattha vinayadharā ‘‘bhagavatā rogasīsena paribhogassa dvāraṃ dinnaṃ, tasmā arogakālepi paribhuñjituṃ vaṭṭati, āpatti na hotī’’ti vadanti. Suttantikā pana ‘‘kiñcāpi āpatti na hoti, ājīvaṃ pana kopeti, tasmā sallekhappaṭipattiyaṃ ṭhitassa na vaṭṭati, sallekhaṃ kopetī’’ti vadanti. Ukkamantīti apagacchanti.
344. மணி கண்டே² அஸ்ஸாதி மணிகண்டோ², மணினா உபலக்கி²தோ வா கண்டோ² அஸ்ஸாதி மணிகண்டோ²தி மஜ்ஜ²பத³லோபீஸமாஸோ த³ட்ட²ப்³போ³. தே³வவண்ணந்தி தே³வத்தபா⁴வங். பஸன்னாகாரந்தி பஸன்னேஹி காதப்³ப³கிச்சங், காயவெய்யாவச்சஸங்கா²தங் உபட்டா²னந்தி வுத்தங் ஹோதி. மணியாசனாய தஸ்ஸ அனாக³மனேன அத்தனோ வட்³டி⁴ ஹோதீதி வுத்தங் ‘‘மணினா மே அத்தோ²’’தி, மந்தபத³னீஹாரேன வா ததா² வுத்தந்தி த³ட்ட²ப்³ப³ங்.
344. Maṇi kaṇṭhe assāti maṇikaṇṭho, maṇinā upalakkhito vā kaṇṭho assāti maṇikaṇṭhoti majjhapadalopīsamāso daṭṭhabbo. Devavaṇṇanti devattabhāvaṃ. Pasannākāranti pasannehi kātabbakiccaṃ, kāyaveyyāvaccasaṅkhātaṃ upaṭṭhānanti vuttaṃ hoti. Maṇiyācanāya tassa anāgamanena attano vaḍḍhi hotīti vuttaṃ ‘‘maṇinā me attho’’ti, mantapadanīhārena vā tathā vuttanti daṭṭhabbaṃ.
345. வத்தமானஸமீபேதி வத்தமானஸ்ஸ ஸமீபே அதீதே. ஏவங் வத்துங் லப்³ப⁴தீதி ‘‘ஆக³தோஸீ’’தி வத்தப்³பே³ வத்தமானஸமீபத்தா ‘‘ஆக³ச்ச²ஸீ’’தி ஏவங் வத்தமானவோஹாரேன வத்துங் லப்³ப⁴தி. லக்க²ணங் பனெத்த² ஸத்³த³ஸத்தா²னுஸாரதோ வேதி³தப்³ப³ங். ஸோ ஏவ நயோதி ‘‘ஆக³தொம்ஹீ’’தி வத்தப்³பே³ ‘‘ஆக³ச்சா²மீ’’தி அயம்பி வத்தமானஸமீபே வத்தமானவோஹாரோதி த³ஸ்ஸேதி.
345.Vattamānasamīpeti vattamānassa samīpe atīte. Evaṃ vattuṃ labbhatīti ‘‘āgatosī’’ti vattabbe vattamānasamīpattā ‘‘āgacchasī’’ti evaṃ vattamānavohārena vattuṃ labbhati. Lakkhaṇaṃ panettha saddasatthānusārato veditabbaṃ. So eva nayoti ‘‘āgatomhī’’ti vattabbe ‘‘āgacchāmī’’ti ayampi vattamānasamīpe vattamānavohāroti dasseti.
348-349. யஸ்மா பன ந ஸக்கா கேவலங் யாசனாய கிஞ்சி காதுங், தஸ்மா ‘‘ஸயங் யாசிதகேஹி உபகரணேஹீ’’தி அதி⁴ப்பாயத்தோ² வுத்தோ. உத்³த⁴ங்முக²ங் லித்தா உல்லித்தா, அதோ⁴முக²ங் லித்தா அவலித்தா. யஸ்மா பன உத்³த⁴ங்முக²ங் லிம்பந்தா யேபு⁴ய்யேன அந்தோ லிம்பந்தி, அதோ⁴முக²ங் லிம்பந்தா ச ப³ஹி, தஸ்மா வுத்தங் ‘‘உல்லித்தாதி அந்தோலித்தா, அவலித்தாதி ப³ஹிலித்தா’’தி. தத்த² உல்லித்தா நாம ட²பெத்வா துலாபிட்ட²ஸங்கா⁴தவாதபானதூ⁴மசி²த்³தா³தி³பே⁴த³ங் அலேபோகாஸங் அவஸேஸே லேபோகாஸே குட்டேஹி ஸத்³தி⁴ங் க⁴டெத்வா ச²த³னஸ்ஸ அந்தோ ஸுதா⁴ய வா மத்திகாய வா லித்தா. அவலித்தா நாம வுத்தனயேனேவ ச²த³னஸ்ஸ ப³ஹி லித்தா. உல்லித்தாவலித்தா நாம ததே²வ ச²த³னஸ்ஸ அந்தோ ச ப³ஹி ச லித்தா.
348-349. Yasmā pana na sakkā kevalaṃ yācanāya kiñci kātuṃ, tasmā ‘‘sayaṃ yācitakehi upakaraṇehī’’ti adhippāyattho vutto. Uddhaṃmukhaṃ littā ullittā, adhomukhaṃ littā avalittā. Yasmā pana uddhaṃmukhaṃ limpantā yebhuyyena anto limpanti, adhomukhaṃ limpantā ca bahi, tasmā vuttaṃ ‘‘ullittāti antolittā, avalittāti bahilittā’’ti. Tattha ullittā nāma ṭhapetvā tulāpiṭṭhasaṅghātavātapānadhūmachiddādibhedaṃ alepokāsaṃ avasese lepokāse kuṭṭehi saddhiṃ ghaṭetvā chadanassa anto sudhāya vā mattikāya vā littā. Avalittā nāma vuttanayeneva chadanassa bahi littā. Ullittāvalittā nāma tatheva chadanassa anto ca bahi ca littā.
ப்³யஞ்ஜனங் ஸமேதீதி ‘‘காரயமானேனா’’தி ஹேதுகத்துவஸேன உத்³தி³ட்ட²பத³ஸ்ஸ ‘‘காராபெந்தேனா’’தி ஹேதுகத்துவஸேனேவ நித்³தே³ஸஸ்ஸ கதத்தா ப்³யஞ்ஜனங் ஸமேதி. யதி³ ஏவங் ‘‘கரொந்தோ வா காராபெந்தோ வா’’தி கஸ்மா தஸ்ஸ பத³பா⁴ஜனங் வுத்தந்தி ஆஹ ‘‘யஸ்மா பனா’’திஆதி³. ‘‘அத்தனா விப்பகதங் பரேஹி பரியோஸாபேதீ’’திஆதி³வசனதோ ‘‘கரொந்தேனபி இத⁴ வுத்தனயேனேவ படிபஜ்ஜிதப்³ப³’’ந்தி வுத்தங். தத்த² இத⁴ வுத்தனயேனேவாதி இமஸ்மிங் ஸிக்கா²பதே³ வுத்தனயேனேவ. உபோ⁴பேதேதி காரககாராபகா. காரயமானேனாதி இமினாவ பதே³ன ஸங்க³ஹிதாதி கத²ங் ஸங்க³ஹிதா. ந ஹி காரயமானோ கரொந்தோ நாம ஹோதி, ஏவங் பனெத்த² அதி⁴ப்பாயோ வேதி³தப்³போ³ – யஸ்மா கரொந்தேனபி காரயமானேனபி இத⁴ வுத்தனயேனேவ படிபஜ்ஜிதப்³ப³ங், தஸ்மா காரயமானேன ஏவங் படிபஜ்ஜிதப்³ப³ந்தி வுத்தே பகே³வ கரொந்தேனாதி இத³ங் அத்த²தோ ஆக³தமேவாதி ‘‘காரயமானேனா’’தி ப⁴க³வதா வுத்தங். ததோ ‘‘காரயமானேனா’’தி வுத்தே ஸாமத்தி²யதோ லப்³ப⁴மானோபி அத்தோ² தேனேவ ஸங்க³ஹிதோ நாம ஹோதீதி. ப்³யஞ்ஜனங் விலோமிதங் ப⁴வெய்யாதி யஸ்மா ‘‘காரயமானேனா’’தி இமஸ்ஸ ‘‘கரொந்தேனா’’தி இத³ங் பரியாயவசனங் ந ஹோதி, தஸ்மா கரொந்தேன வா காராபெந்தேன வாதி பத³த்த²வஸேன நித்³தே³ஸே கதே ப்³யஞ்ஜனங் விருத்³த⁴ங் ப⁴வெய்யாதி அதி⁴ப்பாயோ. அத்த²மத்தமேவாதி பத³த்த²தோ ஸாமத்தி²யதோ ச லப்³ப⁴மானங் அத்த²மத்தமேவ.
Byañjanaṃ sametīti ‘‘kārayamānenā’’ti hetukattuvasena uddiṭṭhapadassa ‘‘kārāpentenā’’ti hetukattuvaseneva niddesassa katattā byañjanaṃ sameti. Yadi evaṃ ‘‘karonto vā kārāpento vā’’ti kasmā tassa padabhājanaṃ vuttanti āha ‘‘yasmā panā’’tiādi. ‘‘Attanā vippakataṃ parehi pariyosāpetī’’tiādivacanato ‘‘karontenapi idha vuttanayeneva paṭipajjitabba’’nti vuttaṃ. Tattha idha vuttanayenevāti imasmiṃ sikkhāpade vuttanayeneva. Ubhopeteti kārakakārāpakā. Kārayamānenāti imināva padena saṅgahitāti kathaṃ saṅgahitā. Na hi kārayamāno karonto nāma hoti, evaṃ panettha adhippāyo veditabbo – yasmā karontenapi kārayamānenapi idha vuttanayeneva paṭipajjitabbaṃ, tasmā kārayamānena evaṃ paṭipajjitabbanti vutte pageva karontenāti idaṃ atthato āgatamevāti ‘‘kārayamānenā’’ti bhagavatā vuttaṃ. Tato ‘‘kārayamānenā’’ti vutte sāmatthiyato labbhamānopi attho teneva saṅgahito nāma hotīti. Byañjanaṃvilomitaṃ bhaveyyāti yasmā ‘‘kārayamānenā’’ti imassa ‘‘karontenā’’ti idaṃ pariyāyavacanaṃ na hoti, tasmā karontena vā kārāpentena vāti padatthavasena niddese kate byañjanaṃ viruddhaṃ bhaveyyāti adhippāyo. Atthamattamevāti padatthato sāmatthiyato ca labbhamānaṃ atthamattameva.
உத்³தே³ஸோதி உத்³தி³ஸிதப்³போ³. அப்³போ³ஹாரிகந்தி அப்பமாணங். ‘‘ஆயாமதோ ச வித்தா²ரதோ சா’’தி அவத்வா விகப்பத்த²ஸ்ஸ வா-ஸத்³த³ஸ்ஸ வுத்தத்தா ஏகதோபா⁴கே³ன வட்³டி⁴தேபி ஆபத்தியேவாதி த³ஸ்ஸெந்தோ ‘‘யோ பனா’’திஆதி³மாஹ. திஹத்தா²தி வட்³ட⁴கீஹத்தே²ன திஹத்தா². பமாணயுத்தோ மஞ்சோதி பகதிவித³த்தி²யா நவவித³த்தி²ப்பமாணோ மஞ்சோ. பமாணிகா காரேதப்³பா³தி உக்கட்ட²ப்பமாணங் ஸந்தா⁴ய வுத்தத்தா உக்கட்ட²ப்பமாணயுத்தாவ குடி அதே³ஸிதவத்து²கா ந வட்டதி, பமாணதோ பன ஊனதரா அதே³ஸிதவத்து²காபி வட்டதீதி கஸ்ஸசி ஸந்தே³ஹோ ஸியாதி தங்னிவத்தனத்த²ங் ‘‘பமாணதோ ஊனதரம்பீ’’திஆதி³ வுத்தங். தத்த² பமாணதோ ஊனதரந்தி பாளியங் வுத்தப்பமாணதோ ஊனதரங். பச்சி²மேன பமாணேன சதுஹத்த²தோ ஊனதரா குடி நாம ந ஹோதீதி சதுஹத்த²தோ பட்டா²ய குடிலக்க²ணப்பத்தங் குடிங் த³ஸ்ஸேதுங் ‘‘சதுஹத்த²ங் பஞ்சஹத்த²ம்பீ’’தி வுத்தங். கலலலேபோதி கேனசி ஸிலேஸேன கதலேபோ, தம்ப³மத்திகாதி³கலலலேபோ வா. அலேபோ ஏவாதி அப்³போ³ஹாரிகாயேவாதி அதி⁴ப்பாயோ. பிட்ட²ஸங்கா⁴டோ த்³வாரபா³ஹா. ஓலோகெத்வாபீதி அபலோகெத்வாபி, அபலோகனகம்மவஸேனபி காதுங் வட்டதீதி அதி⁴ப்பாயோ.
Uddesoti uddisitabbo. Abbohārikanti appamāṇaṃ. ‘‘Āyāmato ca vitthārato cā’’ti avatvā vikappatthassa vā-saddassa vuttattā ekatobhāgena vaḍḍhitepi āpattiyevāti dassento ‘‘yo panā’’tiādimāha. Tihatthāti vaḍḍhakīhatthena tihatthā. Pamāṇayutto mañcoti pakatividatthiyā navavidatthippamāṇo mañco. Pamāṇikā kāretabbāti ukkaṭṭhappamāṇaṃ sandhāya vuttattā ukkaṭṭhappamāṇayuttāva kuṭi adesitavatthukā na vaṭṭati, pamāṇato pana ūnatarā adesitavatthukāpi vaṭṭatīti kassaci sandeho siyāti taṃnivattanatthaṃ ‘‘pamāṇato ūnatarampī’’tiādi vuttaṃ. Tattha pamāṇato ūnataranti pāḷiyaṃ vuttappamāṇato ūnataraṃ. Pacchimena pamāṇena catuhatthato ūnatarā kuṭi nāma na hotīti catuhatthato paṭṭhāya kuṭilakkhaṇappattaṃ kuṭiṃ dassetuṃ ‘‘catuhatthaṃ pañcahatthampī’’ti vuttaṃ. Kalalalepoti kenaci silesena katalepo, tambamattikādikalalalepo vā. Alepo evāti abbohārikāyevāti adhippāyo. Piṭṭhasaṅghāṭo dvārabāhā. Oloketvāpīti apaloketvāpi, apalokanakammavasenapi kātuṃ vaṭṭatīti adhippāyo.
353. யதா² ஸீஹாதீ³னங் கோ³சராய பக்கமந்தானங் நிப³த்³த⁴க³மனமக்³கோ³ ந வட்டதி, ஏவங் ஹத்தீ²னம்பி நிப³த்³த⁴க³மனமக்³கோ³ ந வட்டதி. ஏதேஸந்தி ஸீஹாதீ³னங். சாரிபூ⁴மீதி கோ³சரபூ⁴மி. ந க³ஹிதாதி ந வாரிதாதி அதி⁴ப்பாயோ. ஆரொக்³யத்தா²யாதி நிருபத்³த³வத்தா²ய. ஸேஸானீதி புப்³ப³ண்ணனிஸ்ஸிதாதீ³னி. புப்³ப³ண்ணனிஸ்ஸிதந்தி எத்த² புப்³ப³ண்ணவிருஹனட்டா²னங் புப்³ப³ண்ண-ஸத்³தே³ன க³ஹிதங். தேனாஹ – ‘‘ஸத்தன்னங் த⁴ஞ்ஞானங்…பே॰… டி²த’’ந்தி. அபி⁴ஹனந்தி எத்தா²தி அப்³பா⁴கா⁴தங். ‘‘வேரிக⁴ர’’ந்தி வுத்தமேவத்த²ங் விபா⁴வேதுங் ‘‘சோரானங் மாரணத்தா²ய கத’’ந்தி வுத்தங். த⁴ம்மக³ந்தி⁴காதி ஹத்த²பாதா³தி³சி²ந்த³னக³ந்தி⁴கா.
353. Yathā sīhādīnaṃ gocarāya pakkamantānaṃ nibaddhagamanamaggo na vaṭṭati, evaṃ hatthīnampi nibaddhagamanamaggo na vaṭṭati. Etesanti sīhādīnaṃ. Cāribhūmīti gocarabhūmi. Na gahitāti na vāritāti adhippāyo. Ārogyatthāyāti nirupaddavatthāya. Sesānīti pubbaṇṇanissitādīni. Pubbaṇṇanissitanti ettha pubbaṇṇaviruhanaṭṭhānaṃ pubbaṇṇa-saddena gahitaṃ. Tenāha – ‘‘sattannaṃ dhaññānaṃ…pe… ṭhita’’nti. Abhihananti etthāti abbhāghātaṃ. ‘‘Verighara’’nti vuttamevatthaṃ vibhāvetuṃ ‘‘corānaṃ māraṇatthāya kata’’nti vuttaṃ. Dhammagandhikāti hatthapādādichindanagandhikā.
ஆவிஜ்ஜிதுங் ந ஸக்கா ஹோதீதி சி²ந்த³தடாதி³ஸம்ப⁴வதோ ந ஸக்கா ஹோதி ஆவிஜ்ஜிதுங். பாசினந்தி குடிவத்து²ஸாமந்தா சினிதப்³ப³அதி⁴ட்டா²னங். கிஞ்சாபி இத⁴ புப்³ப³பயோக³ஸஹபயோகா³னங் அதி³ன்னாதா³னே விய விஸேஸோ நத்தி², ததா²பி தேஸங் விபா⁴கே³ன த³ஸ்ஸனங் சி²ந்தி³த்வா புன காதப்³பா³தி எத்த² குடியா பே⁴த³னபரிச்சே²த³த³ஸ்ஸனத்த²ங் கதங். தத³த்தா²யாதி தச்ச²னத்தா²ய. ஏவங் கதந்தி அதே³ஸிதவத்து²ங் பமாணாதிக்கந்தங் வா கதங். தா³ருனா கதங் குட்டங் எத்தா²தி தா³ருகுட்டிகா, குடி. ஸிலாகுட்டிகந்திஆதீ³ஸுபி ஏஸேவ நயோ. பண்ணஸாலந்தி ப³ஹி பண்ணேஹி சா²தே³தப்³ப³ங் உல்லித்தாவலித்தங் குடிமேவ வத³தி. தேனேவாஹ ‘‘ஸபி⁴த்திச்ச²த³னங் லிம்பிஸ்ஸாமீ’’தி.
Āvijjituṃna sakkā hotīti chindataṭādisambhavato na sakkā hoti āvijjituṃ. Pācinanti kuṭivatthusāmantā cinitabbaadhiṭṭhānaṃ. Kiñcāpi idha pubbapayogasahapayogānaṃ adinnādāne viya viseso natthi, tathāpi tesaṃ vibhāgena dassanaṃ chinditvā puna kātabbāti ettha kuṭiyā bhedanaparicchedadassanatthaṃ kataṃ. Tadatthāyāti tacchanatthāya. Evaṃ katanti adesitavatthuṃ pamāṇātikkantaṃ vā kataṃ. Dārunā kataṃ kuṭṭaṃ etthāti dārukuṭṭikā, kuṭi. Silākuṭṭikantiādīsupi eseva nayo. Paṇṇasālanti bahi paṇṇehi chādetabbaṃ ullittāvalittaṃ kuṭimeva vadati. Tenevāha ‘‘sabhitticchadanaṃ limpissāmī’’ti.
அந்தோலேபேனேவ நிட்டா²பேதுகாமங் ஸந்தா⁴ய ‘‘அந்தோலேபே வா’’திஆதி³ வுத்தங். ப³ஹிலேபே வாதி எத்தா²பி ஏஸேவ நயோ. தஸ்மிங் த்³வாரப³த்³தே⁴ வா வாதபானே வா ட²பிதேதி யோஜேதப்³ப³ங். தஸ்ஸோகாஸந்தி தஸ்ஸ த்³வாரப³த்³த⁴ஸ்ஸ வா வாதபானஸ்ஸ வா ஓகாஸங். புன வட்³டெ⁴த்வா வாதி புப்³பே³வ ட²பிதோகாஸங் கு²த்³த³கங் சே, பே⁴த³னேன புன வட்³டெ⁴த்வா. லேபோ ந க⁴டியதீதி புப்³பே³ தி³ன்னலேபோ த்³வாரப³த்³தே⁴ன வா வாதபானேன வா ஸத்³தி⁴ங் ந க⁴டியதி, ஏகாப³த்³த⁴ங் ஹுத்வா ந திட்ட²தீதி வுத்தங் ஹோதி. தந்தி த்³வாரப³த்³த⁴ங் வா வாதபானங் வா. பட²மமேவ ஸங்கா⁴தி³ஸேஸோதி லேபகிச்சஸ்ஸ நிட்டி²தத்தா த்³வாரப³த்³த⁴ங் வா வாதபானங் வா ட²பனதோ புப்³பே³யேவ ஸங்கா⁴தி³ஸேஸோ. அட்ட²ங்கு³லமத்தேன அப்பத்தச்ச²த³னங் கத்வாதி எத்த² ஏவங் மே ஆபத்தி ந ஸியாதி பி⁴த்தியங் வா ச²த³னே வா ஏகங்கு³லமத்தம்பி ஓகாஸங் லேபேன அக⁴டெத்வா ட²பேதி, வட்டதீதி வத³ந்தி. மத்திகாகுட்டமேவ மத்திகாலேபஸங்க்²யங் க³ச்ச²தீதி ஆஹ – ‘‘ஸசே மத்திகாய குட்டங் கரோதி, ச²த³னலேபேன ஸத்³தி⁴ங் க⁴டனே ஆபத்தீ’’தி. உபி⁴ன்னங் அனாபத்தீதி புரிமஸ்ஸ லேபஸ்ஸ அக⁴டிதத்தா து³தியஸ்ஸ அத்துத்³தே³ஸிகதாஸம்ப⁴வதோ உபி⁴ன்னங் அனாபத்தி, தஸ்மா வினாபி வத்தஸீஸேன தேன அனாணத்தோ தஸ்ஸ கரோமீதி கரோதி, உபி⁴ன்னங் அனாபத்தியேவ. ஸசே தேன ஆணத்தோ கரோதி, மூலட்ட²ஸ்ஸேவ ஆபத்தி.
Antolepeneva niṭṭhāpetukāmaṃ sandhāya ‘‘antolepe vā’’tiādi vuttaṃ. Bahilepe vāti etthāpi eseva nayo. Tasmiṃ dvārabaddhe vā vātapāne vā ṭhapiteti yojetabbaṃ. Tassokāsanti tassa dvārabaddhassa vā vātapānassa vā okāsaṃ. Puna vaḍḍhetvā vāti pubbeva ṭhapitokāsaṃ khuddakaṃ ce, bhedanena puna vaḍḍhetvā. Lepo na ghaṭiyatīti pubbe dinnalepo dvārabaddhena vā vātapānena vā saddhiṃ na ghaṭiyati, ekābaddhaṃ hutvā na tiṭṭhatīti vuttaṃ hoti. Tanti dvārabaddhaṃ vā vātapānaṃ vā. Paṭhamameva saṅghādisesoti lepakiccassa niṭṭhitattā dvārabaddhaṃ vā vātapānaṃ vā ṭhapanato pubbeyeva saṅghādiseso. Aṭṭhaṅgulamattena appattacchadanaṃ katvāti ettha evaṃ me āpatti na siyāti bhittiyaṃ vā chadane vā ekaṅgulamattampi okāsaṃ lepena aghaṭetvā ṭhapeti, vaṭṭatīti vadanti. Mattikākuṭṭameva mattikālepasaṅkhyaṃ gacchatīti āha – ‘‘sace mattikāya kuṭṭaṃ karoti, chadanalepena saddhiṃ ghaṭane āpattī’’ti. Ubhinnaṃ anāpattīti purimassa lepassa aghaṭitattā dutiyassa attuddesikatāsambhavato ubhinnaṃ anāpatti, tasmā vināpi vattasīsena tena anāṇatto tassa karomīti karoti, ubhinnaṃ anāpattiyeva. Sace tena āṇatto karoti, mūlaṭṭhasseva āpatti.
354. ச²த்திங்ஸ சதுக்கானி நாம ‘‘பி⁴க்கு² குடிங் கரோதீ’’திஆதி³ம்ஹி பட²மவாரே அதே³ஸிதவத்து²கசதுக்கங் தே³ஸிதவத்து²கசதுக்கங் பமாணாதிக்கந்தசதுக்கங் பமாணிகசதுக்கங் அதே³ஸிதவத்து²கப்பமாணாதிக்கந்தசதுக்கங் தே³ஸிதவத்து²கப்பமாணிகசதுக்கந்தி ச² சதுக்கானி, ஏவங் ஸமாதி³ஸதிவாராதீ³ஸுபி பஞ்சஸூதி ச²த்திங்ஸ. ஆபத்திபே⁴த³த³ஸ்ஸனத்த²ங் வுத்தானீதி ‘‘ஸாரம்பே⁴ சே பி⁴க்கு² வத்து²ஸ்மிங் அபரிக்கமனே’’தி அவிஸேஸேன மாதிகாய வுத்தத்தா ஸாரம்ப⁴அபரிக்கமனேஸுபி ஸங்கா⁴தி³ஸேஸோவ ஸியாதி மிச்சா²கா³ஹனிவத்தனத்த²ங் ஸாரம்பே⁴ அபரிக்கமனே ச து³க்கடங், அதே³ஸிதவத்து²கதாய பமாணாதிக்கந்ததாய ச ஸங்கா⁴தி³ஸேஸோதி ஏவங் ஆபத்திபே⁴த³த³ஸ்ஸனத்த²ங் வுத்தானி.
354.Chattiṃsa catukkāni nāma ‘‘bhikkhu kuṭiṃ karotī’’tiādimhi paṭhamavāre adesitavatthukacatukkaṃ desitavatthukacatukkaṃ pamāṇātikkantacatukkaṃ pamāṇikacatukkaṃ adesitavatthukappamāṇātikkantacatukkaṃ desitavatthukappamāṇikacatukkanti cha catukkāni, evaṃ samādisativārādīsupi pañcasūti chattiṃsa. Āpattibhedadassanatthaṃ vuttānīti ‘‘sārambhe ce bhikkhu vatthusmiṃ aparikkamane’’ti avisesena mātikāya vuttattā sārambhaaparikkamanesupi saṅghādisesova siyāti micchāgāhanivattanatthaṃ sārambhe aparikkamane ca dukkaṭaṃ, adesitavatthukatāya pamāṇātikkantatāya ca saṅghādisesoti evaṃ āpattibhedadassanatthaṃ vuttāni.
355-361. ‘‘த்³வீஹி ஸங்கா⁴தி³ஸேஸேஹீ’’தி வத்தப்³பே³ விப⁴த்திப்³யத்தயேன ச வசனப்³யத்தயேன ச த்³வின்னங் ஸங்கா⁴தி³ஸேஸேனாதி வுத்தந்தி ஆஹ ‘‘த்³வீஹி ஸங்கா⁴தி³ஸேஸேஹி…பே॰… அத்தோ² வேதி³தப்³போ³’’தி. ‘‘அஞ்ஞஸ்ஸ வா தா³தப்³பா³’’தி வுத்தத்தா விப்பகதங் குடிங் லபி⁴த்வா அத்தனோ அத்தா²ய கரொந்தஸ்ஸபி ஆதி³தோ பட்டா²ய அகதத்தா அனாபத்தியேவாதி வத³ந்தி. அபசினிதப்³பா³தி வித்³த⁴ங்ஸேதப்³பா³. பூ⁴மிஸமங் கத்வாதி குடிவத்து²ஸமங் கத்வா.
355-361. ‘‘Dvīhi saṅghādisesehī’’ti vattabbe vibhattibyattayena ca vacanabyattayena ca dvinnaṃ saṅghādisesenāti vuttanti āha ‘‘dvīhi saṅghādisesehi…pe… attho veditabbo’’ti. ‘‘Aññassa vā dātabbā’’ti vuttattā vippakataṃ kuṭiṃ labhitvā attano atthāya karontassapi ādito paṭṭhāya akatattā anāpattiyevāti vadanti. Apacinitabbāti viddhaṃsetabbā. Bhūmisamaṃ katvāti kuṭivatthusamaṃ katvā.
364. ந ஹெத்த² லேபோ க⁴டியதீதி ச²த³னலேபஸ்ஸ அபா⁴வதோ வுத்தங், விஸுங்யேவ அனுஞ்ஞாதத்தா பன ஸசேபி லேணஸ்ஸ அந்தோ உபரிபா⁴கே³ சித்தகம்மாதி³கரணத்த²ங் லேபங் தெ³ந்தி, வட்டதியேவ. லேபதா³னவஸேன அகதா இட்ட²காதி³கு³ஹா கு³ஹா நாமாதி க³ண்டி²பதே³ஸு வுத்தங். திணேஹி வா பண்ணேஹி வா சா²தி³தகுடிகாவ வுத்தாதி ‘‘குக்குடச்சி²ககே³ஹங் வட்டதீ’’தி வத்வா ‘‘ச²த³னங் த³ண்ட³கேஹீ’’திஆதி³னா புன தங் த³ஸ்ஸெந்தேஹி திணபண்ணச்ச²த³னா குடிகாவ வுத்தா. ச²த³னங் த³ண்ட³கேஹி ஜாலப³ந்த⁴ங் கத்வாதி ச²த³னங் தீ³க⁴தோ திரியதோ ச ட²பிதத³ண்ட³கேஹி ஜாலங் விய ப³ந்தி⁴த்வா. ஓகு³ம்பெ²த்வாதி திணாதி³ங் வித்³த⁴ங்ஸெத்வா. பி⁴த்திலேபேன ஸத்³தி⁴ங் லேபே க⁴டிதேதி எத்த² உல்லித்தாவலித்தபா⁴வஸ்ஸ ச²த³னங் ஸந்தா⁴ய வுத்தத்தா ஸசேபி பி⁴த்திலேபேன அனத்தி²கோ ஹோதி, ச²த³னலேபே ஸமந்ததோ பி⁴த்தியா அப்பமத்தகேனபி க⁴டிதே பி⁴த்திலேபேன வினாபி ஆபத்தியேவாதி வத³ந்தி. உபசிகாமோசனத்த²மேவ ஹெட்டா² பாஸாணகுட்டங் கத்வா தங் அலிம்பித்வா உபரி லிம்பதி, லேபோ ந க⁴டியதி நாம, அனாபத்தியேவாதி இமினா அட்ட²கதா²வசனேன தங் ந ஸமேதி. தத்த² கேசி வத³ந்தி ‘‘பி⁴த்திங் அலிம்பிதுகாமதாய அபா⁴வதோ ச²த³னலேபே பாஸாணகுட்டேன ஸத்³தி⁴ங் க⁴டிதேபி தத்த² அனாபத்தி வுத்தா’’தி, தம்பி ந யுத்தங். ‘‘உபசிகாமோசனத்த²மேவா’’தி ஹி வுத்தத்தா பாஸாணகுட்டே புன லிம்பிதுகாமதாய அபா⁴வோயேவ விஞ்ஞாயதி, தேனேவ ‘‘தங் அலிம்பித்வா’’தி வுத்தங். தஸ்மா ‘‘உல்லித்தாதி³பா⁴வோ…பே॰… ச²த³னமேவ ஸந்தா⁴ய வுத்தோ’’தி இத³ங் ஸதிபி பி⁴த்திலேபே ச²த³னலேபேன வினா ஆபத்தி ந ஹோதீதி ச²த³னலேபஸ்ஸ பதா⁴னபா⁴வத³ஸ்ஸனத்த²ங் வுத்தங், ந பன பி⁴த்திலேபேன வினாபி ஆபத்தி ஹோதீதி த³ஸ்ஸனத்த²ந்தி வத³ந்தி, இத³மேவ செத்த² யுத்ததரந்தி அம்ஹாகங் க²ந்தி. எத்தா²தி திணகுடிகாய.
364.Na hettha lepo ghaṭiyatīti chadanalepassa abhāvato vuttaṃ, visuṃyeva anuññātattā pana sacepi leṇassa anto uparibhāge cittakammādikaraṇatthaṃ lepaṃ denti, vaṭṭatiyeva. Lepadānavasena akatā iṭṭhakādiguhā guhā nāmāti gaṇṭhipadesu vuttaṃ. Tiṇehi vā paṇṇehi vā chāditakuṭikāva vuttāti ‘‘kukkuṭacchikagehaṃ vaṭṭatī’’ti vatvā ‘‘chadanaṃ daṇḍakehī’’tiādinā puna taṃ dassentehi tiṇapaṇṇacchadanā kuṭikāva vuttā. Chadanaṃ daṇḍakehi jālabandhaṃ katvāti chadanaṃ dīghato tiriyato ca ṭhapitadaṇḍakehi jālaṃ viya bandhitvā. Ogumphetvāti tiṇādiṃ viddhaṃsetvā. Bhittilepena saddhiṃ lepe ghaṭiteti ettha ullittāvalittabhāvassa chadanaṃ sandhāya vuttattā sacepi bhittilepena anatthiko hoti, chadanalepe samantato bhittiyā appamattakenapi ghaṭite bhittilepena vināpi āpattiyevāti vadanti. Upacikāmocanatthameva heṭṭhā pāsāṇakuṭṭaṃ katvā taṃ alimpitvā upari limpati, lepo na ghaṭiyati nāma, anāpattiyevāti iminā aṭṭhakathāvacanena taṃ na sameti. Tattha keci vadanti ‘‘bhittiṃ alimpitukāmatāya abhāvato chadanalepe pāsāṇakuṭṭena saddhiṃ ghaṭitepi tattha anāpatti vuttā’’ti, tampi na yuttaṃ. ‘‘Upacikāmocanatthamevā’’ti hi vuttattā pāsāṇakuṭṭe puna limpitukāmatāya abhāvoyeva viññāyati, teneva ‘‘taṃ alimpitvā’’ti vuttaṃ. Tasmā ‘‘ullittādibhāvo…pe… chadanameva sandhāya vutto’’ti idaṃ satipi bhittilepe chadanalepena vinā āpatti na hotīti chadanalepassa padhānabhāvadassanatthaṃ vuttaṃ, na pana bhittilepena vināpi āpatti hotīti dassanatthanti vadanti, idameva cettha yuttataranti amhākaṃ khanti. Etthāti tiṇakuṭikāya.
எத்த² ச திணகுடிகாய ஏவ ஸப்³ப³தா² அனாபத்திபா⁴வஸ்ஸ த³ஸ்ஸனங் பரிவாரபாளிங் ஆனெத்வா திணகுடிகாய ஸாரம்பா⁴தி³பச்சயாபி அனாபத்திபா⁴வோ ஸுகே²ன ஸக்கா ஸாதே⁴துந்தி கதங். திணகுடிகாய ச ஸப்³ப³தா² அனாபத்திபா⁴வே ஸாதி⁴தே தேனேவ நயேன லேணகு³ஹாதீ³ஸுபி ஸாரம்பா⁴தி³பச்சயாபி அனாபத்திபா⁴வோ ஸக்கா விஞ்ஞாதுந்தி. தேனேவ ‘‘யங் பனா’’திஆதி³ வுத்தங். ததா² ஹி திணகுடிகாய ஸாரம்பா⁴தி³பச்சயாபி அனாபத்திபா⁴வே ஸாதி⁴தே தேனேவ நயேன அஞ்ஞஸ்ஸத்தா²ய கரொந்தஸ்ஸபி ஸாரம்பா⁴தி³பச்சயாபி அனாபத்திபா⁴வோ அத்த²தோ த³ஸ்ஸிதோயேவ ஹோதி. ஏவஞ்ச ஸதி பி⁴க்கு² ஸமாதி³ஸித்வா பக்கமதி ‘‘குடிங் மே கரோதா²’’தி, ஸமாதி³ஸதி ச தே³ஸிதவத்து²கா ச ஹோது அனாரம்பா⁴ ச ஸபரிக்கமனா சாதி, தஸ்ஸ குடிங் கரொந்தி அதே³ஸிதவத்து²கங் ஸாரம்ப⁴ங் அபரிக்கமனங். ‘‘ஆபத்தி காருகானங் திண்ணங் து³க்கடான’’ந்தி பாளியங் அஞ்ஞஸ்ஸத்தா²ய கரொந்தஸ்ஸபி ஸாரம்பா⁴தி³பச்சயாபி து³க்கடங் கஸ்மா வுத்தந்தி இமங் சோத³னங் மனஸி நிதா⁴ய ‘‘யங் பன…பே॰… அகரணபச்சயா வுத்த’’ந்தி இத³ங் வுத்தங். அயஞ்ஹெத்த² அதி⁴ப்பாயோ – அஞ்ஞஸ்ஸத்தா²ய கரொந்தஸ்ஸபி ஸாரம்பா⁴தி³பச்சயாபி அனாபத்தியேவ. ‘‘ஆபத்தி காருகானங் திண்ணங் து³க்கடான’’ந்தி இத³ங் பன அஞ்ஞஸ்ஸத்தா²ய கரொந்தஸ்ஸ ந ஸாரம்பா⁴தி³பச்சயா ஆபத்தித³ஸ்ஸனத்த²ங் வுத்தங், கிஞ்சரஹி யதா²ஸமாதி³ட்டா²ய அகரணபச்சயா ஆபத்தித³ஸ்ஸனத்த²ந்தி. யஸ்மா ப³ஹூஸு பொத்த²கேஸு ஸதஸோதி⁴தஸம்மதே ச புராணபொத்த²கே அயமேவ பாட²க்கமோ தி³ஸ்ஸதி, தஸ்மா யதா²தி³ட்ட²பாடா²னுக்கமேனேவெத்த² அத்தோ² பகாஸிதோ. கத்த²சி பொத்த²கே பன ‘‘குடிலக்க²ணப்பத்தம்பி குடிங்…பே॰… அனாபத்தீ’’தி இமஸ்ஸானந்தரங் ‘‘யங் பனா’’திஆதி³பாட²ங் லிக²ந்தி, ஏவஞ்ச ஸதி தத்த² அதி⁴ப்பாயோ பாகடோயேவ. அனாபத்தீதி வத்வாதி உபோஸதா²கா³ரஞ்ச ப⁴விஸ்ஸதி, அஹஞ்ச வஸிஸ்ஸாமீதிஆதீ³ஸு வாஸாகா³ரத்தா²ய ஏவ அனியமிதத்தா அனாபத்தீதி வத்வா.
Ettha ca tiṇakuṭikāya eva sabbathā anāpattibhāvassa dassanaṃ parivārapāḷiṃ ānetvā tiṇakuṭikāya sārambhādipaccayāpi anāpattibhāvo sukhena sakkā sādhetunti kataṃ. Tiṇakuṭikāya ca sabbathā anāpattibhāve sādhite teneva nayena leṇaguhādīsupi sārambhādipaccayāpi anāpattibhāvo sakkā viññātunti. Teneva ‘‘yaṃ panā’’tiādi vuttaṃ. Tathā hi tiṇakuṭikāya sārambhādipaccayāpi anāpattibhāve sādhite teneva nayena aññassatthāya karontassapi sārambhādipaccayāpi anāpattibhāvo atthato dassitoyeva hoti. Evañca sati bhikkhu samādisitvā pakkamati ‘‘kuṭiṃ me karothā’’ti, samādisati ca desitavatthukā ca hotu anārambhā ca saparikkamanā cāti, tassa kuṭiṃ karonti adesitavatthukaṃ sārambhaṃ aparikkamanaṃ. ‘‘Āpatti kārukānaṃ tiṇṇaṃ dukkaṭāna’’nti pāḷiyaṃ aññassatthāya karontassapi sārambhādipaccayāpi dukkaṭaṃ kasmā vuttanti imaṃ codanaṃ manasi nidhāya ‘‘yaṃ pana…pe… akaraṇapaccayā vutta’’nti idaṃ vuttaṃ. Ayañhettha adhippāyo – aññassatthāya karontassapi sārambhādipaccayāpi anāpattiyeva. ‘‘Āpatti kārukānaṃ tiṇṇaṃ dukkaṭāna’’nti idaṃ pana aññassatthāya karontassa na sārambhādipaccayā āpattidassanatthaṃ vuttaṃ, kiñcarahi yathāsamādiṭṭhāya akaraṇapaccayā āpattidassanatthanti. Yasmā bahūsu potthakesu satasodhitasammate ca purāṇapotthake ayameva pāṭhakkamo dissati, tasmā yathādiṭṭhapāṭhānukkamenevettha attho pakāsito. Katthaci potthake pana ‘‘kuṭilakkhaṇappattampi kuṭiṃ…pe… anāpattī’’ti imassānantaraṃ ‘‘yaṃ panā’’tiādipāṭhaṃ likhanti, evañca sati tattha adhippāyo pākaṭoyeva. Anāpattīti vatvāti uposathāgārañca bhavissati, ahañca vasissāmītiādīsu vāsāgāratthāya eva aniyamitattā anāpattīti vatvā.
பமாணாதிக்கந்தகுடிகரணலக்க²ணா கிரியாயேவ, அதே³ஸிதவத்து²மூலிகாயபி ஆபத்தியா அங்க³ங் ஹோதி பமாணாதிக்கந்தமூலிகாயபி, தது³ப⁴யங் ஏகதோ கத்வா ‘‘கிரியாகிரியதோ’’தி வுத்தங். வத்து²ங் அதே³ஸாபெத்வா பமாணயுத்தங் குடிங் கரொந்தஸ்ஸபி வத்து²ங் தே³ஸாபெத்வா அகிரியாய குடிகரணகிரியாய ச ஸமுட்டா²னதோ கிரியாகிரியதோவ ஸமுட்டா²தீதி வேதி³தப்³ப³ங். அசித்தகந்தி பண்ணத்திஅஜானநசித்தேன அசித்தகங். உல்லித்தாதீ³னங் அஞ்ஞதரதா, ஹெட்டி²மப்பமாணஸம்ப⁴வோ, அதே³ஸிதவத்து²தா, பமாணாதிக்கந்ததா, அத்துத்³தே³ஸிகதா, வாஸாகா³ரதா, லேபக⁴ட்டனாதி இமானெத்த² ச² வா ஸத்த வா அங்கா³னி.
Pamāṇātikkantakuṭikaraṇalakkhaṇā kiriyāyeva, adesitavatthumūlikāyapi āpattiyā aṅgaṃ hoti pamāṇātikkantamūlikāyapi, tadubhayaṃ ekato katvā ‘‘kiriyākiriyato’’ti vuttaṃ. Vatthuṃ adesāpetvā pamāṇayuttaṃ kuṭiṃ karontassapi vatthuṃ desāpetvā akiriyāya kuṭikaraṇakiriyāya ca samuṭṭhānato kiriyākiriyatova samuṭṭhātīti veditabbaṃ. Acittakanti paṇṇattiajānanacittena acittakaṃ. Ullittādīnaṃ aññataratā, heṭṭhimappamāṇasambhavo, adesitavatthutā, pamāṇātikkantatā, attuddesikatā, vāsāgāratā, lepaghaṭṭanāti imānettha cha vā satta vā aṅgāni.
குடிகாரஸிக்கா²பத³வண்ணனா நிட்டி²தா.
Kuṭikārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. குடிகாரஸிக்கா²பத³ங் • 6. Kuṭikārasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
