| Library / Tipiṭaka / д̇ибидага • Tipiṭaka / винаяавинижчаяа-дийгаа • Vinayavinicchaya-ṭīkā |
лагкан̣агат̇ааван̣н̣анаа
Lakkhaṇakathāvaṇṇanā
837. ид̇од̇и саад̇хааран̣аасаад̇хааран̣агат̇ааяа барам̣. саб̣б̣аг̇анд̇и саб̣б̣асигкаабад̣̇асаад̇хааран̣ам̣. вад̣̇ад̇о мзд̇и вад̣̇ад̇о мама важанам̣. ниб̣од̇хат̇аад̇и нисаамзт̇а, згаг̇г̇ажид̇д̇аа худ̇ваа саггажжам̣ сун̣аат̇аад̇и ад̇т̇о.
837.Itoti sādhāraṇāsādhāraṇakathāya paraṃ. Sabbaganti sabbasikkhāpadasādhāraṇaṃ. Vadato meti vadato mama vacanaṃ. Nibodhathāti nisāmetha, ekaggacittā hutvā sakkaccaṃ suṇāthāti attho.
838-9. ‘‘вибад̇д̇и аабад̇д̇и анаабад̇д̇ий’’д̇и бад̣̇ажчзд̣̇о. ‘‘аан̣ад̇д̇и ан̇г̇а’’нд̇и бад̣̇ажчзд̣̇о. важ̇ж̇агаммабабхзд̣̇аганд̇и важ̇ж̇абабхзд̣̇агам̣ гаммабабхзд̣̇агам̣. д̇игад̣̇ваяанд̇и гусалад̇д̇игавзд̣̇анаад̇д̇игад̣̇ваяам̣. саб̣б̣ад̇т̇аад̇и ид̣̇ам̣ бана сад̇д̇арасавид̇хасаб̣б̣асаад̇хааран̣алагкан̣ам̣. саб̣б̣ад̇т̇а саб̣б̣зсу сигкаабад̣̇зсу.
838-9. ‘‘Vipatti āpatti anāpattī’’ti padacchedo. ‘‘Āṇatti aṅga’’nti padacchedo. Vajjakammapabhedakanti vajjapabhedakaṃ kammapabhedakaṃ. Tikadvayanti kusalattikavedanāttikadvayaṃ. Sabbatthāti idaṃ pana sattarasavidhasabbasādhāraṇalakkhaṇaṃ. Sabbattha sabbesu sikkhāpadesu.
840. ид̇ха имасмим̣ сад̇д̇арасавид̇хз яам̣ лагкан̣ам̣ буб̣б̣з вуд̇д̇анаяам̣, яан̃жа уд̇д̇аанам̣, д̇ам̣ саб̣б̣ам̣ важ̇ж̇зд̇ваа ад̇т̇аж̇од̇анам̣ ад̇т̇аббагаасанам̣ гариссаамийд̇и яож̇анаа.
840.Idha imasmiṃ sattarasavidhe yaṃ lakkhaṇaṃ pubbe vuttanayaṃ, yañca uttānaṃ, taṃ sabbaṃ vajjetvā atthajotanaṃ atthappakāsanaṃ karissāmīti yojanā.
841. нид̣̇аанам̣ наама рааж̇аг̇ахаад̣̇исигкаабад̣̇абан̃н̃ад̇д̇идтаанабхууд̇аани сад̇д̇а наг̇араани, д̇ам̣ буб̣б̣з д̣̇ассид̇анд̇и авасидтаани д̣̇ассзд̇умааха ‘‘буг̇г̇ало’’д̇иаад̣̇и. буг̇г̇ало наама гад̇амо? яам̣ яам̣ бхигкуним̣, бхигкун̃жа аараб̣бха сигкаабад̣̇ам̣ бан̃н̃ад̇д̇ам̣, аяам̣ бхигкуний жа бхигку жа сигкаабад̣̇абан̃н̃ад̇д̇ияаа аад̣̇игаммиго буг̇г̇алод̇и вужжад̇ийд̇и яож̇анаа.
841. Nidānaṃ nāma rājagahādisikkhāpadapaññattiṭṭhānabhūtāni satta nagarāni, taṃ pubbe dassitanti avasiṭṭhāni dassetumāha ‘‘puggalo’’tiādi. Puggalo nāma katamo? Yaṃ yaṃ bhikkhuniṃ, bhikkhuñca ārabbha sikkhāpadaṃ paññattaṃ, ayaṃ bhikkhunī ca bhikkhu ca sikkhāpadapaññattiyā ādikammiko puggaloti vuccatīti yojanā.
842. д̇ханияаад̣̇аяод̇и аад̣̇и-сад̣̇д̣̇зна самб̣ахулаа бхигкуу, ваг̇г̇умуд̣̇аад̇ийрияаа бхигкуу, сзяяасаго, уд̣̇ааяий, аал̣авагаа бхигкуу, чанно, мзд̇д̇ияабхуумаж̇агаа, д̣̇звад̣̇ад̇д̇о, ассаж̇ибунаб̣б̣асугаа бхигкуу, чаб̣б̣аг̇г̇ияаа бхигкуу, убананд̣̇о сагяабуд̇д̇о, ан̃н̃ад̇аро бхигку, хад̇т̇аго сагяабуд̇д̇о, ануруд̣̇д̇хо, сад̇д̇арасаваг̇г̇ияаа бхигкуу, жуул̣абант̇аго, б̣зладтасийсо, ааяасмаа аананд̣̇о, сааг̇ад̇ад̇т̇зро, аридто бхигку, ааяасмаа аананд̣̇од̇и имз згавийсад̇и сан̇г̇ахид̇аа.
842.Dhaniyādayoti ādi-saddena sambahulā bhikkhū, vaggumudātīriyā bhikkhū, seyyasako, udāyī, āḷavakā bhikkhū, channo, mettiyabhūmajakā, devadatto, assajipunabbasukā bhikkhū, chabbaggiyā bhikkhū, upanando sakyaputto, aññataro bhikkhu, hatthako sakyaputto, anuruddho, sattarasavaggiyā bhikkhū, cūḷapanthako, belaṭṭhasīso, āyasmā ānando, sāgatatthero, ariṭṭho bhikkhu, āyasmā ānandoti ime ekavīsati saṅgahitā.
843. т̇уллананд̣̇аад̣̇аяод̇и аад̣̇и-сад̣̇д̣̇зна сунд̣̇арийнанд̣̇аа, чаб̣б̣аг̇г̇ияаа бхигкунияо, ан̃н̃ад̇араа бхигкуний, жан̣д̣агаал̣ий, самб̣ахулаа бхигкунияо, д̣̇вз бхигкунияод̇и чаяимз сан̇г̇ахид̇аа. саб̣б̣зд̇и убхаяабаад̇имогкз аад̣̇игаммигаа саб̣б̣з буг̇г̇алаа.
843.Thullanandādayoti ādi-saddena sundarīnandā, chabbaggiyā bhikkhuniyo, aññatarā bhikkhunī, caṇḍakāḷī, sambahulā bhikkhuniyo, dve bhikkhuniyoti chayime saṅgahitā. Sabbeti ubhayapātimokkhe ādikammikā sabbe puggalā.
844. вад̇т̇ууд̇и вад̇т̇у наама суд̣̇иннаад̣̇ино д̇асса д̇ассзва буг̇г̇аласса мзт̇унаад̣̇игасса жа вад̇т̇уно саб̣б̣аббагаарзна аж̇жхаажааро вийд̇иггамо бавужжад̇ийд̇и яож̇анаа.
844.Vatthūti vatthu nāma sudinnādino tassa tasseva puggalassa methunādikassa ca vatthuno sabbappakārena ajjhācāro vītikkamo pavuccatīti yojanā.
845-6. гзвалаа муулабхууд̇аа бан̃н̃ад̇д̇и. ану жа ануббанно жа саб̣б̣ад̇т̇а жа бад̣̇зсо жа анвануббаннасаб̣б̣ад̇т̇абад̣̇зсаа, д̇зязва бад̣̇аани анвануббаннасаб̣б̣ад̇т̇абад̣̇зсабад̣̇аани, д̇аани буб̣б̣агаани яаасам̣ бан̃н̃ад̇д̇ийнам̣ д̇аа анвануббаннасаб̣б̣ад̇т̇абад̣̇зсабад̣̇абуб̣б̣игаа. д̇ат̇зва саа бан̃н̃ад̇д̇ийд̇и яож̇анаа. анубан̃н̃ад̇д̇и ануббаннабан̃н̃ад̇д̇и саб̣б̣ад̇т̇абан̃н̃ад̇д̇и бад̣̇зсабан̃н̃ад̇д̇и ход̇и. згад̇о убхад̇о буб̣б̣аа гат̇зва саа бан̃н̃ад̇д̇ийд̇и яож̇анаа. згад̇обад̣̇ам̣ убхад̇обад̣̇ан̃жа буб̣б̣амассаад̇и згад̇оубхад̇обуб̣б̣аа, згад̇обан̃н̃ад̇д̇и убхад̇обан̃н̃ад̇д̇ийд̇и вуд̇д̇ам̣ ход̇и.
845-6. Kevalā mūlabhūtā paññatti. Anu ca anuppanno ca sabbattha ca padeso ca anvanuppannasabbatthapadesā, teyeva padāni anvanuppannasabbatthapadesapadāni, tāni pubbakāni yāsaṃ paññattīnaṃ tā anvanuppannasabbatthapadesapadapubbikā. Tatheva sā paññattīti yojanā. Anupaññatti anuppannapaññatti sabbatthapaññatti padesapaññatti hoti. Ekato ubhato pubbā katheva sā paññattīti yojanā. Ekatopadaṃ ubhatopadañca pubbamassāti ekatoubhatopubbā, ekatopaññatti ubhatopaññattīti vuttaṃ hoti.
847. д̇ад̇т̇а навад̇хаасу бан̃н̃ад̇д̇ийсу. бан̃н̃ад̇д̇и наама гад̇амаад̇и ааха ‘‘яо мзт̇уна’’нд̇иаад̣̇и. ‘‘яо бхигку мзт̇унам̣ д̇хаммам̣ бадисзвзяяаа’’д̇и жа ‘‘яо бхигку ад̣̇иннам̣ аад̣̇иязяяаа’’д̇и жа звамаад̣̇игаа сигкаабад̣̇асса муулабхууд̇аа бан̃н̃ад̇д̇и ход̇ийд̇и яож̇анаа.
847.Tattha navadhāsu paññattīsu. Paññatti nāma katamāti āha ‘‘yo methuna’’ntiādi. ‘‘Yo bhikkhu methunaṃ dhammaṃ paṭiseveyyā’’ti ca ‘‘yo bhikkhu adinnaṃ ādiyeyyā’’ti ca evamādikā sikkhāpadassa mūlabhūtā paññatti hotīti yojanā.
848. ижжзвамаад̣̇игаад̇и аад̣̇и-сад̣̇д̣̇зна ‘‘сигкам̣ абажжагкааяа д̣̇уб̣б̣аляам̣ анаавигад̇ваа’’д̇и жа ‘‘г̇аамаа ваа аран̃н̃аа ваа’’д̇и жа звамаад̣̇ийнам̣ сан̇г̇ахо.
848.Iccevamādikāti ādi-saddena ‘‘sikkhaṃ apaccakkhāya dubbalyaṃ anāvikatvā’’ti ca ‘‘gāmā vā araññā vā’’ti ca evamādīnaṃ saṅgaho.
849. важ̇ж̇агз ануббаннзязва бан̃н̃ад̇д̇аа ануббаннабан̃н̃ад̇д̇и, саа ануббаннабан̃н̃ад̇д̇и.
849. Vajjake anuppanneyeva paññattā anuppannapaññatti, sā anuppannapaññatti.
850-1. г̇ун̣ан̇г̇ун̣убааханасигкаабад̣̇зна саха жаммад̇т̇аран̣асигкаабад̣̇ан̃жа д̇хуванхаанам̣ д̇хуванахаанасигкаабад̣̇ам̣, бан̃жаваг̇г̇зна убасамбаад̣̇анасигкаабад̣̇ан̃жаад̇и зсаа жад̇уб̣б̣ид̇хаа бан̃н̃ад̇д̇и бад̣̇зсабан̃н̃ад̇д̇и наамаад̇и вуд̇д̇аад̇и яож̇анаа. маж̇жхимад̣̇зсасмим̣язва ход̇ийд̇и маж̇жхимад̣̇зсасмим̣язва аабад̇д̇игараа ход̇и. на ан̃н̃ад̇од̇и на ан̃н̃ад̇ра бажжанд̇имзсу ж̇анабад̣̇зсу д̣̇зсанд̇арз таанз.
850-1. Guṇaṅguṇupāhanasikkhāpadena saha cammattharaṇasikkhāpadañca dhuvanhānaṃ dhuvanahānasikkhāpadaṃ, pañcavaggena upasampādanasikkhāpadañcāti esā catubbidhā paññatti padesapaññatti nāmāti vuttāti yojanā. Majjhimadesasmiṃyeva hotīti majjhimadesasmiṃyeva āpattikarā hoti. Na aññatoti na aññatra paccantimesu janapadesu desantare ṭhāne.
852. ид̇од̇и жад̇уб̣б̣ид̇хабад̣̇зсабан̃н̃ад̇д̇ид̇о. зд̇т̇аад̇и имасмим̣ бан̃н̃ад̇д̇ибхзд̣̇з. саад̇хааран̣ад̣̇угаад̣̇иганд̇и саад̇хааран̣абан̃н̃ад̇д̇и асаад̇хааран̣абан̃н̃ад̇д̇и, згад̇обан̃н̃ад̇д̇и убхад̇обан̃н̃ад̇д̇ийд̇и д̣̇угад̣̇ваяам̣. ад̇т̇ад̇о згамзваад̇и ад̇т̇ад̇о ан̃н̃аман̃н̃асамаанамзва. вибад̇д̇аабад̇д̇аанаабад̇д̇ивинижчаяо вид̇т̇аарид̇од̇и ид̇ха на д̣̇ассид̇о. аяам̣ банзд̇т̇а сан̇кзбо – вибад̇д̇ийд̇и сийлааажаарад̣̇идтиааж̇ийвавибад̇д̇ийнам̣ ан̃н̃ад̇араа. аабад̇д̇ийд̇и буб̣б̣абаяог̇аад̣̇ивасзна аабад̇д̇ибхзд̣̇о. анаабад̇д̇ийд̇и аж̇аананаад̣̇ивасзна анаабад̇д̇и.
852.Itoti catubbidhapadesapaññattito. Etthāti imasmiṃ paññattibhede. Sādhāraṇadukādikanti sādhāraṇapaññatti asādhāraṇapaññatti, ekatopaññatti ubhatopaññattīti dukadvayaṃ. Atthato ekamevāti atthato aññamaññasamānameva. Vipattāpattānāpattivinicchayo vitthāritoti idha na dassito. Ayaṃ panettha saṅkhepo – vipattīti sīlaācāradiṭṭhiājīvavipattīnaṃ aññatarā. Āpattīti pubbapayogādivasena āpattibhedo. Anāpattīti ajānanādivasena anāpatti.
853. аабад̇д̇и бана саан̣ад̇д̇игааби ход̇и, анаан̣ад̇д̇игааби ход̇ийд̇и яож̇анаа. ‘‘аан̣ад̇д̇ийд̇и жа наамзсаа аан̣аабанаа’’д̇и иминаа аан̣ад̇д̇и-сад̣̇д̣̇асса сабхаавасаад̇хааран̣ад̇д̇аад̇и ид̇хааха.
853. Āpatti pana sāṇattikāpi hoti, anāṇattikāpi hotīti yojanā. ‘‘Āṇattīti ca nāmesā āṇāpanā’’ti iminā āṇatti-saddassa sabhāvasādhāraṇattāti idhāha.
854. саб̣б̣асигкаабад̣̇зсуби саб̣б̣аасам̣ аабад̇д̇ийнам̣ саб̣б̣о бана ан̇г̇абхзд̣̇оби вибхаавинаа н̃аад̇аб̣б̣од̇и яож̇анаа.
854. Sabbasikkhāpadesupi sabbāsaṃ āpattīnaṃ sabbo pana aṅgabhedopi vibhāvinā ñātabboti yojanā.
856. ‘‘саа жа агрияасамудтаанаа’’д̇и бад̣̇ажчзд̣̇о. гааязна, ваажааяа ваа д̣̇асаахаб̣бханд̇арз ад̇ирзгажийварасса анад̇хидтаанзна ниссаг̇г̇ияабаажид̇д̇ияам̣ ход̇ийд̇и ‘‘батамз гат̇инз вияаа’’д̇и уд̣̇аахаран̣ам̣ гад̇ам̣.
856. ‘‘Sā ca akriyasamuṭṭhānā’’ti padacchedo. Kāyena, vācāya vā dasāhabbhantare atirekacīvarassa anadhiṭṭhānena nissaggiyapācittiyaṃ hotīti ‘‘paṭhame kathine viyā’’ti udāharaṇaṃ kataṃ.
857. грияаагрияад̇о ход̇ийд̇и гирияад̇о жа агирияад̇о жа ход̇и. д̇ад̇т̇а уд̣̇аахаран̣амааха ‘‘жийвараг̇г̇ахан̣з вияаа’’д̇и. ан̃н̃аад̇игааяа бхигкунияаа хад̇т̇ад̇о жийвараг̇г̇ахан̣ам̣ грияаа, бааривад̇д̇агасса ад̣̇аанам̣ агрияаад̇и звам̣ гирияааяа жзва агирияааяа жа имам̣ аабаж̇ж̇ад̇и.
857.Kriyākriyato hotīti kiriyato ca akiriyato ca hoti. Tattha udāharaṇamāha ‘‘cīvaraggahaṇeviyā’’ti. Aññātikāya bhikkhuniyā hatthato cīvaraggahaṇaṃ kriyā, pārivattakassa adānaṃ akriyāti evaṃ kiriyāya ceva akiriyāya ca imaṃ āpajjati.
858. сияаа бана гаронд̇асса агаронд̇ассаад̇и яаа бана аабад̇д̇и сияаа гаронд̇асса, сияаа агаронд̇асса ход̇и, аяам̣ сияаа гирияад̇о, сияаа агирияад̇о самудтаад̇и. сияаад̇и жа гад̣̇аажи-сад̣̇д̣̇ад̇т̇з нибаад̇о. ад̇род̣̇аахаран̣амааха ‘‘руубияог̇г̇ахан̣з вияаа’’д̇и. руубияасса уг̇г̇ахан̣з, уг̇г̇ан̣хаабанз сияаа гад̣̇аажи гирияад̇о самудтаад̇и, убанигкид̇д̇асса саад̣̇ияанз гааяаваажаахи гаад̇аб̣б̣асса агаран̣зна гад̣̇аажи агаронд̇асса ход̇ийд̇и.
858.Siyā pana karontassa akarontassāti yā pana āpatti siyā karontassa, siyā akarontassa hoti, ayaṃ siyā kiriyato, siyā akiriyato samuṭṭhāti. Siyāti ca kadāci-saddatthe nipāto. Atrodāharaṇamāha ‘‘rūpiyoggahaṇe viyā’’ti. Rūpiyassa uggahaṇe, uggaṇhāpane siyā kadāci kiriyato samuṭṭhāti, upanikkhittassa sādiyane kāyavācāhi kātabbassa akaraṇena kadāci akarontassa hotīti.
859. яаа гарод̇о агуб̣б̣ад̇о, гад̣̇аажи гаронд̇асса жа ход̇и, саа аабад̇д̇и сияаа гирияаагирияад̇о, сияаа гирияад̇оби жа ход̇ийд̇и яож̇анаа. ‘‘гудигаараабад̇д̇и вияаа’’д̇и вад̇д̇аб̣б̣ам̣. саа хи вад̇т̇ум̣ д̣̇зсаабзд̇ваа бамаан̣аад̇игганд̇ам̣ гарод̇о гирияад̇о самудтаад̇и, ад̣̇зсаабзд̇ваа бамаан̣аад̇игганд̇ам̣, бамаан̣аяуд̇д̇ам̣ ваа гарод̇о гирияаагирияад̇о самудтаад̇и.
859. Yā karoto akubbato, kadāci karontassa ca hoti, sā āpatti siyā kiriyākiriyato, siyā kiriyatopi ca hotīti yojanā. ‘‘Kuṭikārāpatti viyā’’ti vattabbaṃ. Sā hi vatthuṃ desāpetvā pamāṇātikkantaṃ karoto kiriyato samuṭṭhāti, adesāpetvā pamāṇātikkantaṃ, pamāṇayuttaṃ vā karoto kiriyākiriyato samuṭṭhāti.
861. яад̇о аабад̇д̇ид̇о. аяам̣ аабад̇д̇и. сан̃н̃ааяа гаран̣абхууд̇ааяа вимогко зд̇ааяаад̇и сан̃н̃аавимогкаа. зд̇т̇а жа вийд̇иггамасан̃н̃аа авиж̇ж̇амаанааби аабад̇д̇ияаа вимужжанасса саад̇хагад̇амадтзна г̇ахид̇аа. яат̇аа вудтияаа абхаавзна ж̇аад̇ам̣ д̣̇уб̣бхигкам̣ ‘‘вудтигад̇а’’нд̇и вужжад̇и, звам̣самбад̣̇амид̣̇ам̣ взд̣̇ид̇аб̣б̣ам̣. аяам̣ сажид̇д̇агаабад̇д̇и.
861.Yato āpattito. Ayaṃ āpatti. Saññāya karaṇabhūtāya vimokkho etāyāti saññāvimokkhā. Ettha ca vītikkamasaññā avijjamānāpi āpattiyā vimuccanassa sādhakatamaṭṭhena gahitā. Yathā vuṭṭhiyā abhāvena jātaṃ dubbhikkhaṃ ‘‘vuṭṭhikata’’nti vuccati, evaṃsampadamidaṃ veditabbaṃ. Ayaṃ sacittakāpatti.
862-4. ид̇араа бана ажид̇д̇агаабад̇д̇и. вийд̇иггамасан̃н̃ааяа абхаавзна над̇т̇и вимогко зд̇ааяаад̇и носан̃н̃аавимогкаа. сужид̇д̇зна саваасанагилзсаббахаанзна, сагалалогияалогуд̇д̇арагусаласамбаяог̇зна жа сунд̣̇аражид̇д̇зна бхаг̇авад̇аа багаасид̇аа саб̣б̣аава аабад̇д̇и жид̇д̇асса васзна д̣̇увид̇хаа сияунд̇и яож̇анаа. сажид̇д̇агасамудтаанавасзна банаад̇и сажид̇д̇агасамудтаанавасзнзва. сажид̇д̇агамиссагавиваж̇ж̇анад̇т̇ааяа бана-сад̣̇д̣̇о звагаарад̇т̇о вуд̇д̇о.
862-4.Itarā pana acittakāpatti. Vītikkamasaññāya abhāvena natthi vimokkho etāyāti nosaññāvimokkhā. Sucittena savāsanakilesappahānena, sakalalokiyalokuttarakusalasampayogena ca sundaracittena bhagavatā pakāsitā sabbāva āpatti cittassa vasena duvidhā siyunti yojanā. Sacittakasamuṭṭhānavasena panāti sacittakasamuṭṭhānavaseneva. Sacittakamissakavivajjanatthāya pana-saddo evakārattho vutto.
яаа сажид̇д̇агзхи ваа ажид̇д̇агамиссагасамудтаанавасзна ваа самудтаад̇и, аяам̣ ажид̇д̇агаа.
Yā sacittakehi vā acittakamissakasamuṭṭhānavasena vā samuṭṭhāti, ayaṃ acittakā.
865. сувиж̇ж̇знаад̇и собхамаанаахи д̇ийхи виж̇ж̇аахи ваа адтахи ваа виж̇ж̇аахи саманнааг̇ад̇ад̇д̇аа сувиж̇ж̇зна. анаваж̇ж̇знаад̇и саваасанагилзсааваж̇ж̇арахид̇ад̇д̇аа анаваж̇ж̇зна бхаг̇авад̇аа . логабан̣н̣ад̇д̇иваж̇ж̇ад̇о логабан̣н̣ад̇д̇иваж̇ж̇авасзна саб̣б̣аава аабад̇д̇ияо важ̇ж̇авасзна д̣̇увид̇хаа д̣̇угаа вуд̇д̇аад̇и яож̇анаа.
865.Suvijjenāti sobhamānāhi tīhi vijjāhi vā aṭṭhahi vā vijjāhi samannāgatattā suvijjena. Anavajjenāti savāsanakilesāvajjarahitattā anavajjena bhagavatā . Lokapaṇṇattivajjato lokapaṇṇattivajjavasena sabbāva āpattiyo vajjavasena duvidhā dukā vuttāti yojanā.
866. яассаа сажид̇д̇агз багкз, жид̇д̇ам̣ агусалам̣ сияаад̇и яассаа сажид̇д̇агаажид̇д̇агасамудтаанааяа ажид̇д̇агааяа сураабаанаад̣̇иаабад̇д̇ияаа сажид̇д̇агасамудтаанабагкз жид̇д̇ам̣ агусаламзва ход̇и, аяам̣ логаваж̇ж̇аа наамаад̇и ад̇т̇о. яассаа бана сажид̇д̇агасамудтаанааяа батамабаарааж̇игаад̣̇иаабад̇д̇ияаа жид̇д̇ам̣ агусаламзва ход̇и, д̇ассаа логаваж̇ж̇ад̇ааяа вад̇д̇аб̣б̣амзва над̇т̇и. ажид̇д̇агааби ваа аабад̇д̇и сажид̇д̇агабагкз гусалажид̇д̇з сад̇и логаваж̇ж̇ад̇ааяа сид̣̇д̇хааяа ажид̇д̇агабагкзби логаваж̇ж̇о ход̇и, гиман̇г̇ам̣ бана агусалажид̇д̇знзва аабаж̇ж̇ид̇аб̣б̣ааяа аабад̇д̇ияаа логаваж̇ж̇ад̇аад̇и саа висум̣ на вуд̇д̇аа.
866.Yassā sacittake pakkhe, cittaṃ akusalaṃ siyāti yassā sacittakācittakasamuṭṭhānāya acittakāya surāpānādiāpattiyā sacittakasamuṭṭhānapakkhe cittaṃ akusalameva hoti, ayaṃ lokavajjā nāmāti attho. Yassā pana sacittakasamuṭṭhānāya paṭhamapārājikādiāpattiyā cittaṃ akusalameva hoti, tassā lokavajjatāya vattabbameva natthi. Acittakāpi vā āpatti sacittakapakkhe kusalacitte sati lokavajjatāya siddhāya acittakapakkhepi lokavajjo hoti, kimaṅgaṃ pana akusalacitteneva āpajjitabbāya āpattiyā lokavajjatāti sā visuṃ na vuttā.
яасмаа бана бан̣н̣ад̇д̇иваж̇ж̇ааяа вад̇т̇увийд̇иггамаваж̇ж̇аа сияаа гусалам̣, сияаа аб̣яаагад̇ам̣, д̇асмаа д̇ассаа сажид̇д̇агабагкз жид̇д̇ам̣ гусаламзваад̇и аяам̣ нияамо над̇т̇ийд̇и ааха ‘‘сзсаа бан̣н̣ад̇д̇иваж̇ж̇агаа’’д̇и. ‘‘бан̣н̣ад̇д̇иваж̇ж̇агаа’’д̇и иминаа жа лагкан̣зна вад̇т̇увиж̇аананажид̇д̇зна сажид̇д̇агабагкз жид̇д̇ам̣ сияаа гусалам̣, сияаа агусалам̣, сияаа аб̣яаагад̇ам̣, д̇асмаа д̇ассаа сажид̇д̇агабагкз жид̇д̇ам̣ агусаламзваад̇и аяам̣ нияамо над̇т̇ийд̇и ааха.
Yasmā pana paṇṇattivajjāya vatthuvītikkamavajjā siyā kusalaṃ, siyā abyākataṃ, tasmā tassā sacittakapakkhe cittaṃ kusalamevāti ayaṃ niyamo natthīti āha ‘‘sesā paṇṇattivajjakā’’ti. ‘‘Paṇṇattivajjakā’’ti iminā ca lakkhaṇena vatthuvijānanacittena sacittakapakkhe cittaṃ siyā kusalaṃ, siyā akusalaṃ, siyā abyākataṃ, tasmā tassā sacittakapakkhe cittaṃ akusalamevāti ayaṃ niyamo natthīti āha.
867. гааяад̣̇ваарзна аабаж̇ж̇ид̇аб̣б̣аа гааяагаммам̣. убхаяад̇т̇а аабаж̇ж̇ид̇аб̣б̣аа д̇ад̣̇убхаяам̣ гааяагаммам̣ важийгаммам̣. манод̣̇ваарз аабад̇д̇и наама над̇т̇ийд̇и маногаммам̣ на вуд̇д̇ам̣. ‘‘манод̣̇ваарз аабад̇д̇и наама над̇т̇ийд̇и жа ид̣̇ам̣ язбхуяяавасзна вуд̇д̇ам̣ убанигкид̇д̇асаад̣̇ияанаад̣̇ийсу манод̣̇ваарзби аабад̇д̇исамбхавад̇о’’д̇и аажарияаа.
867. Kāyadvārena āpajjitabbā kāyakammaṃ. Ubhayattha āpajjitabbā tadubhayaṃ kāyakammaṃ vacīkammaṃ. Manodvāre āpatti nāma natthīti manokammaṃ na vuttaṃ. ‘‘Manodvāre āpatti nāma natthīti ca idaṃ yebhuyyavasena vuttaṃ upanikkhittasādiyanādīsu manodvārepi āpattisambhavato’’ti ācariyā.
868-9. гусалаад̣̇ид̇игад̣̇ваяанд̇и гусалад̇д̇иган̃жзва взд̣̇анаад̇д̇иган̃жа. аабад̇д̇им̣ аабаж̇ж̇анд̇о гусалаагусалажид̇д̇о, д̇ат̇аа аб̣яаагад̇ажид̇д̇о ваа худ̇ваа аабаж̇ж̇ад̇ийд̇и яож̇анаа.
868-9.Kusalāditikadvayanti kusalattikañceva vedanāttikañca. Āpattiṃ āpajjanto kusalākusalacitto, tathā abyākatacitto vā hutvā āpajjatīti yojanā.
д̣̇угкаад̣̇исам̣яуд̇од̇и аад̣̇и-сад̣̇д̣̇зна убзгкаавзд̣̇анаасаман̇г̇ино сан̇г̇ахо. звам̣ санд̇зби саб̣б̣асигкаабад̣̇зсу агусалажид̇д̇авасзна згам̣ жид̇д̇ам̣, гусалааб̣яаагад̇авасзна д̣̇вз жид̇д̇аани, саб̣б̣зсам̣ васзна д̇ийн̣и жид̇д̇аани. д̣̇угкавзд̣̇анаавасзна згаа взд̣̇анаа, сукаубзгкаавасзна д̣̇вз, саб̣б̣аасам̣ васзна д̇иссо взд̣̇анаад̇и аяамзва бхзд̣̇о лаб̣бхад̇и, на ан̃н̃о бхзд̣̇о.
Dukkhādisaṃyutoti ādi-saddena upekkhāvedanāsamaṅgino saṅgaho. Evaṃ santepi sabbasikkhāpadesu akusalacittavasena ekaṃ cittaṃ, kusalābyākatavasena dve cittāni, sabbesaṃ vasena tīṇi cittāni. Dukkhavedanāvasena ekā vedanā, sukhaupekkhāvasena dve, sabbāsaṃ vasena tisso vedanāti ayameva bhedo labbhati, na añño bhedo.
гусалад̇д̇игам̣ сажзби г̇ахид̇ам̣, на бана саб̣б̣зсамзва жид̇д̇аанам̣ васзна лаб̣бхад̇и, ат̇а ко аабад̇д̇исамудтаабагаанам̣ б̣аад̇д̇им̣сажид̇д̇аанамзва васзна лаб̣бхад̇и. б̣аад̇д̇им̣сзва хи жид̇д̇аани аабад̇д̇исамудтаабагаани. д̣̇ваад̣̇аса агусалаани, адта гаамааважарагусалаани, д̣̇аса гаамааважарагирияажид̇д̇аани, гусалад̇о, гирияад̇о жа д̣̇вз абхин̃н̃аажид̇д̇аани жаад̇и звам̣ б̣аад̇д̇им̣сажид̇д̇зхи самудтид̇ааби аабад̇д̇и агусалаа ваа ход̇и аб̣яаагад̇аа ваа, над̇т̇и аабад̇д̇и гусалам̣. яат̇ааха самат̇агканд̇хагз ‘‘аабад̇д̇аад̇хигаран̣ам̣ сияаа агусалам̣ сияаа аб̣яаагад̇ам̣, над̇т̇и аабад̇д̇аад̇хигаран̣ам̣ гусала’’нд̇и (жуул̣ава. 222; бари. 303). аяам̣ бана баато бан̣н̣ад̇д̇иваж̇ж̇ам̣язва санд̇хааяа вуд̇д̇о, на логаваж̇ж̇ам̣. яасмин̃хи бат̇авикан̣анабхууд̇аг̇аамабаад̇аб̣яад̇аад̣̇игз аабад̇д̇аад̇хигаран̣з гусалажид̇д̇ам̣ ан̇г̇ам̣ ход̇и, д̇асмин̃жа сад̇и на саггаа вад̇д̇ум̣ ‘‘над̇т̇и аабад̇д̇аад̇хигаран̣ам̣ гусала’’нд̇и. д̇асмаа наяид̣̇ам̣ ан̇г̇абахонагажид̇д̇ам̣ санд̇хааяа вуд̇д̇ам̣. яам̣ д̇аава аабад̇д̇аад̇хигаран̣ам̣ логаваж̇ж̇ам̣, д̇ам̣ зганд̇ад̇о агусаламзва. д̇ад̇т̇а ‘‘сияаа агусала’’нд̇и вигаббо над̇т̇и. яам̣ бана бан̣н̣ад̇д̇иваж̇ж̇ам̣, д̇ам̣ яасмаа сан̃жижжа ‘‘имам̣ аабад̇д̇им̣ вийд̇иггамаамий’’д̇и вийд̇иггаманд̇ассзва агусалам̣ ход̇и, асан̃жижжа бана гин̃жи аж̇аананд̇асса сахасзяяаад̣̇ивасзна аабаж̇ж̇анад̇о аб̣яаагад̇ам̣ ход̇и, д̇асмаа д̇ад̇т̇а сан̃жижжаасан̃жижжавасзна имам̣ вигаббабхаавам̣ санд̇хааяа ид̣̇ам̣ вуд̇д̇ам̣ ‘‘аабад̇д̇аад̇хигаран̣ам̣ сияаа агусалам̣ сияаа аб̣яаагад̇ам̣, над̇т̇и аабад̇д̇аад̇хигаран̣ам̣ гусала’’нд̇и. сажз бана ‘‘яам̣ гусалажид̇д̇о аабаж̇ж̇ад̇и, ид̣̇ам̣ вужжад̇и аабад̇д̇аад̇хигаран̣ам̣ гусала’’нд̇и вад̣̇зяяа, ажид̇д̇агаанам̣ зл̣агаломабад̣̇асод̇хаммаад̣̇исамудтаанаанамби гусалажид̇д̇ам̣ аабаж̇ж̇зяяа, на жа д̇ад̇т̇а виж̇ж̇амаанамби гусалажид̇д̇ам̣ аабад̇д̇ияаа ан̇г̇ам̣, гааяаважийвин̃н̃ад̇д̇ивасзна бана жалид̇абавад̇д̇аанам̣ гааяаваажаанам̣ ан̃н̃ад̇арамзва ан̇г̇ам̣, д̇ан̃жа руубагканд̇хабарияаабаннад̇д̇аа аб̣яаагад̇анд̇и.
Kusalattikaṃ sacepi gahitaṃ, na pana sabbesameva cittānaṃ vasena labbhati, atha kho āpattisamuṭṭhāpakānaṃ bāttiṃsacittānameva vasena labbhati. Bāttiṃseva hi cittāni āpattisamuṭṭhāpakāni. Dvādasa akusalāni, aṭṭha kāmāvacarakusalāni, dasa kāmāvacarakiriyacittāni, kusalato, kiriyato ca dve abhiññācittāni cāti evaṃ bāttiṃsacittehi samuṭṭhitāpi āpatti akusalā vā hoti abyākatā vā, natthi āpatti kusalaṃ. Yathāha samathakkhandhake ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti (cūḷava. 222; pari. 303). Ayaṃ pana pāṭho paṇṇattivajjaṃyeva sandhāya vutto, na lokavajjaṃ. Yasmiñhi pathavikhaṇanabhūtagāmapātabyatādike āpattādhikaraṇe kusalacittaṃ aṅgaṃ hoti, tasmiñca sati na sakkā vattuṃ ‘‘natthi āpattādhikaraṇaṃ kusala’’nti. Tasmā nayidaṃ aṅgapahonakacittaṃ sandhāya vuttaṃ. Yaṃ tāva āpattādhikaraṇaṃ lokavajjaṃ, taṃ ekantato akusalameva. Tattha ‘‘siyā akusala’’nti vikappo natthi. Yaṃ pana paṇṇattivajjaṃ, taṃ yasmā sañcicca ‘‘imaṃ āpattiṃ vītikkamāmī’’ti vītikkamantasseva akusalaṃ hoti, asañcicca pana kiñci ajānantassa sahaseyyādivasena āpajjanato abyākataṃ hoti, tasmā tattha sañciccāsañciccavasena imaṃ vikappabhāvaṃ sandhāya idaṃ vuttaṃ ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti. Sace pana ‘‘yaṃ kusalacitto āpajjati, idaṃ vuccati āpattādhikaraṇaṃ kusala’’nti vadeyya, acittakānaṃ eḷakalomapadasodhammādisamuṭṭhānānampi kusalacittaṃ āpajjeyya, na ca tattha vijjamānampi kusalacittaṃ āpattiyā aṅgaṃ, kāyavacīviññattivasena pana calitapavattānaṃ kāyavācānaṃ aññatarameva aṅgaṃ, tañca rūpakkhandhapariyāpannattā abyākatanti.
870. ид̣̇ам̣ д̇у лагкан̣анд̇и ид̣̇ам̣ нид̣̇аанаад̣̇исаад̇хааран̣авинижчаяалагкан̣ам̣.
870.Idaṃ tu lakkhaṇanti idaṃ nidānādisādhāraṇavinicchayalakkhaṇaṃ.
871. ‘‘д̇ару’’нд̇иаад̣̇иг̇аат̇аа буб̣б̣з вуд̇д̇ад̇т̇аава. аяам̣ бана висзсо – д̇ад̇т̇а ‘‘д̣̇ваяан̇гура’’нд̇и вуд̇д̇ам̣, ид̇ха ‘‘жад̇уссика’’нд̇и. д̇ад̇т̇а ‘‘д̣̇ваяан̇гура’’нд̇и логаваж̇ж̇абан̣н̣ад̇д̇иваж̇ж̇аанам̣ г̇ахан̣ам̣ , ид̇ха жад̇уссиканд̇и жад̇уннам̣ вибад̇д̇ийнам̣. жад̇д̇ааро сийкаа ан̇гураа зд̇ассаад̇и виг̇г̇ахо. д̇ад̇т̇а вибад̇д̇и ‘‘сад̇д̇апала’’нд̇и сад̇д̇апалзсу анд̇ог̇ад̇хаа, ид̇ха вибад̇д̇идтаанз важ̇ж̇ам̣ г̇ахзд̇ваа сад̇д̇апалаани.
871.‘‘Taru’’ntiādigāthā pubbe vuttatthāva. Ayaṃ pana viseso – tattha ‘‘dvayaṅkura’’nti vuttaṃ, idha ‘‘catussikha’’nti. Tattha ‘‘dvayaṅkura’’nti lokavajjapaṇṇattivajjānaṃ gahaṇaṃ , idha catussikhanti catunnaṃ vipattīnaṃ. Cattāro sīkhā aṅkurā etassāti viggaho. Tattha vipatti ‘‘sattaphala’’nti sattaphalesu antogadhā, idha vipattiṭṭhāne vajjaṃ gahetvā sattaphalāni.
872. ануд̇д̇арад̇ам̣ г̇ад̇ам̣ ад̇д̇анаа уд̇д̇арасса уд̇д̇амасса гассажи авиж̇ж̇амаанад̇д̇аа имам̣ уд̇д̇арам̣ уд̇д̇арам̣ наама багаран̣ам̣ яо т̇зранавамаж̇жхимзсу ан̃н̃ад̇аро барияаабун̣аад̇и баатасса баг̇ун̣аваажуг̇г̇ад̇агаран̣зна ад̇хийяад̇и, барибужчад̇и ад̇т̇ан̃жа ад̇т̇аван̣н̣анам̣ суд̇ваа саггажжам̣ уг̇г̇ахзд̇ваа манасаа бзгкид̇ваа бан̃н̃ааяа суббадивиж̇жхид̇ваа д̇хаарзд̇и, со жа бхигку жа-сад̣̇д̣̇зна звамзва винаяавинижчаяз яо бхигку яуд̇д̇о, со жа гааяаваажавинаяз гааяаваажаавийд̇иггамаанам̣ винаяанз сам̣варан̣з винаяз винаяабидагз ануд̇д̇арад̇ам̣ убаяаад̇и ад̇д̇ано уд̇д̇арид̇арасса авиж̇ж̇амаанад̇ам̣ убаг̇ажчад̇и. зд̇т̇а гааран̣амааха ‘‘уд̇д̇арад̇о’’д̇и, баг̇ун̣аваажуг̇г̇ад̇агаран̣зна ад̇хийд̇зна ад̇т̇аван̣н̣анам̣ суд̇ваа д̇хааран̣зна судту д̇хаарид̇зна иминаа уд̇д̇арабагаран̣зна хзд̇убхууд̇знаад̇и ад̇т̇о.
872.Anuttarataṃ gataṃ attanā uttarassa uttamassa kassaci avijjamānattā imaṃ uttaraṃ uttaraṃ nāma pakaraṇaṃ yo theranavamajjhimesu aññataro pariyāpuṇāti pāṭhassa paguṇavācuggatakaraṇena adhīyati, paripucchati atthañca atthavaṇṇanaṃ sutvā sakkaccaṃ uggahetvā manasā pekkhitvā paññāya suppaṭivijjhitvā dhāreti, so ca bhikkhu ca-saddena evameva vinayavinicchaye yo bhikkhu yutto, so ca kāyavācavinaye kāyavācāvītikkamānaṃ vinayane saṃvaraṇe vinaye vinayapiṭake anuttarataṃ upayāti attano uttaritarassa avijjamānataṃ upagacchati. Ettha kāraṇamāha ‘‘uttarato’’ti, paguṇavācuggatakaraṇena adhītena atthavaṇṇanaṃ sutvā dhāraṇena suṭṭhu dhāritena iminā uttarapakaraṇena hetubhūtenāti attho.
ид̇и уд̇д̇арз лийнад̇т̇абагаасанияаа
Iti uttare līnatthapakāsaniyā
лагкан̣агат̇ааван̣н̣анаа нидтид̇аа.
Lakkhaṇakathāvaṇṇanā niṭṭhitā.
