1. லஸுணவக்³க³வண்ணனா

1. Lasuṇavaggavaṇṇanā

793-797. பாசித்தியேஸு லஸுணவக்³க³ஸ்ஸ பட²மே ஜாதிங் ஸரதீதி ஜாதிஸ்ஸரோ. ஸபா⁴வேனேவாதி ஸூபஸம்பாகாதி³ங் வினாவ. ப³த³ரஸாளவங் நாம ப³த³ரப²லானி ஸுக்கா²பெத்வா சுண்ணெத்வா கத்தப்³பா³ கா²த³னீயவிகதி. ஸேஸமெத்த² உத்தானமேவ. ஆமகலஸுணஞ்சேவ அஜ்ஜோ²ஹரணஞ்சாதி இமானி பனெத்த² த்³வே அங்கா³னி.

793-797. Pācittiyesu lasuṇavaggassa paṭhame jātiṃ saratīti jātissaro. Sabhāvenevāti sūpasampākādiṃ vināva. Badarasāḷavaṃ nāma badaraphalāni sukkhāpetvā cuṇṇetvā kattabbā khādanīyavikati. Sesamettha uttānameva. Āmakalasuṇañceva ajjhoharaṇañcāti imāni panettha dve aṅgāni.

798-802. து³தியததியசதுத்தா²னி உத்தானத்தா²னேவ.

798-802. Dutiyatatiyacatutthāni uttānatthāneva.

812. பஞ்சமே த்³வின்னங் பப்³பா³னங் உபரீதி எத்த² த்³வின்னங் அங்கு³லீனங் ஸஹ பவேஸனே ஏகேகாய அங்கு³லியா ஏகேகங் பப்³ப³ங் கத்வா த்³வின்னங் பப்³பா³னங் உபரி. ஏகங்கு³லிபவேஸனே த்³வின்னங் பப்³பா³னங் உபரி ந வட்டதீதி வேதி³தப்³ப³ங். மஹாபச்சரியம்பி அயமேவ நயோ த³ஸ்ஸிதோ. உத³கஸுத்³தி⁴பச்சயேன பன ஸதிபி ப²ஸ்ஸஸாதி³யனே யதா²வுத்தபரிச்சே²தே³ அனாபத்தி.

812. Pañcame dvinnaṃ pabbānaṃ uparīti ettha dvinnaṃ aṅgulīnaṃ saha pavesane ekekāya aṅguliyā ekekaṃ pabbaṃ katvā dvinnaṃ pabbānaṃ upari. Ekaṅgulipavesane dvinnaṃ pabbānaṃ upari na vaṭṭatīti veditabbaṃ. Mahāpaccariyampi ayameva nayo dassito. Udakasuddhipaccayena pana satipi phassasādiyane yathāvuttaparicchede anāpatti.

815-817. ச²ட்டே² ஆஸும்பி⁴த்வாதி பாதெத்வா. த³தி⁴மத்தூ²தி த³தி⁴மண்ட³ங் த³தி⁴ம்ஹி பஸன்னோத³கங். பு⁴ஞ்ஜந்தஸ்ஸ பி⁴க்கு²னோ ஹத்த²பாஸே டா²னங், பானீயஸ்ஸ வா விதூ⁴பனஸ்ஸ வா க³ஹணந்தி இமானி பனெத்த² த்³வே அங்கா³னி.

815-817. Chaṭṭhe āsumbhitvāti pātetvā. Dadhimatthūti dadhimaṇḍaṃ dadhimhi pasannodakaṃ. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti imāni panettha dve aṅgāni.

822. ஸத்தமே ‘‘படிக்³க³ண்ஹாதி, ஆபத்தி து³க்கடஸ்ஸா’’தி இத³ங் புப்³ப³பயோக³து³க்கடஸ்ஸ நித³ஸ்ஸனமத்தந்தி ஆஹ ‘‘ந கேவலங் படிக்³க³ஹணேயேவ ஹோதீ’’திஆதி³. பமாணந்தி பாசித்தியாபத்தியா பமாணங். இமேஹியேவ த்³வீஹி பாசித்தியங் ஹோதி, நாஞ்ஞேஹி ப⁴ஜ்ஜனாதீ³ஹீதி அத்தோ². வுத்தமேவத்த²ங் வித்தா²ரதோ த³ஸ்ஸேதுங் ‘‘தஸ்மா’’திஆதி³மாஹ. தங் புப்³பா³பரவிருத்³த⁴ந்தி புனபி வுத்தந்தி வுத்தவாத³ங் ஸந்தா⁴யாஹ. அஞ்ஞாய விஞ்ஞத்தியா லத்³த⁴ம்பி ஹி அனாணத்தியா விஞ்ஞத்தியா இமிஸ்ஸா அவிஞ்ஞத்தியா லத்³த⁴பக்க²ங் ப⁴ஜதி, தஸ்மா ஹெட்டா² அவிஞ்ஞத்தியா லத்³தே⁴ கரணகாராபனேஸு விஸேஸங் அவத்வா இத⁴ விஸேஸவசனங் புப்³பா³பரவிருத்³த⁴ங். யதி³ செத்த² கரணே பாசித்தியங், காராபனேபி பாசித்தியேனேவ ப⁴விதப்³ப³ங். அத² காராபனே து³க்கடங், கரணேபி து³க்கடேனேவ ப⁴விதப்³ப³ங். ந ஹி கரணே வா காராபனே வா விஸேஸோ அத்தி², தஸ்மா அஞ்ஞாய விஞ்ஞத்தியா லத்³த⁴ங் ஸயங் ப⁴ஜ்ஜனாதீ³னி கத்வாபி காராபெத்வாபி பு⁴ஞ்ஜந்தியா து³க்கடமேவாதி இத³மெத்த² ஸன்னிட்டா²னங். அவிஸேஸேன வுத்தந்தி கரணகாராபனானங் ஸாமஞ்ஞதோ வுத்தங். ஸேஸமெத்த² உத்தானமேவ. ஸத்தன்னங் த⁴ஞ்ஞானங் அஞ்ஞதரஸ்ஸ விஞ்ஞாபனங் வா விஞ்ஞாபாபனங் வா, படிலாபோ⁴, ப⁴ஜ்ஜனாதீ³னி கத்வா வா காரெத்வா வா அஜ்ஜோ²ஹரணந்தி இமானி பனெத்த² தீணி அங்கா³னி.

822. Sattame ‘‘paṭiggaṇhāti, āpatti dukkaṭassā’’ti idaṃ pubbapayogadukkaṭassa nidassanamattanti āha ‘‘na kevalaṃ paṭiggahaṇeyeva hotī’’tiādi. Pamāṇanti pācittiyāpattiyā pamāṇaṃ. Imehiyeva dvīhi pācittiyaṃ hoti, nāññehi bhajjanādīhīti attho. Vuttamevatthaṃ vitthārato dassetuṃ ‘‘tasmā’’tiādimāha. Taṃ pubbāparaviruddhanti punapi vuttanti vuttavādaṃ sandhāyāha. Aññāya viññattiyā laddhampi hi anāṇattiyā viññattiyā imissā aviññattiyā laddhapakkhaṃ bhajati, tasmā heṭṭhā aviññattiyā laddhe karaṇakārāpanesu visesaṃ avatvā idha visesavacanaṃ pubbāparaviruddhaṃ. Yadi cettha karaṇe pācittiyaṃ, kārāpanepi pācittiyeneva bhavitabbaṃ. Atha kārāpane dukkaṭaṃ, karaṇepi dukkaṭeneva bhavitabbaṃ. Na hi karaṇe vā kārāpane vā viseso atthi, tasmā aññāya viññattiyā laddhaṃ sayaṃ bhajjanādīni katvāpi kārāpetvāpi bhuñjantiyā dukkaṭamevāti idamettha sanniṭṭhānaṃ. Avisesena vuttanti karaṇakārāpanānaṃ sāmaññato vuttaṃ. Sesamettha uttānameva. Sattannaṃ dhaññānaṃ aññatarassa viññāpanaṃ vā viññāpāpanaṃ vā, paṭilābho, bhajjanādīni katvā vā kāretvā vā ajjhoharaṇanti imāni panettha tīṇi aṅgāni.

824. அட்ட²மே நிப்³பி³ட்டோ²தி பதிட்டா²பிதோ. கேணீதி ரஞ்ஞோ தா³தப்³ப³ஸ்ஸ ஆயஸ்ஸேதங் அதி⁴வசனங். டா²னந்தரந்தி கா³மஜனபதா³தி³டா²னந்தரங். ஸேஸமெத்த² உத்தானமேவ. உச்சாராதி³பா⁴வோ, அனவலோகனங், வளஞ்ஜனட்டா²னங், திரோகுட்டபாகாரதா, ச²ட்³ட³னங் வா ச²ட்³டா³பனங் வாதி இமானி பனெத்த² பஞ்ச அங்கா³னி.

824. Aṭṭhame nibbiṭṭhoti patiṭṭhāpito. Keṇīti rañño dātabbassa āyassetaṃ adhivacanaṃ. Ṭhānantaranti gāmajanapadādiṭhānantaraṃ. Sesamettha uttānameva. Uccārādibhāvo, anavalokanaṃ, vaḷañjanaṭṭhānaṃ, tirokuṭṭapākāratā, chaḍḍanaṃ vā chaḍḍāpanaṃ vāti imāni panettha pañca aṅgāni.

830. நவமே ஸப்³பே³ஸந்தி பி⁴க்கு²ஸ்ஸ பி⁴க்கு²னியா ச. இத⁴ கெ²த்தபாலகா ஆராமாதி³கோ³பகா ச ஸாமிகா ஏவ.

830. Navame sabbesanti bhikkhussa bhikkhuniyā ca. Idha khettapālakā ārāmādigopakā ca sāmikā eva.

836. த³ஸமே ஏகபயோகே³னாதி ஏகதி³ஸாவலோகனபயோகே³ன. தேஸங்யேவாதி யேஸங் நச்சங் பஸ்ஸதி. கிஞ்சாபி ஸயங் நச்சனாதீ³ஸு பாசித்தியங் பாளியங் ந வுத்தங், ததா²பி அட்ட²கதா²பமாணேன க³ஹேதப்³ப³ந்தி த³ஸ்ஸேதுங் ‘‘ஸப்³ப³அட்ட²கதா²ஸு வுத்த’’ந்தி ஆஹ. ‘‘ஆராமே ட²த்வாதி ந கேவலங் ட²த்வா, ததோ ததோ க³ந்த்வாபி ஸப்³பி³ரியாபதே²ஹி லப⁴தி, ‘ஆராமே டி²தா’தி பன ஆராமபரியாபன்னபா⁴வத³ஸ்ஸனத்த²ங் வுத்தங். இதரதா² நிஸின்னாபி ந லபெ⁴ய்யா’’தி தீஸுபி க³ண்டி²பதே³ஸு வுத்தங். ஸேஸமெத்த² உத்தானமேவ. நச்சாதீ³னங் அஞ்ஞதரதா, அஞ்ஞத்ர அனுஞ்ஞாதகாரணா க³மனங், த³ஸ்ஸனங் வா ஸவனங் வாதி இமானி பனெத்த² தீணி அங்கா³னி.

836. Dasame ekapayogenāti ekadisāvalokanapayogena. Tesaṃyevāti yesaṃ naccaṃ passati. Kiñcāpi sayaṃ naccanādīsu pācittiyaṃ pāḷiyaṃ na vuttaṃ, tathāpi aṭṭhakathāpamāṇena gahetabbanti dassetuṃ ‘‘sabbaaṭṭhakathāsu vutta’’nti āha. ‘‘Ārāme ṭhatvāti na kevalaṃ ṭhatvā, tato tato gantvāpi sabbiriyāpathehi labhati, ‘ārāme ṭhitā’ti pana ārāmapariyāpannabhāvadassanatthaṃ vuttaṃ. Itarathā nisinnāpi na labheyyā’’ti tīsupi gaṇṭhipadesu vuttaṃ. Sesamettha uttānameva. Naccādīnaṃ aññataratā, aññatra anuññātakāraṇā gamanaṃ, dassanaṃ vā savanaṃ vāti imāni panettha tīṇi aṅgāni.

லஸுணவக்³க³வண்ணனா நிட்டி²தா.

Lasuṇavaggavaṇṇanā niṭṭhitā.

Next: 2. அந்த⁴காரவக்³க³வண்ணனா • 2. Andhakāravaggavaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
1. பட²மலஸுணஸிக்கா²பத³வண்ணனா • 1. Paṭhamalasuṇasikkhāpadavaṇṇanā
2. து³தியஸிக்கா²பத³வண்ணனா • 2. Dutiyasikkhāpadavaṇṇanā
5. பஞ்சமஸிக்கா²பத³வண்ணனா • 5. Pañcamasikkhāpadavaṇṇanā
7. ஸத்தமஸிக்கா²பத³வண்ணனா • 7. Sattamasikkhāpadavaṇṇanā
8. அட்ட²மஸிக்கா²பத³வண்ணனா • 8. Aṭṭhamasikkhāpadavaṇṇanā
10. த³ஸமஸிக்கா²பத³வண்ணனா • 10. Dasamasikkhāpadavaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact