| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૮. લિચ્છવિકુમારકસુત્તવણ્ણના
8. Licchavikumārakasuttavaṇṇanā
૫૮. અટ્ઠમે સજ્જાનિ ધનૂનીતિ સજિયાનિ આરોપિતધનૂનિ. અદ્દસૂતિ અદ્દસંસુ. ભવિસ્સન્તિ વજ્જીતિ વડ્ઢિસ્સન્તિ વજ્જિરાજાનો. અપાનુભાતિ અવડ્ઢિનિસ્સિતા માનથદ્ધા. પચ્છાલિયં ખિપન્તીતિ પચ્છતો ગન્ત્વા પિટ્ઠિં પાદેન પહરન્તિ. રટ્ઠિકસ્સાતિઆદીસુ રટ્ઠં ભુઞ્જતીતિ રટ્ઠિકો. પિતરા દત્તં સાપતેય્યં ભુઞ્જતીતિ પેત્તનિકો. સેનાય પતિ જેટ્ઠકોતિ સેનાપતિકો. ગામગામણિકસ્સાતિ ગામાનં ગામણિકસ્સ, ગામસામિકસ્સાતિ અત્થો. પૂગગામણિકસ્સાતિ ગણજેટ્ઠકસ્સ. કુલેસૂતિ તેસુ તેસુ કુલેસુ. પચ્ચેકાધિપચ્ચં કારેન્તીતિ પચ્ચેકં જેટ્ઠકટ્ઠાનં કારેન્તિ. કલ્યાણેન મનસા અનુકમ્પન્તીતિ સુન્દરેન ચિત્તેન અનુગ્ગણ્હન્તિ. ખેત્તકમ્મન્તસામન્તસબ્યોહારેતિ યે ચ અત્તનો ખેત્તકમ્મન્તાનં સામન્તા અનન્તરક્ખેત્તસામિનો, તે ચ રજ્જુદણ્ડેહિ ભૂમિપ્પમાણગ્ગાહકે સબ્બોહારે ચ. બલિપટિગ્ગાહિકા દેવતાતિ કુલપ્પવેણિયા આગતા આરક્ખદેવતા. સક્કરોતીતિ તા દેવતા અગ્ગયાગુભત્તાદીહિ સક્કરોતિ.
58. Aṭṭhame sajjāni dhanūnīti sajiyāni āropitadhanūni. Addasūti addasaṃsu. Bhavissanti vajjīti vaḍḍhissanti vajjirājāno. Apānubhāti avaḍḍhinissitā mānathaddhā. Pacchāliyaṃ khipantīti pacchato gantvā piṭṭhiṃ pādena paharanti. Raṭṭhikassātiādīsu raṭṭhaṃ bhuñjatīti raṭṭhiko. Pitarā dattaṃ sāpateyyaṃ bhuñjatīti pettaniko. Senāya pati jeṭṭhakoti senāpatiko. Gāmagāmaṇikassāti gāmānaṃ gāmaṇikassa, gāmasāmikassāti attho. Pūgagāmaṇikassāti gaṇajeṭṭhakassa. Kulesūti tesu tesu kulesu. Paccekādhipaccaṃ kārentīti paccekaṃ jeṭṭhakaṭṭhānaṃ kārenti. Kalyāṇena manasā anukampantīti sundarena cittena anuggaṇhanti. Khettakammantasāmantasabyohāreti ye ca attano khettakammantānaṃ sāmantā anantarakkhettasāmino, te ca rajjudaṇḍehi bhūmippamāṇaggāhake sabbohāre ca. Balipaṭiggāhikādevatāti kulappaveṇiyā āgatā ārakkhadevatā. Sakkarotīti tā devatā aggayāgubhattādīhi sakkaroti.
કિચ્ચકરોતિ ઉપ્પન્નાનં કિચ્ચાનં કારકો. યે ચસ્સ અનુજીવિનોતિ યે ચ એતં ઉપનિસ્સાય જીવન્તિ. ઉભિન્નઞ્ચેવ અત્થાયાતિ ઉભિન્નમ્પિ હિતત્થાય પટિપન્નો હોતીતિ અત્થો. પુબ્બપેતાનન્તિ પરલોકગતાનં. દિટ્ઠે ધમ્મે ચ જીવતન્તિ યે ચ દિટ્ઠે ધમ્મે જીવન્તિ. ઇતિ પદદ્વયેનાપિ અતીતપચ્ચુપ્પન્ને ઞાતયો દસ્સેતિ. વિત્તિસઞ્જનનોતિ તુટ્ઠિજનનો. ઘરમાવસન્તિ ઘરાવાસં વસન્તો. પુજ્જો હોતિ પસંસિયોતિ પૂજેતબ્બો ચ પસંસિતબ્બો ચ હોતીતિ.
Kiccakaroti uppannānaṃ kiccānaṃ kārako. Ye cassa anujīvinoti ye ca etaṃ upanissāya jīvanti. Ubhinnañceva atthāyāti ubhinnampi hitatthāya paṭipanno hotīti attho. Pubbapetānanti paralokagatānaṃ. Diṭṭhe dhamme ca jīvatanti ye ca diṭṭhe dhamme jīvanti. Iti padadvayenāpi atītapaccuppanne ñātayo dasseti. Vittisañjananoti tuṭṭhijanano. Gharamāvasanti gharāvāsaṃ vasanto. Pujjo hoti pasaṃsiyoti pūjetabbo ca pasaṃsitabbo ca hotīti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૮. લિચ્છવિકુમારકસુત્તં • 8. Licchavikumārakasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૮-૧૦. લિચ્છવિકુમારકસુત્તાદિવણ્ણના • 8-10. Licchavikumārakasuttādivaṇṇanā
