| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೯. ಲೋಹಿಚ್ಚಸುತ್ತವಣ್ಣನಾ
9. Lohiccasuttavaṇṇanā
೧೩೨. ತೇಪಿ ಮಾಣವಕಾತ್ವೇವ ವುತ್ತಾ, ನ ಬ್ರಾಹ್ಮಣಕುಮಾರಾ ಏವ। ಸೇಲೇಯ್ಯಕಾನೀತಿ ಅಞ್ಞಮಞ್ಞಂ ಸಿಲಿಸ್ಸನಲಙ್ಘನಕೀಳನಾನಿ।
132.Tepi māṇavakātveva vuttā, na brāhmaṇakumārā eva. Seleyyakānīti aññamaññaṃ silissanalaṅghanakīḷanāni.
ಉಪಟ್ಠಾನವಸೇನ ಇಭಂ ಹರನ್ತೀತಿ ಇಬ್ಭಾ, ಹತ್ಥಿಗೋಪಕಾ। ತೇ ಪನ ನಿಹೀನಕುಟುಮ್ಬಸ್ಸ ಭೋಗ್ಗಂ ಉಪಾದಾಯ ಗಹಪತಿಭಾವಂ ಉಪಾದಾಯ ‘‘ಗಹಪತಿಕಾ’’ತಿಪಿ ವುಚ್ಚನ್ತೀತಿ ಆಹ ‘‘ಗಹಪತಿಕಾ’’ತಿ। ಕಣ್ಹಾತಿ ಕಣ್ಹಾಭಿಜಾತಿಕಾ। ರಟ್ಠಂ ಭರನ್ತೀತಿ ಯಸ್ಮಿಂ ರಟ್ಠೇ ವಸನ್ತಿ, ತಸ್ಸ ರಟ್ಠಸ್ಸ ಬಲಿಂ ಭರಣೇನ, ಅತ್ತನೋ ವಾ ಕುಟುಮ್ಬಸ್ಸ ಭರಣೇನ ಭರತಾ। ಪರಿಯಾಯನ್ತಾತಿ ಪರಿತೋ ಸಂಚರನ್ತಾ ಕೀಳನ್ತಿ।
Upaṭṭhānavasena ibhaṃ harantīti ibbhā, hatthigopakā. Te pana nihīnakuṭumbassa bhoggaṃ upādāya gahapatibhāvaṃ upādāya ‘‘gahapatikā’’tipi vuccantīti āha ‘‘gahapatikā’’ti. Kaṇhāti kaṇhābhijātikā. Raṭṭhaṃ bharantīti yasmiṃ raṭṭhe vasanti, tassa raṭṭhassa baliṃ bharaṇena, attano vā kuṭumbassa bharaṇena bharatā. Pariyāyantāti parito saṃcarantā kīḷanti.
ಸೀಲಜೇಟ್ಠಕಾತಿ ಸೀಲಪ್ಪಧಾನಾ। ಯೇ ಪುರಾಣಂ ಸರನ್ತಿ, ತೇ ಸೀಲುತ್ತಮಾ ಅಹೇಸುಂ। ದ್ವಾರಾನಿ ಚಕ್ಖಾದಿದ್ವಾರಾನಿ।
Sīlajeṭṭhakāti sīlappadhānā. Ye purāṇaṃ saranti, te sīluttamā ahesuṃ. Dvārāni cakkhādidvārāni.
ಅಪಕ್ಕಮಿತ್ವಾ ಅಪೇತಾ ವಿರಹಿತಾ ಹುತ್ವಾ। ವಿಸಮಾನೀತಿ ವಿಗತಸಮಾನಿ ದುಚ್ಚರಿತಸಭಾವಾನಿ। ನಾನಾವಿಧದಣ್ಡಾ ನಾನಾವಿಧದಣ್ಡನಿಪಾತಾ।
Apakkamitvā apetā virahitā hutvā. Visamānīti vigatasamāni duccaritasabhāvāni. Nānāvidhadaṇḍā nānāvidhadaṇḍanipātā.
ಅನಾಹಾರಕಾತಿ ಕಿಞ್ಚಿ ಅಭುಞ್ಜನಕಾ। ಪಙ್ಕೋ ವಿಯ ಪಙ್ಕೋ, ಮಲಂ। ದನ್ತಪಙ್ಕೋ ಪುರಿಮಪದಲೋಪೇನ ಪಙ್ಕೋತಿ ವುತ್ತೋತಿ ‘‘ಪಙ್ಕೋ ನಾಮ ದನ್ತಮಲ’’ನ್ತಿ ವುತ್ತಂ। ಅಜೇಹಿ ಕಾತಬ್ಬಕಾನಂ ಅಕೋಪೇತ್ವಾ ಕರಣಂ ಸಮಾದಾನವಸೇನ ವತಂ। ಏಸ ನಯೋ ಸೇಸೇಸುಪಿ। ಕೋಹಞ್ಞಂ ನಾಮ ಅತ್ತನಿ ವಿಜ್ಜಮಾನದೋಸಂ ಪಟಿಚ್ಛಾದೇತ್ವಾ ಅಸನ್ತಗುಣಪಕಾಸನಾತಿ ಆಹ – ‘‘ಪಟಿಚ್ಛನ್ನ…ಪೇ॰… ಕೋಹಞ್ಞಞ್ಚೇವಾ’’ತಿ। ಪರಿಕ್ಖಾರಭಣ್ಡಕವಣ್ಣಾತಿ ಪರಿಕ್ಖಾರಭಣ್ಡಾ ಕಪ್ಪಕಾತಿ। ತೇ ಚ ಖೋ ಅತ್ತನೋ ಜೀವಿಕತ್ಥಾಯ ಆಮಿಸಕಿಞ್ಜಕ್ಖಸ್ಸ ಅತ್ತನಿಬನ್ಧನತ್ಥಾಯ ಅಮೋಚನತ್ಥಾಯ ಕತಾ।
Anāhārakāti kiñci abhuñjanakā. Paṅko viya paṅko, malaṃ. Dantapaṅko purimapadalopena paṅkoti vuttoti ‘‘paṅko nāma dantamala’’nti vuttaṃ. Ajehi kātabbakānaṃ akopetvā karaṇaṃ samādānavasena vataṃ. Esa nayo sesesupi. Kohaññaṃ nāma attani vijjamānadosaṃ paṭicchādetvā asantaguṇapakāsanāti āha – ‘‘paṭicchanna…pe… kohaññañcevā’’ti. Parikkhārabhaṇḍakavaṇṇāti parikkhārabhaṇḍā kappakāti. Te ca kho attano jīvikatthāya āmisakiñjakkhassa attanibandhanatthāya amocanatthāya katā.
ಅಖಿಲನ್ತಿ ಚೇತೋಖಿಲರಹಿತಂ ಬ್ರಹ್ಮವಿಹಾರವಸೇನ। ತೇನಾಹ ‘‘ಮುದು ಅಥದ್ಧ’’ನ್ತಿ।
Akhilanti cetokhilarahitaṃ brahmavihāravasena. Tenāha ‘‘mudu athaddha’’nti.
ಅಧಿಮುತ್ತೋತಿ ಅಭಿರತಿವಸೇನ ಯುತ್ತಪಯುತ್ತೋ। ಪರಿತ್ತಚಿತ್ತೋತಿ ಪರಿತೋ ಖಣ್ಡಿತಚಿತ್ತೋ। ಅಪ್ಪಮಾಣಚಿತ್ತೋತಿ ಏತ್ಥ ‘‘ಕೋ ಅಯ’’ನ್ತಿ ಪಟಿಕ್ಖಿತುಂ ಸಕ್ಕುಣೇಯ್ಯಚಿತ್ತೋ।
Adhimuttoti abhirativasena yuttapayutto. Parittacittoti parito khaṇḍitacitto. Appamāṇacittoti ettha ‘‘ko aya’’nti paṭikkhituṃ sakkuṇeyyacitto.
ಲೋಹಿಚ್ಚಸುತ್ತವಣ್ಣನಾ ನಿಟ್ಠಿತಾ।
Lohiccasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೯. ಲೋಹಿಚ್ಚಸುತ್ತಂ • 9. Lohiccasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೯. ಲೋಹಿಚ್ಚಸುತ್ತವಣ್ಣನಾ • 9. Lohiccasuttavaṇṇanā
