| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. லோகஸுத்தவண்ணனா
3. Lokasuttavaṇṇanā
23. ததியே லோகோதி து³க்க²ஸச்சங். அபி⁴ஸம்பு³த்³தோ⁴தி ஞாதோ பச்சக்கோ² கதோ. லோகஸ்மாதி து³க்க²ஸச்சதோ. பஹீனோதி மஹாபோ³தி⁴மண்டே³ அரஹத்தமக்³க³ஞாணேன பஹீனோ. ததா²க³தஸ்ஸ பா⁴விதாதி ததா²க³தேன பா⁴விதா.
23. Tatiye lokoti dukkhasaccaṃ. Abhisambuddhoti ñāto paccakkho kato. Lokasmāti dukkhasaccato. Pahīnoti mahābodhimaṇḍe arahattamaggañāṇena pahīno. Tathāgatassa bhāvitāti tathāgatena bhāvitā.
ஏவங் எத்தகேன டா²னேன சதூஹி ஸச்சேஹி அத்தனோ பு³த்³த⁴பா⁴வங் கதெ²த்வா இதா³னி ததா²க³தபா⁴வங் கதே²துங் யங், பி⁴க்க²வேதிஆதி³மாஹ. தத்த² தி³ட்ட²ந்தி ரூபாயதனங். ஸுதந்தி ஸத்³தா³யதனங். முதந்தி பத்வா க³ஹேதப்³ப³தோ க³ந்தா⁴யதனங் ரஸாயதனங் பொ²ட்ட²ப்³பா³யதனங். விஞ்ஞாதந்தி ஸுக²து³க்கா²தி³ த⁴ம்மாரம்மணங். பத்தந்தி பரியேஸித்வா வா அபரியேஸித்வா வா பத்தங். பரியேஸிதந்தி பத்தங் வா அப்பத்தங் வா பரியேஸிதங். அனுவிசரிதங் மனஸாதி சித்தேன அனுஸஞ்சரிதங்.
Evaṃ ettakena ṭhānena catūhi saccehi attano buddhabhāvaṃ kathetvā idāni tathāgatabhāvaṃ kathetuṃ yaṃ, bhikkhavetiādimāha. Tattha diṭṭhanti rūpāyatanaṃ. Sutanti saddāyatanaṃ. Mutanti patvā gahetabbato gandhāyatanaṃ rasāyatanaṃ phoṭṭhabbāyatanaṃ. Viññātanti sukhadukkhādi dhammārammaṇaṃ. Pattanti pariyesitvā vā apariyesitvā vā pattaṃ. Pariyesitanti pattaṃ vā appattaṃ vā pariyesitaṃ. Anuvicaritaṃ manasāti cittena anusañcaritaṃ.
ததா²க³தேன அபி⁴ஸம்பு³த்³த⁴ந்தி இமினா ஏதங் த³ஸ்ஸேதி – யங் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ நீலங் பீதகந்திஆதி³ ரூபாரம்மணங் சக்கு²த்³வாரே ஆபாத²ங் ஆக³ச்ச²தி, ‘‘அயங் ஸத்தோ இமஸ்மிங் க²ணே இமங் நாம ரூபாரம்மணங் தி³ஸ்வா ஸுமனோ வா து³ம்மனோ வா மஜ்ஜ²த்தோ வா ஜாதோ’’தி ஸப்³ப³ங் ததா²க³தஸ்ஸ ஏவங் அபி⁴ஸம்பு³த்³த⁴ங். ததா² யங் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ பே⁴ரிஸத்³தோ³ முதி³ங்க³ஸத்³தோ³திஆதி³ ஸத்³தா³ரம்மணங் ஸோதத்³வாரே ஆபாத²ங் ஆக³ச்ச²தி, மூலக³ந்தோ⁴ தசக³ந்தோ⁴திஆதி³ க³ந்தா⁴ரம்மணங் கா⁴னத்³வாரே ஆபாத²ங் ஆக³ச்ச²தி, மூலரஸோ க²ந்த⁴ரஸோதிஆதி³ ரஸாரம்மணங் ஜிவ்ஹாத்³வாரே ஆபாத²ங் ஆக³ச்ச²தி, கக்க²ளங் முது³கந்திஆதி³ பத²வீதா⁴துதேஜோதா⁴துவாயோதா⁴துபே⁴த³ங் பொ²ட்ட²ப்³பா³ரம்மணங் காயத்³வாரே ஆபாத²ங் ஆக³ச்ச²தி, ‘‘அயங் ஸத்தோ இமஸ்மிங் க²ணே இமங் நாம பொ²ட்ட²ப்³பா³ரம்மணங் பு²ஸித்வா ஸுமனோ வா து³ம்மனோ வா மஜ்ஜ²த்தோ வா ஜாதோ’’தி ஸப்³ப³ங் ததா²க³தஸ்ஸ ஏவங் அபி⁴ஸம்பு³த்³த⁴ங். ததா² யங் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ ஸுக²து³க்கா²தி³பே⁴த³ங் த⁴ம்மாரம்மணங் மனொத்³வாரஸ்ஸ ஆபாத²ங் ஆக³ச்ச²தி, ‘‘அயங் ஸத்தோ இமஸ்மிங் க²ணே இமங் நாம த⁴ம்மாரம்மணங் விஜானித்வா ஸுமனோ வா து³ம்மனோ வா மஜ்ஜ²த்தோ வா ஜாதோ’’தி ஸப்³ப³ங் ததா²க³தஸ்ஸ ஏவங் அபி⁴ஸம்பு³த்³த⁴ங். யஞ்ஹி, பி⁴க்க²வே, இமேஸங் ஸப்³ப³ஸத்தானங் தி³ட்ட²ங் ஸுதங் முதங் விஞ்ஞாதங், தத்த² ததா²க³தேன அதி³ட்ட²ங் வா அஸுதங் வா அமுதங் வா அவிஞ்ஞாதங் வா நத்தி², இமஸ்ஸ பன மஹாஜனஸ்ஸ பரியேஸித்வா அப்பத்தம்பி அத்தி², அபரியேஸித்வா அப்பத்தம்பி அத்தி², பரியேஸித்வா பத்தம்பி அத்தி², அபரியேஸித்வா பத்தம்பி அத்தி², ஸப்³ப³ம்பி ததா²க³தஸ்ஸ அப்பத்தங் நாம நத்தி² ஞாணேன அஸச்சி²கதங்.
Tathāgatenaabhisambuddhanti iminā etaṃ dasseti – yaṃ aparimāṇāsu lokadhātūsu imassa sadevakassa lokassa nīlaṃ pītakantiādi rūpārammaṇaṃ cakkhudvāre āpāthaṃ āgacchati, ‘‘ayaṃ satto imasmiṃ khaṇe imaṃ nāma rūpārammaṇaṃ disvā sumano vā dummano vā majjhatto vā jāto’’ti sabbaṃ tathāgatassa evaṃ abhisambuddhaṃ. Tathā yaṃ aparimāṇāsu lokadhātūsu imassa sadevakassa lokassa bherisaddo mudiṅgasaddotiādi saddārammaṇaṃ sotadvāre āpāthaṃ āgacchati, mūlagandho tacagandhotiādi gandhārammaṇaṃ ghānadvāre āpāthaṃ āgacchati, mūlaraso khandharasotiādi rasārammaṇaṃ jivhādvāre āpāthaṃ āgacchati, kakkhaḷaṃ mudukantiādi pathavīdhātutejodhātuvāyodhātubhedaṃ phoṭṭhabbārammaṇaṃ kāyadvāre āpāthaṃ āgacchati, ‘‘ayaṃ satto imasmiṃ khaṇe imaṃ nāma phoṭṭhabbārammaṇaṃ phusitvā sumano vā dummano vā majjhatto vā jāto’’ti sabbaṃ tathāgatassa evaṃ abhisambuddhaṃ. Tathā yaṃ aparimāṇāsu lokadhātūsu imassa sadevakassa lokassa sukhadukkhādibhedaṃ dhammārammaṇaṃ manodvārassa āpāthaṃ āgacchati, ‘‘ayaṃ satto imasmiṃ khaṇe imaṃ nāma dhammārammaṇaṃ vijānitvā sumano vā dummano vā majjhatto vā jāto’’ti sabbaṃ tathāgatassa evaṃ abhisambuddhaṃ. Yañhi, bhikkhave, imesaṃ sabbasattānaṃ diṭṭhaṃ sutaṃ mutaṃ viññātaṃ, tattha tathāgatena adiṭṭhaṃ vā asutaṃ vā amutaṃ vā aviññātaṃ vā natthi, imassa pana mahājanassa pariyesitvā appattampi atthi, apariyesitvā appattampi atthi, pariyesitvā pattampi atthi, apariyesitvā pattampi atthi, sabbampi tathāgatassa appattaṃ nāma natthi ñāṇena asacchikataṃ.
தஸ்மா ததா²க³தோதி வுச்சதீதி யங் யதா² லோகேன க³தங், தஸ்ஸ ததே²வ க³தத்தா ததா²க³தோதி வுச்சதி . பாளியங் பன ‘‘அபி⁴ஸம்பு³த்³த⁴’’ந்தி வுத்தங், தங் க³தஸத்³தே³ன ஏகத்த²ங். இமினா நயேன ஸப்³ப³வாரேஸு ததா²க³தோதி நிக³மஸ்ஸ அத்தோ² வேதி³தப்³போ³. தஸ்ஸ யுத்தி ஏகபுக்³க³லவண்ணனாயங் ததா²க³தஸத்³த³வித்தா²ரே வுத்தாயேவ. அபிசெத்த² அஞ்ஞத³த்தூ²தி ஏகங்ஸத்தே² நிபாதோ. த³க்க²தீதி த³ஸோ. வஸங் வத்தேதீதி வஸவத்தீ.
Tasmā tathāgatoti vuccatīti yaṃ yathā lokena gataṃ, tassa tatheva gatattā tathāgatoti vuccati . Pāḷiyaṃ pana ‘‘abhisambuddha’’nti vuttaṃ, taṃ gatasaddena ekatthaṃ. Iminā nayena sabbavāresu tathāgatoti nigamassa attho veditabbo. Tassa yutti ekapuggalavaṇṇanāyaṃ tathāgatasaddavitthāre vuttāyeva. Apicettha aññadatthūti ekaṃsatthe nipāto. Dakkhatīti daso. Vasaṃ vattetīti vasavattī.
ஸப்³ப³ங் லோகங் அபி⁴ஞ்ஞாதி தேதா⁴துகங் லோகஸன்னிவாஸங் ஜானித்வா. ஸப்³ப³ங் லோகே யதா²தத²ந்தி தஸ்மிங் தேதா⁴துகலோகஸன்னிவாஸே யங்கிஞ்சி நெய்யங், ஸப்³ப³ங் தங் யதா²தத²ங் அவிபரீதங் ஜானித்வா. விஸங்யுத்தோதி சதுன்னங் யோகா³னங் பஹானேன விஸங்யுத்தோ. அனூபயோதி தண்ஹாதி³ட்டி²உபயேஹி விரஹிதோ. ஸப்³பா³பி⁴பூ⁴தி ரூபாதீ³னி ஸப்³பா³ரம்மணானி அபி⁴ப⁴வித்வா டி²தோ. தீ⁴ரோதி தி⁴திஸம்பன்னோ. ஸப்³ப³க³ந்த²ப்பமோசனோதி ஸப்³பே³ சத்தாரோபி க³ந்தே² மோசெத்வா டி²தோ. பு²ட்ட²ஸ்ஸாதி பு²ட்டா² அஸ்ஸ. இத³ஞ்ச கரணத்தே² ஸாமிவசனங். பரமா ஸந்தீதி நிப்³பா³னங். தஞ்ஹி தேன ஞாணபு²ஸனேன பு²ட்ட²ங். தேனேவாஹ – நிப்³பா³னங் அகுதோப⁴யந்தி. அத² வா பரமாஸந்தீதி உத்தமா ஸந்தி. கதரா ஸாதி? நிப்³பா³னங். யஸ்மா பன நிப்³பா³னே குதோசி ப⁴யங் நத்தி², தஸ்மா தங் அகுதோப⁴யந்தி வுச்சதி. விமுத்தோ உபதி⁴ஸங்க²யேதி உபதி⁴ஸங்க²யஸங்கா²தே நிப்³பா³னே ததா³ரம்மணாய ப²லவிமுத்தியா விமுத்தோ. ஸீஹோ அனுத்தரோதி பரிஸ்ஸயானங் ஸஹனட்டே²ன கிலேஸானஞ்ச ஹிங்ஸனட்டே²ன ததா²க³தோ அனுத்தரோ ஸீஹோ நாம. ப்³ரஹ்மந்தி ஸெட்ட²ங். இதீதி ஏவங் ததா²க³தஸ்ஸ கு³ணே ஜானித்வா. ஸங்க³ம்மாதி ஸமாக³ந்த்வா. தங் நமஸ்ஸந்தீதி தங் ததா²க³தங் தே ஸரணங் க³தா நமஸ்ஸந்தி. இதா³னி யங் வத³ந்தா தே நமஸ்ஸந்தி, தங் த³ஸ்ஸேதுங் த³ந்தோதிஆதி³ வுத்தங். தங் உத்தானத்த²மேவாதி.
Sabbaṃ lokaṃ abhiññāti tedhātukaṃ lokasannivāsaṃ jānitvā. Sabbaṃ loke yathātathanti tasmiṃ tedhātukalokasannivāse yaṃkiñci neyyaṃ, sabbaṃ taṃ yathātathaṃ aviparītaṃ jānitvā. Visaṃyuttoti catunnaṃ yogānaṃ pahānena visaṃyutto. Anūpayoti taṇhādiṭṭhiupayehi virahito. Sabbābhibhūti rūpādīni sabbārammaṇāni abhibhavitvā ṭhito. Dhīroti dhitisampanno. Sabbaganthappamocanoti sabbe cattāropi ganthe mocetvā ṭhito. Phuṭṭhassāti phuṭṭhā assa. Idañca karaṇatthe sāmivacanaṃ. Paramā santīti nibbānaṃ. Tañhi tena ñāṇaphusanena phuṭṭhaṃ. Tenevāha – nibbānaṃ akutobhayanti. Atha vā paramāsantīti uttamā santi. Katarā sāti? Nibbānaṃ. Yasmā pana nibbāne kutoci bhayaṃ natthi, tasmā taṃ akutobhayanti vuccati. Vimutto upadhisaṅkhayeti upadhisaṅkhayasaṅkhāte nibbāne tadārammaṇāya phalavimuttiyā vimutto. Sīho anuttaroti parissayānaṃ sahanaṭṭhena kilesānañca hiṃsanaṭṭhena tathāgato anuttaro sīho nāma. Brahmanti seṭṭhaṃ. Itīti evaṃ tathāgatassa guṇe jānitvā. Saṅgammāti samāgantvā. Taṃ namassantīti taṃ tathāgataṃ te saraṇaṃ gatā namassanti. Idāni yaṃ vadantā te namassanti, taṃ dassetuṃ dantotiādi vuttaṃ. Taṃ uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. லோகஸுத்தங் • 3. Lokasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. லோகஸுத்தவண்ணனா • 3. Lokasuttavaṇṇanā
