| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. लोमसकङ्गियत्थेरअपदानं
8. Lomasakaṅgiyattheraapadānaṃ
२२५.
225.
‘‘इमम्हि भद्दके कप्पे, ब्रह्मबन्धु महायसो।
‘‘Imamhi bhaddake kappe, brahmabandhu mahāyaso;
कस्सपो नाम गोत्तेन, उप्पज्जि वदतं वरो॥
Kassapo nāma gottena, uppajji vadataṃ varo.
२२६.
226.
‘‘तदाहं चन्दनो चेव, पब्बजित्वान सासने।
‘‘Tadāhaṃ candano ceva, pabbajitvāna sāsane;
आपाणकोटिकं धम्मं, पूरयित्वान सासने॥
Āpāṇakoṭikaṃ dhammaṃ, pūrayitvāna sāsane.
२२७.
227.
‘‘ततो चुता सन्तुसितं, उपपन्ना उभो मयं।
‘‘Tato cutā santusitaṃ, upapannā ubho mayaṃ;
तत्थ दिब्बेहि नच्चेहि, गीतेहि वादितेहि च॥
Tattha dibbehi naccehi, gītehi vāditehi ca.
२२८.
228.
‘‘रूपादिदसहङ्गेहि, अभिभोत्वान सेसके।
‘‘Rūpādidasahaṅgehi, abhibhotvāna sesake;
यावतायुं वसित्वान, अनुभोत्वा महासुखं॥
Yāvatāyuṃ vasitvāna, anubhotvā mahāsukhaṃ.
२२९.
229.
‘‘ततो चवित्वा तिदसं, चन्दनो उपपज्जथ।
‘‘Tato cavitvā tidasaṃ, candano upapajjatha;
अहं कपिलवत्थुस्मिं, अजायिं साकियत्रजो॥
Ahaṃ kapilavatthusmiṃ, ajāyiṃ sākiyatrajo.
२३०.
230.
‘‘यदा उदायित्थेरेन, अज्झिट्ठो लोकनायको।
‘‘Yadā udāyittherena, ajjhiṭṭho lokanāyako;
अनुकम्पिय सक्यानं, उपेसि कपिलव्हयं॥
Anukampiya sakyānaṃ, upesi kapilavhayaṃ.
२३१.
231.
‘‘तदातिमानिनो सक्या, न बुद्धस्स गुणञ्ञुनो।
‘‘Tadātimānino sakyā, na buddhassa guṇaññuno;
पणमन्ति न सम्बुद्धं, जातिथद्धा अनादरा॥
Paṇamanti na sambuddhaṃ, jātithaddhā anādarā.
२३२.
232.
‘‘तेसं सङ्कप्पमञ्ञाय, आकासे चङ्कमी जिनो।
‘‘Tesaṃ saṅkappamaññāya, ākāse caṅkamī jino;
पज्जुन्नो विय वस्सित्थ, पज्जलित्थ यथा सिखी॥
Pajjunno viya vassittha, pajjalittha yathā sikhī.
२३३.
233.
‘‘दस्सेत्वा रूपमतुलं, पुन अन्तरधायथ।
‘‘Dassetvā rūpamatulaṃ, puna antaradhāyatha;
एकोपि हुत्वा बहुधा, अहोसि पुनरेकको॥
Ekopi hutvā bahudhā, ahosi punarekako.
२३४.
234.
‘‘अन्धकारं पकासञ्च, दस्सयित्वा अनेकधा।
‘‘Andhakāraṃ pakāsañca, dassayitvā anekadhā;
पाटिहेरं करित्वान, विनयी ञातके मुनि॥
Pāṭiheraṃ karitvāna, vinayī ñātake muni.
२३५.
235.
‘‘चातुद्दीपो महामेघो, तावदेव पवस्सथ।
‘‘Cātuddīpo mahāmegho, tāvadeva pavassatha;
तदा हि जातकं बुद्धो, वेस्सन्तरमदेसयि॥
Tadā hi jātakaṃ buddho, vessantaramadesayi.
२३६.
236.
‘‘तदा ते खत्तिया सब्बे, निहन्त्वा जातिजं मदं।
‘‘Tadā te khattiyā sabbe, nihantvā jātijaṃ madaṃ;
उपेसुं सरणं बुद्धं, आह सुद्धोदनो तदा॥
Upesuṃ saraṇaṃ buddhaṃ, āha suddhodano tadā.
२३७.
237.
‘‘‘इदं ततियं तव भूरिपञ्ञ, पादानि वन्दामि समन्तचक्खु।
‘‘‘Idaṃ tatiyaṃ tava bhūripañña, pādāni vandāmi samantacakkhu;
यदाभिजातो पथवी पकम्पयी, यदा च तं नज्जहि जम्बुछाया’॥
Yadābhijāto pathavī pakampayī, yadā ca taṃ najjahi jambuchāyā’.
२३८.
238.
‘‘तदा बुद्धानुभावं तं, दिस्वा विम्हितमानसो।
‘‘Tadā buddhānubhāvaṃ taṃ, disvā vimhitamānaso;
पब्बजित्वान तत्थेव, निवसिं मातुपूजको॥
Pabbajitvāna tattheva, nivasiṃ mātupūjako.
२३९.
239.
‘‘चन्दनो देवपुत्तो मं, उपगन्त्वानुपुच्छथ।
‘‘Candano devaputto maṃ, upagantvānupucchatha;
भद्देकरत्तस्स तदा, सङ्खेपवित्थारं नयं॥
Bhaddekarattassa tadā, saṅkhepavitthāraṃ nayaṃ.
२४०.
240.
‘‘चोदितोहं तदा तेन, उपेच्च नरनायकं।
‘‘Coditohaṃ tadā tena, upecca naranāyakaṃ;
भद्देकरत्तं सुत्वान, संविग्गो वनमामको॥
Bhaddekarattaṃ sutvāna, saṃviggo vanamāmako.
२४१.
241.
‘‘तदा मातरमपुच्छिं, वने वच्छामि एकको।
‘‘Tadā mātaramapucchiṃ, vane vacchāmi ekako;
२४२.
242.
उरसा पनुदिस्सामि, विवेकमनुब्रूहयं॥
Urasā panudissāmi, vivekamanubrūhayaṃ.
२४३.
243.
‘‘तदा वनं पविट्ठोहं, सरित्वा जिनसासनं।
‘‘Tadā vanaṃ paviṭṭhohaṃ, saritvā jinasāsanaṃ;
भद्देकरत्तओवादं, अरहत्तमपापुणिं॥
Bhaddekarattaovādaṃ, arahattamapāpuṇiṃ.
२४४.
244.
‘‘‘अतीतं नान्वागमेय्य, नप्पटिकङ्खे अनागतं।
‘‘‘Atītaṃ nānvāgameyya, nappaṭikaṅkhe anāgataṃ;
यदतीतं पहीनं तं, अप्पत्तञ्च अनागतं॥
Yadatītaṃ pahīnaṃ taṃ, appattañca anāgataṃ.
२४५.
245.
‘‘‘पच्चुप्पन्नञ्च यो धम्मं, तत्थ तत्थ विपस्सति।
‘‘‘Paccuppannañca yo dhammaṃ, tattha tattha vipassati;
असंहीरं असंकुप्पं, तं विद्वा मनुब्रूहये॥
Asaṃhīraṃ asaṃkuppaṃ, taṃ vidvā manubrūhaye.
२४६.
246.
‘‘‘अज्जेव किच्चमातप्पं, को जञ्ञा मरणं सुवे।
‘‘‘Ajjeva kiccamātappaṃ, ko jaññā maraṇaṃ suve;
२४७.
247.
‘‘‘एवंविहारिं आतापिं, अहोरत्तमतन्दितं।
‘‘‘Evaṃvihāriṃ ātāpiṃ, ahorattamatanditaṃ;
तं वे भद्देकरत्तोति, सन्तो आचिक्खते मुनि’॥
Taṃ ve bhaddekarattoti, santo ācikkhate muni’.
२४८.
248.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
२४९.
249.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
२५०.
250.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा लोमसकङ्गियो 9 थेरो इमा गाथायो
Itthaṃ sudaṃ āyasmā lomasakaṅgiyo 10 thero imā gāthāyo
अभासित्थाति।
Abhāsitthāti.
लोमसकङ्गियत्थेरस्सापदानं अट्ठमं।
Lomasakaṅgiyattherassāpadānaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ८. लोमसकङ्गियत्थेरअपदानवण्णना • 8. Lomasakaṅgiyattheraapadānavaṇṇanā
