A World of Knowledge
    Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi

    ೪೩೩. ಲೋಮಸಕಸ್ಸಪಜಾತಕಂ (೭)

    433. Lomasakassapajātakaṃ (7)

    ೬೦.

    60.

    ಅಸ್ಸ ಇನ್ದಸಮೋ ರಾಜ, ಅಚ್ಚನ್ತಂ ಅಜರಾಮರೋ।

    Assa indasamo rāja, accantaṃ ajarāmaro;

    ಸಚೇ ತ್ವಂ ಯಞ್ಞಂ ಯಾಜೇಯ್ಯ, ಇಸಿಂ ಲೋಮಸಕಸ್ಸಪಂ॥

    Sace tvaṃ yaññaṃ yājeyya, isiṃ lomasakassapaṃ.

    ೬೧.

    61.

    ಸಸಮುದ್ದಪರಿಯಾಯಂ, ಮಹಿಂ ಸಾಗರಕುಣ್ಡಲಂ।

    Sasamuddapariyāyaṃ, mahiṃ sāgarakuṇḍalaṃ;

    ನ ಇಚ್ಛೇ ಸಹ ನಿನ್ದಾಯ, ಏವಂ ಸೇಯ್ಯ 1 ವಿಜಾನಹಿ॥

    Na icche saha nindāya, evaṃ seyya 2 vijānahi.

    ೬೨.

    62.

    ಧಿರತ್ಥು ತಂ ಯಸಲಾಭಂ, ಧನಲಾಭಞ್ಚ ಬ್ರಾಹ್ಮಣ।

    Dhiratthu taṃ yasalābhaṃ, dhanalābhañca brāhmaṇa;

    ಯಾ ವುತ್ತಿ ವಿನಿಪಾತೇನ, ಅಧಮ್ಮಚರಣೇನ ವಾ॥

    Yā vutti vinipātena, adhammacaraṇena vā.

    ೬೩.

    63.

    ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ।

    Api ce pattamādāya, anagāro paribbaje;

    ಸಾಯೇವ ಜೀವಿಕಾ ಸೇಯ್ಯೋ, ಯಾ ಚಾಧಮ್ಮೇನ ಏಸನಾ॥

    Sāyeva jīvikā seyyo, yā cādhammena esanā.

    ೬೪.

    64.

    ಅಪಿ ಚೇ ಪತ್ತಮಾದಾಯ, ಅನಗಾರೋ ಪರಿಬ್ಬಜೇ।

    Api ce pattamādāya, anagāro paribbaje;

    ಅಞ್ಞಂ ಅಹಿಂಸಯಂ ಲೋಕೇ, ಅಪಿ ರಜ್ಜೇನ ತಂ ವರಂ॥

    Aññaṃ ahiṃsayaṃ loke, api rajjena taṃ varaṃ.

    ೬೫.

    65.

    ಬಲಂ ಚನ್ದೋ ಬಲಂ ಸುರಿಯೋ, ಬಲಂ ಸಮಣಬ್ರಾಹ್ಮಣಾ।

    Balaṃ cando balaṃ suriyo, balaṃ samaṇabrāhmaṇā;

    ಬಲಂ ವೇಲಾ ಸಮುದ್ದಸ್ಸ, ಬಲಾತಿಬಲಮಿತ್ಥಿಯೋ॥

    Balaṃ velā samuddassa, balātibalamitthiyo.

    ೬೬.

    66.

    ಯಥಾ ಉಗ್ಗತಪಂ ಸನ್ತಂ, ಇಸಿಂ ಲೋಮಸಕಸ್ಸಪಂ।

    Yathā uggatapaṃ santaṃ, isiṃ lomasakassapaṃ;

    ಪಿತು ಅತ್ಥಾ ಚನ್ದವತೀ, ವಾಜಪೇಯ್ಯಂ 3 ಅಯಾಜಯಿ॥

    Pitu atthā candavatī, vājapeyyaṃ 4 ayājayi.

    ೬೭.

    67.

    ತಂ ಲೋಭಪಕತಂ ಕಮ್ಮಂ, ಕಟುಕಂ ಕಾಮಹೇತುಕಂ।

    Taṃ lobhapakataṃ kammaṃ, kaṭukaṃ kāmahetukaṃ;

    ತಸ್ಸ ಮೂಲಂ ಗವೇಸಿಸ್ಸಂ, ಛೇಚ್ಛಂ ರಾಗಂ ಸಬನ್ಧನಂ॥

    Tassa mūlaṃ gavesissaṃ, checchaṃ rāgaṃ sabandhanaṃ.

    ೬೮.

    68.

    ಧಿರತ್ಥು ಕಾಮೇ ಸುಬಹೂಪಿ ಲೋಕೇ, ತಪೋವ ಸೇಯ್ಯೋ ಕಾಮಗುಣೇಹಿ ರಾಜ।

    Dhiratthu kāme subahūpi loke, tapova seyyo kāmaguṇehi rāja;

    ತಪೋ ಕರಿಸ್ಸಾಮಿ ಪಹಾಯ ಕಾಮೇ, ತವೇವ ರಟ್ಠಂ ಚನ್ದವತೀ ಚ ಹೋತೂತಿ॥

    Tapo karissāmi pahāya kāme, taveva raṭṭhaṃ candavatī ca hotūti.

    ಲೋಮಸಕಸ್ಸಪಜಾತಕಂ ಸತ್ತಮಂ।

    Lomasakassapajātakaṃ sattamaṃ.







    Footnotes:
    1. ಸಯ್ಹ (ಸೀ॰ ಸ್ಯಾ॰ ಪೀ॰)
    2. sayha (sī. syā. pī.)
    3. ವಾಚಪೇಯ್ಯಂ (ಪೀ॰ ಕ॰)
    4. vācapeyyaṃ (pī. ka.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೪೩೩] ೭. ಲೋಮಸಕಸ್ಸಪಜಾತಕವಣ್ಣನಾ • [433] 7. Lomasakassapajātakavaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact