| Library / Tipiṭaka / ཏིཔིཊཀ • Tipiṭaka / ཝིནཡསངྒཧ-ཨཊྛཀཐཱ • Vinayasaṅgaha-aṭṭhakathā |
༦. མཙྪམཾསཝིནིཙྪཡཀཐཱ
6. Macchamaṃsavinicchayakathā
༣༨. མཙྪམཾསེསུ པན མཙྪགྒཧཎེན སབྦམྤི ཛལཛཾ ཝུཏྟཾ། ཏཏྠ ཨཀཔྤིཡཾ ནཱམ ནཏྠི། མཾསེསུ པན མནུསྶཧཏྠིཨསྶསུནཁཨཧིསཱིཧབྱགྒྷདཱིཔིཨཙྪཏརཙྪཱནཾ ཝསེན དས མཾསཱནི ཨཀཔྤིཡཱནི། ཏཏྠ མནུསྶམཾསེ ཐུལླཙྩཡཾ, སེསེསུ དུཀྐཊཾ། ཨིཏི ཨིམེསཾ མནུསྶཱདཱིནཾ དསནྣཾ མཾསམྤི ཨཊྛིཔི ལོཧིཏམྤི ཙམྨམྤི ལོམམྤི སབྦཾ ན ཝཊྚཏི། ཝསཱསུ པན ཨེཀཱ མནུསྶཝསཱཝ ན ཝཊྚཏི། ཁཱིརཱདཱིསུ ཨཀཔྤིཡཾ ནཱམ ནཏྠི། ཨིམེསུ པན ཨཀཔྤིཡམཾསེསུ ཨཊྛིཨཱདཱིསུ ཝཱ ཡཾ ཀིཉྩི ཉཏྭཱ ཝཱ ཨཉཏྭཱ ཝཱ ཁཱདནྟསྶ ཨཱཔཏྟིཡེཝ། ཡདཱ ཛཱནཱཏི, ཏདཱ དེསེཏབྦཱ། ‘‘ཨཔུཙྪིཏྭཱཝ ཁཱདིསྶཱམཱི’’ཏི གཎྷཏོ པཊིགྒཧཎེཔི དུཀྐཊཾ, ‘‘པུཙྪིཏྭཱ ཁཱདིསྶཱམཱི’’ཏི གཎྷཏོ ཨནཱཔཏྟི། ཨུདྡིསྶཀཏཾ པན ཛཱནིཏྭཱ ཁཱདནྟསྶེཝ ཨཱཔཏྟི, པཙྪཱ ཛཱནནྟོ ཨཱཔཏྟིཡཱ ན ཀཱརེཏབྦོ (མཧཱཝ॰ ཨཊྛ॰ ༢༨༡)།
38.Macchamaṃsesu pana macchaggahaṇena sabbampi jalajaṃ vuttaṃ. Tattha akappiyaṃ nāma natthi. Maṃsesu pana manussahatthiassasunakhaahisīhabyagghadīpiacchataracchānaṃ vasena dasa maṃsāni akappiyāni. Tattha manussamaṃse thullaccayaṃ, sesesu dukkaṭaṃ. Iti imesaṃ manussādīnaṃ dasannaṃ maṃsampi aṭṭhipi lohitampi cammampi lomampi sabbaṃ na vaṭṭati. Vasāsu pana ekā manussavasāva na vaṭṭati. Khīrādīsu akappiyaṃ nāma natthi. Imesu pana akappiyamaṃsesu aṭṭhiādīsu vā yaṃ kiñci ñatvā vā añatvā vā khādantassa āpattiyeva. Yadā jānāti, tadā desetabbā. ‘‘Apucchitvāva khādissāmī’’ti gaṇhato paṭiggahaṇepi dukkaṭaṃ, ‘‘pucchitvā khādissāmī’’ti gaṇhato anāpatti. Uddissakataṃ pana jānitvā khādantasseva āpatti, pacchā jānanto āpattiyā na kāretabbo (mahāva. aṭṭha. 281).
ཏཏྠ (པཱརཱ॰ ཨཊྛ॰ ༢.༤༡༠) ཨུདྡིསྶཀཏཾ ནཱམ བྷིཀྑཱུནཾ ཨཏྠཱཡ ཝདྷིཏྭཱ སམྤཱདིཏཾ མཙྪམཾསཾ། ཨུབྷཡམྤི ཧི ཨུདྡིསྶཀཏཾ ན ཝཊྚཏི། ཏམྤི ཨདིཊྛཾ ཨསུཏཾ ཨཔརིསངྐིཏཾ ཝཊྚཏི། ཏིཀོཊིཔརིསུདྡྷཉྷི མཙྪམཾསཾ བྷགཝཏཱ ཨནུཉྙཱཏཾ ཨདིཊྛཾ ཨསུཏཾ ཨཔརིསངྐིཏཾ། ཏཏྠ ཨདིཊྛཾ ནཱམ བྷིཀྑཱུནཾ ཨཏྠཱཡ མིགམཙྪེ ཝདྷིཏྭཱ གཡ྄ཧམཱནཾ ཨདིཊྛཾ། ཨསུཏཾ ནཱམ བྷིཀྑཱུནཾ ཨཏྠཱཡ མིགམཙྪེ ཝདྷིཏྭཱ གཧིཏནྟི ཨསུཏཾ། ཨཔརིསངྐིཏཾ པན དིཊྛཔརིསངྐིཏཾ སུཏཔརིསངྐིཏཾ ཏདུབྷཡཝིནིམུཏྟཔརིསངྐིཏཉྩ ཉཏྭཱ ཏབྦིཔཀྑཏོ ཛཱནིཏབྦཾ། ཀཐཾ? ཨིདྷ བྷིཀྑཱུ པསྶནྟི མནུསྶེ ཛཱལཝཱགུརཱདིཧཏྠེ གཱམཏོ ཝཱ ནིཀྑམནྟེ ཨརཉྙེ ཝཱ ཝིཙརནྟེ། དུཏིཡདིཝསེ ཙ ནེསཾ ཏཾ གཱམཾ པིཎྜཱཡ པཝིཊྛཱནཾ སམཙྪམཾསཾ པིཎྜཔཱཏཾ ཨབྷིཧརནྟི། ཏེ ཏེན དིཊྛེན པརིསངྐནྟི ‘‘བྷིཀྑཱུནཾ ནུ ཁོ ཨཏྠཱཡ ཀཏ’’ནྟི, ཨིདཾ དིཊྛཔརིསངྐིཏཾ, ཨེཏཾ གཧེཏུཾ ན ཝཊྚཏི། ཡཾ ཨེཝཾ ཨཔརིསངྐིཏཾ, ཏཾ ཝཊྚཏི། སཙེ པན ཏེ མནུསྶཱ ‘‘ཀསྨཱ, བྷནྟེ, ན གཎྷཐཱ’’ཏི པུཙྪིཏྭཱ ཏམཏྠཾ སུཏྭཱ ‘‘ནཡིདཾ, བྷནྟེ, བྷིཀྑཱུནཾ ཨཏྠཱཡ ཀཏཾ, ཨམྷེཧི ཨཏྟནོ ཨཏྠཱཡ ཝཱ རཱཛཡུཏྟཱདཱིནཾ ཝཱ ཨཏྠཱཡ ཀཏ’’ནྟི ཝདནྟི, ཀཔྤཏི།
Tattha (pārā. aṭṭha. 2.410) uddissakataṃ nāma bhikkhūnaṃ atthāya vadhitvā sampāditaṃ macchamaṃsaṃ. Ubhayampi hi uddissakataṃ na vaṭṭati. Tampi adiṭṭhaṃ asutaṃ aparisaṅkitaṃ vaṭṭati. Tikoṭiparisuddhañhi macchamaṃsaṃ bhagavatā anuññātaṃ adiṭṭhaṃ asutaṃ aparisaṅkitaṃ. Tattha adiṭṭhaṃ nāma bhikkhūnaṃ atthāya migamacche vadhitvā gayhamānaṃ adiṭṭhaṃ. Asutaṃ nāma bhikkhūnaṃ atthāya migamacche vadhitvā gahitanti asutaṃ. Aparisaṅkitaṃ pana diṭṭhaparisaṅkitaṃ sutaparisaṅkitaṃ tadubhayavinimuttaparisaṅkitañca ñatvā tabbipakkhato jānitabbaṃ. Kathaṃ? Idha bhikkhū passanti manusse jālavāgurādihatthe gāmato vā nikkhamante araññe vā vicarante. Dutiyadivase ca nesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena diṭṭhena parisaṅkanti ‘‘bhikkhūnaṃ nu kho atthāya kata’’nti, idaṃ diṭṭhaparisaṅkitaṃ, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kata’’nti vadanti, kappati.
ན ཧེཝ ཁོ བྷིཀྑཱུ པསྶནྟི, ཨཔིཙ ཁོ སུཎནྟི ‘‘མནུསྶཱ ཀིར ཛཱལཝཱགུརཱདིཧཏྠཱ གཱམཏོ ཝཱ ནིཀྑམནྟི, ཨརཉྙེ ཝཱ ཝིཙརནྟཱི’’ཏི། དུཏིཡདིཝསེ ཙ ཏེསཾ ཏཾ གཱམཾ པིཎྜཱཡ པཝིཊྛཱནཾ སམཙྪམཾསཾ པིཎྜཔཱཏཾ ཨབྷིཧརནྟི། ཏེ ཏེན སུཏེན པརིསངྐནྟི ‘‘བྷིཀྑཱུནཾ ནུ ཁོ ཨཏྠཱཡ ཀཏ’’ནྟི, ཨིདཾ སུཏཔརིསངྐིཏཾ ནཱམ, ཨེཏཾ གཧེཏུཾ ན ཝཊྚཏི། ཡཾ ཨེཝཾ ཨཔརིསངྐིཏཾ, ཏཾ ཝཊྚཏི། སཙེ པན ཏེ མནུསྶཱ ‘‘ཀསྨཱ, བྷནྟེ, ན གཎྷཐཱ’’ཏི པུཙྪིཏྭཱ ཏམཏྠཾ སུཏྭཱ ‘‘ནཡིདཾ, བྷནྟེ, བྷིཀྑཱུནཾ ཨཏྠཱཡ ཀཏཾ, ཨམྷེཧི ཨཏྟནོ ཨཏྠཱཡ ཝཱ རཱཛཡུཏྟཱདཱིནཾ ཝཱ ཨཏྠཱཡ ཀཏ’’ནྟི ཝདནྟི, ཀཔྤཏི།
Na heva kho bhikkhū passanti, apica kho suṇanti ‘‘manussā kira jālavāgurādihatthā gāmato vā nikkhamanti, araññe vā vicarantī’’ti. Dutiyadivase ca tesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena sutena parisaṅkanti ‘‘bhikkhūnaṃ nu kho atthāya kata’’nti, idaṃ sutaparisaṅkitaṃ nāma, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kata’’nti vadanti, kappati.
ན ཧེཝ ཁོ པན བྷིཀྑཱུ པསྶནྟི ན སུཎནྟི, ཨཔིཙ ཁོ ཏེསཾ ཏཾ གཱམཾ པིཎྜཱཡ པཝིཊྛཱནཾ པཏྟཾ གཧེཏྭཱ སམཙྪམཾསཾ པིཎྜཔཱཏཾ ཨབྷིསངྑརིཏྭཱ ཨབྷིཧརནྟི། ཏེ པརིསངྐནྟི ‘‘བྷིཀྑཱུནཾ ནུ ཁོ ཨཏྠཱཡ ཀཏ’’ནྟི, ཨིདཾ ཏདུབྷཡཝིནིམུཏྟཔརིསངྐིཏཾ ནཱམ, ཨེཏམྤི གཧེཏུཾ ན ཝཊྚཏི། ཡཾ ཨེཝཾ ཨཔརིསངྐིཏཾ, ཏཾ ཝཊྚཏི། སཙེ པན ཏེ མནུསྶཱ ‘‘ཀསྨཱ, བྷནྟེ, ན གཎྷཐཱ’’ཏི པུཙྪིཏྭཱ ཏམཏྠཾ སུཏྭཱ ‘‘ནཡིདཾ, བྷནྟེ, བྷིཀྑཱུནཾ ཨཏྠཱཡ ཀཏཾ, ཨམྷེཧི ཨཏྟནོ ཨཏྠཱཡ ཝཱ རཱཛཡུཏྟཱདཱིནཾ ཝཱ ཨཏྠཱཡ ཀཏཾ, པཝཏྟམཾསཾ ཝཱ ཀཔྤིཡམེཝ ལབྷིཏྭཱ བྷིཀྑཱུནཾ ཨཏྠཱཡ སམྤཱདིཏ’’ནྟི ཝདནྟི, ཀཔྤཏི། མཏཱནཾ པེཏཀིཙྩཏྠཱཡ མངྒལཱདཱིནཾ ཝཱ ཨཏྠཱཡ ཀཏེཔི ཨེསེཝ ནཡོ། ཡཾ ཡཉྷི བྷིཀྑཱུནཾཡེཝ ཨཏྠཱཡ ཨཀཏཾ, ཡཏྠ ཙ ནིབྦེམཏིཀོ ཧོཏི, ཏཾ སབྦཾ ཀཔྤཏི།
Na heva kho pana bhikkhū passanti na suṇanti, apica kho tesaṃ taṃ gāmaṃ piṇḍāya paviṭṭhānaṃ pattaṃ gahetvā samacchamaṃsaṃ piṇḍapātaṃ abhisaṅkharitvā abhiharanti. Te parisaṅkanti ‘‘bhikkhūnaṃ nu kho atthāya kata’’nti, idaṃ tadubhayavinimuttaparisaṅkitaṃ nāma, etampi gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kataṃ, pavattamaṃsaṃ vā kappiyameva labhitvā bhikkhūnaṃ atthāya sampādita’’nti vadanti, kappati. Matānaṃ petakiccatthāya maṅgalādīnaṃ vā atthāya katepi eseva nayo. Yaṃ yañhi bhikkhūnaṃyeva atthāya akataṃ, yattha ca nibbematiko hoti, taṃ sabbaṃ kappati.
༣༩. སཙེ པན ཨེཀསྨིཾ ཝིཧཱརེ བྷིཀྑཱུནཾ ཨུདྡིསྶཀཏཾ ཧོཏི, ཏེ ཙ ཨཏྟནོ ཨཏྠཱཡ ཀཏབྷཱཝཾ ན ཛཱནནྟི, ཨཉྙེ ཛཱནནྟི། ཡེ ཛཱནནྟི, ཏེསཾ ན ཝཊྚཏི, ཨིཏརེསཾ པན ཝཊྚཏི། ཨཉྙེ ན ཛཱནནྟི, ཏེཡེཝ ཛཱནནྟི, ཏེསཾཡེཝ ན ཝཊྚཏི, ཨཉྙེསཾ ཝཊྚཏི། ཏེཔི ‘‘ཨམྷཱཀཾ ཨཏྠཱཡ ཀཏ’’ནྟི ཛཱནནྟི, ཨཉྙེཔི ‘‘ཨེཏེསཾ ཨཏྠཱཡ ཀཏ’’ནྟི ཛཱནནྟི, སབྦེསམྤི ན ཝཊྚཏི། སབྦེ ན ཛཱནནྟི, སབྦེསམྤི ཝཊྚཏི། པཉྩསུ ཧི སཧདྷམྨིཀེསུ ཡསྶ ཝཱ ཏསྶ ཝཱ ཨཏྠཱཡ ཨུདྡིསྶཀཏཾ སབྦེསཾ ན ཀཔྤཏི།
39. Sace pana ekasmiṃ vihāre bhikkhūnaṃ uddissakataṃ hoti, te ca attano atthāya katabhāvaṃ na jānanti, aññe jānanti. Ye jānanti, tesaṃ na vaṭṭati, itaresaṃ pana vaṭṭati. Aññe na jānanti, teyeva jānanti, tesaṃyeva na vaṭṭati, aññesaṃ vaṭṭati. Tepi ‘‘amhākaṃ atthāya kata’’nti jānanti, aññepi ‘‘etesaṃ atthāya kata’’nti jānanti, sabbesampi na vaṭṭati. Sabbe na jānanti, sabbesampi vaṭṭati. Pañcasu hi sahadhammikesu yassa vā tassa vā atthāya uddissakataṃ sabbesaṃ na kappati.
སཙེ པན ཀོཙི ཨེཀཾ བྷིཀྑུཾ ཨུདྡིསྶ པཱཎཾ ཝདྷིཏྭཱ ཏསྶ པཏྟཾ པཱུརེཏྭཱ དེཏི, སོ ཙ ཨཏྟནོ ཨཏྠཱཡ ཀཏབྷཱཝཾ ཛཱནཾཡེཝ གཧེཏྭཱ ཨཉྙསྶ བྷིཀྑུནོ དེཏི, སོ ཏཾ ཏསྶ སདྡྷཱཡ པརིབྷུཉྫཏི, ཀསྶ ཨཱཔཏྟཱིཏི? དྭིནྣམྤི ཨནཱཔཏྟི། ཡཉྷི ཨུདྡིསྶ ཀཏཾ, ཏསྶ ཨབྷུཏྟཏཱཡ ཨནཱཔཏྟི, ཨིཏརསྶ ཨཛཱནནཏཱཡ། ཀཔྤིཡམཾསསྶ ཧི པཊིགྒཧཎེ ཨཱཔཏྟི ནཏྠི, ཨུདྡིསྶཀཏཉྩ ཨཛཱནིཏྭཱ བྷུཏྟསྶ པཙྪཱ ཉཏྭཱ ཨཱཔཏྟིདེསནཱཀིཙྩཾ ནཱམ ནཏྠི། ཨཀཔྤིཡམཾསཾ པན ཨཛཱནིཏྭཱ བྷུཏྟེན པཙྪཱ ཉཏྭཱཔི ཨཱཔཏྟི དེསེཏབྦཱ། ཨུདྡིསྶཀཏཉྷི ཉཏྭཱ བྷུཉྫཏོཝ ཨཱཔཏྟི, ཨཀཔྤིཡམཾསཾ ཨཛཱནིཏྭཱ བྷུཉྫནྟསྶཔི ཨཱཔཏྟིཡེཝ, ཏསྨཱ ཨཱཔཏྟིབྷཱིརུཀེན རཱུཔཾ སལླཀྑེནྟེནཔི པུཙྪིཏྭཱཝ མཾསཾ པཊིགྒཧེཏབྦཾ། པརིབྷོགཀཱལེ ‘‘པུཙྪིཏྭཱ པརིབྷུཉྫིསྶཱམཱི’’ཏི ཝཱ གཧེཏྭཱ པུཙྪིཏྭཱཝ པརིབྷུཉྫིཏབྦཾ། ཀསྨཱ? དུཝིཉྙེཡྻཏྟཱ། ཨཙྪམཾསམྤི ཧི སཱུཀརམཾསསདིསཾ ཧོཏི, དཱིཔིམཾསཱདཱིནི ཙ མིགམཾསཱདིསདིསཱནི, ཏསྨཱ པུཙྪིཏྭཱ གཧཎམེཝ ཝཏྟནྟི ཝདནྟི།
Sace pana koci ekaṃ bhikkhuṃ uddissa pāṇaṃ vadhitvā tassa pattaṃ pūretvā deti, so ca attano atthāya katabhāvaṃ jānaṃyeva gahetvā aññassa bhikkhuno deti, so taṃ tassa saddhāya paribhuñjati, kassa āpattīti? Dvinnampi anāpatti. Yañhi uddissa kataṃ, tassa abhuttatāya anāpatti, itarassa ajānanatāya. Kappiyamaṃsassa hi paṭiggahaṇe āpatti natthi, uddissakatañca ajānitvā bhuttassa pacchā ñatvā āpattidesanākiccaṃ nāma natthi. Akappiyamaṃsaṃ pana ajānitvā bhuttena pacchā ñatvāpi āpatti desetabbā. Uddissakatañhi ñatvā bhuñjatova āpatti, akappiyamaṃsaṃ ajānitvā bhuñjantassapi āpattiyeva, tasmā āpattibhīrukena rūpaṃ sallakkhentenapi pucchitvāva maṃsaṃ paṭiggahetabbaṃ. Paribhogakāle ‘‘pucchitvā paribhuñjissāmī’’ti vā gahetvā pucchitvāva paribhuñjitabbaṃ. Kasmā? Duviññeyyattā. Acchamaṃsampi hi sūkaramaṃsasadisaṃ hoti, dīpimaṃsādīni ca migamaṃsādisadisāni, tasmā pucchitvā gahaṇameva vattanti vadanti.
ཨིཏི པཱལི༹མུཏྟཀཝིནཡཝིནིཙྪཡསངྒཧེ
Iti pāḷimuttakavinayavinicchayasaṅgahe
མཙྪམཾསཝིནིཙྪཡཀཐཱ སམཏྟཱ།
Macchamaṃsavinicchayakathā samattā.
