| Library / Tipiṭaka / တိပိဋက • Tipiṭaka / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) |
၄. မဓုရသုတ္တဝဏ္ဏနာ
4. Madhurasuttavaṇṇanā
၃၁၇. ဧဝံ မေ သုတန္တိ မဓုရသုတ္တံ။ တတ္ထ မဟာကစ္စာနောတိ ဂိဟိကာလေ ဥဇ္ဇေနိကရညော ပုရောဟိတပုတ္တော အဘိရူပော ဒသ္သနီယော ပာသာဒိကော သုဝဏ္ဏဝဏ္ဏော စ။ မဓုရာယန္တိ ဧဝံနာမကေ နဂရေ။ ဂုန္ဒာဝနေတိ ကဏ္ဟကဂုန္ဒာဝနေ ။ အဝန္တိပုတ္တောတိ အဝန္တိရဋ္ဌေ ရညော ဓီတာယ ပုတ္တော။ ဝုဒ္ဓော စေဝ အရဟာ စာတိ ဒဟရံ အရဟန္တမ္ပိ န တထာ သမ္ဘာဝေန္တိ ယထာ မဟလ္လကံ, ထေရော ပန ဝုဒ္ဓော စေဝ အဟောသိ အရဟာ စ။ ဗ္ရာဟ္မဏာ, ဘော ကစ္စာနာတိ သော ကိရ ရာဇာ ဗ္ရာဟ္မဏလဒ္ဓိကော, တသ္မာ ဧဝမာဟ။ ဗ္ရာဟ္မဏောဝ သေဋ္ဌော ဝဏ္ဏောတိအာဒီသု ဇာတိဂောတ္တာဒီနံ ပညာပနဋ္ဌာနေ ဗ္ရာဟ္မဏာဝ သေဋ္ဌာတိ ဒသ္သေတိ။ ဟီနော အညော ဝဏ္ဏောတိ ဣတရေ တယော ဝဏ္ဏာ ဟီနာ လာမကာတိ ဝဒတိ။ သုက္ကောတိ ပဏ္ဍရော။ ကဏ္ဟောတိ ကာဠကော။ သုဇ္ဈန္တီတိ ဇာတိဂောတ္တာဒိပညာပနဋ္ဌာနေသု သုဇ္ဈန္တိ။ ဗ္ရဟ္မုနော ပုတ္တာတိ မဟာဗ္ရဟ္မုနော ပုတ္တာ။ ဩရသာ မုခတော ဇာတာတိ ဥရေ ဝသိတ္ဝာ မုခတော နိက္ခန္တာ, ဥရေ ကတ္ဝာ သံဝဒ္ဓိတာတိ ဝာ ဩရသာ။ ဗ္ရဟ္မဇာတိ ဗ္ရဟ္မတော နိဗ္ဗတ္တာ။ ဗ္ရဟ္မနိမ္မိတာတိ ဗ္ရဟ္မုနာ နိမ္မိတာ။ ဗ္ရဟ္မဒာယာဒာတိ ဗ္ရဟ္မုနော ဒာယာဒာ။ ဃောသောယေဝ ခော ဧသောတိ ဝောဟာရမတ္တမေဝေတံ။
317.Evaṃme sutanti madhurasuttaṃ. Tattha mahākaccānoti gihikāle ujjenikarañño purohitaputto abhirūpo dassanīyo pāsādiko suvaṇṇavaṇṇo ca. Madhurāyanti evaṃnāmake nagare. Gundāvaneti kaṇhakagundāvane . Avantiputtoti avantiraṭṭhe rañño dhītāya putto. Vuddho ceva arahā cāti daharaṃ arahantampi na tathā sambhāventi yathā mahallakaṃ, thero pana vuddho ceva ahosi arahā ca. Brāhmaṇā, bho kaccānāti so kira rājā brāhmaṇaladdhiko, tasmā evamāha. Brāhmaṇova seṭṭho vaṇṇotiādīsu jātigottādīnaṃ paññāpanaṭṭhāne brāhmaṇāva seṭṭhāti dasseti. Hīno añño vaṇṇoti itare tayo vaṇṇā hīnā lāmakāti vadati. Sukkoti paṇḍaro. Kaṇhoti kāḷako. Sujjhantīti jātigottādipaññāpanaṭṭhānesu sujjhanti. Brahmuno puttāti mahābrahmuno puttā. Orasā mukhato jātāti ure vasitvā mukhato nikkhantā, ure katvā saṃvaddhitāti vā orasā. Brahmajāti brahmato nibbattā. Brahmanimmitāti brahmunā nimmitā. Brahmadāyādāti brahmuno dāyādā. Ghosoyeva kho esoti vohāramattamevetaṃ.
၃၁၈. ဣဇ္ဈေယ္ယာတိ သမိဇ္ဈေယ္ယ, ယတ္တကာနိ ဓနာဒီနိ ပတ္ထေယ္ယ, တတ္တကေဟိသ္သ မနောရထော ပူရေယ္ယာတိ အတ္ထော။ ခတ္တိယောပိသ္သာသ္သာတိ ခတ္တိယောပိ အသ္သ ဣသ္သရိယသမ္ပတ္တသ္သ ပုဗ္ဗုဋ္ဌာယီ အသ္သ။ နေသံ ဧတ္ထ ကိဉ္စီတိ န ဧတေသံ ဧတ္ထ ကိဉ္စိ။
318.Ijjheyyāti samijjheyya, yattakāni dhanādīni pattheyya, tattakehissa manoratho pūreyyāti attho. Khattiyopissāssāti khattiyopi assa issariyasampattassa pubbuṭṭhāyī assa. Nesaṃ ettha kiñcīti na etesaṃ ettha kiñci.
၃၂၂. အာသနေန ဝာ နိမန္တေယ္ယာမာတိ နိသိန္နာသနံ ပပ္ဖောဋေတ္ဝာ ဣဓ နိသီဒာတိ ဝဒေယ္ယာမ။ အဘိနိမန္တေယ္ယာမပိ နန္တိ အဘိဟရိတ္ဝာ တံ နိမန္တေယ္ယာမ။ တတ္ထ ဒုဝိဓော အဘိဟာရော ဝာစာယ စေဝ ကာယေန စ။ ‘‘တုမ္ဟာကံ ဣစ္ဆိတိစ္ဆိတက္ခဏေ မမံ စီဝရာဒီဟိ ဝဒေယ္ယာထ ယေနတ္ထော’’တိ ဝဒန္တော ဟိ ဝာစာယ အဘိဟရိတ္ဝာ နိမန္တေတိ နာမ။ စီဝရာဒိဝေကလ္လံ သလ္လက္ခေတ္ဝာ ‘‘ဣဒံ ဂဏ္ဟထာ’’တိ တာနိ ဒေန္တော ပန ကာယေန အဘိဟရိတ္ဝာ နိမန္တေတိ နာမ။ တဒုဘယမ္ပိ သန္ဓာယ ‘‘အဘိနိမန္တေယ္ယာမပိ န’’န္တိ အာဟ။ ရက္ခာဝရဏဂုတ္တိန္တိ ရက္ခာသင္ခာတဉ္စေဝ အာဝရဏသင္ခာတဉ္စ ဂုတ္တိံ။ ယာ ပနေသာ အာဝုဓဟတ္ထေ ပုရိသေ ဌပေန္တေန ရက္ခာ, သာ ဓမ္မိကာ နာမ သံဝိဟိတာ န ဟောတိ။ ယထာ ပန အဝေလာယ ကဋ္ဌဟာရိကာပဏ္ဏဟာရိကာဒယော ဝိဟာရံ န ပဝိသန္တိ, မိဂလုဒ္ဒကာဒယော ဝိဟာရသီမာယ မိဂေ ဝာ မစ္ဆေ ဝာ န ဂဏ္ဟန္တိ, ဧဝံ သံဝိဒဟန္တေန ဓမ္မိကာ နာမ သံဝိဟိတာ ဟောတိ။ တံ သန္ဓာယာဟ ‘‘ဓမ္မိက’’န္တိ။
322.Āsanena vā nimanteyyāmāti nisinnāsanaṃ papphoṭetvā idha nisīdāti vadeyyāma. Abhinimanteyyāmapi nanti abhiharitvā taṃ nimanteyyāma. Tattha duvidho abhihāro vācāya ceva kāyena ca. ‘‘Tumhākaṃ icchiticchitakkhaṇe mamaṃ cīvarādīhi vadeyyātha yenattho’’ti vadanto hi vācāya abhiharitvā nimanteti nāma. Cīvarādivekallaṃ sallakkhetvā ‘‘idaṃ gaṇhathā’’ti tāni dento pana kāyena abhiharitvā nimanteti nāma. Tadubhayampi sandhāya ‘‘abhinimanteyyāmapi na’’nti āha. Rakkhāvaraṇaguttinti rakkhāsaṅkhātañceva āvaraṇasaṅkhātañca guttiṃ. Yā panesā āvudhahatthe purise ṭhapentena rakkhā, sā dhammikā nāma saṃvihitā na hoti. Yathā pana avelāya kaṭṭhahārikāpaṇṇahārikādayo vihāraṃ na pavisanti, migaluddakādayo vihārasīmāya mige vā macche vā na gaṇhanti, evaṃ saṃvidahantena dhammikā nāma saṃvihitā hoti. Taṃ sandhāyāha ‘‘dhammika’’nti.
ဧဝံ သန္တေတိ ဧဝံ စတုန္နမ္ပိ ဝဏ္ဏာနံ ပဗ္ဗဇိတာနံ ပဗ္ဗဇိတသက္ကာရေန သမေ သမာနေ။ သေသံ သဗ္ဗတ္ထ ဥတ္တာနမေဝာတိ။
Evaṃsanteti evaṃ catunnampi vaṇṇānaṃ pabbajitānaṃ pabbajitasakkārena same samāne. Sesaṃ sabbattha uttānamevāti.
ပပဉ္စသူဒနိယာ မဇ္ဈိမနိကာယဋ္ဌကထာယ
Papañcasūdaniyā majjhimanikāyaṭṭhakathāya
မဓုရသုတ္တဝဏ္ဏနာ နိဋ္ဌိတာ။
Madhurasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၄. မဓုရသုတ္တံ • 4. Madhurasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၄. မဓုရသုတ္တဝဏ္ဏနာ • 4. Madhurasuttavaṇṇanā
