| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೬. ಮಗ್ಗದತ್ತಿಕತ್ಥೇರಅಪದಾನವಣ್ಣನಾ
6. Maggadattikattheraapadānavaṇṇanā
ಅನೋಮದಸ್ಸೀ ಭಗವಾತಿಆದಿಕಂ ಆಯಸ್ಮತೋ ಮಗ್ಗದತ್ತಿಕತ್ಥೇರಸ್ಸ ಅಪದಾನಂ। ಅಯಮ್ಪಾಯಸ್ಮಾ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಅನೋಮದಸ್ಸಿಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಘರಾವಾಸಂ ಸಣ್ಠಪೇತ್ವಾ ವಸನ್ತೋ ಅನೋಮದಸ್ಸಿಂ ಭಗವನ್ತಂ ಆಕಾಸೇ ಚಙ್ಕಮನ್ತಂ ಪಾದುದ್ಧಾರೇ ಪಾದುದ್ಧಾರಚಙ್ಕಮನಟ್ಠಾನೇ ಪುಪ್ಫಾನಂ ವಿಕಿರಣಂ ಅಚ್ಛರಿಯಞ್ಚ ದಿಸ್ವಾ ಪಸನ್ನಮಾನಸೋ ಪುಪ್ಫಾನಿ ಆಕಾಸೇ ಉಕ್ಖಿಪಿ, ತಾನಿ ವಿತಾನಂ ಹುತ್ವಾ ಅಟ್ಠಂಸು।
Anomadassī bhagavātiādikaṃ āyasmato maggadattikattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā vasanto anomadassiṃ bhagavantaṃ ākāse caṅkamantaṃ pāduddhāre pāduddhāracaṅkamanaṭṭhāne pupphānaṃ vikiraṇaṃ acchariyañca disvā pasannamānaso pupphāni ākāse ukkhipi, tāni vitānaṃ hutvā aṭṭhaṃsu.
೨೬. ಸೋ ತೇನ ಪುಞ್ಞೇನ ಸುಗತೀಸುಯೇವ ಸಂಸರನ್ತೋ ಸಬ್ಬತ್ಥ ಪೂಜಿತೋ ಸುಖಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲೇ ನಿಬ್ಬತ್ತೋ ಕಮೇನ ಯೋಬ್ಬಞ್ಞಂ ಪಾಪುಣಿತ್ವಾ ಸದ್ಧಾಜಾತೋ ಪಬ್ಬಜಿತ್ವಾ ವತ್ತಸಮ್ಪನ್ನೋ ನಚಿರಸ್ಸೇವ ಅರಹತ್ತಂ ಪತ್ತೋ ಚಙ್ಕಮನಸ್ಸ ಪೂಜಿತತ್ತಾ ಮಗ್ಗದತ್ತಿಕತ್ಥೇರೋತಿ ಪಾಕಟೋ। ಸೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಅನೋಮದಸ್ಸೀ ಭಗವಾತಿಆದಿಮಾಹ। ದಿಟ್ಠಧಮ್ಮಸುಖತ್ಥಾಯಾತಿ ಇಮಸ್ಮಿಂ ಅತ್ತಭಾವೇ ಚಙ್ಕಮನೇನ ಸರೀರಸಲ್ಲಹುಕಾದಿಸುಖಂ ಪಟಿಚ್ಚಾತಿ ಅತ್ಥೋ। ಅಬ್ಭೋಕಾಸಮ್ಹಿ ಚಙ್ಕಮೀತಿ ಅಬ್ಭೋಕಾಸೇ ಅಙ್ಗಣಟ್ಠಾನೇ ಚಙ್ಕಮಿ, ಪದವಿಕ್ಖೇಪಂ ಪದಸಞ್ಚಾರಂ ಅಕಾಸೀತಿ ಅತ್ಥೋ।
26. So tena puññena sugatīsuyeva saṃsaranto sabbattha pūjito sukhaṃ anubhavitvā imasmiṃ buddhuppāde ekasmiṃ kule nibbatto kamena yobbaññaṃ pāpuṇitvā saddhājāto pabbajitvā vattasampanno nacirasseva arahattaṃ patto caṅkamanassa pūjitattā maggadattikattheroti pākaṭo. So pubbakammaṃ saritvā somanassajāto pubbacaritāpadānaṃ pakāsento anomadassī bhagavātiādimāha. Diṭṭhadhammasukhatthāyāti imasmiṃ attabhāve caṅkamanena sarīrasallahukādisukhaṃ paṭiccāti attho. Abbhokāsamhi caṅkamīti abbhokāse aṅgaṇaṭṭhāne caṅkami, padavikkhepaṃ padasañcāraṃ akāsīti attho.
ಉದ್ಧತೇ ಪಾದೇ ಪುಪ್ಫಾನೀತಿ ಚಙ್ಕಮನ್ತೇನ ಪಾದೇ ಉದ್ಧತೇ ಪದುಮುಪ್ಪಲಾದೀನಿ ಪುಪ್ಫಾನಿ ಪಥವಿತೋ ಉಗ್ಗನ್ತ್ವಾ ಚಙ್ಕಮೇ ವಿಕಿರಿಂಸೂತಿ ಅತ್ಥೋ। ಸೋಭಂ ಮುದ್ಧನಿ ತಿಟ್ಠರೇತಿ ಬುದ್ಧಸ್ಸ ಮುದ್ಧನಿ ಸೀಸೇ ಸೋಭಯಮಾನಾ ತಾನಿ ತಿಟ್ಠನ್ತೀತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
Uddhate pāde pupphānīti caṅkamantena pāde uddhate padumuppalādīni pupphāni pathavito uggantvā caṅkame vikiriṃsūti attho. Sobhaṃ muddhani tiṭṭhareti buddhassa muddhani sīse sobhayamānā tāni tiṭṭhantīti attho. Sesaṃ suviññeyyamevāti.
ಮಗ್ಗದತ್ತಿಕತ್ಥೇರಅಪದಾನವಣ್ಣನಾ ಸಮತ್ತಾ।
Maggadattikattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೬. ಮಗ್ಗದತ್ತಿಕತ್ಥೇರಅಪದಾನಂ • 6. Maggadattikattheraapadānaṃ
