| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. மக்³க³தா³யகத்தே²ரஅபதா³னவண்ணனா
7. Maggadāyakattheraapadānavaṇṇanā
உத்தரித்வான நதி³கந்திஆதி³கங் ஆயஸ்மதோ மக்³க³தா³யகத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ அனேகேஸு ப⁴வேஸு நிப்³பா³னாதி⁴க³மத்தா²ய புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே லோகஸம்மதே குலே நிப்³ப³த்தோ வுத்³தி⁴மன்வாய க⁴ராவாஸங் வஸந்தோ ஏகதி³வஸங் ப⁴க³வந்தங் ஏகங் நதி³ங் உத்தரித்வா வனந்தரங் க³ச்ச²ந்தங் தி³ஸ்வா பஸன்னமானஸோ ‘‘இதா³னி மயா ப⁴க³வதோ மக்³க³ங் ஸமங் காதுங் வட்டதீ’’தி சிந்தெத்வா குதா³லஞ்ச பிடகஞ்ச ஆதா³ய ப⁴க³வதோ க³மனமக்³க³ங் ஸமங் கத்வா வாலுகங் ஓகிரித்வா ப⁴க³வதோ பாதே³ வந்தி³த்வா, ‘‘ப⁴ந்தே, இமினா மக்³கா³லங்காரகரணேன நிப்³ப³த்தனிப்³ப³த்தட்டா²னே பூஜனீயோ ப⁴வெய்யங், நிப்³பா³னஞ்ச பாபுணெய்ய’’ந்தி பத்த²னங் அகாஸி. ப⁴க³வா ‘‘யதா²தி⁴ப்பாயங் ஸமிஜ்ஜ²தூ’’தி அனுமோத³னங் வத்வா பக்காமி.
Uttaritvāna nadikantiādikaṃ āyasmato maggadāyakattherassa apadānaṃ. Ayampi purimajinavaresu katādhikāro anekesu bhavesu nibbānādhigamatthāya puññāni upacinanto siddhatthassa bhagavato kāle lokasammate kule nibbatto vuddhimanvāya gharāvāsaṃ vasanto ekadivasaṃ bhagavantaṃ ekaṃ nadiṃ uttaritvā vanantaraṃ gacchantaṃ disvā pasannamānaso ‘‘idāni mayā bhagavato maggaṃ samaṃ kātuṃ vaṭṭatī’’ti cintetvā kudālañca piṭakañca ādāya bhagavato gamanamaggaṃ samaṃ katvā vālukaṃ okiritvā bhagavato pāde vanditvā, ‘‘bhante, iminā maggālaṅkārakaraṇena nibbattanibbattaṭṭhāne pūjanīyo bhaveyyaṃ, nibbānañca pāpuṇeyya’’nti patthanaṃ akāsi. Bhagavā ‘‘yathādhippāyaṃ samijjhatū’’ti anumodanaṃ vatvā pakkāmi.
32-3. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ ஸப்³ப³த்த² பூஜிதோ அஹோஸி. இமஸ்மிங் பன பு³த்³து⁴ப்பாதே³ பாகடே ஏகஸ்மிங் குலே நிப்³ப³த்தோ ஸத்த²ரி பஸன்னோ பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பத்வா அத்தனோ புப்³ப³கம்மங் பச்சக்க²தோ ஞத்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ உத்தரித்வான நதி³கந்திஆதி³மாஹ. தத்த² நத³தி ஸத்³த³ங் கரோதி க³ச்ச²தீதி நதீ³, நதீ³யேவ நதி³கா, தங் நதி³கங் உத்தரித்வா அதிக்கமித்வாதி அத்தோ². குதா³லபிடகமாதா³யாதி கு வுச்சதி பத²வீ, தங் விதா³லனே பதா³லனே சி²ந்த³னே அலந்தி குதா³லங், பிடகங் வுச்சதி பங்ஸுவாலிகாதி³வாஹகங், தாலபண்ணவெத்தலதாதீ³ஹி கதபா⁴ஜனங், குதா³லஞ்ச பிடகஞ்ச குதா³லபிடகங், தங் ஆதா³ய க³ஹெத்வாதி அத்தோ². ஸேஸங் உத்தானத்த²மேவாதி.
32-3. So tena puññena devamanussesu saṃsaranto sabbattha pūjito ahosi. Imasmiṃ pana buddhuppāde pākaṭe ekasmiṃ kule nibbatto satthari pasanno pabbajitvā vipassanaṃ vaḍḍhetvā nacirasseva arahattaṃ patvā attano pubbakammaṃ paccakkhato ñatvā somanassajāto pubbacaritāpadānaṃ pakāsento uttaritvāna nadikantiādimāha. Tattha nadati saddaṃ karoti gacchatīti nadī, nadīyeva nadikā, taṃ nadikaṃ uttaritvā atikkamitvāti attho. Kudālapiṭakamādāyāti ku vuccati pathavī, taṃ vidālane padālane chindane alanti kudālaṃ, piṭakaṃ vuccati paṃsuvālikādivāhakaṃ, tālapaṇṇavettalatādīhi katabhājanaṃ, kudālañca piṭakañca kudālapiṭakaṃ, taṃ ādāya gahetvāti attho. Sesaṃ uttānatthamevāti.
மக்³க³தா³யகத்தே²ரஅபதா³னவண்ணனா ஸமத்தா.
Maggadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. மக்³க³தா³யகத்தே²ரஅபதா³னங் • 7. Maggadāyakattheraapadānaṃ
