Library / Tipiṭaka / तिपिटक • Tipiṭaka / पटिसम्भिदामग्गपाळि • Paṭisambhidāmaggapāḷi

९. मग्गकथा

9. Maggakathā

२३७. मग्गोति केनट्ठेन मग्गो? सोतापत्तिमग्गक्खणे दस्सनट्ठेन सम्मादिट्ठि मिच्छादिट्ठिया पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च, पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स वोदानाय मग्गो चेव हेतु च, विसेसाधिगमाय मग्गो चेव हेतु च, उत्तरि पटिवेधाय ¹ मग्गो चेव हेतु च, सच्‍चाभिसमयाय मग्गो चेव हेतु च, निरोधे पतिट्ठापनाय मग्गो चेव हेतु च।

237. Maggoti kenaṭṭhena maggo? Sotāpattimaggakkhaṇe dassanaṭṭhena sammādiṭṭhi micchādiṭṭhiyā pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya ² maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.

अभिनिरोपनट्ठेन सम्मासङ्कप्पो मिच्छासङ्कप्पस्स पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च, पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स वोदानाय मग्गो चेव हेतु च, विसेसाधिगमाय मग्गो चेव हेतु च, उत्तरि पटिवेधाय मग्गो चेव हेतु च, सच्‍चाभिसमयाय मग्गो चेव हेतु च, निरोधे पतिट्ठापनाय मग्गो चेव हेतु च।

Abhiniropanaṭṭhena sammāsaṅkappo micchāsaṅkappassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.

परिग्गहट्ठेन सम्मावाचा मिच्छावाचाय पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च, पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स वोदानाय मग्गो चेव हेतु च, विसेसाधिगमाय मग्गो चेव हेतु च, उत्तरि पटिवेधाय मग्गो चेव हेतु च, सच्‍चाभिसमयाय मग्गो चेव हेतु च, निरोधे पतिट्ठापनाय मग्गो चेव हेतु च।

Pariggahaṭṭhena sammāvācā micchāvācāya pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.

समुट्ठानट्ठेन सम्माकम्मन्तो मिच्छाकम्मन्तस्स पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स वोदानाय मग्गो चेव हेतु च, विसेसाधिगमाय मग्गो चेव हेतु च, उत्तरि पटिवेधाय मग्गो चेव हेतु च, सच्‍चाभिसमयाय मग्गो चेव हेतु च, निरोधे पतिट्ठापनाय मग्गो चेव हेतु च।

Samuṭṭhānaṭṭhena sammākammanto micchākammantassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.

वोदानट्ठेन सम्माआजीवो मिच्छाआजीवस्स पहानाय मग्गो चेव हेतु च…पे॰… पग्गहट्ठेन सम्मावायामो मिच्छावायामस्स पहानाय मग्गो चेव हेतु च…पे॰… उपट्ठानट्ठेन सम्मासति मिच्छासतिया पहानाय मग्गो चेव हेतु च…पे॰… अविक्खेपट्ठेन सम्मासमाधि मिच्छासमाधिस्स पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च, पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स वोदानाय मग्गो चेव हेतु च, विसेसाधिगमाय मग्गो चेव हेतु च, उत्तरि पटिवेधाय मग्गो चेव हेतु च, सच्‍चाभिसमयाय मग्गो चेव हेतु च, निरोधे पतिट्ठापनाय मग्गो चेव हेतु च।

Vodānaṭṭhena sammāājīvo micchāājīvassa pahānāya maggo ceva hetu ca…pe… paggahaṭṭhena sammāvāyāmo micchāvāyāmassa pahānāya maggo ceva hetu ca…pe… upaṭṭhānaṭṭhena sammāsati micchāsatiyā pahānāya maggo ceva hetu ca…pe… avikkhepaṭṭhena sammāsamādhi micchāsamādhissa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.

सकदागामिमग्गक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि ओळारिकस्स कामरागसञ्‍ञोजनस्स पटिघसञ्‍ञोजनस्स ओळारिकस्स कामरागानुसयस्स पटिघानुसयस्स पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च, पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स वोदानाय मग्गो चेव हेतु च, विसेसाधिगमाय मग्गो चेव हेतु च, उत्तरि पटिवेधाय मग्गो चेव हेतु च, सच्‍चाभिसमयाय मग्गो चेव हेतु च, निरोधे पतिट्ठापनाय मग्गो चेव हेतु च।

Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikassa kāmarāgasaññojanassa paṭighasaññojanassa oḷārikassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.

अनागामिमग्गक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि अनुसहगतस्स कामरागसञ्‍ञोजनस्स पटिघसञ्‍ञोजनस्स, अनुसहगतस्स कामरागानुसयस्स पटिघानुसयस्स पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च, पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स वोदानाय मग्गो चेव हेतु च , विसेसाधिगमाय मग्गो चेव हेतु च, उत्तरि पटिवेधाय मग्गो चेव हेतु च, सच्‍चाभिसमयाय मग्गो चेव हेतु च, निरोधे पतिट्ठापनाय मग्गो चेव हेतु च।

Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatassa kāmarāgasaññojanassa paṭighasaññojanassa, anusahagatassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca , visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.

अरहत्तमग्गक्खणे दस्सनट्ठेन सम्मादिट्ठि…पे॰… अविक्खेपट्ठेन सम्मासमाधि रूपरागस्स अरूपरागस्स मानस्स उद्धच्‍चस्स अविज्‍जाय, मानानुसयस्स भवरागानुसयस्स अविज्‍जानुसयस्स पहानाय मग्गो चेव हेतु च, सहजातानं धम्मानं उपत्थम्भनाय मग्गो चेव हेतु च, किलेसानं परियादानाय मग्गो चेव हेतु च, पटिवेधादिविसोधनाय मग्गो चेव हेतु च, चित्तस्स अधिट्ठानाय मग्गो चेव हेतु च, चित्तस्स, वोदानाय मग्गो चेव हेतु च, विसेसाधिगमाय मग्गो चेव हेतु च, उत्तरि पटिवेधाय मग्गो चेव हेतु च, सच्‍चाभिसमयाय मग्गो चेव, हेतु च, निरोधे पतिट्ठापनाय मग्गो चेव हेतु च।

Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgassa arūparāgassa mānassa uddhaccassa avijjāya, mānānusayassa bhavarāgānusayassa avijjānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa, vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva, hetu ca, nirodhe patiṭṭhāpanāya maggo ceva hetu ca.

दस्सनमग्गो सम्मादिट्ठि, अभिनिरोपनमग्गो सम्मासङ्कप्पो , परिग्गहमग्गो सम्मावाचा, समुट्ठानमग्गो सम्माकम्मन्तो, वोदानमग्गो सम्माआजीवो, पग्गहमग्गो सम्मावायामो, उपट्ठानमग्गो सम्मासति, अविक्खेपमग्गो सम्मासमाधि। उपट्ठानमग्गो सतिसम्बोज्झङ्गो, पविचयमग्गो धम्मविचयसम्बोज्झङ्गो, पग्गहमग्गो वीरियसम्बोज्झङ्गो, फरणमग्गो पीतिसम्बोज्झङ्गो, उपसममग्गो पस्सद्धिसम्बोज्झङ्गो, अविक्खेपमग्गो समाधिसम्बोज्झङ्गो, पटिसङ्खानमग्गो उपेक्खासम्बोज्झङ्गो।

Dassanamaggo sammādiṭṭhi, abhiniropanamaggo sammāsaṅkappo , pariggahamaggo sammāvācā, samuṭṭhānamaggo sammākammanto, vodānamaggo sammāājīvo, paggahamaggo sammāvāyāmo, upaṭṭhānamaggo sammāsati, avikkhepamaggo sammāsamādhi. Upaṭṭhānamaggo satisambojjhaṅgo, pavicayamaggo dhammavicayasambojjhaṅgo, paggahamaggo vīriyasambojjhaṅgo, pharaṇamaggo pītisambojjhaṅgo, upasamamaggo passaddhisambojjhaṅgo, avikkhepamaggo samādhisambojjhaṅgo, paṭisaṅkhānamaggo upekkhāsambojjhaṅgo.

अस्सद्धिये अकम्पियमग्गो सद्धाबलं, कोसज्‍जे अकम्पियमग्गो वीरियबलं, पमादे अकम्पियमग्गो सतिबलं, उद्धच्‍चे अकम्पियमग्गो समाधिबलं, अविज्‍जाय अकम्पियमग्गो पञ्‍ञाबलं। अधिमोक्खमग्गो सद्धिन्द्रियं, पग्गहमग्गो वीरियिन्द्रियं, उपट्ठानमग्गो सतिन्द्रियं, अविक्खेपमग्गो समाधिन्द्रियं, दस्सनमग्गो पञ्‍ञिन्द्रियं।

Assaddhiye akampiyamaggo saddhābalaṃ, kosajje akampiyamaggo vīriyabalaṃ, pamāde akampiyamaggo satibalaṃ, uddhacce akampiyamaggo samādhibalaṃ, avijjāya akampiyamaggo paññābalaṃ. Adhimokkhamaggo saddhindriyaṃ, paggahamaggo vīriyindriyaṃ, upaṭṭhānamaggo satindriyaṃ, avikkhepamaggo samādhindriyaṃ, dassanamaggo paññindriyaṃ.

आधिपतेय्यट्ठेन इन्द्रिया मग्गो, अकम्पियट्ठेन बला मग्गो, निय्यानट्ठेन बोज्झङ्गा मग्गो, हेतुट्ठेन मग्गङ्गा मग्गो, उपट्ठानट्ठेन सतिपट्ठाना मग्गो, पदहनट्ठेन सम्मप्पधाना मग्गो, इज्झनट्ठेन इद्धिपादा मग्गो, तथट्ठेन सच्‍चानि मग्गो, अविक्खेपट्ठेन समथो मग्गो, अनुपस्सनट्ठेन विपस्सना मग्गो, एकरसट्ठेन समथविपस्सना मग्गो, अनतिवत्तनट्ठेन युगनद्धा मग्गो, संवरट्ठेन सीलविसुद्धि मग्गो, अविक्खेपट्ठेन चित्तविसुद्धि मग्गो, दस्सनट्ठेन दिट्ठिविसुद्धि मग्गो, मुत्तट्ठेन विमोक्खो मग्गो, पटिवेधट्ठेन विज्‍जा मग्गो, परिच्‍चागट्ठेन विमुत्ति मग्गो, समुच्छेदट्ठेन खये ञाणं मग्गो, छन्दो मूलट्ठेन मग्गो, मनसिकारो समुट्ठानट्ठेन मग्गो, फस्सो समोधानट्ठेन मग्गो, वेदना समोसरणट्ठेन मग्गो, समाधि पमुखट्ठेन मग्गो, सति आधिपतेय्यट्ठेन मग्गो, पञ्‍ञा ततुत्तरट्ठेन मग्गो, विमुत्ति सारट्ठेन मग्गो, अमतोगधं निब्बानं परियोसानट्ठेन मग्गोति।

Ādhipateyyaṭṭhena indriyā maggo, akampiyaṭṭhena balā maggo, niyyānaṭṭhena bojjhaṅgā maggo, hetuṭṭhena maggaṅgā maggo, upaṭṭhānaṭṭhena satipaṭṭhānā maggo, padahanaṭṭhena sammappadhānā maggo, ijjhanaṭṭhena iddhipādā maggo, tathaṭṭhena saccāni maggo, avikkhepaṭṭhena samatho maggo, anupassanaṭṭhena vipassanā maggo, ekarasaṭṭhena samathavipassanā maggo, anativattanaṭṭhena yuganaddhā maggo, saṃvaraṭṭhena sīlavisuddhi maggo, avikkhepaṭṭhena cittavisuddhi maggo, dassanaṭṭhena diṭṭhivisuddhi maggo, muttaṭṭhena vimokkho maggo, paṭivedhaṭṭhena vijjā maggo, pariccāgaṭṭhena vimutti maggo, samucchedaṭṭhena khaye ñāṇaṃ maggo, chando mūlaṭṭhena maggo, manasikāro samuṭṭhānaṭṭhena maggo, phasso samodhānaṭṭhena maggo, vedanā samosaraṇaṭṭhena maggo, samādhi pamukhaṭṭhena maggo, sati ādhipateyyaṭṭhena maggo, paññā tatuttaraṭṭhena maggo, vimutti sāraṭṭhena maggo, amatogadhaṃ nibbānaṃ pariyosānaṭṭhena maggoti.

मग्गकथा निट्ठिता।

Maggakathā niṭṭhitā.

Next: १०. मण्डपेय्यकथा • 10. Maṇḍapeyyakathā

Footnotes:

1. उत्तरिं पटिवेधाय (स्या॰)

2. uttariṃ paṭivedhāya (syā.)

Related texts:

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पटिसम्भिदामग्ग-अट्ठकथा • Paṭisambhidāmagga-aṭṭhakathā / मग्गकथावण्णना • Maggakathāvaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact