Library / Tipiṭaka / తిపిటక • Tipiṭaka / పటిసమ్భిదామగ్గపాళి • Paṭisambhidāmaggapāḷi |
౯. మగ్గకథా
9. Maggakathā
౨౩౭. మగ్గోతి కేనట్ఠేన మగ్గో? సోతాపత్తిమగ్గక్ఖణే దస్సనట్ఠేన సమ్మాదిట్ఠి మిచ్ఛాదిట్ఠియా పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ, పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స వోదానాయ మగ్గో చేవ హేతు చ, విసేసాధిగమాయ మగ్గో చేవ హేతు చ, ఉత్తరి పటివేధాయ 1 మగ్గో చేవ హేతు చ, సచ్చాభిసమయాయ మగ్గో చేవ హేతు చ, నిరోధే పతిట్ఠాపనాయ మగ్గో చేవ హేతు చ.
237. Maggoti kenaṭṭhena maggo? Sotāpattimaggakkhaṇe dassanaṭṭhena sammādiṭṭhi micchādiṭṭhiyā pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya 2 maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
అభినిరోపనట్ఠేన సమ్మాసఙ్కప్పో మిచ్ఛాసఙ్కప్పస్స పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ, పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స వోదానాయ మగ్గో చేవ హేతు చ, విసేసాధిగమాయ మగ్గో చేవ హేతు చ, ఉత్తరి పటివేధాయ మగ్గో చేవ హేతు చ, సచ్చాభిసమయాయ మగ్గో చేవ హేతు చ, నిరోధే పతిట్ఠాపనాయ మగ్గో చేవ హేతు చ.
Abhiniropanaṭṭhena sammāsaṅkappo micchāsaṅkappassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
పరిగ్గహట్ఠేన సమ్మావాచా మిచ్ఛావాచాయ పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ, పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స వోదానాయ మగ్గో చేవ హేతు చ, విసేసాధిగమాయ మగ్గో చేవ హేతు చ, ఉత్తరి పటివేధాయ మగ్గో చేవ హేతు చ, సచ్చాభిసమయాయ మగ్గో చేవ హేతు చ, నిరోధే పతిట్ఠాపనాయ మగ్గో చేవ హేతు చ.
Pariggahaṭṭhena sammāvācā micchāvācāya pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
సముట్ఠానట్ఠేన సమ్మాకమ్మన్తో మిచ్ఛాకమ్మన్తస్స పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స వోదానాయ మగ్గో చేవ హేతు చ, విసేసాధిగమాయ మగ్గో చేవ హేతు చ, ఉత్తరి పటివేధాయ మగ్గో చేవ హేతు చ, సచ్చాభిసమయాయ మగ్గో చేవ హేతు చ, నిరోధే పతిట్ఠాపనాయ మగ్గో చేవ హేతు చ.
Samuṭṭhānaṭṭhena sammākammanto micchākammantassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
వోదానట్ఠేన సమ్మాఆజీవో మిచ్ఛాఆజీవస్స పహానాయ మగ్గో చేవ హేతు చ…పే॰… పగ్గహట్ఠేన సమ్మావాయామో మిచ్ఛావాయామస్స పహానాయ మగ్గో చేవ హేతు చ…పే॰… ఉపట్ఠానట్ఠేన సమ్మాసతి మిచ్ఛాసతియా పహానాయ మగ్గో చేవ హేతు చ…పే॰… అవిక్ఖేపట్ఠేన సమ్మాసమాధి మిచ్ఛాసమాధిస్స పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ, పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స వోదానాయ మగ్గో చేవ హేతు చ, విసేసాధిగమాయ మగ్గో చేవ హేతు చ, ఉత్తరి పటివేధాయ మగ్గో చేవ హేతు చ, సచ్చాభిసమయాయ మగ్గో చేవ హేతు చ, నిరోధే పతిట్ఠాపనాయ మగ్గో చేవ హేతు చ.
Vodānaṭṭhena sammāājīvo micchāājīvassa pahānāya maggo ceva hetu ca…pe… paggahaṭṭhena sammāvāyāmo micchāvāyāmassa pahānāya maggo ceva hetu ca…pe… upaṭṭhānaṭṭhena sammāsati micchāsatiyā pahānāya maggo ceva hetu ca…pe… avikkhepaṭṭhena sammāsamādhi micchāsamādhissa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
సకదాగామిమగ్గక్ఖణే దస్సనట్ఠేన సమ్మాదిట్ఠి…పే॰… అవిక్ఖేపట్ఠేన సమ్మాసమాధి ఓళారికస్స కామరాగసఞ్ఞోజనస్స పటిఘసఞ్ఞోజనస్స ఓళారికస్స కామరాగానుసయస్స పటిఘానుసయస్స పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ, పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స వోదానాయ మగ్గో చేవ హేతు చ, విసేసాధిగమాయ మగ్గో చేవ హేతు చ, ఉత్తరి పటివేధాయ మగ్గో చేవ హేతు చ, సచ్చాభిసమయాయ మగ్గో చేవ హేతు చ, నిరోధే పతిట్ఠాపనాయ మగ్గో చేవ హేతు చ.
Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikassa kāmarāgasaññojanassa paṭighasaññojanassa oḷārikassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
అనాగామిమగ్గక్ఖణే దస్సనట్ఠేన సమ్మాదిట్ఠి…పే॰… అవిక్ఖేపట్ఠేన సమ్మాసమాధి అనుసహగతస్స కామరాగసఞ్ఞోజనస్స పటిఘసఞ్ఞోజనస్స, అనుసహగతస్స కామరాగానుసయస్స పటిఘానుసయస్స పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ, పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స వోదానాయ మగ్గో చేవ హేతు చ , విసేసాధిగమాయ మగ్గో చేవ హేతు చ, ఉత్తరి పటివేధాయ మగ్గో చేవ హేతు చ, సచ్చాభిసమయాయ మగ్గో చేవ హేతు చ, నిరోధే పతిట్ఠాపనాయ మగ్గో చేవ హేతు చ.
Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatassa kāmarāgasaññojanassa paṭighasaññojanassa, anusahagatassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca , visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
అరహత్తమగ్గక్ఖణే దస్సనట్ఠేన సమ్మాదిట్ఠి…పే॰… అవిక్ఖేపట్ఠేన సమ్మాసమాధి రూపరాగస్స అరూపరాగస్స మానస్స ఉద్ధచ్చస్స అవిజ్జాయ, మానానుసయస్స భవరాగానుసయస్స అవిజ్జానుసయస్స పహానాయ మగ్గో చేవ హేతు చ, సహజాతానం ధమ్మానం ఉపత్థమ్భనాయ మగ్గో చేవ హేతు చ, కిలేసానం పరియాదానాయ మగ్గో చేవ హేతు చ, పటివేధాదివిసోధనాయ మగ్గో చేవ హేతు చ, చిత్తస్స అధిట్ఠానాయ మగ్గో చేవ హేతు చ, చిత్తస్స, వోదానాయ మగ్గో చేవ హేతు చ, విసేసాధిగమాయ మగ్గో చేవ హేతు చ, ఉత్తరి పటివేధాయ మగ్గో చేవ హేతు చ, సచ్చాభిసమయాయ మగ్గో చేవ, హేతు చ, నిరోధే పతిట్ఠాపనాయ మగ్గో చేవ హేతు చ.
Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgassa arūparāgassa mānassa uddhaccassa avijjāya, mānānusayassa bhavarāgānusayassa avijjānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa, vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva, hetu ca, nirodhe patiṭṭhāpanāya maggo ceva hetu ca.
దస్సనమగ్గో సమ్మాదిట్ఠి, అభినిరోపనమగ్గో సమ్మాసఙ్కప్పో , పరిగ్గహమగ్గో సమ్మావాచా, సముట్ఠానమగ్గో సమ్మాకమ్మన్తో, వోదానమగ్గో సమ్మాఆజీవో, పగ్గహమగ్గో సమ్మావాయామో, ఉపట్ఠానమగ్గో సమ్మాసతి, అవిక్ఖేపమగ్గో సమ్మాసమాధి. ఉపట్ఠానమగ్గో సతిసమ్బోజ్ఝఙ్గో, పవిచయమగ్గో ధమ్మవిచయసమ్బోజ్ఝఙ్గో, పగ్గహమగ్గో వీరియసమ్బోజ్ఝఙ్గో, ఫరణమగ్గో పీతిసమ్బోజ్ఝఙ్గో, ఉపసమమగ్గో పస్సద్ధిసమ్బోజ్ఝఙ్గో, అవిక్ఖేపమగ్గో సమాధిసమ్బోజ్ఝఙ్గో, పటిసఙ్ఖానమగ్గో ఉపేక్ఖాసమ్బోజ్ఝఙ్గో.
Dassanamaggo sammādiṭṭhi, abhiniropanamaggo sammāsaṅkappo , pariggahamaggo sammāvācā, samuṭṭhānamaggo sammākammanto, vodānamaggo sammāājīvo, paggahamaggo sammāvāyāmo, upaṭṭhānamaggo sammāsati, avikkhepamaggo sammāsamādhi. Upaṭṭhānamaggo satisambojjhaṅgo, pavicayamaggo dhammavicayasambojjhaṅgo, paggahamaggo vīriyasambojjhaṅgo, pharaṇamaggo pītisambojjhaṅgo, upasamamaggo passaddhisambojjhaṅgo, avikkhepamaggo samādhisambojjhaṅgo, paṭisaṅkhānamaggo upekkhāsambojjhaṅgo.
అస్సద్ధియే అకమ్పియమగ్గో సద్ధాబలం, కోసజ్జే అకమ్పియమగ్గో వీరియబలం, పమాదే అకమ్పియమగ్గో సతిబలం, ఉద్ధచ్చే అకమ్పియమగ్గో సమాధిబలం, అవిజ్జాయ అకమ్పియమగ్గో పఞ్ఞాబలం. అధిమోక్ఖమగ్గో సద్ధిన్ద్రియం, పగ్గహమగ్గో వీరియిన్ద్రియం, ఉపట్ఠానమగ్గో సతిన్ద్రియం, అవిక్ఖేపమగ్గో సమాధిన్ద్రియం, దస్సనమగ్గో పఞ్ఞిన్ద్రియం.
Assaddhiye akampiyamaggo saddhābalaṃ, kosajje akampiyamaggo vīriyabalaṃ, pamāde akampiyamaggo satibalaṃ, uddhacce akampiyamaggo samādhibalaṃ, avijjāya akampiyamaggo paññābalaṃ. Adhimokkhamaggo saddhindriyaṃ, paggahamaggo vīriyindriyaṃ, upaṭṭhānamaggo satindriyaṃ, avikkhepamaggo samādhindriyaṃ, dassanamaggo paññindriyaṃ.
ఆధిపతేయ్యట్ఠేన ఇన్ద్రియా మగ్గో, అకమ్పియట్ఠేన బలా మగ్గో, నియ్యానట్ఠేన బోజ్ఝఙ్గా మగ్గో, హేతుట్ఠేన మగ్గఙ్గా మగ్గో, ఉపట్ఠానట్ఠేన సతిపట్ఠానా మగ్గో, పదహనట్ఠేన సమ్మప్పధానా మగ్గో, ఇజ్ఝనట్ఠేన ఇద్ధిపాదా మగ్గో, తథట్ఠేన సచ్చాని మగ్గో, అవిక్ఖేపట్ఠేన సమథో మగ్గో, అనుపస్సనట్ఠేన విపస్సనా మగ్గో, ఏకరసట్ఠేన సమథవిపస్సనా మగ్గో, అనతివత్తనట్ఠేన యుగనద్ధా మగ్గో, సంవరట్ఠేన సీలవిసుద్ధి మగ్గో, అవిక్ఖేపట్ఠేన చిత్తవిసుద్ధి మగ్గో, దస్సనట్ఠేన దిట్ఠివిసుద్ధి మగ్గో, ముత్తట్ఠేన విమోక్ఖో మగ్గో, పటివేధట్ఠేన విజ్జా మగ్గో, పరిచ్చాగట్ఠేన విముత్తి మగ్గో, సముచ్ఛేదట్ఠేన ఖయే ఞాణం మగ్గో, ఛన్దో మూలట్ఠేన మగ్గో, మనసికారో సముట్ఠానట్ఠేన మగ్గో, ఫస్సో సమోధానట్ఠేన మగ్గో, వేదనా సమోసరణట్ఠేన మగ్గో, సమాధి పముఖట్ఠేన మగ్గో, సతి ఆధిపతేయ్యట్ఠేన మగ్గో, పఞ్ఞా తతుత్తరట్ఠేన మగ్గో, విముత్తి సారట్ఠేన మగ్గో, అమతోగధం నిబ్బానం పరియోసానట్ఠేన మగ్గోతి.
Ādhipateyyaṭṭhena indriyā maggo, akampiyaṭṭhena balā maggo, niyyānaṭṭhena bojjhaṅgā maggo, hetuṭṭhena maggaṅgā maggo, upaṭṭhānaṭṭhena satipaṭṭhānā maggo, padahanaṭṭhena sammappadhānā maggo, ijjhanaṭṭhena iddhipādā maggo, tathaṭṭhena saccāni maggo, avikkhepaṭṭhena samatho maggo, anupassanaṭṭhena vipassanā maggo, ekarasaṭṭhena samathavipassanā maggo, anativattanaṭṭhena yuganaddhā maggo, saṃvaraṭṭhena sīlavisuddhi maggo, avikkhepaṭṭhena cittavisuddhi maggo, dassanaṭṭhena diṭṭhivisuddhi maggo, muttaṭṭhena vimokkho maggo, paṭivedhaṭṭhena vijjā maggo, pariccāgaṭṭhena vimutti maggo, samucchedaṭṭhena khaye ñāṇaṃ maggo, chando mūlaṭṭhena maggo, manasikāro samuṭṭhānaṭṭhena maggo, phasso samodhānaṭṭhena maggo, vedanā samosaraṇaṭṭhena maggo, samādhi pamukhaṭṭhena maggo, sati ādhipateyyaṭṭhena maggo, paññā tatuttaraṭṭhena maggo, vimutti sāraṭṭhena maggo, amatogadhaṃ nibbānaṃ pariyosānaṭṭhena maggoti.
మగ్గకథా నిట్ఠితా.
Maggakathā niṭṭhitā.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / ఖుద్దకనికాయ (అట్ఠకథా) • Khuddakanikāya (aṭṭhakathā) / పటిసమ్భిదామగ్గ-అట్ఠకథా • Paṭisambhidāmagga-aṭṭhakathā / మగ్గకథావణ్ణనా • Maggakathāvaṇṇanā