Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā

    မဂ္ဂင္ဂနိဒ္ဒေသဝဏ္ဏနာ

    Maggaṅganiddesavaṇṇanā

    ၂၄. သုတ္တန္တနိဒ္ဒေသေ သမ္မာဒိဋ္ဌိယာတိ သာမိဝစနံ။ ဈာနဝိပသ္သနာမဂ္ဂဖလနိဗ္ဗာနေသု လောကိယဝိရတိသမ္ပယုတ္တစိတ္တေ စ ယထာယောဂံ သမ္ပယောဂတော စ အာရမ္မဏတော စ ဝတ္တမာနာယ သမ္မာဒိဋ္ဌိယာ သာမညလက္ခဏတော ဧကီဘူတာယ သမ္မာဒိဋ္ဌိယာ။ ဝိက္ခမ္ဘနဝိဝေကောတိ ဝိက္ခမ္ဘနဝသေန ဒူရီကရဏဝသေန ဝိဝေကော။ ကေသံ? နီဝရဏာနံ။ တသ္သ ပဌမံ ဈာနံ ဘာဝယတောတိအာဒိ ဝိက္ခမ္ဘနဝသေန ပဌမဇ္ဈာနမေဝ ဝုတ္တံ။ တသ္မိံ ဝုတ္တေ သေသဇ္ဈာနာနိပိ ဝုတ္တာနေဝ ဟောန္တိ။ ဈာနေသုပိ သမ္မာဒိဋ္ဌိယာ ဝိဇ္ဇမာနတ္တာ သမ္မာဒိဋ္ဌိယာ ဝိဝေကော နာမ ဟောတိ။ တဒင္ဂဝိဝေကောတိ တေန တေန ဝိပသ္သနာဉာဏင္ဂေန ဝိဝေကော။ ဒိဋ္ဌိဂတာနန္တိ ဒိဋ္ဌိဝိဝေကသ္သ ဒုက္ကရတ္တာ ပဓာနတ္တာ စ ဒိဋ္ဌိဝိဝေကောဝ ဝုတ္တော။ တသ္မိံ ဝုတ္တေ နိစ္စသညာဒိဝိဝေကောပိ ဝုတ္တောဝ ဟောတိ။ နိဗ္ဗေဓဘာဂိယံ သမာဓိန္တိ ဝိပသ္သနာသမ္ပယုတ္တသမာဓိံ။ သမုစ္ဆေဒဝိဝေကောတိ ကိလေသာနံ သမုစ္ဆေဒေန ဝိဝေကော။ လောကုတ္တရံ ခယဂာမိမဂ္ဂန္တိ ခယသင္ခာတနိဗ္ဗာနဂာမိလောကုတ္တရမဂ္ဂံ။ ပဋိပ္ပသ္သဒ္ဓိဝိဝေကောတိ ကိလေသာနံ ပဋိပ္ပသ္သဒ္ဓိယာ ဝိဝေကော။ နိသ္သရဏဝိဝေကောတိ သဗ္ဗသင္ခတနိသ္သရဏဘူတော သင္ခာရဝိဝေကော။ ဆန္ဒဇာတော ဟောတီတိ ပုဗ္ဗဘာဂေ ဇာတဓမ္မဆန္ဒော ဟောတိ။ သဒ္ဓာဓိမုတ္တောတိ ပုဗ္ဗဘာဂေယေဝ သဒ္ဓာယ အဓိမုတ္တော ဟောတိ။ စိတ္တဉ္စသ္သ သ္ဝာဓိဋ္ဌိတန္တိ ပုဗ္ဗဘာဂေယေဝ စိတ္တဉ္စ အသ္သ ယောဂိသ္သ သုအဓိဋ္ဌိတံ သုဋ္ဌု ပတိဋ္ဌိတံ ဟောတိ။ ဣတိ ဆန္ဒော သဒ္ဓာ စိတ္တန္တိ ဣမေ တယော ဓမ္မာ ပုဗ္ဗဘာဂေ ဥပ္ပန္နဝိဝေကာနံ ဥပနိသ္သယတ္တာ နိသ္သယာ နာမ။ ကေစိ ပန ‘‘စိတ္တဉ္စသ္သ သ္ဝာဓိဋ္ဌိတန္တိ သမာဓိ ဝုတ္တော’’တိ ဝဒန္တိ။ ဝိရာဂာဒီသုပိ ဧသေဝ နယော။

    24. Suttantaniddese sammādiṭṭhiyāti sāmivacanaṃ. Jhānavipassanāmaggaphalanibbānesu lokiyaviratisampayuttacitte ca yathāyogaṃ sampayogato ca ārammaṇato ca vattamānāya sammādiṭṭhiyā sāmaññalakkhaṇato ekībhūtāya sammādiṭṭhiyā. Vikkhambhanavivekoti vikkhambhanavasena dūrīkaraṇavasena viveko. Kesaṃ? Nīvaraṇānaṃ. Tassa paṭhamaṃ jhānaṃ bhāvayatotiādi vikkhambhanavasena paṭhamajjhānameva vuttaṃ. Tasmiṃ vutte sesajjhānānipi vuttāneva honti. Jhānesupi sammādiṭṭhiyā vijjamānattā sammādiṭṭhiyā viveko nāma hoti. Tadaṅgavivekoti tena tena vipassanāñāṇaṅgena viveko. Diṭṭhigatānanti diṭṭhivivekassa dukkarattā padhānattā ca diṭṭhivivekova vutto. Tasmiṃ vutte niccasaññādivivekopi vuttova hoti. Nibbedhabhāgiyaṃ samādhinti vipassanāsampayuttasamādhiṃ. Samucchedavivekoti kilesānaṃ samucchedena viveko. Lokuttaraṃ khayagāmimagganti khayasaṅkhātanibbānagāmilokuttaramaggaṃ. Paṭippassaddhivivekoti kilesānaṃ paṭippassaddhiyā viveko. Nissaraṇavivekoti sabbasaṅkhatanissaraṇabhūto saṅkhāraviveko. Chandajāto hotīti pubbabhāge jātadhammachando hoti. Saddhādhimuttoti pubbabhāgeyeva saddhāya adhimutto hoti. Cittañcassa svādhiṭṭhitanti pubbabhāgeyeva cittañca assa yogissa suadhiṭṭhitaṃ suṭṭhu patiṭṭhitaṃ hoti. Iti chando saddhā cittanti ime tayo dhammā pubbabhāge uppannavivekānaṃ upanissayattā nissayā nāma. Keci pana ‘‘cittañcassa svādhiṭṭhitanti samādhi vutto’’ti vadanti. Virāgādīsupi eseva nayo.

    နိရောဓဝာရေ ပန နိရောဓသဒ္ဒတော အညံ ပရိယာယဝစနံ ဒသ္သေန္တေန အမတာ ဓာတူတိ ဝုတ္တံ, သေသေသု နိရောဓော နိဗ္ဗာနန္တိ ဥဘယတ္ထာပိ နိဗ္ဗာနမေဝ။ ဒ္ဝာဒသ နိသ္သယာတိ ဆန္ဒသဒ္ဓာစိတ္တာနိယေဝ ဝိဝေကာဒီသု စတူသု ဧကေကသ္မိံ တယော တယော ကတ္ဝာ ဒ္ဝာဒသ နိသ္သယာ ဟောန္တိ။

    Nirodhavāre pana nirodhasaddato aññaṃ pariyāyavacanaṃ dassentena amatā dhātūti vuttaṃ, sesesu nirodho nibbānanti ubhayatthāpi nibbānameva. Dvādasa nissayāti chandasaddhācittāniyeva vivekādīsu catūsu ekekasmiṃ tayo tayo katvā dvādasa nissayā honti.

    ၂၅. သမ္မာသင္ကပ္ပဝာယာမသတိသမာဓီနမ္ပိ ဣမိနာဝ နယေန အတ္ထယောဇနာ ဝေဒိတဗ္ဗာ။ သမ္မာဝာစာကမ္မန္တာ ဇီဝာနံ ပန ဈာနက္ခဏေ ဝိပသ္သနာက္ခဏေ စ အဘာဝာ ဈာနဝိပသ္သနာနံ ပုဗ္ဗဘာဂပရဘာဂဝသေန ဝတ္တမာနာ ဝိရတိယော ဈာနဝိပသ္သနာ သန္နိသ္သိတာ ကတ္ဝာ ဝုတ္တာတိ ဝေဒိတဗ္ဗံ။ နီဝရဏာနံ ဒိဋ္ဌိဂတာနဉ္စ ဝိဝေကဝိရာဂနိရောဓပဋိနိသ္သဂ္ဂာ တထာ ပဝတ္တမာနာနံ ဝိရတီနံ ဝိဝေကာဒယော နာမာတိ ဝေဒိတဗ္ဗံ။ ယထာ အဋ္ဌကနိပာတေ ‘‘တတော, တ္ဝံ ဘိက္ခု, ဣမံ သမာဓိံ သဝိတက္ကံ သဝိစာရမ္ပိ ဘာဝေယ္ယာသိ, အဝိတက္ကဝိစာရမတ္တမ္ပိ ဘာဝေယ္ယာသိ, အဝိတက္ကံ အဝိစာရမ္ပိ ဘာဝေယ္ယာသိ, သပ္ပီတိကမ္ပိ ဘာဝေယ္ယာသိ, နိပ္ပီတိကမ္ပိ ဘာဝေယ္ယာသိ, သာတသဟဂတမ္ပိ ဘာဝေယ္ယာသိ, ဥပေက္ခာသဟဂတမ္ပိ ဘာဝေယ္ယာသီ’’တိ (အ. နိ. ၈.၆၃) မေတ္တာဒယော ကာယာနုပသ္သနာဒယော စ နိယကဇ္ဈတ္တမူလသမာဓိဝသေန စတုက္ကပဉ္စကဇ္ဈာနိကာ ဝိယ ဝုတ္တာ, ဧဝမိဓာပိ ပုဗ္ဗဘာဂပရဘာဂဝသေန ဝိရတိယော ဝုတ္တာတိ ဝေဒိတဗ္ဗံ။ ဗ္ယဉ္ဇနစ္ဆာယမတ္တံ ဂဟေတ္ဝာ န ဘဂဝာ အဗ္ဘာစိက္ခိတဗ္ဗော။ ဂမ္ဘီရဉ္ဟိ ဗုဒ္ဓဝစနံ, အာစရိယေ ပယိရုပာသိတ္ဝာ အဓိပ္ပာယတော ဂဟေတဗ္ဗံ။

    25. Sammāsaṅkappavāyāmasatisamādhīnampi imināva nayena atthayojanā veditabbā. Sammāvācākammantā jīvānaṃ pana jhānakkhaṇe vipassanākkhaṇe ca abhāvā jhānavipassanānaṃ pubbabhāgaparabhāgavasena vattamānā viratiyo jhānavipassanā sannissitā katvā vuttāti veditabbaṃ. Nīvaraṇānaṃ diṭṭhigatānañca vivekavirāganirodhapaṭinissaggā tathā pavattamānānaṃ viratīnaṃ vivekādayo nāmāti veditabbaṃ. Yathā aṭṭhakanipāte ‘‘tato, tvaṃ bhikkhu, imaṃ samādhiṃ savitakkaṃ savicārampi bhāveyyāsi, avitakkavicāramattampi bhāveyyāsi, avitakkaṃ avicārampi bhāveyyāsi, sappītikampi bhāveyyāsi, nippītikampi bhāveyyāsi, sātasahagatampi bhāveyyāsi, upekkhāsahagatampi bhāveyyāsī’’ti (a. ni. 8.63) mettādayo kāyānupassanādayo ca niyakajjhattamūlasamādhivasena catukkapañcakajjhānikā viya vuttā, evamidhāpi pubbabhāgaparabhāgavasena viratiyo vuttāti veditabbaṃ. Byañjanacchāyamattaṃ gahetvā na bhagavā abbhācikkhitabbo. Gambhīrañhi buddhavacanaṃ, ācariye payirupāsitvā adhippāyato gahetabbaṃ.

    ၂၆-၂၇. ဗောဇ္ဈင္ဂဗလဣန္ဒ္ရိယဝာရေသုပိ ဣမိနာဝ နယေန အတ္ထော ဝေဒိတဗ္ဗောတိ။

    26-27. Bojjhaṅgabalaindriyavāresupi imināva nayena attho veditabboti.

    ဝိဝေကကထာဝဏ္ဏနာ နိဋ္ဌိတာ။

    Vivekakathāvaṇṇanā niṭṭhitā.







    Related texts:



    တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / ပဋိသမ္ဘိဒာမဂ္ဂပာဠိ • Paṭisambhidāmaggapāḷi / ၁. မဂ္ဂင္ဂနိဒ္ဒေသော • 1. Maggaṅganiddeso


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact