| Library / Tipiṭaka / तिपिटक • Tipiṭaka / पटिसम्भिदामग्गपाळि • Paṭisambhidāmaggapāḷi |
४. मग्गङ्गवारो
4. Maggaṅgavāro
२६. सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा पस्सति। सम्मादिट्ठिपरिभाविता होति मेत्ताचेतोविमुत्ति।
26. Sabbe sattā averino hontu, khemino hontu, sukhino hontūti – sammā passati. Sammādiṭṭhiparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा अभिनिरोपेति। सम्मासङ्कप्पपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – sammā abhiniropeti. Sammāsaṅkappaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा परिग्गण्हाति। सम्मावाचापरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – sammā pariggaṇhāti. Sammāvācāparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा समुट्ठापेति। सम्माकम्मन्तपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – sammā samuṭṭhāpeti. Sammākammantaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा वोदापेति । सम्माआजीवपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – sammā vodāpeti . Sammāājīvaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा पग्गण्हाति। सम्मावायामपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – sammā paggaṇhāti. Sammāvāyāmaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा उपट्ठापेति। सम्मासतिपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – sammā upaṭṭhāpeti. Sammāsatiparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – सम्मा समादहति। सम्मासमाधिपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – sammā samādahati. Sammāsamādhiparibhāvitā hoti mettācetovimutti.
इमे अट्ठ मग्गङ्गा मेत्ताय चेतोविमुत्तिया आसेवना होन्ति। इमेहि अट्ठहि मग्गङ्गेहि मेत्ताचेतोविमुत्ति आसेवीयति। इमे अट्ठ मग्गङ्गा मेत्ताय चेतोविमुत्तिया भावना होन्ति। इमेहि अट्ठहि मग्गङ्गेहि मेत्ताचेतोविमुत्ति भावीयति। इमे अट्ठ मग्गङ्गा मेत्ताय चेतोविमुत्तिया बहुलीकता होन्ति। इमेहि अट्ठहि मग्गङ्गेहि मेत्ताचेतोविमुत्ति बहुलीकरीयति। इमे अट्ठ मग्गङ्गा मेत्ताय चेतोविमुत्तिया अलङ्कारा होन्ति। इमेहि अट्ठहि मग्गङ्गेहि मेत्ताचेतोविमुत्ति स्वालङ्कता होन्ति। इमे अट्ठ मग्गङ्गा मेत्ताय चेतोविमुत्तिया परिक्खारा होन्ति। इमेहि अट्ठहि मग्गङ्गेहि मेत्ताचेतोविमुत्ति सुपरिक्खता होति। इमे अट्ठ मग्गङ्गा मेत्ताय चेतोविमुत्तिया परिवारा होन्ति। इमेहि अट्ठहि मग्गङ्गेहि मेत्ताचेतोविमुत्ति सुपरिवुता होति। इमे अट्ठ मग्गङ्गा मेत्ताय चेतोविमुत्तिया आसेवना होन्ति , भावना होन्ति , बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति, संसट्ठा होन्ति, सम्पयुत्ता होन्ति, पक्खन्दना होन्ति, पसीदना होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति निब्बत्तेन्ति जोतेन्ति पतापेन्ति।
Ime aṭṭha maggaṅgā mettāya cetovimuttiyā āsevanā honti. Imehi aṭṭhahi maggaṅgehi mettācetovimutti āsevīyati. Ime aṭṭha maggaṅgā mettāya cetovimuttiyā bhāvanā honti. Imehi aṭṭhahi maggaṅgehi mettācetovimutti bhāvīyati. Ime aṭṭha maggaṅgā mettāya cetovimuttiyā bahulīkatā honti. Imehi aṭṭhahi maggaṅgehi mettācetovimutti bahulīkarīyati. Ime aṭṭha maggaṅgā mettāya cetovimuttiyā alaṅkārā honti. Imehi aṭṭhahi maggaṅgehi mettācetovimutti svālaṅkatā honti. Ime aṭṭha maggaṅgā mettāya cetovimuttiyā parikkhārā honti. Imehi aṭṭhahi maggaṅgehi mettācetovimutti suparikkhatā hoti. Ime aṭṭha maggaṅgā mettāya cetovimuttiyā parivārā honti. Imehi aṭṭhahi maggaṅgehi mettācetovimutti suparivutā hoti. Ime aṭṭha maggaṅgā mettāya cetovimuttiyā āsevanā honti , bhāvanā honti , bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti.
२७. सब्बेसं पाणानं…पे॰… सब्बेसं भूतानं… सब्बेसं पुग्गलानं… सब्बेसं अत्तभावपरियापन्नानं… सब्बासं इत्थीनं… सब्बेसं पुरिसानं… सब्बेसं अरियानं… सब्बेसं अनरियानं… सब्बेसं देवानं… सब्बेसं मनुस्सानं… सब्बेसं विनिपातिकानं पीळनं वज्जेत्वा अपीळनाय, उपघातं वज्जेत्वा अनुपघातेन, सन्तापं वज्जेत्वा असन्तापेन, परियादानं वज्जेत्वा अपरियादानेन, विहेसं वज्जेत्वा अविहेसाय, सब्बे विनिपातिका अवेरिनो होन्तु मा वेरिनो, सुखिनो होन्तु मा दुक्खिनो, सुखितत्ता होन्तु मा दुक्खितत्ताति – इमेहि अट्ठहाकारेहि सब्बे विनिपातिके मेत्तायतीति – मेत्ता। तं धम्मं चेतयतीति – चेतो। सब्बब्यापादपरियुट्ठानेहि विमुच्चतीति – विमुत्ति। मेत्ता च चेतो च विमुत्ति चाति – मेत्ताचेतोविमुत्ति।
27. Sabbesaṃ pāṇānaṃ…pe… sabbesaṃ bhūtānaṃ… sabbesaṃ puggalānaṃ… sabbesaṃ attabhāvapariyāpannānaṃ… sabbāsaṃ itthīnaṃ… sabbesaṃ purisānaṃ… sabbesaṃ ariyānaṃ… sabbesaṃ anariyānaṃ… sabbesaṃ devānaṃ… sabbesaṃ manussānaṃ… sabbesaṃ vinipātikānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe vinipātike mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
सब्बे विनिपातिका अवेरिनो होन्तु, खेमिनो होन्तु, सुखिनो होन्तूति – सद्धाय अधिमुच्चति। सद्धिन्द्रियपरिभाविता होति मेत्ताचेतोविमुत्ति…पे॰… निब्बत्तेन्ति जोतेन्ति पतापेन्ति।
Sabbe vinipātikā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti…pe… nibbattenti jotenti patāpenti.
सब्बेसं पुरत्थिमाय दिसाय सत्तानं…पे॰… सब्बेसं पच्छिमाय दिसाय सत्तानं… सब्बेसं उत्तराय दिसाय सत्तानं… सब्बेसं दक्खिणाय दिसाय सत्तानं… सब्बेसं पुरत्थिमाय अनुदिसाय सत्तानं… सब्बेसं पच्छिमाय अनुदिसाय सत्तानं… सब्बेसं उत्तराय अनुदिसाय सत्तानं… सब्बेसं दक्खिणाय अनुदिसाय सत्तानं… सब्बेसं हेट्ठिमाय दिसाय सत्तानं… सब्बेसं उपरिमाय दिसाय सत्तानं पीळनं वज्जेत्वा अपीळनाय, उपघातं वज्जेत्वा अनुपघातेन, सन्तापं वज्जेत्वा असन्तापेन, परियादानं वज्जेत्वा अपरियादानेन, विहेसं वज्जेत्वा अविहेसाय, सब्बे उपरिमाय दिसाय सत्ता अवेरिनो होन्तु मा वेरिनो, सुखिनो होन्तु मा दुक्खिनो, सुखितत्ता होन्तु मा दुक्खितत्ताति – इमेहि अट्ठहाकारेहि सब्बे उपरिमाय दिसाय सत्ते मेत्तायतीति – मेत्ता। तं धम्मं चेतयतीति – चेतो। सब्बब्यापादपरियुट्ठानेहि विमुच्चतीति – विमुत्ति। मेत्ता च चेतो च विमुत्ति चाति – मेत्ताचेतोविमुत्ति।
Sabbesaṃ puratthimāya disāya sattānaṃ…pe… sabbesaṃ pacchimāya disāya sattānaṃ… sabbesaṃ uttarāya disāya sattānaṃ… sabbesaṃ dakkhiṇāya disāya sattānaṃ… sabbesaṃ puratthimāya anudisāya sattānaṃ… sabbesaṃ pacchimāya anudisāya sattānaṃ… sabbesaṃ uttarāya anudisāya sattānaṃ… sabbesaṃ dakkhiṇāya anudisāya sattānaṃ… sabbesaṃ heṭṭhimāya disāya sattānaṃ… sabbesaṃ uparimāya disāya sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe uparimāya disāya sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe uparimāya disāya satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
सब्बे उपरिमाय दिसाय सत्ता अवेरिनो होन्तु, खेमिनो होन्तु, सुखिनो होन्तूति – सद्धाय अधिमुच्चति। सद्धिन्द्रियपरिभाविता होति मेत्ताचेतोविमुत्ति…पे॰… निब्बत्तेन्ति जोतेन्ति पतापेन्ति।
Sabbe uparimāya disāya sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti…pe… nibbattenti jotenti patāpenti.
सब्बेसं पुरत्थिमाय दिसाय पाणानं…पे॰… भूतानं… पुग्गलानं अत्तभावपरियापन्नानं… सब्बासं इत्थीनं… सब्बेसं पुरिसानं… सब्बेसं अरियानं… सब्बेसं अनरियानं… सब्बेसं देवानं… सब्बेसं मनुस्सानं… सब्बेसं विनिपातिकानं… सब्बेसं पच्छिमाय दिसाय विनिपातिकानं… सब्बेसं उत्तराय दिसाय विनिपातिकानं… सब्बेसं दक्खिणाय दिसाय विनिपातिकानं… सब्बेसं पुरत्थिमाय अनुदिसाय विनिपातिकानं… सब्बेसं पच्छिमाय अनुदिसाय विनिपातिकानं… सब्बेसं उत्तराय अनुदिसाय विनिपातिकानं… सब्बेसं दक्खिणाय अनुदिसाय विनिपातिकानं… सब्बेसं हेट्ठिमाय दिसाय विनिपातिकानं… सब्बेसं उपरिमाय दिसाय विनिपातिकानं पीळनं वज्जेत्वा अपीळनाय, उपघातं वज्जेत्वा अनुपघातेन, सन्तापं वज्जेत्वा असन्तापेन, परियादानं वज्जेत्वा अपरियादानेन, विहेसं वज्जेत्वा अविहेसाय, सब्बे उपरिमाय दिसाय विनिपातिका अवेरिनो होन्तु मा वेरिनो, सुखिनो होन्तु मा दुक्खिनो, सुखितत्ता होन्तु मा दुक्खितत्ताति – इमेहि अट्ठहाकारेहि सब्बे उपरिमाय दिसाय विनिपातिके मेत्तायतीति – मेत्ता। तं धम्मं चेतयतीति – चेतो। सब्बब्यापादपरियुट्ठानेहि विमुच्चतीति – विमुत्ति। मेत्ता च चेतो च विमुत्ति चाति – मेत्ताचेतोविमुत्ति।
Sabbesaṃ puratthimāya disāya pāṇānaṃ…pe… bhūtānaṃ… puggalānaṃ attabhāvapariyāpannānaṃ… sabbāsaṃ itthīnaṃ… sabbesaṃ purisānaṃ… sabbesaṃ ariyānaṃ… sabbesaṃ anariyānaṃ… sabbesaṃ devānaṃ… sabbesaṃ manussānaṃ… sabbesaṃ vinipātikānaṃ… sabbesaṃ pacchimāya disāya vinipātikānaṃ… sabbesaṃ uttarāya disāya vinipātikānaṃ… sabbesaṃ dakkhiṇāya disāya vinipātikānaṃ… sabbesaṃ puratthimāya anudisāya vinipātikānaṃ… sabbesaṃ pacchimāya anudisāya vinipātikānaṃ… sabbesaṃ uttarāya anudisāya vinipātikānaṃ… sabbesaṃ dakkhiṇāya anudisāya vinipātikānaṃ… sabbesaṃ heṭṭhimāya disāya vinipātikānaṃ… sabbesaṃ uparimāya disāya vinipātikānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe uparimāya disāya vinipātikā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe uparimāya disāya vinipātike mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – सद्धाय अधिमुच्चति। सद्धिन्द्रियपरिभाविता होति मेत्ताचेतोविमुत्ति।
Sabbe uparimāya disāya vinipātikā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – वीरियं पग्गण्हाति। वीरियिन्द्रियपरिभाविता होति मेत्ताचेतोविमुत्ति।
Sabbe uparimāya disāya vinipātikā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
सतिं उपट्ठापेति। सतिन्द्रियपरिभाविता होति मेत्ताचेतोविमुत्ति। चित्तं समादहति। समाधिन्द्रियपरिभाविता होति मेत्ताचेतोविमुत्ति। पञ्ञाय पजानाति। पञ्ञिन्द्रियपरिभाविता होति मेत्ताचेतोविमुत्ति।
Satiṃ upaṭṭhāpeti. Satindriyaparibhāvitā hoti mettācetovimutti. Cittaṃ samādahati. Samādhindriyaparibhāvitā hoti mettācetovimutti. Paññāya pajānāti. Paññindriyaparibhāvitā hoti mettācetovimutti.
इमानि पञ्चिन्द्रियानि मेत्ताय चेतोविमुत्तिया आसेवना होन्ति। इमेहि पञ्चहि इन्द्रियेहि मेत्ताचेतोविमुत्ति आसेवीयति…पे॰… निब्बत्तेन्ति जोतेन्ति पतापेन्ति।
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati…pe… nibbattenti jotenti patāpenti.
सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – अस्सद्धिये न कम्पति। सद्धाबलपरिभाविता होति मेत्ताचेतोविमुत्ति। कोसज्जे न कम्पति। वीरियबलपरिभाविता होति मेत्ताचेतोविमुत्ति। पमादे न कम्पति। सतिबलपरिभाविता होति मेत्ताचेतोविमुत्ति। उद्धच्चे न कम्पति। समाधिबलपरिभाविता होति मेत्ताचेतोविमुत्ति। अविज्जाय न कम्पति। पञ्ञाबलपरिभाविता होति मेत्ताचेतोविमुत्ति।
Sabbe uparimāya disāya vinipātikā averino hontu, khemino hontu, sukhino hontūti – assaddhiye na kampati. Saddhābalaparibhāvitā hoti mettācetovimutti. Kosajje na kampati. Vīriyabalaparibhāvitā hoti mettācetovimutti. Pamāde na kampati. Satibalaparibhāvitā hoti mettācetovimutti. Uddhacce na kampati. Samādhibalaparibhāvitā hoti mettācetovimutti. Avijjāya na kampati. Paññābalaparibhāvitā hoti mettācetovimutti.
इमानि पञ्च बलानि मेत्ताय चेतोविमुत्तिया आसेवना होन्ति। इमेहि पञ्चहि बलेहि मेत्ताचेतोविमुत्ति आसेवीयति…पे॰… निब्बत्तेन्ति जोतेन्ति पतापेन्ति।
Imāni pañca balāni mettāya cetovimuttiyā āsevanā honti. Imehi pañcahi balehi mettācetovimutti āsevīyati…pe… nibbattenti jotenti patāpenti.
सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – सतिं उपट्ठापेति। सतिसम्बोज्झङ्गपरिभाविता होति मेत्ताचेतोविमुत्ति।
Sabbe uparimāya disāya vinipātikā averino hontu, khemino hontu, sukhino hontūti – satiṃ upaṭṭhāpeti. Satisambojjhaṅgaparibhāvitā hoti mettācetovimutti.
पञ्ञाय पविचिनाति। धम्मविचयसम्बोज्झङ्गपरिभाविता होति मेत्ताचेतोविमुत्ति। वीरियं पग्गण्हाति। वीरियसम्बोज्झङ्गपरिभाविता होति मेत्ताचेतोविमुत्ति। परिळाहं पटिप्पस्सम्भेति। पीतिसम्बोज्झङ्गपरिभाविता होति मेत्ताचेतोविमुत्ति। दुट्ठुल्लं पटिप्पस्सम्भेति। पस्सद्धिसम्बोज्झङ्गपरिभाविता होति मेत्ताचेतोविमुत्ति। चित्तं समादहति। समाधिसम्बोज्झङ्गपरिभाविता होति मेत्ताचेतोविमुत्ति। ञाणेन किलेसे पटिसङ्खाति। उपेक्खासम्बोज्झङ्गपरिभाविता होति मेत्ताचेतोविमुत्ति।
Paññāya pavicināti. Dhammavicayasambojjhaṅgaparibhāvitā hoti mettācetovimutti. Vīriyaṃ paggaṇhāti. Vīriyasambojjhaṅgaparibhāvitā hoti mettācetovimutti. Pariḷāhaṃ paṭippassambheti. Pītisambojjhaṅgaparibhāvitā hoti mettācetovimutti. Duṭṭhullaṃ paṭippassambheti. Passaddhisambojjhaṅgaparibhāvitā hoti mettācetovimutti. Cittaṃ samādahati. Samādhisambojjhaṅgaparibhāvitā hoti mettācetovimutti. Ñāṇena kilese paṭisaṅkhāti. Upekkhāsambojjhaṅgaparibhāvitā hoti mettācetovimutti.
इमे सत्त बोज्झङ्गा मेत्ताय चेतोविमुत्तिया आसेवना होन्ति। इमेहि सत्तहि बोज्झङ्गेहि मेत्ताचेतोविमुत्ति आसेवीयति…पे॰… निब्बत्तेन्ति जोतेन्ति पतापेन्ति।
Ime satta bojjhaṅgā mettāya cetovimuttiyā āsevanā honti. Imehi sattahi bojjhaṅgehi mettācetovimutti āsevīyati…pe… nibbattenti jotenti patāpenti.
सब्बे उपरिमाय दिसाय विनिपातिका अवेरिनो होन्तु, खेमिनो होन्तु, सुखिनो होन्तूति – सम्मा पस्सति। सम्मादिट्ठि परिभाविता होति मेत्ताचेतोविमुत्ति। सम्मा अभिनिरोपेति। सम्मासङ्कप्पपरिभाविता होति मेत्ताचेतोविमुत्ति। सम्मा परिग्गण्हाति। सम्मावाचापरिभाविता होति मेत्ताचेतोविमुत्ति। सम्मा समुट्ठापेति। सम्माकम्मन्तपरिभाविता होति मेत्ताचेतोविमुत्ति। सम्मा वोदापेति। सम्मा आजीवपरिभाविता होति मेत्ताचेतोविमुत्ति। सम्मा पग्गण्हाति। सम्मावायामपरिभाविता होति मेत्ताचेतोविमुत्ति। सम्मा उपट्ठाति। सम्मासतिपरिभाविता होति मेत्ताचेतोविमुत्ति। सम्मा समादहति। सम्मासमाधिपरिभाविता होति मेत्ताचेतोविमुत्ति।
Sabbe uparimāya disāya vinipātikā averino hontu, khemino hontu, sukhino hontūti – sammā passati. Sammādiṭṭhi paribhāvitā hoti mettācetovimutti. Sammā abhiniropeti. Sammāsaṅkappaparibhāvitā hoti mettācetovimutti. Sammā pariggaṇhāti. Sammāvācāparibhāvitā hoti mettācetovimutti. Sammā samuṭṭhāpeti. Sammākammantaparibhāvitā hoti mettācetovimutti. Sammā vodāpeti. Sammā ājīvaparibhāvitā hoti mettācetovimutti. Sammā paggaṇhāti. Sammāvāyāmaparibhāvitā hoti mettācetovimutti. Sammā upaṭṭhāti. Sammāsatiparibhāvitā hoti mettācetovimutti. Sammā samādahati. Sammāsamādhiparibhāvitā hoti mettācetovimutti.
इमे अट्ठ मग्गङ्गा मेत्ताय चेतोविमुत्तिया आसेवना होन्ति। इमेहि अट्ठहि मग्गङ्गेहि मेत्ताचेतोविमुत्ति आसेवीयति…पे॰… इमे अट्ठ मग्गङ्गा मेत्ताय चेतोविमुत्तिया परिभाविता होन्ति। इमेहि अट्ठहि मग्गङ्गेहि मेत्ताचेतोविमुत्ति सुपरिवुता होति। इमे अट्ठ मग्गङ्गा मेत्ताय चेतोविमुत्तिया आसेवना होन्ति, भावना होन्ति, बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति , संसट्ठा होन्ति, सम्पयुत्ता होन्ति, पक्खन्दना होन्ति, पसीदना होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति निब्बत्तेन्ति जोतेन्ति पतापेन्तीति।
Ime aṭṭha maggaṅgā mettāya cetovimuttiyā āsevanā honti. Imehi aṭṭhahi maggaṅgehi mettācetovimutti āsevīyati…pe… ime aṭṭha maggaṅgā mettāya cetovimuttiyā paribhāvitā honti. Imehi aṭṭhahi maggaṅgehi mettācetovimutti suparivutā hoti. Ime aṭṭha maggaṅgā mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti , saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpentīti.
मेत्ताकथा निट्ठिता।
Mettākathā niṭṭhitā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पटिसम्भिदामग्ग-अट्ठकथा • Paṭisambhidāmagga-aṭṭhakathā / २-४. बलादिवारत्तयवण्णना • 2-4. Balādivārattayavaṇṇanā
