| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
18. மக்³க³பச்சயனித்³தே³ஸவண்ணனா
18. Maggapaccayaniddesavaṇṇanā
18. மக்³க³பச்சயனித்³தே³ஸே மக்³க³ங்கா³னீதி அஹேதுகசித்துப்பாத³வஜ்ஜேஸு ஸேஸசித்தேஸு உப்பன்னானி பஞ்ஞா, விதக்கோ, ஸம்மாவாசாகம்மந்தாஜீவா, வீரியங், ஸதி, ஸமாதி⁴, மிச்சா²தி³ட்டி², மிச்சா²வாசாகம்மந்தாஜீவாதி இமானி த்³வாத³ஸங்கா³னி. மக்³க³ஸ்ஸ பன ஹேதுபச்சி²மகத்தா அஹேதுகசித்தேஸு மக்³க³ங்கா³னி ந உத்³த⁴டானி. தங்ஸமுட்டா²னானந்தி இதா⁴பி கடத்தாரூபங் ஸங்க³ஹிதமேவ. வுத்தஞ்ஹேதங் பஞ்ஹாவாரே – ‘‘படிஸந்தி⁴க்க²ணே விபாகாப்³யாகதானி மக்³க³ங்கா³னி ஸம்பயுத்தகானங் க²ந்தா⁴னங் கடத்தா ச ரூபானங் மக்³க³பச்சயேன பச்சயோ’’தி. அயங் தாவெத்த² பாளிவண்ணனா.
18. Maggapaccayaniddese maggaṅgānīti ahetukacittuppādavajjesu sesacittesu uppannāni paññā, vitakko, sammāvācākammantājīvā, vīriyaṃ, sati, samādhi, micchādiṭṭhi, micchāvācākammantājīvāti imāni dvādasaṅgāni. Maggassa pana hetupacchimakattā ahetukacittesu maggaṅgāni na uddhaṭāni. Taṃsamuṭṭhānānanti idhāpi kaṭattārūpaṃ saṅgahitameva. Vuttañhetaṃ pañhāvāre – ‘‘paṭisandhikkhaṇe vipākābyākatāni maggaṅgāni sampayuttakānaṃ khandhānaṃ kaṭattā ca rūpānaṃ maggapaccayena paccayo’’ti. Ayaṃ tāvettha pāḷivaṇṇanā.
அயங் பன மக்³க³பச்சயோ த்³வாத³ஸன்னங் மக்³க³ங்கா³னங் வஸேன டி²தோபி ஜாதிபே⁴த³தோ குஸலாதி³வஸேன சதுதா⁴, குஸலாதீ³னஞ்ச காமாவசராதி³பூ⁴மிபே⁴த³தோ த்³வாத³ஸதா⁴ பி⁴ஜ்ஜதீதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ . ஏவங் பி⁴ன்னே பனெத்த² சதுபூ⁴மகம்பி குஸலமக்³க³ங்க³ங் பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, ட²பெத்வா ரூபாவசரங் அவஸேஸங் ஆருப்பே ஸம்பயுத்தத⁴ம்மானஞ்ஞேவ மக்³க³பச்சயேன பச்சயோதி ஸப்³ப³ங் ஜா²னபச்சயே விய வித்தா²ரேதப்³ப³ந்தி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Ayaṃ pana maggapaccayo dvādasannaṃ maggaṅgānaṃ vasena ṭhitopi jātibhedato kusalādivasena catudhā, kusalādīnañca kāmāvacarādibhūmibhedato dvādasadhā bhijjatīti evamettha nānappakārabhedato viññātabbo vinicchayo . Evaṃ bhinne panettha catubhūmakampi kusalamaggaṅgaṃ pañcavokāre sampayuttadhammānañceva cittasamuṭṭhānarūpassa ca, ṭhapetvā rūpāvacaraṃ avasesaṃ āruppe sampayuttadhammānaññeva maggapaccayena paccayoti sabbaṃ jhānapaccaye viya vitthāretabbanti evamettha paccayuppannatopi viññātabbo vinicchayoti.
மக்³க³பச்சயனித்³தே³ஸவண்ணனா.
Maggapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
