| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༣. མགྷདེཝསུཏྟཝཎྞནཱ
3. Maghadevasuttavaṇṇanā
༣༠༨. པུབྦེ མགྷདེཝོ ནཱམ རཱཛཱཏི ཨཏཱིཏཀཱལེ ཨིམསྨིཾཡེཝ ཀཔྤེ ཨནེཀཝསྶསཧསྶཱཡུཀེསུ མནུསྶེསུ པཊིཔཱཊིཡཱ ཨུཔྤནྣཱནཾ ཙཏུརཱསཱིཏིསཧསྶཱནཾ ཙཀྐཝཏྟིརཱཛཱུནཾ ཨཱདིཔུརིསོ མགྷདེཝོཏི ཨེཝཾནཱམོ རཱཛཱ།
308.Pubbemaghadevo nāma rājāti atītakāle imasmiṃyeva kappe anekavassasahassāyukesu manussesu paṭipāṭiyā uppannānaṃ caturāsītisahassānaṃ cakkavattirājūnaṃ ādipuriso maghadevoti evaṃnāmo rājā.
དྷམྨོཏི རཱཛདྷམྨོཏི ལོཀིཀཱ ཝདནྟི། མཧཱབོདྷིནིདྷཱནཔཱརམིཏཱསངྑཱཏོ པན དྷམྨོ ཨཏྠཱིཏི དྷམྨིཀོ། དྷམྨེནཱཏི ཉཱཡེན། ཏདཱ བྲཧྨཝིཧཱརཱདིབྷཱཝནཱདྷམྨསྶ རཉྙོ ཨནདྷིགཏཏྟཱ ཏསྶཔི ཝཱ ཨནབྷིཛ྄ཛྷཱདཱིཧི སམཱནཡོགཀྑམཏྟཱ ཝུཏྟཾ ‘‘དསཀུསལཀམྨཔཐེ ཋིཏོ’’ཏི། དྷམྨནྟི དྷམྨཏོ ཨནཔེཏཾ། ཏཐཱ ཧི ཙ སོ པཀྑཔཱཏཱབྷཱཝཏོ ‘‘སམོ’’ཏི ཝུཙྩཏཱིཏི ཨཱཧ ‘‘སམཾ ཙརཏཱི’’ཏི། པཀཏིནིཡཱམེནེཝཱཏི པཝེཎིཡཱ ཨཱགཏནིཡཱམེནེཝ། ཡསྨཱ ནིགམཛནཔདེསུ ཡེབྷུཡྻེན གཧཔཏཱིནཾ སངྒཧོ, ཏསྨཱ ཨཊྛཀཐཱཡཾ ‘‘གཧཔཏིཀཱན’’ནྟྭེཝ ཝུཏྟཾ། པཱལི༹ཡཾ པན ཨཉྙམེཝ ནཱགརཙཱརིཏྟཾ, ཨཉྙཾ ནེགམཛནཔདཙཱརིཏྟནྟི ཏེ ཝིསུཾ གཧིཏཱ ‘‘ནེགམེསུ ཙེཝ ཛནཔདེསུ ཙཱ’’ཏི། པཙྩུགྒམནནིགྒམནཝསེན ཨུཔོསཐསྶ པཊིཧརཎཾ པཱཊིཧཱརིཡོ, སོ ཨེཝ པཱཊིཧཱརིཀོ, པཀྑོ། ཨིམེ དིཝསཱཏི ཨིམེ ཙཏྟཱརོ དིཝསཱ།
Dhammoti rājadhammoti lokikā vadanti. Mahābodhinidhānapāramitāsaṅkhāto pana dhammo atthīti dhammiko. Dhammenāti ñāyena. Tadā brahmavihārādibhāvanādhammassa rañño anadhigatattā tassapi vā anabhijjhādīhi samānayogakkhamattā vuttaṃ ‘‘dasakusalakammapathe ṭhito’’ti. Dhammanti dhammato anapetaṃ. Tathā hi ca so pakkhapātābhāvato ‘‘samo’’ti vuccatīti āha ‘‘samaṃ caratī’’ti. Pakatiniyāmenevāti paveṇiyā āgataniyāmeneva. Yasmā nigamajanapadesu yebhuyyena gahapatīnaṃ saṅgaho, tasmā aṭṭhakathāyaṃ ‘‘gahapatikāna’’ntveva vuttaṃ. Pāḷiyaṃ pana aññameva nāgaracārittaṃ, aññaṃ negamajanapadacārittanti te visuṃ gahitā ‘‘negamesu ceva janapadesu cā’’ti. Paccuggamananiggamanavasena uposathassa paṭiharaṇaṃ pāṭihāriyo, so eva pāṭihāriko, pakkho. Ime divasāti ime cattāro divasā.
༣༠༩. དེཝོཏི མཙྩུ ཨབྷིབྷཝནཊྛེན། ཡཐཱ ཧི དེཝོ པཀཏིསཏྟེ ཨབྷིབྷཝཏི, ཨེཝཾ མཙྩུ སཏྟེ ཨབྷིབྷཝཏི། ‘‘ཨཧཾ ཨསུཀཾ མདྡིཏུཾ ཨཱགམིསྶཱམི, ཏྭཾ ཏསྶ ཀེསེ གཧེཏྭཱ མཱ ཝིསྶཛྫེཧཱི’’ཏི མཙྩུདེཝསྶ ཨཱཎཱཀརཱ དཱུཏཱ ཝིཡཱཏི དཱུཏཱཏི ཝུཙྩནྟི། ཨལངྐཏཔཊིཡཏྟཱཡཱཏི ཨིདཾ ཨཏྟནོ དིབྦཱནུབྷཱཝཾ ཨཱཝིཀཏྭཱ ཋིཏཱཡཱཏི དསྶེཏུཾ ཝུཏྟཾ། དེཝཏཱབྱཱཀརཎསདིསམེཝ ཧོཏི ན ཙིརེནེཝ མརཎསམྦྷཝཏོ། ཝིསུདྡྷིདེཝཱནནྟི ཁཱིཎཱསཝབྲཧྨཱནཾ། ཏེ ཧི ཙརིམབྷཝེ བོདྷིསཏྟཱནཾ ཛིཎྞཱདིཀེ དསྶེནྟི།
309.Devoti maccu abhibhavanaṭṭhena. Yathā hi devo pakatisatte abhibhavati, evaṃ maccu satte abhibhavati. ‘‘Ahaṃ asukaṃ maddituṃ āgamissāmi, tvaṃ tassa kese gahetvā mā vissajjehī’’ti maccudevassa āṇākarā dūtā viyāti dūtāti vuccanti. Alaṅkatapaṭiyattāyāti idaṃ attano dibbānubhāvaṃ āvikatvā ṭhitāyāti dassetuṃ vuttaṃ. Devatābyākaraṇasadisameva hoti na cireneva maraṇasambhavato. Visuddhidevānanti khīṇāsavabrahmānaṃ. Te hi carimabhave bodhisattānaṃ jiṇṇādike dassenti.
དུཁིཏཉྩ བྱཱདྷིཏནྟི བྱཱདྷིབྷཱཝེན སཉྫཱཏདུཀྑནྟི ཨཏྠོ། ཨནྟིམབྷཝིཀབོདྷིསཏྟཱནཾ ཝིསུདྡྷིདེཝེཧི ཨུཔཊྛཱཔིཏབྷཱཝཾ ཨུཔཱདཱཡ ཏདཉྙེསཾ ཏེཧི ཨནུཔཊྛཱཔིཏཱནམྤི པཎྜིཏཱནཾ ཏཐཱ ཝོཧརིཏབྦཏཱ པརིཡཱཡསིདྡྷཱཏི ཨཱཧ ‘‘ཨིམིནཱ པརིཡཱཡེནཱ’’ཏི།
Dukhitañca byādhitanti byādhibhāvena sañjātadukkhanti attho. Antimabhavikabodhisattānaṃ visuddhidevehi upaṭṭhāpitabhāvaṃ upādāya tadaññesaṃ tehi anupaṭṭhāpitānampi paṇḍitānaṃ tathā voharitabbatā pariyāyasiddhāti āha ‘‘iminā pariyāyenā’’ti.
དིསམྤཏཱིཏི ཝིབྷཏྟིཨལོཔེན ནིདྡེསོ, དིསཱསཱིསེན དེསཱ ཝུཏྟཱཏི དེསཱནཾ ཨདྷིཔཏིརཱཛཱཏི ཨཏྠོ། ཨུཏྟམངྒེ སིརསི རུཧནྟཱིཏི ཨུཏྟམངྒརུཧཱ, ཀེསཱ། ཏེ པནེཏྠ ཡསྨཱ པལིཏཏྟཱ ཨཝིསེསཏོ སབྦཔཙྪིམཝཡསནྡསྶཀཱ ཧོནྟི, ཏསྨཱ ‘‘ཝཡོཧརཱ’’ཏི ཝུཏྟཱ།
Disampatīti vibhattialopena niddeso, disāsīsena desā vuttāti desānaṃ adhipatirājāti attho. Uttamaṅge sirasi ruhantīti uttamaṅgaruhā, kesā. Te panettha yasmā palitattā avisesato sabbapacchimavayasandassakā honti, tasmā ‘‘vayoharā’’ti vuttā.
པུརིསཡུགོ ཡསྨཱ ཏསྨིཾ ཝཾསེ སཉྫཱཏཔུརིསཊྛིཏིཡཱ པརིཙྪིནྣོ, ཏསྨཱ ཨཱཧ ‘‘ཝཾསསམྦྷཝེ པུརིསེ’’ཏི། རཱཛགེཧཏོ ཨཱཧཊབྷིཀྑཱཡ ཡཱཔེནྟོཏི ཨིམིནཱ ཀུམཱརཀཔབྦཛྫཱཡ ཨུཔགཏབྷཱཝཾ དསྶེཏི།
Purisayugo yasmā tasmiṃ vaṃse sañjātapurisaṭṭhitiyā paricchinno, tasmā āha ‘‘vaṃsasambhave purise’’ti. Rājagehato āhaṭabhikkhāya yāpentoti iminā kumārakapabbajjāya upagatabhāvaṃ dasseti.
པརིཧརིཡམཱནོཝཱཏི ཨཉྙེན ཨཉྙེན པརིཧརིཡམཱནོ ཝིཡ ཝེལཱཡ ཝེལཱཡ ཏེན མཧཏཱ པརིཛནེན ཨུཔཊྛིཡམཱནོ ཀུམཱརཀཱིལ༹ཾ ཀཱིལཱི༹ཏི ཨཏྠོ། ཀེཙི པན ‘‘པརིཧརིཡམཱནོ ཨེཝཱ’’ཏི ཨཝདྷཱརཎཝསེན ཨཏྠཾ ཝདནྟི, ཏཐཱ སཏི ཙཏུརཱསཱིཏིཝསྶསཧསྶཱནི ཐཉྙཔཱཡཱི ཏརུཎདཱརཀོ ཨཧོསཱིཏི ཨཱཔཛྫཏཱིཏི ཏདཡུཏྟཾ། ཀུམཱརཀཱལཾ ཝཏྭཱ ཏདནནྟརཾ ཨོཔརཛྫཝཙནཏོ ཝིརུདྡྷཉྩེཏཾ། (པཉྩམངྒལཝཙནེན ཨུནྣངྒལམངྒལཨུཀྐནྟནམངྒལཀམྨཧཱཡམངྒལདུསྶམངྒལཱནི སམུཔགཏཱནི ཨེཝ ཨཧེསུནྟི དཊྛབྦཾ)།
Parihariyamānovāti aññena aññena parihariyamāno viya velāya velāya tena mahatā parijanena upaṭṭhiyamāno kumārakīḷaṃ kīḷīti attho. Keci pana ‘‘parihariyamāno evā’’ti avadhāraṇavasena atthaṃ vadanti, tathā sati caturāsītivassasahassāni thaññapāyī taruṇadārako ahosīti āpajjatīti tadayuttaṃ. Kumārakālaṃ vatvā tadanantaraṃ oparajjavacanato viruddhañcetaṃ. (Pañcamaṅgalavacanena unnaṅgalamaṅgalaukkantanamaṅgalakammahāyamaṅgaladussamaṅgalāni samupagatāni eva ahesunti daṭṭhabbaṃ).
༣༡༡. སཝཾསཝསེན ཨཱགཏཱ པུཏྟནཏྟུཨཱདཡོ པུཏྟཱ ཙ པཔུཏྟཱ ཙ ཨེཏིསྶཱཏི པུཏྟཔཔུཏྟཀཱ པརམྤརཱ། ནིཧཏནྟི ནིཧིཏཾ ཋཔིཏཾ, པཝཏྟིཏནྟི ཨཏྠོ། ནིཧཏནྟི ཝཱ སཏཏཾ པཏིཊྛིཏབྷཱཝེན ཝལ༹ཉྫིཏནྟི ཨཏྠོ། ཏེནཱཧ ‘‘ཀལྱཱཎཝཏྟ’’ནྟི། ཨཏིརེཀཏརཱ དྭེ གུཎཱཏི མཧཱསཏྟསྶ མགྷདེཝཀཱལཏོ ཨཏིརེཀཏརཱ དྭེ གུཎཱ ཨིཏརརཱཛཱུཧི པན ཨཏིརེཀཏརཱ ཨནེཀསཏསཧསྶཔྤབྷེདཱ ཨེཝ གུཎཱ ཨཧེསུནྟི།
311. Savaṃsavasena āgatā puttanattuādayo puttā ca paputtā ca etissāti puttapaputtakā paramparā. Nihatanti nihitaṃ ṭhapitaṃ, pavattitanti attho. Nihatanti vā satataṃ patiṭṭhitabhāvena vaḷañjitanti attho. Tenāha ‘‘kalyāṇavatta’’nti. Atirekatarā dve guṇāti mahāsattassa maghadevakālato atirekatarā dve guṇā itararājūhi pana atirekatarā anekasatasahassappabhedā eva guṇā ahesunti.
༣༡༢. ཏེཏྟིཾས སཧཔུཉྙཀཱརིནོ ཨེཏྠ ནིབྦཏྟཱཏི ཏཾསཧཙརིཏཊྛཱནཾ ཏེཏྟིཾསཾ, ཏདེཝ ཏཱཝཏིཾསཾ, ཏཾནིཝཱསོ ཨེཏེསནྟི ཏཱཝཏིཾསཱ། ནིཝཱསབྷཱཝོ ཙ ཏེསཾ ཏཏྠ ནིབྦཏྟནཔུབྦཀོཏི ཨཱཧ – ‘‘དེཝཱནཾ ཏཱཝཏིཾསཱནནྟི ཏཱཝཏིཾསབྷཝནེ ནིབྦཏྟདེཝཱན’’ནྟི། རཉྙོཏི ནིམིམཧཱརཱཛསྶ། ཨོཝཱདེ ཋཏྭཱཏི ‘‘སཱིལཾ ཨརཀྑནྟོ མམ སནྟིཀཾ མཱ ཨཱགཙྪཏཱུ’’ཏི ནིགྒཎྷནཝསེནཔི, ‘‘ཨེཀནྟཏོ མམ ཝིཛིཏེ ཝསནྟེན སཱིལཾ རཀྑིཏབྦ’’ནྟི ཨེཝཾ པཝཏྟིཏཨོཝཱདཝསེནཔི ཨོཝཱདེ ཋཏྭཱ།
312. Tettiṃsa sahapuññakārino ettha nibbattāti taṃsahacaritaṭṭhānaṃ tettiṃsaṃ, tadeva tāvatiṃsaṃ, taṃnivāso etesanti tāvatiṃsā. Nivāsabhāvo ca tesaṃ tattha nibbattanapubbakoti āha – ‘‘devānaṃ tāvatiṃsānanti tāvatiṃsabhavane nibbattadevāna’’nti. Raññoti nimimahārājassa. Ovāde ṭhatvāti ‘‘sīlaṃ arakkhanto mama santikaṃ mā āgacchatū’’ti niggaṇhanavasenapi, ‘‘ekantato mama vijite vasantena sīlaṃ rakkhitabba’’nti evaṃ pavattitaovādavasenapi ovāde ṭhatvā.
ཨཐ ནནྟི མཧཱཛུཏིཀཾ མཧཱཝིཔྥཱརཾ མཧཱནུབྷཱཝཾ ནིམིརཱཛཱནཾ། ‘‘སཀྐོཧམསྨི དེཝིནྡོ, ཏཝ སནྟིཀམཱགཏོ’’ཏི ཨཏྟནོ སཀྐབྷཱཝཾ པཝེདེཏྭཱ ‘‘ཀངྑཾ ཏེ པཊིཝིནོདེསྶཱམཱི’’ཏི ཨཱཧ། ཏེནཱཧ ‘‘སབྦབྷཱུཏཱནམིསྶརཱ’’ཏིཨཱདི།
Athananti mahājutikaṃ mahāvipphāraṃ mahānubhāvaṃ nimirājānaṃ. ‘‘Sakkohamasmi devindo, tava santikamāgato’’ti attano sakkabhāvaṃ pavedetvā ‘‘kaṅkhaṃ te paṭivinodessāmī’’ti āha. Tenāha ‘‘sabbabhūtānamissarā’’tiādi.
སཱིལཾ ཨུཔཱདཱཡ ཨོམཀཏཱཡ ‘‘ཀི’’ནྟི ཧཱིལེ༹ནྟོ ཝདཏི། གུཎཝིསིཊྛཏཱཡཱཏི ལཱབྷཡསཱདཱིནཉྩེཝ པིཡམནཱཔཏཱདཱིནཉྩ ཨཱསཝཀྑཡཔརིཡོསཱནཱནཾ ནིམིཏྟབྷཱཝེན ཨུཏྟམགུཎཏཱཡ། ཏདཱ སཀྐོ ཨནུརུདྡྷཏྠེརོ, སོ ཨཏྟནོ པུརིམཛཱཏིཡཾ པཙྩཀྑསིདྡྷཾཝ དཱནཏོ སཱིལཾ མཧནྟཾ ཝིབྷཱཝེནྟོ ‘‘ཨཧཉྷཱི’’ཏིཨཱདིམཱཧ། ཏཏྠ ཨཏྟནཱ ཝསིཡམཱནཾ ཀཱམཱཝཙརདེཝལོཀཾ སནྡྷཱཡ ‘‘པེཏྟིཝིསཡཏོ’’ཏི ཝུཏྟཾ། ཏསྶ ཧི ཀཔྤསཏསཧསྶཾ ཝིཝཊྚཛ྄ཛྷཱསཡསྶ པཱུརིཏཔཱརམིསྶ དེཝལོཀོ པེཏལོཀོ ཝིཡ ཨུཔཊྛཱསི། ཏེནེཝཱཧ ‘‘ཨཙྪརཱགཎསངྒྷུཊྛཾ, པིསཱཙགཎསེཝིཏ’’ནྟི (སཾ॰ ནི॰ ༡.༤༦)།
Sīlaṃ upādāya omakatāya ‘‘ki’’nti hīḷento vadati. Guṇavisiṭṭhatāyāti lābhayasādīnañceva piyamanāpatādīnañca āsavakkhayapariyosānānaṃ nimittabhāvena uttamaguṇatāya. Tadā sakko anuruddhatthero, so attano purimajātiyaṃ paccakkhasiddhaṃva dānato sīlaṃ mahantaṃ vibhāvento ‘‘ahañhī’’tiādimāha. Tattha attanā vasiyamānaṃ kāmāvacaradevalokaṃ sandhāya ‘‘pettivisayato’’ti vuttaṃ. Tassa hi kappasatasahassaṃ vivaṭṭajjhāsayassa pūritapāramissa devaloko petaloko viya upaṭṭhāsi. Tenevāha ‘‘accharāgaṇasaṅghuṭṭhaṃ, pisācagaṇasevita’’nti (saṃ. ni. 1.46).
ཁཏྟིཡེཏི ཁཏྟིཡཛཱཏིཡཾ། ཝིསུཛ྄ཛྷཏཱིཏི བྲཧྨལོཀཱུཔཔཏྟིཾ སནྡྷཱཡ ཝདཏི ཀཱམསཾཀིལེསཝིསུཛ྄ཛྷནཏོ། ཀཱཡཱཏི ཙ བྲཧྨཀཱཡམཱཧ།
Khattiyeti khattiyajātiyaṃ. Visujjhatīti brahmalokūpapattiṃ sandhāya vadati kāmasaṃkilesavisujjhanato. Kāyāti ca brahmakāyamāha.
ཨིམསྶ མམ ཨདིཊྛཔུབྦརཱུཔཾ དིསྭཱ ‘‘ཨཧུདེཝ བྷཡ’’ནྟི ཙིནྟེཏྭཱ ཨཱཧ ‘‘ཨཝིཀམྤམཱནོ’’ཏི། བྷཱཡནྟོ ཧི ཙིཏྟསྶ ཨཉྙཐཏྟེན ཀཱཡསྶ ཙ ཚམྦྷིཏཏྟེན ཝིཀམྤཏི ནཱམ། ཏེནཱཧ ‘‘ཨབྷཱཡམཱནོ’’ཏི། སུཁཾ ཀཐེཏུཾ ཧོཏཱིཏི པུཉྙཕལཾ ཀཐེཏུཾ སུཁཾ ཧོཏི།
Imassa mama adiṭṭhapubbarūpaṃ disvā ‘‘ahudeva bhaya’’nti cintetvā āha ‘‘avikampamāno’’ti. Bhāyanto hi cittassa aññathattena kāyassa ca chambhitattena vikampati nāma. Tenāha ‘‘abhāyamāno’’ti. Sukhaṃ kathetuṃ hotīti puññaphalaṃ kathetuṃ sukhaṃ hoti.
༣༡༣. མནཾ ཨཱགམྨ ཡུཏྟཱཡེཝ ཧོནྟཱིཏི མཱཏལིསྶ སཀྐསྶེཝ ཙིཏྟཾ ཛཱནིཏྭཱ ཡུཏྟཱ ཝིཡ ཧོནྟི, རཐེ ཡུཏྟཨཱཛཱནཱིཡཀིཙྩཾ ཀརོནྟི དེཝཔུཏྟཱ། ཨེཝཾ ཏཱདིསེ ཀཱལེ ཏཐཱ པཊིཔཛྫནྟི, ཡཐཱ ཨེརཱཝཎོ དེཝཔུཏྟོ ཧཏྠིཀིཙྩཾ། ནདྡྷིཏོ པཊྛཱཡཱཏི རཐཔཉྫརཔརིཡནྟེན ཨཀྑསྶ སམྦནྡྷཊྛཱནཾ ནདྡྷཱི, ཏཏོ པཊྛཱཡ། ཨཀྑོ བཛ྄ཛྷཏི ཨེཏྠཱཏི ཨཀྑབདྡྷོ, ཨཀྑེན རཐསྶ བདྡྷཊྛཱནཾ། ཡཐཱ དེཝལོཀཏོ ཡཱཝ ཙནྡམཎྜལསྶ གམནཝཱིཐི, ཏཱཝ ཨཏྟནོ ཨཱནུབྷཱཝེན ཧེཊྛཱམུཁམེཝ རཐཾ པེསེསི, ཨེཝཾ ཙནྡམཎྜལསྶ གམནཝཱིཐིཏོ ཡཱཝ རཉྙོ པཱསཱདོ, ཏཱཝ ཏཐེཝ པེསེསི། དྭེ མགྒེ དསྶེཏྭཱཏི པཏོདལཊྛིཡཱ ཨཱཀཱསཾ ཝིལིཁནྟོ ཝིཡ ཨཏྟནོ ཨཱནུབྷཱཝེན ནིརཡགཱམཱི དེཝལོཀགཱམཱི ཙཱཏི དྭེ མགྒེ དསྶེཏྭཱ། ཀཏམེནཱཏིཨཱདི དེསནཱམཏྟཾ, ཡཐཱ ཏེན རཐེན གཙྪནྟསྶ ནིརཡོ དེཝལོཀོ ཙ པཱཀཊཱ ཧོནྟི, ཏཐཱ ཀརཎཾ ཨདྷིཔྤེཏཾ།
313.Manaṃ āgamma yuttāyeva hontīti mātalissa sakkasseva cittaṃ jānitvā yuttā viya honti, rathe yuttaājānīyakiccaṃ karonti devaputtā. Evaṃ tādise kāle tathā paṭipajjanti, yathā erāvaṇo devaputto hatthikiccaṃ. Naddhito paṭṭhāyāti rathapañjarapariyantena akkhassa sambandhaṭṭhānaṃ naddhī, tato paṭṭhāya. Akkho bajjhati etthāti akkhabaddho, akkhena rathassa baddhaṭṭhānaṃ. Yathā devalokato yāva candamaṇḍalassa gamanavīthi, tāva attano ānubhāvena heṭṭhāmukhameva rathaṃ pesesi, evaṃ candamaṇḍalassa gamanavīthito yāva rañño pāsādo, tāva tatheva pesesi. Dve magge dassetvāti patodalaṭṭhiyā ākāsaṃ vilikhanto viya attano ānubhāvena nirayagāmī devalokagāmī cāti dve magge dassetvā. Katamenātiādi desanāmattaṃ, yathā tena rathena gacchantassa nirayo devaloko ca pākaṭā honti, tathā karaṇaṃ adhippetaṃ.
ཝུཏྟཀཱརཎམེཝ སནྡྷཱཡཱཧ མཧཱསཏྟོ ‘‘ཨུབྷཡེནེཝ མཾ མཱཏལི ནེཧཱི’’ཏི། དུགྒནྟི དུགྒམཾ། ཝེཏྟརཎིནྟི ཨེཝཾནཱམཀཾ ནིརཡཾ། ཀུཐིཏནྟི པཀྐུཐིཏཾ ནིཔཀྐཏེལསདིསཛཱལཾ། ཁཱརསཾཡུཏྟནྟི ཁཱརོདཀསདིསཾ།
Vuttakāraṇameva sandhāyāha mahāsatto ‘‘ubhayeneva maṃ mātali nehī’’ti. Dugganti duggamaṃ. Vettaraṇinti evaṃnāmakaṃ nirayaṃ. Kuthitanti pakkuthitaṃ nipakkatelasadisajālaṃ. Khārasaṃyuttanti khārodakasadisaṃ.
རཐཾ ནིཝཏྟེཏྭཱཏི ནིརཡཱབྷིམུཁཏོ ནིཝཏྟེཏྭཱ། བཱིརཎཱིདེཝདྷཱིཏཱཡཱཏི ‘‘བཱིརཎཱི’’ཏི ཨེཝཾནཱམིཀཱཡ ཨཙྪརཱཡ། སོཎདིནྣདེཝཔུཏྟསྶཱཏི ‘‘སོཎདིནྣོ’’ཏི ཨེཝཾནཱམཀསྶ དེཝཔུཏྟསྶ། གཎདེཝཔུཏྟཱནནྟི གཎཝསེན པུཉྙཾ ཀཏྭཱ གཎཝསེནེཝ ནིབྦཏྟདེཝཔུཏྟཱནཾ།
Rathaṃ nivattetvāti nirayābhimukhato nivattetvā. Bīraṇīdevadhītāyāti ‘‘bīraṇī’’ti evaṃnāmikāya accharāya. Soṇadinnadevaputtassāti ‘‘soṇadinno’’ti evaṃnāmakassa devaputtassa. Gaṇadevaputtānanti gaṇavasena puññaṃ katvā gaṇavaseneva nibbattadevaputtānaṃ.
པཏྟཀཱལེཏི ཨུཔཀཊྛཱཡ ཝེལཱཡ། ཨཏིཐིནྟི པཙྩེཀསམྦུདྡྷཾ། ཀསྶཔསྶ བྷགཝཏོ སཱསནེ ཨེཀཾ ཁཱིཎཱསཝཏྠེརནྟིཔི ཝདནྟི། མཱཏཱཝ པུཏྟཾ སཀིམཱབྷིནནྡཱིཏི ཡཐཱ པཝཱསཏོ ཨཱགཏཾ པུཏྟཾ མཱཏཱ སཀིཾ ཨེཀཝཱརཾ ཨཱགཏཀཱལེ ཨབྷིནནྡཏི, ཏཐཱ ནིཙྩཀཱལེ ཨབྷིནནྡི སཀྐཙྩཾ པརིཝིསི། སཾཡམཱ སཾཝིབྷཱགཱཏི སཱིལསཾཡམཱ སཾཝིབྷཱགསཱིལཱ། ཛཱཏཀེཏི ནིམིཛཱཏཀེ།
Pattakāleti upakaṭṭhāya velāya. Atithinti paccekasambuddhaṃ. Kassapassa bhagavato sāsane ekaṃ khīṇāsavattherantipi vadanti. Mātāva puttaṃ sakimābhinandīti yathā pavāsato āgataṃ puttaṃ mātā sakiṃ ekavāraṃ āgatakāle abhinandati, tathā niccakāle abhinandi sakkaccaṃ parivisi. Saṃyamā saṃvibhāgāti sīlasaṃyamā saṃvibhāgasīlā. Jātaketi nimijātake.
ཙིཏྟཀཱུཊནྟི དེཝནགརསྶ དཀྑིཎདིསཱཡ དྭཱརཀོཊྛཀཾ། སཀྐོ ཙིཏྟཾ སནྡྷཱརེཏུཾ ཨསཀྐོནྟོཏི མཧཱསཏྟེ པཝཏྟཾ དེཝཏཱནཾ སཀྐཱརསམྨཱནཾ པཊིཙྩ ཨུཔྤནྣཾ ཨཏྟནོ ཨུསཱུཡཙིཏྟཾ བཧི ཨནཱཝིཀཏྭཱ ཨབྦྷནྟརེཡེཝ ཙ ནཾ ཋཔེཏུཾ ཨསཀྐོནྟོ། ཨཉྙེསཾ པུཉྙེན ཝསཱཧཱིཏི སཀྐསྶ མཧཱསཏྟཾ རོསེཏུཀཱམཏཱཡ ཨཱརཱདྷནཾ ནིདསྶེཏི། པུརཱཎསཀྐོ དཱིགྷཱཡུཀོ, ཏཾ ཨུཔཱདཱཡ ཛརཱཛིཎྞཾ ཝིཡ ཀཏྭཱ ‘‘ཛརསཀྐོ’’ཏི ཝུཏྟཾ།
Cittakūṭanti devanagarassa dakkhiṇadisāya dvārakoṭṭhakaṃ. Sakko cittaṃ sandhāretuṃ asakkontoti mahāsatte pavattaṃ devatānaṃ sakkārasammānaṃ paṭicca uppannaṃ attano usūyacittaṃ bahi anāvikatvā abbhantareyeva ca naṃ ṭhapetuṃ asakkonto. Aññesaṃ puññena vasāhīti sakkassa mahāsattaṃ rosetukāmatāya ārādhanaṃ nidasseti. Purāṇasakko dīghāyuko, taṃ upādāya jarājiṇṇaṃ viya katvā ‘‘jarasakko’’ti vuttaṃ.
༣༡༥. སེསཾ སབྦནྟི པབྦཛྫུཔགམནཱ སེསཾ ཨཏྟནོ ཝཾསེ པོརཱཎརཱཛཱུནཾ རཱཛཙཱརིཏྟཾ། པཱཀཏིཀནྟི པུན སབྷཱཝཏྟམེཝ གཏོ ཨཧོསི, ཨཔབྦཛིཏབྷཱཝཝཙནེནེཝསྶ བྲཧྨཝིཧཱརབྷཱཝནཱདཱིནཾ པབྦཛྫཱགུཎཱནཾ ཨབྷཱཝོ དཱིཔིཏོ ཧོཏི།
315.Sesaṃ sabbanti pabbajjupagamanā sesaṃ attano vaṃse porāṇarājūnaṃ rājacārittaṃ. Pākatikanti puna sabhāvattameva gato ahosi, apabbajitabhāvavacanenevassa brahmavihārabhāvanādīnaṃ pabbajjāguṇānaṃ abhāvo dīpito hoti.
༣༡༦. ཝཱིརིཡཾ ཨཀརོནྟོ སམུཙྪིནྡཏི, ན ཏཱཝ སམུཙྪིནྣཾ, ཀལྱཱཎམིཏྟསཾསགྒཱདིཔཙྩཡསམཝཱཡེ སཏི སཱིལཝཏཾ ཀལྱཱཎཝཏྟཾ པཝཏྟེཏུཾ སཀྐོཏི ། དུསྶཱིལེན སམུཙྪིནྣཾ ནཱམ ཧོཏི ཏསྶ ཏཏྠ ནིརཱསབྷཱཝེན པཊིཔཏྟིཡཱ ཨེཝ ཨསམྦྷཝཏོ། སཏྟ སེཁཱ པཝཏྟེནྟི ཀལྱཱཎཝཏྟསྶ ཨཔརིནིཊྛིཏཀིཙྩཏྟཱ། ཁཱིཎཱསཝེན པཝཏྟིཏཾ ནཱམ པརིནིཊྛིཏཀིཙྩཏྟཱ། སེསཾ སུཝིཉྙེཡྻམེཝ།
316.Vīriyaṃ akaronto samucchindati, na tāva samucchinnaṃ, kalyāṇamittasaṃsaggādipaccayasamavāye sati sīlavataṃ kalyāṇavattaṃ pavattetuṃ sakkoti . Dussīlena samucchinnaṃ nāma hoti tassa tattha nirāsabhāvena paṭipattiyā eva asambhavato. Satta sekhā pavattenti kalyāṇavattassa apariniṭṭhitakiccattā. Khīṇāsavena pavattitaṃ nāma pariniṭṭhitakiccattā. Sesaṃ suviññeyyameva.
མགྷདེཝསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Maghadevasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༣. མགྷདེཝསུཏྟཾ • 3. Maghadevasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༣. མགྷདེཝསུཏྟཝཎྞནཱ • 3. Maghadevasuttavaṇṇanā
