| Library / Tipiṭaka / ཏིཔིཊཀ • Tipiṭaka / སུཏྟནིཔཱཏ-ཨཊྛཀཐཱ • Suttanipāta-aṭṭhakathā |
༡༣. མཧཱབྱཱུཧསུཏྟཝཎྞནཱ
13. Mahābyūhasuttavaṇṇanā
༩༠༢. ཡེ ཀེཙིམེཏི མཧཱབྱཱུཧསུཏྟཾ། ཀཱ ཨུཔྤཏྟི? ཨིདམྤི ཏསྨིཾཡེཝ མཧཱསམཡེ ‘‘ཀིཾ ནུ ཁོ ཨིམེ དིཊྛིཔརིབྦསཱནཱ ཝིཉྙཱུནཾ སནྟིཀཱ ནིནྡམེཝ ལབྷནྟི, ཨུདཱཧུ པསཾསམྤཱི’’ཏི ཨུཔྤནྣཙིཏྟཱནཾ ཨེཀཙྩཱནཾ དེཝཏཱནཾ ཏམཏྠཾ ཨཱཝིཀཱཏུཾ པུརིམནཡེན ནིམྨིཏབུདྡྷེན ཨཏྟཱནཾ པུཙྪཱཔེཏྭཱ ཝུཏྟཾ། ཏཏྠ ཨནྭཱནཡནྟཱིཏི ཨནུ ཨཱནཡནྟི, པུནཔྤུནཾ ཨཱཧརནྟི།
902.Yekecimeti mahābyūhasuttaṃ. Kā uppatti? Idampi tasmiṃyeva mahāsamaye ‘‘kiṃ nu kho ime diṭṭhiparibbasānā viññūnaṃ santikā nindameva labhanti, udāhu pasaṃsampī’’ti uppannacittānaṃ ekaccānaṃ devatānaṃ tamatthaṃ āvikātuṃ purimanayena nimmitabuddhena attānaṃ pucchāpetvā vuttaṃ. Tattha anvānayantīti anu ānayanti, punappunaṃ āharanti.
༩༠༣. ཨིདཱནི ཡསྨཱ ཏེ ‘‘ཨིདམེཝ སཙྩ’’ནྟི ཝདནྟཱ དིཊྛིགཏིཀཱ ཝཱདིནོ ཀདཱཙི ཀཏྠཙི པསཾསམྤི ལབྷནྟི, ཡཾ ཨེཏཾ པསཾསཱསངྑཱཏཾ ཝཱདཕལཾ, ཏཾ ཨཔྤཾ རཱགཱདཱིནཾ སམཱཡ སམཏྠཾ ན ཧོཏི, ཀོ པན ཝཱདོ དུཏིཡེ ནིནྡཱཕལེ, ཏསྨཱ ཨེཏམཏྠཾ དསྶེནྟོ ཨིམཾ ཏཱཝ ཝིསྶཛྫནགཱཐམཱཧ། ‘‘ཨཔྤཉྷི ཨེཏཾ ན ཨལཾ སམཱཡ, དུཝེ ཝིཝཱདསྶ ཕལཱནི བྲཱུམཱི’’ཏིཨཱདི། ཏཏྠ དུཝེ ཝིཝཱདསྶ ཕལཱནཱིཏི ནིནྡཱ པསཾསཱ ཙ, ཛཡཔརཱཛཡཱདཱིནི ཝཱ ཏཾསབྷཱགཱནི། ཨེཏམྤི དིསྭཱཏི ‘‘ནིནྡཱ ཨནིཊྛཱ ཨེཝ, པསཾསཱ ནཱལཾ སམཱཡཱ’’ཏི ཨེཏམྤི ཝིཝཱདཕལེ ཨཱདཱིནཝཾ དིསྭཱ། ཁེམཱབྷིཔསྶཾ ཨཝིཝཱདབྷཱུམིནྟི ཨཝིཝཱདབྷཱུམིཾ ནིབྦཱནཾ ‘‘ཁེམ’’ནྟི པསྶམཱནོ།
903. Idāni yasmā te ‘‘idameva sacca’’nti vadantā diṭṭhigatikā vādino kadāci katthaci pasaṃsampi labhanti, yaṃ etaṃ pasaṃsāsaṅkhātaṃ vādaphalaṃ, taṃ appaṃ rāgādīnaṃ samāya samatthaṃ na hoti, ko pana vādo dutiye nindāphale, tasmā etamatthaṃ dassento imaṃ tāva vissajjanagāthamāha. ‘‘Appañhi etaṃ na alaṃ samāya, duve vivādassa phalāni brūmī’’tiādi. Tattha duve vivādassa phalānīti nindā pasaṃsā ca, jayaparājayādīni vā taṃsabhāgāni. Etampi disvāti ‘‘nindā aniṭṭhā eva, pasaṃsā nālaṃ samāyā’’ti etampi vivādaphale ādīnavaṃ disvā. Khemābhipassaṃ avivādabhūminti avivādabhūmiṃ nibbānaṃ ‘‘khema’’nti passamāno.
༩༠༤. ཨེཝཉྷི ཨཝིཝདམཱནོ – ཡཱ ཀཱཙིམཱཏི གཱཐཱ། ཏཏྠ སམྨུཏིཡོཏི དིཊྛིཡོ། པུཐུཛྫཱཏི པུཐུཛྫནསམྦྷཝཱ། སོ ཨུཔཡཾ ཀིམེཡྻཱཏི སོ ཨུཔགནྟབྦཊྛེན ཨུཔཡཾ རཱུཔཱདཱིསུ ཨེཀམྤི དྷམྨཾ ཀིཾ ཨུཔེཡྻ, ཀེན ཝཱ ཀཱརཎེན ཨུཔེཡྻ། དིཊྛེ སུཏེ ཁནྟིམཀུབྦམཱནོཏི དིཊྛསུཏསུདྡྷཱིསུ པེམཾ ཨཀརོནྟོ།
904. Evañhi avivadamāno – yā kācimāti gāthā. Tattha sammutiyoti diṭṭhiyo. Puthujjāti puthujjanasambhavā. So upayaṃ kimeyyāti so upagantabbaṭṭhena upayaṃ rūpādīsu ekampi dhammaṃ kiṃ upeyya, kena vā kāraṇena upeyya. Diṭṭhe sute khantimakubbamānoti diṭṭhasutasuddhīsu pemaṃ akaronto.
༩༠༥. ཨིཏོ བཱཧིརཱ པན – སཱིལུཏྟམཱཏི གཱཐཱ། ཏསྶཏྠོ – སཱིལཾཡེཝ ‘‘ཨུཏྟམ’’ནྟི མཉྙམཱནཱ སཱིལུཏྟམཱ ཨེཀེ བྷོནྟོ སཾཡམམཏྟེན སུདྡྷིཾ ཝདནྟི, ཧཏྠིཝཏཱདིཉྩ ཝཏཾ སམཱདཱཡ ཨུཔཊྛིཏཱ, ཨིདྷེཝ དིཊྛིཡཾ ཨསྶ སཏྠུནོ སུདྡྷིནྟི བྷཝཱུཔནཱིཏཱ བྷཝཛ྄ཛྷོསིཏཱ སམཱནཱ ཝདནྟི, ཨཔིཙ ཏེ ཀུསལཱ ཝདཱནཱ ‘‘ཀུསལཱ མཡ’’ནྟི ཨེཝཾ ཝཱདཱ།
905. Ito bāhirā pana – sīluttamāti gāthā. Tassattho – sīlaṃyeva ‘‘uttama’’nti maññamānā sīluttamā eke bhonto saṃyamamattena suddhiṃ vadanti, hatthivatādiñca vataṃ samādāya upaṭṭhitā, idheva diṭṭhiyaṃ assa satthuno suddhinti bhavūpanītā bhavajjhositā samānā vadanti, apica te kusalā vadānā ‘‘kusalā maya’’nti evaṃ vādā.
༩༠༦. ཨེཝཾ སཱིལུཏྟམེསུ ཙ ཏེསུ ཏཐཱ པཊིཔནྣོ ཡོ ཀོཙི – སཙེ ཙུཏོཏི གཱཐཱ། ཏསྶཏྠོ – སཙེ ཏཏོ སཱིལཝཏཏོ པརཝིཙྪནྡནེན ཝཱ ཨནབྷིསམྦྷུཎནྟོ ཝཱ ཙུཏོ ཧོཏི, སོ ཏཾ སཱིལབྦཏཱདིཀམྨཾ པུཉྙཱབྷིསངྑཱརཱདིཀམྨཾ ཝཱ ཝིརཱདྷཡིཏྭཱ པཝེདྷཏཱི། ན ཀེཝལཉྩ ཝེདྷཏི, ཨཔིཙ ཁོ ཏཾ སཱིལབྦཏསུདྡྷིཾ པཛཔྤཏཱི ཙ ཝིཔྤལཔཏི པཏྠཡཏཱི ཙ། ཀིམིཝ? སཏྠཱཝ ཧཱིནོ པཝསཾ གྷརམྷཱ། གྷརམྷཱ པཝསནྟོ སཏྠཏོ ཧཱིནོ ཡཐཱ ཏཾ གྷརཾ ཝཱ སཏྠཾ ཝཱ པཏྠེཡྻཱཏི།
906. Evaṃ sīluttamesu ca tesu tathā paṭipanno yo koci – sace cutoti gāthā. Tassattho – sace tato sīlavatato paravicchandanena vā anabhisambhuṇanto vā cuto hoti, so taṃ sīlabbatādikammaṃ puññābhisaṅkhārādikammaṃ vā virādhayitvā pavedhatī. Na kevalañca vedhati, apica kho taṃ sīlabbatasuddhiṃ pajappatī ca vippalapati patthayatī ca. Kimiva? Satthāva hīno pavasaṃ gharamhā. Gharamhā pavasanto satthato hīno yathā taṃ gharaṃ vā satthaṃ vā pattheyyāti.
༩༠༧. ཨེཝཾ པན སཱིལུཏྟམཱནཾ ཝེདྷཀཱརཎཾ ཨརིཡསཱཝཀོ – སཱིལབྦཏཾ ཝཱཔི པཧཱཡ སབྦནྟི གཱཐཱ། ཏཏྠ སཱཝཛྫནཝཛྫནྟི སབྦཱཀུསལཾ ལོཀིཡཀུསལཉྩ། ཨེཏཾ སུདྡྷིཾ ཨསུདྡྷིནྟི ཨཔཏྠཡཱནོཏི པཉྩཀཱམགུཎཱདིབྷེདཾ ཨེཏཾ སུདྡྷིཾ, ཨཀུསལཱདིབྷེདཾ ཨསུདྡྷིཉྩ ཨཔཏྠཡམཱནོ། ཝིརཏོ ཙརེཏི སུདྡྷིཡཱ ཨསུདྡྷིཡཱ ཙ ཝིརཏོ ཙརེཡྻ། སནྟིམནུགྒཧཱཡཱཏི དིཊྛིཾ ཨགཧེཏྭཱ།
907. Evaṃ pana sīluttamānaṃ vedhakāraṇaṃ ariyasāvako – sīlabbataṃ vāpi pahāya sabbanti gāthā. Tattha sāvajjanavajjanti sabbākusalaṃ lokiyakusalañca. Etaṃ suddhiṃ asuddhinti apatthayānoti pañcakāmaguṇādibhedaṃ etaṃ suddhiṃ, akusalādibhedaṃ asuddhiñca apatthayamāno. Virato careti suddhiyā asuddhiyā ca virato careyya. Santimanuggahāyāti diṭṭhiṃ agahetvā.
༩༠༨. ཨེཝཾ ཨིཏོ བཱཧིརཀེ སཱིལུཏྟམེ སཾཡམེན ཝིསུདྡྷིཝཱདེ ཏེསཾ ཝིགྷཱཏཾ སཱིལབྦཏཔྤཧཱཡིནོ ཨརཧཏོ ཙ པཊིཔཏྟིཾ དསྶེཏྭཱ ཨིདཱནི ཨཉྙཐཱཔི སུདྡྷིཝཱདེ བཱཧིརཀེ དསྶེནྟོ ‘‘ཏམཱུཔནིསྶཱཡཱ’’ཏི གཱཐམཱཧ། ཏསྶཏྠོ – སནྟཉྙེཔི སམཎབྲཱཧྨཎཱ, ཏེ ཛིགུཙྪིཏཾ ཨམརནྟཔཾ ཝཱ དིཊྛསུདྡྷིཨཱདཱིསུ ཝཱ ཨཉྙཏརཉྙཏརཾ ཨུཔནིསྶཱཡ ཨཀིརིཡདིཊྛིཡཱ ཝཱ ཨུདྡྷཾསརཱ ཧུཏྭཱ བྷཝཱབྷཝེསུ ཨཝཱིཏཏཎྷཱསེ སུདྡྷིམནུཏྠུནནྟི ཝདནྟི ཀཐེནྟཱིཏི།
908. Evaṃ ito bāhirake sīluttame saṃyamena visuddhivāde tesaṃ vighātaṃ sīlabbatappahāyino arahato ca paṭipattiṃ dassetvā idāni aññathāpi suddhivāde bāhirake dassento ‘‘tamūpanissāyā’’ti gāthamāha. Tassattho – santaññepi samaṇabrāhmaṇā, te jigucchitaṃ amarantapaṃ vā diṭṭhasuddhiādīsu vā aññataraññataraṃ upanissāya akiriyadiṭṭhiyā vā uddhaṃsarā hutvā bhavābhavesu avītataṇhāsesuddhimanutthunanti vadanti kathentīti.
༩༠༩. ཨེཝཾ ཏེསཾ ཨཝཱིཏཏཎྷཱནཾ སུདྡྷིཾ ཨནུཏྠུནནྟཱནཾ ཡོཔི སུདྡྷིཔྤཏྟམེཝ ཨཏྟཱནཾ མཉྙེཡྻ, ཏསྶཔི ཨཝཱིཏཏཎྷཏྟཱ བྷཝཱབྷཝེསུ ཏཾ ཏཾ ཝཏྠུཾ པཏྠཡམཱནསྶ ཧི ཛཔྤིཏཱནི པུནཔྤུནཾ ཧོནྟིཡེཝཱཏི ཨདྷིཔྤཱཡོ། ཏཎྷཱ ཧི ཨཱསེཝིཏཱ ཏཎྷཾ ཝཌྜྷཡཏེཝ། ན ཀེཝལཉྩ ཛཔྤིཏཱནི, པཝེདྷིཏཾ ཝཱཔི པཀཔྤིཏེསུ, ཏཎྷཱདིཊྛཱིཧི ཙསྶ པཀཔྤིཏེསུ ཝཏྠཱུསུ པཝེདྷིཏམྤི ཧོཏཱིཏི ཝུཏྟཾ ཧོཏི། བྷཝཱབྷཝེསུ པན ཝཱིཏཏཎྷཏྟཱ ཨཱཡཏིཾ ཙུཏཱུཔཔཱཏོ ཨིདྷ ཡསྶ ནཏྠི, སཀེན ཝེདྷེཡྻ ཀུཧིཾཝ ཛཔྤེཏི ཨཡམེཏིསྶཱ གཱཐཱཡ སམྦནྡྷོ། སེསཾ ནིདྡེསེ ཝུཏྟནཡམེཝ།
909. Evaṃ tesaṃ avītataṇhānaṃ suddhiṃ anutthunantānaṃ yopi suddhippattameva attānaṃ maññeyya, tassapi avītataṇhattā bhavābhavesu taṃ taṃ vatthuṃ patthayamānassa hi jappitāni punappunaṃ hontiyevāti adhippāyo. Taṇhā hi āsevitā taṇhaṃ vaḍḍhayateva. Na kevalañca jappitāni, pavedhitaṃ vāpi pakappitesu, taṇhādiṭṭhīhi cassa pakappitesu vatthūsu pavedhitampi hotīti vuttaṃ hoti. Bhavābhavesu pana vītataṇhattā āyatiṃ cutūpapāto idha yassa natthi, sakena vedheyya kuhiṃva jappeti ayametissā gāthāya sambandho. Sesaṃ niddese vuttanayameva.
༩༡༠-༡༡. ཡམཱཧཱུཏི པུཙྪཱགཱཐཱ། ཨིདཱནི ཡསྨཱ ཨེཀོཔི ཨེཏྠ ཝཱདོ སཙྩོ ནཏྠི, ཀེཝལཾ དིཊྛིམཏྟཀེན ཧི ཏེ ཝདནྟི, ཏསྨཱ ཏམཏྠཾ དསྶེནྟོ ‘‘སཀཉྷཱི’’ཏི ཨིམཾ ཏཱཝ ཝིསྶཛྫནགཱཐམཱཧ། ཏཏྠ སམྨུཏིནྟི དིཊྛིཾ།
910-11.Yamāhūti pucchāgāthā. Idāni yasmā ekopi ettha vādo sacco natthi, kevalaṃ diṭṭhimattakena hi te vadanti, tasmā tamatthaṃ dassento ‘‘sakañhī’’ti imaṃ tāva vissajjanagāthamāha. Tattha sammutinti diṭṭhiṃ.
༩༡༢. ཨེཝམེཏེསུ སཀཾ དྷམྨཾ པརིཔུཎྞཾ བྲུཝནྟེསུ ཨཉྙསྶ པན དྷམྨཾ ‘‘ཧཱིན’’ནྟི ཝདནྟེསུ ཡསྶ ཀསྶཙི – པརསྶ ཙེ ཝམྦྷཡིཏེན ཧཱིནོཏི གཱཐཱ། ཏསྶཏྠོ – ཡདི པརསྶ ནིནྡིཏཀཱརཎཱ ཧཱིནོ བྷཝེཡྻ, ན ཀོཙི དྷམྨེསུ ཝིསེསི ཨགྒོ བྷཝེཡྻ། ཀིཾ ཀཱརཎཾ? པུཐཱུ ཧི ཨཉྙསྶ ཝདནྟི དྷམྨཾ, ནིཧཱིནཏོ སབྦེཝ ཏེ སམྷི དལ༹ྷཾ ཝདཱནཱ སཀདྷམྨེ དལ༹ྷཝཱདཱ ཨེཝ།
912. Evametesu sakaṃ dhammaṃ paripuṇṇaṃ bruvantesu aññassa pana dhammaṃ ‘‘hīna’’nti vadantesu yassa kassaci – parassa ce vambhayitena hīnoti gāthā. Tassattho – yadi parassa ninditakāraṇā hīno bhaveyya, na koci dhammesu visesi aggo bhaveyya. Kiṃ kāraṇaṃ? Puthū hiaññassa vadanti dhammaṃ, nihīnato sabbeva te samhi daḷhaṃ vadānā sakadhamme daḷhavādā eva.
༩༡༣. ཀིཉྩ བྷིཡྻོ – སདྡྷམྨཔཱུཛཱཏི གཱཐཱ། ཏསྶཏྠོ – ཏེ ཙ ཏིཏྠིཡཱ ཡཐཱ པསཾསནྟི སཀཱཡནཱནི, སདྡྷམྨཔཱུཛཱཔི ནེསཾ ཏཐེཝ ཝཏྟཏི། ཏེ ཧི ཨཏིཝིཡ སཏྠཱརཱདཱིནི སཀྐརོནྟི། ཏཏྠ ཡདི ཏེ པམཱཎཱ སིཡུཾ, ཨེཝཾ སནྟེ སབྦེཝ ཝཱདཱ ཏཐིཡཱ བྷཝེཡྻུཾ། ཀིཾ ཀཱརཎཾ? སུདྡྷཱི ཧི ནེསཾ པཙྩཏྟམེཝ, ན སཱ ཨཉྙཏྲ སིཛ྄ཛྷཏི, ནཱཔི པརམཏྠཏོ། ཨཏྟནི དིཊྛིགཱཧམཏྟམེཝ ཧི ཏཾ ཏེསཾ པརཔཙྩཡནེཡྻབུདྡྷཱིནཾ།
913. Kiñca bhiyyo – saddhammapūjāti gāthā. Tassattho – te ca titthiyā yathā pasaṃsanti sakāyanāni, saddhammapūjāpi nesaṃ tatheva vattati. Te hi ativiya satthārādīni sakkaronti. Tattha yadi te pamāṇā siyuṃ, evaṃ sante sabbeva vādā tathiyā bhaveyyuṃ. Kiṃ kāraṇaṃ? Suddhī hi nesaṃ paccattameva, na sā aññatra sijjhati, nāpi paramatthato. Attani diṭṭhigāhamattameva hi taṃ tesaṃ parapaccayaneyyabuddhīnaṃ.
༩༡༤. ཡོ ཝཱ པན ཝིཔརཱིཏོ བཱཧིཏཔཱཔཏྟཱ བྲཱཧྨཎོ, ཏསྶ – ན བྲཱཧྨཎསྶ པརནེཡྻམཏྠཱིཏི གཱཐཱ། ཏསྶཏྠོ – བྲཱཧྨཎསྶ ཧི ‘‘སབྦེ སངྑཱརཱ ཨནིཙྩཱ’’ཏིཨཱདིནཱ (དྷ॰ པ॰ ༢༧༧; ནེཏྟི॰ ༥) ནཡེན སུདིཊྛཏྟཱ པརེན ནེཏབྦཾ ཉཱཎཾ ནཏྠི, དིཊྛིདྷམྨེསུ ‘‘ཨིདམེཝ སཙྩ’’ནྟི ནིཙྪིནིཏྭཱ སམུགྒཧཱིཏམྤི ནཏྠི། ཏཾཀཱརཎཱ སོ དིཊྛིཀལཧཱནི ཨཏཱིཏོ, ན ཙ སོ སེཊྛཏོ པསྶཏི དྷམྨམཉྙཾ ཨཉྙཏྲ སཏིཔཊྛཱནཱདཱིཧི།
914. Yo vā pana viparīto bāhitapāpattā brāhmaṇo, tassa – na brāhmaṇassa paraneyyamatthīti gāthā. Tassattho – brāhmaṇassa hi ‘‘sabbe saṅkhārā aniccā’’tiādinā (dha. pa. 277; netti. 5) nayena sudiṭṭhattā parena netabbaṃ ñāṇaṃ natthi, diṭṭhidhammesu ‘‘idameva sacca’’nti nicchinitvā samuggahītampi natthi. Taṃkāraṇā so diṭṭhikalahāni atīto, na ca so seṭṭhato passati dhammamaññaṃ aññatra satipaṭṭhānādīhi.
༩༡༥. ཛཱནཱམཱིཏི གཱཐཱཡ སམྦནྡྷོ ཨཏྠོ ཙ – ཨེཝཾ ཏཱཝ པརམཏྠབྲཱཧྨཎོ ན ཧི སེཊྛཏོ པསྶཏི དྷམྨམཉྙཾ, ཨཉྙེ པན ཏིཏྠིཡཱ པརཙིཏྟཉཱཎཱདཱིཧི ཛཱནནྟཱ པསྶནྟཱཔི ‘‘ཛཱནཱམི པསྶཱམི ཏཐེཝ ཨེཏ’’ནྟི ཨེཝཾ ཝདནྟཱཔི ཙ དིཊྛིཡཱ སུདྡྷིཾ པཙྩེནྟི། ཀསྨཱ? ཡསྨཱ ཏེསུ ཨེཀོཔི ཨདྡཀྑི ཙེ ཨདྡས ཙེཔི ཏེན པརཙིཏྟཉཱཎཱདིནཱ ཡཐཱབྷཱུཏཾ ཨཏྠཾ, ཀིཉྷི ཏུམསྶ ཏེན ཏསྶ ཏེན དསྶནེན ཀིཾ ཀཏཾ, ཀིཾ དུཀྑཔརིཉྙཱ སཱདྷིཏཱ, ཨུདཱཧུ སམུདཡཔཧཱནཱདཱིནཾ ཨཉྙཏརཾ, ཡཏོ སབྦཐཱཔི ཨཏིཀྐམིཏྭཱ ཨརིཡམགྒཾ ཏེ ཏིཏྠིཡཱ ཨཉྙེནེཝ ཝདནྟི སུདྡྷིཾ, ཨཏིཀྐམིཏྭཱ ཝཱ ཏེ ཏིཏྠིཡེ བུདྡྷཱདཡོ ཨཉྙེནེཝ ཝདནྟི སུདྡྷིནྟི།
915.Jānāmīti gāthāya sambandho attho ca – evaṃ tāva paramatthabrāhmaṇo na hi seṭṭhato passati dhammamaññaṃ, aññe pana titthiyā paracittañāṇādīhi jānantā passantāpi ‘‘jānāmi passāmi tatheva eta’’nti evaṃ vadantāpi ca diṭṭhiyā suddhiṃ paccenti. Kasmā? Yasmā tesu ekopi addakkhi ce addasa cepi tena paracittañāṇādinā yathābhūtaṃ atthaṃ, kiñhi tumassa tena tassa tena dassanena kiṃ kataṃ, kiṃ dukkhapariññā sādhitā, udāhu samudayapahānādīnaṃ aññataraṃ, yato sabbathāpi atikkamitvā ariyamaggaṃ te titthiyā aññeneva vadanti suddhiṃ, atikkamitvā vā te titthiye buddhādayo aññeneva vadanti suddhinti.
༩༡༦. པསྶཾ ནརོཏི གཱཐཱཡ སམྦནྡྷོ ཨཏྠོ ཙ། ཀིཉྩ བྷིཡྻོ? ཡྭཱཡཾ པརཙིཏྟཉཱཎཱདཱིཧི ཨདྡཀྑི, སོ པསྶཾ ནརོ དཀྑཏི ནཱམརཱུཔཾ, ན ཏཏོ པརཾ དིསྭཱན ཝཱ ཉསྶཏི ཏཱནིམེཝ ནཱམརཱུཔཱནི ནིཙྩཏོ སུཁཏོ ཝཱ ན ཨཉྙཐཱ། སོ ཨེཝཾ པསྶནྟོ ཀཱམཾ བཧུཾ པསྶཏུ ཨཔྤཀཾ ཝཱ ནཱམརཱུཔཾ ནིཙྩཏོ སུཁཏོ ཙ, ཨཐསྶ ཨེཝརཱུཔེན དསྶནེན ན ཧི ཏེན སུདྡྷིཾ ཀུསལཱ ཝདནྟཱིཏི།
916.Passaṃ naroti gāthāya sambandho attho ca. Kiñca bhiyyo? Yvāyaṃ paracittañāṇādīhi addakkhi, so passaṃ naro dakkhati nāmarūpaṃ, na tato paraṃ disvāna vā ñassati tānimeva nāmarūpāni niccato sukhato vā na aññathā. So evaṃ passanto kāmaṃ bahuṃ passatu appakaṃ vā nāmarūpaṃ niccato sukhato ca, athassa evarūpena dassanena na hi tena suddhiṃ kusalā vadantīti.
༩༡༧. ནིཝིསྶཝཱདཱིཏི གཱཐཱཡ སམྦནྡྷོ ཨཏྠོ ཙ – ཏེན ཙ དསྶནེན སུདྡྷིཡཱ ཨསཏིཡཱཔི ཡོ ‘‘ཛཱནཱམི པསྶཱམི ཏཐེཝ ཨེཏ’’ནྟི ཨེཝཾ ནིཝིསྶཝཱདཱི, ཨེཏཾ ཝཱ དསྶནཾ པཊིཙྩ དིཊྛིཡཱ སུདྡྷིཾ པཙྩེནྟོ ‘‘ཨིདམེཝ སཙྩ’’ནྟི ཨེཝཾ ནིཝིསྶཝཱདཱི, སོ སུབྦིནཡོ ན ཧོཏི ཏཾ ཏཐཱ པཀཔྤིཏཾ ཨབྷིསངྑཏཾ དིཊྛིཾ པུརེཀྑརཱནོ། སོ ཧི ཡཾ སཏྠཱརཱདིཾ ནིསྶིཏོ, ཏཏྠེཝ སུབྷཾ ཝདཱནོ སུདྡྷིཾ ཝདོ, ‘‘པརིསུདྡྷཝཱདོ པརིསུདྡྷདསྶནོ ཝཱ ཨཧ’’ནྟི ཨཏྟཱནཾ མཉྙམཱནོ ཏཏྠ ཏཐདྡསཱ སོ, ཏཏྠ སཀཱཡ དིཊྛིཡཱ ཨཝིཔརཱིཏམེཝ སོ ཨདྡས། ཡཐཱ སཱ དིཊྛི པཝཏྟཏི, ཏཐེཝ ནཾ ཨདྡས, ན ཨཉྙཐཱ པསྶིཏུཾ ཨིཙྪཏཱིཏི ཨདྷིཔྤཱཡོ།
917.Nivissavādīti gāthāya sambandho attho ca – tena ca dassanena suddhiyā asatiyāpi yo ‘‘jānāmi passāmi tatheva eta’’nti evaṃ nivissavādī, etaṃ vā dassanaṃ paṭicca diṭṭhiyā suddhiṃ paccento ‘‘idameva sacca’’nti evaṃ nivissavādī, so subbinayo na hoti taṃ tathā pakappitaṃ abhisaṅkhataṃ diṭṭhiṃ purekkharāno. So hi yaṃ satthārādiṃ nissito, tattheva subhaṃ vadāno suddhiṃ vado, ‘‘parisuddhavādo parisuddhadassano vā aha’’nti attānaṃ maññamāno tattha tathaddasā so, tattha sakāya diṭṭhiyā aviparītameva so addasa. Yathā sā diṭṭhi pavattati, tatheva naṃ addasa, na aññathā passituṃ icchatīti adhippāyo.
༩༡༨. ཨེཝཾ པཀཔྤིཏཾ དིཊྛིཾ པུརེཀྑརཱནེསུ ཏིཏྠིཡེསུ – ན བྲཱཧྨཎོ ཀཔྤམུཔེཏི སངྑཱཏི གཱཐཱ། ཏཏྠ སངྑཱཏི སངྑཱཡ, ཛཱནིཏྭཱཏི ཨཏྠོ། ནཔི ཉཱཎབནྡྷཱུཏི སམཱཔཏྟིཉཱཎཱདིནཱ ཨཀཏཏཎྷཱདིཊྛིབནྡྷུ། ཏཏྠ ཝིགྒཧོ – ནཱཔི ཨསྶ ཉཱཎེན ཀཏོ བནྡྷུ ཨཏྠཱིཏི ནཔི ཉཱཎབནྡྷུ། སམྨུཏིཡོཏི དིཊྛིསམྨུཏིཡོ། པུཐུཛྫཱཏི པུཐུཛྫནསམྦྷཝཱ། ཨུགྒཧཎནྟི མཉྙེཏི ཨུགྒཧཎནྟི ཨཉྙེ, ཨཉྙེ ཏཱ སམྨུཏིཡོ ཨུགྒཎྷནྟཱིཏི ཝུཏྟཾ ཧོཏི།
918. Evaṃ pakappitaṃ diṭṭhiṃ purekkharānesu titthiyesu – na brāhmaṇo kappamupeti saṅkhāti gāthā. Tattha saṅkhāti saṅkhāya, jānitvāti attho. Napi ñāṇabandhūti samāpattiñāṇādinā akatataṇhādiṭṭhibandhu. Tattha viggaho – nāpi assa ñāṇena kato bandhu atthīti napi ñāṇabandhu. Sammutiyoti diṭṭhisammutiyo. Puthujjāti puthujjanasambhavā. Uggahaṇanti maññeti uggahaṇanti aññe, aññe tā sammutiyo uggaṇhantīti vuttaṃ hoti.
༩༡༩. ཀིཉྩ བྷིཡྻོ – ཝིསྶཛྫ གནྠཱནཱིཏི གཱཐཱ། ཏཏྠ ཨནུགྒཧོཏི ཨུགྒཧཎཝིརཧིཏོ, སོཔི ནཱསྶ ཨུགྒཧོཏི ཨནུགྒཧོ, ན ཝཱ ཨུགྒཎྷཱཏཱིཏི ཨནུགྒཧོ།
919. Kiñca bhiyyo – vissajja ganthānīti gāthā. Tattha anuggahoti uggahaṇavirahito, sopi nāssa uggahoti anuggaho, na vā uggaṇhātīti anuggaho.
༩༢༠. ཀིཉྩ བྷིཡྻོ – སོ ཨེཝརཱུཔོ – པུབྦཱསཝེཏི གཱཐཱ། ཏཏྠ པུབྦཱསཝེཏི ཨཏཱིཏརཱུཔཱདཱིནི ཨཱརབྦྷ ཨུཔྤཛྫམཱནདྷམྨེ ཀིལེསེ། ནཝེཏི པཙྩུཔྤནྣརཱུཔཱདཱིནི ཨཱརབྦྷ ཨུཔྤཛྫམཱནདྷམྨེ། ན ཚནྡགཱུཏི ཚནྡཱདིཝསེན ན གཙྪཏི། ཨནཏྟགརཧཱིཏི ཀཏཱཀཏཝསེན ཨཏྟཱནཾ ཨགརཧནྟོ།
920. Kiñca bhiyyo – so evarūpo – pubbāsaveti gāthā. Tattha pubbāsaveti atītarūpādīni ārabbha uppajjamānadhamme kilese. Naveti paccuppannarūpādīni ārabbha uppajjamānadhamme. Na chandagūti chandādivasena na gacchati. Anattagarahīti katākatavasena attānaṃ agarahanto.
༩༢༡. ཨེཝཾ ཨནཏྟགརཧཱི ཙ – ས སབྦདྷམྨེསཱུཏི གཱཐཱ། ཏཏྠ སབྦདྷམྨེསཱུཏི དྭཱསཊྛིདིཊྛིདྷམྨེསུ ‘‘ཡཾ ཀིཉྩི དིཊྛཾ ཝཱ’’ཏི ཨེཝཾཔབྷེདེསུ། པནྣབྷཱརོཏི པཏིཏབྷཱརོ། ན ཀཔྤེཏཱིཏི ན ཀཔྤིཡོ, དུཝིདྷམྤི ཀཔྤཾ ན ཀརོཏཱིཏི ཨཏྠོ། ནཱུཔརཏོཏི པུཐུཛྫནཀལྱཱཎཀསེཀྑཱ ཝིཡ ཨུཔརཏིསམངྒཱིཔི ན ཧོཏི། ན པཏྠིཡོཏི ནིཏྟཎྷོ། ཏཎྷཱ ཧི པཏྠིཡཏཱིཏི པཏྠིཡཱ, ནཱསྶ པཏྠིཡཱཏི ན པཏྠིཡོཏི། སེསཾ ཏཏྠ ཏཏྠ པཱཀཊམེཝཱཏི ན ཝུཏྟཾ། ཨེཝཾ ཨརཧཏྟནིཀཱུཊེན དེསནཾ ནིཊྛཱཔེསི, དེསནཱཔརིཡོསཱནེ པུརཱབྷེདསུཏྟེ ཝུཏྟསདིསོ ཨེཝཱབྷིསམཡོ ཨཧོསཱིཏི།
921. Evaṃ anattagarahī ca – sa sabbadhammesūti gāthā. Tattha sabbadhammesūti dvāsaṭṭhidiṭṭhidhammesu ‘‘yaṃ kiñci diṭṭhaṃ vā’’ti evaṃpabhedesu. Pannabhāroti patitabhāro. Na kappetīti na kappiyo, duvidhampi kappaṃ na karotīti attho. Nūparatoti puthujjanakalyāṇakasekkhā viya uparatisamaṅgīpi na hoti. Na patthiyoti nittaṇho. Taṇhā hi patthiyatīti patthiyā, nāssa patthiyāti na patthiyoti. Sesaṃ tattha tattha pākaṭamevāti na vuttaṃ. Evaṃ arahattanikūṭena desanaṃ niṭṭhāpesi, desanāpariyosāne purābhedasutte vuttasadiso evābhisamayo ahosīti.
པརམཏྠཛོཏིཀཱཡ ཁུདྡཀ-ཨཊྛཀཐཱཡ
Paramatthajotikāya khuddaka-aṭṭhakathāya
སུཏྟནིཔཱཏ-ཨཊྛཀཐཱཡ མཧཱབྱཱུཧསུཏྟཝཎྞནཱ ནིཊྛིཏཱ།
Suttanipāta-aṭṭhakathāya mahābyūhasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / སུཏྟནིཔཱཏཔཱལི༹ • Suttanipātapāḷi / ༡༣. མཧཱབྱཱུཧསུཏྟཾ • 13. Mahābyūhasuttaṃ
