| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
7. махаажад̇д̇аарийсагасуд̇д̇аван̣н̣анаа
7. Mahācattārīsakasuttavaṇṇanā
136. д̣̇осзхи аарагаад̇и арияам̣. д̇знааха ‘‘нид̣̇д̣̇оса’’нд̇и. саа бана нид̣̇д̣̇осад̇аа логуд̇д̇арабхаавзна сависзсаад̇и ааха ‘‘логуд̇д̇ара’’нд̇и. саммаа сунд̣̇аро басад̇т̇о нияяааниго самаад̇хи саммаасамаад̇хийд̇и ааха – ‘‘саммаасамаад̇хинд̇и маг̇г̇асамаад̇хи’’нд̇и. убанисийд̣̇ад̇и зд̇т̇а палам̣ д̇аббадиб̣ад̣̇д̇хавуд̇д̇ид̇ааяаад̇и убанисам̣, гааран̣анд̇и ааха – ‘‘саубанисанд̇и саббажжаяа’’нд̇и. баригарод̇и бариваарзд̇ийд̇и баригкаарод̇и ааха – ‘‘сабаригкааранд̇и сабариваара’’нд̇и.
136. Dosehi ārakāti ariyaṃ. Tenāha ‘‘niddosa’’nti. Sā pana niddosatā lokuttarabhāvena savisesāti āha ‘‘lokuttara’’nti. Sammā sundaro pasattho niyyāniko samādhi sammāsamādhīti āha – ‘‘sammāsamādhinti maggasamādhi’’nti. Upanisīdati ettha phalaṃ tappaṭibaddhavuttitāyāti upanisaṃ, kāraṇanti āha – ‘‘saupanisanti sappaccaya’’nti. Parikaroti parivāretīti parikkhāroti āha – ‘‘saparikkhāranti saparivāra’’nti.
бариваарид̇аад̇и сахаж̇аад̇аад̣̇ибажжаяабхаавзна баривааранд̇зхи вияа убаг̇ад̇аа. бурзжааригаад̇и вудтаанаг̇ааминибхааванаа сахаж̇аад̇аад̣̇ибажжаяавасзна бажжаяад̇д̇аа бурассараа. д̇знааха – ‘‘вибассанаасаммаад̣̇идти жаа’’д̇и. ид̣̇аани д̇аани гижжад̇о д̣̇ассзд̇ум̣, ‘‘вибассанаасаммаад̣̇идтий’’д̇иаад̣̇и вуд̇д̇ам̣. д̇ад̇т̇а баривиймам̣саг̇г̇ахан̣ам̣ д̇ад̇т̇а д̇ад̇т̇а жид̇д̇уббаад̣̇з виймам̣саад̇хибад̇зяязна бавад̇д̇ияаа саммаад̣̇идтияаа буб̣б̣ан̇г̇амабхаавад̣̇ассанад̇т̇ам̣. д̇знасса маг̇г̇асамаад̇хисса наанаакан̣игам̣ буб̣б̣ан̇г̇амабхаавам̣ д̣̇ассзд̇и. виймам̣санабарияосаанзд̇и д̇ат̇аабавад̇д̇аануломан̃аан̣асса осаанз. бхуумилад̣̇д̇хам̣ ваддам̣ самуг̇гхаадаяамаанаад̇и ад̇д̇ано санд̇аанз д̣̇ийгхарад̇д̇ам̣ анусаяид̇ам̣ гилзсаваддам̣ самужчинд̣̇анд̇и. вуубасамаяамаанаад̇и д̇ассзва взважанам̣. вуубасамаяамаанаад̇и ваа д̇ад̇о зва авасидтамби ваддам̣ аббавад̇д̇игаран̣авасзна вуубасамзнд̇и. д̇знзвааха – ‘‘маг̇г̇асаммаад̣̇идти…бз… уббаж̇ж̇ад̇ий’’д̇и. саад̇и саммаад̣̇идти. д̣̇увид̇хаабийд̇и яат̇аавуд̇д̇аа д̣̇увид̇хааби. ид̇ха ад̇хиббзд̇аа вибассанаабан̃н̃аасахид̇ааяа маг̇г̇абан̃н̃ааяа гижжасса д̣̇ассид̇ад̇д̇аа.
Parivāritāti sahajātādipaccayabhāvena parivārantehi viya upagatā. Purecārikāti vuṭṭhānagāminibhāvanā sahajātādipaccayavasena paccayattā purassarā. Tenāha – ‘‘vipassanāsammādiṭṭhi cā’’ti. Idāni tāni kiccato dassetuṃ, ‘‘vipassanāsammādiṭṭhī’’tiādi vuttaṃ. Tattha parivīmaṃsaggahaṇaṃ tattha tattha cittuppāde vīmaṃsādhipateyyena pavattiyā sammādiṭṭhiyā pubbaṅgamabhāvadassanatthaṃ. Tenassa maggasamādhissa nānākhaṇikaṃ pubbaṅgamabhāvaṃ dasseti. Vīmaṃsanapariyosāneti tathāpavattaanulomañāṇassa osāne. Bhūmiladdhaṃ vaṭṭaṃ samugghāṭayamānāti attano santāne dīgharattaṃ anusayitaṃ kilesavaṭṭaṃ samucchindanti. Vūpasamayamānāti tasseva vevacanaṃ. Vūpasamayamānāti vā tato eva avasiṭṭhampi vaṭṭaṃ appavattikaraṇavasena vūpasamenti. Tenevāha – ‘‘maggasammādiṭṭhi…pe… uppajjatī’’ti. Sāti sammādiṭṭhi. Duvidhāpīti yathāvuttā duvidhāpi. Idha adhippetā vipassanāpaññāsahitāya maggapaññāya kiccassa dassitattā.
лагкан̣з бадивиж̇жхамаанз лагкан̣иго д̇хаммо бадивид̣̇д̇хо ход̇ийд̇и ааха – ‘‘мижчаад̣̇идтим̣…бз… аарамман̣ад̇о баж̇аанаад̇ий’’д̇и. вибассанаасаммаад̣̇идтияамби зсзва наяо. гижжад̇од̇и бхааванаагижжад̇о. саммаад̣̇идтияам̣ д̇ад̣̇ад̇хиг̇ад̇аасаммохад̇ааяа асаммохад̇о баж̇аанаад̇и. гижжад̇од̇и бадивзд̇хагижжад̇о. д̇ам̣ бана саб̣б̣ат̇аа асаммуяханамзваад̇и ааха ‘‘асаммохад̇о’’д̇и. звам̣ баж̇аананаад̇и мижчаад̣̇идти мижчаад̣̇идтийд̇и яаат̇аавад̇о аваб̣од̇хо. ассаад̇и д̇ам̣саман̇г̇ино буг̇г̇аласса.
Lakkhaṇe paṭivijjhamāne lakkhaṇiko dhammo paṭividdho hotīti āha – ‘‘micchādiṭṭhiṃ…pe… ārammaṇato pajānātī’’ti. Vipassanāsammādiṭṭhiyampi eseva nayo. Kiccatoti bhāvanākiccato. Sammādiṭṭhiyaṃ tadadhigataasammohatāya asammohato pajānāti. Kiccatoti paṭivedhakiccato. Taṃ pana sabbathā asammuyhanamevāti āha ‘‘asammohato’’ti. Evaṃ pajānanāti micchādiṭṭhi micchādiṭṭhīti yāthāvato avabodho. Assāti taṃsamaṅgino puggalassa.
д̣̇вааяанд̇и -гааро д̣̇ийгхам̣ гад̇ваа вуд̇д̇о. д̇знааха ‘‘д̣̇ваяам̣ вад̣̇аамий’’д̇и. д̣̇вз аваяаваа зд̇ассаад̇и д̣̇ваяам̣. д̇знааха ‘‘д̣̇увид̇хагодтаасам̣ вад̣̇аамий’’д̇и. бун̃н̃асса зго бхааг̇о со зва бун̃н̃абхааг̇иго , га-гаарасса яа-гаарам̣ гад̇ваа ид̇т̇илин̇г̇авасзна ‘‘бун̃н̃абхааг̇ияаа’’д̇и вуд̇д̇ам̣. убад̇хисан̇каад̇ассаад̇и канд̇хабаб̣анд̇хасан̇каад̇асса.
Dvāyanti -kāro dīghaṃ katvā vutto. Tenāha ‘‘dvayaṃ vadāmī’’ti. Dve avayavā etassāti dvayaṃ. Tenāha ‘‘duvidhakoṭṭhāsaṃ vadāmī’’ti. Puññassa eko bhāgo so eva puññabhāgiko , ka-kārassa ya-kāraṃ katvā itthiliṅgavasena ‘‘puññabhāgiyā’’ti vuttaṃ. Upadhisaṅkhātassāti khandhapabandhasaṅkhātassa.
амад̇ад̣̇вааранд̇и арияамаг̇г̇ам̣. бан̃н̃абзд̇ийд̇и нияяаанаад̣̇ибагаарад̇о бан̃н̃абзд̇и. д̇знааха ‘‘вибхаж̇ид̇ваа д̣̇ассзд̇ий’’д̇и. д̇ад̇т̇а саммохасса вид̣̇д̇хам̣санзна асаммохад̇о д̣̇ассзд̇и. д̇асмим̣ ад̇т̇зд̇и амад̇ад̣̇ваарабан̃н̃аабанз ад̇т̇з. б̣ож̇жхан̇г̇аббад̇д̇аад̇и б̣ож̇жхан̇г̇абхааваббад̇д̇аа. маг̇г̇абхаавзна нияяаанабхаавзна бавад̇д̇ияаа маг̇г̇абан̃н̃ааяа адтаннамби саад̇хааран̣ад̇д̇аа самуд̣̇ааяасса жа аваяаво ан̇г̇анд̇и гад̇ваа сзсад̇хаммз ан̇г̇игабхаавзна д̣̇ассзнд̇о ‘‘арияамаг̇г̇асса ан̇г̇а’’нд̇и ааха. со бхигкууд̇и мижчаад̣̇идтим̣ ‘‘мижчаад̣̇идтий’’д̇и саммаад̣̇идтим̣ ‘‘саммаад̣̇идтий’’д̇и ж̇аананд̇о бхигку. баж̇аханад̇т̇ааяаад̇и самужчзд̣̇авасзна баж̇аханааяа. бадилаабхад̇т̇ааяаад̇и маг̇г̇асаммаад̣̇идтияаа ад̇хиг̇амааяа. гусалавааяаамод̇и вибассанаасамбаяуд̇д̇ова госалласамбхууд̇о вааяаамо. сарад̇ийд̇и сад̇о, д̇ам̣ банасса саран̣ам̣ сад̇исаман̇г̇ид̇ааяаад̇и ааха ‘‘сад̇ияаа саманнааг̇ад̇о’’д̇и. гааман̃жзд̇т̇а вибассанаасаммаад̣̇идтим̣ яат̇аабхууд̇аа саммаавааяаамасад̇ияо сахаж̇аад̇аа жа бурзж̇аад̇аа жа худ̇ваа бариваарзнд̇и, ‘‘ид̇ияимз д̇аяо д̇хаммаа саммаад̣̇идтим̣ анубарид̇хааванд̇и анубаривад̇д̇анд̇ий’’д̇и бана важанад̇о, ‘‘зд̇т̇а хий’’д̇иаад̣̇инаа маг̇г̇асаммаад̣̇идтияаа зва сзсад̇хаммаанам̣ яат̇аарахам̣ сахажаран̣абхаавзна баривааран̣ам̣ яож̇ид̇ам̣. саммаасан̇габбаад̣̇ийнанд̇и аад̣̇и-сад̣̇д̣̇зна саммааваажаагамманд̇ааж̇ийваанам̣ г̇ахан̣ам̣ ид̇арзсам̣ бариваарабхаавзна г̇ахид̇ад̇д̇аа . на хи саггаа д̇з зва бариваарз бариваараванд̇з жа гад̇ваа вад̇д̇ум̣ сан̇гарад̇о саммохаж̇ананад̇о жа. д̇аяод̇и саммаад̣̇идтивааяаамасад̇ияо сахаж̇аад̇абариваараава хонд̇и маг̇г̇агкан̣игаанам̣ д̇зсам̣ ад̇хиббзд̇ад̇д̇аа вибассанаакан̣авирад̇ийнам̣ асамбхавад̇о.
Amatadvāranti ariyamaggaṃ. Paññapetīti niyyānādipakārato paññapeti. Tenāha ‘‘vibhajitvā dassetī’’ti. Tattha sammohassa viddhaṃsanena asammohato dasseti. Tasmiṃ attheti amatadvārapaññāpane atthe. Bojjhaṅgappattāti bojjhaṅgabhāvappattā. Maggabhāvena niyyānabhāvena pavattiyā maggapaññāya aṭṭhannampi sādhāraṇattā samudāyassa ca avayavo aṅganti katvā sesadhamme aṅgikabhāvena dassento ‘‘ariyamaggassa aṅga’’nti āha. So bhikkhūti micchādiṭṭhiṃ ‘‘micchādiṭṭhī’’ti sammādiṭṭhiṃ ‘‘sammādiṭṭhī’’ti jānanto bhikkhu. Pajahanatthāyāti samucchedavasena pajahanāya. Paṭilābhatthāyāti maggasammādiṭṭhiyā adhigamāya. Kusalavāyāmoti vipassanāsampayuttova kosallasambhūto vāyāmo. Saratīti sato, taṃ panassa saraṇaṃ satisamaṅgitāyāti āha ‘‘satiyā samannāgato’’ti. Kāmañcettha vipassanāsammādiṭṭhiṃ yathābhūtā sammāvāyāmasatiyo sahajātā ca purejātā ca hutvā parivārenti, ‘‘itiyime tayo dhammā sammādiṭṭhiṃ anuparidhāvanti anuparivattantī’’ti pana vacanato, ‘‘ettha hī’’tiādinā maggasammādiṭṭhiyā eva sesadhammānaṃ yathārahaṃ sahacaraṇabhāvena parivāraṇaṃ yojitaṃ. Sammāsaṅkappādīnanti ādi-saddena sammāvācākammantājīvānaṃ gahaṇaṃ itaresaṃ parivārabhāvena gahitattā . Na hi sakkā te eva parivāre parivāravante ca katvā vattuṃ saṅkarato sammohajananato ca. Tayoti sammādiṭṭhivāyāmasatiyo sahajātaparivārāva honti maggakkhaṇikānaṃ tesaṃ adhippetattā vipassanākhaṇaviratīnaṃ asambhavato.
137. д̇агганавасзна логасид̣̇д̇хзнаад̇и ад̇хиббааяо. ‘‘зван̃жзван̃жа бхавид̇аб̣б̣а’’нд̇и вивид̇хам̣ д̇агганам̣ гуубз вияа уд̣̇агасса аарамман̣асса аагад̣дханам̣ вид̇агганам̣ вид̇агго. сан̇габбанавасзнаад̇и д̇ам̣ д̇ам̣ аарамман̣ам̣ г̇ахзд̇ваа габбанавасзна. д̇агганам̣ габбананд̇и жа ад̇ам̣сахаж̇аад̇аанамзваад̇и д̣̇адтаб̣б̣ам̣. згаг̇г̇од̇и иминаа самаад̇хинаа лад̣̇д̇хубагаарассзва вид̇аггасса аббанаабарияааяо ход̇ийд̇и д̣̇ассзд̇и. висзсзна ваа аббанаа вид̇аггасса васзна жид̇д̇ам̣ аарамман̣ам̣ абхиробзд̇и, вид̇аггз асад̇и гат̇анд̇и ааха ‘‘вид̇аггз банаа’’д̇иаад̣̇и. ад̇д̇аноязва д̇хаммад̇ааяа жид̇д̇ам̣ аарамман̣ам̣ абхирухад̇ийд̇и, зд̇зна аарамман̣ад̇хаммаанам̣ г̇ахан̣ам̣ наама сабхаавасид̣̇д̇хам̣, на д̇хамманд̇арамабзгкад̇и, вид̇агго бана бавад̇д̇амаано аарамман̣аабхиниробанавасзнзва бавад̇д̇ад̇ийд̇и д̣̇ассзд̇и. звам̣ санд̇зби сабхааваавид̇аггажид̇д̇уббаад̣̇ад̇о савид̇аггажид̇д̇уббаад̣̇асса аарамман̣аг̇г̇ахан̣ависзсо вид̇аггзна ж̇аад̇од̇и гад̇ваа вид̇агго жид̇д̇асса аарамман̣аг̇г̇ахан̣з висзсабажжаяод̇и баагадояамад̇т̇о. абарз бана бхан̣анд̇и – яат̇аа гожи рааж̇аваллабхам̣, д̇ам̣самб̣анд̇хийнам̣ мид̇д̇ам̣ ваа ниссааяа рааж̇аг̇зхам̣ аарохад̇и анубависад̇и, звам̣ вид̇аггам̣ ниссааяа жид̇д̇ам̣ аарамман̣ам̣ аарохад̇и вид̇аггасса аарамман̣аабхиниробанасабхаавад̇д̇аа, ан̃н̃зсам̣ д̇хаммаанан̃жа авид̇аггасабхаавад̇о. д̇знааха бхаг̇аваа – ‘‘жзд̇асо абхиниробанаа’’д̇и (д̇ха. са. 7).
137.Takkanavasena lokasiddhenāti adhippāyo. ‘‘Evañcevañca bhavitabba’’nti vividhaṃ takkanaṃ kūpe viya udakassa ārammaṇassa ākaḍḍhanaṃ vitakkanaṃ vitakko. Saṅkappanavasenāti taṃ taṃ ārammaṇaṃ gahetvā kappanavasena. Takkanaṃ kappananti ca ataṃsahajātānamevāti daṭṭhabbaṃ. Ekaggoti iminā samādhinā laddhupakārasseva vitakkassa appanāpariyāyo hotīti dasseti. Visesena vā appanā vitakkassa vasena cittaṃ ārammaṇaṃ abhiropeti, vitakke asati kathanti āha ‘‘vitakke panā’’tiādi. Attanoyeva dhammatāya cittaṃ ārammaṇaṃ abhiruhatīti, etena ārammaṇadhammānaṃ gahaṇaṃ nāma sabhāvasiddhaṃ, na dhammantaramapekkhati, vitakko pana pavattamāno ārammaṇābhiniropanavaseneva pavattatīti dasseti. Evaṃ santepi sabhāvāvitakkacittuppādato savitakkacittuppādassa ārammaṇaggahaṇaviseso vitakkena jātoti katvā vitakko cittassa ārammaṇaggahaṇe visesapaccayoti pākaṭoyamattho. Apare pana bhaṇanti – yathā koci rājavallabhaṃ, taṃsambandhīnaṃ mittaṃ vā nissāya rājagehaṃ ārohati anupavisati, evaṃ vitakkaṃ nissāya cittaṃ ārammaṇaṃ ārohati vitakkassa ārammaṇābhiniropanasabhāvattā, aññesaṃ dhammānañca avitakkasabhāvato. Tenāha bhagavā – ‘‘cetaso abhiniropanā’’ti (dha. sa. 7).
яад̣̇и звам̣ гат̇ам̣ авид̇аггажид̇д̇ам̣ аарамман̣ам̣ аарохад̇ийд̇и? вид̇аггаб̣алзнзва. яат̇аа хи со бурисо барижаязна д̇зна винааби нираасан̇го рааж̇аг̇зхам̣ бависад̇и, звам̣ барижаязна вид̇аггзна винааби авид̇аггам̣ жид̇д̇ам̣ аарамман̣ам̣ аарохад̇и. барижаязнаад̇и жа санд̇аанз бавад̇д̇авид̇аггабхааванаасан̇каад̇зна барижаязна. вид̇аггасса хи санд̇аанз абхин̣хам̣ бавад̇д̇асса васзна жид̇д̇асса аарамман̣аабхируханам̣ жирабарижид̇ам̣; д̇зна д̇ам̣ гад̣̇аажи вид̇аггзна винааби д̇ад̇т̇а бавад̇д̇ад̇зва; яат̇аа н̃аан̣асахаг̇ад̇ам̣ жид̇д̇ам̣ саммасанавасзна жирабарижид̇ам̣ гад̣̇аажи н̃аан̣арахид̇амби саммасанавасзна бавад̇д̇ад̇и; яат̇аа ваа гилзсасахид̇ам̣ худ̇ваа бавад̇д̇ам̣ саб̣б̣асо гилзсарахид̇амби барижаязна гилзсаваасанаавасзна бавад̇д̇ад̇и, звам̣ самбад̣̇амид̣̇ам̣ д̣̇адтаб̣б̣ам̣.
Yadi evaṃ kathaṃ avitakkacittaṃ ārammaṇaṃ ārohatīti? Vitakkabaleneva. Yathā hi so puriso paricayena tena vināpi nirāsaṅko rājagehaṃ pavisati, evaṃ paricayena vitakkena vināpi avitakkaṃ cittaṃ ārammaṇaṃ ārohati. Paricayenāti ca santāne pavattavitakkabhāvanāsaṅkhātena paricayena. Vitakkassa hi santāne abhiṇhaṃ pavattassa vasena cittassa ārammaṇābhiruhanaṃ ciraparicitaṃ; tena taṃ kadāci vitakkena vināpi tattha pavattateva; yathā ñāṇasahagataṃ cittaṃ sammasanavasena ciraparicitaṃ kadāci ñāṇarahitampi sammasanavasena pavattati; yathā vā kilesasahitaṃ hutvā pavattaṃ sabbaso kilesarahitampi paricayena kilesavāsanāvasena pavattati, evaṃ sampadamidaṃ daṭṭhabbaṃ.
ваажам̣ сан̇карод̇ийд̇и ваажам̣ уббаад̣̇зд̇и, важийгхосуббад̇д̇ияаа висзсабажжаяо ход̇ийд̇и ад̇т̇о. логияавид̇агго д̣̇вад̇д̇им̣сажид̇д̇асахаг̇ад̇о ваажам̣ сан̇карод̇и важийвин̃н̃ад̇д̇иж̇ананад̇о. важийсан̇каарод̇взва банасса наамам̣ ход̇и рул̣хид̇о, д̇ам̣самад̇т̇ад̇аанирод̇хад̇о ваа самбхавад̇о бана сан̇каарод̇и. ‘‘логуд̇д̇арасаммаасан̇габбам̣ бариваарзнд̇ий’’д̇и вад̇ваа д̇ивид̇хз саммаасан̇габбз гад̣̇аажи гад̇амам̣ бариваарзнд̇ийд̇и? жод̣̇анам̣ санд̇хааяааха ‘‘зд̇т̇аа’’д̇иаад̣̇и. наанаажид̇д̇зсу лаб̣бханд̇и наанаасаманнаахаарахзд̇угад̇д̇аа, буб̣б̣абхааг̇зязва жа д̇з уббаж̇ж̇анд̇ийд̇и. д̇ийн̣и наамаани лабхад̇и д̇ивид̇хассаби бадибагкасса самужчинд̣̇анзна саад̇исаяам̣ д̇ин̣н̣амби гижжагаран̣ад̇о. зса наяо саммааваажаад̣̇ийсуби.
Vācaṃ saṅkharotīti vācaṃ uppādeti, vacīghosuppattiyā visesapaccayo hotīti attho. Lokiyavitakko dvattiṃsacittasahagato vācaṃ saṅkharoti vacīviññattijananato. Vacīsaṅkhārotveva panassa nāmaṃ hoti ruḷhito, taṃsamatthatānirodhato vā sambhavato pana saṅkhāroti. ‘‘Lokuttarasammāsaṅkappaṃ parivārentī’’ti vatvā tividhe sammāsaṅkappe kadāci katamaṃ parivārentīti? Codanaṃ sandhāyāha ‘‘etthā’’tiādi. Nānācittesu labbhanti nānāsamannāhārahetukattā, pubbabhāgeyeva ca te uppajjantīti. Tīṇi nāmāni labhati tividhassapi paṭipakkhassa samucchindanena sātisayaṃ tiṇṇampi kiccakaraṇato. Esa nayo sammāvācādīsupi.
138. вирамад̇и зд̇ааяаад̇и взраман̣ий вирад̇и вужжад̇и. саа мусааваад̣̇ад̇о вираман̣асса гааран̣абхаавад̇о жзд̇анааби взрасса ман̣анад̇о винаасанад̇о вирад̇ибийд̇и ааха – ‘‘вирад̇иби жзд̇анааби ваддад̇ий’’д̇и. аарагаа рамад̇ийд̇и самужчиннзхи д̣̇уурад̇о самуссаарзд̇и. винаа д̇зхи рамад̇ийд̇и ажжанд̇амзва д̇зхи винаа бхавад̇и. д̇ад̇о д̇ад̇од̇и д̣̇идтз ад̣̇идтаваад̣̇аад̣̇ид̇о мусааваад̣̇аа. висзсад̇о ануббад̇д̇ид̇хаммад̇д̇аа бадинивад̇д̇аа худ̇ваа.
138. Viramati etāyāti veramaṇī virati vuccati. Sā musāvādato viramaṇassa kāraṇabhāvato cetanāpi verassa maṇanato vināsanato viratipīti āha – ‘‘viratipi cetanāpi vaṭṭatī’’ti. Ārakā ramatīti samucchinnehi dūrato samussāreti. Vinā tehi ramatīti accantameva tehi vinā bhavati. Tato tatoti diṭṭhe adiṭṭhavādādito musāvādā. Visesato anuppattidhammattā paṭinivattā hutvā.
140. д̇ивид̇хзна гуханавад̇т̇унаад̇и бажжаяабадисзвана-сааманд̇аж̇аббана-ирияаабат̇абавад̇д̇анасан̇каад̇зна баабижчад̇аа ниб̣б̣ад̇д̇зна д̇ивид̇хзна гуханавад̇т̇унаа. зд̇ааяа гуханааяа гаран̣абхууд̇ааяа бажжаяуббаад̣̇анад̇т̇ам̣ нимид̇д̇ам̣ сийлам̣ зд̇зсанд̇и яож̇анаа. ад̇д̇ависаяалаабхахзд̇у аггосанакум̣санавамбханаад̣̇ивасзна бисанам̣ гхадданам̣ вихзтанам̣ ниббзсо. ид̇о лад̣̇д̇хам̣ ан̃н̃асса, д̇ад̇о лад̣̇д̇хам̣ барасса д̣̇ад̇ваа звам̣ лаабхзна лаабхам̣ ниж̇иг̇ийм̣сад̇ийд̇и лаабхзна лаабхам̣ ниж̇иг̇ийм̣санаа. баал̣ияам̣ ааг̇ад̇о гуханаад̣̇ивасзна мижчааааж̇ийво. го бана сод̇и ааха ‘‘ааж̇ийвахзд̇уу’’д̇иаад̣̇и. д̇аасам̣язваад̇и авад̇хааран̣ам̣, ‘‘ааж̇ийво губбамаано гааяаважийд̣̇ваарзсу зва губбад̇ий’’д̇и гад̇ваа вуд̇д̇ам̣.
140.Tividhena kuhanavatthunāti paccayapaṭisevana-sāmantajappana-iriyāpathapavattanasaṅkhātena pāpicchatā nibbattena tividhena kuhanavatthunā. Etāya kuhanāya karaṇabhūtāya paccayuppādanatthaṃ nimittaṃ sīlaṃ etesanti yojanā. Attavisayalābhahetu akkosanakhuṃsanavambhanādivasena pisanaṃ ghaṭṭanaṃ viheṭhanaṃ nippeso. Ito laddhaṃ aññassa, tato laddhaṃ parassa datvā evaṃ lābhena lābhaṃ nijigīṃsatīti lābhena lābhaṃ nijigīṃsanā. Pāḷiyaṃ āgato kuhanādivasena micchāājīvo. Ko pana soti āha ‘‘ājīvahetū’’tiādi. Tāsaṃyevāti avadhāraṇaṃ, ‘‘ājīvo kuppamāno kāyavacīdvāresu eva kuppatī’’ti katvā vuttaṃ.
141. саммаа басад̇т̇аа собханаа нияяаанигаа д̣̇идти зд̇ассаад̇и саммаад̣̇идти, буг̇г̇ало. д̇асса бана яасмаа саммаад̣̇идти сажжаабхисамаяасса ниб̣б̣аанасажчигирияааяа авассаяо, д̇асмаа вуд̇д̇ам̣ – ‘‘маг̇г̇асаммаад̣̇идтияам̣ тид̇ассаа’’д̇и. баход̇и бхавад̇и д̇ааяа сахзва уббаж̇ж̇ад̇и бавад̇д̇ад̇и. бажжавзгкан̣ан̃аан̣ам̣ яаат̇аавад̇о ж̇аананадтзна саммаан̃аан̣анд̇и ид̇хаад̇хиббзд̇ам̣, д̇ан̃жа ко маг̇г̇асамаад̇химхи тид̇з зва ход̇ийд̇и имамад̇т̇ам̣ д̣̇ассзд̇ум̣ ааха – ‘‘маг̇г̇асаммаасамаад̇химхи…бз… саммаан̃аан̣ам̣ баход̇ий’’д̇иаад̣̇и. иминаа гим̣ д̣̇ассзд̇ийд̇и? яат̇аа маг̇г̇асаммаад̣̇идтияам̣ тид̇о буг̇г̇ало, ‘‘саммаад̣̇идтий’’д̇и вуд̇д̇о, звам̣ маг̇г̇апалабажжавзгкан̣ан̃аан̣з тид̇о, ‘‘саммаан̃аан̣о’’д̇и вуд̇д̇о, д̇асса жа маг̇г̇апаласаммаасамаад̇хибавад̇д̇ияаа баход̇и саммаан̃аан̣асса саммаавимуд̇д̇ияаа баход̇ийд̇и имамад̇т̇ам̣ д̣̇ассзд̇и. паласамаад̇хи д̇аава бавад̇д̇ад̇у, маг̇г̇асамаад̇хи бана гат̇анд̇и? д̇амби агуббабхаавад̇ааяа ажжанд̇асамаад̇хибхаавад̇о гижжанибпад̇д̇ияаа бавад̇д̇ад̇зваад̇и вад̇д̇аб̣б̣ад̇ам̣ лабхад̇и. табзд̇ваа адтапалан̇г̇аанийд̇и палабхууд̇аани саммаад̣̇идтиаад̣̇ийни адтан̇г̇аани, ‘‘саммаад̣̇идтисса саммаасан̇габбо баход̇ий’’д̇иаад̣̇инаа висум̣ г̇ахид̇ад̇д̇аа табзд̇ваа. саммаан̃аан̣ам̣ бажжавзгкан̣ам̣ гад̇ваад̇и бажжавзгкан̣ан̃аан̣ам̣ саммаан̃аан̣ам̣ гад̇ваа. палам̣ гаад̇унд̇и палад̇хаммасахажарид̇ад̇ааяа вибаагасабхаавад̇ааяа жа ‘‘пала’’нд̇и лад̣̇д̇ханаамз паласамбаяуд̇д̇ад̇хаммз саммаавимуд̇д̇им̣ гаад̇ум̣ ваддад̇ийд̇и вуд̇д̇ам̣. д̇ат̇аа жа вуд̇д̇ам̣ саллзкасуд̇д̇аван̣н̣анааяам̣ (ма. ни. адта. 1.83) ‘‘паласамбаяуд̇д̇аани бана саммаад̣̇идтиаад̣̇ийни адтан̇г̇аани табзд̇ваа сзсад̇хаммаа саммаавимуд̇д̇ийд̇и взд̣̇ид̇аб̣б̣аа’’д̇и.
141. Sammā pasatthā sobhanā niyyānikā diṭṭhi etassāti sammādiṭṭhi, puggalo. Tassa pana yasmā sammādiṭṭhi saccābhisamayassa nibbānasacchikiriyāya avassayo, tasmā vuttaṃ – ‘‘maggasammādiṭṭhiyaṃ ṭhitassā’’ti. Pahoti bhavati tāya saheva uppajjati pavattati. Paccavekkhaṇañāṇaṃ yāthāvato jānanaṭṭhena sammāñāṇanti idhādhippetaṃ, tañca kho maggasamādhimhi ṭhite eva hotīti imamatthaṃ dassetuṃ āha – ‘‘maggasammāsamādhimhi…pe… sammāñāṇaṃ pahotī’’tiādi. Iminā kiṃ dassetīti? Yathā maggasammādiṭṭhiyaṃ ṭhito puggalo, ‘‘sammādiṭṭhī’’ti vutto, evaṃ maggaphalapaccavekkhaṇañāṇe ṭhito, ‘‘sammāñāṇo’’ti vutto, tassa ca maggaphalasammāsamādhipavattiyā pahoti sammāñāṇassa sammāvimuttiyā pahotīti imamatthaṃ dasseti. Phalasamādhi tāva pavattatu, maggasamādhi pana kathanti? Tampi akuppabhāvatāya accantasamādhibhāvato kiccanipphattiyā pavattatevāti vattabbataṃ labhati. Ṭhapetvā aṭṭhaphalaṅgānīti phalabhūtāni sammādiṭṭhiādīni aṭṭhaṅgāni, ‘‘sammādiṭṭhissa sammāsaṅkappo pahotī’’tiādinā visuṃ gahitattā ṭhapetvā. Sammāñāṇaṃ paccavekkhaṇaṃ katvāti paccavekkhaṇañāṇaṃ sammāñāṇaṃ katvā. Phalaṃ kātunti phaladhammasahacaritatāya vipākasabhāvatāya ca ‘‘phala’’nti laddhanāme phalasampayuttadhamme sammāvimuttiṃ kātuṃ vaṭṭatīti vuttaṃ. Tathā ca vuttaṃ sallekhasuttavaṇṇanāyaṃ (ma. ni. aṭṭha. 1.83) ‘‘phalasampayuttāni pana sammādiṭṭhiādīni aṭṭhaṅgāni ṭhapetvā sesadhammā sammāvimuttīti veditabbā’’ti.
142. ниж̇ж̇ин̣н̣аад̇и ниж̇ж̇ийрид̇аа, вид̣̇д̇хасд̇аа винаасид̇аад̇и ад̇т̇о. палам̣ гат̇ид̇анд̇и ‘‘саммаад̣̇идтисса, бхигкавз, мижчаад̣̇идти ниж̇ж̇ин̣н̣аа ход̇ий’’д̇и иминаа ваарзна сааман̃н̃апалам̣ гат̇ид̇анд̇и вад̣̇анд̇и, ниж̇ж̇ийран̣ам̣ бадиббассамбхананд̇и ад̇хиббааяо. ниж̇ж̇ийран̣ам̣ бана самужчинд̣̇ананд̇и гад̇ваа, маж̇жхимабхаан̣агаа…бз… маг̇г̇о гат̇ид̇од̇и вад̣̇анд̇и. д̣̇ассанадтзнаад̇и барин̃н̃аабхисамаяаад̣̇ивасзна жад̇уннам̣ сажжаанам̣ бажжагкад̇о д̣̇ассанадтзна. вид̣̇ид̇агаран̣адтзнаад̇и бажжагкзна яат̇аад̣̇идтаанам̣ маг̇г̇апалаанам̣ баагадагаран̣адтзна. д̇ад̣̇ад̇химуд̇д̇адтзнаад̇и д̇асмим̣ яат̇аасажчигад̇з ниб̣б̣аанз ад̇химужжанабхаавзна.
142.Nijjiṇṇāti nijjīritā, viddhastā vināsitāti attho. Phalaṃ kathitanti ‘‘sammādiṭṭhissa, bhikkhave, micchādiṭṭhi nijjiṇṇā hotī’’ti iminā vārena sāmaññaphalaṃ kathitanti vadanti, nijjīraṇaṃ paṭippassambhananti adhippāyo. Nijjīraṇaṃ pana samucchindananti katvā, majjhimabhāṇakā…pe… maggo kathitoti vadanti. Dassanaṭṭhenāti pariññābhisamayādivasena catunnaṃ saccānaṃ paccakkhato dassanaṭṭhena. Viditakaraṇaṭṭhenāti paccakkhena yathādiṭṭhānaṃ maggaphalānaṃ pākaṭakaraṇaṭṭhena. Tadadhimuttaṭṭhenāti tasmiṃ yathāsacchikate nibbāne adhimuccanabhāvena.
гусалабагкаад̇и анаваж̇ж̇агодтаасаа. махаавибаагад̣̇аанзнаад̇и махад̇о вибуласса логуд̇д̇арасса сукавибаагасса жзва гааяигаад̣̇ид̣̇угкавибаагасса жа д̣̇аанзна.
Kusalapakkhāti anavajjakoṭṭhāsā. Mahāvipākadānenāti mahato vipulassa lokuttarassa sukhavipākassa ceva kāyikādidukkhavipākassa ca dānena.
яат̇аа махаавибаагасса д̣̇аанзна махаажад̇д̇аарийсагам̣, д̇ат̇аа б̣ахуд̇ааяаби махаажад̇д̇аарийсагод̇и д̣̇ассзд̇ум̣, ‘‘имасмин̃жа бана суд̇д̇з бан̃жа саммаад̣̇идтияо гат̇ид̇аа’’д̇иаад̣̇и вуд̇д̇ам̣. б̣ахуад̇т̇оби хи махаа-сад̣̇д̣̇о ход̇и ‘‘махааж̇ано’’д̇иаад̣̇ийсу (ма. ни. 2.65). зд̇т̇а жа ‘‘над̇т̇и д̣̇инна’’нд̇иаад̣̇инаа вад̇т̇убхзд̣̇зна д̣̇аса мижчаад̣̇идтид̇хаммаа гат̇ид̇аа, вад̇т̇убхзд̣̇знзва, ‘‘ад̇т̇и д̣̇инна’’нд̇иаад̣̇инаа д̣̇аса саммаад̣̇идтид̇хаммаад̇и вийсад̇и ход̇и. яат̇аа ‘‘саммаад̣̇идтисса, бхигкавз, саммаасан̇габбо баход̇ий’’д̇иаад̣̇инаа маг̇г̇авасзна д̣̇аса саммад̇д̇ад̇хаммаа, д̇аббадибагкабхууд̇аа ‘‘мижчаад̣̇идтисса мижчаасан̇габбо баход̇ий’’д̇иаад̣̇инаа ад̇т̇ад̇о д̣̇аса мижчад̇д̇ад̇хаммаад̇и вийсад̇и, д̇ат̇аа палавасзна д̇зсу звам̣ вийсад̇и. гат̇ам̣ ваарзби саммаад̣̇идтиаад̣̇аяо д̣̇асаад̇и вийсад̇и? звамзд̇з д̣̇вз жад̇д̇аарийсагаани буримзна сад̣̇д̇хим̣ д̇аяо жад̇д̇аарийсагаа вибхаавид̇аад̇и взд̣̇ид̇аб̣б̣аа.
Yathā mahāvipākassa dānena mahācattārīsakaṃ, tathā bahutāyapi mahācattārīsakoti dassetuṃ, ‘‘imasmiñca pana sutte pañca sammādiṭṭhiyo kathitā’’tiādi vuttaṃ. Bahuatthopi hi mahā-saddo hoti ‘‘mahājano’’tiādīsu (ma. ni. 2.65). Ettha ca ‘‘natthi dinna’’ntiādinā vatthubhedena dasa micchādiṭṭhidhammā kathitā, vatthubhedeneva, ‘‘atthi dinna’’ntiādinā dasa sammādiṭṭhidhammāti vīsati hoti. Yathā ‘‘sammādiṭṭhissa, bhikkhave, sammāsaṅkappo pahotī’’tiādinā maggavasena dasa sammattadhammā, tappaṭipakkhabhūtā ‘‘micchādiṭṭhissa micchāsaṅkappo pahotī’’tiādinā atthato dasa micchattadhammāti vīsati, tathā phalavasena tesu evaṃ vīsati. Kathaṃ vārepi sammādiṭṭhiādayo dasāti vīsati? Evamete dve cattārīsakāni purimena saddhiṃ tayo cattārīsakā vibhāvitāti veditabbā.
143. басам̣сияасса уж̇увибажжанийгам̣ нинд̣̇ияам̣ басам̣санд̇оби ад̇т̇ад̇о басам̣сияам̣ нинд̣̇анд̇о наама ход̇и. басам̣сияасса г̇ун̣абарид̇хам̣санамукзнзва хи нинд̣̇ияасса басам̣сааяа бавад̇д̇анад̇од̇и ааха – ‘‘мижчаад̣̇идтинаамааяам̣ собханаад̇и вад̣̇анд̇оби саммаад̣̇идтим̣ г̇арахад̇и наамаа’’д̇иаад̣̇и. звамаад̣̇ийд̇и аад̣̇исад̣̇д̣̇зна ‘‘над̇т̇и хзд̇у над̇т̇и бажжаяо сад̇д̇аанам̣ сам̣гилзсааяаа’’д̇и (д̣̇ий. ни. 1.168; ма. ни. 2.227) звамаад̣̇им̣ сан̇г̇ан̣хаад̇и; д̇асмаа звам̣ваад̣̇инод̇и звам̣ хзд̇у бадигкзбаваад̣̇инод̇и ад̇т̇о. огганд̇анияаамаад̇и ог̇аал̣хамижчад̇д̇анияаамаа. зваруубам̣ лад̣̇д̇хим̣ г̇ахзд̇ваад̇иаад̣̇ийсу яам̣ вад̇д̇аб̣б̣ам̣, д̇ам̣ жуул̣абун̣н̣амасуд̇д̇аван̣н̣анааяам̣ вуд̇д̇анаяамзва д̇асмаа д̇ад̇т̇а вуд̇д̇анаязнзва взд̣̇ид̇аб̣б̣ам̣. зд̣̇исо хи ‘‘б̣уд̣̇д̇хаанамби ад̇згижчо’’д̇иаад̣̇и вуд̇д̇асад̣̇исо.
143. Pasaṃsiyassa ujuvipaccanīkaṃ nindiyaṃ pasaṃsantopi atthato pasaṃsiyaṃ nindanto nāma hoti. Pasaṃsiyassa guṇaparidhaṃsanamukheneva hi nindiyassa pasaṃsāya pavattanatoti āha – ‘‘micchādiṭṭhināmāyaṃ sobhanāti vadantopi sammādiṭṭhiṃ garahati nāmā’’tiādi. Evamādīti ādisaddena ‘‘natthi hetu natthi paccayo sattānaṃ saṃkilesāyā’’ti (dī. ni. 1.168; ma. ni. 2.227) evamādiṃ saṅgaṇhāti; tasmā evaṃvādinoti evaṃ hetu paṭikkhepavādinoti attho. Okkantaniyāmāti ogāḷhamicchattaniyāmā. Evarūpaṃ laddhiṃ gahetvātiādīsu yaṃ vattabbaṃ, taṃ cūḷapuṇṇamasuttavaṇṇanāyaṃ vuttanayameva tasmā tattha vuttanayeneva veditabbaṃ. Ediso hi ‘‘buddhānampi atekiccho’’tiādi vuttasadiso.
ад̇д̇ано нинд̣̇аабхаязнаад̇и ‘‘саммаад̣̇идтин̃жа наамзд̇з г̇араханд̇ий’’аад̣̇инаа убари барзхи вад̇д̇аб̣б̣анинд̣̇аабхаязна. гхадданабхаязнаад̇и д̇ат̇аа барзсам̣ аасаад̣̇анаабхаязна. сахад̇хаммзна барзна ад̇д̇ано убари гаад̇аб̣б̣аниг̇г̇ахо убаарамбхо, г̇арахад̇о барид̇д̇аасо убаарамбхабхаяам̣, д̇ам̣ бана ад̇т̇ад̇о убаваад̣̇абхаяам̣ ход̇ийд̇и ааха ‘‘убаваад̣̇абхаязнаа’’д̇и. сзсам̣ сувин̃н̃зяяамзва.
Attano nindābhayenāti ‘‘sammādiṭṭhiñca nāmete garahantī’’ādinā upari parehi vattabbanindābhayena. Ghaṭṭanabhayenāti tathā paresaṃ āsādanābhayena. Sahadhammena parena attano upari kātabbaniggaho upārambho, garahato parittāso upārambhabhayaṃ, taṃ pana atthato upavādabhayaṃ hotīti āha ‘‘upavādabhayenā’’ti. Sesaṃ suviññeyyameva.
махаажад̇д̇аарийсагасуд̇д̇аван̣н̣анааяа лийнад̇т̇аббагаасанаа самад̇д̇аа.
Mahācattārīsakasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 7. махаажад̇д̇аарийсагасуд̇д̇ам̣ • 7. Mahācattārīsakasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 7. махаажад̇д̇аарийсагасуд̇д̇аван̣н̣анаа • 7. Mahācattārīsakasuttavaṇṇanā
