| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૧૧. મહાચોરસુત્તવણ્ણના
11. Mahācorasuttavaṇṇanā
૫૧. એકાદસમે મહાચોરોતિ મહન્તો બલવચોરો. સન્ધિન્તિ ઘરસન્ધિં. નિલ્લોપન્તિ મહાવિલોપં. એકાગારિકન્તિ એકમેવ ગેહં પરિવારેત્વા વિલુમ્પનં. પરિપન્થેપિ તિટ્ઠતીતિ પન્થદૂહનકમ્મં કરોતિ. નદીવિદુગ્ગન્તિ નદીનં દુગ્ગમટ્ઠાનં અન્તરદીપકં, યત્થ સક્કા હોતિ દ્વીહિપિ તીહિપિ જઙ્ઘસહસ્સેહિ સદ્ધિં નિલીયિતું. પબ્બતવિસમન્તિ પબ્બતાનં વિસમટ્ઠાનં પબ્બતન્તરં, યત્થ સક્કા હોતિ સત્તહિ વા અટ્ઠહિ વા જઙ્ઘસહસ્સેહિ સદ્ધિં નિલીયિતું. તિણગહનન્તિ તિણેન વડ્ઢિત્વા સઞ્છન્નં દ્વત્તિયોજનટ્ઠાનં. રોધન્તિ ઘનં અઞ્ઞમઞ્ઞં સંસટ્ઠસાખં એકાબદ્ધં મહાવનસણ્ડં. પરિયોધાય અત્થં ભણિસ્સન્તીતિ પરિયોદહિત્વા તં તં કારણં પક્ખિપિત્વા અત્થં કથયિસ્સન્તિ. ત્યાસ્સાતિ તે અસ્સ. પરિયોધાય અત્થં ભણન્તીતિ કિસ્મિઞ્ચિ કિઞ્ચિ વત્તું આરદ્ધેયેવ ‘‘મા એવં અવચુત્થ, મયં એતં કુલપરમ્પરાય જાનામ, ન એસ એવરૂપં કરિસ્સતી’’તિ તં તં કારણં પક્ખિપિત્વા મહન્તમ્પિ દોસં હરન્તા અત્થં ભણન્તિ. અથ વા પરિયોધાયાતિ પટિચ્છાદેત્વાતિપિ અત્થો. તે હિ તસ્સપિ દોસં પટિચ્છાદેત્વા અત્થં ભણન્તિ. ખતં ઉપહતન્તિ ગુણખનનેન ખતં, ગુણુપઘાતેન ઉપહતં. વિસમેન કાયકમ્મેનાતિ સમ્પક્ખલનટ્ઠેન વિસમેન કાયદ્વારિકકમ્મેન. વચીમનોકમ્મેસુપિ એસેવ નયો. અન્તગ્ગાહિકાયાતિ દસવત્થુકાય અન્તં ગહેત્વા ઠિતદિટ્ઠિયા. સેસં સબ્બત્થ ઉત્તાનત્થમેવાતિ.
51. Ekādasame mahācoroti mahanto balavacoro. Sandhinti gharasandhiṃ. Nillopanti mahāvilopaṃ. Ekāgārikanti ekameva gehaṃ parivāretvā vilumpanaṃ. Paripanthepi tiṭṭhatīti panthadūhanakammaṃ karoti. Nadīvidugganti nadīnaṃ duggamaṭṭhānaṃ antaradīpakaṃ, yattha sakkā hoti dvīhipi tīhipi jaṅghasahassehi saddhiṃ nilīyituṃ. Pabbatavisamanti pabbatānaṃ visamaṭṭhānaṃ pabbatantaraṃ, yattha sakkā hoti sattahi vā aṭṭhahi vā jaṅghasahassehi saddhiṃ nilīyituṃ. Tiṇagahananti tiṇena vaḍḍhitvā sañchannaṃ dvattiyojanaṭṭhānaṃ. Rodhanti ghanaṃ aññamaññaṃ saṃsaṭṭhasākhaṃ ekābaddhaṃ mahāvanasaṇḍaṃ. Pariyodhāya atthaṃ bhaṇissantīti pariyodahitvā taṃ taṃ kāraṇaṃ pakkhipitvā atthaṃ kathayissanti. Tyāssāti te assa. Pariyodhāya atthaṃ bhaṇantīti kismiñci kiñci vattuṃ āraddheyeva ‘‘mā evaṃ avacuttha, mayaṃ etaṃ kulaparamparāya jānāma, na esa evarūpaṃ karissatī’’ti taṃ taṃ kāraṇaṃ pakkhipitvā mahantampi dosaṃ harantā atthaṃ bhaṇanti. Atha vā pariyodhāyāti paṭicchādetvātipi attho. Te hi tassapi dosaṃ paṭicchādetvā atthaṃ bhaṇanti. Khataṃ upahatanti guṇakhananena khataṃ, guṇupaghātena upahataṃ. Visamena kāyakammenāti sampakkhalanaṭṭhena visamena kāyadvārikakammena. Vacīmanokammesupi eseva nayo. Antaggāhikāyāti dasavatthukāya antaṃ gahetvā ṭhitadiṭṭhiyā. Sesaṃ sabbattha uttānatthamevāti.
ચૂળવગ્ગો પઞ્ચમો.
Cūḷavaggo pañcamo.
પઠમપણ્ણાસકં નિટ્ઠિતં.
Paṭhamapaṇṇāsakaṃ niṭṭhitaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧૧. મહાચોરસુત્તં • 11. Mahācorasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧૧. મહાચોરસુત્તવણ્ણના • 11. Mahācorasuttavaṇṇanā
