| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૪. મહાચુન્દસુત્તં
4. Mahācundasuttaṃ
૪૬. એવં મે સુતં – એકં સમયં આયસ્મા મહાચુન્દો ચેતીસુ વિહરતિ સયંજાતિયં 1. તત્ર ખો આયસ્મા મહાચુન્દો ભિક્ખૂ આમન્તેસિ – ‘‘આવુસો ભિક્ખવે’’તિ. ‘‘આવુસો’’તિ ખો તે ભિક્ખૂ આયસ્મતો મહાચુન્દસ્સ પચ્ચસ્સોસું. આયસ્મા મહાચુન્દો એતદવોચ –
46. Evaṃ me sutaṃ – ekaṃ samayaṃ āyasmā mahācundo cetīsu viharati sayaṃjātiyaṃ 2. Tatra kho āyasmā mahācundo bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato mahācundassa paccassosuṃ. Āyasmā mahācundo etadavoca –
‘‘ઇધાવુસો, ધમ્મયોગા ભિક્ખૂ ઝાયી ભિક્ખૂ અપસાદેન્તિ – ‘ઇમે પન ઝાયિનોમ્હા, ઝાયિનોમ્હાતિ ઝાયન્તિ પજ્ઝાયન્તિ નિજ્ઝાયન્તિ અવજ્ઝાયન્તિ 3. કિમિમે 4 ઝાયન્તિ, કિન્તિમે ઝાયન્તિ, કથં ઇમે ઝાયન્તી’તિ? તત્થ ધમ્મયોગા ચ ભિક્ખૂ નપ્પસીદન્તિ, ઝાયી ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.
‘‘Idhāvuso, dhammayogā bhikkhū jhāyī bhikkhū apasādenti – ‘ime pana jhāyinomhā, jhāyinomhāti jhāyanti pajjhāyanti nijjhāyanti avajjhāyanti 5. Kimime 6 jhāyanti, kintime jhāyanti, kathaṃ ime jhāyantī’ti? Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ઇધ પનાવુસો, ઝાયી ભિક્ખૂ ધમ્મયોગે ભિક્ખૂ અપસાદેન્તિ – ‘ઇમે પન ધમ્મયોગમ્હા, ધમ્મયોગમ્હાતિ ઉદ્ધતા ઉન્નળા ચપલા મુખરા વિકિણ્ણવાચા મુટ્ઠસ્સતી અસમ્પજાના અસમાહિતા વિબ્ભન્તચિત્તા પાકતિન્દ્રિયા. કિમિમે ધમ્મયોગા, કિન્તિમે ધમ્મયોગા, કથં ઇમે ધમ્મયોગા’તિ? તત્થ ઝાયી ચ ભિક્ખૂ નપ્પસીદન્તિ, ધમ્મયોગા ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.
‘‘Idha panāvuso, jhāyī bhikkhū dhammayoge bhikkhū apasādenti – ‘ime pana dhammayogamhā, dhammayogamhāti uddhatā unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā. Kimime dhammayogā, kintime dhammayogā, kathaṃ ime dhammayogā’ti? Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ઇધ પનાવુસો, ધમ્મયોગા ભિક્ખૂ ધમ્મયોગાનઞ્ઞેવ ભિક્ખૂનં વણ્ણં ભાસન્તિ, નો ઝાયીનં ભિક્ખૂનં વણ્ણં ભાસન્તિ. તત્થ ધમ્મયોગા ચ ભિક્ખૂ નપ્પસીદન્તિ, ઝાયી ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.
‘‘Idha panāvuso, dhammayogā bhikkhū dhammayogānaññeva bhikkhūnaṃ vaṇṇaṃ bhāsanti, no jhāyīnaṃ bhikkhūnaṃ vaṇṇaṃ bhāsanti. Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘ઇધ પનાવુસો, ઝાયી ભિક્ખૂ ઝાયીનઞ્ઞેવ ભિક્ખૂનં વણ્ણં ભાસન્તિ, નો ધમ્મયોગાનં ભિક્ખૂનં વણ્ણં ભાસન્તિ. તત્થ ઝાયી ચ ભિક્ખૂ નપ્પસીદન્તિ, ધમ્મયોગા ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.
‘‘Idha panāvuso, jhāyī bhikkhū jhāyīnaññeva bhikkhūnaṃ vaṇṇaṃ bhāsanti, no dhammayogānaṃ bhikkhūnaṃ vaṇṇaṃ bhāsanti. Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘તસ્માતિહાવુસો , એવં સિક્ખિતબ્બં – ‘ધમ્મયોગા સમાના ઝાયીનં ભિક્ખૂનં વણ્ણં ભાસિસ્સામા’તિ. એવઞ્હિ વો, આવુસો, સિક્ખિતબ્બં. તં કિસ્સ હેતુ? અચ્છરિયા હેતે, આવુસો, પુગ્ગલા દુલ્લભા લોકસ્મિં, યે અમતં ધાતું કાયેન ફુસિત્વા વિહરન્તિ. તસ્માતિહાવુસો, એવં સિક્ખિતબ્બં – ‘ઝાયી સમાના ધમ્મયોગાનં ભિક્ખૂનં વણ્ણં ભાસિસ્સામા’તિ. એવઞ્હિ વો, આવુસો, સિક્ખિતબ્બં. તં કિસ્સ હેતુ? અચ્છરિયા હેતે, આવુસો, પુગ્ગલા દુલ્લભા લોકસ્મિં યે ગમ્ભીરં અત્થપદં પઞ્ઞાય અતિવિજ્ઝ પસ્સન્તી’’તિ. ચતુત્થં.
‘‘Tasmātihāvuso , evaṃ sikkhitabbaṃ – ‘dhammayogā samānā jhāyīnaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ, ye amataṃ dhātuṃ kāyena phusitvā viharanti. Tasmātihāvuso, evaṃ sikkhitabbaṃ – ‘jhāyī samānā dhammayogānaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ ye gambhīraṃ atthapadaṃ paññāya ativijjha passantī’’ti. Catutthaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૪. મહાચુન્દસુત્તવણ્ણના • 4. Mahācundasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૩-૬. ઇણસુત્તાદિવણ્ણના • 3-6. Iṇasuttādivaṇṇanā
