| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[407] 2. махаагабиж̇аад̇агаван̣н̣анаа
[407] 2. Mahākapijātakavaṇṇanā
ад̇д̇аанам̣ сан̇гамам̣ гад̇ваад̇и ид̣̇ам̣ сад̇т̇аа ж̇зд̇аванз вихаранд̇о н̃аад̇ад̇т̇ажарияам̣ аараб̣бха гат̇зси. вад̇т̇у бхад̣̇д̣̇асаалаж̇аад̇агз (ж̇аа. 1.12.13 аад̣̇аяо) аави бхависсад̇и. д̇ад̣̇аа бана д̇хаммасабхааяам̣ гат̇ам̣ самудтаабзсум̣ ‘‘аавусо, саммаасамб̣уд̣̇д̇хо н̃аад̇агаанам̣ ад̇т̇ам̣ жарад̇ий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзва, буб̣б̣зби д̇ат̇ааг̇ад̇о н̃аад̇ийнам̣ ад̇т̇ам̣ жариязваа’’д̇и вад̇ваа ад̇ийд̇ам̣ аахари.
Attānaṃ saṅkamaṃ katvāti idaṃ satthā jetavane viharanto ñātatthacariyaṃ ārabbha kathesi. Vatthu bhaddasālajātake (jā. 1.12.13 ādayo) āvi bhavissati. Tadā pana dhammasabhāyaṃ kathaṃ samuṭṭhāpesuṃ ‘‘āvuso, sammāsambuddho ñātakānaṃ atthaṃ caratī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva, pubbepi tathāgato ñātīnaṃ atthaṃ cariyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о габияонияам̣ ниб̣б̣ад̇д̇ид̇ваа ваяаббад̇д̇о аарохабарин̣аахасамбанно т̇аамаб̣алуубзд̇о бан̃жахад̇т̇иб̣алабаримаан̣о асийд̇исахассагабиг̇ан̣абаривуд̇о химаванд̇абад̣̇зсз васад̇и. д̇ад̇т̇а г̇ан̇г̇аад̇ийрам̣ ниссааяа саакаавидабасамбанно санд̣̇ажчааяо б̣ахалабад̇д̇о баб̣б̣ад̇агуудам̣ вияа самуг̇г̇ад̇о амб̣аругко ахоси ‘‘ниг̇род̇харугко’’д̇иби вад̣̇анд̇и. д̇асса мад̇хураани палаани д̣̇иб̣б̣аг̇анд̇харасаани маханд̇аани маханд̇агумбхаббамаан̣аани. д̇асса згиссаа саакааяа палаани т̇алз бад̇анд̇и, згиссаа саакааяа г̇ан̇г̇ааж̇алз, д̣̇виннам̣ саакаанам̣ палаани маж̇жхз ругкамуулз бад̇анд̇и. б̣од̇хисад̇д̇о габиг̇ан̣ам̣ аад̣̇ааяа д̇ад̇т̇а палаани каад̣̇анд̇о ‘‘згасмим̣ гаалз имасса ругкасса уд̣̇агз бад̇ид̇ам̣ палам̣ ниссааяа амхаагам̣ бхаяам̣ уббаж̇ж̇иссад̇ий’’д̇и уд̣̇агамад̇т̇агз саакааяа згапаламби анавасзсзд̇ваа бубпагаалз гал̣ааяамад̇д̇агаалад̇о бадтааяа каад̣̇аабзд̇и жзва баад̇аабзд̇и жа. звам̣ санд̇зби асийд̇иваанарасахассзхи ад̣̇идтам̣ гибиллигабудабадижчаннам̣ згам̣ баггапалам̣ над̣̇ияам̣ бад̇ид̇ваа уд̣̇д̇хан̃жа ад̇хо жа ж̇аалам̣ б̣анд̇хаабзд̇ваа уд̣̇агагийл̣ам̣ гийл̣анд̇асса б̣аараан̣асиран̃н̃о уд̣̇д̇хам̣ж̇аалз лаг̇г̇и. ран̃н̃о д̣̇ивасам̣ гийл̣ид̇ваа сааяам̣ г̇аманасамаяз гзваддаа ж̇аалам̣ угкибанд̇аа д̇ам̣ д̣̇исваа ‘‘асугапалам̣ наамаа’’д̇и аж̇аананд̇аа ран̃н̃о д̣̇ассзсум̣.
Atīte bārāṇasiyaṃ brahmadatte rajjaṃ kārente bodhisatto kapiyoniyaṃ nibbattitvā vayappatto ārohapariṇāhasampanno thāmabalūpeto pañcahatthibalaparimāṇo asītisahassakapigaṇaparivuto himavantapadese vasati. Tattha gaṅgātīraṃ nissāya sākhāviṭapasampanno sandacchāyo bahalapatto pabbatakūṭaṃ viya samuggato ambarukkho ahosi ‘‘nigrodharukkho’’tipi vadanti. Tassa madhurāni phalāni dibbagandharasāni mahantāni mahantakumbhappamāṇāni. Tassa ekissā sākhāya phalāni thale patanti, ekissā sākhāya gaṅgājale, dvinnaṃ sākhānaṃ phalāni majjhe rukkhamūle patanti. Bodhisatto kapigaṇaṃ ādāya tattha phalāni khādanto ‘‘ekasmiṃ kāle imassa rukkhassa udake patitaṃ phalaṃ nissāya amhākaṃ bhayaṃ uppajjissatī’’ti udakamatthake sākhāya ekaphalampi anavasesetvā pupphakāle kaḷāyamattakālato paṭṭhāya khādāpeti ceva pātāpeti ca. Evaṃ santepi asītivānarasahassehi adiṭṭhaṃ kipillikapuṭapaṭicchannaṃ ekaṃ pakkaphalaṃ nadiyaṃ patitvā uddhañca adho ca jālaṃ bandhāpetvā udakakīḷaṃ kīḷantassa bārāṇasirañño uddhaṃjāle laggi. Rañño divasaṃ kīḷitvā sāyaṃ gamanasamaye kevaṭṭā jālaṃ ukkhipantā taṃ disvā ‘‘asukaphalaṃ nāmā’’ti ajānantā rañño dassesuṃ.
рааж̇аа ‘‘гим̣палам̣ наамзд̇а’’нд̇и бужчи. ‘‘на ж̇аанаама, д̣̇зваа’’д̇и. ‘‘гз ж̇ааниссанд̇ий’’д̇и? ‘‘ванажарагаа, д̣̇зваа’’д̇и. со ванажарагз баггосаабзд̇ваа д̇зсам̣ санд̇игаа ‘‘амб̣абагга’’нд̇и суд̇ваа чуригааяа чинд̣̇ид̇ваа батамам̣ ванажарагз каад̣̇аабзд̇ваа бажчаа ад̇д̇анааби каад̣̇и, ид̇т̇ааг̇аарассааби амажжаанамби д̣̇аабзси. ран̃н̃о амб̣абаггарасо сагаласарийрам̣ парид̇ваа адтааси. со расад̇ан̣хааяа б̣аж̇жхид̇ваа д̇асса ругкасса тид̇адтаанам̣ ванажарагз бужчид̇ваа д̇зхи ‘‘химаванд̇абад̣̇зсз над̣̇ийд̇ийрз’’д̇и вуд̇д̇з б̣ахуу нааваасан̇гхаадз б̣анд̇хаабзд̇ваа ванажарагзхи д̣̇зсид̇амаг̇г̇зна уд̣̇д̇хам̣сод̇ам̣ аг̇амааси. ‘‘зд̇д̇агаани д̣̇ивасааний’’д̇и барижчзд̣̇о на гат̇ид̇о, анубуб̣б̣зна бана д̇ам̣ таанам̣ бад̇ваа ‘‘зсо д̣̇зва, ругко’’д̇и ванажарагаа ран̃н̃о аажигким̣су. рааж̇аа наавам̣ табзд̇ваа махааж̇анабаривуд̇о бад̣̇асаа д̇ад̇т̇а г̇анд̇ваа ругкамуулз саяанам̣ бан̃н̃абаабзд̇ваа амб̣абаггаани каад̣̇ид̇ваа наанаг̇г̇арасабхож̇анам̣ бхун̃ж̇ид̇ваа нибаж̇ж̇и, саб̣б̣ад̣̇исаасу аарагкам̣ табзд̇ваа аг̇г̇им̣ гарим̣су.
Rājā ‘‘kiṃphalaṃ nāmeta’’nti pucchi. ‘‘Na jānāma, devā’’ti. ‘‘Ke jānissantī’’ti? ‘‘Vanacarakā, devā’’ti. So vanacarake pakkosāpetvā tesaṃ santikā ‘‘ambapakka’’nti sutvā churikāya chinditvā paṭhamaṃ vanacarake khādāpetvā pacchā attanāpi khādi, itthāgārassāpi amaccānampi dāpesi. Rañño ambapakkaraso sakalasarīraṃ pharitvā aṭṭhāsi. So rasataṇhāya bajjhitvā tassa rukkhassa ṭhitaṭṭhānaṃ vanacarake pucchitvā tehi ‘‘himavantapadese nadītīre’’ti vutte bahū nāvāsaṅghāṭe bandhāpetvā vanacarakehi desitamaggena uddhaṃsotaṃ agamāsi. ‘‘Ettakāni divasānī’’ti paricchedo na kathito, anupubbena pana taṃ ṭhānaṃ patvā ‘‘eso deva, rukkho’’ti vanacarakā rañño ācikkhiṃsu. Rājā nāvaṃ ṭhapetvā mahājanaparivuto padasā tattha gantvā rukkhamūle sayanaṃ paññapāpetvā ambapakkāni khāditvā nānaggarasabhojanaṃ bhuñjitvā nipajji, sabbadisāsu ārakkhaṃ ṭhapetvā aggiṃ kariṃsu.
махаасад̇д̇о мануссзсу нид̣̇д̣̇ам̣ огганд̇зсу ад̣дхарад̇д̇асамаяз барисааяа сад̣̇д̇хим̣ аг̇амааси. асийд̇исахассаваанараа саакааяа саакам̣ жаранд̇аа амб̣аани каад̣̇анд̇и. рааж̇аа баб̣уж̇жхид̇ваа габиг̇ан̣ам̣ д̣̇исваа мануссз удтаабзд̇ваа д̇хануг̇г̇ахз баггосаабзд̇ваа ‘‘яат̇аа зд̇з палакаад̣̇агаа ваанараа на балааяанд̇и, д̇ат̇аа д̇з баригкибид̇ваа виж̇жхат̇а, свз амб̣аани жзва ваанарамам̣сан̃жа каад̣̇иссаамий’’д̇и ааха. д̇хануг̇г̇ахаа ‘‘саад̇хуу’’д̇и самбадижчид̇ваа ругкам̣ бариваарзд̇ваа сарз саннаяхид̇ваа адтам̣су. д̇з д̣̇исваа ваанараа маран̣абхаяабхийд̇аа балааяид̇ум̣ асаггонд̇аа махаасад̇д̇ам̣ убасан̇гамид̇ваа ‘‘д̣̇зва, ‘балааяанамаггадз виж̇жхиссаамаа’д̇и ругкам̣ бариваарзд̇ваа д̇хануг̇г̇ахаа тид̇аа, гим̣ гаромаа’’д̇и бужчид̇ваа гамбамаанаа адтам̣су. б̣од̇хисад̇д̇о ‘‘маа бхааяид̇т̇а, ахам̣ во ж̇ийвид̇ам̣ д̣̇ассаамий’’д̇и ваанараг̇ан̣ам̣ самассаасзд̇ваа уж̇угам̣ уг̇г̇ад̇асаакам̣ ааруяха г̇ан̇г̇аабхимукам̣ г̇ад̇асаакам̣ г̇анд̇ваа д̇ассаа барияанд̇ад̇о багканд̣̇ид̇ваа д̇ханусад̇амад̇д̇ам̣ таанам̣ ад̇иггамма г̇ан̇г̇аад̇ийрз згасмим̣ г̇умб̣амад̇т̇агз бад̇ид̇ваа д̇ад̇о оруяха ‘‘мамааг̇ад̇адтаанам̣ зд̇д̇агам̣ бхависсад̇ий’’д̇и аагаасам̣ барижчинд̣̇ид̇ваа згам̣ взд̇д̇алад̇ам̣ муулз чинд̣̇ид̇ваа сод̇хзд̇ваа ‘‘зд̇д̇агам̣ таанам̣ ругкз б̣аж̇жхиссад̇и, зд̇д̇агам̣ аагаасадтам̣ бхависсад̇ий’’д̇и имаани д̣̇вз таанаани вавад̇т̇абзд̇ваа ад̇д̇ано гадияам̣ б̣анд̇ханадтаанам̣ на саллагкзси.
Mahāsatto manussesu niddaṃ okkantesu aḍḍharattasamaye parisāya saddhiṃ agamāsi. Asītisahassavānarā sākhāya sākhaṃ carantā ambāni khādanti. Rājā pabujjhitvā kapigaṇaṃ disvā manusse uṭṭhāpetvā dhanuggahe pakkosāpetvā ‘‘yathā ete phalakhādakā vānarā na palāyanti, tathā te parikkhipitvā vijjhatha, sve ambāni ceva vānaramaṃsañca khādissāmī’’ti āha. Dhanuggahā ‘‘sādhū’’ti sampaṭicchitvā rukkhaṃ parivāretvā sare sannayhitvā aṭṭhaṃsu. Te disvā vānarā maraṇabhayabhītā palāyituṃ asakkontā mahāsattaṃ upasaṅkamitvā ‘‘deva, ‘palāyanamakkaṭe vijjhissāmā’ti rukkhaṃ parivāretvā dhanuggahā ṭhitā, kiṃ karomā’’ti pucchitvā kampamānā aṭṭhaṃsu. Bodhisatto ‘‘mā bhāyittha, ahaṃ vo jīvitaṃ dassāmī’’ti vānaragaṇaṃ samassāsetvā ujukaṃ uggatasākhaṃ āruyha gaṅgābhimukhaṃ gatasākhaṃ gantvā tassā pariyantato pakkhanditvā dhanusatamattaṃ ṭhānaṃ atikkamma gaṅgātīre ekasmiṃ gumbamatthake patitvā tato oruyha ‘‘mamāgataṭṭhānaṃ ettakaṃ bhavissatī’’ti ākāsaṃ paricchinditvā ekaṃ vettalataṃ mūle chinditvā sodhetvā ‘‘ettakaṃ ṭhānaṃ rukkhe bajjhissati, ettakaṃ ākāsaṭṭhaṃ bhavissatī’’ti imāni dve ṭhānāni vavatthapetvā attano kaṭiyaṃ bandhanaṭṭhānaṃ na sallakkhesi.
со д̇ам̣ лад̇ам̣ аад̣̇ааяа згам̣ годим̣ г̇ан̇г̇аад̇ийрз бад̇идтид̇аругкз б̣анд̇хид̇ваа згам̣ ад̇д̇ано гадияам̣ б̣анд̇хид̇ваа ваад̇ажчиннавалаахаго вияа взг̇зна д̇ханусад̇амад̇д̇ам̣ таанам̣ лан̇гхид̇ваа гадияам̣ б̣анд̇ханадтаанасса асаллагкид̇ад̇д̇аа ругкам̣ баабун̣ид̇ум̣ асаггонд̇о убхохи хад̇т̇зхи амб̣асаакам̣ д̣̇ал̣хам̣ г̇ан̣хид̇ваа ваанараг̇ан̣асса сан̃н̃амад̣̇ааси ‘‘сийгхам̣ мама бидтим̣ мад̣̇д̣̇амаанаа взд̇д̇алад̇ааяа сод̇т̇иг̇аманам̣ г̇ажчат̇аа’’д̇и. асийд̇исахассаваанараа махаасад̇д̇ам̣ ванд̣̇ид̇ваа камаабзд̇ваа д̇ат̇аа аг̇амам̣су. д̇ад̣̇аа д̣̇звад̣̇ад̇д̇оби маггадо худ̇ваа д̇зсам̣ аб̣бханд̇арз ход̇и. со ‘‘аяам̣ мз бажжаамид̇д̇асса бидтим̣ бассид̇ум̣ гаало’’д̇и ужжам̣ саакам̣ ааруяха взг̇ам̣ ж̇анзд̇ваа д̇асса бидтияам̣ бад̇и. махаасад̇д̇асса хад̣̇аяам̣ бхиж̇ж̇и, б̣алававзд̣̇анаа уббаж̇ж̇и. соби д̇ам̣ взд̣̇анааббад̇д̇ам̣ гад̇ваа баггаами. махаасад̇д̇о згагова ахоси. рааж̇аа анид̣̇д̣̇ааяанд̇о ваанарзхи жа махаасад̇д̇зна жа гад̇агирияам̣ саб̣б̣ам̣ д̣̇исваа ‘‘аяам̣ д̇иражчаано худ̇ваа ад̇д̇ано ж̇ийвид̇ам̣ аг̇ан̣зд̇ваа барисааяа сод̇т̇ибхаавамзва агаасий’’д̇и жинд̇знд̇о нибаж̇ж̇и.
So taṃ lataṃ ādāya ekaṃ koṭiṃ gaṅgātīre patiṭṭhitarukkhe bandhitvā ekaṃ attano kaṭiyaṃ bandhitvā vātacchinnavalāhako viya vegena dhanusatamattaṃ ṭhānaṃ laṅghitvā kaṭiyaṃ bandhanaṭṭhānassa asallakkhitattā rukkhaṃ pāpuṇituṃ asakkonto ubhohi hatthehi ambasākhaṃ daḷhaṃ gaṇhitvā vānaragaṇassa saññamadāsi ‘‘sīghaṃ mama piṭṭhiṃ maddamānā vettalatāya sotthigamanaṃ gacchathā’’ti. Asītisahassavānarā mahāsattaṃ vanditvā khamāpetvā tathā agamaṃsu. Tadā devadattopi makkaṭo hutvā tesaṃ abbhantare hoti. So ‘‘ayaṃ me paccāmittassa piṭṭhiṃ passituṃ kālo’’ti uccaṃ sākhaṃ āruyha vegaṃ janetvā tassa piṭṭhiyaṃ pati. Mahāsattassa hadayaṃ bhijji, balavavedanā uppajji. Sopi taṃ vedanāppattaṃ katvā pakkāmi. Mahāsatto ekakova ahosi. Rājā aniddāyanto vānarehi ca mahāsattena ca katakiriyaṃ sabbaṃ disvā ‘‘ayaṃ tiracchāno hutvā attano jīvitaṃ agaṇetvā parisāya sotthibhāvameva akāsī’’ti cintento nipajji.
со бабхаад̇ааяа рад̇д̇ияаа махаасад̇д̇асса д̇уссид̇ваа ‘‘на яуд̇д̇ам̣ имам̣ габирааж̇аанам̣ наасзд̇ум̣, убааязна нам̣ од̇аарзд̇ваа бадиж̇аг̇г̇иссаамий’’д̇и анд̇ог̇ан̇г̇ааяа нааваасан̇гхаадам̣ табзд̇ваа д̇ад̇т̇а аддагам̣ б̣анд̇хаабзд̇ваа сан̣игам̣ махаасад̇д̇ам̣ од̇аараабзд̇ваа бидтияам̣ гаасаававад̇т̇ам̣ бад̇т̇араабзд̇ваа г̇ан̇г̇од̣̇агзна нхаабзд̇ваа паан̣ид̇од̣̇агам̣ бааязд̇ваа барисуд̣̇д̇хасарийрам̣ сахассабаагад̇злзна аб̣бхан̃ж̇аабзд̇ваа саяанабидтз зл̣агажаммам̣ сант̇араабзд̇ваа сан̣игам̣ д̇ад̇т̇а нибаж̇ж̇аабзд̇ваа ад̇д̇анаа нийжз аасанз нисийд̣̇ид̇ваа батамам̣ г̇аат̇амааха –
So pabhātāya rattiyā mahāsattassa tussitvā ‘‘na yuttaṃ imaṃ kapirājānaṃ nāsetuṃ, upāyena naṃ otāretvā paṭijaggissāmī’’ti antogaṅgāya nāvāsaṅghāṭaṃ ṭhapetvā tattha aṭṭakaṃ bandhāpetvā saṇikaṃ mahāsattaṃ otārāpetvā piṭṭhiyaṃ kāsāvavatthaṃ pattharāpetvā gaṅgodakena nhāpetvā phāṇitodakaṃ pāyetvā parisuddhasarīraṃ sahassapākatelena abbhañjāpetvā sayanapiṭṭhe eḷakacammaṃ santharāpetvā saṇikaṃ tattha nipajjāpetvā attanā nīce āsane nisīditvā paṭhamaṃ gāthamāha –
83.
83.
‘‘ад̇д̇аанам̣ сан̇гамам̣ гад̇ваа, яо сод̇т̇им̣ самад̇аараяи;
‘‘Attānaṃ saṅkamaṃ katvā, yo sotthiṃ samatārayi;
гим̣ д̇вам̣ д̇зсам̣ гимз д̇уяхам̣, хонд̇и зд̇з махаагабий’’д̇и.
Kiṃ tvaṃ tesaṃ kime tuyhaṃ, honti ete mahākapī’’ti.
д̇ассад̇т̇о – амбхо махаагаби, яо д̇вам̣ ад̇д̇аанам̣ сан̇гамам̣ гад̇ваа д̇улам̣ ааробзд̇ваа ж̇ийвид̇ам̣ барижжаж̇ид̇ваа имз ваанарз сод̇т̇им̣ самад̇аараяи, кзмзна санд̇аарзси; гим̣ д̇вам̣ д̇зсам̣ хоси, гимз д̇уяхам̣ ваа гим̣су зд̇з хонд̇ийд̇и?
Tassattho – ambho mahākapi, yo tvaṃ attānaṃ saṅkamaṃ katvā tulaṃ āropetvā jīvitaṃ pariccajitvā ime vānare sotthiṃ samatārayi, khemena santāresi; kiṃ tvaṃ tesaṃ hosi, kime tuyhaṃ vā kiṃsu ete hontīti?
д̇ам̣ суд̇ваа б̣од̇хисад̇д̇о рааж̇аанам̣ овад̣̇анд̇о сзсаг̇аат̇аа абхааси –
Taṃ sutvā bodhisatto rājānaṃ ovadanto sesagāthā abhāsi –
84.
84.
‘‘рааж̇аахам̣ иссаро д̇зсам̣, яуут̇асса барихаараго;
‘‘Rājāhaṃ issaro tesaṃ, yūthassa parihārako;
д̇зсам̣ согабарзд̇аанам̣, бхийд̇аанам̣ д̇з аринд̣̇ама.
Tesaṃ sokaparetānaṃ, bhītānaṃ te arindama.
85.
85.
‘‘уллан̇гхаяид̇ваа ад̇д̇аанам̣, виссадтад̇хануно сад̇ам̣;
‘‘Ullaṅghayitvā attānaṃ, vissaṭṭhadhanuno sataṃ;
д̇ад̇о абарабаад̣̇зсу, д̣̇ал̣хам̣ б̣анд̇хам̣ лад̇ааг̇ун̣ам̣.
Tato aparapādesu, daḷhaṃ bandhaṃ latāguṇaṃ.
86.
86.
‘‘чиннаб̣бхамива ваад̇зна, нун̣н̣о ругкам̣ убааг̇амим̣;
‘‘Chinnabbhamiva vātena, nuṇṇo rukkhaṃ upāgamiṃ;
сохам̣ аббабхавам̣ д̇ад̇т̇а, саакам̣ хад̇т̇зхи аг̇г̇ахим̣.
Sohaṃ appabhavaṃ tattha, sākhaṃ hatthehi aggahiṃ.
87.
87.
‘‘д̇ам̣ мам̣ вияааяад̇ам̣ санд̇ам̣, саакааяа жа лад̇ааяа жа;
‘‘Taṃ maṃ viyāyataṃ santaṃ, sākhāya ca latāya ca;
самануггаманд̇аа баад̣̇зхи, сод̇т̇им̣ саакаамиг̇аа г̇ад̇аа.
Samanukkamantā pādehi, sotthiṃ sākhāmigā gatā.
88.
88.
‘‘д̇ам̣ мам̣ на д̇абад̇з б̣анд̇хо, мад̇о мз на д̇абзссад̇и;
‘‘Taṃ maṃ na tapate bandho, mato me na tapessati;
сукамаахарид̇ам̣ д̇зсам̣, язсам̣ раж̇ж̇амагаараяим̣.
Sukhamāharitaṃ tesaṃ, yesaṃ rajjamakārayiṃ.
89.
89.
‘‘зсаа д̇з убамаа рааж̇а, д̇ам̣ сун̣охи аринд̣̇ама;
‘‘Esā te upamā rāja, taṃ suṇohi arindama;
ран̃н̃аа радтасса яог̇г̇асса, б̣аласса ниг̇амасса жа;
Raññā raṭṭhassa yoggassa, balassa nigamassa ca;
саб̣б̣зсам̣ сукамздтаб̣б̣ам̣, кад̇д̇иязна баж̇аанад̇аа’’д̇и.
Sabbesaṃ sukhameṭṭhabbaṃ, khattiyena pajānatā’’ti.
д̇ад̇т̇а д̇зсанд̇и д̇зсам̣ асийд̇исахассаанам̣ ваанараанам̣. бхийд̇аанам̣ д̇зд̇и д̇ава виж̇жханад̇т̇ааяа аан̣аабзд̇ваа тид̇асса бхийд̇аанам̣. аринд̣̇амаад̇и рааж̇аанам̣ аалабад̇и. рааж̇аа хи жораад̣̇ийнам̣ арийнам̣ д̣̇аманад̇о ‘‘аринд̣̇амо’’д̇и вужжад̇и. виссадтад̇хануно сад̇анд̇и анааробид̇ад̇ханусад̇аббамаан̣ам̣ таанам̣ ад̇д̇аанам̣ аагаасз уллан̇гхаяид̇ваа виссаж̇ж̇зд̇ваа д̇ад̇о имамхаа ругкаа лан̇гхаяид̇ваа г̇ад̇адтаанад̇о. абарабаад̣̇зсууд̇и бажчаабаад̣̇зсу. ид̣̇ам̣ гадибхааг̇ам̣ санд̇хааяа вуд̇д̇ам̣. б̣од̇хисад̇д̇о хи гадибхааг̇з д̇ам̣ лад̇ааг̇ун̣ам̣ д̣̇ал̣хам̣ б̣анд̇хид̇ваа бажчимабаад̣̇зхи бхуумияам̣ аггамид̇ваа виссаж̇ж̇зд̇ваа ваад̇авзг̇зна аагаасам̣ багканд̣̇и. нун̣н̣о ругкам̣ убааг̇аминд̇и ваад̇ажчиннам̣ аб̣бхамива ад̇д̇ано взг̇аж̇анид̇зна ваад̇зна нун̣н̣о. яат̇аа ваад̇ажчиннаб̣бхам̣ ваад̇зна, звам̣ ад̇д̇ано взг̇зна нун̣н̣о худ̇ваа имам̣ амб̣аругкам̣ убааг̇амим̣ . аббабхаванд̇и со ахам̣ д̇ад̇т̇а аагаасаббад̣̇зсз ругкам̣ баабун̣ид̇ум̣ аббахонд̇о д̇асса ругкасса саакам̣ хад̇т̇зхи аг̇г̇ахзсинд̇и ад̇т̇о.
Tattha tesanti tesaṃ asītisahassānaṃ vānarānaṃ. Bhītānaṃ teti tava vijjhanatthāya āṇāpetvā ṭhitassa bhītānaṃ. Arindamāti rājānaṃ ālapati. Rājā hi corādīnaṃ arīnaṃ damanato ‘‘arindamo’’ti vuccati. Vissaṭṭhadhanuno satanti anāropitadhanusatappamāṇaṃ ṭhānaṃ attānaṃ ākāse ullaṅghayitvā vissajjetvā tato imamhā rukkhā laṅghayitvā gataṭṭhānato. Aparapādesūti pacchāpādesu. Idaṃ kaṭibhāgaṃ sandhāya vuttaṃ. Bodhisatto hi kaṭibhāge taṃ latāguṇaṃ daḷhaṃ bandhitvā pacchimapādehi bhūmiyaṃ akkamitvā vissajjetvā vātavegena ākāsaṃ pakkhandi. Nuṇṇorukkhaṃ upāgaminti vātacchinnaṃ abbhamiva attano vegajanitena vātena nuṇṇo. Yathā vātacchinnabbhaṃ vātena, evaṃ attano vegena nuṇṇo hutvā imaṃ ambarukkhaṃ upāgamiṃ . Appabhavanti so ahaṃ tattha ākāsappadese rukkhaṃ pāpuṇituṃ appahonto tassa rukkhassa sākhaṃ hatthehi aggahesinti attho.
вияааяад̇анд̇и ругкасаакааяа жа взд̇д̇алад̇ааяа жа вийн̣ааяа бхамарад̇анд̇и вияа вид̇ад̇ам̣ аагад̣дхид̇асарийрам̣. самануггаманд̇аад̇и маяаа анун̃н̃аад̇аа мам̣ ванд̣̇ид̇ваа баад̣̇зхи ануггаманд̇аа ниранд̇арамзва аггаманд̇аа сод̇т̇им̣ г̇ад̇аа. д̇ам̣ мам̣ на д̇абад̇з б̣анд̇ход̇и д̇ам̣ мам̣ нааби со валлияаа б̣анд̇хо д̇абад̇и, нааби ид̣̇аани маран̣ам̣ д̇абзссад̇и. гим̣гааран̣аа? сукамаахарид̇ам̣ д̇зсанд̇и яасмаа язсам̣ ахам̣ раж̇ж̇амагаараяим̣, д̇зсам̣ маяаа сукамаахарид̇ам̣. зд̇з хи ‘‘махаарааж̇а, аяам̣ но уббаннам̣ д̣̇угкам̣ харид̇ваа сукам̣ аахариссад̇ий’’д̇и мам̣ рааж̇аанам̣ агам̣су. ахамби ‘‘д̇умхаагам̣ уббаннам̣ д̣̇угкам̣ хариссаами’’жжзва зд̇зсам̣ рааж̇аа ж̇аад̇о. д̇ам̣ аж̇ж̇а маяаа зд̇зсам̣ маран̣ад̣̇угкам̣ харид̇ваа ж̇ийвид̇асукам̣ аахадам̣, д̇зна мам̣ нааби б̣анд̇хо д̇абад̇и, на маран̣авад̇хо д̇абзссад̇и.
Viyāyatanti rukkhasākhāya ca vettalatāya ca vīṇāya bhamaratanti viya vitataṃ ākaḍḍhitasarīraṃ. Samanukkamantāti mayā anuññātā maṃ vanditvā pādehi anukkamantā nirantarameva akkamantā sotthiṃ gatā. Taṃ maṃ na tapate bandhoti taṃ maṃ nāpi so valliyā bandho tapati, nāpi idāni maraṇaṃ tapessati. Kiṃkāraṇā? Sukhamāharitaṃ tesanti yasmā yesaṃ ahaṃ rajjamakārayiṃ, tesaṃ mayā sukhamāharitaṃ. Ete hi ‘‘mahārāja, ayaṃ no uppannaṃ dukkhaṃ haritvā sukhaṃ āharissatī’’ti maṃ rājānaṃ akaṃsu. Ahampi ‘‘tumhākaṃ uppannaṃ dukkhaṃ harissāmi’’cceva etesaṃ rājā jāto. Taṃ ajja mayā etesaṃ maraṇadukkhaṃ haritvā jīvitasukhaṃ āhaṭaṃ, tena maṃ nāpi bandho tapati, na maraṇavadho tapessati.
зсаа д̇з убамаад̇и зсаа д̇з махаарааж̇а, маяаа гад̇агирияааяа убамаа. д̇ам̣ сун̣охийд̇и д̇асмаа имааяа убамааяа сам̣санд̣̇зд̇ваа ад̇д̇ано д̣̇ияяамаанам̣ оваад̣̇ам̣ сун̣аахи. ран̃н̃аа радтассаад̇и махаарааж̇а, ран̃н̃аа наама ужчуяанд̇з ужчум̣ вияа радтам̣ абийл̣зд̇ваа жад̇уб̣б̣ид̇хам̣ аг̇ад̇иг̇аманам̣ бахааяа жад̇уухи сан̇г̇ахавад̇т̇уухи сан̇г̇ан̣ханд̇зна д̣̇асасу рааж̇ад̇хаммзсу бад̇идтааяа маяаа вияа ад̇д̇ано ж̇ийвид̇ам̣ барижжаж̇ид̇ваа ‘‘гинд̇имз радтаваасино виг̇ад̇абхаяаа г̇имхагаалз вивадад̣̇ваарз н̃аад̇ийхи жа бариваарагзхи жа бариваарид̇аа урз буд̇д̇з нажжзнд̇аа сийд̇зна ваад̇зна б̣ийж̇ияамаанаа яат̇ааружи ад̇д̇ано ад̇д̇ано санд̇агам̣ барибхун̃ж̇анд̇аа гааяигажзд̇асигасукасаман̇г̇ино бхавзяяу’’нд̇и сагаларадтасса жа рат̇асагадаад̣̇ияуд̇д̇авааханасса яог̇г̇асса жа бад̇д̇исан̇каад̇асса б̣аласса жа ниг̇амаж̇анабад̣̇асан̇каад̇асса ниг̇амасса жа саб̣б̣зсам̣ сукамзва зсид̇аб̣б̣ам̣ г̇авзсид̇аб̣б̣анд̇и ад̇т̇о. кад̇д̇иязна баж̇аанад̇аад̇и кзд̇д̇аанам̣ ад̇хибад̇ибхаавзна ‘‘кад̇д̇ияо’’д̇и лад̣̇д̇ханаамзна бана зд̇зна авасзсасад̇д̇з ад̇иггамма баж̇аанад̇аа н̃аан̣асамбаннзна бхавид̇аб̣б̣анд̇и.
Esā te upamāti esā te mahārāja, mayā katakiriyāya upamā. Taṃ suṇohīti tasmā imāya upamāya saṃsandetvā attano diyyamānaṃ ovādaṃ suṇāhi. Raññā raṭṭhassāti mahārāja, raññā nāma ucchuyante ucchuṃ viya raṭṭhaṃ apīḷetvā catubbidhaṃ agatigamanaṃ pahāya catūhi saṅgahavatthūhi saṅgaṇhantena dasasu rājadhammesu patiṭṭhāya mayā viya attano jīvitaṃ pariccajitvā ‘‘kintime raṭṭhavāsino vigatabhayā gimhakāle vivaṭadvāre ñātīhi ca parivārakehi ca parivāritā ure putte naccentā sītena vātena bījiyamānā yathāruci attano attano santakaṃ paribhuñjantā kāyikacetasikasukhasamaṅgino bhaveyyu’’nti sakalaraṭṭhassa ca rathasakaṭādiyuttavāhanassa yoggassa ca pattisaṅkhātassa balassa ca nigamajanapadasaṅkhātassa nigamassa ca sabbesaṃ sukhameva esitabbaṃ gavesitabbanti attho. Khattiyena pajānatāti khettānaṃ adhipatibhāvena ‘‘khattiyo’’ti laddhanāmena pana etena avasesasatte atikkamma pajānatā ñāṇasampannena bhavitabbanti.
звам̣ махаасад̇д̇о рааж̇аанам̣ овад̣̇анд̇о анусаасанд̇ова гааламагааси. рааж̇аа амажжз баггосаабзд̇ваа ‘‘имасса габирааж̇асса рааж̇уунам̣ вияа сарийрагижжам̣ гарот̇аа’’д̇и вад̇ваа ид̇т̇ааг̇аарамби аан̣аабзси ‘‘д̇умхз рад̇д̇авад̇т̇анивад̇т̇аа вигин̣н̣агзсаа д̣̇ан̣д̣ад̣̇ийбигахад̇т̇аа габирааж̇аанам̣ бариваарзд̇ваа аал̣ааханам̣ г̇ажчат̇аа’’д̇и. амажжаа д̣̇ааруунам̣ сагадасад̇амад̇д̇зна жид̇агам̣ гарид̇ваа рааж̇уунам̣ гаран̣анияаамзнзва махаасад̇д̇асса сарийрагижжам̣ гад̇ваа сийсагабаалам̣ г̇ахзд̇ваа ран̃н̃о санд̇игам̣ аг̇амам̣су. рааж̇аа махаасад̇д̇асса аал̣ааханз жзд̇ияам̣ гаарзд̇ваа д̣̇ийбз ж̇аалаабзд̇ваа г̇анд̇хамаалаад̣̇ийхи бууж̇зд̇ваа сийсагабаалам̣ суван̣н̣акажид̇ам̣ гаарзд̇ваа гунд̇аг̇г̇з табзд̇ваа бурад̇о гад̇ваа г̇анд̇хамаалаад̣̇ийхи бууж̇знд̇о б̣аараан̣асим̣ г̇анд̇ваа анд̇орааж̇ад̣̇ваарз табзд̇ваа сагаланаг̇арам̣ саж̇ж̇аабзд̇ваа сад̇д̇аахам̣ д̇хаад̇убууж̇ам̣ гаарзси. ат̇а нам̣ д̇хаад̇ум̣ г̇ахзд̇ваа жзд̇ияам̣ гаарзд̇ваа яааваж̇ийвам̣ г̇анд̇хамаалаад̣̇ийхи бууж̇зд̇ваа б̣од̇хисад̇д̇асса оваад̣̇з бад̇идтааяа д̣̇аанаад̣̇ийни бун̃н̃аани гаронд̇о д̇хаммзна раж̇ж̇ам̣ гаарзд̇ваа саг̇г̇абарааяан̣о ахоси.
Evaṃ mahāsatto rājānaṃ ovadanto anusāsantova kālamakāsi. Rājā amacce pakkosāpetvā ‘‘imassa kapirājassa rājūnaṃ viya sarīrakiccaṃ karothā’’ti vatvā itthāgārampi āṇāpesi ‘‘tumhe rattavatthanivatthā vikiṇṇakesā daṇḍadīpikahatthā kapirājānaṃ parivāretvā āḷāhanaṃ gacchathā’’ti. Amaccā dārūnaṃ sakaṭasatamattena citakaṃ karitvā rājūnaṃ karaṇaniyāmeneva mahāsattassa sarīrakiccaṃ katvā sīsakapālaṃ gahetvā rañño santikaṃ agamaṃsu. Rājā mahāsattassa āḷāhane cetiyaṃ kāretvā dīpe jālāpetvā gandhamālādīhi pūjetvā sīsakapālaṃ suvaṇṇakhacitaṃ kāretvā kuntagge ṭhapetvā purato katvā gandhamālādīhi pūjento bārāṇasiṃ gantvā antorājadvāre ṭhapetvā sakalanagaraṃ sajjāpetvā sattāhaṃ dhātupūjaṃ kāresi. Atha naṃ dhātuṃ gahetvā cetiyaṃ kāretvā yāvajīvaṃ gandhamālādīhi pūjetvā bodhisattassa ovāde patiṭṭhāya dānādīni puññāni karonto dhammena rajjaṃ kāretvā saggaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси – ‘‘д̇ад̣̇аа рааж̇аа аананд̣̇о ахоси, д̣̇удтагаби д̣̇звад̣̇ад̇д̇о, барисаа б̣уд̣̇д̇хабарисаа, габирааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi – ‘‘tadā rājā ānando ahosi, duṭṭhakapi devadatto, parisā buddhaparisā, kapirājā pana ahameva ahosi’’nti.
махаагабиж̇аад̇агаван̣н̣анаа д̣̇уд̇ияаа.
Mahākapijātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 407. махаагабиж̇аад̇агам̣ • 407. Mahākapijātakaṃ
