| Library / Tipiṭaka / તિપિટક • Tipiṭaka / જાતકપાળિ • Jātakapāḷi |
૪૫૩. મહામઙ્ગલજાતકં (૧૫)
453. Mahāmaṅgalajātakaṃ (15)
૧૫૫.
155.
કિંસુ નરો જપ્પમધિચ્ચકાલે, કં વા વિજ્જં કતમં વા સુતાનં;
Kiṃsu naro jappamadhiccakāle, kaṃ vā vijjaṃ katamaṃ vā sutānaṃ;
સો મચ્ચો અસ્મિઞ્ચ 1 પરમ્હિ લોકે, કથં કરો સોત્થાનેન ગુત્તો.
So macco asmiñca 2 paramhi loke, kathaṃ karo sotthānena gutto.
૧૫૬.
156.
યસ્સ દેવા પિતરો ચ સબ્બે, સરીસપા 3 સબ્બભૂતાનિ ચાપિ;
Yassa devā pitaro ca sabbe, sarīsapā 4 sabbabhūtāni cāpi;
મેત્તાય નિચ્ચં અપચિતાનિ હોન્તિ, ભૂતેસુ વે સોત્થાનં તદાહુ.
Mettāya niccaṃ apacitāni honti, bhūtesu ve sotthānaṃ tadāhu.
૧૫૭.
157.
યો સબ્બલોકસ્સ નિવાતવુત્તિ, ઇત્થીપુમાનં સહદારકાનં;
Yo sabbalokassa nivātavutti, itthīpumānaṃ sahadārakānaṃ;
ખન્તા દુરુત્તાનમપ્પટિકૂલવાદી, અધિવાસનં સોત્થાનં તદાહુ.
Khantā duruttānamappaṭikūlavādī, adhivāsanaṃ sotthānaṃ tadāhu.
૧૫૮.
158.
યો નાવજાનાતિ સહાયમિત્તે 5, સિપ્પેન કુલ્યાહિ ધનેન જચ્ચા;
Yo nāvajānāti sahāyamitte 6, sippena kulyāhi dhanena jaccā;
રુચિપઞ્ઞો અત્થકાલે મતીમા 7, સહાયેસુ વે સોત્થાનં તદાહુ.
Rucipañño atthakāle matīmā 8, sahāyesu ve sotthānaṃ tadāhu.
૧૫૯.
159.
મિત્તાનિ વે યસ્સ ભવન્તિ સન્તો, સંવિસ્સત્થા અવિસંવાદકસ્સ;
Mittāni ve yassa bhavanti santo, saṃvissatthā avisaṃvādakassa;
ન મિત્તદુબ્ભી સંવિભાગી ધનેન, મિત્તેસુ વે સોત્થાનં તદાહુ.
Na mittadubbhī saṃvibhāgī dhanena, mittesu ve sotthānaṃ tadāhu.
૧૬૦.
160.
યસ્સ ભરિયા તુલ્યવયા સમગ્ગા, અનુબ્બતા ધમ્મકામા પજાતા 9;
Yassa bhariyā tulyavayā samaggā, anubbatā dhammakāmā pajātā 10;
કોલિનિયા સીલવતી પતિબ્બતા, દારેસુ વે સોત્થાનં તદાહુ.
Koliniyā sīlavatī patibbatā, dāresu ve sotthānaṃ tadāhu.
૧૬૧.
161.
યસ્સ રાજા ભૂતપતિ 11 યસસ્સી, જાનાતિ સોચેય્યં પરક્કમઞ્ચ;
Yassa rājā bhūtapati 12 yasassī, jānāti soceyyaṃ parakkamañca;
અદ્વેજ્ઝતા સુહદયં મમન્તિ, રાજૂસુ વે સોત્થાનં તદાહુ.
Advejjhatā suhadayaṃ mamanti, rājūsu ve sotthānaṃ tadāhu.
૧૬૨.
162.
અન્નઞ્ચ પાનઞ્ચ દદાતિ સદ્ધો, માલઞ્ચ ગન્ધઞ્ચ વિલેપનઞ્ચ;
Annañca pānañca dadāti saddho, mālañca gandhañca vilepanañca;
પસન્નચિત્તો અનુમોદમાનો, સગ્ગેસુ વે સોત્થાનં તદાહુ.
Pasannacitto anumodamāno, saggesu ve sotthānaṃ tadāhu.
૧૬૩.
163.
યમરિયધમ્મેન પુનન્તિ વુદ્ધા, આરાધિતા સમચરિયાય સન્તો;
Yamariyadhammena punanti vuddhā, ārādhitā samacariyāya santo;
બહુસ્સુતા ઇસયો સીલવન્તો, અરહન્તમજ્ઝે સોત્થાનં તદાહુ.
Bahussutā isayo sīlavanto, arahantamajjhe sotthānaṃ tadāhu.
૧૬૪.
164.
એતાનિ ખો સોત્થાનાનિ લોકે, વિઞ્ઞુપ્પસત્થાનિ સુખુદ્રયાનિ 13;
Etāni kho sotthānāni loke, viññuppasatthāni sukhudrayāni 14;
તાનીધ સેવેથ નરો સપઞ્ઞો, ન હિ મઙ્ગલે કિઞ્ચનમત્થિ સચ્ચન્તિ.
Tānīdha sevetha naro sapañño, na hi maṅgale kiñcanamatthi saccanti.
મહામઙ્ગલજાતકં પન્નરસમં.
Mahāmaṅgalajātakaṃ pannarasamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / જાતક-અટ્ઠકથા • Jātaka-aṭṭhakathā / [૪૫૩] ૧૫. મહામઙ્ગલજાતકવણ્ણના • [453] 15. Mahāmaṅgalajātakavaṇṇanā
