Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi |
೪೫೩. ಮಹಾಮಙ್ಗಲಜಾತಕಂ (೧೫)
453. Mahāmaṅgalajātakaṃ (15)
೧೫೫.
155.
ಕಿಂಸು ನರೋ ಜಪ್ಪಮಧಿಚ್ಚಕಾಲೇ, ಕಂ ವಾ ವಿಜ್ಜಂ ಕತಮಂ ವಾ ಸುತಾನಂ।
Kiṃsu naro jappamadhiccakāle, kaṃ vā vijjaṃ katamaṃ vā sutānaṃ;
ಸೋ ಮಚ್ಚೋ ಅಸ್ಮಿಞ್ಚ 1 ಪರಮ್ಹಿ ಲೋಕೇ, ಕಥಂ ಕರೋ ಸೋತ್ಥಾನೇನ ಗುತ್ತೋ॥
So macco asmiñca 2 paramhi loke, kathaṃ karo sotthānena gutto.
೧೫೬.
156.
ಯಸ್ಸ ದೇವಾ ಪಿತರೋ ಚ ಸಬ್ಬೇ, ಸರೀಸಪಾ 3 ಸಬ್ಬಭೂತಾನಿ ಚಾಪಿ।
Yassa devā pitaro ca sabbe, sarīsapā 4 sabbabhūtāni cāpi;
ಮೇತ್ತಾಯ ನಿಚ್ಚಂ ಅಪಚಿತಾನಿ ಹೋನ್ತಿ, ಭೂತೇಸು ವೇ ಸೋತ್ಥಾನಂ ತದಾಹು॥
Mettāya niccaṃ apacitāni honti, bhūtesu ve sotthānaṃ tadāhu.
೧೫೭.
157.
ಯೋ ಸಬ್ಬಲೋಕಸ್ಸ ನಿವಾತವುತ್ತಿ, ಇತ್ಥೀಪುಮಾನಂ ಸಹದಾರಕಾನಂ।
Yo sabbalokassa nivātavutti, itthīpumānaṃ sahadārakānaṃ;
ಖನ್ತಾ ದುರುತ್ತಾನಮಪ್ಪಟಿಕೂಲವಾದೀ, ಅಧಿವಾಸನಂ ಸೋತ್ಥಾನಂ ತದಾಹು॥
Khantā duruttānamappaṭikūlavādī, adhivāsanaṃ sotthānaṃ tadāhu.
೧೫೮.
158.
ಯೋ ನಾವಜಾನಾತಿ ಸಹಾಯಮಿತ್ತೇ 5, ಸಿಪ್ಪೇನ ಕುಲ್ಯಾಹಿ ಧನೇನ ಜಚ್ಚಾ।
Yo nāvajānāti sahāyamitte 6, sippena kulyāhi dhanena jaccā;
ರುಚಿಪಞ್ಞೋ ಅತ್ಥಕಾಲೇ ಮತೀಮಾ 7, ಸಹಾಯೇಸು ವೇ ಸೋತ್ಥಾನಂ ತದಾಹು॥
Rucipañño atthakāle matīmā 8, sahāyesu ve sotthānaṃ tadāhu.
೧೫೯.
159.
ಮಿತ್ತಾನಿ ವೇ ಯಸ್ಸ ಭವನ್ತಿ ಸನ್ತೋ, ಸಂವಿಸ್ಸತ್ಥಾ ಅವಿಸಂವಾದಕಸ್ಸ।
Mittāni ve yassa bhavanti santo, saṃvissatthā avisaṃvādakassa;
ನ ಮಿತ್ತದುಬ್ಭೀ ಸಂವಿಭಾಗೀ ಧನೇನ, ಮಿತ್ತೇಸು ವೇ ಸೋತ್ಥಾನಂ ತದಾಹು॥
Na mittadubbhī saṃvibhāgī dhanena, mittesu ve sotthānaṃ tadāhu.
೧೬೦.
160.
ಯಸ್ಸ ಭರಿಯಾ ತುಲ್ಯವಯಾ ಸಮಗ್ಗಾ, ಅನುಬ್ಬತಾ ಧಮ್ಮಕಾಮಾ ಪಜಾತಾ 9।
Yassa bhariyā tulyavayā samaggā, anubbatā dhammakāmā pajātā 10;
ಕೋಲಿನಿಯಾ ಸೀಲವತೀ ಪತಿಬ್ಬತಾ, ದಾರೇಸು ವೇ ಸೋತ್ಥಾನಂ ತದಾಹು॥
Koliniyā sīlavatī patibbatā, dāresu ve sotthānaṃ tadāhu.
೧೬೧.
161.
ಯಸ್ಸ ರಾಜಾ ಭೂತಪತಿ 11 ಯಸಸ್ಸೀ, ಜಾನಾತಿ ಸೋಚೇಯ್ಯಂ ಪರಕ್ಕಮಞ್ಚ।
Yassa rājā bhūtapati 12 yasassī, jānāti soceyyaṃ parakkamañca;
ಅದ್ವೇಜ್ಝತಾ ಸುಹದಯಂ ಮಮನ್ತಿ, ರಾಜೂಸು ವೇ ಸೋತ್ಥಾನಂ ತದಾಹು॥
Advejjhatā suhadayaṃ mamanti, rājūsu ve sotthānaṃ tadāhu.
೧೬೨.
162.
ಅನ್ನಞ್ಚ ಪಾನಞ್ಚ ದದಾತಿ ಸದ್ಧೋ, ಮಾಲಞ್ಚ ಗನ್ಧಞ್ಚ ವಿಲೇಪನಞ್ಚ।
Annañca pānañca dadāti saddho, mālañca gandhañca vilepanañca;
ಪಸನ್ನಚಿತ್ತೋ ಅನುಮೋದಮಾನೋ, ಸಗ್ಗೇಸು ವೇ ಸೋತ್ಥಾನಂ ತದಾಹು॥
Pasannacitto anumodamāno, saggesu ve sotthānaṃ tadāhu.
೧೬೩.
163.
ಯಮರಿಯಧಮ್ಮೇನ ಪುನನ್ತಿ ವುದ್ಧಾ, ಆರಾಧಿತಾ ಸಮಚರಿಯಾಯ ಸನ್ತೋ।
Yamariyadhammena punanti vuddhā, ārādhitā samacariyāya santo;
ಬಹುಸ್ಸುತಾ ಇಸಯೋ ಸೀಲವನ್ತೋ, ಅರಹನ್ತಮಜ್ಝೇ ಸೋತ್ಥಾನಂ ತದಾಹು॥
Bahussutā isayo sīlavanto, arahantamajjhe sotthānaṃ tadāhu.
೧೬೪.
164.
ಏತಾನಿ ಖೋ ಸೋತ್ಥಾನಾನಿ ಲೋಕೇ, ವಿಞ್ಞುಪ್ಪಸತ್ಥಾನಿ ಸುಖುದ್ರಯಾನಿ 13।
Etāni kho sotthānāni loke, viññuppasatthāni sukhudrayāni 14;
ತಾನೀಧ ಸೇವೇಥ ನರೋ ಸಪಞ್ಞೋ, ನ ಹಿ ಮಙ್ಗಲೇ ಕಿಞ್ಚನಮತ್ಥಿ ಸಚ್ಚನ್ತಿ॥
Tānīdha sevetha naro sapañño, na hi maṅgale kiñcanamatthi saccanti.
ಮಹಾಮಙ್ಗಲಜಾತಕಂ ಪನ್ನರಸಮಂ।
Mahāmaṅgalajātakaṃ pannarasamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೪೫೩] ೧೫. ಮಹಾಮಙ್ಗಲಜಾತಕವಣ್ಣನಾ • [453] 15. Mahāmaṅgalajātakavaṇṇanā