| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૧૦. મહાનામસુત્તવણ્ણના
10. Mahānāmasuttavaṇṇanā
૧૦. દસમે મહાનામોતિ દસબલસ્સ ચૂળપિતુ પુત્તો એકો સક્યરાજા. યેન ભગવા તેનુપસઙ્કમીતિ ભુત્તપાતરાસો હુત્વા દાસપરિજનપરિવુતો ગન્ધમાલાદીનિ ગાહાપેત્વા યત્થ સત્થા, તત્થ અગમાસિ. અરિયફલં અસ્સ આગતન્તિ આગતફલો. સિક્ખાત્તયસાસનં એતેન વિઞ્ઞાતન્તિ વિઞ્ઞાતસાસનો. ઇતિ અયં રાજા ‘‘સોતાપન્નસ્સ નિસ્સયવિહારં પુચ્છામી’’તિ પુચ્છન્તો એવમાહ.
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
નેવસ્સ રાગપરિયુટ્ઠિતન્તિ ન ઉપ્પજ્જમાનેન રાગેન ઉટ્ઠહિત્વા ગહિતં. ઉજુગતન્તિ બુદ્ધાનુસ્સતિકમ્મટ્ઠાને ઉજુકમેવ ગતં. તથાગતં આરબ્ભાતિ તથાગતગુણે આરબ્ભ. અત્થવેદન્તિ અટ્ઠકથં નિસ્સાય ઉપ્પન્નં પીતિપામોજ્જં. ધમ્મવેદન્તિ પાળિં નિસ્સાય ઉપ્પન્નં પીતિપામોજ્જં. ધમ્મૂપસઞ્હિતન્તિ પાળિઞ્ચ અટ્ઠકથઞ્ચ નિસ્સાય ઉપ્પન્નં. પમુદિતસ્સાતિ દુવિધેન પામોજ્જેન પમુદિતસ્સ. પીતિ જાયતીતિ પઞ્ચવિધા પીતિ નિબ્બત્તતિ. કાયો પસ્સમ્ભતીતિ નામકાયો ચ કરજકાયો ચ દરથપટિપ્પસ્સદ્ધિયા પટિપ્પસ્સમ્ભતિ. સુખન્તિ કાયિકચેતસિકસુખં. સમાધિયતીતિ આરમ્મણે સમ્મા ઠપિતં હોતિ. વિસમગતાય પજાયાતિ રાગદોસમોહવિસમગતેસુ સત્તેસુ. સમપ્પત્તોતિ સમં ઉપસમં પત્તો હુત્વા. સબ્યાપજ્ઝાયાતિ સદુક્ખાય. ધમ્મસોતં સમાપન્નોતિ વિપસ્સનાસઙ્ખાતં ધમ્મસોતં સમાપન્નો. બુદ્ધાનુસ્સતિં ભાવેતીતિ બુદ્ધાનુસ્સતિકમ્મટ્ઠાનં બ્રૂહેતિ વડ્ઢેતિ. ઇમિના નયેન સબ્બત્થ અત્થો વેદિતબ્બો. ઇતિ મહાનામો સોતાપન્નસ્સ નિસ્સયવિહારં પુચ્છિ. સત્થાપિસ્સ તમેવ કથેસિ. એવં ઇમસ્મિં સુત્તે સોતાપન્નોવ કથિતોતિ.
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
આહુનેય્યવગ્ગો પઠમો.
Āhuneyyavaggo paṭhamo.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧૦. મહાનામસુત્તં • 10. Mahānāmasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧૦. મહાનામસુત્તવણ્ણના • 10. Mahānāmasuttavaṇṇanā
