A World of Knowledge
    Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi

    ೫೪೫. ಮಹಾನಾರದಕಸ್ಸಪಜಾತಕಂ (೮)

    545. Mahānāradakassapajātakaṃ (8)

    ೧೧೫೩.

    1153.

    ‘‘ಅಹು ರಾಜಾ ವಿದೇಹಾನಂ, ಅಙ್ಗತಿ 1 ನಾಮ ಖತ್ತಿಯೋ।

    ‘‘Ahu rājā videhānaṃ, aṅgati 2 nāma khattiyo;

    ಪಹೂತಯೋಗ್ಗೋ ಧನಿಮಾ, ಅನನ್ತಬಲಪೋರಿಸೋ॥

    Pahūtayoggo dhanimā, anantabalaporiso.

    ೧೧೫೪.

    1154.

    ಸೋ ಚ ಪನ್ನರಸಿಂ 3 ರತ್ತಿಂ, ಪುರಿಮಯಾಮೇ ಅನಾಗತೇ।

    So ca pannarasiṃ 4 rattiṃ, purimayāme anāgate;

    ಚಾತುಮಾಸಾ 5 ಕೋಮುದಿಯಾ, ಅಮಚ್ಚೇ ಸನ್ನಿಪಾತಯಿ॥

    Cātumāsā 6 komudiyā, amacce sannipātayi.

    ೧೧೫೫.

    1155.

    ‘‘ಪಣ್ಡಿತೇ ಸುತಸಮ್ಪನ್ನೇ, ಮಿತಪುಬ್ಬೇ 7 ವಿಚಕ್ಖಣೇ।

    ‘‘Paṇḍite sutasampanne, mitapubbe 8 vicakkhaṇe;

    ವಿಜಯಞ್ಚ ಸುನಾಮಞ್ಚ, ಸೇನಾಪತಿಂ ಅಲಾತಕಂ॥

    Vijayañca sunāmañca, senāpatiṃ alātakaṃ.

    ೧೧೫೬.

    1156.

    ‘‘ತಮನುಪುಚ್ಛಿ ವೇದೇಹೋ, ‘‘ಪಚ್ಚೇಕಂ ಬ್ರೂಥ ಸಂ ರುಚಿಂ।

    ‘‘Tamanupucchi vedeho, ‘‘paccekaṃ brūtha saṃ ruciṃ;

    ಚಾತುಮಾಸಾ ಕೋಮುದಜ್ಜ, ಜುಣ್ಹಂ ಬ್ಯಪಹತಂ 9 ತಮಂ।

    Cātumāsā komudajja, juṇhaṃ byapahataṃ 10 tamaṃ;

    ಕಾಯಜ್ಜ ರತಿಯಾ ರತ್ತಿಂ, ವಿಹರೇಮು ಇಮಂ ಉತುಂ’’॥

    Kāyajja ratiyā rattiṃ, viharemu imaṃ utuṃ’’.

    ೧೧೫೭.

    1157.

    ‘‘ತತೋ ಸೇನಾಪತಿ ರಞ್ಞೋ, ಅಲಾತೋ ಏತದಬ್ರವಿ।

    ‘‘Tato senāpati rañño, alāto etadabravi;

    ‘‘ಹಟ್ಠಂ ಯೋಗ್ಗಂ ಬಲಂ ಸಬ್ಬಂ, ಸೇನಂ ಸನ್ನಾಹಯಾಮಸೇ॥

    ‘‘Haṭṭhaṃ yoggaṃ balaṃ sabbaṃ, senaṃ sannāhayāmase.

    ೧೧೫೮.

    1158.

    ‘‘ನಿಯ್ಯಾಮ ದೇವ ಯುದ್ಧಾಯ, ಅನನ್ತಬಲಪೋರಿಸಾ।

    ‘‘Niyyāma deva yuddhāya, anantabalaporisā;

    ಯೇ ತೇ ವಸಂ ನ ಆಯನ್ತಿ, ವಸಂ ಉಪನಯಾಮಸೇ 11

    Ye te vasaṃ na āyanti, vasaṃ upanayāmase 12;

    ಏಸಾ ಮಯ್ಹಂ ಸಕಾ ದಿಟ್ಠಿ, ಅಜಿತಂ ಓಜಿನಾಮಸೇ॥

    Esā mayhaṃ sakā diṭṭhi, ajitaṃ ojināmase.

    ೧೧೫೯.

    1159.

    ಅಲಾತಸ್ಸ ವಚೋ ಸುತ್ವಾ, ಸುನಾಮೋ ಏತದಬ್ರವಿ।

    Alātassa vaco sutvā, sunāmo etadabravi;

    ‘‘ಸಬ್ಬೇ ತುಯ್ಹಂ ಮಹಾರಾಜ, ಅಮಿತ್ತಾ ವಸಮಾಗತಾ॥

    ‘‘Sabbe tuyhaṃ mahārāja, amittā vasamāgatā.

    ೧೧೬೦.

    1160.

    ‘‘ನಿಕ್ಖಿತ್ತಸತ್ಥಾ ಪಚ್ಚತ್ಥಾ, ನಿವಾತಮನುವತ್ತರೇ।

    ‘‘Nikkhittasatthā paccatthā, nivātamanuvattare;

    ಉತ್ತಮೋ ಉಸ್ಸವೋ ಅಜ್ಜ, ನ ಯುದ್ಧಂ ಮಮ ರುಚ್ಚತಿ॥

    Uttamo ussavo ajja, na yuddhaṃ mama ruccati.

    ೧೧೬೧.

    1161.

    ‘‘ಅನ್ನಪಾನಞ್ಚ ಖಜ್ಜಞ್ಚ, ಖಿಪ್ಪಂ ಅಭಿಹರನ್ತು ತೇ।

    ‘‘Annapānañca khajjañca, khippaṃ abhiharantu te;

    ರಮಸ್ಸು ದೇವ ಕಾಮೇಹಿ, ನಚ್ಚಗೀತೇ ಸುವಾದಿತೇ’’॥

    Ramassu deva kāmehi, naccagīte suvādite’’.

    ೧೧೬೨.

    1162.

    ಸುನಾಮಸ್ಸ ವಚೋ ಸುತ್ವಾ, ವಿಜಯೋ ಏತದಬ್ರವಿ।

    Sunāmassa vaco sutvā, vijayo etadabravi;

    ‘‘ಸಬ್ಬೇ ಕಾಮಾ ಮಹಾರಾಜ, ನಿಚ್ಚಂ ತವ ಮುಪಟ್ಠಿತಾ॥

    ‘‘Sabbe kāmā mahārāja, niccaṃ tava mupaṭṭhitā.

    ೧೧೬೩.

    1163.

    ‘‘ನ ಹೇತೇ ದುಲ್ಲಭಾ ದೇವ, ತವ ಕಾಮೇಹಿ ಮೋದಿತುಂ।

    ‘‘Na hete dullabhā deva, tava kāmehi modituṃ;

    ಸದಾಪಿ ಕಾಮಾ ಸುಲಭಾ, ನೇತಂ ಚಿತ್ತಮತಂ 13 ಮಮ॥

    Sadāpi kāmā sulabhā, netaṃ cittamataṃ 14 mama.

    ೧೧೬೪.

    1164.

    ‘‘ಸಮಣಂ ಬ್ರಾಹ್ಮಣಂ ವಾಪಿ, ಉಪಾಸೇಮು ಬಹುಸ್ಸುತಂ।

    ‘‘Samaṇaṃ brāhmaṇaṃ vāpi, upāsemu bahussutaṃ;

    ಯೋ ನಜ್ಜ ವಿನಯೇ ಕಙ್ಖಂ, ಅತ್ಥಧಮ್ಮವಿದೂ ಇಸೇ’’॥

    Yo najja vinaye kaṅkhaṃ, atthadhammavidū ise’’.

    ೧೧೬೫.

    1165.

    ವಿಜಯಸ್ಸ ವಚೋ ಸುತ್ವಾ, ರಾಜಾ ಅಙ್ಗತಿ ಮಬ್ರವಿ।

    Vijayassa vaco sutvā, rājā aṅgati mabravi;

    ‘‘ಯಥಾ ವಿಜಯೋ ಭಣತಿ, ಮಯ್ಹಮ್ಪೇತಂವ ರುಚ್ಚತಿ॥

    ‘‘Yathā vijayo bhaṇati, mayhampetaṃva ruccati.

    ೧೧೬೬.

    1166.

    ‘‘ಸಮಣಂ ಬ್ರಾಹ್ಮಣಂ ವಾಪಿ, ಉಪಾಸೇಮು ಬಹುಸ್ಸುತಂ।

    ‘‘Samaṇaṃ brāhmaṇaṃ vāpi, upāsemu bahussutaṃ;

    ಯೋ ನಜ್ಜ ವಿನಯೇ ಕಙ್ಖಂ, ಅತ್ಥಧಮ್ಮವಿದೂ ಇಸೇ॥

    Yo najja vinaye kaṅkhaṃ, atthadhammavidū ise.

    ೧೧೬೭.

    1167.

    ‘‘ಸಬ್ಬೇವ ಸನ್ತಾ ಕರೋಥ ಮತಿಂ, ಕಂ ಉಪಾಸೇಮು ಪಣ್ಡಿತಂ।

    ‘‘Sabbeva santā karotha matiṃ, kaṃ upāsemu paṇḍitaṃ;

    ಯೋ 15 ನಜ್ಜ ವಿನಯೇ ಕಙ್ಖಂ, ಅತ್ಥಧಮ್ಮವಿದೂ ಇಸೇ’’॥

    Yo 16 najja vinaye kaṅkhaṃ, atthadhammavidū ise’’.

    ೧೧೬೮.

    1168.

    ‘‘ವೇದೇಹಸ್ಸ ವಚೋ ಸುತ್ವಾ, ಅಲಾತೋ ಏತದಬ್ರವಿ।

    ‘‘Vedehassa vaco sutvā, alāto etadabravi;

    ‘‘ಅತ್ಥಾಯಂ ಮಿಗದಾಯಸ್ಮಿಂ, ಅಚೇಲೋ ಧೀರಸಮ್ಮತೋ॥

    ‘‘Atthāyaṃ migadāyasmiṃ, acelo dhīrasammato.

    ೧೧೬೯.

    1169.

    ‘‘ಗುಣೋ ಕಸ್ಸಪಗೋತ್ತಾಯಂ, ಸುತೋ ಚಿತ್ರಕಥೀ ಗಣೀ।

    ‘‘Guṇo kassapagottāyaṃ, suto citrakathī gaṇī;

    ತಂ ದೇವ 17 ಪಯಿರುಪಾಸೇಮು 18, ಸೋ ನೋ ಕಙ್ಖಂ ವಿನೇಸ್ಸತಿ’’॥

    Taṃ deva 19 payirupāsemu 20, so no kaṅkhaṃ vinessati’’.

    ೧೧೭೦.

    1170.

    ‘‘ಅಲಾತಸ್ಸ ವಚೋ ಸುತ್ವಾ, ರಾಜಾ ಚೋದೇಸಿ ಸಾರಥಿಂ।

    ‘‘Alātassa vaco sutvā, rājā codesi sārathiṃ;

    ‘‘ಮಿಗದಾಯಂ ಗಮಿಸ್ಸಾಮ, ಯುತ್ತಂ ಯಾನಂ ಇಧಾನಯ’’॥

    ‘‘Migadāyaṃ gamissāma, yuttaṃ yānaṃ idhānaya’’.

    ೧೧೭೧.

    1171.

    ತಸ್ಸ ಯಾನಂ ಅಯೋಜೇಸುಂ, ದನ್ತಂ ರೂಪಿಯಪಕ್ಖರಂ 21

    Tassa yānaṃ ayojesuṃ, dantaṃ rūpiyapakkharaṃ 22;

    ಸುಕ್ಕಮಟ್ಠಪರಿವಾರಂ, ಪಣ್ಡರಂ ದೋಸಿನಾಮುಖಂ॥

    Sukkamaṭṭhaparivāraṃ, paṇḍaraṃ dosināmukhaṃ.

    ೧೧೭೨.

    1172.

    ‘‘ತತ್ರಾಸುಂ ಕುಮುದಾಯುತ್ತಾ, ಚತ್ತಾರೋ ಸಿನ್ಧವಾ ಹಯಾ।

    ‘‘Tatrāsuṃ kumudāyuttā, cattāro sindhavā hayā;

    ಅನಿಲೂಪಮಸಮುಪ್ಪಾತಾ 23, ಸುದನ್ತಾ ಸೋಣ್ಣಮಾಲಿನೋ॥

    Anilūpamasamuppātā 24, sudantā soṇṇamālino.

    ೧೧೭೩.

    1173.

    ‘‘ಸೇತಚ್ಛತ್ತಂ ಸೇತರಥೋ, ಸೇತಸ್ಸಾ ಸೇತಬೀಜನೀ।

    ‘‘Setacchattaṃ setaratho, setassā setabījanī;

    ವೇದೇಹೋ ಸಹಮಚ್ಚೇಹಿ, ನಿಯ್ಯಂ ಚನ್ದೋವ ಸೋಭತಿ॥

    Vedeho sahamaccehi, niyyaṃ candova sobhati.

    ೧೧೭೪.

    1174.

    ‘‘ತಮನುಯಾಯಿಂಸು ಬಹವೋ, ಇನ್ದಿಖಗ್ಗಧರಾ 25 ಬಲೀ।

    ‘‘Tamanuyāyiṃsu bahavo, indikhaggadharā 26 balī;

    ಅಸ್ಸಪಿಟ್ಠಿಗತಾ ವೀರಾ, ನರಾ ನರವರಾಧಿಪಂ॥

    Assapiṭṭhigatā vīrā, narā naravarādhipaṃ.

    ೧೧೭೫.

    1175.

    ಸೋ ಮುಹುತ್ತಂವ ಯಾಯಿತ್ವಾ, ಯಾನಾ ಓರುಯ್ಹ ಖತ್ತಿಯೋ।

    So muhuttaṃva yāyitvā, yānā oruyha khattiyo;

    ವೇದೇಹೋ ಸಹಮಚ್ಚೇಹಿ, ಪತ್ತೀ ಗುಣಮುಪಾಗಮಿ॥

    Vedeho sahamaccehi, pattī guṇamupāgami.

    ೧೧೭೬.

    1176.

    ಯೇಪಿ ತತ್ಥ ತದಾ ಆಸುಂ, ಬ್ರಾಹ್ಮಣಿಬ್ಭಾ ಸಮಾಗತಾ।

    Yepi tattha tadā āsuṃ, brāhmaṇibbhā samāgatā;

    ನ ತೇ ಅಪನಯೀ ರಾಜಾ, ಅಕತಂ ಭೂಮಿಮಾಗತೇ॥

    Na te apanayī rājā, akataṃ bhūmimāgate.

    ೧೧೭೭.

    1177.

    ‘‘ತತೋ ಸೋ ಮುದುಕಾ ಭಿಸಿಯಾ, ಮುದುಚಿತ್ತಕಸನ್ಥತೇ 27

    ‘‘Tato so mudukā bhisiyā, muducittakasanthate 28;

    ಮುದುಪಚ್ಚತ್ಥತೇ ರಾಜಾ, ಏಕಮನ್ತಂ ಉಪಾವಿಸಿ॥

    Mudupaccatthate rājā, ekamantaṃ upāvisi.

    ೧೧೭೮.

    1178.

    ‘‘ನಿಸಜ್ಜ ರಾಜಾ ಸಮ್ಮೋದಿ, ಕಥಂ ಸಾರಣಿಯಂ ತತೋ।

    ‘‘Nisajja rājā sammodi, kathaṃ sāraṇiyaṃ tato;

    ‘‘ಕಚ್ಚಿ ಯಾಪನಿಯಂ ಭನ್ತೇ, ವಾತಾನಮವಿಯಗ್ಗತಾ 29

    ‘‘Kacci yāpaniyaṃ bhante, vātānamaviyaggatā 30.

    ೧೧೭೯.

    1179.

    ‘‘ಕಚ್ಚಿ ಅಕಸಿರಾ ವುತ್ತಿ, ಲಭಸಿ 31 ಪಿಣ್ಡಯಾಪನಂ 32

    ‘‘Kacci akasirā vutti, labhasi 33 piṇḍayāpanaṃ 34;

    ಅಪಾಬಾಧೋ ಚಸಿ ಕಚ್ಚಿ, ಚಕ್ಖುಂ ನ ಪರಿಹಾಯತಿ’’॥

    Apābādho casi kacci, cakkhuṃ na parihāyati’’.

    ೧೧೮೦.

    1180.

    ತಂ ಗುಣೋ ಪಟಿಸಮ್ಮೋದಿ, ವೇದೇಹಂ ವಿನಯೇ ರತಂ।

    Taṃ guṇo paṭisammodi, vedehaṃ vinaye rataṃ;

    ‘‘ಯಾಪನೀಯಂ ಮಹಾರಾಜ, ಸಬ್ಬಮೇತಂ ತದೂಭಯಂ॥

    ‘‘Yāpanīyaṃ mahārāja, sabbametaṃ tadūbhayaṃ.

    ೧೧೮೧.

    1181.

    ‘‘ಕಚ್ಚಿ ತುಯ್ಹಮ್ಪಿ ವೇದೇಹ, ಪಚ್ಚನ್ತಾ ನ ಬಲೀಯರೇ।

    ‘‘Kacci tuyhampi vedeha, paccantā na balīyare;

    ಕಚ್ಚಿ ಅರೋಗಂ ಯೋಗ್ಗಂ ತೇ, ಕಚ್ಚಿ ವಹತಿ ವಾಹನಂ।

    Kacci arogaṃ yoggaṃ te, kacci vahati vāhanaṃ;

    ಕಚ್ಚಿ ತೇ ಬ್ಯಾಧಯೋ ನತ್ಥಿ, ಸರೀರಸ್ಸುಪತಾಪಿಯಾ’’ 35

    Kacci te byādhayo natthi, sarīrassupatāpiyā’’ 36.

    ೧೧೮೨.

    1182.

    ಪಟಿಸಮ್ಮೋದಿತೋ ರಾಜಾ, ತತೋ ಪುಚ್ಛಿ ಅನನ್ತರಾ।

    Paṭisammodito rājā, tato pucchi anantarā;

    ಅತ್ಥಂ ಧಮ್ಮಞ್ಚ ಞಾಯಞ್ಚ, ಧಮ್ಮಕಾಮೋ ರಥೇಸಭೋ॥

    Atthaṃ dhammañca ñāyañca, dhammakāmo rathesabho.

    ೧೧೮೩.

    1183.

    ‘‘ಕಥಂ ಧಮ್ಮಂ ಚರೇ ಮಚ್ಚೋ, ಮಾತಾಪಿತೂಸು ಕಸ್ಸಪ।

    ‘‘Kathaṃ dhammaṃ care macco, mātāpitūsu kassapa;

    ಕಥಂ ಚರೇ ಆಚರಿಯೇ, ಪುತ್ತದಾರೇ ಕಥಂ ಚರೇ॥

    Kathaṃ care ācariye, puttadāre kathaṃ care.

    ೧೧೮೪.

    1184.

    ‘‘ಕಥಂ ಚರೇಯ್ಯ ವುಡ್ಢೇಸು, ಕಥಂ ಸಮಣಬ್ರಾಹ್ಮಣೇ।

    ‘‘Kathaṃ careyya vuḍḍhesu, kathaṃ samaṇabrāhmaṇe;

    ಕಥಞ್ಚ ಬಲಕಾಯಸ್ಮಿಂ, ಕಥಂ ಜನಪದೇ ಚರೇ॥

    Kathañca balakāyasmiṃ, kathaṃ janapade care.

    ೧೧೮೫.

    1185.

    ‘‘ಕಥಂ ಧಮ್ಮಂ ಚರಿತ್ವಾನ, ಮಚ್ಚಾ ಗಚ್ಛನ್ತಿ 37 ಸುಗ್ಗತಿಂ।

    ‘‘Kathaṃ dhammaṃ caritvāna, maccā gacchanti 38 suggatiṃ;

    ಕಥಞ್ಚೇಕೇ ಅಧಮ್ಮಟ್ಠಾ, ಪತನ್ತಿ ನಿರಯಂ ಅಥೋ’’॥

    Kathañceke adhammaṭṭhā, patanti nirayaṃ atho’’.

    ೧೧೮೬.

    1186.

    ‘‘ವೇದೇಹಸ್ಸ ವಚೋ ಸುತ್ವಾ, ಕಸ್ಸಪೋ ಏತದಬ್ರವಿ।

    ‘‘Vedehassa vaco sutvā, kassapo etadabravi;

    ‘‘‘ಸುಣೋಹಿ ಮೇ ಮಹಾರಾಜ, ಸಚ್ಚಂ ಅವಿತಥಂ ಪದಂ॥

    ‘‘‘Suṇohi me mahārāja, saccaṃ avitathaṃ padaṃ.

    ೧೧೮೭.

    1187.

    ‘‘‘ನತ್ಥಿ ಧಮ್ಮಚರಿತಸ್ಸ 39, ಫಲಂ ಕಲ್ಯಾಣಪಾಪಕಂ।

    ‘‘‘Natthi dhammacaritassa 40, phalaṃ kalyāṇapāpakaṃ;

    ನತ್ಥಿ ದೇವ ಪರೋ ಲೋಕೋ, ಕೋ ತತೋ ಹಿ ಇಧಾಗತೋ॥

    Natthi deva paro loko, ko tato hi idhāgato.

    ೧೧೮೮.

    1188.

    ‘‘‘ನತ್ಥಿ ದೇವ ಪಿತರೋ ವಾ, ಕುತೋ ಮಾತಾ ಕುತೋ ಪಿತಾ।

    ‘‘‘Natthi deva pitaro vā, kuto mātā kuto pitā;

    ನತ್ಥಿ ಆಚರಿಯೋ ನಾಮ, ಅದನ್ತಂ ಕೋ ದಮೇಸ್ಸತಿ॥

    Natthi ācariyo nāma, adantaṃ ko damessati.

    ೧೧೮೯.

    1189.

    ‘‘‘ಸಮತುಲ್ಯಾನಿ ಭೂತಾನಿ, ನತ್ಥಿ ಜೇಟ್ಠಾಪಚಾಯಿಕಾ।

    ‘‘‘Samatulyāni bhūtāni, natthi jeṭṭhāpacāyikā;

    ನತ್ಥಿ ಬಲಂ ವೀರಿಯಂ ವಾ, ಕುತೋ ಉಟ್ಠಾನಪೋರಿಸಂ।

    Natthi balaṃ vīriyaṃ vā, kuto uṭṭhānaporisaṃ;

    ನಿಯತಾನಿ ಹಿ ಭೂತಾನಿ, ಯಥಾ ಗೋಟವಿಸೋ ತಥಾ॥

    Niyatāni hi bhūtāni, yathā goṭaviso tathā.

    ೧೧೯೦.

    1190.

    ‘‘‘ಲದ್ಧೇಯ್ಯಂ ಲಭತೇ ಮಚ್ಚೋ, ತತ್ಥ ದಾನಫಲಂ ಕುತೋ।

    ‘‘‘Laddheyyaṃ labhate macco, tattha dānaphalaṃ kuto;

    ನತ್ಥಿ ದಾನಫಲಂ ದೇವ, ಅವಸೋ ದೇವವೀರಿಯೋ॥

    Natthi dānaphalaṃ deva, avaso devavīriyo.

    ೧೧೯೧.

    1191.

    ‘‘‘ಬಾಲೇಹಿ ದಾನಂ ಪಞ್ಞತ್ತಂ, ಪಣ್ಡಿತೇಹಿ ಪಟಿಚ್ಛಿತಂ।

    ‘‘‘Bālehi dānaṃ paññattaṃ, paṇḍitehi paṭicchitaṃ;

    ಅವಸಾ ದೇನ್ತಿ ಧೀರಾನಂ, ಬಾಲಾ ಪಣ್ಡಿತಮಾನಿನೋ॥

    Avasā denti dhīrānaṃ, bālā paṇḍitamānino.

    ೧೧೯೨.

    1192.

    ‘‘‘ಸತ್ತಿಮೇ ಸಸ್ಸತಾ ಕಾಯಾ, ಅಚ್ಛೇಜ್ಜಾ ಅವಿಕೋಪಿನೋ।

    ‘‘‘Sattime sassatā kāyā, acchejjā avikopino;

    ತೇಜೋ ಪಥವೀ ಆಪೋ ಚ, ವಾಯೋ ಸುಖಂ ದುಖಞ್ಚಿಮೇ।

    Tejo pathavī āpo ca, vāyo sukhaṃ dukhañcime;

    ಜೀವೇ ಚ ಸತ್ತಿಮೇ ಕಾಯಾ, ಯೇಸಂ ಛೇತ್ತಾ ನ ವಿಜ್ಜತಿ॥

    Jīve ca sattime kāyā, yesaṃ chettā na vijjati.

    ೧೧೯೩.

    1193.

    ‘‘‘ನತ್ಥಿ ಹನ್ತಾ ವ ಛೇತ್ತಾ ವಾ, ಹಞ್ಞೇ ಯೇವಾಪಿ 41 ಕೋಚಿ ನಂ।

    ‘‘‘Natthi hantā va chettā vā, haññe yevāpi 42 koci naṃ;

    ಅನ್ತರೇನೇವ ಕಾಯಾನಂ, ಸತ್ಥಾನಿ ವೀತಿವತ್ತರೇ॥

    Antareneva kāyānaṃ, satthāni vītivattare.

    ೧೧೯೪.

    1194.

    ‘‘‘ಯೋ ಚಾಪಿ 43 ಸಿರಮಾದಾಯ, ಪರೇಸಂ ನಿಸಿತಾಸಿನಾ।

    ‘‘‘Yo cāpi 44 siramādāya, paresaṃ nisitāsinā;

    ನ ಸೋ ಛಿನ್ದತಿ ತೇ ಕಾಯೇ, ತತ್ಥ ಪಾಪಫಲಂ ಕುತೋ॥

    Na so chindati te kāye, tattha pāpaphalaṃ kuto.

    ೧೧೯೫.

    1195.

    ‘‘‘ಚುಲ್ಲಾಸೀತಿಮಹಾಕಪ್ಪೇ, ಸಬ್ಬೇ ಸುಜ್ಝನ್ತಿ ಸಂಸರಂ।

    ‘‘‘Cullāsītimahākappe, sabbe sujjhanti saṃsaraṃ;

    ಅನಾಗತೇ ತಮ್ಹಿ ಕಾಲೇ, ಸಞ್ಞತೋಪಿ ನ ಸುಜ್ಝತಿ॥

    Anāgate tamhi kāle, saññatopi na sujjhati.

    ೧೧೯೬.

    1196.

    ‘‘‘ಚರಿತ್ವಾಪಿ ಬಹುಂ ಭದ್ರಂ, ನೇವ ಸುಜ್ಝನ್ತಿನಾಗತೇ।

    ‘‘‘Caritvāpi bahuṃ bhadraṃ, neva sujjhantināgate;

    ಪಾಪಞ್ಚೇಪಿ ಬಹುಂ ಕತ್ವಾ, ತಂ ಖಣಂ ನಾತಿವತ್ತರೇ॥

    Pāpañcepi bahuṃ katvā, taṃ khaṇaṃ nātivattare.

    ೧೧೯೭.

    1197.

    ‘‘‘ಅನುಪುಬ್ಬೇನ ನೋ ಸುದ್ಧಿ, ಕಪ್ಪಾನಂ ಚುಲ್ಲಸೀತಿಯಾ।

    ‘‘‘Anupubbena no suddhi, kappānaṃ cullasītiyā;

    ನಿಯತಿಂ ನಾತಿವತ್ತಾಮ, ವೇಲನ್ತಮಿವ ಸಾಗರೋ’’’॥

    Niyatiṃ nātivattāma, velantamiva sāgaro’’’.

    ೧೧೯೮.

    1198.

    ಕಸ್ಸಪಸ್ಸ ವಚೋ ಸುತ್ವಾ, ಅಲಾತೋ ಏತದಬ್ರವಿ।

    Kassapassa vaco sutvā, alāto etadabravi;

    ‘‘ಯಥಾ ಭದನ್ತೋ ಭಣತಿ, ಮಯ್ಹಮ್ಪೇತಂವ ರುಚ್ಚತಿ॥

    ‘‘Yathā bhadanto bhaṇati, mayhampetaṃva ruccati.

    ೧೧೯೯.

    1199.

    ‘‘ಅಹಮ್ಪಿ ಪುರಿಮಂ ಜಾತಿಂ, ಸರೇ ಸಂಸರಿತತ್ತನೋ।

    ‘‘Ahampi purimaṃ jātiṃ, sare saṃsaritattano;

    ಪಿಙ್ಗಲೋ ನಾಮಹಂ ಆಸಿಂ, ಲುದ್ದೋ ಗೋಘಾತಕೋ ಪುರೇ॥

    Piṅgalo nāmahaṃ āsiṃ, luddo goghātako pure.

    ೧೨೦೦.

    1200.

    ‘‘ಬಾರಾಣಸಿಯಂ ಫೀತಾಯಂ, ಬಹುಂ ಪಾಪಂ ಕತಂ ಮಯಾ।

    ‘‘Bārāṇasiyaṃ phītāyaṃ, bahuṃ pāpaṃ kataṃ mayā;

    ಬಹೂ ಮಯಾ ಹತಾ ಪಾಣಾ, ಮಹಿಂಸಾ ಸೂಕರಾ ಅಜಾ॥

    Bahū mayā hatā pāṇā, mahiṃsā sūkarā ajā.

    ೧೨೦೧.

    1201.

    ‘‘ತತೋ ಚುತೋ ಇಧ ಜಾತೋ, ಇದ್ಧೇ ಸೇನಾಪತೀಕುಲೇ।

    ‘‘Tato cuto idha jāto, iddhe senāpatīkule;

    ನತ್ಥಿ ನೂನ ಫಲಂ ಪಾಪಂ, ಯೋಹಂ 45 ನ ನಿರಯಂ ಗತೋ॥

    Natthi nūna phalaṃ pāpaṃ, yohaṃ 46 na nirayaṃ gato.

    ೧೨೦೨.

    1202.

    ಅಥೇತ್ಥ ಬೀಜಕೋ ನಾಮ, ದಾಸೋ ಆಸಿ ಪಟಚ್ಚರೀ 47

    Athettha bījako nāma, dāso āsi paṭaccarī 48;

    ಉಪೋಸಥಂ ಉಪವಸನ್ತೋ, ಗುಣಸನ್ತಿಕುಪಾಗಮಿ॥

    Uposathaṃ upavasanto, guṇasantikupāgami.

    ೧೨೦೩.

    1203.

    ಕಸ್ಸಪಸ್ಸ ವಚೋ ಸುತ್ವಾ, ಅಲಾತಸ್ಸ ಚ ಭಾಸಿತಂ।

    Kassapassa vaco sutvā, alātassa ca bhāsitaṃ;

    ಪಸ್ಸಸನ್ತೋ ಮುಹುಂ ಉಣ್ಹಂ, ರುದಂ ಅಸ್ಸೂನಿ ವತ್ತಯಿ॥

    Passasanto muhuṃ uṇhaṃ, rudaṃ assūni vattayi.

    ೧೨೦೪.

    1204.

    ತಮನುಪುಚ್ಛಿ ವೇದೇಹೋ, ‘‘ಕಿಮತ್ಥಂ ಸಮ್ಮ ರೋದಸಿ।

    Tamanupucchi vedeho, ‘‘kimatthaṃ samma rodasi;

    ಕಿಂ ತೇ ಸುತಂ ವಾ ದಿಟ್ಠಂ ವಾ, ಕಿಂ ಮಂ ವೇದೇಸಿ ವೇದನಂ’’॥

    Kiṃ te sutaṃ vā diṭṭhaṃ vā, kiṃ maṃ vedesi vedanaṃ’’.

    ೧೨೦೫.

    1205.

    ವೇದೇಹಸ್ಸ ವಚೋ ಸುತ್ವಾ, ಬೀಜಕೋ ಏತದಬ್ರವಿ।

    Vedehassa vaco sutvā, bījako etadabravi;

    ‘‘ನತ್ಥಿ ಮೇ ವೇದನಾ ದುಕ್ಖಾ, ಮಹಾರಾಜ ಸುಣೋಹಿ ಮೇ॥

    ‘‘Natthi me vedanā dukkhā, mahārāja suṇohi me.

    ೧೨೦೬.

    1206.

    ‘‘ಅಹಮ್ಪಿ ಪುರಿಮಂ ಜಾತಿಂ, ಸರಾಮಿ ಸುಖಮತ್ತನೋ।

    ‘‘Ahampi purimaṃ jātiṃ, sarāmi sukhamattano;

    ಸಾಕೇತಾಹಂ ಪುರೇ ಆಸಿಂ, ಭಾವಸೇಟ್ಠಿ ಗುಣೇ ರತೋ॥

    Sāketāhaṃ pure āsiṃ, bhāvaseṭṭhi guṇe rato.

    ೧೨೦೭.

    1207.

    ‘‘ಸಮ್ಮತೋ ಬ್ರಾಹ್ಮಣಿಬ್ಭಾನಂ, ಸಂವಿಭಾಗರತೋ ಸುಚಿ।

    ‘‘Sammato brāhmaṇibbhānaṃ, saṃvibhāgarato suci;

    ನ ಚಾಪಿ ಪಾಪಕಂ ಕಮ್ಮಂ, ಸರಾಮಿ ಕತಮತ್ತನೋ॥

    Na cāpi pāpakaṃ kammaṃ, sarāmi katamattano.

    ೧೨೦೮.

    1208.

    ‘‘ತತೋ ಚುತಾಹಂ ವೇದೇಹ, ಇಧ ಜಾತೋ ದುರಿತ್ಥಿಯಾ।

    ‘‘Tato cutāhaṃ vedeha, idha jāto duritthiyā;

    ಗಬ್ಭಮ್ಹಿ ಕುಮ್ಭದಾಸಿಯಾ, ಯತೋ ಜಾತೋ ಸುದುಗ್ಗತೋ॥

    Gabbhamhi kumbhadāsiyā, yato jāto suduggato.

    ೧೨೦೯.

    1209.

    ‘‘ಏವಮ್ಪಿ ದುಗ್ಗತೋ ಸನ್ತೋ, ಸಮಚರಿಯಂ ಅಧಿಟ್ಠಿತೋ।

    ‘‘Evampi duggato santo, samacariyaṃ adhiṭṭhito;

    ಉಪಡ್ಢಭಾಗಂ ಭತ್ತಸ್ಸ, ದದಾಮಿ ಯೋ ಮೇ ಇಚ್ಛತಿ॥

    Upaḍḍhabhāgaṃ bhattassa, dadāmi yo me icchati.

    ೧೨೧೦.

    1210.

    ‘‘ಚಾತುದ್ದಸಿಂ ಪಞ್ಚದಸಿಂ, ಸದಾ ಉಪವಸಾಮಹಂ।

    ‘‘Cātuddasiṃ pañcadasiṃ, sadā upavasāmahaṃ;

    ನ ಚಾಪಿ 49 ಭೂತೇ ಹಿಂಸಾಮಿ, ಥೇಯ್ಯಞ್ಚಾಪಿ ವಿವಜ್ಜಯಿಂ॥

    Na cāpi 50 bhūte hiṃsāmi, theyyañcāpi vivajjayiṃ.

    ೧೨೧೧.

    1211.

    ‘‘ಸಬ್ಬಮೇವ ಹಿ ನೂನೇತಂ, ಸುಚಿಣ್ಣಂ ಭವತಿ ನಿಪ್ಫಲಂ।

    ‘‘Sabbameva hi nūnetaṃ, suciṇṇaṃ bhavati nipphalaṃ;

    ನಿರತ್ಥಂ ಮಞ್ಞಿದಂ ಸೀಲಂ, ಅಲಾತೋ ಭಾಸತೀ ಯಥಾ॥

    Niratthaṃ maññidaṃ sīlaṃ, alāto bhāsatī yathā.

    ೧೨೧೨.

    1212.

    ‘‘ಕಲಿಮೇವ ನೂನ ಗಣ್ಹಾಮಿ, ಅಸಿಪ್ಪೋ ಧುತ್ತಕೋ ಯಥಾ।

    ‘‘Kalimeva nūna gaṇhāmi, asippo dhuttako yathā;

    ಕಟಂ ಅಲಾತೋ ಗಣ್ಹಾತಿ, ಕಿತವೋಸಿಕ್ಖಿತೋ ಯಥಾ॥

    Kaṭaṃ alāto gaṇhāti, kitavosikkhito yathā.

    ೧೨೧೩.

    1213.

    ‘‘ದ್ವಾರಂ ನಪ್ಪಟಿಪಸ್ಸಾಮಿ, ಯೇನ ಗಚ್ಛಾಮಿ ಸುಗ್ಗತಿಂ।

    ‘‘Dvāraṃ nappaṭipassāmi, yena gacchāmi suggatiṃ;

    ತಸ್ಮಾ ರಾಜ ಪರೋದಾಮಿ, ಸುತ್ವಾ ಕಸ್ಸಪಭಾಸಿತಂ’’॥

    Tasmā rāja parodāmi, sutvā kassapabhāsitaṃ’’.

    ೧೨೧೪.

    1214.

    ಬೀಜಕಸ್ಸ ವಚೋ ಸುತ್ವಾ, ರಾಜಾ ಅಙ್ಗತಿ ಮಬ್ರವಿ।

    Bījakassa vaco sutvā, rājā aṅgati mabravi;

    ‘‘ನತ್ಥಿ ದ್ವಾರಂ ಸುಗತಿಯಾ, ನಿಯತಿಂ 51 ಕಙ್ಖ ಬೀಜಕ॥

    ‘‘Natthi dvāraṃ sugatiyā, niyatiṃ 52 kaṅkha bījaka.

    ೧೨೧೫.

    1215.

    ‘‘ಸುಖಂ ವಾ ಯದಿ ವಾ ದುಕ್ಖಂ, ನಿಯತಿಯಾ ಕಿರ ಲಬ್ಭತಿ।

    ‘‘Sukhaṃ vā yadi vā dukkhaṃ, niyatiyā kira labbhati;

    ಸಂಸಾರಸುದ್ಧಿ ಸಬ್ಬೇಸಂ, ಮಾ ತುರಿತ್ಥೋ 53 ಅನಾಗತೇ॥

    Saṃsārasuddhi sabbesaṃ, mā turittho 54 anāgate.

    ೧೨೧೬.

    1216.

    ‘‘ಅಹಮ್ಪಿ ಪುಬ್ಬೇ ಕಲ್ಯಾಣೋ, ಬ್ರಾಹ್ಮಣಿಬ್ಭೇಸು ಬ್ಯಾವಟೋ 55

    ‘‘Ahampi pubbe kalyāṇo, brāhmaṇibbhesu byāvaṭo 56;

    ವೋಹಾರಮನುಸಾಸನ್ತೋ , ರತಿಹೀನೋ ತದನ್ತರಾ’’॥

    Vohāramanusāsanto , ratihīno tadantarā’’.

    ೧೨೧೭.

    1217.

    ‘‘ಪುನಪಿ ಭನ್ತೇ ದಕ್ಖೇಮು, ಸಙ್ಗತಿ ಚೇ ಭವಿಸ್ಸತಿ’’।

    ‘‘Punapi bhante dakkhemu, saṅgati ce bhavissati’’;

    ಇದಂ ವತ್ವಾನ ವೇದೇಹೋ, ಪಚ್ಚಗಾ ಸನಿವೇಸನಂ॥

    Idaṃ vatvāna vedeho, paccagā sanivesanaṃ.

    ೧೨೧೮.

    1218.

    ತತೋ ರತ್ಯಾ ವಿವಸಾನೇ, ಉಪಟ್ಠಾನಮ್ಹಿ ಅಙ್ಗತಿ।

    Tato ratyā vivasāne, upaṭṭhānamhi aṅgati;

    ಅಮಚ್ಚೇ ಸನ್ನಿಪಾತೇತ್ವಾ, ಇದಂ ವಚನಮಬ್ರವಿ॥

    Amacce sannipātetvā, idaṃ vacanamabravi.

    ೧೨೧೯.

    1219.

    ‘‘ಚನ್ದಕೇ ಮೇ ವಿಮಾನಸ್ಮಿಂ, ಸದಾ ಕಾಮೇ ವಿಧೇನ್ತು ಮೇ।

    ‘‘Candake me vimānasmiṃ, sadā kāme vidhentu me;

    ಮಾ ಉಪಗಚ್ಛುಂ ಅತ್ಥೇಸು, ಗುಯ್ಹಪ್ಪಕಾಸಿಯೇಸು ಚ॥

    Mā upagacchuṃ atthesu, guyhappakāsiyesu ca.

    ೧೨೨೦.

    1220.

    ‘‘ವಿಜಯೋ ಚ ಸುನಾಮೋ ಚ, ಸೇನಾಪತಿ ಅಲಾತಕೋ।

    ‘‘Vijayo ca sunāmo ca, senāpati alātako;

    ಏತೇ ಅತ್ಥೇ ನಿಸೀದನ್ತು, ವೋಹಾರಕುಸಲಾ ತಯೋ’’॥

    Ete atthe nisīdantu, vohārakusalā tayo’’.

    ೧೨೨೧.

    1221.

    ಇದಂ ವತ್ವಾನ ವೇದೇಹೋ, ಕಾಮೇವ ಬಹುಮಞ್ಞಥ।

    Idaṃ vatvāna vedeho, kāmeva bahumaññatha;

    ನ ಚಾಪಿ ಬ್ರಾಹ್ಮಣಿಬ್ಭೇಸು, ಅತ್ಥೇ ಕಿಸ್ಮಿಞ್ಚಿ ಬ್ಯಾವಟೋ॥

    Na cāpi brāhmaṇibbhesu, atthe kismiñci byāvaṭo.

    ೧೨೨೨.

    1222.

    ತತೋ ದ್ವೇಸತ್ತರತ್ತಸ್ಸ, ವೇದೇಹಸ್ಸತ್ರಜಾ ಪಿಯಾ।

    Tato dvesattarattassa, vedehassatrajā piyā;

    ರಾಜಕಞ್ಞಾ ರುಚಾ 57 ನಾಮ, ಧಾತಿಮಾತರಮಬ್ರವಿ॥

    Rājakaññā rucā 58 nāma, dhātimātaramabravi.

    ೧೨೨೩.

    1223.

    ‘ಅಲಙ್ಕರೋಥ ಮಂ ಖಿಪ್ಪಂ, ಸಖಿಯೋ ಚಾಲಙ್ಕರೋನ್ತು 59 ಮೇ।

    ‘Alaṅkarotha maṃ khippaṃ, sakhiyo cālaṅkarontu 60 me;

    ಸುವೇ ಪನ್ನರಸೋ ದಿಬ್ಯೋ, ಗಚ್ಛಂ ಇಸ್ಸರಸನ್ತಿಕೇ’ 61

    Suve pannaraso dibyo, gacchaṃ issarasantike’ 62.

    ೧೨೨೪.

    1224.

    ತಸ್ಸಾ ಮಾಲ್ಯಂ ಅಭಿಹರಿಂಸು, ಚನ್ದನಞ್ಚ ಮಹಾರಹಂ।

    Tassā mālyaṃ abhihariṃsu, candanañca mahārahaṃ;

    ಮಣಿಸಙ್ಖಮುತ್ತಾರತನಂ, ನಾನಾರತ್ತೇ ಚ ಅಮ್ಬರೇ॥

    Maṇisaṅkhamuttāratanaṃ, nānāratte ca ambare.

    ೧೨೨೫.

    1225.

    ತಞ್ಚ ಸೋವಣ್ಣಯೇ 63 ಪೀಠೇ, ನಿಸಿನ್ನಂ ಬಹುಕಿತ್ಥಿಯೋ।

    Tañca sovaṇṇaye 64 pīṭhe, nisinnaṃ bahukitthiyo;

    ಪರಿಕಿರಿಯ ಪಸೋಭಿಂಸು 65, ರುಚಂ ರುಚಿರವಣ್ಣಿನಿಂ॥

    Parikiriya pasobhiṃsu 66, rucaṃ ruciravaṇṇiniṃ.

    ೧೨೨೬.

    1226.

    ಸಾ ಚ ಸಖಿಮಜ್ಝಗತಾ, ಸಬ್ಬಾಭರಣಭೂಸಿತಾ।

    Sā ca sakhimajjhagatā, sabbābharaṇabhūsitā;

    ಸತೇರತಾ ಅಬ್ಭಮಿವ, ಚನ್ದಕಂ ಪಾವಿಸೀ ರುಚಾ॥

    Sateratā abbhamiva, candakaṃ pāvisī rucā.

    ೧೨೨೭.

    1227.

    ಉಪಸಙ್ಕಮಿತ್ವಾ ವೇದೇಹಂ, ವನ್ದಿತ್ವಾ ವಿನಯೇ ರತಂ।

    Upasaṅkamitvā vedehaṃ, vanditvā vinaye rataṃ;

    ಸುವಣ್ಣಖಚಿತೇ 67 ಪೀಠೇ, ಏಕಮನ್ತಂ ಉಪಾವಿಸಿ’’॥

    Suvaṇṇakhacite 68 pīṭhe, ekamantaṃ upāvisi’’.

    ೧೨೨೮.

    1228.

    ತಞ್ಚ ದಿಸ್ವಾನ ವೇದೇಹೋ, ಅಚ್ಛರಾನಂವ ಸಙ್ಗಮಂ।

    Tañca disvāna vedeho, accharānaṃva saṅgamaṃ;

    ರುಚಂ ಸಖಿಮಜ್ಝಗತಂ, ಇದಂ ವಚನಮಬ್ರವಿ॥

    Rucaṃ sakhimajjhagataṃ, idaṃ vacanamabravi.

    ೧೨೨೯.

    1229.

    ‘‘ಕಚ್ಚಿ ರಮಸಿ ಪಾಸಾದೇ, ಅನ್ತೋಪೋಕ್ಖರಣಿಂ ಪತಿ।

    ‘‘Kacci ramasi pāsāde, antopokkharaṇiṃ pati;

    ಕಚ್ಚಿ ಬಹುವಿಧಂ ಖಜ್ಜಂ, ಸದಾ ಅಭಿಹರನ್ತಿ ತೇ॥

    Kacci bahuvidhaṃ khajjaṃ, sadā abhiharanti te.

    ೧೨೩೦.

    1230.

    ‘‘ಕಚ್ಚಿ ಬಹುವಿಧಂ ಮಾಲ್ಯಂ, ಓಚಿನಿತ್ವಾ ಕುಮಾರಿಯೋ।

    ‘‘Kacci bahuvidhaṃ mālyaṃ, ocinitvā kumāriyo;

    ಘರಕೇ ಕರೋಥ ಪಚ್ಚೇಕಂ, ಖಿಡ್ಡಾರತಿರತಾ ಮುಹುಂ 69

    Gharake karotha paccekaṃ, khiḍḍāratiratā muhuṃ 70.

    ೧೨೩೧.

    1231.

    ‘‘ಕೇನ ವಾ ವಿಕಲಂ ತುಯ್ಹಂ, ಕಿಂ ಖಿಪ್ಪಂ ಆಹರನ್ತು ತೇ।

    ‘‘Kena vā vikalaṃ tuyhaṃ, kiṃ khippaṃ āharantu te;

    ಮನೋಕರಸ್ಸು ಕುಡ್ಡಮುಖೀ 71, ಅಪಿ ಚನ್ದಸಮಮ್ಹಿಪಿ’’ 72

    Manokarassu kuḍḍamukhī 73, api candasamamhipi’’ 74.

    ೧೨೩೨.

    1232.

    ವೇದೇಹಸ್ಸ ವಚೋ ಸುತ್ವಾ, ರುಚಾ ಪಿತರಮಬ್ರವಿ।

    Vedehassa vaco sutvā, rucā pitaramabravi;

    ‘‘ಸಬ್ಬಮೇತಂ ಮಹಾರಾಜ, ಲಬ್ಭತಿಸ್ಸರಸನ್ತಿಕೇ॥

    ‘‘Sabbametaṃ mahārāja, labbhatissarasantike.

    ೧೨೩೩.

    1233.

    ‘‘ಸುವೇ ಪನ್ನರಸೋ ದಿಬ್ಯೋ, ಸಹಸ್ಸಂ ಆಹರನ್ತು ಮೇ।

    ‘‘Suve pannaraso dibyo, sahassaṃ āharantu me;

    ಯಥಾದಿನ್ನಞ್ಚ ದಸ್ಸಾಮಿ, ದಾನಂ ಸಬ್ಬವನೀಸ್ವಹಂ’’ 75

    Yathādinnañca dassāmi, dānaṃ sabbavanīsvahaṃ’’ 76.

    ೧೨೩೪.

    1234.

    ರುಚಾಯ ವಚನಂ ಸುತ್ವಾ, ರಾಜಾ ಅಙ್ಗತಿ ಮಬ್ರವಿ।

    Rucāya vacanaṃ sutvā, rājā aṅgati mabravi;

    ‘‘ಬಹುಂ ವಿನಾಸಿತಂ ವಿತ್ತಂ, ನಿರತ್ಥಂ ಅಫಲಂ ತಯಾ॥

    ‘‘Bahuṃ vināsitaṃ vittaṃ, niratthaṃ aphalaṃ tayā.

    ೧೨೩೫.

    1235.

    ‘‘ಉಪೋಸಥೇ ವಸಂ ನಿಚ್ಚಂ, ಅನ್ನಪಾನಂ ನ ಭುಞ್ಜಸಿ।

    ‘‘Uposathe vasaṃ niccaṃ, annapānaṃ na bhuñjasi;

    ನಿಯತೇತಂ ಅಭುತ್ತಬ್ಬಂ, ನತ್ಥಿ ಪುಞ್ಞಂ ಅಭುಞ್ಜತೋ’’॥

    Niyatetaṃ abhuttabbaṃ, natthi puññaṃ abhuñjato’’.

    ೧೨೩೬.

    1236.

    ‘‘ಬೀಜಕೋಪಿ ಹಿ ಸುತ್ವಾನ, ತದಾ ಕಸ್ಸಪಭಾಸಿತಂ।

    ‘‘Bījakopi hi sutvāna, tadā kassapabhāsitaṃ;

    ಪಸ್ಸಸನ್ತೋ ಮುಹುಂ ಉಣ್ಹಂ, ರುದಂ ಅಸ್ಸೂನಿ ವತ್ತಯಿ॥

    Passasanto muhuṃ uṇhaṃ, rudaṃ assūni vattayi.

    ೧೨೩೭.

    1237.

    ‘‘ಯಾವ ರುಚೇ ಜೀವಮಾನಾ 77, ಮಾ ಭತ್ತಮಪನಾಮಯಿ।

    ‘‘Yāva ruce jīvamānā 78, mā bhattamapanāmayi;

    ನತ್ಥಿ ಭದ್ದೇ ಪರೋ ಲೋಕೋ, ಕಿಂ ನಿರತ್ಥಂ ವಿಹಞ್ಞಸಿ’’॥

    Natthi bhadde paro loko, kiṃ niratthaṃ vihaññasi’’.

    ೧೨೩೮.

    1238.

    ವೇದೇಹಸ್ಸ ವಚೋ ಸುತ್ವಾ, ರುಚಾ ರುಚಿರವಣ್ಣಿನೀ।

    Vedehassa vaco sutvā, rucā ruciravaṇṇinī;

    ಜಾನಂ ಪುಬ್ಬಾಪರಂ ಧಮ್ಮಂ, ಪಿತರಂ ಏತದಬ್ರವಿ॥

    Jānaṃ pubbāparaṃ dhammaṃ, pitaraṃ etadabravi.

    ೧೨೩೯.

    1239.

    ‘‘ಸುತಮೇವ ಪುರೇ ಆಸಿ, ಸಕ್ಖಿ 79 ದಿಟ್ಠಮಿದಂ ಮಯಾ।

    ‘‘Sutameva pure āsi, sakkhi 80 diṭṭhamidaṃ mayā;

    ಬಾಲೂಪಸೇವೀ ಯೋ ಹೋತಿ, ಬಾಲೋವ ಸಮಪಜ್ಜಥ॥

    Bālūpasevī yo hoti, bālova samapajjatha.

    ೧೨೪೦.

    1240.

    ‘‘ಮೂಳ್ಹೋ ಹಿ ಮೂಳ್ಹಮಾಗಮ್ಮ, ಭಿಯ್ಯೋ ಮೋಹಂ ನಿಗಚ್ಛತಿ।

    ‘‘Mūḷho hi mūḷhamāgamma, bhiyyo mohaṃ nigacchati;

    ಪತಿರೂಪಂ ಅಲಾತೇನ, ಬೀಜಕೇನ ಚ ಮುಯ್ಹಿತುಂ॥

    Patirūpaṃ alātena, bījakena ca muyhituṃ.

    ೧೨೪೧.

    1241.

    ‘‘ತ್ವಞ್ಚ ದೇವಾಸಿ ಸಪ್ಪಞ್ಞೋ, ಧೀರೋ ಅತ್ಥಸ್ಸ ಕೋವಿದೋ।

    ‘‘Tvañca devāsi sappañño, dhīro atthassa kovido;

    ಕಥಂ ಬಾಲೇಹಿ ಸದಿಸಂ, ಹೀನದಿಟ್ಠಿಂ ಉಪಾಗಮಿ॥

    Kathaṃ bālehi sadisaṃ, hīnadiṭṭhiṃ upāgami.

    ೧೨೪೨.

    1242.

    ‘‘ಸಚೇಪಿ ಸಂಸಾರಪಥೇನ ಸುಜ್ಝತಿ, ನಿರತ್ಥಿಯಾ ಪಬ್ಬಜ್ಜಾ ಗುಣಸ್ಸ।

    ‘‘Sacepi saṃsārapathena sujjhati, niratthiyā pabbajjā guṇassa;

    ಕೀಟೋವ ಅಗ್ಗಿಂ ಜಲಿತಂ ಅಪಾಪತಂ, ಉಪಪಜ್ಜತಿ ಮೋಹಮೂಳ್ಹೋ 81 ನಗ್ಗಭಾವಂ॥

    Kīṭova aggiṃ jalitaṃ apāpataṃ, upapajjati mohamūḷho 82 naggabhāvaṃ.

    ೧೨೪೩.

    1243.

    ‘‘ಸಂಸಾರಸುದ್ಧೀತಿ ಪುರೇ ನಿವಿಟ್ಠಾ, ಕಮ್ಮಂ ವಿದೂಸೇನ್ತಿ ಬಹೂ ಅಜಾನಂ 83

    ‘‘Saṃsārasuddhīti pure niviṭṭhā, kammaṃ vidūsenti bahū ajānaṃ 84;

    ಪುಬ್ಬೇ ಕಲೀ ದುಗ್ಗಹಿತೋವಅತ್ಥಾ 85, ದುಮ್ಮೋ ಚ ಯಾ ಬಲಿಸಾ ಅಮ್ಬುಜೋವ॥

    Pubbe kalī duggahitovaatthā 86, dummo ca yā balisā ambujova.

    ೧೨೪೪.

    1244.

    ‘‘ಉಪಮಂ ತೇ ಕರಿಸ್ಸಾಮಿ, ಮಹಾರಾಜ ತವತ್ಥಿಯಾ।

    ‘‘Upamaṃ te karissāmi, mahārāja tavatthiyā;

    ಉಪಮಾಯ ಮಿಧೇಕಚ್ಚೇ, ಅತ್ಥಂ ಜಾನನ್ತಿ ಪಣ್ಡಿತಾ॥

    Upamāya midhekacce, atthaṃ jānanti paṇḍitā.

    ೧೨೪೫.

    1245.

    ‘‘ವಾಣಿಜಾನಂ ಯಥಾ ನಾವಾ, ಅಪ್ಪಮಾಣಭರಾ 87 ಗರು।

    ‘‘Vāṇijānaṃ yathā nāvā, appamāṇabharā 88 garu;

    ಅತಿಭಾರಂ ಸಮಾದಾಯ, ಅಣ್ಣವೇ ಅವಸೀದತಿ॥

    Atibhāraṃ samādāya, aṇṇave avasīdati.

    ೧೨೪೬.

    1246.

    ‘‘ಏವಮೇವ ನರೋ ಪಾಪಂ, ಥೋಕಂ ಥೋಕಮ್ಪಿ ಆಚಿನಂ।

    ‘‘Evameva naro pāpaṃ, thokaṃ thokampi ācinaṃ;

    ಅತಿಭಾರಂ ಸಮಾದಾಯ, ನಿರಯೇ ಅವಸೀದತಿ॥

    Atibhāraṃ samādāya, niraye avasīdati.

    ೧೨೪೭.

    1247.

    ‘‘ನ ತಾವ ಭಾರೋ ಪರಿಪೂರೋ, ಅಲಾತಸ್ಸ ಮಹೀಪತಿ।

    ‘‘Na tāva bhāro paripūro, alātassa mahīpati;

    ಆಚಿನಾತಿ ಚ ತಂ ಪಾಪಂ, ಯೇನ ಗಚ್ಛತಿ ದುಗ್ಗತಿಂ॥

    Ācināti ca taṃ pāpaṃ, yena gacchati duggatiṃ.

    ೧೨೪೮.

    1248.

    ‘‘ಪುಬ್ಬೇವಸ್ಸ ಕತಂ ಪುಞ್ಞಂ, ಅಲಾತಸ್ಸ ಮಹೀಪತಿ।

    ‘‘Pubbevassa kataṃ puññaṃ, alātassa mahīpati;

    ತಸ್ಸೇವ ದೇವ ನಿಸ್ಸನ್ದೋ, ಯಞ್ಚೇಸೋ ಲಭತೇ ಸುಖಂ॥

    Tasseva deva nissando, yañceso labhate sukhaṃ.

    ೧೨೪೯.

    1249.

    ‘‘ಖೀಯತೇ ಚಸ್ಸ ತಂ ಪುಞ್ಞಂ, ತಥಾ ಹಿ ಅಗುಣೇ ರತೋ।

    ‘‘Khīyate cassa taṃ puññaṃ, tathā hi aguṇe rato;

    ಉಜುಮಗ್ಗಂ ಅವಹಾಯ 89, ಕುಮ್ಮಗ್ಗಮನುಧಾವತಿ॥

    Ujumaggaṃ avahāya 90, kummaggamanudhāvati.

    ೧೨೫೦.

    1250.

    ‘‘ತುಲಾ ಯಥಾ ಪಗ್ಗಹಿತಾ, ಓಹಿತೇ ತುಲಮಣ್ಡಲೇ।

    ‘‘Tulā yathā paggahitā, ohite tulamaṇḍale;

    ಉನ್ನಮೇತಿ ತುಲಾಸೀಸಂ, ಭಾರೇ ಓರೋಪಿತೇ ಸತಿ॥

    Unnameti tulāsīsaṃ, bhāre oropite sati.

    ೧೨೫೧.

    1251.

    ‘‘ಏವಮೇವ ನರೋ ಪುಞ್ಞಂ, ಥೋಕಂ ಥೋಕಮ್ಪಿ ಆಚಿನಂ।

    ‘‘Evameva naro puññaṃ, thokaṃ thokampi ācinaṃ;

    ಸಗ್ಗಾತಿಮಾನೋ ದಾಸೋವ, ಬೀಜಕೋ ಸಾತವೇ 91 ರತೋ॥

    Saggātimāno dāsova, bījako sātave 92 rato.

    ೧೨೫೨.

    1252.

    ‘‘ಯಮಜ್ಜ ಬೀಜಕೋ ದಾಸೋ, ದುಕ್ಖಂ ಪಸ್ಸತಿ ಅತ್ತನಿ।

    ‘‘Yamajja bījako dāso, dukkhaṃ passati attani;

    ಪುಬ್ಬೇವಸ್ಸ 93 ಕತಂ ಪಾಪಂ, ತಮೇಸೋ ಪಟಿಸೇವತಿ॥

    Pubbevassa 94 kataṃ pāpaṃ, tameso paṭisevati.

    ೧೨೫೩.

    1253.

    ‘‘ಖೀಯತೇ ಚಸ್ಸ ತಂ ಪಾಪಂ, ತಥಾ ಹಿ ವಿನಯೇ ರತೋ।

    ‘‘Khīyate cassa taṃ pāpaṃ, tathā hi vinaye rato;

    ಕಸ್ಸಪಞ್ಚ ಸಮಾಪಜ್ಜ, ಮಾ ಹೇವುಪ್ಪಥಮಾಗಮಾ॥

    Kassapañca samāpajja, mā hevuppathamāgamā.

    ೧೨೫೪.

    1254.

    ‘‘ಯಂ ಯಞ್ಹಿ ರಾಜ ಭಜತಿ, ಸನ್ತಂ ವಾ ಯದಿ ವಾ ಅಸಂ।

    ‘‘Yaṃ yañhi rāja bhajati, santaṃ vā yadi vā asaṃ;

    ಸೀಲವನ್ತಂ ವಿಸೀಲಂ ವಾ, ವಸಂ ತಸ್ಸೇವ ಗಚ್ಛತಿ॥

    Sīlavantaṃ visīlaṃ vā, vasaṃ tasseva gacchati.

    ೧೨೫೫.

    1255.

    ‘‘ಯಾದಿಸಂ ಕುರುತೇ ಮಿತ್ತಂ, ಯಾದಿಸಂ ಚೂಪಸೇವತಿ।

    ‘‘Yādisaṃ kurute mittaṃ, yādisaṃ cūpasevati;

    ಸೋಪಿ ತಾದಿಸಕೋ ಹೋತಿ, ಸಹವಾಸೋ ಹಿ 95 ತಾದಿಸೋ॥

    Sopi tādisako hoti, sahavāso hi 96 tādiso.

    ೧೨೫೬.

    1256.

    ‘‘ಸೇವಮಾನೋ ಸೇವಮಾನಂ, ಸಮ್ಫುಟ್ಠೋ ಸಮ್ಫುಸಂ ಪರಂ।

    ‘‘Sevamāno sevamānaṃ, samphuṭṭho samphusaṃ paraṃ;

    ಸರೋ ದಿದ್ಧೋ ಕಲಾಪಂವ, ಅಲಿತ್ತಮುಪಲಿಮ್ಪತಿ।

    Saro diddho kalāpaṃva, alittamupalimpati;

    ಉಪಲೇಪಭಯಾ 97 ಧೀರೋ, ನೇವ ಪಾಪಸಖಾ ಸಿಯಾ॥

    Upalepabhayā 98 dhīro, neva pāpasakhā siyā.

    ೧೨೫೭.

    1257.

    ‘‘ಪೂತಿಮಚ್ಛಂ ಕುಸಗ್ಗೇನ, ಯೋ ನರೋ ಉಪನಯ್ಹತಿ।

    ‘‘Pūtimacchaṃ kusaggena, yo naro upanayhati;

    ಕುಸಾಪಿ ಪೂತಿ ವಾಯನ್ತಿ, ಏವಂ ಬಾಲೂಪಸೇವನಾ॥

    Kusāpi pūti vāyanti, evaṃ bālūpasevanā.

    ೧೨೫೮.

    1258.

    ‘‘ತಗರಞ್ಚ ಪಲಾಸೇನ, ಯೋ ನರೋ ಉಪನಯ್ಹತಿ।

    ‘‘Tagarañca palāsena, yo naro upanayhati;

    ಪತ್ತಾಪಿ ಸುರಭಿ ವಾಯನ್ತಿ, ಏವಂ ಧೀರೂಪಸೇವನಾ॥

    Pattāpi surabhi vāyanti, evaṃ dhīrūpasevanā.

    ೧೨೫೯.

    1259.

    ‘‘ತಸ್ಮಾ ಪತ್ತಪುಟಸ್ಸೇವ 99, ಞತ್ವಾ ಸಮ್ಪಾಕಮತ್ತನೋ।

    ‘‘Tasmā pattapuṭasseva 100, ñatvā sampākamattano;

    ಅಸನ್ತೇ ನೋಪಸೇವೇಯ್ಯ, ಸನ್ತೇ ಸೇವೇಯ್ಯ ಪಣ್ಡಿತೋ।

    Asante nopaseveyya, sante seveyya paṇḍito;

    ಅಸನ್ತೋ ನಿರಯಂ ನೇನ್ತಿ, ಸನ್ತೋ ಪಾಪೇನ್ತಿ ಸುಗ್ಗತಿಂ’’॥

    Asanto nirayaṃ nenti, santo pāpenti suggatiṃ’’.

    ೧೨೬೦.

    1260.

    ಅಹಮ್ಪಿ ಜಾತಿಯೋ ಸತ್ತ, ಸರೇ ಸಂಸರಿತತ್ತನೋ।

    Ahampi jātiyo satta, sare saṃsaritattano;

    ಅನಾಗತಾಪಿ ಸತ್ತೇವ, ಯಾ ಗಮಿಸ್ಸಂ ಇತೋ ಚುತಾ॥

    Anāgatāpi satteva, yā gamissaṃ ito cutā.

    ೧೨೬೧.

    1261.

    ‘‘ಯಾ ಮೇ ಸಾ ಸತ್ತಮೀ ಜಾತಿ, ಅಹು ಪುಬ್ಬೇ ಜನಾಧಿಪ।

    ‘‘Yā me sā sattamī jāti, ahu pubbe janādhipa;

    ಕಮ್ಮಾರಪುತ್ತೋ ಮಗಧೇಸು, ಅಹುಂ ರಾಜಗಹೇ ಪುರೇ॥

    Kammāraputto magadhesu, ahuṃ rājagahe pure.

    ೧೨೬೨.

    1262.

    ‘‘ಪಾಪಂ ಸಹಾಯಮಾಗಮ್ಮ, ಬಹುಂ ಪಾಪಂ ಕತಂ ಮಯಾ।

    ‘‘Pāpaṃ sahāyamāgamma, bahuṃ pāpaṃ kataṃ mayā;

    ಪರದಾರಸ್ಸ ಹೇಠೇನ್ತೋ, ಚರಿಮ್ಹಾ ಅಮರಾ ವಿಯ॥

    Paradārassa heṭhento, carimhā amarā viya.

    ೧೨೬೩.

    1263.

    ‘‘ತಂ ಕಮ್ಮಂ ನಿಹಿತಂ ಅಟ್ಠಾ, ಭಸ್ಮಚ್ಛನ್ನೋವ ಪಾವಕೋ।

    ‘‘Taṃ kammaṃ nihitaṃ aṭṭhā, bhasmacchannova pāvako;

    ಅಥ ಅಞ್ಞೇಹಿ ಕಮ್ಮೇಹಿ, ಅಜಾಯಿಂ ವಂಸಭೂಮಿಯಂ॥

    Atha aññehi kammehi, ajāyiṃ vaṃsabhūmiyaṃ.

    ೧೨೬೪.

    1264.

    ‘‘ಕೋಸಮ್ಬಿಯಂ ಸೇಟ್ಠಿಕುಲೇ, ಇದ್ಧೇ ಫೀತೇ ಮಹದ್ಧನೇ।

    ‘‘Kosambiyaṃ seṭṭhikule, iddhe phīte mahaddhane;

    ಏಕಪುತ್ತೋ ಮಹಾರಾಜ, ನಿಚ್ಚಂ ಸಕ್ಕತಪೂಜಿತೋ॥

    Ekaputto mahārāja, niccaṃ sakkatapūjito.

    ೧೨೬೫.

    1265.

    ‘‘ತತ್ಥ ಮಿತ್ತಂ ಅಸೇವಿಸ್ಸಂ, ಸಹಾಯಂ ಸಾತವೇ ರತಂ।

    ‘‘Tattha mittaṃ asevissaṃ, sahāyaṃ sātave rataṃ;

    ಪಣ್ಡಿತಂ ಸುತಸಮ್ಪನ್ನಂ, ಸೋ ಮಂ ಅತ್ಥೇ ನಿವೇಸಯಿ॥

    Paṇḍitaṃ sutasampannaṃ, so maṃ atthe nivesayi.

    ೧೨೬೬.

    1266.

    ‘‘ಚಾತುದ್ದಸಿಂ ಪಞ್ಚದಸಿಂ, ಬಹುಂ ರತ್ತಿಂ ಉಪಾವಸಿಂ।

    ‘‘Cātuddasiṃ pañcadasiṃ, bahuṃ rattiṃ upāvasiṃ;

    ತಂ ಕಮ್ಮಂ ನಿಹಿತಂ ಅಟ್ಠಾ, ನಿಧೀವ ಉದಕನ್ತಿಕೇ॥

    Taṃ kammaṃ nihitaṃ aṭṭhā, nidhīva udakantike.

    ೧೨೬೭.

    1267.

    ‘‘ಅಥ ಪಾಪಾನ ಕಮ್ಮಾನಂ, ಯಮೇತಂ ಮಗಧೇ ಕತಂ।

    ‘‘Atha pāpāna kammānaṃ, yametaṃ magadhe kataṃ;

    ಫಲಂ ಪರಿಯಾಗ ಮಂ 101 ಪಚ್ಛಾ, ಭುತ್ವಾ ದುಟ್ಠವಿಸಂ ಯಥಾ॥

    Phalaṃ pariyāga maṃ 102 pacchā, bhutvā duṭṭhavisaṃ yathā.

    ೧೨೬೮.

    1268.

    ‘‘ತತೋ ಚುತಾಹಂ ವೇದೇಹ, ರೋರುವೇ ನಿರಯೇ ಚಿರಂ।

    ‘‘Tato cutāhaṃ vedeha, roruve niraye ciraṃ;

    ಸಕಮ್ಮುನಾ ಅಪಚ್ಚಿಸ್ಸಂ, ತಂ ಸರಂ ನ ಸುಖಂ ಲಭೇ॥

    Sakammunā apaccissaṃ, taṃ saraṃ na sukhaṃ labhe.

    ೧೨೬೯.

    1269.

    ‘‘ಬಹುವಸ್ಸಗಣೇ ತತ್ಥ, ಖೇಪಯಿತ್ವಾ ಬಹುಂ ದುಖಂ।

    ‘‘Bahuvassagaṇe tattha, khepayitvā bahuṃ dukhaṃ;

    ಭಿನ್ನಾಗತೇ 103 ಅಹುಂ ರಾಜ, ಛಗಲೋ ಉದ್ಧತಪ್ಫಲೋ 104

    Bhinnāgate 105 ahuṃ rāja, chagalo uddhatapphalo 106.

    ೧೨೭೦.

    1270.

    ‘‘ಸಾತಪುತ್ತಾ ಮಯಾ ವೂಳ್ಹಾ, ಪಿಟ್ಠಿಯಾ ಚ ರಥೇನ ಚ।

    ‘‘Sātaputtā mayā vūḷhā, piṭṭhiyā ca rathena ca;

    ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ॥

    Tassa kammassa nissando, paradāragamanassa me.

    ೧೨೭೧.

    1271.

    ‘‘ತತೋ ಚುತಾಹಂ ವೇದೇಹ, ಕಪಿ ಆಸಿಂ ಬ್ರಹಾವನೇ।

    ‘‘Tato cutāhaṃ vedeha, kapi āsiṃ brahāvane;

    ನಿಲುಞ್ಚಿತಫಲೋ 107 ಯೇವ, ಯೂಥಪೇನ ಪಗಬ್ಭಿನಾ।

    Niluñcitaphalo 108 yeva, yūthapena pagabbhinā;

    ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ॥

    Tassa kammassa nissando, paradāragamanassa me.

    ೧೨೭೨.

    1272.

    ‘‘ತತೋ ಚುತಾಹಂ ವೇದೇಹ, ದಸ್ಸನೇಸು 109 ಪಸೂ ಅಹುಂ।

    ‘‘Tato cutāhaṃ vedeha, dassanesu 110 pasū ahuṃ;

    ನಿಲುಞ್ಚಿತೋ ಜವೋ ಭದ್ರೋ, ಯೋಗ್ಗಂ ವೂಳ್ಹಂ ಚಿರಂ ಮಯಾ।

    Niluñcito javo bhadro, yoggaṃ vūḷhaṃ ciraṃ mayā;

    ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ॥

    Tassa kammassa nissando, paradāragamanassa me.

    ೧೨೭೩.

    1273.

    ‘‘ತತೋ ಚುತಾಹಂ ವೇದೇಹ, ವಜ್ಜೀಸು ಕುಲಮಾಗಮಾ।

    ‘‘Tato cutāhaṃ vedeha, vajjīsu kulamāgamā;

    ನೇವಿತ್ಥೀ ನ ಪುಮಾ ಆಸಿಂ, ಮನುಸ್ಸತ್ತೇ ಸುದುಲ್ಲಭೇ।

    Nevitthī na pumā āsiṃ, manussatte sudullabhe;

    ತಸ್ಸ ಕಮ್ಮಸ್ಸ ನಿಸ್ಸನ್ದೋ, ಪರದಾರಗಮನಸ್ಸ ಮೇ॥

    Tassa kammassa nissando, paradāragamanassa me.

    ೧೨೭೪.

    1274.

    ‘‘ತತೋ ಚುತಾಹಂ ವೇದೇಹ, ಅಜಾಯಿಂ ನನ್ದನೇ ವನೇ।

    ‘‘Tato cutāhaṃ vedeha, ajāyiṃ nandane vane;

    ಭವನೇ ತಾವತಿಂಸಾಹಂ, ಅಚ್ಛರಾ ಕಾಮವಣ್ಣಿನೀ 111

    Bhavane tāvatiṃsāhaṃ, accharā kāmavaṇṇinī 112.

    ೧೨೭೫.

    1275.

    ‘‘ವಿಚಿತ್ತವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ।

    ‘‘Vicittavatthābharaṇā, āmuttamaṇikuṇḍalā;

    ಕುಸಲಾ ನಚ್ಚಗೀತಸ್ಸ, ಸಕ್ಕಸ್ಸ ಪರಿಚಾರಿಕಾ॥

    Kusalā naccagītassa, sakkassa paricārikā.

    ೧೨೭೬.

    1276.

    ‘‘ತತ್ಥ ಠಿತಾಹಂ ವೇದೇಹ, ಸರಾಮಿ ಜಾತಿಯೋ ಇಮಾ।

    ‘‘Tattha ṭhitāhaṃ vedeha, sarāmi jātiyo imā;

    ಅನಾಗತಾಪಿ ಸತ್ತೇವ, ಯಾ ಗಮಿಸ್ಸಂ ಇತೋ ಚುತಾ॥

    Anāgatāpi satteva, yā gamissaṃ ito cutā.

    ೧೨೭೭.

    1277.

    ‘‘ಪರಿಯಾಗತಂ ತಂ ಕುಸಲಂ, ಯಂ ಮೇ ಕೋಸಮ್ಬಿಯಂ ಕತಂ।

    ‘‘Pariyāgataṃ taṃ kusalaṃ, yaṃ me kosambiyaṃ kataṃ;

    ದೇವೇ ಚೇವ ಮನುಸ್ಸೇ ಚ, ಸನ್ಧಾವಿಸ್ಸಂ ಇತೋ ಚುತಾ॥

    Deve ceva manusse ca, sandhāvissaṃ ito cutā.

    ೧೨೭೮.

    1278.

    ‘‘ಸತ್ತ ಜಚ್ಚೋ 113 ಮಹಾರಾಜ, ನಿಚ್ಚಂ ಸಕ್ಕತಪೂಜಿತಾ।

    ‘‘Satta jacco 114 mahārāja, niccaṃ sakkatapūjitā;

    ಥೀಭಾವಾಪಿ ನ ಮುಚ್ಚಿಸ್ಸಂ, ಛಟ್ಠಾ ನಿಗತಿಯೋ 115 ಇಮಾ॥

    Thībhāvāpi na muccissaṃ, chaṭṭhā nigatiyo 116 imā.

    ೧೨೭೯.

    1279.

    ‘‘ಸತ್ತಮೀ ಚ ಗತಿ ದೇವ, ದೇವಪುತ್ತೋ ಮಹಿದ್ಧಿಕೋ।

    ‘‘Sattamī ca gati deva, devaputto mahiddhiko;

    ಪುಮಾ ದೇವೋ ಭವಿಸ್ಸಾಮಿ 117, ದೇವಕಾಯಸ್ಮಿಮುತ್ತಮೋ॥

    Pumā devo bhavissāmi 118, devakāyasmimuttamo.

    ೧೨೮೦.

    1280.

    ‘‘ಅಜ್ಜಾಪಿ ಸನ್ತಾನಮಯಂ, ಮಾಲಂ ಗನ್ಥೇನ್ತಿ ನನ್ದನೇ।

    ‘‘Ajjāpi santānamayaṃ, mālaṃ ganthenti nandane;

    ದೇವಪುತ್ತೋ ಜವೋ ನಾಮ, ಯೋ ಮೇ ಮಾಲಂ ಪಟಿಚ್ಛತಿ॥

    Devaputto javo nāma, yo me mālaṃ paṭicchati.

    ೧೨೮೧.

    1281.

    ‘‘ಮುಹುತ್ತೋ ವಿಯ ಸೋ ದಿಬ್ಯೋ, ಇಧ ವಸ್ಸಾನಿ ಸೋಳಸ।

    ‘‘Muhutto viya so dibyo, idha vassāni soḷasa;

    ರತ್ತಿನ್ದಿವೋ ಚ ಸೋ ದಿಬ್ಯೋ, ಮಾನುಸಿಂ ಸರದೋಸತಂ॥

    Rattindivo ca so dibyo, mānusiṃ saradosataṃ.

    ೧೨೮೨.

    1282.

    ‘‘ಇತಿ ಕಮ್ಮಾನಿ ಅನ್ವೇನ್ತಿ, ಅಸಙ್ಖೇಯ್ಯಾಪಿ ಜಾತಿಯೋ।

    ‘‘Iti kammāni anventi, asaṅkheyyāpi jātiyo;

    ಕಲ್ಯಾಣಂ ಯದಿ ವಾ ಪಾಪಂ, ನ ಹಿ ಕಮ್ಮಂ ವಿನಸ್ಸತಿ 119

    Kalyāṇaṃ yadi vā pāpaṃ, na hi kammaṃ vinassati 120.

    ೧೨೮೩.

    1283.

    ‘‘ಯೋ ಇಚ್ಛೇ ಪುರಿಸೋ ಹೋತುಂ, ಜಾತಿಂ ಜಾತಿಂ 121 ಪುನಪ್ಪುನಂ।

    ‘‘Yo icche puriso hotuṃ, jātiṃ jātiṃ 122 punappunaṃ;

    ಪರದಾರಂ ವಿವಜ್ಜೇಯ್ಯ, ಧೋತಪಾದೋವ ಕದ್ದಮಂ॥

    Paradāraṃ vivajjeyya, dhotapādova kaddamaṃ.

    ೧೨೮೪.

    1284.

    ‘‘ಯಾ ಇಚ್ಛೇ ಪುರಿಸೋ ಹೋತುಂ, ಜಾತಿಂ ಜಾತಿಂ ಪುನಪ್ಪುನಂ।

    ‘‘Yā icche puriso hotuṃ, jātiṃ jātiṃ punappunaṃ;

    ಸಾಮಿಕಂ ಅಪಚಾಯೇಯ್ಯ, ಇನ್ದಂವ ಪರಿಚಾರಿಕಾ॥

    Sāmikaṃ apacāyeyya, indaṃva paricārikā.

    ೧೨೮೫.

    1285.

    ‘‘ಯೋ ಇಚ್ಛೇ ದಿಬ್ಯಭೋಗಞ್ಚ, ದಿಬ್ಬಮಾಯುಂ ಯಸಂ ಸುಖಂ।

    ‘‘Yo icche dibyabhogañca, dibbamāyuṃ yasaṃ sukhaṃ;

    ಪಾಪಾನಿ ಪರಿವಜ್ಜೇತ್ವಾ 123, ತಿವಿಧಂ ಧಮ್ಮಮಾಚರೇ॥

    Pāpāni parivajjetvā 124, tividhaṃ dhammamācare.

    ೧೨೮೬.

    1286.

    ‘‘ಕಾಯೇನ ವಾಚಾ ಮನಸಾ, ಅಪ್ಪಮತ್ತೋ ವಿಚಕ್ಖಣೋ।

    ‘‘Kāyena vācā manasā, appamatto vicakkhaṇo;

    ಅತ್ತನೋ ಹೋತಿ ಅತ್ಥಾಯ, ಇತ್ಥೀ ವಾ ಯದಿ ವಾ ಪುಮಾ॥

    Attano hoti atthāya, itthī vā yadi vā pumā.

    ೧೨೮೭.

    1287.

    ‘‘ಯೇ ಕೇಚಿಮೇ ಮಾನುಜಾ ಜೀವಲೋಕೇ, ಯಸಸ್ಸಿನೋ ಸಬ್ಬಸಮನ್ತಭೋಗಾ।

    ‘‘Ye kecime mānujā jīvaloke, yasassino sabbasamantabhogā;

    ಅಸಂಸಯಂ ತೇಹಿ ಪುರೇ ಸುಚಿಣ್ಣಂ, ಕಮ್ಮಸ್ಸಕಾಸೇ ಪುಥು ಸಬ್ಬಸತ್ತಾ॥

    Asaṃsayaṃ tehi pure suciṇṇaṃ, kammassakāse puthu sabbasattā.

    ೧೨೮೮.

    1288.

    ‘‘ಇಙ್ಘಾನುಚಿನ್ತೇಸಿ ಸಯಮ್ಪಿ ದೇವ, ಕುತೋನಿದಾನಾ ತೇ ಇಮಾ ಜನಿನ್ದ।

    ‘‘Iṅghānucintesi sayampi deva, kutonidānā te imā janinda;

    ಯಾ ತೇ ಇಮಾ ಅಚ್ಛರಾಸನ್ನಿಕಾಸಾ, ಅಲಙ್ಕತಾ ಕಞ್ಚನಜಾಲಛನ್ನಾ’’॥

    Yā te imā accharāsannikāsā, alaṅkatā kañcanajālachannā’’.

    ೧೨೮೯.

    1289.

    ಇಚ್ಚೇವಂ ಪಿತರಂ ಕಞ್ಞಾ, ರುಚಾ ತೋಸೇಸಿ ಅಙ್ಗತಿಂ।

    Iccevaṃ pitaraṃ kaññā, rucā tosesi aṅgatiṃ;

    ಮೂಳ್ಹಸ್ಸ ಮಗ್ಗಮಾಚಿಕ್ಖಿ, ಧಮ್ಮಮಕ್ಖಾಸಿ ಸುಬ್ಬತಾ॥

    Mūḷhassa maggamācikkhi, dhammamakkhāsi subbatā.

    ೧೨೯೦.

    1290.

    ಅಥಾಗಮಾ ಬ್ರಹ್ಮಲೋಕಾ, ನಾರದೋ ಮಾನುಸಿಂ ಪಜಂ।

    Athāgamā brahmalokā, nārado mānusiṃ pajaṃ;

    ಜಮ್ಬುದೀಪಂ ಅವೇಕ್ಖನ್ತೋ, ಅದ್ದಾ ರಾಜಾನಮಙ್ಗತಿಂ॥

    Jambudīpaṃ avekkhanto, addā rājānamaṅgatiṃ.

    ೧೨೯೧.

    1291.

    ‘‘ತತೋ ಪತಿಟ್ಠಾ ಪಾಸಾದೇ, ವೇದೇಹಸ್ಸ ಪುರತ್ಥತೋ 125

    ‘‘Tato patiṭṭhā pāsāde, vedehassa puratthato 126;

    ತಞ್ಚ ದಿಸ್ವಾನಾನುಪ್ಪತ್ತಂ, ರುಚಾ ಇಸಿಮವನ್ದಥ॥

    Tañca disvānānuppattaṃ, rucā isimavandatha.

    ೧೨೯೨.

    1292.

    ‘‘ಅಥಾಸನಮ್ಹಾ ಓರುಯ್ಹ, ರಾಜಾ ಬ್ಯಥಿತಮಾನಸೋ 127

    ‘‘Athāsanamhā oruyha, rājā byathitamānaso 128;

    ನಾರದಂ ಪರಿಪುಚ್ಛನ್ತೋ, ಇದಂ ವಚನಮಬ್ರವಿ॥

    Nāradaṃ paripucchanto, idaṃ vacanamabravi.

    ೧೨೯೩.

    1293.

    ‘‘ಕುತೋ ನು ಆಗಚ್ಛಸಿ ದೇವವಣ್ಣಿ, ಓಭಾಸಯಂ ಸಬ್ಬದಿಸಾ 129 ಚನ್ದಿಮಾವ।

    ‘‘Kuto nu āgacchasi devavaṇṇi, obhāsayaṃ sabbadisā 130 candimāva;

    ಅಕ್ಖಾಹಿ ಮೇ ಪುಚ್ಛಿತೋ ನಾಮಗೋತ್ತಂ, ಕಥಂ ತಂ ಜಾನನ್ತಿ ಮನುಸ್ಸಲೋಕೇ’’॥

    Akkhāhi me pucchito nāmagottaṃ, kathaṃ taṃ jānanti manussaloke’’.

    ೧೨೯೪.

    1294.

    ‘‘ಅಹಞ್ಹಿ ದೇವತೋ ಇದಾನಿ ಏಮಿ, ಓಭಾಸಯಂ ಸಬ್ಬದಿಸಾ 131 ಚನ್ದಿಮಾವ।

    ‘‘Ahañhi devato idāni emi, obhāsayaṃ sabbadisā 132 candimāva;

    ಅಕ್ಖಾಮಿ ತೇ ಪುಚ್ಛಿತೋ ನಾಮಗೋತ್ತಂ, ಜಾನನ್ತಿ ಮಂ ನಾರದೋ ಕಸ್ಸಪೋ ಚ’’॥

    Akkhāmi te pucchito nāmagottaṃ, jānanti maṃ nārado kassapo ca’’.

    ೧೨೯೫.

    1295.

    ‘‘ಅಚ್ಛೇರರೂಪಂ ತವ 133 ಯಾದಿಸಞ್ಚ, ವೇಹಾಯಸಂ ಗಚ್ಛಸಿ ತಿಟ್ಠಸೀ ಚ।

    ‘‘Accherarūpaṃ tava 134 yādisañca, vehāyasaṃ gacchasi tiṭṭhasī ca;

    ಪುಚ್ಛಾಮಿ ತಂ ನಾರದ ಏತಮತ್ಥಂ, ಅಥ ಕೇನ ವಣ್ಣೇನ ತವಾಯಮಿದ್ಧಿ’’॥

    Pucchāmi taṃ nārada etamatthaṃ, atha kena vaṇṇena tavāyamiddhi’’.

    ೧೨೯೬.

    1296.

    ‘‘ಸಚ್ಚಞ್ಚ ಧಮ್ಮೋ ಚ ದಮೋ ಚ ಚಾಗೋ, ಗುಣಾ ಮಮೇತೇ ಪಕತಾ ಪುರಾಣಾ।

    ‘‘Saccañca dhammo ca damo ca cāgo, guṇā mamete pakatā purāṇā;

    ತೇಹೇವ ಧಮ್ಮೇಹಿ ಸುಸೇವಿತೇಹಿ, ಮನೋಜವೋ ಯೇನ ಕಾಮಂ ಗತೋಸ್ಮಿ’’॥

    Teheva dhammehi susevitehi, manojavo yena kāmaṃ gatosmi’’.

    ೧೨೯೭.

    1297.

    ‘‘ಅಚ್ಛೇರಮಾಚಿಕ್ಖಸಿ ಪುಞ್ಞಸಿದ್ಧಿಂ, ಸಚೇ ಹಿ ಏತೇಹಿ 135 ಯಥಾ ವದೇಸಿ।

    ‘‘Accheramācikkhasi puññasiddhiṃ, sace hi etehi 136 yathā vadesi;

    ಪುಚ್ಛಾಮಿ ತಂ ನಾರದ ಏತಮತ್ಥಂ, ಪುಟ್ಠೋ ಚ ಮೇ ಸಾಧು ವಿಯಾಕರೋಹಿ’’॥

    Pucchāmi taṃ nārada etamatthaṃ, puṭṭho ca me sādhu viyākarohi’’.

    ೧೨೯೮.

    1298.

    ‘‘ಪುಚ್ಛಸ್ಸು ಮಂ ರಾಜ ತವೇಸ ಅತ್ಥೋ, ಯಂ ಸಂಸಯಂ ಕುರುಸೇ ಭೂಮಿಪಾಲ।

    ‘‘Pucchassu maṃ rāja tavesa attho, yaṃ saṃsayaṃ kuruse bhūmipāla;

    ಅಹಂ ತಂ ನಿಸ್ಸಂಸಯತಂ ಗಮೇಮಿ, ನಯೇಹಿ ಞಾಯೇಹಿ ಚ ಹೇತುಭೀ ಚ’’॥

    Ahaṃ taṃ nissaṃsayataṃ gamemi, nayehi ñāyehi ca hetubhī ca’’.

    ೧೨೯೯.

    1299.

    ‘‘ಪುಚ್ಛಾಮಿ ತಂ ನಾರದ ಏತಮತ್ಥಂ, ಪುಟ್ಠೋ ಚ ಮೇ ನಾರದ ಮಾ ಮುಸಾ ಭಣಿ।

    ‘‘Pucchāmi taṃ nārada etamatthaṃ, puṭṭho ca me nārada mā musā bhaṇi;

    ಅತ್ಥಿ ನು ದೇವಾ ಪಿತರೋ ನು ಅತ್ಥಿ, ಲೋಕೋ ಪರೋ ಅತ್ಥಿ ಜನೋ ಯಮಾಹು’’॥

    Atthi nu devā pitaro nu atthi, loko paro atthi jano yamāhu’’.

    ೧೩೦೦.

    1300.

    ‘‘ಅತ್ಥೇವ ದೇವಾ ಪಿತರೋ ಚ ಅತ್ಥಿ, ಲೋಕೋ ಪರೋ ಅತ್ಥಿ ಜನೋ ಯಮಾಹು।

    ‘‘Attheva devā pitaro ca atthi, loko paro atthi jano yamāhu;

    ಕಾಮೇಸು ಗಿದ್ಧಾ ಚ ನರಾ ಪಮೂಳ್ಹಾ, ಲೋಕಂ ಪರಂ ನ ವಿದೂ ಮೋಹಯುತ್ತಾ’’॥

    Kāmesu giddhā ca narā pamūḷhā, lokaṃ paraṃ na vidū mohayuttā’’.

    ೧೩೦೧.

    1301.

    ‘‘ಅತ್ಥೀತಿ ಚೇ ನಾರದ ಸದ್ದಹಾಸಿ, ನಿವೇಸನಂ ಪರಲೋಕೇ ಮತಾನಂ।

    ‘‘Atthīti ce nārada saddahāsi, nivesanaṃ paraloke matānaṃ;

    ಇಧೇವ ಮೇ ಪಞ್ಚ ಸತಾನಿ ದೇಹಿ, ದಸ್ಸಾಮಿ ತೇ ಪರಲೋಕೇ ಸಹಸ್ಸಂ’’॥

    Idheva me pañca satāni dehi, dassāmi te paraloke sahassaṃ’’.

    ೧೩೦೨.

    1302.

    ‘‘ದಜ್ಜೇಮು ಖೋ ಪಞ್ಚ ಸತಾನಿ ಭೋತೋ, ಜಞ್ಞಾಮು ಚೇ ಸೀಲವನ್ತಂ ವದಞ್ಞುಂ 137

    ‘‘Dajjemu kho pañca satāni bhoto, jaññāmu ce sīlavantaṃ vadaññuṃ 138;

    ಲುದ್ದಂ ತಂ ಭೋನ್ತಂ ನಿರಯೇ ವಸನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Luddaṃ taṃ bhontaṃ niraye vasantaṃ, ko codaye paraloke sahassaṃ.

    ೧೩೦೩.

    1303.

    ‘‘ಇಧೇವ ಯೋ ಹೋತಿ ಅಧಮ್ಮಸೀಲೋ 139, ಪಾಪಾಚಾರೋ ಅಲಸೋ ಲುದ್ದಕಮ್ಮೋ।

    ‘‘Idheva yo hoti adhammasīlo 140, pāpācāro alaso luddakammo;

    ನ ಪಣ್ಡಿತಾ ತಸ್ಮಿಂ ಇಣಂ ದದನ್ತಿ, ನ ಹಿ ಆಗಮೋ ಹೋತಿ ತಥಾವಿಧಮ್ಹಾ॥

    Na paṇḍitā tasmiṃ iṇaṃ dadanti, na hi āgamo hoti tathāvidhamhā.

    ೧೩೦೪.

    1304.

    ‘‘ದಕ್ಖಞ್ಚ ಪೋಸಂ ಮನುಜಾ ವಿದಿತ್ವಾ, ಉಟ್ಠಾನಕಂ 141 ಸೀಲವನ್ತಂ ವದಞ್ಞುಂ।

    ‘‘Dakkhañca posaṃ manujā viditvā, uṭṭhānakaṃ 142 sīlavantaṃ vadaññuṃ;

    ಸಯಮೇವ ಭೋಗೇಹಿ ನಿಮನ್ತಯನ್ತಿ, ಕಮ್ಮಂ ಕರಿತ್ವಾ ಪುನ ಮಾಹರೇಸಿ’’॥

    Sayameva bhogehi nimantayanti, kammaṃ karitvā puna māharesi’’.

    ೧೩೦೫.

    1305.

    ‘‘ಇತೋ ಚುತೋ 143 ದಕ್ಖಸಿ ತತ್ಥ ರಾಜ, ಕಾಕೋಲಸಙ್ಘೇಹಿ ವಿಕಸ್ಸಮಾನಂ 144

    ‘‘Ito cuto 145 dakkhasi tattha rāja, kākolasaṅghehi vikassamānaṃ 146;

    ತಂ ಖಜ್ಜಮಾನಂ ನಿರಯೇ ವಸನ್ತಂ, ಕಾಕೇಹಿ ಗಿಜ್ಝೇಹಿ ಚ ಸೇನಕೇಹಿ 147

    Taṃ khajjamānaṃ niraye vasantaṃ, kākehi gijjhehi ca senakehi 148;

    ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Sañchinnagattaṃ ruhiraṃ savantaṃ, ko codaye paraloke sahassaṃ.

    ೧೩೦೬.

    1306.

    ‘‘ಅನ್ಧಂತಮಂ ತತ್ಥ ನ ಚನ್ದಸೂರಿಯಾ, ನಿರಯೋ ಸದಾ ತುಮುಲೋ ಘೋರರೂಪೋ।

    ‘‘Andhaṃtamaṃ tattha na candasūriyā, nirayo sadā tumulo ghorarūpo;

    ಸಾ ನೇವ ರತ್ತೀ ನ ದಿವಾ ಪಞ್ಞಾಯತಿ, ತಥಾವಿಧೇ ಕೋ ವಿಚರೇ ಧನತ್ಥಿಕೋ॥

    Sā neva rattī na divā paññāyati, tathāvidhe ko vicare dhanatthiko.

    ೧೩೦೭.

    1307.

    ‘‘ಸಬಲೋ ಚ ಸಾಮೋ ಚ ದುವೇ ಸುವಾನಾ, ಪವದ್ಧಕಾಯಾ ಬಲಿನೋ ಮಹನ್ತಾ।

    ‘‘Sabalo ca sāmo ca duve suvānā, pavaddhakāyā balino mahantā;

    ಖಾದನ್ತಿ ದನ್ತೇಹಿ ಅಯೋಮಯೇಹಿ, ಇತೋ ಪಣುನ್ನಂ ಪರಲೋಕಪತ್ತಂ 149

    Khādanti dantehi ayomayehi, ito paṇunnaṃ paralokapattaṃ 150.

    ೧೩೦೮.

    1308.

    ‘‘ತಂ ಖಜ್ಜಮಾನಂ ನಿರಯೇ ವಸನ್ತಂ, ಲುದ್ದೇಹಿ ವಾಳೇಹಿ ಅಘಮ್ಮಿಗೇಹಿ ಚ।

    ‘‘Taṃ khajjamānaṃ niraye vasantaṃ, luddehi vāḷehi aghammigehi ca;

    ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Sañchinnagattaṃ ruhiraṃ savantaṃ, ko codaye paraloke sahassaṃ.

    ೧೩೦೯.

    1309.

    ‘‘ಉಸೂಹಿ ಸತ್ತೀಹಿ ಚ ಸುನಿಸಿತಾಹಿ, ಹನನ್ತಿ ವಿಜ್ಝನ್ತಿ ಚ ಪಚ್ಚಮಿತ್ತಾ 151

    ‘‘Usūhi sattīhi ca sunisitāhi, hananti vijjhanti ca paccamittā 152;

    ಕಾಳೂಪಕಾಳಾ ನಿರಯಮ್ಹಿ ಘೋರೇ, ಪುಬ್ಬೇ ನರಂ ದುಕ್ಕಟಕಮ್ಮಕಾರಿಂ॥

    Kāḷūpakāḷā nirayamhi ghore, pubbe naraṃ dukkaṭakammakāriṃ.

    ೧೩೧೦.

    1310.

    ‘‘ತಂ ಹಞ್ಞಮಾನಂ ನಿರಯೇ ವಜನ್ತಂ, ಕುಚ್ಛಿಸ್ಮಿಂ ಪಸ್ಸಸ್ಮಿಂ ವಿಪ್ಫಾಲಿತೂದರಂ।

    ‘‘Taṃ haññamānaṃ niraye vajantaṃ, kucchismiṃ passasmiṃ vipphālitūdaraṃ;

    ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Sañchinnagattaṃ ruhiraṃ savantaṃ, ko codaye paraloke sahassaṃ.

    ೧೩೧೧.

    1311.

    ‘‘ಸತ್ತೀ ಉಸೂ ತೋಮರಭಿಣ್ಡಿವಾಲಾ, ವಿವಿಧಾವುಧಾ ವಸ್ಸನ್ತಿ ತತ್ಥ ದೇವಾ।

    ‘‘Sattī usū tomarabhiṇḍivālā, vividhāvudhā vassanti tattha devā;

    ಪತನ್ತಿ ಅಙ್ಗಾರಮಿವಚ್ಚಿಮನ್ತೋ, ಸಿಲಾಸನೀ ವಸ್ಸತಿ ಲುದ್ದಕಮ್ಮೇ॥

    Patanti aṅgāramivaccimanto, silāsanī vassati luddakamme.

    ೧೩೧೨.

    1312.

    ‘‘ಉಣ್ಹೋ ಚ ವಾತೋ ನಿರಯಮ್ಹಿ ದುಸ್ಸಹೋ, ನ ತಮ್ಹಿ ಸುಖಂ ಲಬ್ಭತಿ 153 ಇತ್ತರಮ್ಪಿ।

    ‘‘Uṇho ca vāto nirayamhi dussaho, na tamhi sukhaṃ labbhati 154 ittarampi;

    ತಂ ತಂ ವಿಧಾವನ್ತಮಲೇನಮಾತುರಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Taṃ taṃ vidhāvantamalenamāturaṃ, ko codaye paraloke sahassaṃ.

    ೧೩೧೩.

    1313.

    ‘‘ಸನ್ಧಾವಮಾನಮ್ಪಿ 155 ರಥೇಸು ಯುತ್ತಂ, ಸಜೋತಿಭೂತಂ ಪಥವಿಂ ಕಮನ್ತಂ।

    ‘‘Sandhāvamānampi 156 rathesu yuttaṃ, sajotibhūtaṃ pathaviṃ kamantaṃ;

    ಪತೋದಲಟ್ಠೀಹಿ ಸುಚೋದಯನ್ತಂ 157, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Patodalaṭṭhīhi sucodayantaṃ 158, ko codaye paraloke sahassaṃ.

    ೧೩೧೪.

    1314.

    ‘‘ತಮಾರುಹನ್ತಂ ಖುರಸಞ್ಚಿತಂ ಗಿರಿಂ, ವಿಭಿಂಸನಂ ಪಜ್ಜಲಿತಂ ಭಯಾನಕಂ।

    ‘‘Tamāruhantaṃ khurasañcitaṃ giriṃ, vibhiṃsanaṃ pajjalitaṃ bhayānakaṃ;

    ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Sañchinnagattaṃ ruhiraṃ savantaṃ, ko codaye paraloke sahassaṃ.

    ೧೩೧೫.

    1315.

    ‘‘ತಮಾರುಹನ್ತಂ ಪಬ್ಬತಸನ್ನಿಕಾಸಂ, ಅಙ್ಗಾರರಾಸಿಂ ಜಲಿತಂ ಭಯಾನಕಂ।

    ‘‘Tamāruhantaṃ pabbatasannikāsaṃ, aṅgārarāsiṃ jalitaṃ bhayānakaṃ;

    ಸುದಡ್ಢಗತ್ತಂ ಕಪಣಂ ರುದನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Sudaḍḍhagattaṃ kapaṇaṃ rudantaṃ, ko codaye paraloke sahassaṃ.

    ೧೩೧೬.

    1316.

    ‘‘ಅಬ್ಭಕೂಟಸಮಾ ಉಚ್ಚಾ, ಕಣ್ಟಕನಿಚಿತಾ 159 ದುಮಾ।

    ‘‘Abbhakūṭasamā uccā, kaṇṭakanicitā 160 dumā;

    ಅಯೋಮಯೇಹಿ ತಿಕ್ಖೇಹಿ, ನರಲೋಹಿತಪಾಯಿಭಿ॥

    Ayomayehi tikkhehi, naralohitapāyibhi.

    ೧೩೧೭.

    1317.

    ‘‘ತಮಾರುಹನ್ತಿ ನಾರಿಯೋ, ನರಾ ಚ ಪರದಾರಗೂ।

    ‘‘Tamāruhanti nāriyo, narā ca paradāragū;

    ಚೋದಿತಾ ಸತ್ತಿಹತ್ಥೇಹಿ, ಯಮನಿದ್ದೇಸಕಾರಿಭಿ॥

    Coditā sattihatthehi, yamaniddesakāribhi.

    ೧೩೧೮.

    1318.

    ‘‘ತಮಾರುಹನ್ತಂ ನಿರಯಂ, ಸಿಮ್ಬಲಿಂ ರುಹರಿಮಕ್ಖಿತಂ।

    ‘‘Tamāruhantaṃ nirayaṃ, simbaliṃ ruharimakkhitaṃ;

    ವಿದಡ್ಢಕಾಯಂ 161 ವಿತಚಂ, ಆತುರಂ ಗಾಳ್ಹವೇದನಂ॥

    Vidaḍḍhakāyaṃ 162 vitacaṃ, āturaṃ gāḷhavedanaṃ.

    ೧೩೧೯.

    1319.

    ‘‘ಪಸ್ಸಸನ್ತಂ ಮುಹುಂ ಉಣ್ಹಂ, ಪುಬ್ಬಕಮ್ಮಾಪರಾಧಿಕಂ।

    ‘‘Passasantaṃ muhuṃ uṇhaṃ, pubbakammāparādhikaṃ;

    ದುಮಗ್ಗೇ ವಿತಚಂ ಗತ್ತಂ 163, ಕೋ ತಂ ಯಾಚೇಯ್ಯ ತಂ ಧನಂ॥

    Dumagge vitacaṃ gattaṃ 164, ko taṃ yāceyya taṃ dhanaṃ.

    ೧೩೨೦.

    1320.

    ‘‘ಅಬ್ಭಕೂಟಸಮಾ ಉಚ್ಚಾ, ಅಸಿಪತ್ತಾಚಿತಾ ದುಮಾ।

    ‘‘Abbhakūṭasamā uccā, asipattācitā dumā;

    ಅಯೋಮಯೇಹಿ ತಿಕ್ಖೇಹಿ, ನರಲೋಹಿತಪಾಯಿಭಿ॥

    Ayomayehi tikkhehi, naralohitapāyibhi.

    ೧೩೨೧.

    1321.

    ‘‘ತಮಾರುಹನ್ತಂ ಅಸಿಪತ್ತಪಾದಪಂ, ಅಸೀಹಿ ತಿಕ್ಖೇಹಿ ಚ ಛಿಜ್ಜಮಾನಂ 165

    ‘‘Tamāruhantaṃ asipattapādapaṃ, asīhi tikkhehi ca chijjamānaṃ 166;

    ಸಞ್ಛಿನ್ನಗತ್ತಂ ರುಹಿರಂ ಸವನ್ತಂ, ಕೋ ಚೋದಯೇ ಪರಲೋಕೇ ಸಹಸ್ಸಂ॥

    Sañchinnagattaṃ ruhiraṃ savantaṃ, ko codaye paraloke sahassaṃ.

    ೧೩೨೨.

    1322.

    ‘‘ತತೋ ನಿಕ್ಖನ್ತಮತ್ತಂ ತಂ, ಅಸಿಪತ್ತಾಚಿತಾ ದುಮಾ 167

    ‘‘Tato nikkhantamattaṃ taṃ, asipattācitā dumā 168;

    ಸಮ್ಪತಿತಂ ವೇತರಣಿಂ, ಕೋ ತಂ ಯಾಚೇಯ್ಯ ತಂ ಧನಂ॥

    Sampatitaṃ vetaraṇiṃ, ko taṃ yāceyya taṃ dhanaṃ.

    ೧೩೨೩.

    1323.

    ‘‘ಖರಾ ಖರೋದಕಾ 169 ತತ್ತಾ, ದುಗ್ಗಾ ವೇತರಣೀ ನದೀ।

    ‘‘Kharā kharodakā 170 tattā, duggā vetaraṇī nadī;

    ಅಯೋಪೋಕ್ಖರಸಞ್ಛನ್ನಾ, ತಿಕ್ಖಾ ಪತ್ತೇಹಿ ಸನ್ದತಿ॥

    Ayopokkharasañchannā, tikkhā pattehi sandati.

    ೧೩೨೪.

    1324.

    ‘‘ತತ್ಥ ಸಞ್ಛಿನ್ನಗತ್ತಂ ತಂ, ವುಯ್ಹನ್ತಂ ರುಹಿರಮಕ್ಖಿತಂ।

    ‘‘Tattha sañchinnagattaṃ taṃ, vuyhantaṃ ruhiramakkhitaṃ;

    ವೇತರಞ್ಞೇ ಅನಾಲಮ್ಬೇ, ಕೋ ತಂ ಯಾಚೇಯ್ಯ ತಂ ಧನಂ’’॥

    Vetaraññe anālambe, ko taṃ yāceyya taṃ dhanaṃ’’.

    ೧೩೨೫.

    1325.

    ‘‘ವೇಧಾಮಿ ರುಕ್ಖೋ ವಿಯ ಛಿಜ್ಜಮಾನೋ, ದಿಸಂ ನ ಜಾನಾಮಿ ಪಮೂಳ್ಹಸಞ್ಞೋ।

    ‘‘Vedhāmi rukkho viya chijjamāno, disaṃ na jānāmi pamūḷhasañño;

    ಭಯಾನುತಪ್ಪಾಮಿ ಮಹಾ ಚ ಮೇ ಭಯಾ, ಸುತ್ವಾನ ಕಥಾ 171 ತವ ಭಾಸಿತಾ ಇಸೇ॥

    Bhayānutappāmi mahā ca me bhayā, sutvāna kathā 172 tava bhāsitā ise.

    ೧೩೨೬.

    1326.

    ‘‘ಆದಿತ್ತೇ ವಾರಿಮಜ್ಝಂವ, ದೀಪಂವೋಘೇ ಮಹಣ್ಣವೇ।

    ‘‘Āditte vārimajjhaṃva, dīpaṃvoghe mahaṇṇave;

    ಅನ್ಧಕಾರೇವ ಪಜ್ಜೋತೋ, ತ್ವಂ ನೋಸಿ ಸರಣಂ ಇಸೇ॥

    Andhakāreva pajjoto, tvaṃ nosi saraṇaṃ ise.

    ೧೩೨೭.

    1327.

    ‘‘ಅತ್ಥಞ್ಚ ಧಮ್ಮಂ ಅನುಸಾಸ ಮಂ ಇಸೇ, ಅತೀತಮದ್ಧಾ ಅಪರಾಧಿತಂ ಮಯಾ।

    ‘‘Atthañca dhammaṃ anusāsa maṃ ise, atītamaddhā aparādhitaṃ mayā;

    ಆಚಿಕ್ಖ ಮೇ ನಾರದ ಸುದ್ಧಿಮಗ್ಗಂ, ಯಥಾ ಅಹಂ ನೋ ನಿರಯಂ ಪತೇಯ್ಯಂ’’॥

    Ācikkha me nārada suddhimaggaṃ, yathā ahaṃ no nirayaṃ pateyyaṃ’’.

    ೧೩೨೮.

    1328.

    ‘‘ಯಥಾ ಅಹು ಧತರಟ್ಠೋ ( ) 173, ವೇಸ್ಸಾಮಿತ್ತೋ ಅಟ್ಠಕೋ ಯಾಮತಗ್ಗಿ।

    ‘‘Yathā ahu dhataraṭṭho ( ) 174, vessāmitto aṭṭhako yāmataggi;

    ಉಸಿನ್ದರೋ ಚಾಪಿ ಸಿವೀ ಚ ರಾಜಾ, ಪರಿಚಾರಕಾ ಸಮಣಬ್ರಾಹ್ಮಣಾನಂ॥

    Usindaro cāpi sivī ca rājā, paricārakā samaṇabrāhmaṇānaṃ.

    ೧೩೨೯.

    1329.

    ‘‘ಏತೇ ಚಞ್ಞೇ ಚ ರಾಜಾನೋ, ಯೇ ಸಗ್ಗವಿಸಯಂ 175 ಗತಾ।

    ‘‘Ete caññe ca rājāno, ye saggavisayaṃ 176 gatā;

    ಅಧಮ್ಮಂ ಪರಿವಜ್ಜೇತ್ವಾ, ಧಮ್ಮಂ ಚರ ಮಹೀಪತಿ॥

    Adhammaṃ parivajjetvā, dhammaṃ cara mahīpati.

    ೧೩೩೦.

    1330.

    ‘‘ಅನ್ನಹತ್ಥಾ ಚ ತೇ ಬ್ಯಮ್ಹೇ, ಘೋಸಯನ್ತು ಪುರೇ ತವ।

    ‘‘Annahatthā ca te byamhe, ghosayantu pure tava;

    ಕೋ ಛಾತೋ ಕೋ ಚ ತಸಿತೋ, ಕೋ ಮಾಲಂ ಕೋ ವಿಲೇಪನಂ।

    Ko chāto ko ca tasito, ko mālaṃ ko vilepanaṃ;

    ನಾನಾರತ್ತಾನಂ ವತ್ಥಾನಂ, ಕೋ ನಗ್ಗೋ ಪರಿದಹಿಸ್ಸತಿ॥

    Nānārattānaṃ vatthānaṃ, ko naggo paridahissati.

    ೧೩೩೧.

    1331.

    ‘‘ಕೋ ಪನ್ಥೇ ಛತ್ತಮಾನೇತಿ 177, ಪಾದುಕಾ ಚ ಮುದೂ ಸುಭಾ।

    ‘‘Ko panthe chattamāneti 178, pādukā ca mudū subhā;

    ಇತಿ ಸಾಯಞ್ಚ ಪಾತೋ ಚ, ಘೋಸಯನ್ತು ಪುರೇ ತವ॥

    Iti sāyañca pāto ca, ghosayantu pure tava.

    ೧೩೩೨.

    1332.

    ‘‘ಜಿಣ್ಣಂ ಪೋಸಂ ಗವಸ್ಸಞ್ಚ, ಮಾಸ್ಸು ಯುಞ್ಜ ಯಥಾ ಪುರೇ।

    ‘‘Jiṇṇaṃ posaṃ gavassañca, māssu yuñja yathā pure;

    ಪರಿಹಾರಞ್ಚ ದಜ್ಜಾಸಿ, ಅಧಿಕಾರಕತೋ ಬಲೀ॥

    Parihārañca dajjāsi, adhikārakato balī.

    ೧೩೩೩.

    1333.

    ‘‘ಕಾಯೋ ತೇ ರಥಸಞ್ಞಾತೋ, ಮನೋಸಾರಥಿಕೋ ಲಹು।

    ‘‘Kāyo te rathasaññāto, manosārathiko lahu;

    ಅವಿಹಿಂಸಾಸಾರಿತಕ್ಖೋ, ಸಂವಿಭಾಗಪಟಿಚ್ಛದೋ॥

    Avihiṃsāsāritakkho, saṃvibhāgapaṭicchado.

    ೧೩೩೪.

    1334.

    ‘‘ಪಾದಸಞ್ಞಮನೇಮಿಯೋ, ಹತ್ಥಸಞ್ಞಮಪಕ್ಖರೋ।

    ‘‘Pādasaññamanemiyo, hatthasaññamapakkharo;

    ಕುಚ್ಛಿಸಞ್ಞಮನಬ್ಭನ್ತೋ, ವಾಚಾಸಞ್ಞಮಕೂಜನೋ॥

    Kucchisaññamanabbhanto, vācāsaññamakūjano.

    ೧೩೩೫.

    1335.

    ‘‘ಸಚ್ಚವಾಕ್ಯಸಮತ್ತಙ್ಗೋ, ಅಪೇಸುಞ್ಞಸುಸಞ್ಞತೋ।

    ‘‘Saccavākyasamattaṅgo, apesuññasusaññato;

    ಗಿರಾಸಖಿಲನೇಲಙ್ಗೋ, ಮಿತಭಾಣಿಸಿಲೇಸಿತೋ॥

    Girāsakhilanelaṅgo, mitabhāṇisilesito.

    ೧೩೩೬.

    1336.

    ‘‘ಸದ್ಧಾಲೋಭಸುಸಙ್ಖಾರೋ, ನಿವಾತಞ್ಜಲಿಕುಬ್ಬರೋ।

    ‘‘Saddhālobhasusaṅkhāro, nivātañjalikubbaro;

    ಅಥದ್ಧತಾನತೀಸಾಕೋ 179, ಸೀಲಸಂವರನನ್ಧನೋ॥

    Athaddhatānatīsāko 180, sīlasaṃvaranandhano.

    ೧೩೩೭.

    1337.

    ‘‘ಅಕ್ಕೋಧನಮನುಗ್ಘಾತೀ, ಧಮ್ಮಪಣ್ಡರಛತ್ತಕೋ।

    ‘‘Akkodhanamanugghātī, dhammapaṇḍarachattako;

    ಬಾಹುಸಚ್ಚಮಪಾಲಮ್ಬೋ, ಠಿತಚಿತ್ತಮುಪಾಧಿಯೋ 181

    Bāhusaccamapālambo, ṭhitacittamupādhiyo 182.

    ೧೩೩೮.

    1338.

    ‘‘ಕಾಲಞ್ಞುತಾಚಿತ್ತಸಾರೋ, ವೇಸಾರಜ್ಜತಿದಣ್ಡಕೋ।

    ‘‘Kālaññutācittasāro, vesārajjatidaṇḍako;

    ನಿವಾತವುತ್ತಿಯೋತ್ತಕೋ 183, ಅನತಿಮಾನಯುಗೋ ಲಹು॥

    Nivātavuttiyottako 184, anatimānayugo lahu.

    ೧೩೩೯.

    1339.

    ‘‘ಅಲೀನಚಿತ್ತಸನ್ಥಾರೋ , ವುದ್ಧಿಸೇವೀ ರಜೋಹತೋ।

    ‘‘Alīnacittasanthāro , vuddhisevī rajohato;

    ಸತಿ ಪತೋದೋ ಧೀರಸ್ಸ, ಧಿತಿ ಯೋಗೋ ಚ ರಸ್ಮಿಯೋ॥

    Sati patodo dhīrassa, dhiti yogo ca rasmiyo.

    ೧೩೪೦.

    1340.

    ‘‘ಮನೋ ದನ್ತಂ ಪಥಂ ನೇತಿ 185, ಸಮದನ್ತೇಹಿ ವಾಹಿಭಿ।

    ‘‘Mano dantaṃ pathaṃ neti 186, samadantehi vāhibhi;

    ಇಚ್ಛಾ ಲೋಭೋ ಚ ಕುಮ್ಮಗ್ಗೋ, ಉಜುಮಗ್ಗೋ ಚ ಸಂಯಮೋ॥

    Icchā lobho ca kummaggo, ujumaggo ca saṃyamo.

    ೧೩೪೧.

    1341.

    ‘‘ರೂಪೇ ಸದ್ದೇ ರಸೇ ಗನ್ಧೇ, ವಾಹನಸ್ಸ ಪಧಾವತೋ।

    ‘‘Rūpe sadde rase gandhe, vāhanassa padhāvato;

    ಪಞ್ಞಾ ಆಕೋಟನೀ ರಾಜ, ತತ್ಥ ಅತ್ತಾವ ಸಾರಥಿ॥

    Paññā ākoṭanī rāja, tattha attāva sārathi.

    ೧೩೪೨.

    1342.

    ‘‘ಸಚೇ ಏತೇನ ಯಾನೇನ, ಸಮಚರಿಯಾ ದಳ್ಹಾ ಧಿತಿ।

    ‘‘Sace etena yānena, samacariyā daḷhā dhiti;

    ಸಬ್ಬಕಾಮದುಹೋ ರಾಜ, ನ ಜಾತು ನಿರಯಂ ವಜೇ’’॥

    Sabbakāmaduho rāja, na jātu nirayaṃ vaje’’.

    ೧೩೪೩.

    1343.

    ‘‘ಅಲಾತೋ ದೇವದತ್ತೋಸಿ, ಸುನಾಮೋ ಆಸಿ ಭದ್ದಜಿ।

    ‘‘Alāto devadattosi, sunāmo āsi bhaddaji;

    ವಿಜಯೋ ಸಾರಿಪುತ್ತೋಸಿ, ಮೋಗ್ಗಲ್ಲಾನೋಸಿ ಬೀಜಕೋ॥

    Vijayo sāriputtosi, moggallānosi bījako.

    ೧೩೪೪.

    1344.

    ‘‘ಸುನಕ್ಖತ್ತೋ ಲಿಚ್ಛವಿಪುತ್ತೋ, ಗುಣೋ ಆಸಿ ಅಚೇಲಕೋ।

    ‘‘Sunakkhatto licchaviputto, guṇo āsi acelako;

    ಆನನ್ದೋ ಸಾ ರುಚಾ ಆಸಿ, ಯಾ ರಾಜಾನಂ ಪಸಾದಯಿ॥

    Ānando sā rucā āsi, yā rājānaṃ pasādayi.

    ೧೩೪೫.

    1345.

    ‘‘ಊರುವೇಳಕಸ್ಸಪೋ ರಾಜಾ, ಪಾಪದಿಟ್ಠಿ ತದಾ ಅಹು।

    ‘‘Ūruveḷakassapo rājā, pāpadiṭṭhi tadā ahu;

    ಮಹಾಬ್ರಹ್ಮಾ ಬೋಧಿಸತ್ತೋ, ಏವಂ ಧಾರೇಥ ಜಾತಕ’’ನ್ತಿ॥

    Mahābrahmā bodhisatto, evaṃ dhāretha jātaka’’nti.

    ಮಹಾನಾರದಕಸ್ಸಪಜಾತಕಂ ಅಟ್ಠಮಂ।

    Mahānāradakassapajātakaṃ aṭṭhamaṃ.







    Footnotes:
    1. ಅಙ್ಗಾತಿ (ಸೀ॰) ಏವಮುಪರಿಪಿ
    2. aṅgāti (sī.) evamuparipi
    3. ಪನ್ನರಸೇ (ಸ್ಯಾ॰ ಕ॰)
    4. pannarase (syā. ka.)
    5. ಚಾತುಮಸ್ಸ (ಸೀ॰ ಪೀ॰)
    6. cātumassa (sī. pī.)
    7. ಮಿಹಿತಪುಬ್ಬೇ (ಸೀ॰ ಪೀ॰)
    8. mihitapubbe (sī. pī.)
    9. ಬ್ಯಪಗತಂ (ಸೀ॰ ಪೀ॰)
    10. byapagataṃ (sī. pī.)
    11. ಉಪನಿಯ್ಯಾಮಸೇ (ಕ॰)
    12. upaniyyāmase (ka.)
    13. ಚಿತ್ತಂ ಮತೀ (ಕ॰)
    14. cittaṃ matī (ka.)
    15. ಕೋ (ಸೀ॰ ಪೀ॰)
    16. ko (sī. pī.)
    17. ತದೇವ (ಕ॰)
    18. ಪಯಿರುಪಾಸಯ (ಸೀ॰ ಪೀ॰)
    19. tadeva (ka.)
    20. payirupāsaya (sī. pī.)
    21. ರೂಪಿಯುಪಕ್ಖರಂ (ಕ॰)
    22. rūpiyupakkharaṃ (ka.)
    23. ಅನಿಲೂಪಮಸಮುಪ್ಪಾದಾ (ಕ॰)
    24. anilūpamasamuppādā (ka.)
    25. ಇನ್ದಖಗ್ಗಧರಾ (ಸೀ॰), ಇಟ್ಠಿಖಗ್ಗಧರಾ (ಪೀ॰)
    26. indakhaggadharā (sī.), iṭṭhikhaggadharā (pī.)
    27. ಮುದುಚಿತ್ತಕಳನ್ದಕೇ (ಸೀ॰ ಪೀ॰)
    28. muducittakaḷandake (sī. pī.)
    29. ವಾತಾನಮವಿಸಗ್ಗತಾ (ಸೀ॰ ಪೀ॰), ವಾತಾನಮವಿಯತ್ತತಾ (ಸ್ಯಾ॰)
    30. vātānamavisaggatā (sī. pī.), vātānamaviyattatā (syā.)
    31. ಲಬ್ಭತಿ (ಸೀ॰ ಪೀ॰)
    32. ಪಿಣ್ಡಿಯಾಪನಂ (ಸ್ಯಾ॰ ಕ॰)
    33. labbhati (sī. pī.)
    34. piṇḍiyāpanaṃ (syā. ka.)
    35. ಸರೀರಸ್ಸುಪತಾಪಿಕಾ (ಸೀ॰ ಪೀ॰), ಸರೀರಸ್ಸುಪತಾಪನಾ (?)
    36. sarīrassupatāpikā (sī. pī.), sarīrassupatāpanā (?)
    37. ಪೇಚ್ಚ ಗಚ್ಛತಿ (ಸೀ॰ ಸ್ಯಾ॰ ಪೀ॰)
    38. pecca gacchati (sī. syā. pī.)
    39. ಧಮ್ಮಸ್ಸ ಚಿಣ್ಣಸ್ಸ (ಸೀ॰)
    40. dhammassa ciṇṇassa (sī.)
    41. ಹಞ್ಞರೇ ವಾಪಿ (ಸೀ॰ ಸ್ಯಾ॰ ಪೀ॰)
    42. haññare vāpi (sī. syā. pī.)
    43. ಯೋಪಾಯಂ (ಸೀ॰ ಪೀ॰), ಯೋ ಚಾಯಂ (ಸ್ಯಾ॰ ಕ॰)
    44. yopāyaṃ (sī. pī.), yo cāyaṃ (syā. ka.)
    45. ಪಾಪೇ ಸೋಹಂ (ಸೀ॰ ಪೀ॰)
    46. pāpe sohaṃ (sī. pī.)
    47. ಪಳಚ್ಚರೀ (ಸೀ॰ ಪೀ॰), ಪಟಜ್ಜರೀ (ಕ॰)
    48. paḷaccarī (sī. pī.), paṭajjarī (ka.)
    49. ನ ಅಹಂ (ಕ॰)
    50. na ahaṃ (ka.)
    51. ನಿಯತಂ (ಸ್ಯಾ॰)
    52. niyataṃ (syā.)
    53. ತುರಿತೋ (ಸ್ಯಾ॰)
    54. turito (syā.)
    55. ವಾವಟೋ (ಕ॰)
    56. vāvaṭo (ka.)
    57. ರುಜಾ (ಸೀ॰ ಪೀ॰) ಏವಮುಪರಿಪಿ
    58. rujā (sī. pī.) evamuparipi
    59. ಚ ಕರೋನ್ತು (ಸೀ॰ ಪೀ॰)
    60. ca karontu (sī. pī.)
    61. ಪಿತುಸ್ಸ ಸನ್ತಿಕೇ (ಸ್ಯಾ॰)
    62. pitussa santike (syā.)
    63. ಸೋಣ್ಣಮಯೇ (ಕ॰)
    64. soṇṇamaye (ka.)
    65. ಅಸೋಭಿಂಸು (ಸೀ॰ ಸ್ಯಾ॰ ಪೀ॰)
    66. asobhiṃsu (sī. syā. pī.)
    67. ಸುವಣ್ಣವಿಕತೇ (ಸೀ॰ ಪೀ॰)
    68. suvaṇṇavikate (sī. pī.)
    69. ಅಹು (ಸ್ಯಾ॰ ಕ॰)
    70. ahu (syā. ka.)
    71. ಕುಟ್ಟಮುಖೀ (ಸೀ॰ ಪೀ॰)
    72. ಅಪಿ ಚನ್ದಸಮಮ್ಪಿ ತೇ (ಕ॰)
    73. kuṭṭamukhī (sī. pī.)
    74. api candasamampi te (ka.)
    75. ಸಬ್ಬವಣೀಸ್ವಹಂ (ಸ್ಯಾ॰ ಕ॰)
    76. sabbavaṇīsvahaṃ (syā. ka.)
    77. ಜೀವಸಿನೋ (ಸೀ॰ ಪೀ॰)
    78. jīvasino (sī. pī.)
    79. ಪಚ್ಚಕ್ಖಂ (ಕ॰)
    80. paccakkhaṃ (ka.)
    81. ಮೋಮುಹೋ (ಸೀ॰ ಪೀ॰)
    82. momuho (sī. pī.)
    83. ಬಹೂ ಪಜಾ (ಕ॰)
    84. bahū pajā (ka.)
    85. ಅತ್ಥೋ (ಕ॰), ದುಗ್ಗಹಿತೋವ’ನತ್ಥಾ (?)
    86. attho (ka.), duggahitova’natthā (?)
    87. ಅಪ್ಪಮಾಣಹರಾ (ಪೀ॰)
    88. appamāṇaharā (pī.)
    89. ಅಪಾಹಾಯ (ಸೀ॰)
    90. apāhāya (sī.)
    91. ಸಾಧವೇ (ಕ॰)
    92. sādhave (ka.)
    93. ಪುಬ್ಬೇ ತಸ್ಸ (ಸೀ॰ ಪೀ॰)
    94. pubbe tassa (sī. pī.)
    95. ಸಹವಾಸೋಪಿ (ಕ॰)
    96. sahavāsopi (ka.)
    97. ಉಪಲಿಮ್ಪಭಯಾ (ಕ॰)
    98. upalimpabhayā (ka.)
    99. ಫಲಪುಟಸ್ಸೇವ (ಸೀ॰ ಪೀ॰)
    100. phalapuṭasseva (sī. pī.)
    101. ಪರಿಯಾಗ ತಂ (ಸೀ॰), ಪರಿಯಾಗತಂ (ಸ್ಯಾ॰ ಪೀ॰)
    102. pariyāga taṃ (sī.), pariyāgataṃ (syā. pī.)
    103. ಭೇಣ್ಣಾಕಟೇ (ಸೀ॰ ಪೀ॰)
    104. ಛಕಲೋ ಉದ್ಧಿತಪ್ಫಲೋ (ಸೀ॰ ಪೀ॰)
    105. bheṇṇākaṭe (sī. pī.)
    106. chakalo uddhitapphalo (sī. pī.)
    107. ನಿಲಿಚ್ಛಿತಫಲೋ (ಸೀ॰ ಪೀ॰)
    108. nilicchitaphalo (sī. pī.)
    109. ದಸಣ್ಣೇಸು (ಸೀ॰ ಪೀ॰), ದಸನ್ನೇಸು (ಸ್ಯಾ॰)
    110. dasaṇṇesu (sī. pī.), dasannesu (syā.)
    111. ವರವಣ್ಣಿನೀ (ಕ॰)
    112. varavaṇṇinī (ka.)
    113. ಜಚ್ಚಾ (ಸ್ಯಾ॰ ಪೀ॰)
    114. jaccā (syā. pī.)
    115. ಛಟ್ಠಾ ಗತಿಯೋ (ಸ್ಯಾ॰)
    116. chaṭṭhā gatiyo (syā.)
    117. ಭವಿಸ್ಸತಿ (ಕ॰)
    118. bhavissati (ka.)
    119. ಪನಸ್ಸತಿ (ಸೀ॰ ಪೀ॰)
    120. panassati (sī. pī.)
    121. ಜಾತಿಜಾತಿಂ (ಸೀ॰ ಪೀ॰)
    122. jātijātiṃ (sī. pī.)
    123. ಪರಿವಜ್ಜೇಯ್ಯ (ಕ॰)
    124. parivajjeyya (ka.)
    125. ಪುರಕ್ಖತೋ (ಸ್ಯಾ॰ ಕ॰)
    126. purakkhato (syā. ka.)
    127. ಬ್ಯಮ್ಹಿತಮಾನಸೋ (ಸೀ॰ ಸ್ಯಾ॰ ಪೀ॰)
    128. byamhitamānaso (sī. syā. pī.)
    129. ಸಂವರಿಂ (ಸೀ॰ ಪೀ॰)
    130. saṃvariṃ (sī. pī.)
    131. ಸಂವರಿಂ (ಸೀ॰ ಪೀ॰)
    132. saṃvariṃ (sī. pī.)
    133. ವತ (ಸೀ॰ ಪೀ॰)
    134. vata (sī. pī.)
    135. ಏತೇ ತ್ವಂ (ಸೀ॰ ಪೀ॰)
    136. ete tvaṃ (sī. pī.)
    137. ವತಞ್ಞುಂ (ಕ॰)
    138. vataññuṃ (ka.)
    139. ಅಕಮ್ಮಸೀಲೋ (ಪೀ॰)
    140. akammasīlo (pī.)
    141. ಉಟ್ಠಾಹಕಂ (ಸೀ॰)
    142. uṭṭhāhakaṃ (sī.)
    143. ಗತೋ (ಸೀ॰ ಪೀ॰)
    144. ಕಾಕೋಳಸಙ್ಘೇಹಿಪಿ ಕಡ್ಢಮಾನಂ (ಸೀ॰ ಪೀ॰)
    145. gato (sī. pī.)
    146. kākoḷasaṅghehipi kaḍḍhamānaṃ (sī. pī.)
    147. ಸೋಣಕೇಹಿ (ಸ್ಯಾ॰ ಕ॰)
    148. soṇakehi (syā. ka.)
    149. ಪರಲೋಕೇ ಪತನ್ತಂ (ಕ॰)
    150. paraloke patantaṃ (ka.)
    151. ಪೋಥಯನ್ತಿ (ಕ॰)
    152. pothayanti (ka.)
    153. ಸೇತಿ (ಕ॰)
    154. seti (ka.)
    155. ಸನ್ಧಾವಮಾನಂ ತಂ (ಸೀ॰ ಪೀ॰)
    156. sandhāvamānaṃ taṃ (sī. pī.)
    157. ಸುಚೋದಿಯನ್ತಂ (ಸೀ॰ ಪೀ॰)
    158. sucodiyantaṃ (sī. pī.)
    159. ಕಣ್ಟಕಾಪಚಿತಾ (ಸೀ॰ ಪೀ॰), ಕಣ್ಟಕಾಹಿಚಿತಾ (ಸ್ಯಾ॰)
    160. kaṇṭakāpacitā (sī. pī.), kaṇṭakāhicitā (syā.)
    161. ವಿದುಟ್ಠಕಾಯಂ (ಪೀ॰)
    162. viduṭṭhakāyaṃ (pī.)
    163. ದುಮಗ್ಗವಿಟಪಗ್ಗತಂ (ಸೀ॰)
    164. dumaggaviṭapaggataṃ (sī.)
    165. ಪಭಿಜ್ಜಮಾನಂ (ಕ॰)
    166. pabhijjamānaṃ (ka.)
    167. ಅಸಿಪತ್ತನಿರಯಾ ದುಖಾ (ಸೀ॰ ಪೀ॰)
    168. asipattanirayā dukhā (sī. pī.)
    169. ಖಾರೋದಿಕಾ (ಸೀ॰), ಖರೋದಿಕಾ (ಪೀ॰)
    170. khārodikā (sī.), kharodikā (pī.)
    171. ಗಾಥಾ (ಸೀ॰ ಸ್ಯಾ॰ ಪೀ॰)
    172. gāthā (sī. syā. pī.)
    173. ಏತ್ಥ ಕಿಞ್ಚಿ ಊನಂ ವಿಯ ದಿಸ್ಸತಿ
    174. ettha kiñci ūnaṃ viya dissati
    175. ಸಕ್ಕವಿಸಯಂ (ಸೀ॰ ಪೀ॰)
    176. sakkavisayaṃ (sī. pī.)
    177. ಛತ್ತ’ಮಾದೇತಿ (ಸೀ॰ ಸ್ಯಾ॰ ಪೀ॰)
    178. chatta’mādeti (sī. syā. pī.)
    179. ಅತ್ಥದ್ಧತಾನತೀಸಾಕೋ (ಸೀ॰ ಪೀ॰)
    180. atthaddhatānatīsāko (sī. pī.)
    181. ಧಿತಿಚಿತ್ತಮುಪಾಧಿಯೋ (ಕ॰)
    182. dhiticittamupādhiyo (ka.)
    183. ನಿವಾತವುತ್ತಿಯೋತ್ತಙ್ಗೋ (ಕ॰)
    184. nivātavuttiyottaṅgo (ka.)
    185. ಪಥ’ನ್ವೇತಿ (ಸೀ॰ ಪೀ॰)
    186. patha’nveti (sī. pī.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೫೪೫] ೮. ಮಹಾನಾರದಕಸ್ಸಪಜಾತಕವಣ್ಣನಾ • [545] 8. Mahānāradakassapajātakavaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact