| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ • Mahāvibhaṅga |
੭. ਮਹਾਪੇਸਕਾਰਸਿਕ੍ਖਾਪਦਂ
7. Mahāpesakārasikkhāpadaṃ
੬੪੧. ਤੇਨ ਸਮਯੇਨ ਬੁਦ੍ਧੋ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ। ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਪવਾਸਂ ਗਚ੍ਛਨ੍ਤੋ ਪਜਾਪਤਿਂ ਏਤਦવੋਚ – ‘‘ਸੁਤ੍ਤਂ ਧਾਰਯਿਤ੍વਾ ਅਮੁਕਸ੍ਸ ਤਨ੍ਤવਾਯਸ੍ਸ ਦੇਹਿ, ਚੀવਰਂ વਾਯਾਪੇਤ੍વਾ ਨਿਕ੍ਖਿਪ, ਆਗਤੋ ਅਯ੍ਯਂ ਉਪਨਨ੍ਦਂ ਚੀવਰੇਨ ਅਚ੍ਛਾਦੇਸ੍ਸਾਮੀ’’ਤਿ। ਅਸ੍ਸੋਸਿ ਖੋ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਤਸ੍ਸ ਪੁਰਿਸਸ੍ਸ ਇਮਂ વਾਚਂ ਭਾਸਮਾਨਸ੍ਸ। ਅਥ ਖੋ ਸੋ ਭਿਕ੍ਖੁ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦવੋਚ – ‘‘ਮਹਾਪੁਞ੍ਞੋਸਿ ਤ੍વਂ, ਆવੁਸੋ ਉਪਨਨ੍ਦ, ਅਮੁਕਸ੍ਮਿਂ ਓਕਾਸੇ ਅਞ੍ਞਤਰੋ ਪੁਰਿਸੋ ਪવਾਸਂ ਗਚ੍ਛਨ੍ਤੋ ਪਜਾਪਤਿਂ ਏਤਦવੋਚ – ‘‘ਸੁਤ੍ਤਂ ਧਾਰਯਿਤ੍વਾ ਅਮੁਕਸ੍ਸ ਤਨ੍ਤવਾਯਸ੍ਸ ਦੇਹਿ, ਚੀવਰਂ વਾਯਾਪੇਤ੍વਾ ਨਿਕ੍ਖਿਪ, ਆਗਤੋ ਅਯ੍ਯਂ ਉਪਨਨ੍ਦਂ ਚੀવਰੇਨ ਅਚ੍ਛਾਦੇਸ੍ਸਾਮੀ’’ਤਿ। ‘‘ਅਤ੍ਥਾવੁਸੋ, ਮਂ ਸੋ ਉਪਟ੍ਠਾਕੋ’’ਤਿ। ਸੋਪਿ ਖੋ ਤਨ੍ਤવਾਯੋ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਉਪਟ੍ਠਾਕੋ ਹੋਤਿ। ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਯੇਨ ਸੋ ਤਨ੍ਤવਾਯੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਤਂ ਤਨ੍ਤવਾਯਂ ਏਤਦવੋਚ – ‘‘ਇਦਂ ਖੋ, ਆવੁਸੋ, ਚੀવਰਂ ਮਂ ਉਦ੍ਦਿਸ੍ਸ વਿਯ੍ਯਤਿ; ਆਯਤਞ੍ਚ ਕਰੋਹਿ વਿਤ੍ਥਤਞ੍ਚ। ਅਪ੍ਪਿਤਞ੍ਚ ਸੁવੀਤਞ੍ਚ ਸੁਪ੍ਪવਾਯਿਤਞ੍ਚ ਸੁવਿਲੇਖਿਤਞ੍ਚ ਸੁવਿਤਚ੍ਛਿਤਞ੍ਚ ਕਰੋਹੀ’’ਤਿ। ‘‘ਏਤੇ ਖੋ ਮੇ, ਭਨ੍ਤੇ, ਸੁਤ੍ਤਂ ਧਾਰਯਿਤ੍વਾ ਅਦਂਸੁ; ਇਮਿਨਾ ਸੁਤ੍ਤੇਨ ਚੀવਰਂ વਿਨਾਹੀ’’ਤਿ। ‘‘ਨ, ਭਨ੍ਤੇ, ਸਕ੍ਕਾ ਆਯਤਂ વਾ વਿਤ੍ਥਤਂ વਾ ਅਪ੍ਪਿਤਂ વਾ ਕਾਤੁਂ। ਸਕ੍ਕਾ ਚ ਖੋ, ਭਨ੍ਤੇ, ਸੁવੀਤਞ੍ਚ ਸੁਪ੍ਪવਾਯਿਤਞ੍ਚ ਸੁવਿਲੇਖਿਤਞ੍ਚ ਸੁવਿਤਚ੍ਛਿਤਞ੍ਚ ਕਾਤੁ’’ਨ੍ਤਿ। ‘‘ਇਙ੍ਘ ਤ੍વਂ, ਆવੁਸੋ, ਆਯਤਞ੍ਚ ਕਰੋਹਿ વਿਤ੍ਥਤਞ੍ਚ ਅਪ੍ਪਿਤਞ੍ਚ। ਨ ਤੇਨ ਸੁਤ੍ਤੇਨ ਪਟਿਬਦ੍ਧਂ ਭવਿਸ੍ਸਤੀ’’ਤਿ।
641. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro puriso pavāsaṃ gacchanto pajāpatiṃ etadavoca – ‘‘suttaṃ dhārayitvā amukassa tantavāyassa dehi, cīvaraṃ vāyāpetvā nikkhipa, āgato ayyaṃ upanandaṃ cīvarena acchādessāmī’’ti. Assosi kho aññataro piṇḍacāriko bhikkhu tassa purisassa imaṃ vācaṃ bhāsamānassa. Atha kho so bhikkhu yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ etadavoca – ‘‘mahāpuññosi tvaṃ, āvuso upananda, amukasmiṃ okāse aññataro puriso pavāsaṃ gacchanto pajāpatiṃ etadavoca – ‘‘suttaṃ dhārayitvā amukassa tantavāyassa dehi, cīvaraṃ vāyāpetvā nikkhipa, āgato ayyaṃ upanandaṃ cīvarena acchādessāmī’’ti. ‘‘Atthāvuso, maṃ so upaṭṭhāko’’ti. Sopi kho tantavāyo āyasmato upanandassa sakyaputtassa upaṭṭhāko hoti. Atha kho āyasmā upanando sakyaputto yena so tantavāyo tenupasaṅkami; upasaṅkamitvā taṃ tantavāyaṃ etadavoca – ‘‘idaṃ kho, āvuso, cīvaraṃ maṃ uddissa viyyati; āyatañca karohi vitthatañca. Appitañca suvītañca suppavāyitañca suvilekhitañca suvitacchitañca karohī’’ti. ‘‘Ete kho me, bhante, suttaṃ dhārayitvā adaṃsu; iminā suttena cīvaraṃ vināhī’’ti. ‘‘Na, bhante, sakkā āyataṃ vā vitthataṃ vā appitaṃ vā kātuṃ. Sakkā ca kho, bhante, suvītañca suppavāyitañca suvilekhitañca suvitacchitañca kātu’’nti. ‘‘Iṅgha tvaṃ, āvuso, āyatañca karohi vitthatañca appitañca. Na tena suttena paṭibaddhaṃ bhavissatī’’ti.
ਅਥ ਖੋ ਸੋ ਤਨ੍ਤવਾਯੋ ਯਥਾਭਤਂ ਸੁਤ੍ਤਂ ਤਨ੍ਤੇ ਉਪਨੇਤ੍વਾ ਯੇਨ ਸਾ ਇਤ੍ਥੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਤਂ ਇਤ੍ਥਿਂ ਏਤਦવੋਚ – ‘‘ਸੁਤ੍ਤੇਨ, ਅਯ੍ਯੇ, ਅਤ੍ਥੋ’’ਤਿ। ‘‘ਨਨੁ ਤ੍વਂ ਅਯ੍ਯੋ 1 ਮਯਾ વੁਤ੍ਤੋ – ‘ਇਮਿਨਾ ਸੁਤ੍ਤੇਨ ਚੀવਰਂ વਿਨਾਹੀ’’’ਤਿ। ‘‘ਸਚ੍ਚਾਹਂ, ਅਯ੍ਯੇ, ਤਯਾ વੁਤ੍ਤੋ – ‘ਇਮਿਨਾ ਸੁਤ੍ਤੇਨ ਚੀવਰਂ વਿਨਾਹੀ’ਤਿ। ਅਪਿਚ, ਮਂ ਅਯ੍ਯੋ ਉਪਨਨ੍ਦੋ ਏવਮਾਹ – ‘ਇਙ੍ਘ ਤ੍વਂ, ਆવੁਸੋ, ਆਯਤਞ੍ਚ ਕਰੋਹਿ વਿਤ੍ਥਤਞ੍ਚ ਅਪ੍ਪਿਤਞ੍ਚ, ਨ ਤੇਨ ਸੁਤ੍ਤੇਨ ਪਟਿਬਦ੍ਧਂ ਭવਿਸ੍ਸਤੀ’’’ਤਿ। ਅਥ ਖੋ ਸਾ ਇਤ੍ਥੀ ਯਤ੍ਤਕਂਯੇવ ਸੁਤ੍ਤਂ ਪਠਮਂ ਅਦਾਸਿ ਤਤ੍ਤਕਂ ਪਚ੍ਛਾ ਅਦਾਸਿ। ਅਸ੍ਸੋਸਿ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ – ‘‘ਸੋ ਕਿਰ ਪੁਰਿਸੋ ਪવਾਸਤੋ ਆਗਤੋ’’ਤਿ। ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਯੇਨ ਤਸ੍ਸ ਪੁਰਿਸਸ੍ਸ ਨਿવੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਪਞ੍ਞਤ੍ਤੇ ਆਸਨੇ ਨਿਸੀਦਿ। ਅਥ ਖੋ ਸੋ ਪੁਰਿਸੋ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਪੁਰਿਸੋ ਪਜਾਪਤਿਂ ਏਤਦવੋਚ – ‘‘વੀਤਂ ਤਂ ਚੀવਰ’’ਨ੍ਤਿ? ‘‘ਆਮਾਯ੍ਯ, વੀਤਂ ਤਂ ਚੀવਰ’’ਨ੍ਤਿ। ‘‘ਆਹਰ, ਅਯ੍ਯਂ ਉਪਨਨ੍ਦਂ ਚੀવਰੇਨ ਅਚ੍ਛਾਦੇਸ੍ਸਾਮੀ’’ਤਿ। ਅਥ ਖੋ ਸਾ ਇਤ੍ਥੀ ਤਂ ਚੀવਰਂ ਨੀਹਰਿਤ੍વਾ ਸਾਮਿਕਸ੍ਸ ਦਤ੍વਾ ਏਤਮਤ੍ਥਂ ਆਰੋਚੇਸਿ। ਅਥ ਖੋ ਸੋ ਪੁਰਿਸੋ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਚੀવਰਂ ਦਤ੍વਾ ਉਜ੍ਝਾਯਤਿ ਖਿਯ੍ਯਤਿ વਿਪਾਚੇਤਿ – ‘‘ਮਹਿਚ੍ਛਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਅਸਨ੍ਤੁਟ੍ਠਾ। ਨਯਿਮੇ ਸੁਕਰਾ ਚੀવਰੇਨ ਅਚ੍ਛਾਦੇਤੁਂ। ਕਥਞ੍ਹਿ ਨਾਮ ਅਯ੍ਯੋ ਉਪਨਨ੍ਦੋ ਮਯਾ ਪੁਬ੍ਬੇ ਅਪ੍ਪવਾਰਿਤੋ ਤਨ੍ਤવਾਯੇ 2 ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਿਸ੍ਸਤੀ’’ਤਿ।
Atha kho so tantavāyo yathābhataṃ suttaṃ tante upanetvā yena sā itthī tenupasaṅkami; upasaṅkamitvā taṃ itthiṃ etadavoca – ‘‘suttena, ayye, attho’’ti. ‘‘Nanu tvaṃ ayyo 3 mayā vutto – ‘iminā suttena cīvaraṃ vināhī’’’ti. ‘‘Saccāhaṃ, ayye, tayā vutto – ‘iminā suttena cīvaraṃ vināhī’ti. Apica, maṃ ayyo upanando evamāha – ‘iṅgha tvaṃ, āvuso, āyatañca karohi vitthatañca appitañca, na tena suttena paṭibaddhaṃ bhavissatī’’’ti. Atha kho sā itthī yattakaṃyeva suttaṃ paṭhamaṃ adāsi tattakaṃ pacchā adāsi. Assosi kho āyasmā upanando sakyaputto – ‘‘so kira puriso pavāsato āgato’’ti. Atha kho āyasmā upanando sakyaputto yena tassa purisassa nivesanaṃ tenupasaṅkami; upasaṅkamitvā paññatte āsane nisīdi. Atha kho so puriso yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinno kho so puriso pajāpatiṃ etadavoca – ‘‘vītaṃ taṃ cīvara’’nti? ‘‘Āmāyya, vītaṃ taṃ cīvara’’nti. ‘‘Āhara, ayyaṃ upanandaṃ cīvarena acchādessāmī’’ti. Atha kho sā itthī taṃ cīvaraṃ nīharitvā sāmikassa datvā etamatthaṃ ārocesi. Atha kho so puriso āyasmato upanandassa sakyaputtassa cīvaraṃ datvā ujjhāyati khiyyati vipāceti – ‘‘mahicchā ime samaṇā sakyaputtiyā asantuṭṭhā. Nayime sukarā cīvarena acchādetuṃ. Kathañhi nāma ayyo upanando mayā pubbe appavārito tantavāye 4 upasaṅkamitvā cīvare vikappaṃ āpajjissatī’’ti.
ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਪੁਰਿਸਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ વਿਪਾਚੇਨ੍ਤਸ੍ਸ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ॰… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕਸ੍ਸ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਅਨੇਕਪਰਿਯਾਯੇਨ વਿਗਰਹਿਤ੍વਾ ਭਗવਤੋ ਏਤਮਤ੍ਥਂ ਆਰੋਚੇਸੁਂ…ਪੇ॰… ‘‘ਸਚ੍ਚਂ ਕਿਰ ਤ੍વਂ, ਉਪਨਨ੍ਦ, ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕਸ੍ਸ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜੀ’’ਤਿ? ‘‘ਸਚ੍ਚਂ, ਭਗવਾ’’ਤਿ। ‘‘ਞਾਤਕੋ ਤੇ, ਉਪਨਨ੍ਦ, ਅਞ੍ਞਾਤਕੋ’’ਤਿ? ‘‘ਅਞ੍ਞਾਤਕੋ, ਭਗવਾ’’ਤਿ। ‘‘ਅਞ੍ਞਾਤਕੋ, ਮੋਘਪੁਰਿਸ, ਅਞ੍ਞਾਤਕਸ੍ਸ ਨ ਜਾਨਾਤਿ ਪਤਿਰੂਪਂ વਾ ਅਪ੍ਪਤਿਰੂਪਂ વਾ ਸਨ੍ਤਂ વਾ ਅਸਨ੍ਤਂ વਾ। ਤਤ੍ਥ ਨਾਮ ਤ੍વਂ, ਮੋਘਪੁਰਿਸ, ਪੁਬ੍ਬੇ ਅਪ੍ਪવਾਰਿਤੋ ਅਞ੍ਞਾਤਕਸ੍ਸ ਗਹਪਤਿਕਸ੍ਸ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ વਾ ਪਸਾਦਾਯ…ਪੇ॰… ਏવਞ੍ਚ ਪਨ, ਭਿਕ੍ਖવੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
Assosuṃ kho bhikkhū tassa purisassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto pubbe appavārito gahapatikassa tantavāye upasaṅkamitvā cīvare vikappaṃ āpajjissatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, pubbe appavārito gahapatikassa tantavāye upasaṅkamitvā cīvare vikappaṃ āpajjī’’ti? ‘‘Saccaṃ, bhagavā’’ti. ‘‘Ñātako te, upananda, aññātako’’ti? ‘‘Aññātako, bhagavā’’ti. ‘‘Aññātako, moghapurisa, aññātakassa na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, pubbe appavārito aññātakassa gahapatikassa tantavāye upasaṅkamitvā cīvare vikappaṃ āpajjissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
੬੪੨. ‘‘ਭਿਕ੍ਖੁਂ ਪਨੇવ ਉਦ੍ਦਿਸ੍ਸ ਅਞ੍ਞਾਤਕੋ ਗਹਪਤਿ વਾ ਗਹਪਤਾਨੀ વਾ ਤਨ੍ਤવਾਯੇਹਿ ਚੀવਰਂ વਾਯਾਪੇਯ੍ਯ, ਤਤ੍ਰ ਚੇ ਸੋ ਭਿਕ੍ਖੁ ਪੁਬ੍ਬੇ ਅਪ੍ਪવਾਰਿਤੋ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜੇਯ੍ਯ – ‘ਇਦਂ ਖੋ, ਆવੁਸੋ, ਚੀવਰਂ ਮਂ ਉਦ੍ਦਿਸ੍ਸ વਿਯ੍ਯਤਿ। ਆਯਤਞ੍ਚ ਕਰੋਥ વਿਤ੍ਥਤਞ੍ਚ। ਅਪ੍ਪਿਤਞ੍ਚ ਸੁવੀਤਞ੍ਚ ਸੁਪ੍ਪવਾਯਿਤਞ੍ਚ ਸੁવਿਲੇਖਿਤਞ੍ਚ ਸੁવਿਤਚ੍ਛਿਤਞ੍ਚ ਕਰੋਥ। ਅਪ੍ਪੇવ ਨਾਮ ਮਯਮ੍ਪਿ ਆਯਸ੍ਮਨ੍ਤਾਨਂ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯਾਮਾ’ਤਿ। ਏવਞ੍ਚ ਸੋ ਭਿਕ੍ਖੁ વਤ੍વਾ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯ ਅਨ੍ਤਮਸੋ ਪਿਣ੍ਡਪਾਤਮਤ੍ਤਮ੍ਪਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ।
642.‘‘Bhikkhuṃ paneva uddissa aññātako gahapati vā gahapatānī vā tantavāyehi cīvaraṃ vāyāpeyya, tatra ce so bhikkhu pubbe appavārito tantavāye upasaṅkamitvā cīvare vikappaṃ āpajjeyya – ‘idaṃ kho, āvuso, cīvaraṃ maṃ uddissa viyyati. Āyatañca karotha vitthatañca. Appitañca suvītañca suppavāyitañca suvilekhitañca suvitacchitañca karotha. Appeva nāma mayampi āyasmantānaṃ kiñcimattaṃ anupadajjeyyāmā’ti. Evañca so bhikkhu vatvā kiñcimattaṃ anupadajjeyya antamaso piṇḍapātamattampi, nissaggiyaṃ pācittiya’’nti.
੬੪੩. ਭਿਕ੍ਖੁਂ ਪਨੇવ ਉਦ੍ਦਿਸ੍ਸਾਤਿ ਭਿਕ੍ਖੁਸ੍ਸਤ੍ਥਾਯ ਭਿਕ੍ਖੁਂ ਆਰਮ੍ਮਣਂ ਕਰਿਤ੍વਾ ਭਿਕ੍ਖੁਂ ਅਚ੍ਛਾਦੇਤੁਕਾਮੋ।
643.Bhikkhuṃ paneva uddissāti bhikkhussatthāya bhikkhuṃ ārammaṇaṃ karitvā bhikkhuṃ acchādetukāmo.
ਅਞ੍ਞਾਤਕੋ ਨਾਮ ਮਾਤਿਤੋ વਾ ਪਿਤਿਤੋ વਾ ਯਾવ ਸਤ੍ਤਮਾ ਪਿਤਾਮਹਯੁਗਾ ਅਸਮ੍ਬਦ੍ਧੋ।
Aññātako nāma mātito vā pitito vā yāva sattamā pitāmahayugā asambaddho.
ਗਹਪਤਿ ਨਾਮ ਯੋ ਕੋਚਿ ਅਗਾਰਂ ਅਜ੍ਝਾવਸਤਿ।
Gahapati nāma yo koci agāraṃ ajjhāvasati.
ਗਹਪਤਾਨੀ ਨਾਮ ਯਾ ਕਾਚਿ ਅਗਾਰਂ ਅਜ੍ਝਾવਸਤਿ।
Gahapatānī nāma yā kāci agāraṃ ajjhāvasati.
ਤਨ੍ਤવਾਯੇਹੀਤਿ ਪੇਸਕਾਰੇਹਿ।
Tantavāyehīti pesakārehi.
ਚੀવਰਂ ਨਾਮ ਛਨ੍ਨਂ ਚੀવਰਾਨਂ ਅਞ੍ਞਤਰਂ ਚੀવਰਂ વਿਕਪ੍ਪਨੁਪਗਂ ਪਚ੍ਛਿਮਂ।
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
વਾਯਾਪੇਯ੍ਯਾਤਿ વਿਨਾਪੇਤਿ।
Vāyāpeyyāti vināpeti.
ਤਤ੍ਰ ਚੇ ਸੋ ਭਿਕ੍ਖੂਤਿ ਯਂ ਭਿਕ੍ਖੁਂ ਉਦ੍ਦਿਸ੍ਸ ਚੀવਰਂ વਿਯ੍ਯਤਿ ਸੋ ਭਿਕ੍ਖੁ।
Tatra ce so bhikkhūti yaṃ bhikkhuṃ uddissa cīvaraṃ viyyati so bhikkhu.
ਪੁਬ੍ਬੇ ਅਪ੍ਪવਾਰਿਤੋਤਿ ਪੁਬ੍ਬੇ ਅવੁਤ੍ਤੋ ਹੋਤਿ – ‘‘ਕੀਦਿਸੇਨ ਤੇ, ਭਨ੍ਤੇ, ਚੀવਰੇਨ ਅਤ੍ਥੋ, ਕੀਦਿਸਂ ਤੇ ਚੀવਰਂ વਾਯਾਪੇਮੀ’’ਤਿ?
Pubbe appavāritoti pubbe avutto hoti – ‘‘kīdisena te, bhante, cīvarena attho, kīdisaṃ te cīvaraṃ vāyāpemī’’ti?
ਤਨ੍ਤવਾਯੇ ਉਪਸਙ੍ਕਮਿਤ੍વਾਤਿ ਘਰਂ ਗਨ੍ਤ੍વਾ ਯਤ੍ਥ ਕਤ੍ਥਚਿ ਉਪਸਙ੍ਕਮਿਤ੍વਾ।
Tantavāye upasaṅkamitvāti gharaṃ gantvā yattha katthaci upasaṅkamitvā.
ਚੀવਰੇ વਿਕਪ੍ਪਂ ਆਪਜ੍ਜੇਯ੍ਯਾਤਿ – ‘‘ਇਦਂ ਖੋ, ਆવੁਸੋ, ਚੀવਰਂ ਮਂ ਉਦ੍ਦਿਸ੍ਸ વਿਯ੍ਯਤਿ, ਆਯਤਞ੍ਚ ਕਰੋਥ વਿਤ੍ਥਤਞ੍ਚ। ਅਪ੍ਪਿਤਞ੍ਚ ਸੁવੀਤਞ੍ਚ ਸੁਪ੍ਪવਾਯਿਤਞ੍ਚ ਸੁવਿਲੇਖਿਤਞ੍ਚ ਸੁવਿਤਚ੍ਛਿਤਞ੍ਚ ਕਰੋਥ। ਅਪ੍ਪੇવ ਨਾਮ ਮਯਮ੍ਪਿ ਆਯਸ੍ਮਨ੍ਤਾਨਂ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯਾਮਾ’’ਤਿ।
Cīvare vikappaṃ āpajjeyyāti – ‘‘idaṃ kho, āvuso, cīvaraṃ maṃ uddissa viyyati, āyatañca karotha vitthatañca. Appitañca suvītañca suppavāyitañca suvilekhitañca suvitacchitañca karotha. Appeva nāma mayampi āyasmantānaṃ kiñcimattaṃ anupadajjeyyāmā’’ti.
ਏવਞ੍ਚ ਸੋ ਭਿਕ੍ਖੁ વਤ੍વਾ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯ ਅਨ੍ਤਮਸੋ ਪਿਣ੍ਡਪਾਤਮਤ੍ਤਮ੍ਪੀਤਿ। ਪਿਣ੍ਡਪਾਤੋ ਨਾਮ ਯਾਗੁਪਿ ਭਤ੍ਤਮ੍ਪਿ ਖਾਦਨੀਯਮ੍ਪਿ ਚੁਣ੍ਣਪਿਣ੍ਡੋਪਿ ਦਨ੍ਤਕਟ੍ਠਮ੍ਪਿ ਦਸਿਕਸੁਤ੍ਤਮ੍ਪਿ, ਅਨ੍ਤਮਸੋ ਧਮ੍ਮਮ੍ਪਿ ਭਣਤਿ।
Evañca so bhikkhu vatvā kiñcimattaṃ anupadajjeyya antamaso piṇḍapātamattampīti. Piṇḍapāto nāma yāgupi bhattampi khādanīyampi cuṇṇapiṇḍopi dantakaṭṭhampi dasikasuttampi, antamaso dhammampi bhaṇati.
ਤਸ੍ਸ વਚਨੇਨ ਆਯਤਂ વਾ વਿਤ੍ਥਤਂ વਾ ਅਪ੍ਪਿਤਂ વਾ ਕਰੋਤਿ, ਪਯੋਗੇ ਦੁਕ੍ਕਟਂ। ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ। ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ વਾ ਗਣਸ੍ਸ વਾ ਪੁਗ੍ਗਲਸ੍ਸ વਾ। ਏવਞ੍ਚ ਪਨ, ਭਿਕ੍ਖવੇ, ਨਿਸ੍ਸਜ੍ਜਿਤਬ੍ਬਂ…ਪੇ॰… ਇਦਂ ਮੇ, ਭਨ੍ਤੇ, ਚੀવਰਂ ਪੁਬ੍ਬੇ ਅਪ੍ਪવਾਰਿਤੋ ਅਞ੍ਞਾਤਕਸ੍ਸ ਗਹਪਤਿਕਸ੍ਸ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਨ੍ਨਂ ਨਿਸ੍ਸਗ੍ਗਿਯਂ। ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ॰… ਦਦੇਯ੍ਯਾਤਿ…ਪੇ॰… ਦਦੇਯ੍ਯੁਨ੍ਤਿ…ਪੇ॰… ਆਯਸ੍ਮਤੋ ਦਮ੍ਮੀਤਿ।
Tassa vacanena āyataṃ vā vitthataṃ vā appitaṃ vā karoti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ pubbe appavārito aññātakassa gahapatikassa tantavāye upasaṅkamitvā cīvare vikappaṃ āpannaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
੬੪੪. ਅਞ੍ਞਾਤਕੇ ਅਞ੍ਞਾਤਕਸਞ੍ਞੀ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕਸ੍ਸ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਞ੍ਞਾਤਕੇ વੇਮਤਿਕੋ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕਸ੍ਸ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਞ੍ਞਾਤਕੇ ਞਾਤਕਸਞ੍ਞੀ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕਸ੍ਸ ਤਨ੍ਤવਾਯੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
644. Aññātake aññātakasaññī pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake vematiko pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake ñātakasaññī pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ.
ਞਾਤਕੇ ਅਞਾਤਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ। ਞਾਤਕੇ વੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ। ਞਾਤਕੇ ਞਾਤਕਸਞ੍ਞੀ, ਅਨਾਪਤ੍ਤਿ।
Ñātake añātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
੬੪੫. ਅਨਾਪਤ੍ਤਿ – ਞਾਤਕਾਨਂ, ਪવਾਰਿਤਾਨਂ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਮਹਗ੍ਘਂ વਾਯਾਪੇਤੁਕਾਮਸ੍ਸ ਅਪ੍ਪਗ੍ਘਂ વਾਯਾਪੇਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ।
645. Anāpatti – ñātakānaṃ, pavāritānaṃ, aññassatthāya, attano dhanena, mahagghaṃ vāyāpetukāmassa appagghaṃ vāyāpeti, ummattakassa, ādikammikassāti.
ਮਹਾਪੇਸਕਾਰਸਿਕ੍ਖਾਪਦਂ ਨਿਟ੍ਠਿਤਂ ਸਤ੍ਤਮਂ।
Mahāpesakārasikkhāpadaṃ niṭṭhitaṃ sattamaṃ.
Footnotes:
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā / ੭. ਮਹਾਪੇਸਕਾਰਸਿਕ੍ਖਾਪਦવਣ੍ਣਨਾ • 7. Mahāpesakārasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੭. ਮਹਾਪੇਸਕਾਰਸਿਕ੍ਖਾਪਦવਣ੍ਣਨਾ • 7. Mahāpesakārasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੭. ਮਹਾਪੇਸਕਾਰਸਿਕ੍ਖਾਪਦવਣ੍ਣਨਾ • 7. Mahāpesakārasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੭. ਮਹਾਪੇਸਕਾਰਸਿਕ੍ਖਾਪਦવਣ੍ਣਨਾ • 7. Mahāpesakārasikkhāpadavaṇṇanā
