| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૩. મહાપુરિસલક્ખણપઞ્હો
3. Mahāpurisalakkhaṇapañho
૩. રાજા આહ ‘‘ભન્તે નાગસેન, બુદ્ધો દ્વત્તિંસમહાપુરિસલક્ખણેહિ સમન્નાગતો અસીતિયા ચ અનુબ્યઞ્જનેહિ પરિરઞ્જિતો સુવણ્ણવણ્ણો કઞ્ચનસન્નિભત્તચો બ્યામપ્પભો’’તિ? ‘‘આમ, મહારાજ, ભગવા દ્વત્તિંસમહાપુરિસલક્ખણેહિ સમન્નાગતો અસીતિયા ચ અનુબ્યઞ્જનેહિ પરિરઞ્જિતો સુવણ્ણવણ્ણો કઞ્ચનસન્નિભત્તચો બ્યામપ્પભો’’તિ.
3. Rājā āha ‘‘bhante nāgasena, buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti? ‘‘Āma, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti.
‘‘કિં પનસ્સ, ભન્તે, માતાપિતરોપિ દ્વત્તિંસમહાપુરિસલક્ખણેહિ સમન્નાગતા અસીતિયા ચ અનુબ્યઞ્જનેહિ પરિરઞ્જિતા સુવણ્ણવણ્ણા કઞ્ચનસન્નિભત્તચા બ્યામપ્પભા’’તિ? ‘‘નો ચસ્સ, મહારાજ, માતાપિતરો દ્વત્તિંસમહાપુરિસલક્ખણેહિ સમન્નાગતા અસીતિયા ચ અનુબ્યઞ્જનેહિ પરિરઞ્જિતા સુવણ્ણવણ્ણા કઞ્ચનસન્નિભત્તચા બ્યામપ્પભા’’તિ.
‘‘Kiṃ panassa, bhante, mātāpitaropi dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti? ‘‘No cassa, mahārāja, mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘એવં સન્તે ખો, ભન્તે નાગસેન, ન ઉપ્પજ્જતિ બુદ્ધો દ્વત્તિંસમહાપુરિસલક્ખણેહિ સમન્નાગતો અસીતિયા ચ અનુબ્યઞ્જનેહિ પરિરઞ્જિતો સુવણ્ણવણ્ણો કઞ્ચનસન્નિભત્તચો બ્યામપ્પભોતિ, અપિ ચ માતુસદિસો વા પુત્તો હોતિ માતુપક્ખો વા, પિતુસદિસો વા પુત્તો હોતિ પિતુપક્ખો વા’’તિ. થેરો આહ ‘‘અત્થિ પન, મહારાજ, કિઞ્ચિ પદુમં સતપત્ત’’ન્તિ? ‘‘આમ, ભન્તે, અત્થી’’તિ. ‘‘તસ્સ પન કુહિં સમ્ભવો’’તિ? ‘‘કદ્દમે જાયતિ ઉદકે આસીયતી’’તિ . ‘‘કિંનુ ખો, મહારાજ, પદુમં કદ્દમેન સદિસં વણ્ણેન વા ગન્ધેન વા રસેન વા’’તિ? ‘‘ન હિ, ભન્તે’’તિ. ‘‘અથ ઉદકેન વા ગન્ધેન વા રસેન વા’’તિ? ‘‘ન હિ, ભન્તે’’તિ. ‘‘એવમેવ ખો, મહારાજ, ભગવા દ્વત્તિંસમહાપુરિસલક્ખણેહિ સમન્નાગતો અસીતિયા ચ અનુબ્યઞ્જનેહિ પરિરઞ્જિતો સુવણ્ણવણ્ણો કઞ્ચનસન્નિભત્તચો બ્યામપ્પભો, નો ચસ્સ માતાપિતરો દ્વત્તિંસમહાપુરિસલક્ખણેહિ સમન્નાગતા અસીતિયા ચ અનુબ્યઞ્જનેહિ પરિરઞ્જિતા સુવણ્ણવણ્ણા કઞ્ચનસન્નિભત્તચા બ્યામપ્પભા’’તિ.
‘‘Evaṃ sante kho, bhante nāgasena, na uppajjati buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabhoti, api ca mātusadiso vā putto hoti mātupakkho vā, pitusadiso vā putto hoti pitupakkho vā’’ti. Thero āha ‘‘atthi pana, mahārāja, kiñci padumaṃ satapatta’’nti? ‘‘Āma, bhante, atthī’’ti. ‘‘Tassa pana kuhiṃ sambhavo’’ti? ‘‘Kaddame jāyati udake āsīyatī’’ti . ‘‘Kiṃnu kho, mahārāja, padumaṃ kaddamena sadisaṃ vaṇṇena vā gandhena vā rasena vā’’ti? ‘‘Na hi, bhante’’ti. ‘‘Atha udakena vā gandhena vā rasena vā’’ti? ‘‘Na hi, bhante’’ti. ‘‘Evameva kho, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho, no cassa mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
મહાપુરિસલક્ખણપઞ્હો તતિયો.
Mahāpurisalakkhaṇapañho tatiyo.
