Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya

    ૧૦. મહાસાલપુત્તસુત્તં

    10. Mahāsālaputtasuttaṃ

    ૪૦. ‘‘હિમવન્તં, ભિક્ખવે, પબ્બતરાજં નિસ્સાય મહાસાલા પઞ્ચહિ વડ્ઢીહિ વડ્ઢન્તિ. કતમાહિ પઞ્ચહિ? સાખાપત્તપલાસેન વડ્ઢન્તિ; તચેન વડ્ઢન્તિ; પપટિકાય વડ્ઢન્તિ; ફેગ્ગુના વડ્ઢન્તિ; સારેન વડ્ઢન્તિ. હિમવન્તં, ભિક્ખવે, પબ્બતરાજં નિસ્સાય મહાસાલા ઇમાહિ પઞ્ચહિ વડ્ઢીહિ વડ્ઢન્તિ. એવમેવં ખો, ભિક્ખવે, સદ્ધં કુલપુત્તં નિસ્સાય અન્તોજનો પઞ્ચહિ વડ્ઢીહિ વડ્ઢતિ. કતમાહિ પઞ્ચહિ? સદ્ધાય વડ્ઢતિ; સીલેન વડ્ઢતિ; સુતેન વડ્ઢતિ; ચાગેન વડ્ઢતિ; પઞ્ઞાય વડ્ઢતિ. સદ્ધં, ભિક્ખવે, કુલપુત્તં નિસ્સાય અન્તોજનો ઇમાહિ પઞ્ચહિ વડ્ઢીહિ વડ્ઢતી’’તિ.

    40. ‘‘Himavantaṃ, bhikkhave, pabbatarājaṃ nissāya mahāsālā pañcahi vaḍḍhīhi vaḍḍhanti. Katamāhi pañcahi? Sākhāpattapalāsena vaḍḍhanti; tacena vaḍḍhanti; papaṭikāya vaḍḍhanti; pheggunā vaḍḍhanti; sārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi pañcahi vaḍḍhīhi vaḍḍhanti. Evamevaṃ kho, bhikkhave, saddhaṃ kulaputtaṃ nissāya antojano pañcahi vaḍḍhīhi vaḍḍhati. Katamāhi pañcahi? Saddhāya vaḍḍhati; sīlena vaḍḍhati; sutena vaḍḍhati; cāgena vaḍḍhati; paññāya vaḍḍhati. Saddhaṃ, bhikkhave, kulaputtaṃ nissāya antojano imāhi pañcahi vaḍḍhīhi vaḍḍhatī’’ti.

    ‘‘યથા હિ પબ્બતો સેલો, અરઞ્ઞસ્મિં બ્રહાવને;

    ‘‘Yathā hi pabbato selo, araññasmiṃ brahāvane;

    તં રુક્ખા ઉપનિસ્સાય, વડ્ઢન્તે તે વનપ્પતી.

    Taṃ rukkhā upanissāya, vaḍḍhante te vanappatī.

    ‘‘તથેવ સીલસમ્પન્નં, સદ્ધં કુલપુત્તં ઇમં 1;

    ‘‘Tatheva sīlasampannaṃ, saddhaṃ kulaputtaṃ imaṃ 2;

    ઉપનિસ્સાય વડ્ઢન્તિ, પુત્તદારા ચ બન્ધવા;

    Upanissāya vaḍḍhanti, puttadārā ca bandhavā;

    અમચ્ચા ઞાતિસઙ્ઘા ચ, યે ચસ્સ અનુજીવિનો.

    Amaccā ñātisaṅghā ca, ye cassa anujīvino.

    ‘‘ત્યસ્સ સીલવતો સીલં, ચાગં સુચરિતાનિ ચ;

    ‘‘Tyassa sīlavato sīlaṃ, cāgaṃ sucaritāni ca;

    પસ્સમાનાનુકુબ્બન્તિ, યે ભવન્તિ વિચક્ખણા.

    Passamānānukubbanti, ye bhavanti vicakkhaṇā.

    ‘‘ઇમં ધમ્મં ચરિત્વાન, મગ્ગં 3 સુગતિગામિનં;

    ‘‘Imaṃ dhammaṃ caritvāna, maggaṃ 4 sugatigāminaṃ;

    નન્દિનો દેવલોકસ્મિં, મોદન્તિ કામકામિનો’’તિ. દસમં;

    Nandino devalokasmiṃ, modanti kāmakāmino’’ti. dasamaṃ;

    સુમનવગ્ગો ચતુત્થો.

    Sumanavaggo catuttho.

    તસ્સુદ્દાનં –

    Tassuddānaṃ –

    સુમના ચુન્દી ઉગ્ગહો, સીહો દાનાનિસંસકો;

    Sumanā cundī uggaho, sīho dānānisaṃsako;

    કાલભોજનસદ્ધા ચ, પુત્તસાલેહિ તે દસાતિ.

    Kālabhojanasaddhā ca, puttasālehi te dasāti.




    Next: ૫. મુણ્ડરાજવગ્ગો • 5. Muṇḍarājavaggo




    Footnotes:
    1. કુલપતિં ઇધ (સી॰), કુલપુત્તં ઇધ (સ્યા॰)
    2. kulapatiṃ idha (sī.), kulaputtaṃ idha (syā.)
    3. સગ્ગં (સ્યા॰ ક॰)
    4. saggaṃ (syā. ka.)



    Related texts:



    અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૧૦. મહાસાલપુત્તસુત્તવણ્ણના • 10. Mahāsālaputtasuttavaṇṇanā

    ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૯-૧૦. પુત્તસુત્તાદિવણ્ણના • 9-10. Puttasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact