Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya

    ౪. మహాసాలసుత్తం

    4. Mahāsālasuttaṃ

    ౨౦౦. సావత్థినిదానం . అథ ఖో అఞ్ఞతరో బ్రాహ్మణమహాసాలో లూఖో లూఖపావురణో 1 యేన భగవా తేనుపసఙ్కమి; ఉపసఙ్కమిత్వా భగవతా సద్ధిం సమ్మోది. సమ్మోదనీయం కథం సారణీయం వీతిసారేత్వా ఏకమన్తం నిసీది. ఏకమన్తం నిసిన్నం ఖో తం బ్రాహ్మణమహాసాలం భగవా ఏతదవోచ – ‘‘కిన్ను త్వం, బ్రాహ్మణ, లూఖో లూఖపావురణో’’తి? ‘‘ఇధ మే, భో గోతమ, చత్తారో పుత్తా. తే మం దారేహి సంపుచ్ఛ ఘరా నిక్ఖామేన్తీ’’తి. ‘‘తేన హి త్వం, బ్రాహ్మణ, ఇమా గాథాయో పరియాపుణిత్వా సభాయం మహాజనకాయే సన్నిపతితే పుత్తేసు చ సన్నిసిన్నేసు భాసస్సు –

    200. Sāvatthinidānaṃ . Atha kho aññataro brāhmaṇamahāsālo lūkho lūkhapāvuraṇo 2 yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho taṃ brāhmaṇamahāsālaṃ bhagavā etadavoca – ‘‘kinnu tvaṃ, brāhmaṇa, lūkho lūkhapāvuraṇo’’ti? ‘‘Idha me, bho gotama, cattāro puttā. Te maṃ dārehi saṃpuccha gharā nikkhāmentī’’ti. ‘‘Tena hi tvaṃ, brāhmaṇa, imā gāthāyo pariyāpuṇitvā sabhāyaṃ mahājanakāye sannipatite puttesu ca sannisinnesu bhāsassu –

    ‘‘యేహి జాతేహి నన్దిస్సం, యేసఞ్చ భవమిచ్ఛిసం;

    ‘‘Yehi jātehi nandissaṃ, yesañca bhavamicchisaṃ;

    తే మం దారేహి సంపుచ్ఛ, సావ వారేన్తి సూకరం.

    Te maṃ dārehi saṃpuccha, sāva vārenti sūkaraṃ.

    ‘‘అసన్తా కిర మం జమ్మా, తాత తాతాతి భాసరే;

    ‘‘Asantā kira maṃ jammā, tāta tātāti bhāsare;

    రక్ఖసా పుత్తరూపేన, తే జహన్తి వయోగతం.

    Rakkhasā puttarūpena, te jahanti vayogataṃ.

    ‘‘అస్సోవ జిణ్ణో నిబ్భోగో, ఖాదనా అపనీయతి;

    ‘‘Assova jiṇṇo nibbhogo, khādanā apanīyati;

    బాలకానం పితా థేరో, పరాగారేసు భిక్ఖతి.

    Bālakānaṃ pitā thero, parāgāresu bhikkhati.

    ‘‘దణ్డోవ కిర మే సేయ్యో, యఞ్చే పుత్తా అనస్సవా;

    ‘‘Daṇḍova kira me seyyo, yañce puttā anassavā;

    చణ్డమ్పి గోణం వారేతి, అథో చణ్డమ్పి కుక్కురం.

    Caṇḍampi goṇaṃ vāreti, atho caṇḍampi kukkuraṃ.

    ‘‘అన్ధకారే పురే హోతి, గమ్భీరే గాధమేధతి;

    ‘‘Andhakāre pure hoti, gambhīre gādhamedhati;

    దణ్డస్స ఆనుభావేన, ఖలిత్వా పతితిట్ఠతీ’’తి.

    Daṇḍassa ānubhāvena, khalitvā patitiṭṭhatī’’ti.

    అథ ఖో సో బ్రాహ్మణమహాసాలో భగవతో సన్తికే ఇమా గాథాయో పరియాపుణిత్వా సభాయం మహాజనకాయే సన్నిపతితే పుత్తేసు చ సన్నిసిన్నేసు అభాసి –

    Atha kho so brāhmaṇamahāsālo bhagavato santike imā gāthāyo pariyāpuṇitvā sabhāyaṃ mahājanakāye sannipatite puttesu ca sannisinnesu abhāsi –

    ‘‘యేహి జాతేహి నన్దిస్సం, యేసఞ్చ భవమిచ్ఛిసం;

    ‘‘Yehi jātehi nandissaṃ, yesañca bhavamicchisaṃ;

    తే మం దారేహి సంపుచ్ఛ, సావ వారేన్తి సూకరం.

    Te maṃ dārehi saṃpuccha, sāva vārenti sūkaraṃ.

    ‘‘అసన్తా కిర మం జమ్మా, తాత తాతాతి భాసరే;

    ‘‘Asantā kira maṃ jammā, tāta tātāti bhāsare;

    రక్ఖసా పుత్తరూపేన, తే జహన్తి వయోగతం.

    Rakkhasā puttarūpena, te jahanti vayogataṃ.

    ‘‘అస్సోవ జిణ్ణో నిబ్భోగో, ఖాదనా అపనీయతి;

    ‘‘Assova jiṇṇo nibbhogo, khādanā apanīyati;

    బాలకానం పితా థేరో, పరాగారేసు భిక్ఖతి.

    Bālakānaṃ pitā thero, parāgāresu bhikkhati.

    ‘‘దణ్డోవ కిర మే సేయ్యో, యఞ్చే పుత్తా అనస్సవా;

    ‘‘Daṇḍova kira me seyyo, yañce puttā anassavā;

    చణ్డమ్పి గోణం వారేతి, అథో చణ్డమ్పి కుక్కురం.

    Caṇḍampi goṇaṃ vāreti, atho caṇḍampi kukkuraṃ.

    ‘‘అన్ధకారే పురే హోతి, గమ్భీరే గాధమేధతి;

    ‘‘Andhakāre pure hoti, gambhīre gādhamedhati;

    దణ్డస్స ఆనుభావేన, ఖలిత్వా పతితిట్ఠతీ’’తి.

    Daṇḍassa ānubhāvena, khalitvā patitiṭṭhatī’’ti.

    అథ ఖో నం బ్రాహ్మణమహాసాలం పుత్తా ఘరం నేత్వా న్హాపేత్వా పచ్చేకం దుస్సయుగేన అచ్ఛాదేసుం. అథ ఖో సో బ్రాహ్మణమహాసాలో ఏకం దుస్సయుగం ఆదాయ యేన భగవా తేనుపసఙ్కమి; ఉపసఙ్కమిత్వా భగవతా సద్ధిం సమ్మోది. సమ్మోదనీయం కథం సారణీయం వీతిసారేత్వా ఏకమన్తం నిసీది. ఏకమన్తం నిసిన్నో ఖో బ్రాహ్మణమహాసాలో భగవన్తం ఏతదవోచ – ‘‘మయం, భో గోతమ, బ్రాహ్మణా నామ ఆచరియస్స ఆచరియధనం పరియేసామ. పటిగ్గణ్హతు మే భవం గోతమో ఆచరియధన’’న్తి. పటిగ్గహేసి భగవా అనుకమ్పం ఉపాదాయ. అథ ఖో సో బ్రాహ్మణమహాసాలో భగవన్తం ఏతదవోచ – ‘‘అభిక్కన్తం, భో గోతమ…పే॰… ఉపాసకం మం భవం గోతమో ధారేతు అజ్జతగ్గే పాణుపేతం సరణం గత’’న్తి.

    Atha kho naṃ brāhmaṇamahāsālaṃ puttā gharaṃ netvā nhāpetvā paccekaṃ dussayugena acchādesuṃ. Atha kho so brāhmaṇamahāsālo ekaṃ dussayugaṃ ādāya yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho brāhmaṇamahāsālo bhagavantaṃ etadavoca – ‘‘mayaṃ, bho gotama, brāhmaṇā nāma ācariyassa ācariyadhanaṃ pariyesāma. Paṭiggaṇhatu me bhavaṃ gotamo ācariyadhana’’nti. Paṭiggahesi bhagavā anukampaṃ upādāya. Atha kho so brāhmaṇamahāsālo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.







    Footnotes:
    1. లూఖపాపురణో (సీ॰ స్యా॰ కం॰ పీ॰)
    2. lūkhapāpuraṇo (sī. syā. kaṃ. pī.)



    Related texts:



    అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౪. మహాసాలసుత్తవణ్ణనా • 4. Mahāsālasuttavaṇṇanā

    టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౪. మహాసాలసుత్తవణ్ణనా • 4. Mahāsālasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact