Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ • Dīghanikāya

    ༩. མཧཱསཏིཔཊྛཱནསུཏྟཾ

    9. Mahāsatipaṭṭhānasuttaṃ

    ༣༧༢. ཨེཝཾ མེ སུཏཾ – ཨེཀཾ སམཡཾ བྷགཝཱ ཀུརཱུསུ ཝིཧརཏི ཀམྨཱསདྷམྨཾ ནཱམ ཀུརཱུནཾ ནིགམོ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདྡནྟེ’’ཏི 1 ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –

    372. Evaṃ me sutaṃ – ekaṃ samayaṃ bhagavā kurūsu viharati kammāsadhammaṃ nāma kurūnaṃ nigamo. Tatra kho bhagavā bhikkhū āmantesi – ‘‘bhikkhavo’’ti. ‘‘Bhaddante’’ti 2 te bhikkhū bhagavato paccassosuṃ. Bhagavā etadavoca –

    ཨུདྡེསོ

    Uddeso

    ༣༧༣. ‘‘ཨེཀཱཡནོ ཨཡཾ, བྷིཀྑཝེ, མགྒོ སཏྟཱནཾ ཝིསུདྡྷིཡཱ, སོཀཔརིདེཝཱནཾ སམཏིཀྐམཱཡ དུཀྑདོམནསྶཱནཾ ཨཏྠངྒམཱཡ ཉཱཡསྶ ཨདྷིགམཱཡ ནིབྦཱནསྶ སཙྪིཀིརིཡཱཡ, ཡདིདཾ ཙཏྟཱརོ སཏིཔཊྛཱནཱ།

    373. ‘‘Ekāyano ayaṃ, bhikkhave, maggo sattānaṃ visuddhiyā, sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya, yadidaṃ cattāro satipaṭṭhānā.

    ‘‘ཀཏམེ ཙཏྟཱརོ? ཨིདྷ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, ཝེདནཱསུ ཝེདནཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ, ཝིནེཡྻ ལོཀེ ཨབྷིཛ྄ཛྷཱདོམནསྶཾ, ཙིཏྟེ ཙིཏྟཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ།

    ‘‘Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ, vedanāsu vedanānupassī viharati ātāpī sampajāno satimā, vineyya loke abhijjhādomanassaṃ, citte cittānupassī viharati ātāpī sampajāno satimā vineyya loke abhijjhādomanassaṃ, dhammesu dhammānupassī viharati ātāpī sampajāno satimā vineyya loke abhijjhādomanassaṃ.

    ཨུདྡེསོ ནིཊྛིཏོ།

    Uddeso niṭṭhito.

    ཀཱཡཱནུཔསྶནཱ ཨཱནཱཔཱནཔབྦཾ

    Kāyānupassanā ānāpānapabbaṃ

    ༣༧༤. ‘‘ཀཐཉྩ པན, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི? ཨིདྷ, བྷིཀྑཝེ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ནིསཱིདཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ པརིམུཁཾ སཏིཾ ཨུཔཊྛཔེཏྭཱ། སོ སཏོཝ ཨསྶསཏི, སཏོཝ པསྶསཏི། དཱིགྷཾ ཝཱ ཨསྶསནྟོ ‘དཱིགྷཾ ཨསྶསཱམཱི’ཏི པཛཱནཱཏི, དཱིགྷཾ ཝཱ པསྶསནྟོ ‘དཱིགྷཾ པསྶསཱམཱི’ཏི པཛཱནཱཏི། རསྶཾ ཝཱ ཨསྶསནྟོ ‘རསྶཾ ཨསྶསཱམཱི’ཏི པཛཱནཱཏི, རསྶཾ ཝཱ པསྶསནྟོ ‘རསྶཾ པསྶསཱམཱི’ཏི པཛཱནཱཏི། ‘སབྦཀཱཡཔཊིསཾཝེདཱི ཨསྶསིསྶཱམཱི’ཏི སིཀྑཏི , ‘སབྦཀཱཡཔཊིསཾཝེདཱི པསྶསིསྶཱམཱི’ཏི སིཀྑཏི། ‘པསྶམྦྷཡཾ ཀཱཡསངྑཱརཾ ཨསྶསིསྶཱམཱི’ཏི སིཀྑཏི, ‘པསྶམྦྷཡཾ ཀཱཡསངྑཱརཾ པསྶསིསྶཱམཱི’ཏི སིཀྑཏི།

    374. ‘‘Kathañca pana, bhikkhave, bhikkhu kāye kāyānupassī viharati? Idha, bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So satova assasati, satova passasati. Dīghaṃ vā assasanto ‘dīghaṃ assasāmī’ti pajānāti, dīghaṃ vā passasanto ‘dīghaṃ passasāmī’ti pajānāti. Rassaṃ vā assasanto ‘rassaṃ assasāmī’ti pajānāti, rassaṃ vā passasanto ‘rassaṃ passasāmī’ti pajānāti. ‘Sabbakāyapaṭisaṃvedī assasissāmī’ti sikkhati , ‘sabbakāyapaṭisaṃvedī passasissāmī’ti sikkhati. ‘Passambhayaṃ kāyasaṅkhāraṃ assasissāmī’ti sikkhati, ‘passambhayaṃ kāyasaṅkhāraṃ passasissāmī’ti sikkhati.

    ‘‘སེཡྻཐཱཔི, བྷིཀྑཝེ, དཀྑོ བྷམཀཱརོ ཝཱ བྷམཀཱརནྟེཝཱསཱི ཝཱ དཱིགྷཾ ཝཱ ཨཉྪནྟོ ‘དཱིགྷཾ ཨཉྪཱམཱི’ཏི པཛཱནཱཏི, རསྶཾ ཝཱ ཨཉྪནྟོ ‘རསྶཾ ཨཉྪཱམཱི’ཏི པཛཱནཱཏི ཨེཝམེཝ ཁོ, བྷིཀྑཝེ, བྷིཀྑུ དཱིགྷཾ ཝཱ ཨསྶསནྟོ ‘དཱིགྷཾ ཨསྶསཱམཱི’ཏི པཛཱནཱཏི, དཱིགྷཾ ཝཱ པསྶསནྟོ ‘དཱིགྷཾ པསྶསཱམཱི’ཏི པཛཱནཱཏི, རསྶཾ ཝཱ ཨསྶསནྟོ ‘རསྶཾ ཨསྶསཱམཱི’ཏི པཛཱནཱཏི, རསྶཾ ཝཱ པསྶསནྟོ ‘རསྶཾ པསྶསཱམཱི’ཏི པཛཱནཱཏི། ‘སབྦཀཱཡཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘སབྦཀཱཡཔཊིསཾཝེདཱི པསྶསིསྶཱམཱི’ཏི སིཀྑཏི, ‘པསྶམྦྷཡཾ ཀཱཡསངྑཱརཾ ཨསྶསིསྶཱམཱི’ཏི སིཀྑཏི, ‘པསྶམྦྷཡཾ ཀཱཡསངྑཱརཾ པསྶསིསྶཱམཱི’ཏི སིཀྑཏི། ཨིཏི ཨཛ྄ཛྷཏྟཾ ཝཱ ཀཱཡེ ཀཱཡཱནུཔསྶཱི ཝིཧརཏི, བཧིདྡྷཱ ཝཱ ཀཱཡེ ཀཱཡཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ ཀཱཡེ ཀཱཡཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི, ཝཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི, སམུདཡཝཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི། ‘ཨཏྠི ཀཱཡོ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ 3, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    ‘‘Seyyathāpi, bhikkhave, dakkho bhamakāro vā bhamakārantevāsī vā dīghaṃ vā añchanto ‘dīghaṃ añchāmī’ti pajānāti, rassaṃ vā añchanto ‘rassaṃ añchāmī’ti pajānāti evameva kho, bhikkhave, bhikkhu dīghaṃ vā assasanto ‘dīghaṃ assasāmī’ti pajānāti, dīghaṃ vā passasanto ‘dīghaṃ passasāmī’ti pajānāti, rassaṃ vā assasanto ‘rassaṃ assasāmī’ti pajānāti, rassaṃ vā passasanto ‘rassaṃ passasāmī’ti pajānāti. ‘Sabbakāyapaṭisaṃvedī assasissāmī’ti sikkhati, ‘sabbakāyapaṭisaṃvedī passasissāmī’ti sikkhati, ‘passambhayaṃ kāyasaṅkhāraṃ assasissāmī’ti sikkhati, ‘passambhayaṃ kāyasaṅkhāraṃ passasissāmī’ti sikkhati. Iti ajjhattaṃ vā kāye kāyānupassī viharati, bahiddhā vā kāye kāyānupassī viharati, ajjhattabahiddhā vā kāye kāyānupassī viharati. Samudayadhammānupassī vā kāyasmiṃ viharati, vayadhammānupassī vā kāyasmiṃ viharati, samudayavayadhammānupassī vā kāyasmiṃ viharati. ‘Atthi kāyo’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati. Evampi kho 4, bhikkhave, bhikkhu kāye kāyānupassī viharati.

    ཨཱནཱཔཱནཔབྦཾ ནིཊྛིཏཾ།

    Ānāpānapabbaṃ niṭṭhitaṃ.

    ཀཱཡཱནུཔསྶནཱ ཨིརིཡཱཔཐཔབྦཾ

    Kāyānupassanā iriyāpathapabbaṃ

    ༣༧༥. ‘‘པུན ཙཔརཾ, བྷིཀྑཝེ, བྷིཀྑུ གཙྪནྟོ ཝཱ ‘གཙྪཱམཱི’ཏི པཛཱནཱཏི, ཋིཏོ ཝཱ ‘ཋིཏོམྷཱི’ཏི པཛཱནཱཏི, ནིསིནྣོ ཝཱ ‘ནིསིནྣོམྷཱི’ཏི པཛཱནཱཏི, སཡཱནོ ཝཱ ‘སཡཱནོམྷཱི’ཏི པཛཱནཱཏི, ཡཐཱ ཡཐཱ ཝཱ པནསྶ ཀཱཡོ པཎིཧིཏོ ཧོཏི, ཏཐཱ ཏཐཱ ནཾ པཛཱནཱཏི། ཨིཏི ཨཛ྄ཛྷཏྟཾ ཝཱ ཀཱཡེ ཀཱཡཱནུཔསྶཱི ཝིཧརཏི, བཧིདྡྷཱ ཝཱ ཀཱཡེ ཀཱཡཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ ཀཱཡེ ཀཱཡཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི, ཝཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི, སམུདཡཝཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི། ‘ཨཏྠི ཀཱཡོ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    375. ‘‘Puna caparaṃ, bhikkhave, bhikkhu gacchanto vā ‘gacchāmī’ti pajānāti, ṭhito vā ‘ṭhitomhī’ti pajānāti, nisinno vā ‘nisinnomhī’ti pajānāti, sayāno vā ‘sayānomhī’ti pajānāti, yathā yathā vā panassa kāyo paṇihito hoti, tathā tathā naṃ pajānāti. Iti ajjhattaṃ vā kāye kāyānupassī viharati, bahiddhā vā kāye kāyānupassī viharati, ajjhattabahiddhā vā kāye kāyānupassī viharati. Samudayadhammānupassī vā kāyasmiṃ viharati, vayadhammānupassī vā kāyasmiṃ viharati, samudayavayadhammānupassī vā kāyasmiṃ viharati. ‘Atthi kāyo’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati. Evampi kho, bhikkhave, bhikkhu kāye kāyānupassī viharati.

    ཨིརིཡཱཔཐཔབྦཾ ནིཊྛིཏཾ།

    Iriyāpathapabbaṃ niṭṭhitaṃ.

    ཀཱཡཱནུཔསྶནཱ སམྤཛཱནཔབྦཾ

    Kāyānupassanā sampajānapabbaṃ

    ༣༧༦. ‘‘པུན ཙཔརཾ, བྷིཀྑཝེ, བྷིཀྑུ ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏི, ཨཱལོཀིཏེ ཝིལོཀིཏེ སམྤཛཱནཀཱརཱི ཧོཏི, སམིཉྫིཏེ པསཱརིཏེ སམྤཛཱནཀཱརཱི ཧོཏི, སངྒྷཱཊིཔཏྟཙཱིཝརདྷཱརཎེ སམྤཛཱནཀཱརཱི ཧོཏི, ཨསིཏེ པཱིཏེ ཁཱཡིཏེ སཱཡིཏེ སམྤཛཱནཀཱརཱི ཧོཏི, ཨུཙྩཱརཔསྶཱཝཀམྨེ སམྤཛཱནཀཱརཱི ཧོཏི, གཏེ ཋིཏེ ནིསིནྣེ སུཏྟེ ཛཱགརིཏེ བྷཱསིཏེ ཏུཎྷཱིབྷཱཝེ སམྤཛཱནཀཱརཱི ཧོཏི། ཨིཏི ཨཛ྄ཛྷཏྟཾ ཝཱ…པེ॰… ཨེཝམྤི ཁོ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    376. ‘‘Puna caparaṃ, bhikkhave, bhikkhu abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti. Iti ajjhattaṃ vā…pe… evampi kho, bhikkhave, bhikkhu kāye kāyānupassī viharati.

    སམྤཛཱནཔབྦཾ ནིཊྛིཏཾ།

    Sampajānapabbaṃ niṭṭhitaṃ.

    ཀཱཡཱནུཔསྶནཱ པཊིཀཱུལམནསིཀཱརཔབྦཾ

    Kāyānupassanā paṭikūlamanasikārapabbaṃ

    ༣༧༧. ‘‘པུན ཙཔརཾ, བྷིཀྑཝེ, བྷིཀྑུ ཨིམམེཝ ཀཱཡཾ ཨུདྡྷཾ པཱདཏལཱ ཨདྷོ ཀེསམཏྠཀཱ ཏཙཔརིཡནྟཾ པཱུརཾ ནཱནཔྤཀཱརསྶ ཨསུཙིནོ པཙྩཝེཀྑཏི – ‘ཨཏྠི ཨིམསྨིཾ ཀཱཡེ ཀེསཱ ལོམཱ ནཁཱ དནྟཱ ཏཙོ, མཾསཾ ནྷཱརུ ཨཊྛི ཨཊྛིམིཉྫཾ ཝཀྐཾ, ཧདཡཾ ཡཀནཾ ཀིལོམཀཾ པིཧཀཾ པཔྥཱསཾ, ཨནྟཾ ཨནྟགུཎཾ ཨུདརིཡཾ ཀརཱིསཾ 5, པིཏྟཾ སེམྷཾ པུབྦོ ལོཧིཏཾ སེདོ མེདོ, ཨསྶུ ཝསཱ ཁེལོ༹ སིངྒྷཱཎིཀཱ ལསིཀཱ མུཏྟ’ནྟི།

    377. ‘‘Puna caparaṃ, bhikkhave, bhikkhu imameva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati – ‘atthi imasmiṃ kāye kesā lomā nakhā dantā taco, maṃsaṃ nhāru aṭṭhi aṭṭhimiñjaṃ vakkaṃ, hadayaṃ yakanaṃ kilomakaṃ pihakaṃ papphāsaṃ, antaṃ antaguṇaṃ udariyaṃ karīsaṃ 6, pittaṃ semhaṃ pubbo lohitaṃ sedo medo, assu vasā kheḷo siṅghāṇikā lasikā mutta’nti.

    ‘‘སེཡྻཐཱཔི, བྷིཀྑཝེ, ཨུབྷཏོམུཁཱ པུཏོལི༹ 7 པཱུརཱ ནཱནཱཝིཧིཏསྶ དྷཉྙསྶ, སེཡྻཐིདཾ སཱལཱིནཾ ཝཱིཧཱིནཾ མུགྒཱནཾ མཱསཱནཾ ཏིལཱནཾ ཏཎྜུལཱནཾ། ཏམེནཾ ཙཀྑུམཱ པུརིསོ མུཉྩིཏྭཱ པཙྩཝེཀྑེཡྻ – ‘ཨིམེ སཱལཱི, ཨིམེ ཝཱིཧཱི ཨིམེ མུགྒཱ ཨིམེ མཱསཱ ཨིམེ ཏིལཱ ཨིམེ ཏཎྜུལཱ’ཏི། ཨེཝམེཝ ཁོ, བྷིཀྑཝེ, བྷིཀྑུ ཨིམམེཝ ཀཱཡཾ ཨུདྡྷཾ པཱདཏལཱ ཨདྷོ ཀེསམཏྠཀཱ ཏཙཔརིཡནྟཾ པཱུརཾ ནཱནཔྤཀཱརསྶ ཨསུཙིནོ པཙྩཝེཀྑཏི – ‘ཨཏྠི ཨིམསྨིཾ ཀཱཡེ ཀེསཱ ལོམཱ…པེ॰… མུཏྟ’ནྟི།

    ‘‘Seyyathāpi, bhikkhave, ubhatomukhā putoḷi 8 pūrā nānāvihitassa dhaññassa, seyyathidaṃ sālīnaṃ vīhīnaṃ muggānaṃ māsānaṃ tilānaṃ taṇḍulānaṃ. Tamenaṃ cakkhumā puriso muñcitvā paccavekkheyya – ‘ime sālī, ime vīhī ime muggā ime māsā ime tilā ime taṇḍulā’ti. Evameva kho, bhikkhave, bhikkhu imameva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati – ‘atthi imasmiṃ kāye kesā lomā…pe… mutta’nti.

    ཨིཏི ཨཛ྄ཛྷཏྟཾ ཝཱ…པེ॰… ཨེཝམྤི ཁོ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    Iti ajjhattaṃ vā…pe… evampi kho, bhikkhave, bhikkhu kāye kāyānupassī viharati.

    པཊིཀཱུལམནསིཀཱརཔབྦཾ ནིཊྛིཏཾ།

    Paṭikūlamanasikārapabbaṃ niṭṭhitaṃ.

    ཀཱཡཱནུཔསྶནཱ དྷཱཏུམནསིཀཱརཔབྦཾ

    Kāyānupassanā dhātumanasikārapabbaṃ

    ༣༧༨. ‘‘པུན ཙཔརཾ, བྷིཀྑཝེ, བྷིཀྑུ ཨིམམེཝ ཀཱཡཾ ཡཐཱཋིཏཾ ཡཐཱཔཎིཧིཏཾ དྷཱཏུསོ པཙྩཝེཀྑཏི – ‘ཨཏྠི ཨིམསྨིཾ ཀཱཡེ པཐཝཱིདྷཱཏུ ཨཱཔོདྷཱཏུ ཏེཛོདྷཱཏུ ཝཱཡོདྷཱཏཱུ’ཏི།

    378. ‘‘Puna caparaṃ, bhikkhave, bhikkhu imameva kāyaṃ yathāṭhitaṃ yathāpaṇihitaṃ dhātuso paccavekkhati – ‘atthi imasmiṃ kāye pathavīdhātu āpodhātu tejodhātu vāyodhātū’ti.

    ‘‘སེཡྻཐཱཔི , བྷིཀྑཝེ, དཀྑོ གོགྷཱཏཀོ ཝཱ གོགྷཱཏཀནྟེཝཱསཱི ཝཱ གཱཝིཾ ཝདྷིཏྭཱ ཙཏུམཧཱཔཐེ བིལསོ ཝིབྷཛིཏྭཱ ནིསིནྣོ ཨསྶ, ཨེཝམེཝ ཁོ, བྷིཀྑཝེ, བྷིཀྑུ ཨིམམེཝ ཀཱཡཾ ཡཐཱཋིཏཾ ཡཐཱཔཎིཧིཏཾ དྷཱཏུསོ པཙྩཝེཀྑཏི – ‘ཨཏྠི ཨིམསྨིཾ ཀཱཡེ པཐཝཱིདྷཱཏུ ཨཱཔོདྷཱཏུ ཏེཛོདྷཱཏུ ཝཱཡོདྷཱཏཱུ’ཏི།

    ‘‘Seyyathāpi , bhikkhave, dakkho goghātako vā goghātakantevāsī vā gāviṃ vadhitvā catumahāpathe bilaso vibhajitvā nisinno assa, evameva kho, bhikkhave, bhikkhu imameva kāyaṃ yathāṭhitaṃ yathāpaṇihitaṃ dhātuso paccavekkhati – ‘atthi imasmiṃ kāye pathavīdhātu āpodhātu tejodhātu vāyodhātū’ti.

    ‘‘ཨིཏི ཨཛ྄ཛྷཏྟཾ ཝཱ ཀཱཡེ ཀཱཡཱནུཔསྶཱི ཝིཧརཏི…པེ॰… ཨེཝམྤི ཁོ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    ‘‘Iti ajjhattaṃ vā kāye kāyānupassī viharati…pe… evampi kho, bhikkhave, bhikkhu kāye kāyānupassī viharati.

    དྷཱཏུམནསིཀཱརཔབྦཾ ནིཊྛིཏཾ།

    Dhātumanasikārapabbaṃ niṭṭhitaṃ.

    ཀཱཡཱནུཔསྶནཱ ནཝསིཝཐིཀཔབྦཾ

    Kāyānupassanā navasivathikapabbaṃ

    ༣༧༩. ‘‘པུན ཙཔརཾ, བྷིཀྑཝེ, བྷིཀྑུ སེཡྻཐཱཔི པསྶེཡྻ སརཱིརཾ སིཝཐིཀཱཡ ཚཌྜིཏཾ ཨེཀཱཧམཏཾ ཝཱ དྭཱིཧམཏཾ ཝཱ ཏཱིཧམཏཾ ཝཱ ཨུདྡྷུམཱཏཀཾ ཝིནཱིལཀཾ ཝིཔུབྦཀཛཱཏཾ། སོ ཨིམམེཝ ཀཱཡཾ ཨུཔསཾཧརཏི – ‘ཨཡམྤི ཁོ ཀཱཡོ ཨེཝཾདྷམྨོ ཨེཝཾབྷཱཝཱི ཨེཝཾཨནཏཱིཏོ’ཏི།

    379. ‘‘Puna caparaṃ, bhikkhave, bhikkhu seyyathāpi passeyya sarīraṃ sivathikāya chaḍḍitaṃ ekāhamataṃ vā dvīhamataṃ vā tīhamataṃ vā uddhumātakaṃ vinīlakaṃ vipubbakajātaṃ. So imameva kāyaṃ upasaṃharati – ‘ayampi kho kāyo evaṃdhammo evaṃbhāvī evaṃanatīto’ti.

    ‘‘ཨིཏི ཨཛ྄ཛྷཏྟཾ ཝཱ …པེ॰… ཨེཝམྤི ཁོ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    ‘‘Iti ajjhattaṃ vā …pe… evampi kho, bhikkhave, bhikkhu kāye kāyānupassī viharati.

    ‘‘པུན ཙཔརཾ, བྷིཀྑཝེ, བྷིཀྑུ སེཡྻཐཱཔི པསྶེཡྻ སརཱིརཾ སིཝཐིཀཱཡ ཚཌྜིཏཾ ཀཱཀེཧི ཝཱ ཁཛྫམཱནཾ ཀུལལེཧི ཝཱ ཁཛྫམཱནཾ གིཛ྄ཛྷེཧི ཝཱ ཁཛྫམཱནཾ ཀངྐེཧི ཝཱ ཁཛྫམཱནཾ སུནཁེཧི ཝཱ ཁཛྫམཱནཾ བྱགྒྷེཧི ཝཱ ཁཛྫམཱནཾ དཱིཔཱིཧི ཝཱ ཁཛྫམཱནཾ སིངྒཱལེཧི ཝཱ 9 ཁཛྫམཱནཾ ཝིཝིདྷེཧི ཝཱ པཱཎཀཛཱཏེཧི ཁཛྫམཱནཾ། སོ ཨིམམེཝ ཀཱཡཾ ཨུཔསཾཧརཏི – ‘ཨཡམྤི ཁོ ཀཱཡོ ཨེཝཾདྷམྨོ ཨེཝཾབྷཱཝཱི ཨེཝཾཨནཏཱིཏོ’ཏི།

    ‘‘Puna caparaṃ, bhikkhave, bhikkhu seyyathāpi passeyya sarīraṃ sivathikāya chaḍḍitaṃ kākehi vā khajjamānaṃ kulalehi vā khajjamānaṃ gijjhehi vā khajjamānaṃ kaṅkehi vā khajjamānaṃ sunakhehi vā khajjamānaṃ byagghehi vā khajjamānaṃ dīpīhi vā khajjamānaṃ siṅgālehi vā 10 khajjamānaṃ vividhehi vā pāṇakajātehi khajjamānaṃ. So imameva kāyaṃ upasaṃharati – ‘ayampi kho kāyo evaṃdhammo evaṃbhāvī evaṃanatīto’ti.

    ‘‘ཨིཏི ཨཛ྄ཛྷཏྟཾ ཝཱ…པེ॰… ཨེཝམྤི ཁོ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    ‘‘Iti ajjhattaṃ vā…pe… evampi kho, bhikkhave, bhikkhu kāye kāyānupassī viharati.

    ‘‘པུན ཙཔརཾ, བྷིཀྑཝེ, བྷིཀྑུ སེཡྻཐཱཔི པསྶེཡྻ སརཱིརཾ སིཝཐིཀཱཡ ཚཌྜིཏཾ ཨཊྛིཀསངྑལིཀཾ སམཾསལོཧིཏཾ ནྷཱརུསམྦནྡྷཾ…པེ॰… ཨཊྛིཀསངྑལིཀཾ ནིམཾསལོཧིཏམཀྑིཏཾ ནྷཱརུསམྦནྡྷཾ…པེ॰… ཨཊྛིཀསངྑལིཀཾ ཨཔགཏམཾསལོཧིཏཾ ནྷཱརུསམྦནྡྷཾ…པེ॰… ཨཊྛིཀཱནི ཨཔགཏསམྦནྡྷཱནི 11 དིསཱ ཝིདིསཱ ཝིཀྑིཏྟཱནི, ཨཉྙེན ཧཏྠཊྛིཀཾ ཨཉྙེན པཱདཊྛིཀཾ ཨཉྙེན གོཔྥཀཊྛིཀཾ 12 ཨཉྙེན ཛངྒྷཊྛིཀཾ ཨཉྙེན ཨཱུརུཊྛིཀཾ ཨཉྙེན ཀཊིཊྛིཀཾ 13 ཨཉྙེན ཕཱསུཀཊྛིཀཾ ཨཉྙེན པིཊྛིཊྛིཀཾ ཨཉྙེན ཁནྡྷཊྛིཀཾ 14 ཨཉྙེན གཱིཝཊྛིཀཾ ཨཉྙེན ཧནུཀཊྛིཀཾ ཨཉྙེན དནྟཊྛིཀཾ ཨཉྙེན སཱིསཀཊཱཧཾ། སོ ཨིམམེཝ ཀཱཡཾ ཨུཔསཾཧརཏི – ‘ཨཡམྤི ཁོ ཀཱཡོ ཨེཝཾདྷམྨོ ཨེཝཾབྷཱཝཱི ཨེཝཾཨནཏཱིཏོ’ཏི།

    ‘‘Puna caparaṃ, bhikkhave, bhikkhu seyyathāpi passeyya sarīraṃ sivathikāya chaḍḍitaṃ aṭṭhikasaṅkhalikaṃ samaṃsalohitaṃ nhārusambandhaṃ…pe… aṭṭhikasaṅkhalikaṃ nimaṃsalohitamakkhitaṃ nhārusambandhaṃ…pe… aṭṭhikasaṅkhalikaṃ apagatamaṃsalohitaṃ nhārusambandhaṃ…pe… aṭṭhikāni apagatasambandhāni 15 disā vidisā vikkhittāni, aññena hatthaṭṭhikaṃ aññena pādaṭṭhikaṃ aññena gopphakaṭṭhikaṃ 16 aññena jaṅghaṭṭhikaṃ aññena ūruṭṭhikaṃ aññena kaṭiṭṭhikaṃ 17 aññena phāsukaṭṭhikaṃ aññena piṭṭhiṭṭhikaṃ aññena khandhaṭṭhikaṃ 18 aññena gīvaṭṭhikaṃ aññena hanukaṭṭhikaṃ aññena dantaṭṭhikaṃ aññena sīsakaṭāhaṃ. So imameva kāyaṃ upasaṃharati – ‘ayampi kho kāyo evaṃdhammo evaṃbhāvī evaṃanatīto’ti.

    ‘‘ཨིཏི ཨཛ྄ཛྷཏྟཾ ཝཱ …པེ॰… ཝིཧརཏི།

    ‘‘Iti ajjhattaṃ vā …pe… viharati.

    ‘‘པུན ཙཔརཾ, བྷིཀྑཝེ, བྷིཀྑུ སེཡྻཐཱཔི པསྶེཡྻ སརཱིརཾ སིཝཐིཀཱཡ ཚཌྜིཏཾ ཨཊྛིཀཱནི སེཏཱནི སངྑཝཎྞཔཊིབྷཱགཱནི…པེ॰… ཨཊྛིཀཱནི པུཉྫཀིཏཱནི ཏེརོཝསྶིཀཱནི …པེ॰… ཨཊྛིཀཱནི པཱུཏཱིནི ཙུཎྞཀཛཱཏཱནི། སོ ཨིམམེཝ ཀཱཡཾ ཨུཔསཾཧརཏི – ‘ཨཡམྤི ཁོ ཀཱཡོ ཨེཝཾདྷམྨོ ཨེཝཾབྷཱཝཱི ཨེཝཾཨནཏཱིཏོ’ཏི། ཨིཏི ཨཛ྄ཛྷཏྟཾ ཝཱ ཀཱཡེ ཀཱཡཱནུཔསྶཱི ཝིཧརཏི, བཧིདྡྷཱ ཝཱ ཀཱཡེ ཀཱཡཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ ཀཱཡེ ཀཱཡཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི, ཝཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི, སམུདཡཝཡདྷམྨཱནུཔསྶཱི ཝཱ ཀཱཡསྨིཾ ཝིཧརཏི། ‘ཨཏྠི ཀཱཡོ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི།

    ‘‘Puna caparaṃ, bhikkhave, bhikkhu seyyathāpi passeyya sarīraṃ sivathikāya chaḍḍitaṃ aṭṭhikāni setāni saṅkhavaṇṇapaṭibhāgāni…pe… aṭṭhikāni puñjakitāni terovassikāni …pe… aṭṭhikāni pūtīni cuṇṇakajātāni. So imameva kāyaṃ upasaṃharati – ‘ayampi kho kāyo evaṃdhammo evaṃbhāvī evaṃanatīto’ti. Iti ajjhattaṃ vā kāye kāyānupassī viharati, bahiddhā vā kāye kāyānupassī viharati, ajjhattabahiddhā vā kāye kāyānupassī viharati. Samudayadhammānupassī vā kāyasmiṃ viharati, vayadhammānupassī vā kāyasmiṃ viharati, samudayavayadhammānupassī vā kāyasmiṃ viharati. ‘Atthi kāyo’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati. Evampi kho, bhikkhave, bhikkhu kāye kāyānupassī viharati.

    ནཝསིཝཐིཀཔབྦཾ ནིཊྛིཏཾ།

    Navasivathikapabbaṃ niṭṭhitaṃ.

    ཙུདྡས ཀཱཡཱནུཔསྶནཱ ནིཊྛིཏཱ།

    Cuddasa kāyānupassanā niṭṭhitā.

    ཝེདནཱནུཔསྶནཱ

    Vedanānupassanā

    ༣༨༠. ‘‘ཀཐཉྩ པན, བྷིཀྑཝེ, བྷིཀྑུ ཝེདནཱསུ ཝེདནཱནུཔསྶཱི ཝིཧརཏི? ཨིདྷ, བྷིཀྑཝེ, བྷིཀྑུ སུཁཾ ཝཱ ཝེདནཾ ཝེདཡམཱནོ ‘སུཁཾ ཝེདནཾ ཝེདཡཱམཱི’ཏི པཛཱནཱཏི ། དུཀྑཾ ཝཱ ཝེདནཾ ཝེདཡམཱནོ ‘དུཀྑཾ ཝེདནཾ ཝེདཡཱམཱི’ཏི པཛཱནཱཏི། ཨདུཀྑམསུཁཾ ཝཱ ཝེདནཾ ཝེདཡམཱནོ ‘ཨདུཀྑམསུཁཾ ཝེདནཾ ཝེདཡཱམཱི’ཏི པཛཱནཱཏི། སཱམིསཾ ཝཱ སུཁཾ ཝེདནཾ ཝེདཡམཱནོ ‘སཱམིསཾ སུཁཾ ཝེདནཾ ཝེདཡཱམཱི’ཏི པཛཱནཱཏི, ནིརཱམིསཾ ཝཱ སུཁཾ ཝེདནཾ ཝེདཡམཱནོ ‘ནིརཱམིསཾ སུཁཾ ཝེདནཾ ཝེདཡཱམཱི’ཏི པཛཱནཱཏི། སཱམིསཾ ཝཱ དུཀྑཾ ཝེདནཾ ཝེདཡམཱནོ ‘སཱམིསཾ དུཀྑཾ ཝེདནཾ ཝེདཡཱམཱི’ཏི པཛཱནཱཏི, ནིརཱམིསཾ ཝཱ དུཀྑཾ ཝེདནཾ ཝེདཡམཱནོ ‘ནིརཱམིསཾ དུཀྑཾ ཝེདནཾ ཝེདཡཱམཱི’ཏི པཛཱནཱཏི། སཱམིསཾ ཝཱ ཨདུཀྑམསུཁཾ ཝེདནཾ ཝེདཡམཱནོ ‘སཱམིསཾ ཨདུཀྑམསུཁཾ ཝེདནཾ ཝེདཡཱམཱི’ཏི པཛཱནཱཏི, ནིརཱམིསཾ ཝཱ ཨདུཀྑམསུཁཾ ཝེདནཾ ཝེདཡམཱནོ ‘ནིརཱམིསཾ ཨདུཀྑམསུཁཾ ཝེདནཾ ཝེདཡཱམཱི’ཏི པཛཱནཱཏི། ཨིཏི ཨཛ྄ཛྷཏྟཾ ཝཱ ཝེདནཱསུ ཝེདནཱནུཔསྶཱི ཝིཧརཏི, བཧིདྡྷཱ ཝཱ ཝེདནཱསུ ཝེདནཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ ཝེདནཱསུ ཝེདནཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ ཝེདནཱསུ ཝིཧརཏི, ཝཡདྷམྨཱནུཔསྶཱི ཝཱ ཝེདནཱསུ ཝིཧརཏི, སམུདཡཝཡདྷམྨཱནུཔསྶཱི ཝཱ ཝེདནཱསུ ཝིཧརཏི། ‘ཨཏྠི ཝེདནཱ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ, བྷིཀྑཝེ, བྷིཀྑུ ཝེདནཱསུ ཝེདནཱནུཔསྶཱི ཝིཧརཏི།

    380. ‘‘Kathañca pana, bhikkhave, bhikkhu vedanāsu vedanānupassī viharati? Idha, bhikkhave, bhikkhu sukhaṃ vā vedanaṃ vedayamāno ‘sukhaṃ vedanaṃ vedayāmī’ti pajānāti . Dukkhaṃ vā vedanaṃ vedayamāno ‘dukkhaṃ vedanaṃ vedayāmī’ti pajānāti. Adukkhamasukhaṃ vā vedanaṃ vedayamāno ‘adukkhamasukhaṃ vedanaṃ vedayāmī’ti pajānāti. Sāmisaṃ vā sukhaṃ vedanaṃ vedayamāno ‘sāmisaṃ sukhaṃ vedanaṃ vedayāmī’ti pajānāti, nirāmisaṃ vā sukhaṃ vedanaṃ vedayamāno ‘nirāmisaṃ sukhaṃ vedanaṃ vedayāmī’ti pajānāti. Sāmisaṃ vā dukkhaṃ vedanaṃ vedayamāno ‘sāmisaṃ dukkhaṃ vedanaṃ vedayāmī’ti pajānāti, nirāmisaṃ vā dukkhaṃ vedanaṃ vedayamāno ‘nirāmisaṃ dukkhaṃ vedanaṃ vedayāmī’ti pajānāti. Sāmisaṃ vā adukkhamasukhaṃ vedanaṃ vedayamāno ‘sāmisaṃ adukkhamasukhaṃ vedanaṃ vedayāmī’ti pajānāti, nirāmisaṃ vā adukkhamasukhaṃ vedanaṃ vedayamāno ‘nirāmisaṃ adukkhamasukhaṃ vedanaṃ vedayāmī’ti pajānāti. Iti ajjhattaṃ vā vedanāsu vedanānupassī viharati, bahiddhā vā vedanāsu vedanānupassī viharati, ajjhattabahiddhā vā vedanāsu vedanānupassī viharati. Samudayadhammānupassī vā vedanāsu viharati, vayadhammānupassī vā vedanāsu viharati, samudayavayadhammānupassī vā vedanāsu viharati. ‘Atthi vedanā’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati. Evampi kho, bhikkhave, bhikkhu vedanāsu vedanānupassī viharati.

    ཝེདནཱནུཔསྶནཱ ནིཊྛིཏཱ།

    Vedanānupassanā niṭṭhitā.

    ཙིཏྟཱནུཔསྶནཱ

    Cittānupassanā

    ༣༨༡. ‘‘ཀཐཉྩ པན, བྷིཀྑཝེ, བྷིཀྑུ ཙིཏྟེ ཙིཏྟཱནུཔསྶཱི ཝིཧརཏི? ཨིདྷ, བྷིཀྑཝེ, བྷིཀྑུ སརཱགཾ ཝཱ ཙིཏྟཾ ‘སརཱགཾ ཙིཏྟ’ནྟི པཛཱནཱཏི, ཝཱིཏརཱགཾ ཝཱ ཙིཏྟཾ ‘ཝཱིཏརཱགཾ ཙིཏྟ’ནྟི པཛཱནཱཏི། སདོསཾ ཝཱ ཙིཏྟཾ ‘སདོསཾ ཙིཏྟ’ནྟི པཛཱནཱཏི, ཝཱིཏདོསཾ ཝཱ ཙིཏྟཾ ‘ཝཱིཏདོསཾ ཙིཏྟ’ནྟི པཛཱནཱཏི། སམོཧཾ ཝཱ ཙིཏྟཾ ‘སམོཧཾ ཙིཏྟ’ནྟི པཛཱནཱཏི, ཝཱིཏམོཧཾ ཝཱ ཙིཏྟཾ ‘ཝཱིཏམོཧཾ ཙིཏྟ’ནྟི པཛཱནཱཏི། སངྑིཏྟཾ ཝཱ ཙིཏྟཾ ‘སངྑིཏྟཾ ཙིཏྟ’ནྟི པཛཱནཱཏི, ཝིཀྑིཏྟཾ ཝཱ ཙིཏྟཾ ‘ཝིཀྑིཏྟཾ ཙིཏྟ’ནྟི པཛཱནཱཏི། མཧགྒཏཾ ཝཱ ཙིཏྟཾ ‘མཧགྒཏཾ ཙིཏྟ’ནྟི པཛཱནཱཏི, ཨམཧགྒཏཾ ཝཱ ཙིཏྟཾ ‘ཨམཧགྒཏཾ ཙིཏྟ’ནྟི པཛཱནཱཏི། སཨུཏྟརཾ ཝཱ ཙིཏྟཾ ‘སཨུཏྟརཾ ཙིཏྟ’ནྟི པཛཱནཱཏི, ཨནུཏྟརཾ ཝཱ ཙིཏྟཾ ‘ཨནུཏྟརཾ ཙིཏྟ’ནྟི པཛཱནཱཏི། སམཱཧིཏཾ ཝཱ ཙིཏྟཾ ‘སམཱཧིཏཾ ཙིཏྟ’ནྟི པཛཱནཱཏི, ཨསམཱཧིཏཾ ཝཱ ཙིཏྟཾ ‘ཨསམཱཧིཏཾ ཙིཏྟ’ནྟི པཛཱནཱཏི། ཝིམུཏྟཾ ཝཱ ཙིཏྟཾ ‘ཝིམུཏྟཾ ཙིཏྟ’ནྟི པཛཱནཱཏི། ཨཝིམུཏྟཾ ཝཱ ཙིཏྟཾ ‘ཨཝིམུཏྟཾ ཙིཏྟ’ནྟི པཛཱནཱཏི། ཨིཏི ཨཛ྄ཛྷཏྟཾ ཝཱ ཙིཏྟེ ཙིཏྟཱནུཔསྶཱི ཝིཧརཏི, བཧིདྡྷཱ ཝཱ ཙིཏྟེ ཙིཏྟཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ ཙིཏྟེ ཙིཏྟཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ ཙིཏྟསྨིཾ ཝིཧརཏི, ཝཡདྷམྨཱནུཔསྶཱི ཝཱ ཙིཏྟསྨིཾ ཝིཧརཏི, སམུདཡཝཡདྷམྨཱནུཔསྶཱི ཝཱ ཙིཏྟསྨིཾ ཝིཧརཏི, ‘ཨཏྠི ཙིཏྟ’ནྟི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི ། ཨེཝམྤི ཁོ, བྷིཀྑཝེ, བྷིཀྑུ ཙིཏྟེ ཙིཏྟཱནུཔསྶཱི ཝིཧརཏི།

    381. ‘‘Kathañca pana, bhikkhave, bhikkhu citte cittānupassī viharati? Idha, bhikkhave, bhikkhu sarāgaṃ vā cittaṃ ‘sarāgaṃ citta’nti pajānāti, vītarāgaṃ vā cittaṃ ‘vītarāgaṃ citta’nti pajānāti. Sadosaṃ vā cittaṃ ‘sadosaṃ citta’nti pajānāti, vītadosaṃ vā cittaṃ ‘vītadosaṃ citta’nti pajānāti. Samohaṃ vā cittaṃ ‘samohaṃ citta’nti pajānāti, vītamohaṃ vā cittaṃ ‘vītamohaṃ citta’nti pajānāti. Saṅkhittaṃ vā cittaṃ ‘saṅkhittaṃ citta’nti pajānāti, vikkhittaṃ vā cittaṃ ‘vikkhittaṃ citta’nti pajānāti. Mahaggataṃ vā cittaṃ ‘mahaggataṃ citta’nti pajānāti, amahaggataṃ vā cittaṃ ‘amahaggataṃ citta’nti pajānāti. Sauttaraṃ vā cittaṃ ‘sauttaraṃ citta’nti pajānāti, anuttaraṃ vā cittaṃ ‘anuttaraṃ citta’nti pajānāti. Samāhitaṃ vā cittaṃ ‘samāhitaṃ citta’nti pajānāti, asamāhitaṃ vā cittaṃ ‘asamāhitaṃ citta’nti pajānāti. Vimuttaṃ vā cittaṃ ‘vimuttaṃ citta’nti pajānāti. Avimuttaṃ vā cittaṃ ‘avimuttaṃ citta’nti pajānāti. Iti ajjhattaṃ vā citte cittānupassī viharati, bahiddhā vā citte cittānupassī viharati, ajjhattabahiddhā vā citte cittānupassī viharati. Samudayadhammānupassī vā cittasmiṃ viharati, vayadhammānupassī vā cittasmiṃ viharati, samudayavayadhammānupassī vā cittasmiṃ viharati, ‘atthi citta’nti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati . Evampi kho, bhikkhave, bhikkhu citte cittānupassī viharati.

    ཙིཏྟཱནུཔསྶནཱ ནིཊྛིཏཱ།

    Cittānupassanā niṭṭhitā.

    དྷམྨཱནུཔསྶནཱ ནཱིཝརཎཔབྦཾ

    Dhammānupassanā nīvaraṇapabbaṃ

    ༣༨༢. ‘‘ཀཐཉྩ པན, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི? ཨིདྷ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི པཉྩསུ ནཱིཝརཎེསུ། ཀཐཉྩ པན, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི པཉྩསུ ནཱིཝརཎེསུ?

    382. ‘‘Kathañca pana, bhikkhave, bhikkhu dhammesu dhammānupassī viharati? Idha, bhikkhave, bhikkhu dhammesu dhammānupassī viharati pañcasu nīvaraṇesu. Kathañca pana, bhikkhave, bhikkhu dhammesu dhammānupassī viharati pañcasu nīvaraṇesu?

    ‘‘ཨིདྷ, བྷིཀྑཝེ, བྷིཀྑུ སནྟཾ ཝཱ ཨཛ྄ཛྷཏྟཾ ཀཱམཙྪནྡཾ ‘ཨཏྠི མེ ཨཛ྄ཛྷཏྟཾ ཀཱམཙྪནྡོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ ཀཱམཙྪནྡཾ ‘ནཏྠི མེ ཨཛ྄ཛྷཏྟཾ ཀཱམཙྪནྡོ’ཏི པཛཱནཱཏི, ཡཐཱ ཙ ཨནུཔྤནྣསྶ ཀཱམཙྪནྡསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ ཀཱམཙྪནྡསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ ཀཱམཙྪནྡསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Idha, bhikkhave, bhikkhu santaṃ vā ajjhattaṃ kāmacchandaṃ ‘atthi me ajjhattaṃ kāmacchando’ti pajānāti, asantaṃ vā ajjhattaṃ kāmacchandaṃ ‘natthi me ajjhattaṃ kāmacchando’ti pajānāti, yathā ca anuppannassa kāmacchandassa uppādo hoti tañca pajānāti, yathā ca uppannassa kāmacchandassa pahānaṃ hoti tañca pajānāti, yathā ca pahīnassa kāmacchandassa āyatiṃ anuppādo hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ བྱཱཔཱདཾ ‘ཨཏྠི མེ ཨཛ྄ཛྷཏྟཾ བྱཱཔཱདོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ བྱཱཔཱདཾ ‘ནཏྠི མེ ཨཛ྄ཛྷཏྟཾ བྱཱཔཱདོ’ཏི པཛཱནཱཏི, ཡཐཱ ཙ ཨནུཔྤནྣསྶ བྱཱཔཱདསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ བྱཱཔཱདསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ བྱཱཔཱདསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ byāpādaṃ ‘atthi me ajjhattaṃ byāpādo’ti pajānāti, asantaṃ vā ajjhattaṃ byāpādaṃ ‘natthi me ajjhattaṃ byāpādo’ti pajānāti, yathā ca anuppannassa byāpādassa uppādo hoti tañca pajānāti, yathā ca uppannassa byāpādassa pahānaṃ hoti tañca pajānāti, yathā ca pahīnassa byāpādassa āyatiṃ anuppādo hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ ཐིནམིདྡྷཾ ‘ཨཏྠི མེ ཨཛ྄ཛྷཏྟཾ ཐིནམིདྡྷ’ནྟི པཛཱནཱཏི, ཨསནྟཾ ཝཱ ཨཛ྄ཛྷཏྟཾ ཐིནམིདྡྷཾ ‘ནཏྠི མེ ཨཛ྄ཛྷཏྟཾ ཐིནམིདྡྷ’ནྟི པཛཱནཱཏི, ཡཐཱ ཙ ཨནུཔྤནྣསྶ ཐིནམིདྡྷསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ ཐིནམིདྡྷསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ ཐིནམིདྡྷསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ thinamiddhaṃ ‘atthi me ajjhattaṃ thinamiddha’nti pajānāti, asantaṃ vā ajjhattaṃ thinamiddhaṃ ‘natthi me ajjhattaṃ thinamiddha’nti pajānāti, yathā ca anuppannassa thinamiddhassa uppādo hoti tañca pajānāti, yathā ca uppannassa thinamiddhassa pahānaṃ hoti tañca pajānāti, yathā ca pahīnassa thinamiddhassa āyatiṃ anuppādo hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ ཨུདྡྷཙྩཀུཀྐུཙྩཾ ‘ཨཏྠི མེ ཨཛ྄ཛྷཏྟཾ ཨུདྡྷཙྩཀུཀྐུཙྩ’ནྟི པཛཱནཱཏི, ཨསནྟཾ ཝཱ ཨཛ྄ཛྷཏྟཾ ཨུདྡྷཙྩཀུཀྐུཙྩཾ ‘ནཏྠི མེ ཨཛ྄ཛྷཏྟཾ ཨུདྡྷཙྩཀུཀྐུཙྩ’ནྟི པཛཱནཱཏི, ཡཐཱ ཙ ཨནུཔྤནྣསྶ ཨུདྡྷཙྩཀུཀྐུཙྩསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ ཨུདྡྷཙྩཀུཀྐུཙྩསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ ཨུདྡྷཙྩཀུཀྐུཙྩསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ uddhaccakukkuccaṃ ‘atthi me ajjhattaṃ uddhaccakukkucca’nti pajānāti, asantaṃ vā ajjhattaṃ uddhaccakukkuccaṃ ‘natthi me ajjhattaṃ uddhaccakukkucca’nti pajānāti, yathā ca anuppannassa uddhaccakukkuccassa uppādo hoti tañca pajānāti, yathā ca uppannassa uddhaccakukkuccassa pahānaṃ hoti tañca pajānāti, yathā ca pahīnassa uddhaccakukkuccassa āyatiṃ anuppādo hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ ཝིཙིཀིཙྪཾ ‘ཨཏྠི མེ ཨཛ྄ཛྷཏྟཾ ཝིཙིཀིཙྪཱ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ ཝིཙིཀིཙྪཾ ‘ནཏྠི མེ ཨཛ྄ཛྷཏྟཾ ཝིཙིཀིཙྪཱ’ཏི པཛཱནཱཏི, ཡཐཱ ཙ ཨནུཔྤནྣཱཡ ཝིཙིཀིཙྪཱཡ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣཱཡ ཝིཙིཀིཙྪཱཡ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནཱཡ ཝིཙིཀིཙྪཱཡ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ vicikicchaṃ ‘atthi me ajjhattaṃ vicikicchā’ti pajānāti, asantaṃ vā ajjhattaṃ vicikicchaṃ ‘natthi me ajjhattaṃ vicikicchā’ti pajānāti, yathā ca anuppannāya vicikicchāya uppādo hoti tañca pajānāti, yathā ca uppannāya vicikicchāya pahānaṃ hoti tañca pajānāti, yathā ca pahīnāya vicikicchāya āyatiṃ anuppādo hoti tañca pajānāti.

    ‘‘ཨིཏི ཨཛ྄ཛྷཏྟཾ ཝཱ དྷམྨེསུ དྷམྨཱནུཔསྶཱི ཝིཧརཏི, བཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི སམུདཡདྷམྨཱནུཔསྶཱི ཝཱ དྷམྨེསུ ཝིཧརཏི, ཝཡདྷམྨཱནུཔསྶཱི ཝཱ དྷམྨེསུ ཝིཧརཏི, སམུདཡཝཡདྷམྨཱནུཔསྶཱི ཝཱ དྷམྨེསུ ཝིཧརཏི ‘ཨཏྠི དྷམྨཱ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི པཉྩསུ ནཱིཝརཎེསུ།

    ‘‘Iti ajjhattaṃ vā dhammesu dhammānupassī viharati, bahiddhā vā dhammesu dhammānupassī viharati, ajjhattabahiddhā vā dhammesu dhammānupassī viharati samudayadhammānupassī vā dhammesu viharati, vayadhammānupassī vā dhammesu viharati, samudayavayadhammānupassī vā dhammesu viharati ‘atthi dhammā’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati. Evampi kho, bhikkhave, bhikkhu dhammesu dhammānupassī viharati pañcasu nīvaraṇesu.

    ནཱིཝརཎཔབྦཾ ནིཊྛིཏཾ།

    Nīvaraṇapabbaṃ niṭṭhitaṃ.

    དྷམྨཱནུཔསྶནཱ ཁནྡྷཔབྦཾ

    Dhammānupassanā khandhapabbaṃ

    ༣༨༣. ‘‘པུན ཙཔརཾ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི པཉྩསུ ཨུཔཱདཱནཀྑནྡྷེསུ། ཀཐཉྩ པན, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི པཉྩསུ ཨུཔཱདཱནཀྑནྡྷེསུ? ཨིདྷ, བྷིཀྑཝེ, བྷིཀྑུ – ‘ཨིཏི རཱུཔཾ, ཨིཏི རཱུཔསྶ སམུདཡོ, ཨིཏི རཱུཔསྶ ཨཏྠངྒམོ; ཨིཏི ཝེདནཱ, ཨིཏི ཝེདནཱཡ སམུདཡོ, ཨིཏི ཝེདནཱཡ ཨཏྠངྒམོ; ཨིཏི སཉྙཱ, ཨིཏི སཉྙཱཡ སམུདཡོ, ཨིཏི སཉྙཱཡ ཨཏྠངྒམོ; ཨིཏི སངྑཱརཱ, ཨིཏི སངྑཱརཱནཾ སམུདཡོ, ཨིཏི སངྑཱརཱནཾ ཨཏྠངྒམོ, ཨིཏི ཝིཉྙཱཎཾ, ཨིཏི ཝིཉྙཱཎསྶ སམུདཡོ, ཨིཏི ཝིཉྙཱཎསྶ ཨཏྠངྒམོ’ཏི, ཨིཏི ཨཛ྄ཛྷཏྟཾ ཝཱ དྷམྨེསུ དྷམྨཱནུཔསྶཱི ཝིཧརཏི, བཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ དྷམྨེསུ ཝིཧརཏི, ཝཡདྷམྨཱནུཔསྶཱི ཝཱ དྷམྨེསུ ཝིཧརཏི, སམུདཡཝཡདྷམྨཱནུཔསྶཱི ཝཱ དྷམྨེསུ ཝིཧརཏི། ‘ཨཏྠི དྷམྨཱ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ, ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི ། ཨེཝམྤི ཁོ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི པཉྩསུ ཨུཔཱདཱནཀྑནྡྷེསུ།

    383. ‘‘Puna caparaṃ, bhikkhave, bhikkhu dhammesu dhammānupassī viharati pañcasu upādānakkhandhesu. Kathañca pana, bhikkhave, bhikkhu dhammesu dhammānupassī viharati pañcasu upādānakkhandhesu? Idha, bhikkhave, bhikkhu – ‘iti rūpaṃ, iti rūpassa samudayo, iti rūpassa atthaṅgamo; iti vedanā, iti vedanāya samudayo, iti vedanāya atthaṅgamo; iti saññā, iti saññāya samudayo, iti saññāya atthaṅgamo; iti saṅkhārā, iti saṅkhārānaṃ samudayo, iti saṅkhārānaṃ atthaṅgamo, iti viññāṇaṃ, iti viññāṇassa samudayo, iti viññāṇassa atthaṅgamo’ti, iti ajjhattaṃ vā dhammesu dhammānupassī viharati, bahiddhā vā dhammesu dhammānupassī viharati, ajjhattabahiddhā vā dhammesu dhammānupassī viharati. Samudayadhammānupassī vā dhammesu viharati, vayadhammānupassī vā dhammesu viharati, samudayavayadhammānupassī vā dhammesu viharati. ‘Atthi dhammā’ti vā panassa sati paccupaṭṭhitā hoti yāvadeva ñāṇamattāya paṭissatimattāya, anissito ca viharati, na ca kiñci loke upādiyati . Evampi kho, bhikkhave, bhikkhu dhammesu dhammānupassī viharati pañcasu upādānakkhandhesu.

    ཁནྡྷཔབྦཾ ནིཊྛིཏཾ།

    Khandhapabbaṃ niṭṭhitaṃ.

    དྷམྨཱནུཔསྶནཱ ཨཱཡཏནཔབྦཾ

    Dhammānupassanā āyatanapabbaṃ

    ༣༨༤. ‘‘པུན ཙཔརཾ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི ཚསུ ཨཛ྄ཛྷཏྟིཀབཱཧིརེསུ ཨཱཡཏནེསུ། ཀཐཉྩ པན, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི ཚསུ ཨཛ྄ཛྷཏྟིཀབཱཧིརེསུ ཨཱཡཏནེསུ?

    384. ‘‘Puna caparaṃ, bhikkhave, bhikkhu dhammesu dhammānupassī viharati chasu ajjhattikabāhiresu āyatanesu. Kathañca pana, bhikkhave, bhikkhu dhammesu dhammānupassī viharati chasu ajjhattikabāhiresu āyatanesu?

    ‘‘ཨིདྷ, བྷིཀྑཝེ, བྷིཀྑུ ཙཀྑུཉྩ པཛཱནཱཏི, རཱུཔེ ཙ པཛཱནཱཏི, ཡཉྩ ཏདུབྷཡཾ པཊིཙྩ ཨུཔྤཛྫཏི སཾཡོཛནཾ ཏཉྩ པཛཱནཱཏི, ཡཐཱ ཙ ཨནུཔྤནྣསྶ སཾཡོཛནསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ སཾཡོཛནསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ སཾཡོཛནསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Idha, bhikkhave, bhikkhu cakkhuñca pajānāti, rūpe ca pajānāti, yañca tadubhayaṃ paṭicca uppajjati saṃyojanaṃ tañca pajānāti, yathā ca anuppannassa saṃyojanassa uppādo hoti tañca pajānāti, yathā ca uppannassa saṃyojanassa pahānaṃ hoti tañca pajānāti, yathā ca pahīnassa saṃyojanassa āyatiṃ anuppādo hoti tañca pajānāti.

    ‘‘སོཏཉྩ པཛཱནཱཏི, སདྡེ ཙ པཛཱནཱཏི, ཡཉྩ ཏདུབྷཡཾ པཊིཙྩ ཨུཔྤཛྫཏི སཾཡོཛནཾ ཏཉྩ པཛཱནཱཏི, ཡཐཱ ཙ ཨནུཔྤནྣསྶ སཾཡོཛནསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ སཾཡོཛནསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ སཾཡོཛནསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Sotañca pajānāti, sadde ca pajānāti, yañca tadubhayaṃ paṭicca uppajjati saṃyojanaṃ tañca pajānāti, yathā ca anuppannassa saṃyojanassa uppādo hoti tañca pajānāti, yathā ca uppannassa saṃyojanassa pahānaṃ hoti tañca pajānāti, yathā ca pahīnassa saṃyojanassa āyatiṃ anuppādo hoti tañca pajānāti.

    ‘‘གྷཱནཉྩ པཛཱནཱཏི, གནྡྷེ ཙ པཛཱནཱཏི, ཡཉྩ ཏདུབྷཡཾ པཊིཙྩ ཨུཔྤཛྫཏི སཾཡོཛནཾ ཏཉྩ པཛཱནཱཏི, ཡཐཱ ཙ ཨནུཔྤནྣསྶ སཾཡོཛནསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ སཾཡོཛནསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ སཾཡོཛནསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Ghānañca pajānāti, gandhe ca pajānāti, yañca tadubhayaṃ paṭicca uppajjati saṃyojanaṃ tañca pajānāti, yathā ca anuppannassa saṃyojanassa uppādo hoti tañca pajānāti, yathā ca uppannassa saṃyojanassa pahānaṃ hoti tañca pajānāti, yathā ca pahīnassa saṃyojanassa āyatiṃ anuppādo hoti tañca pajānāti.

    ‘‘ཛིཝ྄ཧཉྩ པཛཱནཱཏི, རསེ ཙ པཛཱནཱཏི, ཡཉྩ ཏདུབྷཡཾ པཊིཙྩ ཨུཔྤཛྫཏི སཾཡོཛནཾ ཏཉྩ པཛཱནཱཏི, ཡཐཱ ཙ ཨནུཔྤནྣསྶ སཾཡོཛནསྶ ཨུཔྤཱདོ ཧོཏི ཏཉྩ པཛཱནཱཏི , ཡཐཱ ཙ ཨུཔྤནྣསྶ སཾཡོཛནསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ སཾཡོཛནསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Jivhañca pajānāti, rase ca pajānāti, yañca tadubhayaṃ paṭicca uppajjati saṃyojanaṃ tañca pajānāti, yathā ca anuppannassa saṃyojanassa uppādo hoti tañca pajānāti , yathā ca uppannassa saṃyojanassa pahānaṃ hoti tañca pajānāti, yathā ca pahīnassa saṃyojanassa āyatiṃ anuppādo hoti tañca pajānāti.

    ‘‘ཀཱཡཉྩ པཛཱནཱཏི, ཕོཊྛབྦེ ཙ པཛཱནཱཏི, ཡཉྩ ཏདུབྷཡཾ པཊིཙྩ ཨུཔྤཛྫཏི སཾཡོཛནཾ ཏཉྩ པཛཱནཱཏི, ཡཐཱ ཙ ཨནུཔྤནྣསྶ སཾཡོཛནསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ སཾཡོཛནསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ སཾཡོཛནསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Kāyañca pajānāti, phoṭṭhabbe ca pajānāti, yañca tadubhayaṃ paṭicca uppajjati saṃyojanaṃ tañca pajānāti, yathā ca anuppannassa saṃyojanassa uppādo hoti tañca pajānāti, yathā ca uppannassa saṃyojanassa pahānaṃ hoti tañca pajānāti, yathā ca pahīnassa saṃyojanassa āyatiṃ anuppādo hoti tañca pajānāti.

    ‘‘མནཉྩ པཛཱནཱཏི, དྷམྨེ ཙ པཛཱནཱཏི, ཡཉྩ ཏདུབྷཡཾ པཊིཙྩ ཨུཔྤཛྫཏི སཾཡོཛནཾ ཏཉྩ པཛཱནཱཏི, ཡཐཱ ཙ ཨནུཔྤནྣསྶ སཾཡོཛནསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ སཾཡོཛནསྶ པཧཱནཾ ཧོཏི ཏཉྩ པཛཱནཱཏི, ཡཐཱ ཙ པཧཱིནསྶ སཾཡོཛནསྶ ཨཱཡཏིཾ ཨནུཔྤཱདོ ཧོཏི ཏཉྩ པཛཱནཱཏི།

    ‘‘Manañca pajānāti, dhamme ca pajānāti, yañca tadubhayaṃ paṭicca uppajjati saṃyojanaṃ tañca pajānāti, yathā ca anuppannassa saṃyojanassa uppādo hoti tañca pajānāti, yathā ca uppannassa saṃyojanassa pahānaṃ hoti tañca pajānāti, yathā ca pahīnassa saṃyojanassa āyatiṃ anuppādo hoti tañca pajānāti.

    ‘‘ཨིཏི ཨཛ྄ཛྷཏྟཾ ཝཱ དྷམྨེསུ དྷམྨཱནུཔསྶཱི ཝིཧརཏི, བཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ དྷམྨེསུ ཝིཧརཏི, ཝཡདྷམྨཱནུཔསྶཱི ཝཱ དྷམྨེསུ ཝིཧརཏི, སམུདཡཝཡདྷམྨཱནུཔསྶཱི ཝཱ དྷམྨེསུ ཝིཧརཏི། ‘ཨཏྠི དྷམྨཱ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ, ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི ཚསུ ཨཛ྄ཛྷཏྟིཀབཱཧིརེསུ ཨཱཡཏནེསུ།

    ‘‘Iti ajjhattaṃ vā dhammesu dhammānupassī viharati, bahiddhā vā dhammesu dhammānupassī viharati, ajjhattabahiddhā vā dhammesu dhammānupassī viharati. Samudayadhammānupassī vā dhammesu viharati, vayadhammānupassī vā dhammesu viharati, samudayavayadhammānupassī vā dhammesu viharati. ‘Atthi dhammā’ti vā panassa sati paccupaṭṭhitā hoti yāvadeva ñāṇamattāya paṭissatimattāya, anissito ca viharati, na ca kiñci loke upādiyati. Evampi kho, bhikkhave, bhikkhu dhammesu dhammānupassī viharati chasu ajjhattikabāhiresu āyatanesu.

    ཨཱཡཏནཔབྦཾ ནིཊྛིཏཾ།

    Āyatanapabbaṃ niṭṭhitaṃ.

    དྷམྨཱནུཔསྶནཱ བོཛ྄ཛྷངྒཔབྦཾ

    Dhammānupassanā bojjhaṅgapabbaṃ

    ༣༨༥. ‘‘པུན ཙཔརཾ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི སཏྟསུ བོཛ྄ཛྷངྒེསུ། ཀཐཉྩ པན, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི སཏྟསུ བོཛ྄ཛྷངྒེསུ? ཨིདྷ, བྷིཀྑཝེ, བྷིཀྑུ སནྟཾ ཝཱ ཨཛ྄ཛྷཏྟཾ སཏིསམྦོཛ྄ཛྷངྒཾ ‘ཨཏྠི མེ ཨཛ྄ཛྷཏྟཾ སཏིསམྦོཛ྄ཛྷངྒོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ སཏིསམྦོཛ྄ཛྷངྒཾ ‘ནཏྠི མེ ཨཛ྄ཛྷཏྟཾ སཏིསམྦོཛ྄ཛྷངྒོ’ཏི པཛཱནཱཏི, ཡཐཱ ཙ ཨནུཔྤནྣསྶ སཏིསམྦོཛ྄ཛྷངྒསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ སཏིསམྦོཛ྄ཛྷངྒསྶ བྷཱཝནཱཡ པཱརིཔཱུརཱི ཧོཏི ཏཉྩ པཛཱནཱཏི།

    385. ‘‘Puna caparaṃ, bhikkhave, bhikkhu dhammesu dhammānupassī viharati sattasu bojjhaṅgesu. Kathañca pana, bhikkhave, bhikkhu dhammesu dhammānupassī viharati sattasu bojjhaṅgesu? Idha, bhikkhave, bhikkhu santaṃ vā ajjhattaṃ satisambojjhaṅgaṃ ‘atthi me ajjhattaṃ satisambojjhaṅgo’ti pajānāti, asantaṃ vā ajjhattaṃ satisambojjhaṅgaṃ ‘natthi me ajjhattaṃ satisambojjhaṅgo’ti pajānāti, yathā ca anuppannassa satisambojjhaṅgassa uppādo hoti tañca pajānāti, yathā ca uppannassa satisambojjhaṅgassa bhāvanāya pāripūrī hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ དྷམྨཝིཙཡསམྦོཛ྄ཛྷངྒཾ ‘ཨཏྠི མེ ཨཛ྄ཛྷཏྟཾ དྷམྨཝིཙཡསམྦོཛ྄ཛྷངྒོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ དྷམྨཝིཙཡསམྦོཛ྄ཛྷངྒཾ ‘ནཏྠི མེ ཨཛ྄ཛྷཏྟཾ དྷམྨཝིཙཡསམྦོཛ྄ཛྷངྒོ’ཏི པཛཱནཱཏི, ཡཐཱ ཙ ཨནུཔྤནྣསྶ དྷམྨཝིཙཡསམྦོཛ྄ཛྷངྒསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ དྷམྨཝིཙཡསམྦོཛ྄ཛྷངྒསྶ བྷཱཝནཱཡ པཱརིཔཱུརཱི ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ dhammavicayasambojjhaṅgaṃ ‘atthi me ajjhattaṃ dhammavicayasambojjhaṅgo’ti pajānāti, asantaṃ vā ajjhattaṃ dhammavicayasambojjhaṅgaṃ ‘natthi me ajjhattaṃ dhammavicayasambojjhaṅgo’ti pajānāti, yathā ca anuppannassa dhammavicayasambojjhaṅgassa uppādo hoti tañca pajānāti, yathā ca uppannassa dhammavicayasambojjhaṅgassa bhāvanāya pāripūrī hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ ཝཱིརིཡསམྦོཛ྄ཛྷངྒཾ ‘ཨཏྠི མེ ཨཛ྄ཛྷཏྟཾ ཝཱིརིཡསམྦོཛ྄ཛྷངྒོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ ཝཱིརིཡསམྦོཛ྄ཛྷངྒཾ ‘ནཏྠི མེ ཨཛ྄ཛྷཏྟཾ ཝཱིརིཡསམྦོཛ྄ཛྷངྒོ’ཏི པཛཱནཱཏི, ཡཐཱ ཙ ཨནུཔྤནྣསྶ ཝཱིརིཡསམྦོཛ྄ཛྷངྒསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ ཝཱིརིཡསམྦོཛ྄ཛྷངྒསྶ བྷཱཝནཱཡ པཱརིཔཱུརཱི ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ vīriyasambojjhaṅgaṃ ‘atthi me ajjhattaṃ vīriyasambojjhaṅgo’ti pajānāti, asantaṃ vā ajjhattaṃ vīriyasambojjhaṅgaṃ ‘natthi me ajjhattaṃ vīriyasambojjhaṅgo’ti pajānāti, yathā ca anuppannassa vīriyasambojjhaṅgassa uppādo hoti tañca pajānāti, yathā ca uppannassa vīriyasambojjhaṅgassa bhāvanāya pāripūrī hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ པཱིཏིསམྦོཛ྄ཛྷངྒཾ ‘ཨཏྠི མེ ཨཛ྄ཛྷཏྟཾ པཱིཏིསམྦོཛ྄ཛྷངྒོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ པཱིཏིསམྦོཛ྄ཛྷངྒཾ ‘ནཏྠི མེ ཨཛ྄ཛྷཏྟཾ པཱིཏིསམྦོཛ྄ཛྷངྒོ’ཏི པཛཱནཱཏི, ཡཐཱ ཙ ཨནུཔྤནྣསྶ པཱིཏིསམྦོཛ྄ཛྷངྒསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ པཱིཏིསམྦོཛ྄ཛྷངྒསྶ བྷཱཝནཱཡ པཱརིཔཱུརཱི ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ pītisambojjhaṅgaṃ ‘atthi me ajjhattaṃ pītisambojjhaṅgo’ti pajānāti, asantaṃ vā ajjhattaṃ pītisambojjhaṅgaṃ ‘natthi me ajjhattaṃ pītisambojjhaṅgo’ti pajānāti, yathā ca anuppannassa pītisambojjhaṅgassa uppādo hoti tañca pajānāti, yathā ca uppannassa pītisambojjhaṅgassa bhāvanāya pāripūrī hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ པསྶདྡྷིསམྦོཛ྄ཛྷངྒཾ ‘ཨཏྠི མེ ཨཛ྄ཛྷཏྟཾ པསྶདྡྷིསམྦོཛ྄ཛྷངྒོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ པསྶདྡྷིསམྦོཛ྄ཛྷངྒཾ ‘ནཏྠི མེ ཨཛ྄ཛྷཏྟཾ པསྶདྡྷིསམྦོཛ྄ཛྷངྒོ’ཏི པཛཱནཱཏི, ཡཐཱ ཙ ཨནུཔྤནྣསྶ པསྶདྡྷིསམྦོཛ྄ཛྷངྒསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ པསྶདྡྷིསམྦོཛ྄ཛྷངྒསྶ བྷཱཝནཱཡ པཱརིཔཱུརཱི ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ passaddhisambojjhaṅgaṃ ‘atthi me ajjhattaṃ passaddhisambojjhaṅgo’ti pajānāti, asantaṃ vā ajjhattaṃ passaddhisambojjhaṅgaṃ ‘natthi me ajjhattaṃ passaddhisambojjhaṅgo’ti pajānāti, yathā ca anuppannassa passaddhisambojjhaṅgassa uppādo hoti tañca pajānāti, yathā ca uppannassa passaddhisambojjhaṅgassa bhāvanāya pāripūrī hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ སམཱདྷིསམྦོཛ྄ཛྷངྒཾ ‘ཨཏྠི མེ ཨཛ྄ཛྷཏྟཾ སམཱདྷིསམྦོཛ྄ཛྷངྒོ’ཏི པཛཱནཱཏི, ཨསནྟཾ ཝཱ ཨཛ྄ཛྷཏྟཾ སམཱདྷིསམྦོཛ྄ཛྷངྒཾ ‘ནཏྠི མེ ཨཛ྄ཛྷཏྟཾ སམཱདྷིསམྦོཛ྄ཛྷངྒོ’ཏི པཛཱནཱཏི, ཡཐཱ ཙ ཨནུཔྤནྣསྶ སམཱདྷིསམྦོཛ྄ཛྷངྒསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ སམཱདྷིསམྦོཛ྄ཛྷངྒསྶ བྷཱཝནཱཡ པཱརིཔཱུརཱི ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ samādhisambojjhaṅgaṃ ‘atthi me ajjhattaṃ samādhisambojjhaṅgo’ti pajānāti, asantaṃ vā ajjhattaṃ samādhisambojjhaṅgaṃ ‘natthi me ajjhattaṃ samādhisambojjhaṅgo’ti pajānāti, yathā ca anuppannassa samādhisambojjhaṅgassa uppādo hoti tañca pajānāti, yathā ca uppannassa samādhisambojjhaṅgassa bhāvanāya pāripūrī hoti tañca pajānāti.

    ‘‘སནྟཾ ཝཱ ཨཛ྄ཛྷཏྟཾ ཨུཔེཀྑཱསམྦོཛ྄ཛྷངྒཾ ‘ཨཏྠི མེ ཨཛ྄ཛྷཏྟཾ ཨུཔེཀྑཱསམྦོཛ྄ཛྷངྒོ’ཏི པཛཱནཱཏི , ཨསནྟཾ ཝཱ ཨཛ྄ཛྷཏྟཾ ཨུཔེཀྑཱསམྦོཛ྄ཛྷངྒཾ ‘ནཏྠི མེ ཨཛ྄ཛྷཏྟཾ ཨུཔེཀྑཱསམྦོཛ྄ཛྷངྒོ’ཏི པཛཱནཱཏི, ཡཐཱ ཙ ཨནུཔྤནྣསྶ ཨུཔེཀྑཱསམྦོཛ྄ཛྷངྒསྶ ཨུཔྤཱདོ ཧོཏི ཏཉྩ པཛཱནཱཏི, ཡཐཱ ཙ ཨུཔྤནྣསྶ ཨུཔེཀྑཱསམྦོཛ྄ཛྷངྒསྶ བྷཱཝནཱཡ པཱརིཔཱུརཱི ཧོཏི ཏཉྩ པཛཱནཱཏི།

    ‘‘Santaṃ vā ajjhattaṃ upekkhāsambojjhaṅgaṃ ‘atthi me ajjhattaṃ upekkhāsambojjhaṅgo’ti pajānāti , asantaṃ vā ajjhattaṃ upekkhāsambojjhaṅgaṃ ‘natthi me ajjhattaṃ upekkhāsambojjhaṅgo’ti pajānāti, yathā ca anuppannassa upekkhāsambojjhaṅgassa uppādo hoti tañca pajānāti, yathā ca uppannassa upekkhāsambojjhaṅgassa bhāvanāya pāripūrī hoti tañca pajānāti.

    ‘‘ཨིཏི ཨཛ྄ཛྷཏྟཾ ཝཱ དྷམྨེསུ དྷམྨཱནུཔསྶཱི ཝིཧརཏི, བཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ དྷམྨེསུ ཝིཧརཏི, ཝཡདྷམྨཱནུཔསྶཱི ཝཱ དྷམྨེསུ ཝིཧརཏི, སམུདཡཝཡདྷམྨཱནུཔསྶཱི ཝཱ དྷམྨེསུ ཝིཧརཏི ‘ཨཏྠི དྷམྨཱ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི སཏྟསུ བོཛ྄ཛྷངྒེསུ།

    ‘‘Iti ajjhattaṃ vā dhammesu dhammānupassī viharati, bahiddhā vā dhammesu dhammānupassī viharati, ajjhattabahiddhā vā dhammesu dhammānupassī viharati. Samudayadhammānupassī vā dhammesu viharati, vayadhammānupassī vā dhammesu viharati, samudayavayadhammānupassī vā dhammesu viharati ‘atthi dhammā’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati. Evampi kho, bhikkhave, bhikkhu dhammesu dhammānupassī viharati sattasu bojjhaṅgesu.

    བོཛ྄ཛྷངྒཔབྦཾ ནིཊྛིཏཾ། 19

    Bojjhaṅgapabbaṃ niṭṭhitaṃ. 20

    དྷམྨཱནུཔསྶནཱ སཙྩཔབྦཾ

    Dhammānupassanā saccapabbaṃ

    ༣༨༦. ‘‘པུན ཙཔརཾ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི ཙཏཱུསུ ཨརིཡསཙྩེསུ། ཀཐཉྩ པན, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི ཙཏཱུསུ ཨརིཡསཙྩེསུ? ཨིདྷ, བྷིཀྑཝེ, བྷིཀྑུ ‘ཨིདཾ དུཀྑ’ནྟི ཡཐཱབྷཱུཏཾ པཛཱནཱཏི, ‘ཨཡཾ དུཀྑསམུདཡོ’ཏི ཡཐཱབྷཱུཏཾ པཛཱནཱཏི, ‘ཨཡཾ དུཀྑནིརོདྷོ’ཏི ཡཐཱབྷཱུཏཾ པཛཱནཱཏི, ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ པཛཱནཱཏི།

    386. ‘‘Puna caparaṃ, bhikkhave, bhikkhu dhammesu dhammānupassī viharati catūsu ariyasaccesu. Kathañca pana, bhikkhave, bhikkhu dhammesu dhammānupassī viharati catūsu ariyasaccesu? Idha, bhikkhave, bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti.

    པཋམབྷཱཎཝཱརོ ནིཊྛིཏོ།

    Paṭhamabhāṇavāro niṭṭhito.

    དུཀྑསཙྩནིདྡེསོ

    Dukkhasaccaniddeso

    ༣༨༧. ‘‘ཀཏམཉྩ , བྷིཀྑཝེ, དུཀྑཾ ཨརིཡསཙྩཾ? ཛཱཏིཔི དུཀྑཱ, ཛརཱཔི དུཀྑཱ, མརཎམྤི དུཀྑཾ, སོཀཔརིདེཝདུཀྑདོམནསྶུཔཱཡཱསཱཔི དུཀྑཱ, ཨཔྤིཡེཧི སམྤཡོགོཔི དུཀྑོ, པིཡེཧི ཝིཔྤཡོགོཔི དུཀྑོ 21, ཡམྤིཙྪཾ ན ལབྷཏི ཏམྤི དུཀྑཾ, སངྑིཏྟེན པཉྩུཔཱདཱནཀྑནྡྷཱ 22 དུཀྑཱ།

    387. ‘‘Katamañca , bhikkhave, dukkhaṃ ariyasaccaṃ? Jātipi dukkhā, jarāpi dukkhā, maraṇampi dukkhaṃ, sokaparidevadukkhadomanassupāyāsāpi dukkhā, appiyehi sampayogopi dukkho, piyehi vippayogopi dukkho 23, yampicchaṃ na labhati tampi dukkhaṃ, saṅkhittena pañcupādānakkhandhā24dukkhā.

    ༣༨༨. ‘‘ཀཏམཱ ཙ, བྷིཀྑཝེ, ཛཱཏི? ཡཱ ཏེསཾ ཏེསཾ སཏྟཱནཾ ཏམྷི ཏམྷི སཏྟནིཀཱཡེ ཛཱཏི སཉྫཱཏི ཨོཀྐནྟི ཨབྷིནིབྦཏྟི ཁནྡྷཱནཾ པཱཏུབྷཱཝོ ཨཱཡཏནཱནཾ པཊིལཱབྷོ, ཨཡཾ ཝུཙྩཏི, བྷིཀྑཝེ, ཛཱཏི།

    388. ‘‘Katamā ca, bhikkhave, jāti? Yā tesaṃ tesaṃ sattānaṃ tamhi tamhi sattanikāye jāti sañjāti okkanti abhinibbatti khandhānaṃ pātubhāvo āyatanānaṃ paṭilābho, ayaṃ vuccati, bhikkhave, jāti.

    ༣༨༩. ‘‘ཀཏམཱ ཙ, བྷིཀྑཝེ, ཛརཱ? ཡཱ ཏེསཾ ཏེསཾ སཏྟཱནཾ ཏམྷི ཏམྷི སཏྟནིཀཱཡེ ཛརཱ ཛཱིརཎཏཱ ཁཎྜིཙྩཾ པཱལིཙྩཾ ཝལིཏྟཙཏཱ ཨཱཡུནོ སཾཧཱནི ཨིནྡྲིཡཱནཾ པརིཔཱཀོ, ཨཡཾ ཝུཙྩཏི, བྷིཀྑཝེ, ཛརཱ།

    389. ‘‘Katamā ca, bhikkhave, jarā? Yā tesaṃ tesaṃ sattānaṃ tamhi tamhi sattanikāye jarā jīraṇatā khaṇḍiccaṃ pāliccaṃ valittacatā āyuno saṃhāni indriyānaṃ paripāko, ayaṃ vuccati, bhikkhave, jarā.

    ༣༩༠. ‘‘ཀཏམཉྩ, བྷིཀྑཝེ, མརཎཾ? ཡཾ 25 ཏེསཾ ཏེསཾ སཏྟཱནཾ ཏམྷཱ ཏམྷཱ སཏྟནིཀཱཡཱ ཙུཏི ཙཝནཏཱ བྷེདོ ཨནྟརདྷཱནཾ མཙྩུ མརཎཾ ཀཱལཀིརིཡཱ ཁནྡྷཱནཾ བྷེདོ ཀལེ༹ཝརསྶ ནིཀྑེཔོ ཛཱིཝིཏིནྡྲིཡསྶུཔཙྪེདོ, ཨིདཾ ཝུཙྩཏི, བྷིཀྑཝེ, མརཎཾ།

    390. ‘‘Katamañca, bhikkhave, maraṇaṃ? Yaṃ 26 tesaṃ tesaṃ sattānaṃ tamhā tamhā sattanikāyā cuti cavanatā bhedo antaradhānaṃ maccu maraṇaṃ kālakiriyā khandhānaṃ bhedo kaḷevarassa nikkhepo jīvitindriyassupacchedo, idaṃ vuccati, bhikkhave, maraṇaṃ.

    ༣༩༡. ‘‘ཀཏམོ ཙ, བྷིཀྑཝེ, སོཀོ? ཡོ ཁོ, བྷིཀྑཝེ, ཨཉྙཏརཉྙཏརེན བྱསནེན སམནྣཱགཏསྶ ཨཉྙཏརཉྙཏརེན དུཀྑདྷམྨེན ཕུཊྛསྶ སོཀོ སོཙནཱ སོཙིཏཏྟཾ ཨནྟོསོཀོ ཨནྟོཔརིསོཀོ, ཨཡཾ ཝུཙྩཏི, བྷིཀྑཝེ, སོཀོ།

    391. ‘‘Katamo ca, bhikkhave, soko? Yo kho, bhikkhave, aññataraññatarena byasanena samannāgatassa aññataraññatarena dukkhadhammena phuṭṭhassa soko socanā socitattaṃ antosoko antoparisoko, ayaṃ vuccati, bhikkhave, soko.

    ༣༩༢. ‘‘ཀཏམོ ཙ, བྷིཀྑཝེ, པརིདེཝོ? ཡོ ཁོ, བྷིཀྑཝེ, ཨཉྙཏརཉྙཏརེན བྱསནེན སམནྣཱགཏསྶ ཨཉྙཏརཉྙཏརེན དུཀྑདྷམྨེན ཕུཊྛསྶ ཨཱདེཝོ པརིདེཝོ ཨཱདེཝནཱ པརིདེཝནཱ ཨཱདེཝིཏཏྟཾ པརིདེཝིཏཏྟཾ, ཨཡཾ ཝུཙྩཏི, བྷིཀྑཝེ པརིདེཝོ།

    392. ‘‘Katamo ca, bhikkhave, paridevo? Yo kho, bhikkhave, aññataraññatarena byasanena samannāgatassa aññataraññatarena dukkhadhammena phuṭṭhassa ādevo paridevo ādevanā paridevanā ādevitattaṃ paridevitattaṃ, ayaṃ vuccati, bhikkhave paridevo.

    ༣༩༣. ‘‘ཀཏམཉྩ , བྷིཀྑཝེ, དུཀྑཾ? ཡཾ ཁོ, བྷིཀྑཝེ, ཀཱཡིཀཾ དུཀྑཾ ཀཱཡིཀཾ ཨསཱཏཾ ཀཱཡསམྥསྶཛཾ དུཀྑཾ ཨསཱཏཾ ཝེདཡིཏཾ, ཨིདཾ ཝུཙྩཏི, བྷིཀྑཝེ, དུཀྑཾ།

    393. ‘‘Katamañca , bhikkhave, dukkhaṃ? Yaṃ kho, bhikkhave, kāyikaṃ dukkhaṃ kāyikaṃ asātaṃ kāyasamphassajaṃ dukkhaṃ asātaṃ vedayitaṃ, idaṃ vuccati, bhikkhave, dukkhaṃ.

    ༣༩༤. ‘‘ཀཏམཉྩ , བྷིཀྑཝེ, དོམནསྶཾ? ཡཾ ཁོ, བྷིཀྑཝེ, ཙེཏསིཀཾ དུཀྑཾ ཙེཏསིཀཾ ཨསཱཏཾ མནོསམྥསྶཛཾ དུཀྑཾ ཨསཱཏཾ ཝེདཡིཏཾ, ཨིདཾ ཝུཙྩཏི, བྷིཀྑཝེ, དོམནསྶཾ།

    394. ‘‘Katamañca , bhikkhave, domanassaṃ? Yaṃ kho, bhikkhave, cetasikaṃ dukkhaṃ cetasikaṃ asātaṃ manosamphassajaṃ dukkhaṃ asātaṃ vedayitaṃ, idaṃ vuccati, bhikkhave, domanassaṃ.

    ༣༩༥. ‘‘ཀཏམོ ཙ, བྷིཀྑཝེ, ཨུཔཱཡཱསོ? ཡོ ཁོ, བྷིཀྑཝེ, ཨཉྙཏརཉྙཏརེན བྱསནེན སམནྣཱགཏསྶ ཨཉྙཏརཉྙཏརེན དུཀྑདྷམྨེན ཕུཊྛསྶ ཨཱཡཱསོ ཨུཔཱཡཱསོ ཨཱཡཱསིཏཏྟཾ ཨུཔཱཡཱསིཏཏྟཾ, ཨཡཾ ཝུཙྩཏི, བྷིཀྑཝེ, ཨུཔཱཡཱསོ།

    395. ‘‘Katamo ca, bhikkhave, upāyāso? Yo kho, bhikkhave, aññataraññatarena byasanena samannāgatassa aññataraññatarena dukkhadhammena phuṭṭhassa āyāso upāyāso āyāsitattaṃ upāyāsitattaṃ, ayaṃ vuccati, bhikkhave, upāyāso.

    ༣༩༦. ‘‘ཀཏམོ ཙ, བྷིཀྑཝེ, ཨཔྤིཡེཧི སམྤཡོགོ དུཀྑོ? ཨིདྷ ཡསྶ ཏེ ཧོནྟི ཨནིཊྛཱ ཨཀནྟཱ ཨམནཱཔཱ རཱུཔཱ སདྡཱ གནྡྷཱ རསཱ ཕོཊྛབྦཱ དྷམྨཱ, ཡེ ཝཱ པནསྶ ཏེ ཧོནྟི ཨནཏྠཀཱམཱ ཨཧིཏཀཱམཱ ཨཕཱསུཀཀཱམཱ ཨཡོགཀྑེམཀཱམཱ, ཡཱ ཏེཧི སདྡྷིཾ སངྒཏི སམཱགམོ སམོདྷཱནཾ མིསྶཱིབྷཱཝོ, ཨཡཾ ཝུཙྩཏི, བྷིཀྑཝེ, ཨཔྤིཡེཧི སམྤཡོགོ དུཀྑོ།

    396. ‘‘Katamo ca, bhikkhave, appiyehi sampayogo dukkho? Idha yassa te honti aniṭṭhā akantā amanāpā rūpā saddā gandhā rasā phoṭṭhabbā dhammā, ye vā panassa te honti anatthakāmā ahitakāmā aphāsukakāmā ayogakkhemakāmā, yā tehi saddhiṃ saṅgati samāgamo samodhānaṃ missībhāvo, ayaṃ vuccati, bhikkhave, appiyehi sampayogo dukkho.

    ༣༩༧. ‘‘ཀཏམོ ཙ, བྷིཀྑཝེ, པིཡེཧི ཝིཔྤཡོགོ དུཀྑོ? ཨིདྷ ཡསྶ ཏེ ཧོནྟི ཨིཊྛཱ ཀནྟཱ མནཱཔཱ རཱུཔཱ སདྡཱ གནྡྷཱ རསཱ ཕོཊྛབྦཱ དྷམྨཱ, ཡེ ཝཱ པནསྶ ཏེ ཧོནྟི ཨཏྠཀཱམཱ ཧིཏཀཱམཱ ཕཱསུཀཀཱམཱ ཡོགཀྑེམཀཱམཱ མཱཏཱ ཝཱ པིཏཱ ཝཱ བྷཱཏཱ ཝཱ བྷགིནཱི ཝཱ མིཏྟཱ ཝཱ ཨམཙྩཱ ཝཱ ཉཱཏིསཱལོཧིཏཱ ཝཱ, ཡཱ ཏེཧི སདྡྷིཾ ཨསངྒཏི ཨསམཱགམོ ཨསམོདྷཱནཾ ཨམིསྶཱིབྷཱཝོ, ཨཡཾ ཝུཙྩཏི, བྷིཀྑཝེ, པིཡེཧི ཝིཔྤཡོགོ དུཀྑོ།

    397. ‘‘Katamo ca, bhikkhave, piyehi vippayogo dukkho? Idha yassa te honti iṭṭhā kantā manāpā rūpā saddā gandhā rasā phoṭṭhabbā dhammā, ye vā panassa te honti atthakāmā hitakāmā phāsukakāmā yogakkhemakāmā mātā vā pitā vā bhātā vā bhaginī vā mittā vā amaccā vā ñātisālohitā vā, yā tehi saddhiṃ asaṅgati asamāgamo asamodhānaṃ amissībhāvo, ayaṃ vuccati, bhikkhave, piyehi vippayogo dukkho.

    ༣༩༨. ‘‘ཀཏམཉྩ , བྷིཀྑཝེ, ཡམྤིཙྪཾ ན ལབྷཏི ཏམྤི དུཀྑཾ? ཛཱཏིདྷམྨཱནཾ, བྷིཀྑཝེ, སཏྟཱནཾ ཨེཝཾ ཨིཙྪཱ ཨུཔྤཛྫཏི – ‘ཨཧོ ཝཏ མཡཾ ན ཛཱཏིདྷམྨཱ ཨསྶཱམ, ན ཙ ཝཏ ནོ ཛཱཏི ཨཱགཙྪེཡྻཱ’ཏི། ན ཁོ པནེཏཾ ཨིཙྪཱཡ པཏྟབྦཾ, ཨིདམྤི ཡམྤིཙྪཾ ན ལབྷཏི ཏམྤི དུཀྑཾ། ཛརཱདྷམྨཱནཾ, བྷིཀྑཝེ, སཏྟཱནཾ ཨེཝཾ ཨིཙྪཱ ཨུཔྤཛྫཏི – ‘ཨཧོ ཝཏ མཡཾ ན ཛརཱདྷམྨཱ ཨསྶཱམ, ན ཙ ཝཏ ནོ ཛརཱ ཨཱགཙྪེཡྻཱ’ཏི། ན ཁོ པནེཏཾ ཨིཙྪཱཡ པཏྟབྦཾ, ཨིདམྤི ཡམྤིཙྪཾ ན ལབྷཏི ཏམྤི དུཀྑཾ། བྱཱདྷིདྷམྨཱནཾ, བྷིཀྑཝེ, སཏྟཱནཾ ཨེཝཾ ཨིཙྪཱ ཨུཔྤཛྫཏི ‘ཨཧོ ཝཏ མཡཾ ན བྱཱདྷིདྷམྨཱ ཨསྶཱམ, ན ཙ ཝཏ ནོ བྱཱདྷི ཨཱགཙྪེཡྻཱ’ཏི། ན ཁོ པནེཏཾ ཨིཙྪཱཡ པཏྟབྦཾ, ཨིདམྤི ཡམྤིཙྪཾ ན ལབྷཏི ཏམྤི དུཀྑཾ། མརཎདྷམྨཱནཾ, བྷིཀྑཝེ, སཏྟཱནཾ ཨེཝཾ ཨིཙྪཱ ཨུཔྤཛྫཏི ‘ཨཧོ ཝཏ མཡཾ ན མརཎདྷམྨཱ ཨསྶཱམ, ན ཙ ཝཏ ནོ མརཎཾ ཨཱགཙྪེཡྻཱ’ཏི། ན ཁོ པནེཏཾ ཨིཙྪཱཡ པཏྟབྦཾ, ཨིདམྤི ཡམྤིཙྪཾ ན ལབྷཏི ཏམྤི དུཀྑཾ། སོཀཔརིདེཝདུཀྑདོམནསྶུཔཱཡཱསདྷམྨཱནཾ, བྷིཀྑཝེ, སཏྟཱནཾ ཨེཝཾ ཨིཙྪཱ ཨུཔྤཛྫཏི ‘ཨཧོ ཝཏ མཡཾ ན སོཀཔརིདེཝདུཀྑདོམནསྶུཔཱཡཱསདྷམྨཱ ཨསྶཱམ, ན ཙ ཝཏ ནོ སོཀཔརིདེཝདུཀྑདོམནསྶུཔཱཡཱསདྷམྨཱ ཨཱགཙྪེཡྻུ’ནྟི། ན ཁོ པནེཏཾ ཨིཙྪཱཡ པཏྟབྦཾ, ཨིདམྤི ཡམྤིཙྪཾ ན ལབྷཏི ཏམྤི དུཀྑཾ།

    398. ‘‘Katamañca , bhikkhave, yampicchaṃ na labhati tampi dukkhaṃ? Jātidhammānaṃ, bhikkhave, sattānaṃ evaṃ icchā uppajjati – ‘aho vata mayaṃ na jātidhammā assāma, na ca vata no jāti āgaccheyyā’ti. Na kho panetaṃ icchāya pattabbaṃ, idampi yampicchaṃ na labhati tampi dukkhaṃ. Jarādhammānaṃ, bhikkhave, sattānaṃ evaṃ icchā uppajjati – ‘aho vata mayaṃ na jarādhammā assāma, na ca vata no jarā āgaccheyyā’ti. Na kho panetaṃ icchāya pattabbaṃ, idampi yampicchaṃ na labhati tampi dukkhaṃ. Byādhidhammānaṃ, bhikkhave, sattānaṃ evaṃ icchā uppajjati ‘aho vata mayaṃ na byādhidhammā assāma, na ca vata no byādhi āgaccheyyā’ti. Na kho panetaṃ icchāya pattabbaṃ, idampi yampicchaṃ na labhati tampi dukkhaṃ. Maraṇadhammānaṃ, bhikkhave, sattānaṃ evaṃ icchā uppajjati ‘aho vata mayaṃ na maraṇadhammā assāma, na ca vata no maraṇaṃ āgaccheyyā’ti. Na kho panetaṃ icchāya pattabbaṃ, idampi yampicchaṃ na labhati tampi dukkhaṃ. Sokaparidevadukkhadomanassupāyāsadhammānaṃ, bhikkhave, sattānaṃ evaṃ icchā uppajjati ‘aho vata mayaṃ na sokaparidevadukkhadomanassupāyāsadhammā assāma, na ca vata no sokaparidevadukkhadomanassupāyāsadhammā āgaccheyyu’nti. Na kho panetaṃ icchāya pattabbaṃ, idampi yampicchaṃ na labhati tampi dukkhaṃ.

    ༣༩༩. ‘‘ཀཏམེ ཙ, བྷིཀྑཝེ, སངྑིཏྟེན པཉྩུཔཱདཱནཀྑནྡྷཱ དུཀྑཱ? སེཡྻཐིདཾ – རཱུཔུཔཱདཱནཀྑནྡྷོ, ཝེདནུཔཱདཱནཀྑནྡྷོ, སཉྙུཔཱདཱནཀྑནྡྷོ, སངྑཱརུཔཱདཱནཀྑནྡྷོ, ཝིཉྙཱཎུཔཱདཱནཀྑནྡྷོ། ཨིམེ ཝུཙྩནྟི, བྷིཀྑཝེ, སངྑིཏྟེན པཉྩུཔཱདཱནཀྑནྡྷཱ དུཀྑཱ། ཨིདཾ ཝུཙྩཏི, བྷིཀྑཝེ, དུཀྑཾ ཨརིཡསཙྩཾ།

    399. ‘‘Katame ca, bhikkhave, saṅkhittena pañcupādānakkhandhā dukkhā? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho. Ime vuccanti, bhikkhave, saṅkhittena pañcupādānakkhandhā dukkhā. Idaṃ vuccati, bhikkhave, dukkhaṃ ariyasaccaṃ.

    སམུདཡསཙྩནིདྡེསོ

    Samudayasaccaniddeso

    ༤༠༠. ‘‘ཀཏམཉྩ , བྷིཀྑཝེ, དུཀྑསམུདཡཾ 27 ཨརིཡསཙྩཾ? ཡཱཡཾ ཏཎྷཱ པོནོབྦྷཝིཀཱ 28 ནནྡཱིརཱགསཧགཏཱ 29 ཏཏྲཏཏྲཱབྷིནནྡིནཱི, སེཡྻཐིདཾ – ཀཱམཏཎྷཱ བྷཝཏཎྷཱ ཝིབྷཝཏཎྷཱ།

    400. ‘‘Katamañca , bhikkhave, dukkhasamudayaṃ 30 ariyasaccaṃ? Yāyaṃ taṇhā ponobbhavikā 31 nandīrāgasahagatā 32 tatratatrābhinandinī, seyyathidaṃ – kāmataṇhā bhavataṇhā vibhavataṇhā.

    ‘‘སཱ ཁོ པནེསཱ, བྷིཀྑཝེ, ཏཎྷཱ ཀཏྠ ཨུཔྤཛྫམཱནཱ ཨུཔྤཛྫཏི, ཀཏྠ ནིཝིསམཱནཱ ནིཝིསཏི? ཡཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Sā kho panesā, bhikkhave, taṇhā kattha uppajjamānā uppajjati, kattha nivisamānā nivisati? Yaṃ loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘ཀིཉྩ ལོཀེ པིཡརཱུཔཾ སཱཏརཱུཔཾ? ཙཀྑུ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི། སོཏཾ ལོཀེ…པེ॰… གྷཱནཾ ལོཀེ… ཛིཝ྄ཧཱ ལོཀེ… ཀཱཡོ ལོཀེ… མནོ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Kiñca loke piyarūpaṃ sātarūpaṃ? Cakkhu loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati. Sotaṃ loke…pe… ghānaṃ loke… jivhā loke… kāyo loke… mano loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘རཱུཔཱ ལོཀེ… སདྡཱ ལོཀེ… གནྡྷཱ ལོཀེ… རསཱ ལོཀེ… ཕོཊྛབྦཱ ལོཀེ… དྷམྨཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Rūpā loke… saddā loke… gandhā loke… rasā loke… phoṭṭhabbā loke… dhammā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘ཙཀྑུཝིཉྙཱཎཾ ལོཀེ… སོཏཝིཉྙཱཎཾ ལོཀེ… གྷཱནཝིཉྙཱཎཾ ལོཀེ… ཛིཝ྄ཧཱཝིཉྙཱཎཾ ལོཀེ… ཀཱཡཝིཉྙཱཎཾ ལོཀེ… མནོཝིཉྙཱཎཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Cakkhuviññāṇaṃ loke… sotaviññāṇaṃ loke… ghānaviññāṇaṃ loke… jivhāviññāṇaṃ loke… kāyaviññāṇaṃ loke… manoviññāṇaṃ loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘ཙཀྑུསམྥསྶོ ལོཀེ… སོཏསམྥསྶོ ལོཀེ… གྷཱནསམྥསྶོ ལོཀེ… ཛིཝ྄ཧཱསམྥསྶོ ལོཀེ… ཀཱཡསམྥསྶོ ལོཀེ… མནོསམྥསྶོ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Cakkhusamphasso loke… sotasamphasso loke… ghānasamphasso loke… jivhāsamphasso loke… kāyasamphasso loke… manosamphasso loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘ཙཀྑུསམྥསྶཛཱ ཝེདནཱ ལོཀེ… སོཏསམྥསྶཛཱ ཝེདནཱ ལོཀེ… གྷཱནསམྥསྶཛཱ ཝེདནཱ ལོཀེ… ཛིཝ྄ཧཱསམྥསྶཛཱ ཝེདནཱ ལོཀེ… ཀཱཡསམྥསྶཛཱ ཝེདནཱ ལོཀེ… མནོསམྥསྶཛཱ ཝེདནཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Cakkhusamphassajā vedanā loke… sotasamphassajā vedanā loke… ghānasamphassajā vedanā loke… jivhāsamphassajā vedanā loke… kāyasamphassajā vedanā loke… manosamphassajā vedanā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘རཱུཔསཉྙཱ ལོཀེ… སདྡསཉྙཱ ལོཀེ… གནྡྷསཉྙཱ ལོཀེ… རསསཉྙཱ ལོཀེ… ཕོཊྛབྦསཉྙཱ ལོཀེ… དྷམྨསཉྙཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Rūpasaññā loke… saddasaññā loke… gandhasaññā loke… rasasaññā loke… phoṭṭhabbasaññā loke… dhammasaññā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘རཱུཔསཉྩེཏནཱ ལོཀེ… སདྡསཉྩེཏནཱ ལོཀེ… གནྡྷསཉྩེཏནཱ ལོཀེ… རསསཉྩེཏནཱ ལོཀེ… ཕོཊྛབྦསཉྩེཏནཱ ལོཀེ… དྷམྨསཉྩེཏནཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Rūpasañcetanā loke… saddasañcetanā loke… gandhasañcetanā loke… rasasañcetanā loke… phoṭṭhabbasañcetanā loke… dhammasañcetanā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘རཱུཔཏཎྷཱ ལོཀེ… སདྡཏཎྷཱ ལོཀེ… གནྡྷཏཎྷཱ ལོཀེ… རསཏཎྷཱ ལོཀེ… ཕོཊྛབྦཏཎྷཱ ལོཀེ… དྷམྨཏཎྷཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Rūpataṇhā loke… saddataṇhā loke… gandhataṇhā loke… rasataṇhā loke… phoṭṭhabbataṇhā loke… dhammataṇhā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘རཱུཔཝིཏཀྐོ ལོཀེ… སདྡཝིཏཀྐོ ལོཀེ… གནྡྷཝིཏཀྐོ ལོཀེ… རསཝིཏཀྐོ ལོཀེ… ཕོཊྛབྦཝིཏཀྐོ ལོཀེ… དྷམྨཝིཏཀྐོ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི།

    ‘‘Rūpavitakko loke… saddavitakko loke… gandhavitakko loke… rasavitakko loke… phoṭṭhabbavitakko loke… dhammavitakko loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.

    ‘‘རཱུཔཝིཙཱརོ ལོཀེ… སདྡཝིཙཱརོ ལོཀེ… གནྡྷཝིཙཱརོ ལོཀེ… རསཝིཙཱརོ ལོཀེ… ཕོཊྛབྦཝིཙཱརོ ལོཀེ… དྷམྨཝིཙཱརོ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏི། ཨིདཾ ཝུཙྩཏི, བྷིཀྑཝེ, དུཀྑསམུདཡཾ ཨརིཡསཙྩཾ།

    ‘‘Rūpavicāro loke… saddavicāro loke… gandhavicāro loke… rasavicāro loke… phoṭṭhabbavicāro loke… dhammavicāro loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati. Idaṃ vuccati, bhikkhave, dukkhasamudayaṃ ariyasaccaṃ.

    ནིརོདྷསཙྩནིདྡེསོ

    Nirodhasaccaniddeso

    ༤༠༡. ‘‘ཀཏམཉྩ , བྷིཀྑཝེ, དུཀྑནིརོདྷཾ 33 ཨརིཡསཙྩཾ? ཡོ ཏསྶཱཡེཝ ཏཎྷཱཡ ཨསེསཝིརཱགནིརོདྷོ ཙཱགོ པཊིནིསྶགྒོ མུཏྟི ཨནཱལཡོ།

    401. ‘‘Katamañca , bhikkhave, dukkhanirodhaṃ 34 ariyasaccaṃ? Yo tassāyeva taṇhāya asesavirāganirodho cāgo paṭinissaggo mutti anālayo.

    ‘‘སཱ ཁོ པནེསཱ, བྷིཀྑཝེ, ཏཎྷཱ ཀཏྠ པཧཱིཡམཱནཱ པཧཱིཡཏི, ཀཏྠ ནིརུཛ྄ཛྷམཱནཱ ནིརུཛ྄ཛྷཏི? ཡཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Sā kho panesā, bhikkhave, taṇhā kattha pahīyamānā pahīyati, kattha nirujjhamānā nirujjhati? Yaṃ loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘ཀིཉྩ ལོཀེ པིཡརཱུཔཾ སཱཏརཱུཔཾ? ཙཀྑུ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི། སོཏཾ ལོཀེ…པེ॰… གྷཱནཾ ལོཀེ… ཛིཝ྄ཧཱ ལོཀེ… ཀཱཡོ ལོཀེ… མནོ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Kiñca loke piyarūpaṃ sātarūpaṃ? Cakkhu loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati. Sotaṃ loke…pe… ghānaṃ loke… jivhā loke… kāyo loke… mano loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘རཱུཔཱ ལོཀེ… སདྡཱ ལོཀེ… གནྡྷཱ ལོཀེ… རསཱ ལོཀེ… ཕོཊྛབྦཱ ལོཀེ… དྷམྨཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Rūpā loke… saddā loke… gandhā loke… rasā loke… phoṭṭhabbā loke… dhammā loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘ཙཀྑུཝིཉྙཱཎཾ ལོཀེ… སོཏཝིཉྙཱཎཾ ལོཀེ… གྷཱནཝིཉྙཱཎཾ ལོཀེ… ཛིཝ྄ཧཱཝིཉྙཱཎཾ ལོཀེ… ཀཱཡཝིཉྙཱཎཾ ལོཀེ… མནོཝིཉྙཱཎཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Cakkhuviññāṇaṃ loke… sotaviññāṇaṃ loke… ghānaviññāṇaṃ loke… jivhāviññāṇaṃ loke… kāyaviññāṇaṃ loke… manoviññāṇaṃ loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘ཙཀྑུསམྥསྶོ ལོཀེ… སོཏསམྥསྶོ ལོཀེ… གྷཱནསམྥསྶོ ལོཀེ… ཛིཝ྄ཧཱསམྥསྶོ ལོཀེ… ཀཱཡསམྥསྶོ ལོཀེ… མནོསམྥསྶོ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Cakkhusamphasso loke… sotasamphasso loke… ghānasamphasso loke… jivhāsamphasso loke… kāyasamphasso loke… manosamphasso loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘ཙཀྑུསམྥསྶཛཱ ཝེདནཱ ལོཀེ… སོཏསམྥསྶཛཱ ཝེདནཱ ལོཀེ … གྷཱནསམྥསྶཛཱ ཝེདནཱ ལོཀེ… ཛིཝ྄ཧཱསམྥསྶཛཱ ཝེདནཱ ལོཀེ… ཀཱཡསམྥསྶཛཱ ཝེདནཱ ལོཀེ… མནོསམྥསྶཛཱ ཝེདནཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Cakkhusamphassajā vedanā loke… sotasamphassajā vedanā loke … ghānasamphassajā vedanā loke… jivhāsamphassajā vedanā loke… kāyasamphassajā vedanā loke… manosamphassajā vedanā loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘རཱུཔསཉྙཱ ལོཀེ… སདྡསཉྙཱ ལོཀེ… གནྡྷསཉྙཱ ལོཀེ… རསསཉྙཱ ལོཀེ… ཕོཊྛབྦསཉྙཱ ལོཀེ… དྷམྨསཉྙཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Rūpasaññā loke… saddasaññā loke… gandhasaññā loke… rasasaññā loke… phoṭṭhabbasaññā loke… dhammasaññā loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘རཱུཔསཉྩེཏནཱ ལོཀེ… སདྡསཉྩེཏནཱ ལོཀེ… གནྡྷསཉྩེཏནཱ ལོཀེ… རསསཉྩེཏནཱ ལོཀེ… ཕོཊྛབྦསཉྩེཏནཱ ལོཀེ… དྷམྨསཉྩེཏནཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Rūpasañcetanā loke… saddasañcetanā loke… gandhasañcetanā loke… rasasañcetanā loke… phoṭṭhabbasañcetanā loke… dhammasañcetanā loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘རཱུཔཏཎྷཱ ལོཀེ… སདྡཏཎྷཱ ལོཀེ… གནྡྷཏཎྷཱ ལོཀེ… རསཏཎྷཱ ལོཀེ… ཕོཊྛབྦཏཎྷཱ ལོཀེ… དྷམྨཏཎྷཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Rūpataṇhā loke… saddataṇhā loke… gandhataṇhā loke… rasataṇhā loke… phoṭṭhabbataṇhā loke… dhammataṇhā loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘རཱུཔཝིཏཀྐོ ལོཀེ… སདྡཝིཏཀྐོ ལོཀེ… གནྡྷཝིཏཀྐོ ལོཀེ… རསཝིཏཀྐོ ལོཀེ… ཕོཊྛབྦཝིཏཀྐོ ལོཀེ… དྷམྨཝིཏཀྐོ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི།

    ‘‘Rūpavitakko loke… saddavitakko loke… gandhavitakko loke… rasavitakko loke… phoṭṭhabbavitakko loke… dhammavitakko loke piyarūpaṃ sātarūpaṃ, etthesā taṇhā pahīyamānā pahīyati, ettha nirujjhamānā nirujjhati.

    ‘‘རཱུཔཝིཙཱརོ ལོཀེ… སདྡཝིཙཱརོ ལོཀེ… གནྡྷཝིཙཱརོ ལོཀེ… རསཝིཙཱརོ ལོཀེ… ཕོཊྛབྦཝིཙཱརོ ལོཀེ… དྷམྨཝིཙཱརོ ལོཀེ པིཡརཱུཔཾ སཱཏརཱུཔཾ , ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏི། ཨིདཾ ཝུཙྩཏི, བྷིཀྑཝེ, དུཀྑནིརོདྷཾ ཨརིཡསཙྩཾ།

    ‘‘Rūpavicāro loke… saddavicāro loke… gandhavicāro loke… rasavicāro loke… phoṭṭhabbavicāro loke… dhammavicāro loke piyarūpaṃ sātarūpaṃ , etthesā taṇhā pahīyamānā pahīyati, ettha nirujjhamānā nirujjhati. Idaṃ vuccati, bhikkhave, dukkhanirodhaṃ ariyasaccaṃ.

    མགྒསཙྩནིདྡེསོ

    Maggasaccaniddeso

    ༤༠༢. ‘‘ཀཏམཉྩ, བྷིཀྑཝེ, དུཀྑནིརོདྷགཱམིནཱི པཊིཔདཱ ཨརིཡསཙྩཾ? ཨཡམེཝ ཨརིཡོ ཨཊྛངྒིཀོ མགྒོ སེཡྻཐིདཾ – སམྨཱདིཊྛི སམྨཱསངྐཔྤོ སམྨཱཝཱཙཱ སམྨཱཀམྨནྟོ སམྨཱཨཱཛཱིཝོ སམྨཱཝཱཡཱམོ སམྨཱསཏི སམྨཱསམཱདྷི།

    402. ‘‘Katamañca, bhikkhave, dukkhanirodhagāminī paṭipadā ariyasaccaṃ? Ayameva ariyo aṭṭhaṅgiko maggo seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi.

    ‘‘ཀཏམཱ ཙ, བྷིཀྑཝེ, སམྨཱདིཊྛི? ཡཾ ཁོ, བྷིཀྑཝེ, དུཀྑེ ཉཱཎཾ, དུཀྑསམུདཡེ ཉཱཎཾ, དུཀྑནིརོདྷེ ཉཱཎཾ, དུཀྑནིརོདྷགཱམིནིཡཱ པཊིཔདཱཡ ཉཱཎཾ, ཨཡཾ ཝུཙྩཏི, བྷིཀྑཝེ, སམྨཱདིཊྛི།

    ‘‘Katamā ca, bhikkhave, sammādiṭṭhi? Yaṃ kho, bhikkhave, dukkhe ñāṇaṃ, dukkhasamudaye ñāṇaṃ, dukkhanirodhe ñāṇaṃ, dukkhanirodhagāminiyā paṭipadāya ñāṇaṃ, ayaṃ vuccati, bhikkhave, sammādiṭṭhi.

    ‘‘ཀཏམོ ཙ, བྷིཀྑཝེ, སམྨཱསངྐཔྤོ? ནེཀྑམྨསངྐཔྤོ ཨབྱཱཔཱདསངྐཔྤོ ཨཝིཧིཾསཱསངྐཔྤོ, ཨཡཾ ཝུཙྩཏི བྷིཀྑཝེ, སམྨཱསངྐཔྤོ།

    ‘‘Katamo ca, bhikkhave, sammāsaṅkappo? Nekkhammasaṅkappo abyāpādasaṅkappo avihiṃsāsaṅkappo, ayaṃ vuccati bhikkhave, sammāsaṅkappo.

    ‘‘ཀཏམཱ ཙ, བྷིཀྑཝེ, སམྨཱཝཱཙཱ? མུསཱཝཱདཱ ཝེརམཎཱི 35 པིསུཎཱཡ ཝཱཙཱཡ ཝེརམཎཱི ཕརུསཱཡ ཝཱཙཱཡ ཝེརམཎཱི སམྥཔྤལཱཔཱ ཝེརམཎཱི, ཨཡཾ ཝུཙྩཏི, བྷིཀྑཝེ, སམྨཱཝཱཙཱ།

    ‘‘Katamā ca, bhikkhave, sammāvācā? Musāvādā veramaṇī 36 pisuṇāya vācāya veramaṇī pharusāya vācāya veramaṇī samphappalāpā veramaṇī, ayaṃ vuccati, bhikkhave, sammāvācā.

    ‘‘ཀཏམོ ཙ, བྷིཀྑཝེ, སམྨཱཀམྨནྟོ? པཱཎཱཏིཔཱཏཱ ཝེརམཎཱི ཨདིནྣཱདཱནཱ ཝེརམཎཱི ཀཱམེསུམིཙྪཱཙཱརཱ ཝེརམཎཱི, ཨཡཾ ཝུཙྩཏི, བྷིཀྑཝེ, སམྨཱཀམྨནྟོ།

    ‘‘Katamo ca, bhikkhave, sammākammanto? Pāṇātipātā veramaṇī adinnādānā veramaṇī kāmesumicchācārā veramaṇī, ayaṃ vuccati, bhikkhave, sammākammanto.

    ‘‘ཀཏམོ ཙ, བྷིཀྑཝེ, སམྨཱཨཱཛཱིཝོ? ཨིདྷ, བྷིཀྑཝེ, ཨརིཡསཱཝཀོ མིཙྪཱཨཱཛཱིཝཾ པཧཱཡ སམྨཱཨཱཛཱིཝེན ཛཱིཝིཏཾ ཀཔྤེཏི, ཨཡཾ ཝུཙྩཏི, བྷིཀྑཝེ, སམྨཱཨཱཛཱིཝོ།

    ‘‘Katamo ca, bhikkhave, sammāājīvo? Idha, bhikkhave, ariyasāvako micchāājīvaṃ pahāya sammāājīvena jīvitaṃ kappeti, ayaṃ vuccati, bhikkhave, sammāājīvo.

    ‘‘ཀཏམོ ཙ, བྷིཀྑཝེ, སམྨཱཝཱཡཱམོ? ཨིདྷ, བྷིཀྑཝེ, བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི; ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི; ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི; ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི། ཨཡཾ ཝུཙྩཏི, བྷིཀྑཝེ, སམྨཱཝཱཡཱམོ།

    ‘‘Katamo ca, bhikkhave, sammāvāyāmo? Idha, bhikkhave, bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati; uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati; anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati; uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati. Ayaṃ vuccati, bhikkhave, sammāvāyāmo.

    ‘‘ཀཏམཱ ཙ, བྷིཀྑཝེ, སམྨཱསཏི? ཨིདྷ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ; ཝེདནཱསུ ཝེདནཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ; ཙིཏྟེ ཙིཏྟཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ; དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ། ཨཡཾ ཝུཙྩཏི, བྷིཀྑཝེ, སམྨཱསཏི།

    ‘‘Katamā ca, bhikkhave, sammāsati? Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ; vedanāsu vedanānupassī viharati ātāpī sampajāno satimā vineyya loke abhijjhādomanassaṃ; citte cittānupassī viharati ātāpī sampajāno satimā vineyya loke abhijjhādomanassaṃ; dhammesu dhammānupassī viharati ātāpī sampajāno satimā vineyya loke abhijjhādomanassaṃ. Ayaṃ vuccati, bhikkhave, sammāsati.

    ‘‘ཀཏམོ ཙ, བྷིཀྑཝེ, སམྨཱསམཱདྷི? ཨིདྷ, བྷིཀྑཝེ, བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏི། ཝིཏཀྐཝིཙཱརཱནཾ ཝཱུཔསམཱ ཨཛ྄ཛྷཏྟཾ སམྤསཱདནཾ ཙེཏསོ ཨེཀོདིབྷཱཝཾ ཨཝིཏཀྐཾ ཨཝིཙཱརཾ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏི། པཱིཏིཡཱ ཙ ཝིརཱགཱ ཨུཔེཀྑཀོ ཙ ཝིཧརཏི, སཏོ ཙ སམྤཛཱནོ, སུཁཉྩ ཀཱཡེན པཊིསཾཝེདེཏི, ཡཾ ཏཾ ཨརིཡཱ ཨཱཙིཀྑནྟི ‘ཨུཔེཀྑཀོ སཏིམཱ སུཁཝིཧཱརཱི’ཏི ཏཏིཡཾ ཛྷཱནཾ ཨུཔསམྤཛྫ ཝིཧརཏི། སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ , སམྨཱསམཱདྷི། ཨིདཾ ཝུཙྩཏི, བྷིཀྑཝེ, དུཀྑནིརོདྷགཱམིནཱི པཊིཔདཱ ཨརིཡསཙྩཾ།

    ‘‘Katamo ca, bhikkhave, sammāsamādhi? Idha, bhikkhave, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati. Pītiyā ca virāgā upekkhako ca viharati, sato ca sampajāno, sukhañca kāyena paṭisaṃvedeti, yaṃ taṃ ariyā ācikkhanti ‘upekkhako satimā sukhavihārī’ti tatiyaṃ jhānaṃ upasampajja viharati. Sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati. Ayaṃ vuccati, bhikkhave , sammāsamādhi. Idaṃ vuccati, bhikkhave, dukkhanirodhagāminī paṭipadā ariyasaccaṃ.

    ༤༠༣. ‘‘ཨིཏི ཨཛ྄ཛྷཏྟཾ ཝཱ དྷམྨེསུ དྷམྨཱནུཔསྶཱི ཝིཧརཏི, བཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི, ཨཛ྄ཛྷཏྟབཧིདྡྷཱ ཝཱ དྷམྨེསུ དྷམྨཱནུཔསྶཱི ཝིཧརཏི། སམུདཡདྷམྨཱནུཔསྶཱི ཝཱ དྷམྨེསུ ཝིཧརཏི, ཝཡདྷམྨཱནུཔསྶཱི ཝཱ དྷམྨེསུ ཝིཧརཏི, སམུདཡཝཡདྷམྨཱནུཔསྶཱི ཝཱ དྷམྨེསུ ཝིཧརཏི། ‘ཨཏྠི དྷམྨཱ’ཏི ཝཱ པནསྶ སཏི པཙྩུཔཊྛིཏཱ ཧོཏི ཡཱཝདེཝ ཉཱཎམཏྟཱཡ པཊིསྶཏིམཏྟཱཡ ཨནིསྶིཏོ ཙ ཝིཧརཏི, ན ཙ ཀིཉྩི ལོཀེ ཨུཔཱདིཡཏི། ཨེཝམྤི ཁོ, བྷིཀྑཝེ, བྷིཀྑུ དྷམྨེསུ དྷམྨཱནུཔསྶཱི ཝིཧརཏི ཙཏཱུསུ ཨརིཡསཙྩེསུ།

    403. ‘‘Iti ajjhattaṃ vā dhammesu dhammānupassī viharati, bahiddhā vā dhammesu dhammānupassī viharati, ajjhattabahiddhā vā dhammesu dhammānupassī viharati. Samudayadhammānupassī vā dhammesu viharati, vayadhammānupassī vā dhammesu viharati, samudayavayadhammānupassī vā dhammesu viharati. ‘Atthi dhammā’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati. Evampi kho, bhikkhave, bhikkhu dhammesu dhammānupassī viharati catūsu ariyasaccesu.

    སཙྩཔབྦཾ ནིཊྛིཏཾ།

    Saccapabbaṃ niṭṭhitaṃ.

    དྷམྨཱནུཔསྶནཱ ནིཊྛིཏཱ།

    Dhammānupassanā niṭṭhitā.

    ༤༠༤. ‘‘ཡོ ཧི ཀོཙི, བྷིཀྑཝེ, ཨིམེ ཙཏྟཱརོ སཏིཔཊྛཱནེ ཨེཝཾ བྷཱཝེཡྻ སཏྟཝསྶཱནི, ཏསྶ དྭིནྣཾ ཕལཱནཾ ཨཉྙཏརཾ ཕལཾ པཱཊིཀངྑཾ དིཊྛེཝ དྷམྨེ ཨཉྙཱ; སཏི ཝཱ ཨུཔཱདིསེསེ ཨནཱགཱམིཏཱ།

    404. ‘‘Yo hi koci, bhikkhave, ime cattāro satipaṭṭhāne evaṃ bhāveyya sattavassāni, tassa dvinnaṃ phalānaṃ aññataraṃ phalaṃ pāṭikaṅkhaṃ diṭṭheva dhamme aññā; sati vā upādisese anāgāmitā.

    ‘‘ཏིཊྛནྟུ, བྷིཀྑཝེ, སཏྟཝསྶཱནི། ཡོ ཧི ཀོཙི, བྷིཀྑཝེ, ཨིམེ ཙཏྟཱརོ སཏིཔཊྛཱནེ ཨེཝཾ བྷཱཝེཡྻ ཚ ཝསྶཱནི…པེ॰… པཉྩ ཝསྶཱནི… ཙཏྟཱརི ཝསྶཱནི… ཏཱིཎི ཝསྶཱནི… དྭེ ཝསྶཱནི… ཨེཀཾ ཝསྶཾ… ཏིཊྛཏུ, བྷིཀྑཝེ, ཨེཀཾ ཝསྶཾ། ཡོ ཧི ཀོཙི, བྷིཀྑཝེ, ཨིམེ ཙཏྟཱརོ སཏིཔཊྛཱནེ ཨེཝཾ བྷཱཝེཡྻ སཏྟམཱསཱནི, ཏསྶ དྭིནྣཾ ཕལཱནཾ ཨཉྙཏརཾ ཕལཾ པཱཊིཀངྑཾ དིཊྛེཝ དྷམྨེ ཨཉྙཱ; སཏི ཝཱ ཨུཔཱདིསེསེ ཨནཱགཱམིཏཱ།

    ‘‘Tiṭṭhantu, bhikkhave, sattavassāni. Yo hi koci, bhikkhave, ime cattāro satipaṭṭhāne evaṃ bhāveyya cha vassāni…pe… pañca vassāni… cattāri vassāni… tīṇi vassāni… dve vassāni… ekaṃ vassaṃ… tiṭṭhatu, bhikkhave, ekaṃ vassaṃ. Yo hi koci, bhikkhave, ime cattāro satipaṭṭhāne evaṃ bhāveyya sattamāsāni, tassa dvinnaṃ phalānaṃ aññataraṃ phalaṃ pāṭikaṅkhaṃ diṭṭheva dhamme aññā; sati vā upādisese anāgāmitā.

    ‘‘ཏིཊྛནྟུ , བྷིཀྑཝེ, སཏྟ མཱསཱནི། ཡོ ཧི ཀོཙི, བྷིཀྑཝེ, ཨིམེ ཙཏྟཱརོ སཏིཔཊྛཱནེ ཨེཝཾ བྷཱཝེཡྻ ཚ མཱསཱནི…པེ॰… པཉྩ མཱསཱནི… ཙཏྟཱརི མཱསཱནི… ཏཱིཎི མཱསཱནི … དྭེ མཱསཱནི… ཨེཀཾ མཱསཾ… ཨཌྜྷམཱསཾ… ཏིཊྛཏུ, བྷིཀྑཝེ, ཨཌྜྷམཱསོ། ཡོ ཧི ཀོཙི, བྷིཀྑཝེ, ཨིམེ ཙཏྟཱརོ སཏིཔཊྛཱནེ ཨེཝཾ བྷཱཝེཡྻ སཏྟཱཧཾ, ཏསྶ དྭིནྣཾ ཕལཱནཾ ཨཉྙཏརཾ ཕལཾ པཱཊིཀངྑཾ དིཊྛེཝ དྷམྨེ ཨཉྙཱ; སཏི ཝཱ ཨུཔཱདིསེསེ ཨནཱགཱམིཏཱཏི།

    ‘‘Tiṭṭhantu , bhikkhave, satta māsāni. Yo hi koci, bhikkhave, ime cattāro satipaṭṭhāne evaṃ bhāveyya cha māsāni…pe… pañca māsāni… cattāri māsāni… tīṇi māsāni … dve māsāni… ekaṃ māsaṃ… aḍḍhamāsaṃ… tiṭṭhatu, bhikkhave, aḍḍhamāso. Yo hi koci, bhikkhave, ime cattāro satipaṭṭhāne evaṃ bhāveyya sattāhaṃ, tassa dvinnaṃ phalānaṃ aññataraṃ phalaṃ pāṭikaṅkhaṃ diṭṭheva dhamme aññā; sati vā upādisese anāgāmitāti.

    ༤༠༥. ‘‘ཨེཀཱཡནོ ཨཡཾ, བྷིཀྑཝེ, མགྒོ སཏྟཱནཾ ཝིསུདྡྷིཡཱ སོཀཔརིདེཝཱནཾ སམཏིཀྐམཱཡ དུཀྑདོམནསྶཱནཾ ཨཏྠངྒམཱཡ ཉཱཡསྶ ཨདྷིགམཱཡ ནིབྦཱནསྶ སཙྪིཀིརིཡཱཡ ཡདིདཾ ཙཏྟཱརོ སཏིཔཊྛཱནཱཏི། ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟ’’ནྟི། ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།

    405. ‘‘Ekāyano ayaṃ, bhikkhave, maggo sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya yadidaṃ cattāro satipaṭṭhānāti. Iti yaṃ taṃ vuttaṃ, idametaṃ paṭicca vutta’’nti. Idamavoca bhagavā. Attamanā te bhikkhū bhagavato bhāsitaṃ abhinandunti.

    མཧཱསཏིཔཊྛཱནསུཏྟཾ ནིཊྛིཏཾ ནཝམཾ།

    Mahāsatipaṭṭhānasuttaṃ niṭṭhitaṃ navamaṃ.




    Next: ༡༠. པཱཡཱསིསུཏྟཾ • 10. Pāyāsisuttaṃ




    Footnotes:
    1. བྷདནྟེཏི (སཱི॰ སྱཱ॰ པཱི॰)
    2. bhadanteti (sī. syā. pī.)
    3. ཨེཝམྤི (སཱི॰ སྱཱ॰ པཱི॰)
    4. evampi (sī. syā. pī.)
    5. ཀརཱིསཾ མཏྠལུངྒཾ (ཀ॰)
    6. karīsaṃ matthaluṅgaṃ (ka.)
    7. མཱུཏོལཱི༹ (སྱཱ॰), མུཏོལི (པཱི॰)
    8. mūtoḷī (syā.), mutoli (pī.)
    9. གིཛ྄ཛྷེཧི ཝཱ ཁཛྫམཱནཾ, སུཝཱནེཧི ཝཱ ཁཛྫམཱནཾ, སིགཱལེཧི ཝཱ ཁཛྫམཱནཾ, (སྱཱ॰ པཱི॰)
    10. gijjhehi vā khajjamānaṃ, suvānehi vā khajjamānaṃ, sigālehi vā khajjamānaṃ, (syā. pī.)
    11. ཨཔགཏནྷཱརུསམྦནྡྷཱནི (སྱཱ॰)
    12. ‘‘ཨཉྙེན གོཔྥཀཊྛིཀ’’ནྟི ཨིདཾ སཱི॰ སྱཱ॰ པཱི॰ པོཏྠཀེསུ ནཏྠི
    13. ཨཉྙེན ཀཊཊྛིཀཾ ཨཉྙེན པིཊྛཊྛིཀཾ ཨཉྙེན ཀཎྜཀཊྛིཀཾ ཨཉྙེན ཕཱསུཀཊྛིཀཾ ཨཉྙེན ཨུརཊྛིཀཾ ཨཉྙེན ཨཾསཊྛིཀཾ ཨཉྙེན བཱཧུཊྛིཀཾ (སྱཱ॰)
    14. ཨཉྙེན ཀཊཊྛིཀཾ ཨཉྙེན པིཊྛཊྛིཀཾ ཨཉྙེན ཀཎྜཀཊྛིཀཾ ཨཉྙེན ཕཱསུཀཊྛིཀཾ ཨཉྙེན ཨུརཊྛིཀཾ ཨཉྙེན ཨཾསཊྛིཀཾ ཨཉྙེན བཱཧུཊྛིཀཾ (སྱཱ॰)
    15. apagatanhārusambandhāni (syā.)
    16. ‘‘aññena gopphakaṭṭhika’’nti idaṃ sī. syā. pī. potthakesu natthi
    17. aññena kaṭaṭṭhikaṃ aññena piṭṭhaṭṭhikaṃ aññena kaṇḍakaṭṭhikaṃ aññena phāsukaṭṭhikaṃ aññena uraṭṭhikaṃ aññena aṃsaṭṭhikaṃ aññena bāhuṭṭhikaṃ (syā.)
    18. aññena kaṭaṭṭhikaṃ aññena piṭṭhaṭṭhikaṃ aññena kaṇḍakaṭṭhikaṃ aññena phāsukaṭṭhikaṃ aññena uraṭṭhikaṃ aññena aṃsaṭṭhikaṃ aññena bāhuṭṭhikaṃ (syā.)
    19. བོཛ྄ཛྷངྒཔབྦཾ ནིཊྛིཏཾ, པཋམབྷཱཎཝཱརཾ (སྱཱ॰)
    20. bojjhaṅgapabbaṃ niṭṭhitaṃ, paṭhamabhāṇavāraṃ (syā.)
    21. ཨཔྤིཡེཧི…པེ॰… ཝིཔྤཡོགོ དུཀྑོཏིཔཱཋོ ཙེཝ ཏཾནིདྡེསོ ཙ ཀཏྠཙི ན དིསྶཏི, ཨཊྛཀཐཱཡཾཔི ཏཾསཾཝཎྞནཱ ནཏྠི
    22. པཉྩུཔཱདཱནཀྑནྡྷཱཔི (ཀ॰)
    23. appiyehi…pe… vippayogo dukkhotipāṭho ceva taṃniddeso ca katthaci na dissati, aṭṭhakathāyaṃpi taṃsaṃvaṇṇanā natthi
    24. pañcupādānakkhandhāpi (ka.)
    25. ཨཊྛཀཐཱ ཨོལོཀེཏབྦཱ
    26. aṭṭhakathā oloketabbā
    27. དུཀྑསམུདཡོ (སྱཱ॰)
    28. པོནོབྷཝིཀཱ (སཱི॰ པཱི॰)
    29. ནནྡིརཱགསཧགཏཱ (སཱི॰ སྱཱ॰ པཱི॰)
    30. dukkhasamudayo (syā.)
    31. ponobhavikā (sī. pī.)
    32. nandirāgasahagatā (sī. syā. pī.)
    33. དུཀྑནིརོདྷོ (སྱཱ॰)
    34. dukkhanirodho (syā.)
    35. ཝེརམཎི (ཀ॰)
    36. veramaṇi (ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༩. མཧཱསཏིཔཊྛཱནསུཏྟཝཎྞནཱ • 9. Mahāsatipaṭṭhānasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༩. མཧཱསཏིཔཊྛཱནསུཏྟཝཎྞནཱ • 9. Mahāsatipaṭṭhānasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact