| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
மஹாவிப⁴ங்க³ஸங்க³ஹகதா²வண்ணனா
Mahāvibhaṅgasaṅgahakathāvaṇṇanā
4. ஏவங் ஸோதுஜனங் ஸவனே நியோஜெத்வா யதா²படிஞ்ஞாதங் உத்தரவினிச்ச²யங் த³ஸ்ஸேதுமாஹ ‘‘மேது²ன’’ந்திஆதி³. ‘‘கதி ஆபத்தியோ’’தி அயங் தி³ட்ட²ஸங்ஸந்த³னா, அதி³ட்ட²ஜோதனா, விமதிச்சே²த³னா, அனுமதி, கதே²துகம்யதாபுச்சா²தி பஞ்சன்னங் புச்சா²னங் கதே²துகம்யதாபுச்சா². திஸ்ஸோ ஆபத்தியோ பு²ஸேதி தஸ்ஸா ஸங்கே²பதோ விஸ்ஸஜ்ஜனங்.
4. Evaṃ sotujanaṃ savane niyojetvā yathāpaṭiññātaṃ uttaravinicchayaṃ dassetumāha ‘‘methuna’’ntiādi. ‘‘Kati āpattiyo’’ti ayaṃ diṭṭhasaṃsandanā, adiṭṭhajotanā, vimaticchedanā, anumati, kathetukamyatāpucchāti pañcannaṃ pucchānaṃ kathetukamyatāpucchā. Tisso āpattiyo phuseti tassā saṅkhepato vissajjanaṃ.
5. ஏவங் க³ணனாவஸேன த³ஸ்ஸிதானங் ‘‘ப⁴வே’’திஆதி³ ஸரூபதோ த³ஸ்ஸனங். கெ²த்தேதி திண்ணங் மக்³கா³னங் அஞ்ஞதரஸ்மிங் அல்லோகாஸே திலபீ³ஜமத்தேபி பதே³ஸே. மேது²னங் படிஸேவந்தஸ்ஸ பாராஜிகங் ப⁴வேதி ஸம்ப³ந்தோ⁴. ‘‘து²ல்லச்சய’’ந்தி வுத்தந்தி யோஜனா. ‘‘யேபு⁴ய்யக்கா²யிதே’’தி இத³ங் நித³ஸ்ஸனமத்தங், உபட்³ட⁴க்கா²யிதேபி து²ல்லச்சயஸ்ஸ ஹெட்டா² வுத்தத்தா. வட்டகதே முகே² அபு²ஸந்தங் அங்க³ஜாதங் பவேஸெந்தஸ்ஸ து³க்கடங் வுத்தந்தி யோஜனா.
5. Evaṃ gaṇanāvasena dassitānaṃ ‘‘bhave’’tiādi sarūpato dassanaṃ. Khetteti tiṇṇaṃ maggānaṃ aññatarasmiṃ allokāse tilabījamattepi padese. Methunaṃ paṭisevantassa pārājikaṃ bhaveti sambandho. ‘‘Thullaccaya’’nti vuttanti yojanā. ‘‘Yebhuyyakkhāyite’’ti idaṃ nidassanamattaṃ, upaḍḍhakkhāyitepi thullaccayassa heṭṭhā vuttattā. Vaṭṭakate mukhe aphusantaṃ aṅgajātaṃ pavesentassa dukkaṭaṃ vuttanti yojanā.
6. ‘‘அதி³ன்னங் ஆதி³யந்தோ’’திஆத³யோபி வுத்தனயாயேவ.
6.‘‘Adinnaṃādiyanto’’tiādayopi vuttanayāyeva.
7. பஞ்சமாஸக்³க⁴னே வாபீதி போராணகஸ்ஸ நீலகஹாபணஸ்ஸ சதுத்த²பா⁴க³ஸங்கா²தே பஞ்சமாஸே, தத³க்³க⁴னகே வா. அதி⁴கே வாதி அதிரேகபஞ்சமாஸகே வா தத³க்³க⁴னகே வா. அதி³ன்னே பஞ்சவீஸதியா அவஹாரானங் அஞ்ஞதரேன அவஹடே பராஜயோ ஹோதீதி அத்தோ². மாஸே வா ஊனமாஸே வா தத³க்³க⁴னகே வா து³க்கடங். ததோ மஜ்ஜே²தி பஞ்சமாஸகதோ மஜ்ஜே². பஞ்ச மாஸா ஸமாஹடா, பஞ்சன்னங் மாஸானங் ஸமாஹாரோதி வா பஞ்சமாஸங், பஞ்சமாஸங் அக்³க⁴தீதி பஞ்சமாஸக்³க⁴னங், பஞ்சமாஸஞ்ச பஞ்சமாஸக்³க⁴னஞ்ச பஞ்சமாஸக்³க⁴னங், ஏகதே³ஸஸரூபேகஸேஸோயங், தஸ்மிங். மாஸே வாதி எத்தா²பி மாஸோ ச மாஸக்³க⁴னகஞ்ச மாஸமாஸக்³க⁴னகோதி வத்தப்³பே³ ‘‘மாஸே’’தி ஏகதே³ஸஸரூபேகஸேஸோ, உத்தரபத³லோபோ ச த³ட்ட²ப்³போ³.
7.Pañcamāsagghane vāpīti porāṇakassa nīlakahāpaṇassa catutthabhāgasaṅkhāte pañcamāse, tadagghanake vā. Adhike vāti atirekapañcamāsake vā tadagghanake vā. Adinne pañcavīsatiyā avahārānaṃ aññatarena avahaṭe parājayo hotīti attho. Māse vā ūnamāse vā tadagghanake vā dukkaṭaṃ. Tato majjheti pañcamāsakato majjhe. Pañca māsā samāhaṭā, pañcannaṃ māsānaṃ samāhāroti vā pañcamāsaṃ, pañcamāsaṃ agghatīti pañcamāsagghanaṃ, pañcamāsañca pañcamāsagghanañca pañcamāsagghanaṃ, ekadesasarūpekasesoyaṃ, tasmiṃ. Māse vāti etthāpi māso ca māsagghanakañca māsamāsagghanakoti vattabbe ‘‘māse’’ti ekadesasarūpekaseso, uttarapadalopo ca daṭṭhabbo.
‘‘பஞ்சமாஸக்³க⁴னே’’தி ஸாமஞ்ஞேன வுத்தேபி போராணகஸ்ஸ நீலகஹாபணஸ்ஸேவ சதுத்த²பா⁴க³வஸேன பஞ்சமாஸனியமோ காதப்³போ³. ததா² ஹி ப⁴க³வதா து³தியபாராஜிகங் பஞ்ஞாபெந்தேன பி⁴க்கூ²ஸு பப்³ப³ஜிதங் புராணவோஹாரிகமஹாமத்தங் பி⁴க்கு²ங் ‘‘கித்தகேன வத்து²னா ராஜா மாக³தோ⁴ ஸேனியோ பி³ம்பி³ஸாரோ சோரங் க³ஹெத்வா ஹனதி வா ப³ந்த⁴தி வா பப்³பா³ஜேதி வா’’தி புச்சி²த்வா தேன ‘‘பாதே³ன வா பாதா³ரஹேன வா’’தி வுத்தே தேனேவ பமாணேன அதி³ன்னங் ஆதி³யந்தஸ்ஸ பஞ்ஞத்தங். அட்ட²கதா²யஞ்ச –
‘‘Pañcamāsagghane’’ti sāmaññena vuttepi porāṇakassa nīlakahāpaṇasseva catutthabhāgavasena pañcamāsaniyamo kātabbo. Tathā hi bhagavatā dutiyapārājikaṃ paññāpentena bhikkhūsu pabbajitaṃ purāṇavohārikamahāmattaṃ bhikkhuṃ ‘‘kittakena vatthunā rājā māgadho seniyo bimbisāro coraṃ gahetvā hanati vā bandhati vā pabbājeti vā’’ti pucchitvā tena ‘‘pādena vā pādārahena vā’’ti vutte teneva pamāṇena adinnaṃ ādiyantassa paññattaṃ. Aṭṭhakathāyañca –
‘‘பஞ்சமாஸகோ பாதோ³தி பாளிங் உல்லிங்கி³த்வா ‘ததா³ ராஜக³ஹே வீஸதிமாஸகோ கஹாபணோ ஹோதி, தஸ்மா பஞ்சமாஸகோ பாதோ³’. ஏதேன லக்க²ணேன ஸப்³ப³ஜனபதே³ஸு கஹாபணஸ்ஸ சதுத்தோ² பா⁴கோ³ ‘பாதோ³’தி வேதி³தப்³போ³. ஸோ ச கோ² போராணகஸ்ஸ நீலகஹாபணஸ்ஸ வஸேன, ந இதரேஸங் து³த்³ரதா³மகாதீ³னங். தேன ஹி பாதே³ன அதீதா பு³த்³தா⁴பி பாராஜிகங் பஞ்ஞபேஸுங், அனாக³தாபி பஞ்ஞபெஸ்ஸந்தி. ஸப்³ப³பு³த்³தா⁴னஞ்ஹி பாராஜிகவத்து²ம்ஹி வா பாராஜிகே வா நானத்தங் நத்தி², இமானேவ சத்தாரி பாராஜிகவத்தூ²னி, இமானேவ சத்தாரி பாராஜிகானி, இதோ ஊனங் வா அதிரேகங் வா நத்தி². தஸ்மா ப⁴க³வாபி த⁴னியங் விக³ரஹித்வா பாதே³னேவ து³தியபாராஜிகங் பஞ்ஞபெந்தோ ‘யோ பன பி⁴க்கு² அதி³ன்னங் தெ²ய்யஸங்கா²த’ந்திஆதி³மாஹா’’தி (பாரா॰ அட்ட²॰ 1.88) வுத்தங்.
‘‘Pañcamāsako pādoti pāḷiṃ ulliṅgitvā ‘tadā rājagahe vīsatimāsako kahāpaṇo hoti, tasmā pañcamāsako pādo’. Etena lakkhaṇena sabbajanapadesu kahāpaṇassa catuttho bhāgo ‘pādo’ti veditabbo. So ca kho porāṇakassa nīlakahāpaṇassa vasena, na itaresaṃ dudradāmakādīnaṃ. Tena hi pādena atītā buddhāpi pārājikaṃ paññapesuṃ, anāgatāpi paññapessanti. Sabbabuddhānañhi pārājikavatthumhi vā pārājike vā nānattaṃ natthi, imāneva cattāri pārājikavatthūni, imāneva cattāri pārājikāni, ito ūnaṃ vā atirekaṃ vā natthi. Tasmā bhagavāpi dhaniyaṃ vigarahitvā pādeneva dutiyapārājikaṃ paññapento ‘yo pana bhikkhu adinnaṃ theyyasaṅkhāta’ntiādimāhā’’ti (pārā. aṭṭha. 1.88) vuttaṃ.
ஸாரத்த²தீ³பனியஞ்ச –
Sāratthadīpaniyañca –
‘‘சதுத்தோ² பா⁴கோ³ பாதோ³தி வேதி³தப்³போ³தி இமினாவ ஸப்³ப³ஜனபதே³ஸு கஹாபணஸ்ஸேவ வீஸதிமோ பா⁴கோ³மாஸகோதி இத³ஞ்ச வுத்தமேவ ஹோதீதி த³ட்ட²ப்³ப³ங். போராணஸத்தா²னுரூபங் லக்க²ணஸம்பன்னா உப்பாதி³தா நீலகஹாபணாதி வேதி³தப்³பா³. து³த்³ரதா³மேன உப்பாதி³தோ து³த்³ரதா³மகோ. ஸோ கிர நீலகஹாபணஸ்ஸ திபா⁴க³ங் அக்³க⁴தீ’தி வத்வா ‘யஸ்மிங் பதே³ஸே நீலகஹாபணா ந ஸந்தி, தத்தா²பி நீலகஹாபணவஸேனேவ பரிச்சே²தோ³ காதப்³போ³. கத²ங்? நீலகஹாபணானங் வளஞ்ஜனட்டா²னே ச அவளஞ்ஜனட்டா²னே ச ஸமானஅக்³க⁴வஸேன பவத்தமானங் ப⁴ண்ட³ங் நீலகஹாபணேன ஸமானக்³க⁴ங் க³ஹெத்வா தஸ்ஸ சதுத்த²பா⁴க³க்³க⁴னகங் நீலகஹாபணஸ்ஸ பாத³க்³க⁴னகந்தி பரிச்சி²ந்தி³த்வா வினிச்ச²யோ காதப்³போ³’’தி (ஸாரத்த²॰ டீ॰ 2.88) அயமத்தோ²வ வுத்தோ.
‘‘Catuttho bhāgo pādoti veditabboti imināva sabbajanapadesu kahāpaṇasseva vīsatimo bhāgomāsakoti idañca vuttameva hotīti daṭṭhabbaṃ. Porāṇasatthānurūpaṃ lakkhaṇasampannā uppāditā nīlakahāpaṇāti veditabbā. Dudradāmena uppādito dudradāmako. So kira nīlakahāpaṇassa tibhāgaṃ agghatī’ti vatvā ‘yasmiṃ padese nīlakahāpaṇā na santi, tatthāpi nīlakahāpaṇavaseneva paricchedo kātabbo. Kathaṃ? Nīlakahāpaṇānaṃ vaḷañjanaṭṭhāne ca avaḷañjanaṭṭhāne ca samānaagghavasena pavattamānaṃ bhaṇḍaṃ nīlakahāpaṇena samānagghaṃ gahetvā tassa catutthabhāgagghanakaṃ nīlakahāpaṇassa pādagghanakanti paricchinditvā vinicchayo kātabbo’’ti (sārattha. ṭī. 2.88) ayamatthova vutto.
எத்த² கஹாபணங் நாம கரொந்தா ஸுவண்ணேனபி கரொந்தி ரஜதேனபி தம்பே³னபி ஸுவண்ணரஜததம்ப³மிஸ்ஸகேனபி . தேஸு கதரங் கஹாபணங் நீலகஹாபணந்தி? கேசி தாவ ‘‘ஸுவண்ணகஹாபண’’ந்தி. கேசி ‘‘மிஸ்ஸககஹாபண’’ந்தி. தத்த² ‘‘ஸுவண்ணகஹாபண’’ந்தி வத³ந்தானங் அயமதி⁴ப்பாயோ – பாராஜிகவத்து²னா பாதே³ன ஸப்³ப³த்த² ஏகலக்க²ணேன ப⁴விதப்³ப³ங், காலதே³ஸபரிபோ⁴கா³தி³வஸேன அக்³க⁴னானத்தங் பாத³ஸ்ஸேவ ப⁴விதப்³ப³ங். ப⁴க³வதா ஹி த⁴ம்மிகராஜூஹி ஹனநப³ந்த⁴னபப்³பா³ஜனானுரூபேனேவ அதி³ன்னாதா³னே பாராஜிகங் பஞ்ஞத்தங், ந இதரதா². தஸ்மா ஏஸா ஸப்³ப³தா³ ஸப்³ப³த்த² அப்³யபி⁴சாரீதி ஸுவண்ணமயஸ்ஸ கஹாபணஸ்ஸ சதுத்தே²ன பாதே³ன ப⁴விதப்³ப³ந்தி.
Ettha kahāpaṇaṃ nāma karontā suvaṇṇenapi karonti rajatenapi tambenapi suvaṇṇarajatatambamissakenapi . Tesu kataraṃ kahāpaṇaṃ nīlakahāpaṇanti? Keci tāva ‘‘suvaṇṇakahāpaṇa’’nti. Keci ‘‘missakakahāpaṇa’’nti. Tattha ‘‘suvaṇṇakahāpaṇa’’nti vadantānaṃ ayamadhippāyo – pārājikavatthunā pādena sabbattha ekalakkhaṇena bhavitabbaṃ, kāladesaparibhogādivasena agghanānattaṃ pādasseva bhavitabbaṃ. Bhagavatā hi dhammikarājūhi hananabandhanapabbājanānurūpeneva adinnādāne pārājikaṃ paññattaṃ, na itarathā. Tasmā esā sabbadā sabbattha abyabhicārīti suvaṇṇamayassa kahāpaṇassa catutthena pādena bhavitabbanti.
‘‘மிஸ்ஸககஹாபண’’ந்தி வத³ந்தானங் பன அயமதி⁴ப்பாயோ –
‘‘Missakakahāpaṇa’’nti vadantānaṃ pana ayamadhippāyo –
அட்ட²கதா²யங் –
Aṭṭhakathāyaṃ –
‘‘ததா³ ராஜக³ஹே வீஸதிமாஸகோ கஹாபணோ ஹோதி, தஸ்மா பஞ்சமாஸகோ பாதோ³. ஏதேன லக்க²ணேன ஸப்³ப³ஜனபதே³ஸு கஹாபணஸ்ஸ சதுத்தோ² பா⁴கோ³ ‘பாதோ³’தி வேதி³தப்³போ³. ஸோ ச கோ² போராணகஸ்ஸ நீலகஹாபணஸ்ஸ வஸேன, ந இதரேஸங் து³த்³ரதா³மகாதீ³ன’’ந்தி (பாரா॰ அட்ட²॰ 1.88) –
‘‘Tadā rājagahe vīsatimāsako kahāpaṇo hoti, tasmā pañcamāsako pādo. Etena lakkhaṇena sabbajanapadesu kahāpaṇassa catuttho bhāgo ‘pādo’ti veditabbo. So ca kho porāṇakassa nīlakahāpaṇassa vasena, na itaresaṃ dudradāmakādīna’’nti (pārā. aṭṭha. 1.88) –
வுத்தத்தா, ஸாரத்த²தீ³பனியஞ்ச –
Vuttattā, sāratthadīpaniyañca –
‘‘போராணஸத்தா²னுரூபங் லக்க²ணஸம்பன்னா உப்பாதி³தா நீலகஹாபணாதி வேதி³தப்³பா³’’தி (ஸாரத்த²॰ டீ॰ 2.88) –
‘‘Porāṇasatthānurūpaṃ lakkhaṇasampannā uppāditā nīlakahāpaṇāti veditabbā’’ti (sārattha. ṭī. 2.88) –
வுத்தத்தா ச ‘‘வினயவினிச்ச²யங் பத்வா க³ருகே டா²தப்³ப³’’ந்தி வசனதோ ச மிஸ்ஸககஹாபணோயேவ நீலகஹாபணோ. தத்தே²வ ஹி போராணஸத்த²விஹிதங் லக்க²ணங் தி³ஸ்ஸதி. கத²ங்? பஞ்ச மாஸா ஸுவண்ணஸ்ஸ, ததா² ரஜதஸ்ஸ, த³ஸ மாஸா தம்ப³ஸ்ஸாதி ஏதே வீஸதி மாஸே மிஸ்ஸெத்வா ப³ந்த⁴னத்தா²ய வீஹிமத்தங் லோஹங் பக்கி²பித்வா அக்க²ரானி ச ஹத்தி²ஆதீ³னமஞ்ஞதரஞ்ச ரூபங் த³ஸ்ஸெத்வா கதோ நித்³தோ³ஸத்தா நீலகஹாபணோ நாம ஹோதீதி.
Vuttattā ca ‘‘vinayavinicchayaṃ patvā garuke ṭhātabba’’nti vacanato ca missakakahāpaṇoyeva nīlakahāpaṇo. Tattheva hi porāṇasatthavihitaṃ lakkhaṇaṃ dissati. Kathaṃ? Pañca māsā suvaṇṇassa, tathā rajatassa, dasa māsā tambassāti ete vīsati māse missetvā bandhanatthāya vīhimattaṃ lohaṃ pakkhipitvā akkharāni ca hatthiādīnamaññatarañca rūpaṃ dassetvā kato niddosattā nīlakahāpaṇo nāma hotīti.
ஸிக்கா²பா⁴ஜனவினிச்ச²யே ச கேஸுசி பொத்த²கேஸு ‘‘பாதோ³ நாம பஞ்ச மாஸா ஸுவண்ணஸ்ஸா’’தி புரிமபக்க²வாதீ³னங் மதேன பாடோ² லிகி²தோ. கேஸுசி பொத்த²கேஸு து³தியபக்க²வாதீ³னங் மதேன ‘‘பஞ்ச மாஸா ஹிரஞ்ஞஸ்ஸா’’தி பாடோ² லிகி²தோ. ஸீஹளபா⁴ஸாய போராணகேஹி லிகி²தாய ஸாமணேரஸிக்கா²ய பன –
Sikkhābhājanavinicchaye ca kesuci potthakesu ‘‘pādo nāma pañca māsā suvaṇṇassā’’ti purimapakkhavādīnaṃ matena pāṭho likhito. Kesuci potthakesu dutiyapakkhavādīnaṃ matena ‘‘pañca māsā hiraññassā’’ti pāṭho likhito. Sīhaḷabhāsāya porāṇakehi likhitāya sāmaṇerasikkhāya pana –
‘‘போராணகஸ்ஸ நீலகஹாபணஸ்ஸாதி வுத்தஅட்ட²கதா²வசனஸ்ஸ, போராணகே ரதனஸுத்தாபி⁴தா⁴னகஸுத்தே வுத்தகஹாபணலக்க²ணஸ்ஸ ச அனுரூபதோ ‘ஸுவண்ணரஜததம்பா³னி மிஸ்ஸெத்வா உட்டா²பெத்வா கதகஹாபணங் கஹாபணங் நாமா’தி ச ‘ஸாமணேரானமுபஸம்பன்னானஞ்ச அதி³ன்னாதா³னபாராஜிகவத்து²ம்ஹி கோ விஸேஸோ’தி புச்ச²ங் கத்வா ‘ஸாமணேரானங் த³ஸிகஸுத்தேனாபி பாராஜிகோ ஹோதி, உபஸம்பன்னானங் பன ஸுவண்ணஸ்ஸ வீஸதிவீஹிமத்தேனா’’தி –
‘‘Porāṇakassa nīlakahāpaṇassāti vuttaaṭṭhakathāvacanassa, porāṇake ratanasuttābhidhānakasutte vuttakahāpaṇalakkhaṇassa ca anurūpato ‘suvaṇṇarajatatambāni missetvā uṭṭhāpetvā katakahāpaṇaṃ kahāpaṇaṃ nāmā’ti ca ‘sāmaṇerānamupasampannānañca adinnādānapārājikavatthumhi ko viseso’ti pucchaṃ katvā ‘sāmaṇerānaṃ dasikasuttenāpi pārājiko hoti, upasampannānaṃ pana suvaṇṇassa vīsativīhimattenā’’ti –
ச விஸேஸோ த³ஸ்ஸிதோ.
Ca viseso dassito.
தங் பன ஸுவண்ணமாஸகவஸேன அட்³ட⁴தியமாஸகங் ஹோதி, பஞ்சமாஸகேன ச ப⁴க³வதா பாராஜிகங் பஞ்ஞத்தங். தஸ்மா தஸ்ஸ யதா²வுத்தலக்க²ணஸ்ஸ கஹாபணஸ்ஸ ஸப்³ப³தே³ஸேஸு அலப்³ப⁴மானத்தா ஸப்³ப³தே³ஸஸாதா⁴ரணேன தஸ்ஸ மிஸ்ஸககஹாபணஸ்ஸ பஞ்சமாஸபாத³க்³க⁴னகேன ஸுவண்ணேனேவ பாராஜிகவத்து²ம்ஹி நியமிதே ஸப்³ப³தே³ஸவாஸீனங் உபகாராய ஹோதீதி ஏவங் ஸுவண்ணேனேவ பாராஜிகவத்து²பரிச்சே²தோ³ கதோ. அயமேவ நியமோ ஸீஹளாசரியவாதே³ஹி ஸாரோதி க³ஹிதோ. தஸ்மா ஸிக்கா²க³ருகேஹி ஸப்³ப³த்த² பேஸலேஹி வினயத⁴ரேஹி அயமேவ வினிச்ச²யோ ஸாரதோ பச்சேதப்³போ³. ஹொந்தி செத்த² –
Taṃ pana suvaṇṇamāsakavasena aḍḍhatiyamāsakaṃ hoti, pañcamāsakena ca bhagavatā pārājikaṃ paññattaṃ. Tasmā tassa yathāvuttalakkhaṇassa kahāpaṇassa sabbadesesu alabbhamānattā sabbadesasādhāraṇena tassa missakakahāpaṇassa pañcamāsapādagghanakena suvaṇṇeneva pārājikavatthumhi niyamite sabbadesavāsīnaṃ upakārāya hotīti evaṃ suvaṇṇeneva pārājikavatthuparicchedo kato. Ayameva niyamo sīhaḷācariyavādehi sāroti gahito. Tasmā sikkhāgarukehi sabbattha pesalehi vinayadharehi ayameva vinicchayo sārato paccetabbo. Honti cettha –
‘‘ஹேமரஜததம்பே³ஹி, ஸத்தே² நித்³தி³ட்ட²லக்க²ணங்;
‘‘Hemarajatatambehi, satthe niddiṭṭhalakkhaṇaṃ;
அஹாபெத்வா கதோ வீஸ-மாஸோ நீலகஹாபணோ.
Ahāpetvā kato vīsa-māso nīlakahāpaṇo.
ஹேமபாத³ங் ஸஜ்ஜு²பாத³ங், தம்ப³பாத³த்³வயஞ்ஹி ஸோ;
Hemapādaṃ sajjhupādaṃ, tambapādadvayañhi so;
மிஸ்ஸெத்வா ரூபமப்பெத்வா, காதுங் ஸத்தே²ஸு த³ஸ்ஸிதோ.
Missetvā rūpamappetvā, kātuṃ satthesu dassito.
‘ஏலா’தி வுச்சதே தோ³ஸோ, நித்³தோ³ஸத்தா ததீ²ரிதோ;
‘Elā’ti vuccate doso, niddosattā tathīrito;
தஸ்ஸ பாதோ³ ஸுவண்ணஸ்ஸ, வீஸவீஹக்³க⁴னோ மதோ.
Tassa pādo suvaṇṇassa, vīsavīhagghano mato.
யஸ்மிங் பன பதே³ஸே ஸோ, ந வத்ததி கஹாபணோ;
Yasmiṃ pana padese so, na vattati kahāpaṇo;
வீஸஸோவண்ணவீஹக்³க⁴ங், தப்பாத³க்³க⁴ந்தி வேதி³யங்.
Vīsasovaṇṇavīhagghaṃ, tappādagghanti vediyaṃ.
வீஸஸோவண்ணவீஹக்³க⁴ங், தே²னெந்தா பி⁴க்க²வோ ததோ;
Vīsasovaṇṇavīhagghaṃ, thenentā bhikkhavo tato;
சவந்தி ஸாமஞ்ஞகு³ணா, இச்சாஹு வினயஞ்ஞுனோ’’தி.
Cavanti sāmaññaguṇā, iccāhu vinayaññuno’’ti.
9. ஓபாதந்தி ஆவாடங். து³க்கே² ஜாதேதி யோஜனா.
9.Opātanti āvāṭaṃ. Dukkhe jāteti yojanā.
10. உத்தரிங் த⁴ம்மந்தி எத்த² ‘‘உத்தரிமனுஸ்ஸத⁴ம்ம’’ந்தி வத்தப்³பே³ நிருத்தினயேன மஜ்ஜ²பத³லோபங், நிக்³க³ஹீதாக³மஞ்ச கத்வா ‘‘உத்தரிங் த⁴ம்ம’’ந்தி வுத்தங். உத்தரிமனுஸ்ஸானங் ஜா²யீனஞ்சேவ அரியானஞ்ச த⁴ம்மங் உத்தரிமனுஸ்ஸத⁴ம்மங். அத்துபனாயிகந்தி அத்தனி தங் உபனேதி ‘‘மயி அத்தீ²’’தி ஸமுதா³சரந்தோ, அத்தானங் வா தத்த² உபனேதி ‘‘அஹங் எத்த² ஸந்தி³ஸ்ஸாமீ’’தி ஸமுதா³சரந்தோதி அத்துபனாயிகோ, தங் அத்துபனாயிகங், ஏவங் கத்வா வத³ந்தோதி ஸம்ப³ந்தோ⁴.
10.Uttariṃ dhammanti ettha ‘‘uttarimanussadhamma’’nti vattabbe niruttinayena majjhapadalopaṃ, niggahītāgamañca katvā ‘‘uttariṃ dhamma’’nti vuttaṃ. Uttarimanussānaṃ jhāyīnañceva ariyānañca dhammaṃ uttarimanussadhammaṃ. Attupanāyikanti attani taṃ upaneti ‘‘mayi atthī’’ti samudācaranto, attānaṃ vā tattha upaneti ‘‘ahaṃ ettha sandissāmī’’ti samudācarantoti attupanāyiko, taṃ attupanāyikaṃ, evaṃ katvā vadantoti sambandho.
11. பரியாயேதி ‘‘யோ தே விஹாரே வஸதி, ஸோ பி⁴க்கு² அரஹா’’திஆதி³னா (பரி॰ 287) பரியாயப⁴ணனே. ஞாதேதி யங் உத்³தி³ஸ்ஸ ப⁴ணதி, தஸ்மிங் விஞ்ஞும்ஹி மனுஸ்ஸஜாதிகே அசிரேன ஞாதே. நோ சேதி நோ சே ஜானாதி.
11.Pariyāyeti ‘‘yo te vihāre vasati, so bhikkhu arahā’’tiādinā (pari. 287) pariyāyabhaṇane. Ñāteti yaṃ uddissa bhaṇati, tasmiṃ viññumhi manussajātike acirena ñāte. No ceti no ce jānāti.
இதி உத்தரே லீனத்த²பகாஸனியா
Iti uttare līnatthapakāsaniyā
பாராஜிககதா²வண்ணனா நிட்டி²தா.
Pārājikakathāvaṇṇanā niṭṭhitā.
13. சேதேதி, உபக்கமதி, முச்சதி, ஏவங் அங்க³த்தயே புண்ணே க³ருகங் வுத்தங். த்³வங்கே³ சேதேதி, உபக்கமதி யதி³ ந முச்சதி, ஏவங் அங்க³த்³வயே து²ல்லச்சயந்தி யோஜனா. பயோகே³தி பயோஜெத்வா உபக்கமிதுங் அங்க³ஜாதாமஸனங், பரஸ்ஸ ஆணாபனந்தி ஏவரூபே ஸாஹத்தி²காணத்திகபயோகே³.
13. Ceteti, upakkamati, muccati, evaṃ aṅgattaye puṇṇe garukaṃ vuttaṃ. Dvaṅge ceteti, upakkamati yadi na muccati, evaṃ aṅgadvaye thullaccayanti yojanā. Payogeti payojetvā upakkamituṃ aṅgajātāmasanaṃ, parassa āṇāpananti evarūpe sāhatthikāṇattikapayoge.
14. வுத்தனயேனேவ உபரூபரி பஞ்ஹாபுச்ச²னங் ஞாதுங் ஸக்காதி தங் அவத்துகாமோ ஆஹ ‘‘இதோ பட்டா²யா’’திஆதி³. மயம்பி யதெ³த்த² புப்³பே³ அவுத்தமனுத்தானத்த²ஞ்ச, ததே³வ வண்ணயிஸ்ஸாம.
14. Vuttanayeneva uparūpari pañhāpucchanaṃ ñātuṃ sakkāti taṃ avattukāmo āha ‘‘ito paṭṭhāyā’’tiādi. Mayampi yadettha pubbe avuttamanuttānatthañca, tadeva vaṇṇayissāma.
15. காயேனாதி அத்தனோ காயேன. காயந்தி இத்தி²யா காயங். ஏஸ நயோ ‘‘காயப³த்³த⁴’’ந்தி எத்தா²பி.
15.Kāyenāti attano kāyena. Kāyanti itthiyā kāyaṃ. Esa nayo ‘‘kāyabaddha’’nti etthāpi.
16. அத்தனோ காயேன படிப³த்³தே⁴ன இத்தி²யா காயபடிப³த்³தே⁴ பு²ட்டே² து து³க்கடந்தி யோஜனா.
16. Attano kāyena paṭibaddhena itthiyā kāyapaṭibaddhe phuṭṭhe tu dukkaṭanti yojanā.
17. திஸ்ஸோ ஆபத்தியோ ஸியுந்தி யோஜனா. த்³வின்னங் மக்³கா³னந்தி வச்சமக்³க³பஸ்ஸாவமக்³கா³னங்.
17.Tisso āpattiyo siyunti yojanā. Dvinnaṃ maggānanti vaccamaggapassāvamaggānaṃ.
18. வண்ணாதி³ப⁴ஞ்ஞேதி வண்ணாதி³னா ப⁴ணனே. காயபடிப³த்³தே⁴ வண்ணாதி³னா ப⁴ஞ்ஞே து³க்கடந்தி யோஜனா.
18.Vaṇṇādibhaññeti vaṇṇādinā bhaṇane. Kāyapaṭibaddhe vaṇṇādinā bhaññe dukkaṭanti yojanā.
19. அத்தகாமசரியாயாதி அத்தகாமபாரிசரியாய.
19.Attakāmacariyāyāti attakāmapāricariyāya.
20. பண்ட³கஸ்ஸ ஸந்திகேபி அத்தகாமபாரிசரியாய வண்ணங் வத³தோ தஸ்ஸ பி⁴க்கு²னோதி யோஜனா. திரச்சா²னக³தஸ்ஸாபி ஸந்திகேதி எத்தா²பி ஏஸேவ நயோ.
20. Paṇḍakassa santikepi attakāmapāricariyāya vaṇṇaṃ vadato tassa bhikkhunoti yojanā. Tiracchānagatassāpi santiketi etthāpi eseva nayo.
21. இத்தி²புரிஸானமந்தரே ஸஞ்சரித்தங் ஸஞ்சரணபா⁴வங் ஸமாபன்னே பி⁴க்கு²ம்ஹி படிக்³க³ண்ஹனவீமங்ஸாபச்சாஹரணகத்திகே ஸம்பன்னே தஸ்ஸ பு³தோ⁴ க³ருகங் நித்³தி³ஸேதி யோஜனா.
21. Itthipurisānamantare sañcarittaṃ sañcaraṇabhāvaṃ samāpanne bhikkhumhi paṭiggaṇhanavīmaṃsāpaccāharaṇakattike sampanne tassa budho garukaṃ niddiseti yojanā.
22. த்³வங்க³ஸமாயோகே³தி தீஸ்வேதேஸு த்³வின்னங் அங்கா³னங் யதா²கத²ஞ்சி ஸமாயோகே³. அங்கே³ ஸதி பனேகஸ்மிந்தி திண்ணமேகஸ்மிங் பன அங்கே³ ஸதி.
22.Dvaṅgasamāyogeti tīsvetesu dvinnaṃ aṅgānaṃ yathākathañci samāyoge. Aṅge sati panekasminti tiṇṇamekasmiṃ pana aṅge sati.
24. பயோகே³தி ‘‘அதே³ஸிதவத்து²கங் பமாணாதிக்கந்தங் குடிங், அதே³ஸிதவத்து²கங் மஹல்லகவிஹாரஞ்ச காரெஸ்ஸாமீ’’தி உபகரணத்த²ங் அரஞ்ஞக³மனதோ பட்டா²ய ஸப்³ப³பயோகே³. ஏகபிண்டே³ அனாக³தேதி ஸப்³ப³பரியந்திமங் பிண்ட³ங் ஸந்தா⁴ய வுத்தங்.
24.Payogeti ‘‘adesitavatthukaṃ pamāṇātikkantaṃ kuṭiṃ, adesitavatthukaṃ mahallakavihārañca kāressāmī’’ti upakaraṇatthaṃ araññagamanato paṭṭhāya sabbapayoge. Ekapiṇḍe anāgateti sabbapariyantimaṃ piṇḍaṃ sandhāya vuttaṃ.
25. இத⁴ யோ பி⁴க்கு² அமூலகேன பாராஜிகேன த⁴ம்மேன அனுத்³த⁴ங்ஸேதீதி யோஜனா.
25. Idha yo bhikkhu amūlakena pārājikena dhammena anuddhaṃsetīti yojanā.
26. ஓகாஸங் ந ச காரெத்வாதி ‘‘கரோது மே, ஆயஸ்மா, ஓகாஸங், அஹங் தே வத்துகாமோ’’தி ஏவங் தேன பி⁴க்கு²னா ஓகாஸங் அகாராபெத்வா.
26.Okāsaṃna ca kāretvāti ‘‘karotu me, āyasmā, okāsaṃ, ahaṃ te vattukāmo’’ti evaṃ tena bhikkhunā okāsaṃ akārāpetvā.
28. அஞ்ஞபா⁴கி³யேதி அஞ்ஞபா⁴கி³யபதே³ன உபலக்கி²தஸிக்கா²பதே³. ஏவங் அஞ்ஞத்ரபி ஈதி³ஸேஸு டா²னேஸு அத்தோ² வேதி³தப்³போ³.
28.Aññabhāgiyeti aññabhāgiyapadena upalakkhitasikkhāpade. Evaṃ aññatrapi īdisesu ṭhānesu attho veditabbo.
29. ‘‘ஸமனுபா⁴ஸனாய ஏவா’’தி பத³ச்சே²தோ³. ந படினிஸ்ஸஜந்தி அப்படினிஸ்ஸஜந்தோ.
29. ‘‘Samanubhāsanāya evā’’ti padacchedo. Na paṭinissajanti appaṭinissajanto.
30. ஞத்தியா து³க்கடங் ஆபன்னோ ஸியா, த்³வீஹி கம்மவாசாஹி து²ல்லதங் ஆபன்னோ ஸியா, கம்மவாசாய ஓஸானே க³ருகங் ஆபன்னோ ஸியாதி யோஜனா. ‘‘து²ல்லத’’ந்தி இத³ங் து²ல்லச்சயாபத்திஉபலக்க²ணவசனங்.
30. Ñattiyā dukkaṭaṃ āpanno siyā, dvīhi kammavācāhi thullataṃ āpanno siyā, kammavācāya osāne garukaṃ āpanno siyāti yojanā. ‘‘Thullata’’nti idaṃ thullaccayāpattiupalakkhaṇavacanaṃ.
31. சதூஸு யாவததியகேஸு பட²மே ஆபத்திபரிச்சே²த³ங் த³ஸ்ஸெத்வா இதரேஸங் திண்ணங் தேனபி ஏகபரிச்சே²த³த்தா தத்த² வுத்தனயமேவ தேஸு அதிதி³ஸந்தோ ஆஹ ‘‘பே⁴தா³னுவத்தகே’’திஆதி³.
31. Catūsu yāvatatiyakesu paṭhame āpattiparicchedaṃ dassetvā itaresaṃ tiṇṇaṃ tenapi ekaparicchedattā tattha vuttanayameva tesu atidisanto āha ‘‘bhedānuvattake’’tiādi.
இதி உத்தரே லீனத்த²பகாஸனியா
Iti uttare līnatthapakāsaniyā
ஸங்கா⁴தி³ஸேஸகதா²வண்ணனா நிட்டி²தா.
Saṅghādisesakathāvaṇṇanā niṭṭhitā.
32. அதிரேகசீவரந்தி அனதி⁴ட்டி²தங், அவிகப்பிதங் விகப்பனுபக³பமாணங் சீவரங் லத்³தா⁴ த³ஸாஹங் அதிக்கமந்தோ ஏகமேவ நிஸ்ஸக்³கி³யங் பாசித்தியங் ஆபஜ்ஜதி. திசீவரேன ஏகரத்திம்பி வினா வஸந்தோ ஏகமேவ நிஸ்ஸக்³கி³யங் பாசித்தியங் ஆபஜ்ஜதி. இத³ஞ்ச ஜாதிவஸேன ஏகத்தங் ஸந்தா⁴ய வுத்தங் வத்து²க³ணனாய ஆபத்தீனங் பரிச்சி²ந்தி³தப்³ப³த்தா.
32.Atirekacīvaranti anadhiṭṭhitaṃ, avikappitaṃ vikappanupagapamāṇaṃ cīvaraṃ laddhā dasāhaṃ atikkamanto ekameva nissaggiyaṃ pācittiyaṃ āpajjati. Ticīvarena ekarattimpi vinā vasanto ekameva nissaggiyaṃ pācittiyaṃ āpajjati. Idañca jātivasena ekattaṃ sandhāya vuttaṃ vatthugaṇanāya āpattīnaṃ paricchinditabbattā.
33. க³ஹெத்வாகாலசீவரந்தி அகாலசீவரங் படிக்³க³ஹெத்வா. மாஸந்தி ஸதியா பச்சாஸாய நிக்கி²பிதுங் அனுஞ்ஞாதங் மாஸங். அதிக்கமந்தோதி ஸதியாபி பச்சாஸாய வீதிக்கமந்தோ அந்தோமாஸே அனதி⁴ட்ட²ஹித்வா, அவிகப்பெத்வா வா திங்ஸதி³வஸானி அதிக்கமந்தோ, சீவருப்பாத³தி³வஸங் அருணங் ஆதி³ங் கத்வா ஏகதிங்ஸமங் அருணங் உட்டா²பெந்தோதி அத்தோ². ஏகங் நிஸ்ஸக்³கி³யங் ஆபத்திங் ஆபஜ்ஜதீதி உதீ³ரிதந்தி யோஜனா.
33.Gahetvākālacīvaranti akālacīvaraṃ paṭiggahetvā. Māsanti satiyā paccāsāya nikkhipituṃ anuññātaṃ māsaṃ. Atikkamantoti satiyāpi paccāsāya vītikkamanto antomāse anadhiṭṭhahitvā, avikappetvā vā tiṃsadivasāni atikkamanto, cīvaruppādadivasaṃ aruṇaṃ ādiṃ katvā ekatiṃsamaṃ aruṇaṃ uṭṭhāpentoti attho. Ekaṃ nissaggiyaṃ āpattiṃ āpajjatīti udīritanti yojanā.
34. அஞ்ஞாதிகாய பி⁴க்கு²னியா. யங்கிஞ்சி புராணசீவரந்தி ஏகவாரம்பி பரிபு⁴த்தங் ஸங்கா⁴டிஆதீ³னமஞ்ஞதரங் சீவரங்.
34.Aññātikāya bhikkhuniyā. Yaṃkiñci purāṇacīvaranti ekavārampi paribhuttaṃ saṅghāṭiādīnamaññataraṃ cīvaraṃ.
35. பயோக³ஸ்மிந்தி ‘‘தோ⁴வா’’திஆதி³கே பி⁴க்கு²னோ ஆணத்திகபயோகே³, ஏவங் ஆணத்தாய ச பி⁴க்கு²னியா உத்³த⁴னாதி³கே ஸப்³ப³ஸ்மிங் பயோகே³ ச. ‘‘நிஸ்ஸக்³கி³யாவ பாசித்தி ஹோதீதி நிஸ்ஸக்³கி³யா பாசித்தி ச ஹோதீதி யோஜனா.
35.Payogasminti ‘‘dhovā’’tiādike bhikkhuno āṇattikapayoge, evaṃ āṇattāya ca bhikkhuniyā uddhanādike sabbasmiṃ payoge ca. ‘‘Nissaggiyāva pācitti hotīti nissaggiyā pācitti ca hotīti yojanā.
36. படிக³ண்ஹதோதி எத்த² ‘‘அஞ்ஞத்ர பாரிவத்தகா’’தி யோஜனா.
36.Paṭigaṇhatoti ettha ‘‘aññatra pārivattakā’’ti yojanā.
38. பயோக³ஸ்மிந்தி விஞ்ஞாபனபயோகே³. விஞ்ஞாபிதேதி விஞ்ஞாபிதசீவரே படிலத்³தே⁴.
38.Payogasminti viññāpanapayoge. Viññāpiteti viññāpitacīvare paṭiladdhe.
39. பி⁴க்கூ²தி அச்சி²ன்னசீவரோ வா நட்ட²சீவரோ வா பி⁴க்கு². தது³த்தரிந்தி ஸந்தருத்தரபரமதோ உத்தரிங்.
39.Bhikkhūti acchinnacīvaro vā naṭṭhacīvaro vā bhikkhu. Taduttarinti santaruttaraparamato uttariṃ.
41. பயோகே³தி விகப்பனாபஜ்ஜனபயோகே³.
41.Payogeti vikappanāpajjanapayoge.
42. து³வேதி து³க்கடபாசித்தியவஸேன து³வே ஆபத்தியோ பு²ஸேதி யோஜேதப்³ப³ங்.
42.Duveti dukkaṭapācittiyavasena duve āpattiyo phuseti yojetabbaṃ.
44. பயோகே³தி அனுஞ்ஞாதபயோக³தோ அதிரேகாபி⁴னிப்பா²த³னபயோகே³. லாபே⁴தி சீவரஸ்ஸ படிலாபே⁴.
44.Payogeti anuññātapayogato atirekābhinipphādanapayoge. Lābheti cīvarassa paṭilābhe.
கதி²னவக்³க³வண்ணனா பட²மா.
Kathinavaggavaṇṇanā paṭhamā.
45. கோஸியவக்³க³ஸ்ஸ ஆதீ³ஸு பஞ்சஸு ஸிக்கா²பதே³ஸு த்³வே த்³வே ஆபத்தியோதி யோஜனா. பயோகே³தி கரணகாராபனபயோகே³. லாபே⁴தி கத்வா வா காரெத்வா வா பரினிட்டா²பனே.
45. Kosiyavaggassa ādīsu pañcasu sikkhāpadesu dve dve āpattiyoti yojanā. Payogeti karaṇakārāpanapayoge. Lābheti katvā vā kāretvā vā pariniṭṭhāpane.
46. ‘‘க³ஹெத்வா ஏளகலோமானீ’’தி பத³ச்சே²தோ³. அதிக்கமந்தி அதிக்கமந்தோ.
46. ‘‘Gahetvā eḷakalomānī’’ti padacchedo. Atikkamanti atikkamanto.
47. அஞ்ஞாயாதி அஞ்ஞாதிகாய பி⁴க்கு²னியா. ‘‘தோ⁴வாபேதி ஏளலோமக’’ந்தி பத³ச்சே²தோ³. ஏளலோமகந்தி ஏளகலோமானி. நிருத்தினயேன க-காரஸ்ஸ விபரியாயோ. பயோகே³தி தோ⁴வாபனபயோகே³.
47.Aññāyāti aññātikāya bhikkhuniyā. ‘‘Dhovāpeti eḷalomaka’’nti padacchedo. Eḷalomakanti eḷakalomāni. Niruttinayena ka-kārassa vipariyāyo. Payogeti dhovāpanapayoge.
48. பயோகே³தி படிக்³க³ண்ஹனபயோகே³.
48.Payogeti paṭiggaṇhanapayoge.
49. நானாகாரந்தி நானப்பகாரங். ஸமாபஜ்ஜந்தி ஸமாபஜ்ஜந்தோ பி⁴க்கு². ஸமாபன்னேதி ஸங்வோஹாரே ஸமாபன்னே ஸதி. பயோகே³தி ஸமாபஜ்ஜனபயோகே³.
49.Nānākāranti nānappakāraṃ. Samāpajjanti samāpajjanto bhikkhu. Samāpanneti saṃvohāre samāpanne sati. Payogeti samāpajjanapayoge.
50. பயோகே³தி கயவிக்கயாபஜ்ஜனபயோகே³. தஸ்மிங் கதேதி தஸ்மிங் ப⁴ண்டே³ அத்தனோ ஸந்தகபா⁴வங் நீதே.
50.Payogeti kayavikkayāpajjanapayoge. Tasmiṃ kateti tasmiṃ bhaṇḍe attano santakabhāvaṃ nīte.
கோஸியவக்³க³வண்ணனா து³தியா.
Kosiyavaggavaṇṇanā dutiyā.
51. அதிரேககந்தி அனதி⁴ட்டி²தங், அவிகப்பிதங் வா பத்தங். த³ஸாஹங் அதிக்கமெந்தஸ்ஸ தஸ்ஸ பி⁴க்கு²னோ ஏகாவ நிஸ்ஸக்³கி³யாபத்தி ஹோதீதி யோஜனா.
51.Atirekakanti anadhiṭṭhitaṃ, avikappitaṃ vā pattaṃ. Dasāhaṃ atikkamentassa tassa bhikkhuno ekāva nissaggiyāpatti hotīti yojanā.
52-3. நத்தி² ஏதஸ்ஸ பஞ்ச ப³ந்த⁴னானீதி அபஞ்சப³ந்த⁴னோ, தஸ்மிங், ஊனபஞ்சப³ந்த⁴னே பத்தேதி அத்தோ². பயோகே³தி விஞ்ஞாபனபயோகே³. தஸ்ஸ பத்தஸ்ஸ லாபே⁴ படிலாபே⁴.
52-3. Natthi etassa pañca bandhanānīti apañcabandhano, tasmiṃ, ūnapañcabandhane patteti attho. Payogeti viññāpanapayoge. Tassa pattassa lābhe paṭilābhe.
54. பே⁴ஸஜ்ஜந்தி ஸப்பிஆதி³கங்.
54.Bhesajjanti sappiādikaṃ.
55. பயோகே³தி பரியேஸனபயோகே³.
55.Payogeti pariyesanapayoge.
56. பயோகே³தி அச்சி²ந்த³னஅச்சி²ந்தா³பனபயோகே³. ஹடேதி அச்சி²ந்தி³த்வா க³ஹிதே.
56.Payogeti acchindanaacchindāpanapayoge. Haṭeti acchinditvā gahite.
57. த்³வே பனாபத்தியோ பு²ஸேதி வாயாபனபயோகே³ து³க்கடங், விகப்பனுபக³பச்சி²மசீவரபமாணேன வீதே நிஸ்ஸக்³கி³யந்தி த்³வே ஆபத்தியோ ஆபஜ்ஜதீதி அத்தோ².
57.Dve panāpattiyo phuseti vāyāpanapayoge dukkaṭaṃ, vikappanupagapacchimacīvarapamāṇena vīte nissaggiyanti dve āpattiyo āpajjatīti attho.
58-9. யோ பன பி⁴க்கு² அப்பவாரிதோ அஞ்ஞாதகஸ்ஸேவ தந்தவாயே ஸமேச்ச உபஸங்கமித்வா சீவரே விகப்பங் ஆபஜ்ஜந்தோ ஹோதி. ஸோதி ஸோ பி⁴க்கு². த்³வே ஆபத்தியோ ஆபஜ்ஜதி, ந ஸங்ஸயோதி யோஜனா. பயோகே³தி விகப்பாபஜ்ஜனபயோகே³.
58-9. Yo pana bhikkhu appavārito aññātakasseva tantavāye samecca upasaṅkamitvā cīvare vikappaṃ āpajjanto hoti. Soti so bhikkhu. Dve āpattiyo āpajjati, na saṃsayoti yojanā. Payogeti vikappāpajjanapayoge.
60. அச்சேகஸஞ்ஞிதங் சீவரங் படிக்³க³ஹெத்வாதி யோஜனா. காலந்தி சீவரகாலங்.
60. Accekasaññitaṃ cīvaraṃ paṭiggahetvāti yojanā. Kālanti cīvarakālaṃ.
61. திண்ணமஞ்ஞதரங் வத்த²ந்தி திண்ணங் சீவரானங் அஞ்ஞதரங் சீவரங். க⁴ரேதி அந்தரக⁴ரே. நித³ஹித்வாதி நிக்கி²பித்வா. தேன சீவரேன வினா சா²ரத்ததோ அதி⁴கங் தி³வஸங் யஸ்ஸ ஆரஞ்ஞகஸ்ஸ விஹாரஸ்ஸ கோ³சரகா³மே தங் சீவரங் நிக்கி²த்தங், தம்ஹா விஹாரா அஞ்ஞத்ர வஸந்தோ நிஸ்ஸக்³கி³யங் பு²ஸேதி யோஜனா.
61.Tiṇṇamaññataraṃ vatthanti tiṇṇaṃ cīvarānaṃ aññataraṃ cīvaraṃ. Ghareti antaraghare. Nidahitvāti nikkhipitvā. Tena cīvarena vinā chārattato adhikaṃ divasaṃ yassa āraññakassa vihārassa gocaragāme taṃ cīvaraṃ nikkhittaṃ, tamhā vihārā aññatra vasanto nissaggiyaṃ phuseti yojanā.
62. ஸங்கி⁴கங் லாப⁴ங் பரிணதங் ஜானங் ஜானந்தோ.
62. Saṅghikaṃ lābhaṃ pariṇataṃ jānaṃ jānanto.
63. பயோகே³தி பரிணாமனபயோகே³. ஸப்³ப³த்தா²தி பாராஜிகாதீ³ஸு ஸப்³ப³ஸிக்கா²பதே³ஸு. அப்பனாவாரபரிஹானீதி பரிவாரே பட²மங் வுத்தகத்த²பஞ்ஞத்திவாரஸ்ஸ பரிஹாபனங், இத⁴ அவசனந்தி அத்தோ², தஸ்ஸ வாரஸ்ஸ பரிவாரே ஸப்³ப³பட²மத்தா பட²மங் வத்தப்³ப³பா⁴வேபி தத்த² வத்தப்³ப³ங் பச்சா² க³ண்ஹிதுகாமேன மயா தங் ட²பெத்வா பட²மங் ஆபத்தித³ஸ்ஸனத்த²ங் தத³னந்தரோ கதாபத்திவாரோ பட²மங் வுத்தோதி அதி⁴ப்பாயோ.
63.Payogeti pariṇāmanapayoge. Sabbatthāti pārājikādīsu sabbasikkhāpadesu. Appanāvāraparihānīti parivāre paṭhamaṃ vuttakatthapaññattivārassa parihāpanaṃ, idha avacananti attho, tassa vārassa parivāre sabbapaṭhamattā paṭhamaṃ vattabbabhāvepi tattha vattabbaṃ pacchā gaṇhitukāmena mayā taṃ ṭhapetvā paṭhamaṃ āpattidassanatthaṃ tadanantaro katāpattivāro paṭhamaṃ vuttoti adhippāyo.
பத்தவக்³க³வண்ணனா ததியா.
Pattavaggavaṇṇanā tatiyā.
இதி உத்தரே லீனத்த²பகாஸனியா
Iti uttare līnatthapakāsaniyā
திங்ஸனிஸ்ஸக்³கி³யகதா²வண்ணனா நிட்டி²தா.
Tiṃsanissaggiyakathāvaṇṇanā niṭṭhitā.
64. மனுஸ்ஸுத்தரித⁴ம்மேதி உத்தரிமனுஸ்ஸத⁴ம்மே. அபூ⁴தஸ்மிங் உத்தரிமனுஸ்ஸத⁴ம்மே ஸமுல்லபிதே பராஜயோ பாராஜிகாபத்தி.
64.Manussuttaridhammeti uttarimanussadhamme. Abhūtasmiṃ uttarimanussadhamme samullapite parājayo pārājikāpatti.
65. அமூலந்திமவத்து²னா அமூலகேன பாராஜிகேன த⁴ம்மேன பி⁴க்கு²ங் சோத³னாய க³ரு ஸங்கா⁴தி³ஸேஸோ ஹோதீதி யோஜனா. பரியாயவசனேதி ‘‘யோ தே விஹாரே வஸதீ’’திஆதி³னா (பரி॰ 287) பரியாயேன கத²னே. ஞாதேதி யஸ்ஸ கதே²தி, தஸ்மிங் வசனானந்தரமேவ ஞாதே.
65.Amūlantimavatthunā amūlakena pārājikena dhammena bhikkhuṃ codanāya garu saṅghādiseso hotīti yojanā. Pariyāyavacaneti ‘‘yo te vihāre vasatī’’tiādinā (pari. 287) pariyāyena kathane. Ñāteti yassa katheti, tasmiṃ vacanānantarameva ñāte.
66. நோ சே பன விஜானாதீதி அத² தங் பரியாயேன வுத்தங் வசனானந்தரமேவ ஸசே ந ஜானாதி. ஸமுதா³ஹடந்தி கதி²தங்.
66.Noce pana vijānātīti atha taṃ pariyāyena vuttaṃ vacanānantarameva sace na jānāti. Samudāhaṭanti kathitaṃ.
67. ஓமஸதோ பி⁴க்கு²ஸ்ஸ து³வே ஆபத்தியோ வுத்தா. உபஸம்பன்னங் ஓமஸதோ பாசித்தி ஸியா. இதரங் அனுபஸம்பன்னங் ஓமஸதோ து³க்கடங் ஸியாதி யோஜனா.
67. Omasato bhikkhussa duve āpattiyo vuttā. Upasampannaṃ omasato pācitti siyā. Itaraṃ anupasampannaṃ omasato dukkaṭaṃ siyāti yojanā.
68. பேஸுஞ்ஞஹரணேபி த்³வே ஆபத்தியோ ஹொந்தி.
68. Pesuññaharaṇepi dve āpattiyo honti.
69. பயோகே³தி பத³ஸோ த⁴ம்மங் வாசெந்தஸ்ஸ வசனகிரியாரம்ப⁴தோ பட்டா²ய யாவ பதா³தீ³னங் பரிஸமாபனங், எத்த²ந்தரே அக்க²ருச்சாரணபயோகே³ து³க்கடங். பதா³னங் பரிஸமத்தியங் பாசித்தியங்.
69.Payogeti padaso dhammaṃ vācentassa vacanakiriyārambhato paṭṭhāya yāva padādīnaṃ parisamāpanaṃ, etthantare akkharuccāraṇapayoge dukkaṭaṃ. Padānaṃ parisamattiyaṃ pācittiyaṃ.
70. ‘‘திரத்தா அனுபஸம்பன்னஸஹஸெய்யாயா’’தி பத³ச்சே²தோ³. அனுபஸம்பன்னேன ஸஹஸெய்யா அனுபஸம்பன்னஸஹஸெய்யா, தாய. திரத்தா உத்தரிங் அனுபஸம்பன்னஸஹஸெய்யாயாதி யோஜனா. பயோகே³தி ஸயனத்தா²ய ஸெய்யாபஞ்ஞாபனகாயாவஜ்ஜனாதி³புப்³ப³பயோகே³. பன்னேதி காயபஸாரணலக்க²ணேன ஸயனேன நிபன்னே.
70. ‘‘Tirattā anupasampannasahaseyyāyā’’ti padacchedo. Anupasampannena sahaseyyā anupasampannasahaseyyā, tāya. Tirattā uttariṃ anupasampannasahaseyyāyāti yojanā. Payogeti sayanatthāya seyyāpaññāpanakāyāvajjanādipubbapayoge. Panneti kāyapasāraṇalakkhaṇena sayanena nipanne.
71. யோ பன பி⁴க்கு² ஏகரத்தியங் மாதுகா³மேன ஸஹஸெய்யங் கப்பேதி. து³க்கடாத³யோதி ‘‘பயோகே³ து³க்கடங், நிபன்னே பாசித்திய’’ந்தி யதா²வுத்தத்³வேஆபத்தியோ ஆபஜ்ஜதீதி யோஜனா.
71. Yo pana bhikkhu ekarattiyaṃ mātugāmena sahaseyyaṃ kappeti. Dukkaṭādayoti ‘‘payoge dukkaṭaṃ, nipanne pācittiya’’nti yathāvuttadveāpattiyo āpajjatīti yojanā.
72. பயோகே³தி யதா²வுத்தலக்க²ணபயோகே³.
72.Payogeti yathāvuttalakkhaṇapayoge.
73. அனுபஸம்பன்னேதி ஸமீபத்தே² சேதங் பு⁴ம்மங். அனுபஸம்பன்னஸ்ஸ ஸந்திகே பூ⁴தங் உத்தரிமனுஸ்ஸத⁴ம்மங் யோ ஸசே ஆரோசேதீதி யோஜனா. து³க்கடாத³யோதி யஸ்ஸ ஆரோசேதி, ஸோ நப்படிவிஜானாதி, து³க்கடங், படிவிஜானாதி, பாசித்தியந்தி ஏவங் த்³வே ஆபத்தியோ தஸ்ஸ ஹொந்தி.
73.Anupasampanneti samīpatthe cetaṃ bhummaṃ. Anupasampannassa santike bhūtaṃ uttarimanussadhammaṃ yo sace ārocetīti yojanā. Dukkaṭādayoti yassa āroceti, so nappaṭivijānāti, dukkaṭaṃ, paṭivijānāti, pācittiyanti evaṃ dve āpattiyo tassa honti.
74. அஞ்ஞதோ அஞ்ஞஸ்ஸ உபஸம்பன்னஸ்ஸ து³ட்டு²ல்லஸ்ஸ ஆபத்திங் அனுபஸம்பன்னே அனுபஸம்பன்னஸ்ஸ ஸந்திகே வத³ங் வத³ந்தோதி யோஜனா. பயோகே³தி ஆரம்ப⁴தோ பட்டா²ய புப்³ப³பயோகே³ து³க்கடங் ஆக³ச்ச²தி து³க்கடங் ஆபஜ்ஜதி. ஆரோசிதே பாசித்தி ஸியாதி யோஜனா.
74.Aññato aññassa upasampannassa duṭṭhullassa āpattiṃ anupasampanne anupasampannassa santike vadaṃ vadantoti yojanā. Payogeti ārambhato paṭṭhāya pubbapayoge dukkaṭaṃ āgacchati dukkaṭaṃ āpajjati. Ārocite pācitti siyāti yojanā.
75. பயோகே³தி ‘‘அகப்பியபத²விங் க²ணிஸ்ஸாமீ’’தி குதா³ல பரியேஸனாதி³ஸப்³ப³பயோகே³தி.
75.Payogeti ‘‘akappiyapathaviṃ khaṇissāmī’’ti kudāla pariyesanādisabbapayogeti.
முஸாவாத³வக்³க³வண்ணனா பட²மா.
Musāvādavaggavaṇṇanā paṭhamā.
76. பாதெந்தோதி விகோபெந்தோ. தஸ்ஸாதி பூ⁴தகா³மஸ்ஸ. பாதேதி விகோபனே.
76.Pātentoti vikopento. Tassāti bhūtagāmassa. Pāteti vikopane.
77. அஞ்ஞவாத³கவிஹேஸகானங் ஏகயோக³னித்³தி³ட்ட²த்தா தத்த² வுத்தனயேனேவ விஹேஸகே ச ஞாதுங் ஸக்காதி தத்த² விஸுங் ஆபத்திபே⁴தோ³ ந வுத்தோ.
77. Aññavādakavihesakānaṃ ekayoganiddiṭṭhattā tattha vuttanayeneva vihesake ca ñātuṃ sakkāti tattha visuṃ āpattibhedo na vutto.
78. பரந்தி அஞ்ஞங் ஸங்கே⁴ன ஸம்மதஸேனாஸனபஞ்ஞாபகாதி³கங் உபஸம்பன்னங். உஜ்ஜா²பெந்தோதி தஸ்ஸ அயஸங் உப்பாதே³துகாமதாய பி⁴க்கூ²ஹி அவஜானாபேதுங் ‘‘ச²ந்தா³ய இத்த²ன்னாமோ இத³ங் நாம கரோதீ’’திஆதீ³னி வத்வா அவஞ்ஞாய ஓலோகாபெந்தோ, லாமகதோ வா சிந்தாபெந்தோ. பயோகே³தி உஜ்ஜா²பனத்தா²ய தஸ்ஸ அவண்ணப⁴ணனாதி³கே புப்³ப³பயோகே³.
78.Paranti aññaṃ saṅghena sammatasenāsanapaññāpakādikaṃ upasampannaṃ. Ujjhāpentoti tassa ayasaṃ uppādetukāmatāya bhikkhūhi avajānāpetuṃ ‘‘chandāya itthannāmo idaṃ nāma karotī’’tiādīni vatvā avaññāya olokāpento, lāmakato vā cintāpento. Payogeti ujjhāpanatthāya tassa avaṇṇabhaṇanādike pubbapayoge.
83. ஸங்கி⁴கே விஹாரே புப்³பூ³பக³தங் பி⁴க்கு²ங் ஜானங் ஜானந்தோ அனுபக²ஜ்ஜ ஸெய்யங் கப்பேதி, தஸ்ஸேவங் ஸெய்யங் கப்பயதோதி யோஜனா. பயோகே³து³க்கடாத³யோதி எத்த² அலுத்தஸமாஸோ. ஆதி³-ஸத்³தே³ன ஸெய்யாகப்பனே பாசித்தியங் ஸங்க³ண்ஹாதி.
83. Saṅghike vihāre pubbūpagataṃ bhikkhuṃ jānaṃ jānanto anupakhajja seyyaṃ kappeti, tassevaṃ seyyaṃ kappayatoti yojanā. Payogedukkaṭādayoti ettha aluttasamāso. Ādi-saddena seyyākappane pācittiyaṃ saṅgaṇhāti.
84. பயோகே³தி ‘‘நிக்கட்³ட⁴த² இம’’ந்திஆதி³கே ஆணத்திகே வா ‘‘யாஹி யாஹீ’’திஆதி³கே வாசஸிகே வா ஹத்தே²ன தஸ்ஸ அங்க³பராமஸனாதி³வஸேன கதே காயிகே வா நிக்கட்³ட⁴னபயோகே³. ஸேஸந்தி பாசித்தியங்.
84.Payogeti ‘‘nikkaḍḍhatha ima’’ntiādike āṇattike vā ‘‘yāhi yāhī’’tiādike vācasike vā hatthena tassa aṅgaparāmasanādivasena kate kāyike vā nikkaḍḍhanapayoge. Sesanti pācittiyaṃ.
85. ‘‘வேஹாஸகுடியா உபரீ’’தி பத³ச்சே²தோ³. ஆஹச்சபாத³கேதி எத்த² ‘‘மஞ்சே வா பீடே² வா’’தி ஸேஸோ. ஸீத³ந்தி நிஸீத³ந்தோ. து³க்கடாத³யோதி பயோகே³ து³க்கடங், நிபஜ்ஜாய பாசித்தியந்தி இமா ஆபத்தியோ பு²ஸேதி அத்தோ².
85. ‘‘Vehāsakuṭiyā uparī’’ti padacchedo. Āhaccapādaketi ettha ‘‘mañce vā pīṭhe vā’’ti seso. Sīdanti nisīdanto. Dukkaṭādayoti payoge dukkaṭaṃ, nipajjāya pācittiyanti imā āpattiyo phuseti attho.
86. அஸ்ஸ பஜ்ஜஸ்ஸ பட²மபாத³ங் த³ஸக்க²ரபாத³கங் ச²ந்தோ³விசிதியங் வுத்தகா³தா², ‘‘கா³தா²ச²ந்தோ³ அதீதத்³வய’’ந்தி இமினா ச²ந்தோ³விசிதிலக்க²ணேன கா³தா²ச²ந்த³த்தா அதி⁴ட்டி²த்வா த்³வத்திபரியாயேதி எத்த² அக்க²ரத்³வயங் அதி⁴கங் வுத்தந்தி த³ட்ட²ப்³ப³ங். பயோகே³தி அதி⁴ட்டா²னபயோகே³. அதி⁴ட்டி²தேதி த்³வத்திபரியாயானங் உபரி அதி⁴ட்டா²னே கதே.
86. Assa pajjassa paṭhamapādaṃ dasakkharapādakaṃ chandovicitiyaṃ vuttagāthā, ‘‘gāthāchando atītadvaya’’nti iminā chandovicitilakkhaṇena gāthāchandattā adhiṭṭhitvā dvattipariyāyeti ettha akkharadvayaṃ adhikaṃ vuttanti daṭṭhabbaṃ. Payogeti adhiṭṭhānapayoge. Adhiṭṭhiteti dvattipariyāyānaṃ upari adhiṭṭhāne kate.
87. பயோகே³தி ஸிஞ்சனஸிஞ்சாபனபயோகே³. ஸித்தேதி ஸிஞ்சனகிரியபரியோஸானே.
87.Payogeti siñcanasiñcāpanapayoge. Sitteti siñcanakiriyapariyosāne.
பூ⁴தகா³மவக்³க³வண்ணனா து³தியா.
Bhūtagāmavaggavaṇṇanā dutiyā.
88. து³க்கடங் பு²ஸேதி யோஜனா. ஓவதி³தே பாசித்தி ஸியாதி யோஜனா.
88. Dukkaṭaṃ phuseti yojanā. Ovadite pācitti siyāti yojanā.
89. விபா⁴கோ³யேவ விபா⁴க³தா.
89. Vibhāgoyeva vibhāgatā.
90. அஞ்ஞாதிகாய பி⁴க்கு²னியா அஞ்ஞத்ர பாரிவத்தகா சீவரங் தெ³ந்தோ பி⁴க்கு² து³வே ஆபத்தியோ பு²ஸேதி யோஜனா. பயோகே³தி தா³னபயோகே³.
90.Aññātikāya bhikkhuniyā aññatra pārivattakā cīvaraṃ dento bhikkhu duve āpattiyo phuseti yojanā. Payogeti dānapayoge.
93. ‘‘நாவங் ஏக’’ந்தி பத³ச்சே²தோ³. பயோகே³தி அபி⁴ருஹணபயோகே³. து³க்கடாத³யோதி ஆதி³-ஸத்³தே³ன அபி⁴ருள்ஹே பாசித்தியங் ஸங்க³ண்ஹாதி.
93. ‘‘Nāvaṃ eka’’nti padacchedo. Payogeti abhiruhaṇapayoge. Dukkaṭādayoti ādi-saddena abhiruḷhe pācittiyaṃ saṅgaṇhāti.
94. ‘‘து³வித⁴ங் ஆபத்தி’’ந்தி பத³ச்சே²தோ³.
94. ‘‘Duvidhaṃ āpatti’’nti padacchedo.
96. பி⁴க்கு²னியா ஸத்³தி⁴ங் ரஹோ நிஸஜ்ஜங் கப்பெந்தோ பி⁴க்கு² பயோகே³து³க்கடாத³யோ த்³வேபி ஆபத்தியோ பு²ஸேதி யோஜனா.
96. Bhikkhuniyā saddhiṃ raho nisajjaṃ kappento bhikkhu payogedukkaṭādayo dvepi āpattiyo phuseti yojanā.
ஓவாத³வக்³க³வண்ணனா ததியா.
Ovādavaggavaṇṇanā tatiyā.
97. தது³த்தரிந்தி ததோ பு⁴ஞ்ஜிதுங் அனுஞ்ஞாதஏகதி³வஸதோ உத்தரிங் து³தியதி³வஸதோ பட்டா²ய. அனந்தரஸ்ஸ வக்³க³ஸ்ஸாதி ஓவாத³வக்³க³ஸ்ஸ. நவமேனாதி பி⁴க்கு²னியா பரிபாசிதபிண்ட³பாதஸிக்கா²பதே³ன.
97.Taduttarinti tato bhuñjituṃ anuññātaekadivasato uttariṃ dutiyadivasato paṭṭhāya. Anantarassa vaggassāti ovādavaggassa. Navamenāti bhikkhuniyā paripācitapiṇḍapātasikkhāpadena.
99. த்³வத்திபத்தேதி த்³வத்திபத்தபூரே. தது³த்தரிந்தி த்³வத்திபத்தபூரதோ உத்தரிங். பயோகே³தி படிக்³க³ஹணபயோகே³.
99.Dvattipatteti dvattipattapūre. Taduttarinti dvattipattapūrato uttariṃ. Payogeti paṭiggahaṇapayoge.
101. அபி⁴ஹட்டு²ந்தி அபி⁴ஹரித்வா.
101.Abhihaṭṭhunti abhiharitvā.
102. தஸ்ஸாதி அபி⁴ஹரந்தஸ்ஸ. பிடகேதி வினயபிடகே.
102.Tassāti abhiharantassa. Piṭaketi vinayapiṭake.
103. த³ஸமேபீதி எத்த² ‘‘த³ஸமே அபீ’’தி பத³ச்சே²தோ³.
103.Dasamepīti ettha ‘‘dasame apī’’ti padacchedo.
போ⁴ஜனவக்³க³வண்ணனா சதுத்தா².
Bhojanavaggavaṇṇanā catutthā.
104. அசேலகாதி³னோதி ஆதி³-ஸத்³தே³ன ‘‘பரிப்³பா³ஜகஸ்ஸ வா பரிப்³பா³ஜிகாய வா’’தி (பாசி॰ 270) வுத்தே ஸங்க³ண்ஹாதி. போ⁴ஜனாதி³கந்தி ஆதி³-ஸத்³தே³ன கா²த³னீயங் ஸங்க³ண்ஹாதி. பயோகே³தி ஸஹத்தா² தா³னபயோகே³.
104.Acelakādinoti ādi-saddena ‘‘paribbājakassa vā paribbājikāya vā’’ti (pāci. 270) vutte saṅgaṇhāti. Bhojanādikanti ādi-saddena khādanīyaṃ saṅgaṇhāti. Payogeti sahatthā dānapayoge.
105. தா³பெத்வா வா அதா³பெத்வா வா கிஞ்சி ஆமிஸங். பயோகே³தி உய்யோஜனபயோகே³. தஸ்மிந்தி தஸ்மிங் பி⁴க்கு²ம்ஹி. உய்யோஜிதே பாசித்தி ஸியாதி யோஜனா.
105.Dāpetvā vā adāpetvā vā kiñci āmisaṃ. Payogeti uyyojanapayoge. Tasminti tasmiṃ bhikkhumhi. Uyyojite pācitti siyāti yojanā.
109. உம்மாராதிக்கமேதி இந்த³கீ²லாதிக்கமே.
109.Ummārātikkameti indakhīlātikkame.
110. தது³த்தரிந்தி ததோ பரிச்சி²ன்னரத்திபரியந்ததோ வா பரிச்சி²ன்னபே⁴ஸஜ்ஜபரியந்ததோ வா உத்தரிங்.
110.Taduttarinti tato paricchinnarattipariyantato vā paricchinnabhesajjapariyantato vā uttariṃ.
111. உய்யுத்தங் த³ஸ்ஸனத்தா²ய க³ச்ச²ந்தோ த்³வே ஆபத்தியோ பு²ஸேதி யோஜனா.
111. Uyyuttaṃ dassanatthāya gacchanto dve āpattiyo phuseti yojanā.
அசேலகவக்³க³வண்ணனா பஞ்சமா.
Acelakavaggavaṇṇanā pañcamā.
114. மேரெய்யந்தி மேரயங். நிருத்தினயேன அ-காரஸ்ஸ ஏ-காரோ, ய-காரஸ்ஸ ச த்³வித்தங். மேரய-ஸத்³த³பரியாயோ வா மேரெய்ய-ஸத்³தோ³. முனீதி பி⁴க்கு².
114.Mereyyanti merayaṃ. Niruttinayena a-kārassa e-kāro, ya-kārassa ca dvittaṃ. Meraya-saddapariyāyo vā mereyya-saddo. Munīti bhikkhu.
115. ‘‘பி⁴க்கு² அங்கு³லிபதோதே³னா’’தி பத³ச்சே²தோ³. பயோகே³தி ஹாஸாபனபயோகே³. தஸ்ஸாதி ஹாஸாபெந்தஸ்ஸ.
115. ‘‘Bhikkhu aṅgulipatodenā’’ti padacchedo. Payogeti hāsāpanapayoge. Tassāti hāsāpentassa.
116. கொ³ப்ப²கா ஹெட்டா² உத³கே து³க்கடங். கொ³ப்ப²கதோ உபரி உபரிகொ³ப்ப²கங், உத³கங், தஸ்மிங், கொ³ப்ப²கதோ அதி⁴கப்பமாணே உத³கேதி அத்தோ².
116. Gopphakā heṭṭhā udake dukkaṭaṃ. Gopphakato upari uparigopphakaṃ, udakaṃ, tasmiṃ, gopphakato adhikappamāṇe udaketi attho.
117. அனாத³ரியந்தி புக்³க³லானாத³ரியங், த⁴ம்மானாத³ரியங் வா. பயோகே³தி அனாத³ரியவஸேன பவத்தே காயபயோகே³ வா வசீபயோகே³ வா. கதே அனாத³ரியே.
117.Anādariyanti puggalānādariyaṃ, dhammānādariyaṃ vā. Payogeti anādariyavasena pavatte kāyapayoge vā vacīpayoge vā. Kate anādariye.
118. பயோகே³தி பி⁴ங்ஸாபனபயோகே³.
118.Payogeti bhiṃsāpanapayoge.
119. ஜோதிந்தி அக்³கி³ங். ஸமாத³ஹித்வானாதி ஜாலெத்வா. ‘‘விஸிப்³பெ³ந்தோ’’தி இமினா ப²லூபசாரேன காரணங் வுத்தங். விஸிப்³ப³னகிரியா ஹி ஸமாத³ஹனகிரியாய ப²லந்தி விஸிப்³ப³னகிரியாவோஹாரேன ஸமாத³ஹனகிரியாவ. தஸ்மா விஸிப்³பெ³ந்தோதி எத்த² ஸமாத³ஹந்தோதி அத்தோ². பயோகே³தி ஸமாத³ஹனஸமாத³ஹாபனபயோகே³. விஸீவிதேதி வுத்தனயேன ஸமாத³ஹிதேதி அத்தோ².
119.Jotinti aggiṃ. Samādahitvānāti jāletvā. ‘‘Visibbento’’ti iminā phalūpacārena kāraṇaṃ vuttaṃ. Visibbanakiriyā hi samādahanakiriyāya phalanti visibbanakiriyāvohārena samādahanakiriyāva. Tasmā visibbentoti ettha samādahantoti attho. Payogeti samādahanasamādahāpanapayoge. Visīviteti vuttanayena samādahiteti attho.
120. பயோகே³தி சுண்ணமத்திகாபி⁴ஸங்க²ரணாதி³ஸப்³ப³பயோகே³. இதரந்தி பாசித்தியங்.
120.Payogeti cuṇṇamattikābhisaṅkharaṇādisabbapayoge. Itaranti pācittiyaṃ.
121. திண்ணங் து³ப்³ப³ண்ணகரணானந்தி கங்ஸனீலபத்தனீலகத்³த³மஸங்கா²தானங் திண்ணங் து³ப்³ப³ண்ணகரணானங். ஏகங் அஞ்ஞதரங் அனாதி³ய அத³த்வா. சீவரந்தி நவசீவரங்.
121.Tiṇṇaṃ dubbaṇṇakaraṇānanti kaṃsanīlapattanīlakaddamasaṅkhātānaṃ tiṇṇaṃ dubbaṇṇakaraṇānaṃ. Ekaṃ aññataraṃ anādiya adatvā. Cīvaranti navacīvaraṃ.
122. நத்தி² ஏதஸ்ஸ உத்³தா⁴ரந்தி அனுத்³தா⁴ரோ, தங் அனுத்³தா⁴ரந்தி வத்தப்³பே³ கா³தா²ப³ந்த⁴வஸேன ரஸ்ஸத்தங், அகதபச்சுத்³தா⁴ரந்தி அத்தோ².
122. Natthi etassa uddhāranti anuddhāro, taṃ anuddhāranti vattabbe gāthābandhavasena rassattaṃ, akatapaccuddhāranti attho.
123. அபனிதெ⁴ந்தோதி அபனெத்வா நிதெ⁴ந்தோ நிக்கி²பெந்தோ. பத்தாதி³கந்தி ஆதி³-ஸத்³தே³ன சீவரனிஸீத³னஸூசிக⁴ரகாயப³ந்த⁴னானங் க³ஹணங். பயோகே³தி அபனிதா⁴னபயோகே³. தஸ்மிங் பத்தாதி³கே பஞ்சவிதே⁴ பரிக்கா²ரே. அபனிஹிதே ஸேஸா பாசித்தியாபத்தி ஸியாதி யோஜனா.
123.Apanidhentoti apanetvā nidhento nikkhipento. Pattādikanti ādi-saddena cīvaranisīdanasūcigharakāyabandhanānaṃ gahaṇaṃ. Payogeti apanidhānapayoge. Tasmiṃ pattādike pañcavidhe parikkhāre. Apanihite sesā pācittiyāpatti siyāti yojanā.
ஸுராபானவக்³க³வண்ணனா ச²ட்டா².
Surāpānavaggavaṇṇanā chaṭṭhā.
124. தபோத⁴னோதி பாதிமொக்க²ஸங்வரஸீலஸங்கா²தங் தபோத⁴னமஸ்ஸாதி தபோத⁴னோ, பி⁴க்கு².
124.Tapodhanoti pātimokkhasaṃvarasīlasaṅkhātaṃ tapodhanamassāti tapodhano, bhikkhu.
125. தஸ்மிங் ஓபாதே.
125.Tasmiṃ opāte.
126. மனுஸ்ஸவிக்³க³ஹோ மனுஸ்ஸஸரீரோ. திரச்சா²னக³தோ நாகோ³ வா ஸுபண்ணோ வா. தஸ்ஸ ஓபாதக²ணகஸ்ஸ.
126.Manussaviggaho manussasarīro. Tiracchānagato nāgo vā supaṇṇo vā. Tassa opātakhaṇakassa.
127. படுபு³த்³தி⁴னாதி ஸப்³பே³ஸு ஞெய்யத⁴ம்மேஸு நிபுனஞாணேன ப⁴க³வதா.
127.Paṭubuddhināti sabbesu ñeyyadhammesu nipunañāṇena bhagavatā.
128. பயோகே³தி பரிபோ⁴க³த்தா²ய க³ஹணாதி³கே பயோகே³. தஸ்ஸாதி பி⁴க்கு²ஸ்ஸ.
128.Payogeti paribhogatthāya gahaṇādike payoge. Tassāti bhikkhussa.
129. உக்கோடெந்தோதி உச்சாலெந்தோ யதா²டா²னே டா²துங் அதெ³ந்தோ. பயோகே³தி உக்கோடனபயோகே³. உக்கோடிதே பாசித்தியங் ஸியாதி யோஜனா.
129.Ukkoṭentoti uccālento yathāṭhāne ṭhātuṃ adento. Payogeti ukkoṭanapayoge. Ukkoṭite pācittiyaṃ siyāti yojanā.
130. து³ட்டு²ல்லங் வஜ்ஜகந்தி ஸங்கா⁴தி³ஸேஸாதி³கே. ஏகங் பாசித்தியங் ஆபத்திங் ஆபஜ்ஜதி இதி தீ³பிதந்தி யோஜனா.
130.Duṭṭhullaṃ vajjakanti saṅghādisesādike. Ekaṃ pācittiyaṃ āpattiṃ āpajjati iti dīpitanti yojanā.
131. பயோகே³தி க³ணபரியேஸனாதி³பயோகே³. து³க்கடங் பத்தோ ஸியா து³க்கடாபத்திங் ஆபன்னோ ப⁴வெய்யாதி அத்தோ². ஸேஸாதி பாசித்தியாபத்தி உபஸம்பாதி³தே ஸியா. கா³தா²ப³ந்த⁴வஸேன உபஸக்³க³லோபோ.
131.Payogeti gaṇapariyesanādipayoge. Dukkaṭaṃ patto siyā dukkaṭāpattiṃ āpanno bhaveyyāti attho. Sesāti pācittiyāpatti upasampādite siyā. Gāthābandhavasena upasaggalopo.
132-3. ஜானங் தெ²ய்யஸத்தே²ன ஸஹ ஸங்விதா⁴ய மக்³க³ங் படிபஜ்ஜதோ ச ததே²வ மாதுகா³மேன ஸஹ ஸங்விதா⁴ய மக்³க³ங் படிபஜ்ஜதோ சாதி யோஜனா. பயோகே³தி ஸங்விதா⁴ய க³ந்துங் படிபுச்சா²தி³கரணபயோகே³. படிபன்னேதி மக்³க³படிபன்னே. அனந்தரந்தி அத்³த⁴யோஜனகா³மந்தராதிக்கமனானந்தரங்.
132-3. Jānaṃ theyyasatthena saha saṃvidhāya maggaṃ paṭipajjato ca tatheva mātugāmena saha saṃvidhāya maggaṃ paṭipajjato cāti yojanā. Payogeti saṃvidhāya gantuṃ paṭipucchādikaraṇapayoge. Paṭipanneti maggapaṭipanne. Anantaranti addhayojanagāmantarātikkamanānantaraṃ.
134. ஞத்தியா ஓஸானே து³க்கடங் பு²ஸேதி யோஜனா.
134. Ñattiyā osāne dukkaṭaṃ phuseti yojanā.
135. அகதானுத⁴ம்மேனாதி அனுத⁴ம்மோ வுச்சதி ஆபத்தியா அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா த⁴ம்மேன வினயேன ஸத்து²ஸாஸனேன உக்கி²த்தகஸ்ஸ அனுலோமவத்தங் தி³ஸ்வா கத்வா ஓஸாரணா, ஸோ ஓஸாரணஸங்கா²தோ அனுத⁴ம்மோ யஸ்ஸ ந கதோ, அயங் அகதானுத⁴ம்மோ நாம, தாதி³ஸேன பி⁴க்கு²னா ஸத்³தி⁴ந்தி அத்தோ². ஸம்பு⁴ஞ்ஜந்தோதி ஆமிஸஸம்போ⁴க³ங் கரொந்தோ பி⁴க்கு². பயோகே³தி பு⁴ஞ்ஜிதுங் ஆமிஸபடிக்³க³ஹணாதி³பயோகே³. பு⁴த்தேதி ஸம்பு⁴த்தே, உப⁴யஸம்போ⁴கே³, தத³ஞ்ஞதரே வா கதேதி அத்தோ².
135.Akatānudhammenāti anudhammo vuccati āpattiyā adassane vā appaṭikamme vā pāpikāya diṭṭhiyā appaṭinissagge vā dhammena vinayena satthusāsanena ukkhittakassa anulomavattaṃ disvā katvā osāraṇā, so osāraṇasaṅkhāto anudhammo yassa na kato, ayaṃ akatānudhammo nāma, tādisena bhikkhunā saddhinti attho. Sambhuñjantoti āmisasambhogaṃ karonto bhikkhu. Payogeti bhuñjituṃ āmisapaṭiggahaṇādipayoge. Bhutteti sambhutte, ubhayasambhoge, tadaññatare vā kateti attho.
136. உபலாபெந்தோதி பத்தசீவரஉத்³தே³ஸபரிபுச்ச²னாதி³வஸேன ஸங்க³ண்ஹந்தோ. பயோகே³தி உபலாபனபயோகே³.
136.Upalāpentoti pattacīvarauddesaparipucchanādivasena saṅgaṇhanto. Payogeti upalāpanapayoge.
ஸப்பாணகவக்³க³வண்ணனா ஸத்தமா.
Sappāṇakavaggavaṇṇanā sattamā.
137. ஸஹத⁴ம்மிகந்தி கரணத்தே² உபயோக³வசனங், பஞ்சஹி ஸஹத⁴ம்மிகேஹி ஸிக்கி²தப்³ப³த்தா, தேஸங் வா ஸந்தகத்தா ‘‘ஸஹத⁴ம்மிக’’ந்தி லத்³த⁴னாமேன பு³த்³த⁴பஞ்ஞத்தேன ஸிக்கா²பதே³ன வுச்சமானஸ்ஸாதி அத்தோ². ப⁴ணதோதி ‘‘பி⁴க்கு²ஸ்ஸா’’தி இமினா ஸமானாதி⁴கரணங்.
137.Sahadhammikanti karaṇatthe upayogavacanaṃ, pañcahi sahadhammikehi sikkhitabbattā, tesaṃ vā santakattā ‘‘sahadhammika’’nti laddhanāmena buddhapaññattena sikkhāpadena vuccamānassāti attho. Bhaṇatoti ‘‘bhikkhussā’’ti iminā samānādhikaraṇaṃ.
138. விவண்ணெந்தோதி ‘‘கிங் பனிமேஹி கு²த்³தா³னுகு²த்³த³கேஹி ஸிக்கா²பதே³ஹி உத்³தி³ட்டே²ஹீ’’திஆதி³னா க³ரஹந்தோ. பயோகே³தி ‘‘கிங் இமேஹீ’’திஆதி³னா க³ரஹணவஸேன பவத்தே வசீபயோகே³. விவண்ணிதே க³ரஹிதே.
138.Vivaṇṇentoti ‘‘kiṃ panimehi khuddānukhuddakehi sikkhāpadehi uddiṭṭhehī’’tiādinā garahanto. Payogeti ‘‘kiṃ imehī’’tiādinā garahaṇavasena pavatte vacīpayoge. Vivaṇṇite garahite.
139. மோஹெந்தோதி ‘‘இதா³னேவ கோ² அஹங், ஆவுஸோ, ஜானாமீ’’திஆதி³னா அத்தனோ அஜானநத்தேன ஆபன்னபா⁴வங் தீ³பெத்வா பி⁴க்கு²ங் மோஹெந்தோ, வஞ்செந்தோதி அத்தோ². மோஹேதி மோஹாரோபனகம்மே. அரோபிதே கதே.
139.Mohentoti ‘‘idāneva kho ahaṃ, āvuso, jānāmī’’tiādinā attano ajānanattena āpannabhāvaṃ dīpetvā bhikkhuṃ mohento, vañcentoti attho. Moheti mohāropanakamme. Aropite kate.
140. பி⁴க்கு²ஸ்ஸ குபிதோ பஹாரங் தெ³ந்தோ பு²ஸேதி யோஜனா. பயோகே³தி த³ண்டா³தா³னாதி³பயோகே³.
140. Bhikkhussa kupito pahāraṃ dento phuseti yojanā. Payogeti daṇḍādānādipayoge.
141. பயோகே³தி உக்³கி³ரணபயோகே³. உக்³கி³ரிதேதி உச்சாரிதே.
141.Payogeti uggiraṇapayoge. Uggiriteti uccārite.
142. அமூலேனேவாதி தி³ட்டா²தி³மூலவிரஹிதேனேவ. யோகே³தி ஓகாஸகாராபனாதி³பயோகே³. உத்³த⁴ங்ஸிதேதி சோதி³தே.
142.Amūlenevāti diṭṭhādimūlavirahiteneva. Yogeti okāsakārāpanādipayoge. Uddhaṃsiteti codite.
143. குக்குச்சங் ஜனயந்தோதி ‘‘ஊனவீஸதிவஸ்ஸோ த்வங் மஞ்ஞே உபஸம்பன்னோ’’திஆதி³னா குக்குச்சங் உபத³ஹந்தோ. யோகே³தி குக்குச்சுப்பாத³னபயோகே³. உப்பாதி³தேதி குக்குச்சே உப்பாதி³தே.
143.Kukkuccaṃ janayantoti ‘‘ūnavīsativasso tvaṃ maññe upasampanno’’tiādinā kukkuccaṃ upadahanto. Yogeti kukkuccuppādanapayoge. Uppāditeti kukkucce uppādite.
144. ‘‘திட்ட²ந்தோ உபஸ்ஸுதி’’ந்தி பத³ச்சே²தோ³. ஸுதியா ஸமீபங் உபஸ்ஸுதி, ஸவனூபசாரேதி அத்தோ².
144. ‘‘Tiṭṭhanto upassuti’’nti padacchedo. Sutiyā samīpaṃ upassuti, savanūpacāreti attho.
145. த⁴ம்மிகானங் து கம்மானந்தி த⁴ம்மேன வினயேன ஸத்து²ஸாஸனேன கதானங் அபலோகனாதீ³னங் சதுன்னங் கம்மானங். ததோ புனாதி ச²ந்த³தா³னதோ பச்சா². கீ²யனத⁴ம்மந்தி அத்தனோ அதி⁴ப்பேதபா⁴வவிபா⁴வனமந்தனங். த்³வே பு²ஸே து³க்கடாத³யோதி கீ²யனத⁴ம்மாபஜ்ஜனபயோகே³ து³க்கடங், கீ²யனத⁴ம்மே ஆபன்னே பாசித்தியந்தி ஏவங் து³க்கடாத³யோ த்³வே ஆபத்தியோ ஆபஜ்ஜெய்யாதி அத்தோ².
145.Dhammikānaṃ tu kammānanti dhammena vinayena satthusāsanena katānaṃ apalokanādīnaṃ catunnaṃ kammānaṃ. Tato punāti chandadānato pacchā. Khīyanadhammanti attano adhippetabhāvavibhāvanamantanaṃ. Dve phuse dukkaṭādayoti khīyanadhammāpajjanapayoge dukkaṭaṃ, khīyanadhamme āpanne pācittiyanti evaṃ dukkaṭādayo dve āpattiyo āpajjeyyāti attho.
146. ஸங்கே⁴ ஸங்க⁴மஜ்ஜே². வினிச்ச²யேதி வத்து²தோ ஓதிண்ணவினிச்ச²யே. நிட்ட²ங் அக³தேதி வத்து²ம்ஹி அவினிச்சி²தே, ஞத்திங் ட²பெத்வா கம்மவாசாய வா அபரியோஸிதாய.
146.Saṅghe saṅghamajjhe. Vinicchayeti vatthuto otiṇṇavinicchaye. Niṭṭhaṃ agateti vatthumhi avinicchite, ñattiṃ ṭhapetvā kammavācāya vā apariyositāya.
148. ஸமக்³கே³ன ஸங்கே⁴னாதி ஸமானஸங்வாஸகேன ஸமானஸீமாயங் டி²தேன ஸங்கே⁴ன.
148.Samaggena saṅghenāti samānasaṃvāsakena samānasīmāyaṃ ṭhitena saṅghena.
ஸஹத⁴ம்மிகவக்³க³வண்ணனா அட்ட²மா.
Sahadhammikavaggavaṇṇanā aṭṭhamā.
150. அவிதி³தோ ஹுத்வாதி ரஞ்ஞோ அவிதி³தாக³மனோ ஹுத்வா.
150.Aviditohutvāti rañño aviditāgamano hutvā.
152. ரதனந்தி முத்தாதி³த³ஸவித⁴ங் ரதனங். பயோகே³தி ரதனக்³க³ஹணபயோகே³.
152.Ratananti muttādidasavidhaṃ ratanaṃ. Payogeti ratanaggahaṇapayoge.
153. விகாலேதி மஜ்ஜ²ந்திகாதிக்கமதோ பட்டா²ய அருணே.
153.Vikāleti majjhantikātikkamato paṭṭhāya aruṇe.
155. அட்டி²த³ந்தவிஸாணாபி⁴னிப்³ப³த்தந்தி அட்டி²த³ந்தவிஸாணமயங். பயோகே³தி காராபனபயோகே³.
155.Aṭṭhidantavisāṇābhinibbattanti aṭṭhidantavisāṇamayaṃ. Payogeti kārāpanapayoge.
156. தஸ்மிங் மஞ்சாதி³ம்ஹி காராபிதே ஸேஸா பாசித்தியாபத்தி ஸியாதி யோஜனா.
156. Tasmiṃ mañcādimhi kārāpite sesā pācittiyāpatti siyāti yojanā.
ரதனவக்³க³வண்ணனா நவமா.
Ratanavaggavaṇṇanā navamā.
இதி உத்தரே லீனத்த²பகாஸனியா
Iti uttare līnatthapakāsaniyā
பாசித்தியகதா²வண்ணனா நிட்டி²தா.
Pācittiyakathāvaṇṇanā niṭṭhitā.
159. சதூஸு பாடிதே³ஸனீயேஸுபி அவிஸேஸேன ஆதி³ச்சப³ந்து⁴னா பு³த்³தே⁴ன த்³விதா⁴ ஆபத்தி நித்³தி³ட்டா²தி யோஜனா.
159. Catūsu pāṭidesanīyesupi avisesena ādiccabandhunā buddhena dvidhā āpatti niddiṭṭhāti yojanā.
160. ஸப்³ப³த்தா²தி ஸப்³பே³ஸு சதூஸு.
160.Sabbatthāti sabbesu catūsu.
பாடிதே³ஸனீயகதா²வண்ணனா.
Pāṭidesanīyakathāvaṇṇanā.
161. ஸேகி²யகதா² உத்தானத்தா²யேவ.
161. Sekhiyakathā uttānatthāyeva.
ஸேகி²யகதா²வண்ணனா.
Sekhiyakathāvaṇṇanā.
162. பரிவாரே பட²மங் த³ஸ்ஸிதஸோளஸவாரப்பபே⁴தே³ மஹாவிப⁴ங்கே³ ‘‘பட²மங் பாராஜிகங் கத்த² பஞ்ஞத்த’’ந்திஆதி³ப்பபே⁴தோ³ (பரி॰ 1) கத்த²பஞ்ஞத்திவாரோ , ‘‘மேது²னங் த⁴ம்மங் படிஸேவந்தோ கதி ஆபத்தியோ ஆபஜ்ஜதீ’’திஆதி³ப்பபே⁴தோ³ (பரி॰ 157) கதாபத்திவாரோ, ‘‘மேது²னங் த⁴ம்மங் படிஸேவந்தஸ்ஸ ஆபத்தியோ சதுன்னங் விபத்தீனங் கதி விபத்தியோ ப⁴ஜந்தீ’’திஆதி³ப்பபே⁴தோ³ (பரி॰ 182) விபத்திவாரோ, ‘‘மேது²னங் த⁴ம்மங் படிஸேவந்தஸ்ஸ ஆபத்தியோ ஸத்தன்னங் ஆபத்திக்க²ந்தா⁴னங் கதிஹி ஆபத்திக்க²ந்தே⁴ஹி ஸங்க³ஹிதா’’திஆதி³ப்பபே⁴தோ³ (பரி॰ 182) ஸங்க³ஹவாரோ, ‘‘மேது²னங் த⁴ம்மங் படிஸேவந்தஸ்ஸ ஆபத்தியோ ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்ட²ஹந்தீ’’திஆதி³ப்பபே⁴தோ³ (பரி॰ 184) ஸமுட்டா²னவாரோ, ‘‘மேது²னங் த⁴ம்மங் படிஸேவந்தஸ்ஸ ஆபத்தியோ சதுன்னங் அதி⁴கரணானங் கதமங் அதி⁴கரண’’ந்திஆதி³ப்பபே⁴தோ³ (பரி॰ 185) அதி⁴கரணவாரோ, ‘‘மேது²னங் த⁴ம்மங் படிஸேவந்தஸ்ஸ ஆபத்தியோ ஸத்தன்னங் ஸமதா²னங் கதிஹி ஸமதே²ஹி ஸம்மந்தீ’’திஆதி³ப்பபே⁴தோ³ (பரி॰ 186) ஸமத²வாரோ, தத³னந்தரோ இமேஹி ஸத்தஹி வாரேஹி மிஸ்ஸோ அட்ட²மோ ஸமுச்சயவாரோதி இமேஸு அட்ட²ஸு வாரேஸு ஆதி³பூ⁴தே கத்த²பஞ்ஞத்தினாமதெ⁴ய்யே அப்பனாவாரே ஸங்க³ஹேதப்³பா³னங் நிதா³னாதி³ஸத்தரஸலக்க²ணானங் உப⁴யவிப⁴ங்க³ஸாதா⁴ரணதோ உபரி வக்க²மானத்தா தங் வாரங் ட²பெத்வா தத³னந்தரங் அஸாதா⁴ரணங் கதாபத்திவாரங் ஸேகி²யாவஸானங் பாளிக்கமானுரூபங் த³ஸ்ஸெத்வா தத³னந்தரா விபத்திவாராத³யோ ச² வாரா உப⁴யவிப⁴ங்க³ஸாதா⁴ரணதோ வக்க²மானாதி கத்வா தேபி ட²பெத்வா இமே பச்சயஸத்³தே³ன அயோஜெத்வா த³ஸ்ஸிதா அட்டே²வ வாரா, புன ‘‘மேது²னங் த⁴ம்மங் படிஸேவனபச்சயா பாராஜிகங் கத்த² பஞ்ஞத்த’’ந்திஆதி³னா (பரி॰ 188) பச்சய-ஸத்³த³ங் யோஜெத்வா த³ஸ்ஸிதா அபரே அட்ட² வாரா யோஜிதாதி தத்தா²பி து³தியங் கதாபத்திபச்சயவாரங் இமினா கதாபத்திவாரேன ஏகபரிச்சே²த³ங் கத்வா த³ஸ்ஸேதுமாஹ ‘‘பஞ்ஞத்தா’’திஆதி³. படிஸேவனபச்சயாதி படிஸேவனஹேதுனா.
162. Parivāre paṭhamaṃ dassitasoḷasavārappabhede mahāvibhaṅge ‘‘paṭhamaṃ pārājikaṃ kattha paññatta’’ntiādippabhedo (pari. 1) katthapaññattivāro , ‘‘methunaṃ dhammaṃ paṭisevanto kati āpattiyo āpajjatī’’tiādippabhedo (pari. 157) katāpattivāro, ‘‘methunaṃ dhammaṃ paṭisevantassa āpattiyo catunnaṃ vipattīnaṃ kati vipattiyo bhajantī’’tiādippabhedo (pari. 182) vipattivāro, ‘‘methunaṃ dhammaṃ paṭisevantassa āpattiyo sattannaṃ āpattikkhandhānaṃ katihi āpattikkhandhehi saṅgahitā’’tiādippabhedo (pari. 182) saṅgahavāro, ‘‘methunaṃ dhammaṃ paṭisevantassa āpattiyo channaṃ āpattisamuṭṭhānānaṃ katihi samuṭṭhānehi samuṭṭhahantī’’tiādippabhedo (pari. 184) samuṭṭhānavāro, ‘‘methunaṃ dhammaṃ paṭisevantassa āpattiyo catunnaṃ adhikaraṇānaṃ katamaṃ adhikaraṇa’’ntiādippabhedo (pari. 185) adhikaraṇavāro, ‘‘methunaṃ dhammaṃ paṭisevantassa āpattiyo sattannaṃ samathānaṃ katihi samathehi sammantī’’tiādippabhedo (pari. 186) samathavāro, tadanantaro imehi sattahi vārehi misso aṭṭhamo samuccayavāroti imesu aṭṭhasu vāresu ādibhūte katthapaññattināmadheyye appanāvāre saṅgahetabbānaṃ nidānādisattarasalakkhaṇānaṃ ubhayavibhaṅgasādhāraṇato upari vakkhamānattā taṃ vāraṃ ṭhapetvā tadanantaraṃ asādhāraṇaṃ katāpattivāraṃ sekhiyāvasānaṃ pāḷikkamānurūpaṃ dassetvā tadanantarā vipattivārādayo cha vārā ubhayavibhaṅgasādhāraṇato vakkhamānāti katvā tepi ṭhapetvā ime paccayasaddena ayojetvā dassitā aṭṭheva vārā, puna ‘‘methunaṃ dhammaṃ paṭisevanapaccayā pārājikaṃ kattha paññatta’’ntiādinā (pari. 188) paccaya-saddaṃ yojetvā dassitā apare aṭṭha vārā yojitāti tatthāpi dutiyaṃ katāpattipaccayavāraṃ iminā katāpattivārena ekaparicchedaṃ katvā dassetumāha ‘‘paññattā’’tiādi. Paṭisevanapaccayāti paṭisevanahetunā.
163. அல்லோகாஸப்பவேஸனேதி ஜீவமானஸரீரே திண்ணங் மக்³கா³னங் அஞ்ஞதரஸ்மிங் மக்³கே³ அல்லோகாஸப்பவேஸனே. மதே அக்கா²யிதே வா பி-ஸத்³தே³ன யேபு⁴ய்யஅக்கா²யிதே பவேஸனே பவேஸனநிமித்தங் மேது²னங் த⁴ம்மங் படிஸேவந்தோ பி⁴க்கு² பாராஜிகங் பு²ஸேதி ஸம்ப³ந்தோ⁴.
163.Allokāsappavesaneti jīvamānasarīre tiṇṇaṃ maggānaṃ aññatarasmiṃ magge allokāsappavesane. Mate akkhāyite vā pi-saddena yebhuyyaakkhāyite pavesane pavesananimittaṃ methunaṃ dhammaṃ paṭisevanto bhikkhu pārājikaṃ phuseti sambandho.
164. ததா² யேபு⁴ய்யக்கா²யிதே, உபட்³ட⁴க்கா²யிதே ச மேது²னங் த⁴ம்மங் படிஸேவந்தோ பி⁴க்கு² து²ல்லச்சயங் பு²ஸேதி யோஜனா. வட்டகதே முகே² து³க்கடங் வுத்தந்தி ஸம்ப³ந்தோ⁴. ஜதுமட்ட²கேதி பி⁴க்கு²னியா ஜதுமட்ட²கே தி³ன்னே பாசித்தி வுத்தாதி ஸம்ப³ந்தோ⁴.
164. Tathā yebhuyyakkhāyite, upaḍḍhakkhāyite ca methunaṃ dhammaṃ paṭisevanto bhikkhu thullaccayaṃ phuseti yojanā. Vaṭṭakate mukhe dukkaṭaṃ vuttanti sambandho. Jatumaṭṭhaketi bhikkhuniyā jatumaṭṭhake dinne pācitti vuttāti sambandho.
166. அவஸ்ஸுதஸ்ஸாதி காயஸங்ஸக்³க³ராகே³ன திந்தஸ்ஸ. போஸஸ்ஸாதி க³ஹணகிரியாஸம்ப³ந்தே⁴ ஸாமிவசனங். பி⁴க்கு²னியாதி அத்தஸம்ப³ந்தே⁴ ஸாமிவசனங். ‘‘அத்தனோ’’தி ஸேஸோ. அவஸ்ஸுதேன போஸேன அத்தனோ அத⁴க்க²காதி³க³ஹணங் ஸாதி³யந்தியா ததா² அவஸ்ஸுதாய பி⁴க்கு²னியா பாராஜிகந்தி யோஜனா.
166.Avassutassāti kāyasaṃsaggarāgena tintassa. Posassāti gahaṇakiriyāsambandhe sāmivacanaṃ. Bhikkhuniyāti attasambandhe sāmivacanaṃ. ‘‘Attano’’ti seso. Avassutena posena attano adhakkhakādigahaṇaṃ sādiyantiyā tathā avassutāya bhikkhuniyā pārājikanti yojanā.
167. காயேனாதி அத்தனோ காயேன. காயந்தி மாதுகா³மஸ்ஸ காயங். பு²ஸதோதி காயஸங்ஸக்³க³ராகே³ன பு²ஸதோ. காயேன காயப³த்³த⁴ந்தி எத்தா²பி ஏஸேவ நயோ.
167.Kāyenāti attano kāyena. Kāyanti mātugāmassa kāyaṃ. Phusatoti kāyasaṃsaggarāgena phusato. Kāyena kāyabaddhanti etthāpi eseva nayo.
168. காயேன படிப³த்³தே⁴னாதி அத்தனோ காயபடிப³த்³தே⁴ன. படிப³த்³த⁴ந்தி இத்தி²யா காயபடிப³த்³த⁴ங் பு²ஸந்தஸ்ஸ து³க்கடங். தஸ்ஸ பி⁴க்கு²ஸ்ஸ.
168.Kāyena paṭibaddhenāti attano kāyapaṭibaddhena. Paṭibaddhanti itthiyā kāyapaṭibaddhaṃ phusantassa dukkaṭaṃ. Tassa bhikkhussa.
‘‘மஹாவிப⁴ங்க³ஸங்க³ஹோ நிட்டி²தோ’’தி கஸ்மா வுத்தங், நனு ஸோளஸவாரஸங்க³ஹே மஹாவிப⁴ங்கே³ கதாபத்திவாரோயேவெத்த² வுத்தோ, ந இதரே வாராதி? ஸச்சங், அவயவே பன ஸமுதா³யோபசாரேன வுத்தங். ஸாதா⁴ரணாஸாதா⁴ரணானங் மஹாவிப⁴ங்கே³ க³தானங் ஸப்³பா³பத்திபபே⁴தா³னங் த³ஸ்ஸனோபசாரபூ⁴தோ கதாபத்திவாரோ த³ஸ்ஸிதோதி தங்த³ஸ்ஸனேன அப்பதா⁴னா இதரேபி வாரா உபசாரதோ த³ஸ்ஸிதா ஹொந்தீதி ச ததா² வுத்தந்தி வேதி³தப்³ப³ங்.
‘‘Mahāvibhaṅgasaṅgaho niṭṭhito’’ti kasmā vuttaṃ, nanu soḷasavārasaṅgahe mahāvibhaṅge katāpattivāroyevettha vutto, na itare vārāti? Saccaṃ, avayave pana samudāyopacārena vuttaṃ. Sādhāraṇāsādhāraṇānaṃ mahāvibhaṅge gatānaṃ sabbāpattipabhedānaṃ dassanopacārabhūto katāpattivāro dassitoti taṃdassanena appadhānā itarepi vārā upacārato dassitā hontīti ca tathā vuttanti veditabbaṃ.
இதி உத்தரே லீனத்த²பகாஸனியா
Iti uttare līnatthapakāsaniyā
மஹாவிப⁴ங்க³ஸங்க³ஹவண்ணனா நிட்டி²தா.
Mahāvibhaṅgasaṅgahavaṇṇanā niṭṭhitā.
