| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. மஜ்ஜே²ஸுத்தவண்ணனா
7. Majjhesuttavaṇṇanā
61. ஸத்தமே பாராயனே மெத்தெய்யபஞ்ஹேதி பாராயனஸமாக³மம்ஹி மெத்தெய்யமாணவஸ்ஸ பஞ்ஹே. உபொ⁴ந்தே விதி³த்வானாதி த்³வே அந்தே த்³வே கொட்டா²ஸே ஜானித்வா. மஜ்ஜே² மந்தா ந லிப்பதீதி மந்தா வுச்சதி பஞ்ஞா, தாய உபோ⁴ அந்தே விதி³த்வா மஜ்ஜே² ந லிப்பதி, வேமஜ்ஜெ²ட்டா²னே ந லிப்பதி. ஸிப்³ப³னிமச்சகா³தி ஸிப்³ப³னிஸங்கா²தங் தண்ஹங் அதீதோ. ப²ஸ்ஸோதி ப²ஸ்ஸவஸேன நிப்³ப³த்தத்தா அயங் அத்தபா⁴வோ. ஏகோ அந்தோதி அயமேகோ கொட்டா²ஸோ. ப²ஸ்ஸஸமுத³யோதி ப²ஸ்ஸோ ஸமுத³யோ அஸ்ஸாதி ப²ஸ்ஸஸமுத³யோ, இமஸ்மிங் அத்தபா⁴வே கதகம்மப²ஸ்ஸபச்சயா நிப்³ப³த்தோ அனாக³தத்தபா⁴வோ. து³தியோ அந்தோதி து³தியோ கொட்டா²ஸோ. ப²ஸ்ஸனிரோதோ⁴தி நிப்³பா³னங். மஜ்ஜே²தி ஸிப்³பி³னிதண்ஹங் செ²த்வா த்³விதா⁴கரணட்டே²ன நிப்³பா³னங் மஜ்ஜே² நாம ஹோதி. தண்ஹா ஹி நங் ஸிப்³ப³தீதி தண்ஹா நங் அத்தபா⁴வத்³வயஸங்கா²தங் ப²ஸ்ஸஞ்ச ப²ஸ்ஸஸமுத³யஞ்ச ஸிப்³ப³தி க⁴ட்டேதி. கிங் காரணா? தஸ்ஸ தஸ்ஸேவ ப⁴வஸ்ஸ அபி⁴னிப்³ப³த்தியா. யதி³ ஹி தண்ஹா ந ஸிப்³பெ³ய்ய, தஸ்ஸ தஸ்ஸ ப⁴வஸ்ஸ நிப்³ப³த்தி ந ப⁴வெய்ய. இமஸ்மிங் டா²னே கோடிமஜ்ஜி²கூபமங் க³ண்ஹந்தி. த்³வின்னஞ்ஹி கண்டா³னங் ஏகதோ கத்வா மஜ்ஜே² ஸுத்தேன ஸங்ஸிப்³பி³தானங் கோடி மஜ்ஜ²ந்தி வுச்சதி. ஸுத்தே சி²ன்னே உபோ⁴ கண்டா³னி உப⁴தோ பதந்தி. ஏவமெத்த² கண்ட³த்³வயங் விய வுத்தப்பகாரா த்³வே அந்தா, ஸிப்³பி³த்வா டி²தஸுத்தங் விய தண்ஹா, ஸுத்தே சி²ன்னே கண்ட³த்³வயஸ்ஸ உப⁴தோபதனங் விய தண்ஹாய நிருத்³தா⁴ய அந்தத்³வயங் நிருத்³த⁴மேவ ஹோதி. எத்தாவதாதி எத்தகேன இமினா உபோ⁴ அந்தே விதி³த்வா தண்ஹாய மஜ்ஜே² அனுபலித்தபா⁴வேன அபி⁴ஞ்ஞெய்யங் சதுஸச்சத⁴ம்மங் அபி⁴ஜானாதி நாம, தீரணபரிஞ்ஞாய ச பஹானபரிஞ்ஞாய ச பரிஜானிதப்³ப³ங் லோகியஸச்சத்³வயங் பரிஜானாதி நாம. தி³ட்டே²வ த⁴ம்மேதி இமஸ்மிங்யேவ அத்தபா⁴வே. து³க்க²ஸ்ஸந்தகரோ ஹோதீதி வட்டது³க்க²ஸ்ஸ கோடிகரோ பரிச்சே²த³பரிவடுமகரோ ஹோதி நாம.
61. Sattame pārāyane metteyyapañheti pārāyanasamāgamamhi metteyyamāṇavassa pañhe. Ubhonte viditvānāti dve ante dve koṭṭhāse jānitvā. Majjhe mantā na lippatīti mantā vuccati paññā, tāya ubho ante viditvā majjhe na lippati, vemajjheṭṭhāne na lippati. Sibbanimaccagāti sibbanisaṅkhātaṃ taṇhaṃ atīto. Phassoti phassavasena nibbattattā ayaṃ attabhāvo. Eko antoti ayameko koṭṭhāso. Phassasamudayoti phasso samudayo assāti phassasamudayo, imasmiṃ attabhāve katakammaphassapaccayā nibbatto anāgatattabhāvo. Dutiyo antoti dutiyo koṭṭhāso. Phassanirodhoti nibbānaṃ. Majjheti sibbinitaṇhaṃ chetvā dvidhākaraṇaṭṭhena nibbānaṃ majjhe nāma hoti. Taṇhā hinaṃ sibbatīti taṇhā naṃ attabhāvadvayasaṅkhātaṃ phassañca phassasamudayañca sibbati ghaṭṭeti. Kiṃ kāraṇā? Tassa tasseva bhavassa abhinibbattiyā. Yadi hi taṇhā na sibbeyya, tassa tassa bhavassa nibbatti na bhaveyya. Imasmiṃ ṭhāne koṭimajjhikūpamaṃ gaṇhanti. Dvinnañhi kaṇḍānaṃ ekato katvā majjhe suttena saṃsibbitānaṃ koṭi majjhanti vuccati. Sutte chinne ubho kaṇḍāni ubhato patanti. Evamettha kaṇḍadvayaṃ viya vuttappakārā dve antā, sibbitvā ṭhitasuttaṃ viya taṇhā, sutte chinne kaṇḍadvayassa ubhatopatanaṃ viya taṇhāya niruddhāya antadvayaṃ niruddhameva hoti. Ettāvatāti ettakena iminā ubho ante viditvā taṇhāya majjhe anupalittabhāvena abhiññeyyaṃ catusaccadhammaṃ abhijānāti nāma, tīraṇapariññāya ca pahānapariññāya ca parijānitabbaṃ lokiyasaccadvayaṃ parijānāti nāma. Diṭṭhevadhammeti imasmiṃyeva attabhāve. Dukkhassantakaro hotīti vaṭṭadukkhassa koṭikaro paricchedaparivaṭumakaro hoti nāma.
து³தியவாரே திண்ணங் கண்டா³னங் வஸேன உபமா வேதி³தப்³பா³. திண்ணஞ்ஹி கண்டா³னங் ஸுத்தேன ஸங்ஸிப்³பி³தானங் ஸுத்தே சி²ன்னே தீணி கண்டா³னி தீஸு டா²னேஸு பதந்தி, ஏவமெத்த² கண்ட³த்தயங் விய அதீதானாக³தபச்சுப்பன்னா க²ந்தா⁴, ஸுத்தங் விய தண்ஹா. ஸா ஹி அதீதங் பச்சுப்பன்னேன, பச்சுப்பன்னஞ்ச அனாக³தேன ஸத்³தி⁴ங் ஸங்ஸிப்³ப³தி. ஸுத்தே சி²ன்னே கண்ட³த்தயஸ்ஸ தீஸு டா²னேஸு பதனங் விய தண்ஹாய நிருத்³தா⁴ய அதீதானாக³தபச்சுப்பன்னா க²ந்தா⁴ நிருத்³தா⁴வ ஹொந்தி.
Dutiyavāre tiṇṇaṃ kaṇḍānaṃ vasena upamā veditabbā. Tiṇṇañhi kaṇḍānaṃ suttena saṃsibbitānaṃ sutte chinne tīṇi kaṇḍāni tīsu ṭhānesu patanti, evamettha kaṇḍattayaṃ viya atītānāgatapaccuppannā khandhā, suttaṃ viya taṇhā. Sā hi atītaṃ paccuppannena, paccuppannañca anāgatena saddhiṃ saṃsibbati. Sutte chinne kaṇḍattayassa tīsu ṭhānesu patanaṃ viya taṇhāya niruddhāya atītānāgatapaccuppannā khandhā niruddhāva honti.
ததியவாரே அது³க்க²மஸுகா² மஜ்ஜே²தி த்³வின்னங் வேத³னானங் அந்தரட்ட²கபா⁴வேன மஜ்ஜே². ஸுக²ஞ்ஹி து³க்க²ஸ்ஸ, து³க்க²ங் வா ஸுக²ஸ்ஸ அந்தரங் நாம நத்தி². தண்ஹா ஸிப்³பி³னீதி வேத³னாஸு நந்தி³ராகோ³ வேத³னானங் உபச்சே²த³ங் நிவாரேதீதி தா ஸிப்³ப³தி நாம.
Tatiyavāre adukkhamasukhā majjheti dvinnaṃ vedanānaṃ antaraṭṭhakabhāvena majjhe. Sukhañhi dukkhassa, dukkhaṃ vā sukhassa antaraṃ nāma natthi. Taṇhā sibbinīti vedanāsu nandirāgo vedanānaṃ upacchedaṃ nivāretīti tā sibbati nāma.
சதுத்த²வாரே விஞ்ஞாணங் மஜ்ஜே²தி படிஸந்தி⁴விஞ்ஞாணம்பி ஸேஸவிஞ்ஞாணம்பி நாமரூபபச்சயஸமுதா³க³தத்தா நாமரூபானங் மஜ்ஜே² நாம.
Catutthavāre viññāṇaṃ majjheti paṭisandhiviññāṇampi sesaviññāṇampi nāmarūpapaccayasamudāgatattā nāmarūpānaṃ majjhe nāma.
பஞ்சமவாரே விஞ்ஞாணங் மஜ்ஜே²தி கம்மவிஞ்ஞாணங் மஜ்ஜே², அஜ்ஜ²த்திகாயதனேஸு வா மனாயதனேன கம்மஸ்ஸ க³ஹிதத்தா இத⁴ யங்கிஞ்சி விஞ்ஞாணங் மஜ்ஜே² நாம, மனொத்³வாரே வா ஆவஜ்ஜனஸ்ஸ அஜ்ஜ²த்திகாயதனநிஸ்ஸிதத்தா ஜவனவிஞ்ஞாணங் மஜ்ஜே² நாம.
Pañcamavāre viññāṇaṃ majjheti kammaviññāṇaṃ majjhe, ajjhattikāyatanesu vā manāyatanena kammassa gahitattā idha yaṃkiñci viññāṇaṃ majjhe nāma, manodvāre vā āvajjanassa ajjhattikāyatananissitattā javanaviññāṇaṃ majjhe nāma.
ச²ட்ட²வாரே ஸக்காயோதி தேபூ⁴மகவட்டங். ஸக்காயஸமுத³யோதி ஸமுத³யஸச்சங். ஸக்காயனிரோதோ⁴தி நிரோத⁴ஸச்சங். பரியாயேனாதி தேன தேன காரணேனேவ. ஸேஸங் ஸப்³ப³த்த² வுத்தனயேனேவ வேதி³தப்³ப³ங்.
Chaṭṭhavāre sakkāyoti tebhūmakavaṭṭaṃ. Sakkāyasamudayoti samudayasaccaṃ. Sakkāyanirodhoti nirodhasaccaṃ. Pariyāyenāti tena tena kāraṇeneva. Sesaṃ sabbattha vuttanayeneva veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. மஜ்ஜே²ஸுத்தங் • 7. Majjhesuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. மஜ்ஜே²ஸுத்தவண்ணனா • 7. Majjhesuttavaṇṇanā
