| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
9. маанагаамасуд̇д̇аван̣н̣анаа
9. Mānakāmasuttavaṇṇanā
9. навамз маанагаамассаад̇и маанам̣ гаамзнд̇асса ижчанд̇асса. д̣̇амод̇и зваруубасса буг̇г̇аласса самаад̇хибагкиго д̣̇амо над̇т̇ийд̇и вад̣̇ад̇и. ‘‘сажжзна д̣̇анд̇о д̣̇амасаа убзд̇о, взд̣̇анд̇аг̇уу вусид̇аб̣рахмажарияо’’д̇и (сам̣. ни. 1.195) зд̇т̇а хи инд̣̇рияасам̣варо д̣̇амод̇и вуд̇д̇о. ‘‘яад̣̇и сажжаа д̣̇амаа жааг̇аа, канд̇яаа бхияяод̇ха виж̇ж̇ад̇ий’’д̇и (сам̣. ни. 1.246; су. ни. 191) зд̇т̇а бан̃н̃аа. ‘‘д̣̇аанзна д̣̇амзна сам̣яамзна сажжаваж̇ж̇зна ад̇т̇и бун̃н̃ам̣, ад̇т̇и бун̃н̃асса ааг̇амо’’д̇и (сам̣. ни. 4.365) зд̇т̇а убосат̇агаммам̣. ‘‘сагкиссаси ко д̇вам̣, бун̣н̣а, иминаа д̣̇амуубасамзна саманнааг̇ад̇о сунаабаранд̇асмим̣ ж̇анабад̣̇з вихарид̇у’’нд̇и (сам̣. ни. 4.88; ма. ни. 3.396) зд̇т̇а ад̇хиваасанаканд̇и. имасмим̣ бана суд̇д̇з д̣̇амод̇и самаад̇хибагкигад̇хаммаанам̣ зд̇ам̣ наамам̣. д̇знзвааха – ‘‘на монамад̇т̇и асамаахид̇ассаа’’д̇и. д̇ад̇т̇а монанд̇и жад̇умаг̇г̇ан̃аан̣ам̣, д̇ан̃хи мунаад̇ийд̇и монам̣, жад̇усажжад̇хаммз ж̇аанаад̇ийд̇и ад̇т̇о. мажжуд̇хзяяассаад̇и д̇збхуумагаваддасса. д̇ан̃хи мажжуно бад̇идтаанадтзна мажжуд̇хзяяанд̇и вужжад̇и. бааранд̇и д̇ассзва баарам̣ ниб̣б̣аанам̣. д̇арзяяаад̇и бадивиж̇жхзяяа баабун̣зяяа ваа. ид̣̇ам̣ вуд̇д̇ам̣ ход̇и – зго аран̃н̃з вихаранд̇о бамад̇д̇о буг̇г̇ало мажжуд̇хзяяасса баарам̣ на д̇арзяяа на бадивиж̇жхзяяа на баабун̣зяяаад̇и.
9. Navame mānakāmassāti mānaṃ kāmentassa icchantassa. Damoti evarūpassa puggalassa samādhipakkhiko damo natthīti vadati. ‘‘Saccena danto damasā upeto, vedantagū vusitabrahmacariyo’’ti (saṃ. ni. 1.195) ettha hi indriyasaṃvaro damoti vutto. ‘‘Yadi saccā damā cāgā, khantyā bhiyyodha vijjatī’’ti (saṃ. ni. 1.246; su. ni. 191) ettha paññā. ‘‘Dānena damena saṃyamena saccavajjena atthi puññaṃ, atthi puññassa āgamo’’ti (saṃ. ni. 4.365) ettha uposathakammaṃ. ‘‘Sakkhissasi kho tvaṃ, puṇṇa, iminā damūpasamena samannāgato sunāparantasmiṃ janapade viharitu’’nti (saṃ. ni. 4.88; ma. ni. 3.396) ettha adhivāsanakhanti. Imasmiṃ pana sutte damoti samādhipakkhikadhammānaṃ etaṃ nāmaṃ. Tenevāha – ‘‘na monamatthi asamāhitassā’’ti. Tattha monanti catumaggañāṇaṃ, tañhi munātīti monaṃ, catusaccadhamme jānātīti attho. Maccudheyyassāti tebhūmakavaṭṭassa. Tañhi maccuno patiṭṭhānaṭṭhena maccudheyyanti vuccati. Pāranti tasseva pāraṃ nibbānaṃ. Tareyyāti paṭivijjheyya pāpuṇeyya vā. Idaṃ vuttaṃ hoti – eko araññe viharanto pamatto puggalo maccudheyyassa pāraṃ na tareyya na paṭivijjheyya na pāpuṇeyyāti.
маанам̣ бахааяаад̇и арахад̇д̇амаг̇г̇зна нававид̇хамаанам̣ баж̇ахид̇ваа. сусамаахид̇ад̇д̇од̇и убажаараббанаасамаад̇хийхи судту самаахид̇ад̇д̇о. сужзд̇асод̇и н̃аан̣асамбаяуд̇д̇ад̇ааяа сунд̣̇аражид̇д̇о. н̃аан̣авиббаяуд̇д̇ажид̇д̇зна хи сужзд̇асод̇и на вужжад̇и, д̇асмаа н̃аан̣асамбаяуд̇д̇зна сужзд̇асо худ̇ваад̇и ад̇т̇о. саб̣б̣ад̇хи виббамуд̇д̇од̇и саб̣б̣зсу канд̇хааяад̇анаад̣̇ийсу виббамуд̇д̇о худ̇ваа. д̇арзяяаад̇и зд̇т̇а д̇збхуумагаваддам̣ самад̇иггаманд̇о ниб̣б̣аанам̣ бадивиж̇жханд̇о д̇арад̇ийд̇и бадивзд̇хад̇аран̣ам̣ наама вуд̇д̇ам̣. ид̇и имааяа г̇аат̇ааяа д̇иссо сигкаа гат̇ид̇аа хонд̇и. гат̇ам̣ – маано наамааяам̣ сийлабхзд̣̇ано, д̇асмаа ‘‘маанам̣ бахааяаа’’д̇и иминаа ад̇хисийласигкаа гат̇ид̇аа ход̇и. ‘‘сусамаахид̇ад̇д̇о’’д̇и иминаа ад̇хижид̇д̇асигкаа. ‘‘сужзд̇асо’’д̇и зд̇т̇а жид̇д̇зна бан̃н̃аа д̣̇ассид̇аа, д̇асмаа иминаа ад̇хибан̃н̃аасигкаа гат̇ид̇аа. ад̇хисийлан̃жа наама сийлз сад̇и ход̇и, ад̇хижид̇д̇ам̣ жид̇д̇з сад̇и, ад̇хибан̃н̃аа бан̃н̃ааяа сад̇и. д̇асмаа сийлам̣ наама бан̃жаби д̣̇асаби сийлаани, баад̇имогкасам̣варо ад̇хисийлам̣ наамаад̇и взд̣̇ид̇аб̣б̣ам̣. адта самаабад̇д̇ияо жид̇д̇ам̣, вибассанаабаад̣̇агаж̇жхаанам̣ ад̇хижид̇д̇ам̣. гаммассагад̇ан̃аан̣ам̣ бан̃н̃аа, вибассанаа ад̇хибан̃н̃аа. ануббаннзби хи б̣уд̣̇д̇хуббаад̣̇з бавад̇д̇ад̇ийд̇и бан̃жасийлам̣ д̣̇асасийлам̣ сийламзва, баад̇имогкасам̣варасийлам̣ б̣уд̣̇д̇хуббаад̣̇зязва бавад̇д̇ад̇ийд̇и ад̇хисийлам̣. жид̇д̇абан̃н̃аасуби зсзва наяо. абижа ниб̣б̣аанам̣ бад̇т̇аяанд̇зна самаад̣̇иннам̣ бан̃жасийламби д̣̇асасийламби ад̇хисийламзва. самаабаннаа адта самаабад̇д̇ияоби ад̇хижид̇д̇амзва. саб̣б̣амби ваа логияасийлам̣ сийламзва, логуд̇д̇арам̣ ад̇хисийлам̣. жид̇д̇абан̃н̃аасуби зсзва наяод̇и. ид̇и имааяа г̇аат̇ааяа самод̇хаанзд̇ваа д̇иссо сигкаа сагаласаасанам̣ гат̇ид̇ам̣ ход̇ийд̇и.
Mānaṃ pahāyāti arahattamaggena navavidhamānaṃ pajahitvā. Susamāhitattoti upacārappanāsamādhīhi suṭṭhu samāhitatto. Sucetasoti ñāṇasampayuttatāya sundaracitto. Ñāṇavippayuttacittena hi sucetasoti na vuccati, tasmā ñāṇasampayuttena sucetaso hutvāti attho. Sabbadhi vippamuttoti sabbesu khandhāyatanādīsu vippamutto hutvā. Tareyyāti ettha tebhūmakavaṭṭaṃ samatikkamanto nibbānaṃ paṭivijjhanto taratīti paṭivedhataraṇaṃ nāma vuttaṃ. Iti imāya gāthāya tisso sikkhā kathitā honti. Kathaṃ – māno nāmāyaṃ sīlabhedano, tasmā ‘‘mānaṃ pahāyā’’ti iminā adhisīlasikkhā kathitā hoti. ‘‘Susamāhitatto’’ti iminā adhicittasikkhā. ‘‘Sucetaso’’ti ettha cittena paññā dassitā, tasmā iminā adhipaññāsikkhā kathitā. Adhisīlañca nāma sīle sati hoti, adhicittaṃ citte sati, adhipaññā paññāya sati. Tasmā sīlaṃ nāma pañcapi dasapi sīlāni, pātimokkhasaṃvaro adhisīlaṃ nāmāti veditabbaṃ. Aṭṭha samāpattiyo cittaṃ, vipassanāpādakajjhānaṃ adhicittaṃ. Kammassakatañāṇaṃ paññā, vipassanā adhipaññā. Anuppannepi hi buddhuppāde pavattatīti pañcasīlaṃ dasasīlaṃ sīlameva, pātimokkhasaṃvarasīlaṃ buddhuppādeyeva pavattatīti adhisīlaṃ. Cittapaññāsupi eseva nayo. Apica nibbānaṃ patthayantena samādinnaṃ pañcasīlampi dasasīlampi adhisīlameva. Samāpannā aṭṭha samāpattiyopi adhicittameva. Sabbampi vā lokiyasīlaṃ sīlameva, lokuttaraṃ adhisīlaṃ. Cittapaññāsupi eseva nayoti. Iti imāya gāthāya samodhānetvā tisso sikkhā sakalasāsanaṃ kathitaṃ hotīti.
маанагаамасуд̇д̇аван̣н̣анаа нидтид̇аа.
Mānakāmasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 9. маанагаамасуд̇д̇ам̣ • 9. Mānakāmasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 9. маанагаамасуд̇д̇аван̣н̣анаа • 9. Mānakāmasuttavaṇṇanā
