| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૮. મનસિકારલક્ખણપઞ્હો
8. Manasikāralakkhaṇapañho
૮. રાજા આહ ‘‘કિંલક્ખણો, ભન્તે નાગસેન, મનસિકારો, કિંલક્ખણા પઞ્ઞા’’તિ? ‘‘ઊહનલક્ખણો ખો, મહારાજ, મનસિકારો, છેદનલક્ખણા પઞ્ઞા’’તિ.
8. Rājā āha ‘‘kiṃlakkhaṇo, bhante nāgasena, manasikāro, kiṃlakkhaṇā paññā’’ti? ‘‘Ūhanalakkhaṇo kho, mahārāja, manasikāro, chedanalakkhaṇā paññā’’ti.
‘‘કથં ઊહનલક્ખણો મનસિકારો, કથં છેદનલક્ખણા પઞ્ઞા, ઓપમ્મં કરોહી’’તિ. ‘‘જાનાસિ, ત્વં મહારાજ, યવલાવકે’’તિ. ‘‘આમ , ભન્તે, જાનામી’’તિ . ‘‘કથં, મહારાજ, યવલાવકા યવં લુનન્તી’’તિ? ‘‘વામેન, ભન્તે, હત્થેન યવકલાપં ગહેત્વા દક્ખિણેન હત્થેન દાત્તં ગહેત્વા દાત્તેન છિન્દન્તી’’તિ.
‘‘Kathaṃ ūhanalakkhaṇo manasikāro, kathaṃ chedanalakkhaṇā paññā, opammaṃ karohī’’ti. ‘‘Jānāsi, tvaṃ mahārāja, yavalāvake’’ti. ‘‘Āma , bhante, jānāmī’’ti . ‘‘Kathaṃ, mahārāja, yavalāvakā yavaṃ lunantī’’ti? ‘‘Vāmena, bhante, hatthena yavakalāpaṃ gahetvā dakkhiṇena hatthena dāttaṃ gahetvā dāttena chindantī’’ti.
‘‘યથા, મહારાજ, યવલાવકો વામેન હત્થેન યવકલાપં ગહેત્વા દક્ખિણેન હત્થેન દાત્તં ગહેત્વા યવં છિન્દતિ, એવમેવ ખો, મહારાજ, યોગાવચરો મનસિકારેન માનસં ગહેત્વા પઞ્ઞાય કિલેસે છિન્દતિ, એવં ખો, મહારાજ, ઊહનલક્ખણો મનસિકારો, એવં છેદનલક્ખણા પઞ્ઞા’’તિ.
‘‘Yathā, mahārāja, yavalāvako vāmena hatthena yavakalāpaṃ gahetvā dakkhiṇena hatthena dāttaṃ gahetvā yavaṃ chindati, evameva kho, mahārāja, yogāvacaro manasikārena mānasaṃ gahetvā paññāya kilese chindati, evaṃ kho, mahārāja, ūhanalakkhaṇo manasikāro, evaṃ chedanalakkhaṇā paññā’’ti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
મનસિકારલક્ખણપઞ્હો અટ્ઠમો.
Manasikāralakkhaṇapañho aṭṭhamo.
