| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
10. மண்ட³பெய்யகதா²
10. Maṇḍapeyyakathā
238. ‘‘மண்ட³பெய்யமித³ங் , பி⁴க்க²வே, ப்³ரஹ்மசரியங். ஸத்தா² ஸம்முகீ²பூ⁴தோ தித⁴த்தமண்டோ³ 1. ஸத்த²ரி ஸம்முகீ²பூ⁴தே தே³ஸனாமண்டோ³, படிக்³க³ஹமண்டோ³, ப்³ரஹ்மசரியமண்டோ³’’.
238. ‘‘Maṇḍapeyyamidaṃ , bhikkhave, brahmacariyaṃ. Satthā sammukhībhūto tidhattamaṇḍo 2. Satthari sammukhībhūte desanāmaṇḍo, paṭiggahamaṇḍo, brahmacariyamaṇḍo’’.
கதமோ தே³ஸனாமண்டோ³? சதுன்னங் அரியஸச்சானங் ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங் 3, சதுன்னங் ஸதிபட்டா²னானங்…பே॰… சதுன்னங் ஸம்மப்பதா⁴னானங்… சதுன்னங் இத்³தி⁴பாதா³னங்… பஞ்சன்னங் இந்த்³ரியானங்… பஞ்சன்னங் ப³லானங்… ஸத்தன்னங் பொ³ஜ்ஜ²ங்கா³னங்… அரியஸ்ஸ அட்ட²ங்கி³கஸ்ஸ மக்³க³ஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங் – அயங் தே³ஸனாமண்டோ³.
Katamo desanāmaṇḍo? Catunnaṃ ariyasaccānaṃ ācikkhanā desanā paññāpanā paṭṭhapanā vivaraṇā vibhajanā uttānīkammaṃ 4, catunnaṃ satipaṭṭhānānaṃ…pe… catunnaṃ sammappadhānānaṃ… catunnaṃ iddhipādānaṃ… pañcannaṃ indriyānaṃ… pañcannaṃ balānaṃ… sattannaṃ bojjhaṅgānaṃ… ariyassa aṭṭhaṅgikassa maggassa ācikkhanā desanā paññāpanā paṭṭhapanā vivaraṇā vibhajanā uttānīkammaṃ – ayaṃ desanāmaṇḍo.
கதமோ படிக்³க³ஹமண்டோ³? பி⁴க்கூ² பி⁴க்கு²னியோ உபாஸகா உபாஸிகாயோ தே³வா மனுஸ்ஸா யே வா பனஞ்ஞேபி கேசி விஞ்ஞாதாரோ – அயங் படிக்³க³ஹமண்டோ³.
Katamo paṭiggahamaṇḍo? Bhikkhū bhikkhuniyo upāsakā upāsikāyo devā manussā ye vā panaññepi keci viññātāro – ayaṃ paṭiggahamaṇḍo.
கதமோ ப்³ரஹ்மசரியமண்டோ³? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴ – அயங் ப்³ரஹ்மசரியமண்டோ³.
Katamo brahmacariyamaṇḍo? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi – ayaṃ brahmacariyamaṇḍo.
239. அதி⁴மொக்க²மண்டோ³ ஸத்³தி⁴ந்த்³ரியங், அஸ்ஸத்³தி⁴யங் கஸடோ; அஸ்ஸத்³தி⁴யங் கஸடங் ச²ட்³டெ³த்வா ஸத்³தி⁴ந்த்³ரியஸ்ஸ அதி⁴மொக்க²மண்ட³ங் பிவதீதி – மண்ட³பெய்யங். பக்³க³ஹமண்டோ³ வீரியிந்த்³ரியங், கோஸஜ்ஜங் கஸடோ; கோஸஜ்ஜங் கஸடங் ச²ட்³டெ³த்வா வீரியிந்த்³ரியஸ்ஸ பக்³க³ஹமண்ட³ங் பிவதீதி – மண்ட³பெய்யங். உபட்டா²னமண்டோ³ ஸதிந்த்³ரியங், பமாதோ³ கஸடோ; பமாத³ங் கஸடங் ச²ட்³டெ³த்வா ஸதிந்த்³ரியஸ்ஸ உபட்டா²னமண்ட³ங் பிவதீதி – மண்ட³பெய்யங். அவிக்கே²பமண்டோ³ ஸமாதி⁴ந்த்³ரியங், உத்³த⁴ச்சங் கஸடோ; உத்³த⁴ச்சங் கஸடங் ச²ட்³டெ³த்வா ஸமாதி⁴ந்த்³ரியஸ்ஸ அவிக்கே²பமண்ட³ங் பிவதீதி – மண்ட³பெய்யங். த³ஸ்ஸனமண்டோ³ பஞ்ஞிந்த்³ரியங், அவிஜ்ஜங் கஸடோ; அவிஜ்ஜங் கஸடங் ச²ட்³டெ³த்வா பஞ்ஞிந்த்³ரியஸ்ஸ த³ஸ்ஸனமண்ட³ங் பிவதீதி – மண்ட³பெய்யங்.
239. Adhimokkhamaṇḍo saddhindriyaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhindriyassa adhimokkhamaṇḍaṃ pivatīti – maṇḍapeyyaṃ. Paggahamaṇḍo vīriyindriyaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyindriyassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo satindriyaṃ, pamādo kasaṭo; pamādaṃ kasaṭaṃ chaḍḍetvā satindriyassa upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo samādhindriyaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhindriyassa avikkhepamaṇḍaṃ pivatīti – maṇḍapeyyaṃ. Dassanamaṇḍo paññindriyaṃ, avijjaṃ kasaṭo; avijjaṃ kasaṭaṃ chaḍḍetvā paññindriyassa dassanamaṇḍaṃ pivatīti – maṇḍapeyyaṃ.
அஸ்ஸத்³தி⁴யே அகம்பியமண்டோ³ ஸத்³தா⁴ப³லங், அஸ்ஸத்³தி⁴யங் கஸடோ; அஸ்ஸத்³தி⁴யங் கஸடங் ச²ட்³டெ³த்வா ஸத்³தா⁴ப³லஸ்ஸ அஸ்ஸத்³தி⁴யே அகம்பியமண்ட³ங் பிவதீதி – மண்ட³பெய்யங். கோஸஜ்ஜே அகம்பியமண்டோ³ வீரியப³லங், கோஸஜ்ஜங் கஸடோ; கோஸஜ்ஜங் கஸடங் ச²ட்³டெ³த்வா வீரியப³லஸ்ஸ கோஸஜ்ஜே அகம்பியமண்ட³ங் பிவதீதி – மண்ட³பெய்யங். பமாதே³ அகம்பியமண்டோ³ ஸதிப³லங், பமாதோ³ கஸடோ; பமாத³ங் கஸடங் ச²ட்³டெ³த்வா ஸதிப³லஸ்ஸ பமாதே³ அகம்பியமண்ட³ங் பிவதீதி – மண்ட³பெய்யங். உத்³த⁴ச்சே அகம்பியமண்டோ³ ஸமாதி⁴ப³லங், உத்³த⁴ச்சங் கஸடோ; உத்³த⁴ச்சங் கஸடங் ச²ட்³டெ³த்வா ஸமாதி⁴ப³லஸ்ஸ உத்³த⁴ச்சே அகம்பியமண்ட³ங் பிவதீதி – மண்ட³பெய்யங். அவிஜ்ஜாய அகம்பியமண்டோ³ பஞ்ஞாப³லங், அவிஜ்ஜா கஸடோ; அவிஜ்ஜங் கஸடங் ச²ட்³டெ³த்வா பஞ்ஞாப³லஸ்ஸ அவிஜ்ஜாய அகம்பியமண்ட³ங் பிவதீதி – மண்ட³பெய்யங்.
Assaddhiye akampiyamaṇḍo saddhābalaṃ, assaddhiyaṃ kasaṭo; assaddhiyaṃ kasaṭaṃ chaḍḍetvā saddhābalassa assaddhiye akampiyamaṇḍaṃ pivatīti – maṇḍapeyyaṃ. Kosajje akampiyamaṇḍo vīriyabalaṃ, kosajjaṃ kasaṭo; kosajjaṃ kasaṭaṃ chaḍḍetvā vīriyabalassa kosajje akampiyamaṇḍaṃ pivatīti – maṇḍapeyyaṃ. Pamāde akampiyamaṇḍo satibalaṃ, pamādo kasaṭo; pamādaṃ kasaṭaṃ chaḍḍetvā satibalassa pamāde akampiyamaṇḍaṃ pivatīti – maṇḍapeyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; uddhaccaṃ kasaṭaṃ chaḍḍetvā samādhibalassa uddhacce akampiyamaṇḍaṃ pivatīti – maṇḍapeyyaṃ. Avijjāya akampiyamaṇḍo paññābalaṃ, avijjā kasaṭo; avijjaṃ kasaṭaṃ chaḍḍetvā paññābalassa avijjāya akampiyamaṇḍaṃ pivatīti – maṇḍapeyyaṃ.
உபட்டா²னமண்டோ³ ஸதிஸம்பொ³ஜ்ஜ²ங்கா³, பமாதோ³ கஸடோ; பமாத³ங் கஸடங் ச²ட்³டெ³த்வா ஸதிஸம்பொ³ஜ்ஜ²ங்க³ஸ்ஸ உபட்டா²னமண்ட³ங் பிவதீதி – மண்ட³பெய்யங். பவிசயமண்டோ³ த⁴ம்மவிசயஸம்பொ³ஜ்ஜ²ங்கோ³, அவிஜ்ஜா கஸடோ; அவிஜ்ஜங் கஸடங் ச²ட்³டெ³த்வா த⁴ம்மவிசயஸம்பொ³ஜ்ஜ²ங்க³ஸ்ஸ பவிசயமண்ட³ங் பிவதீதி – மண்ட³பெய்யங். பக்³க³ஹமண்டோ³ வீரியஸம்பொ³ஜ்ஜ²ங்கோ³, கோஸஜ்ஜங் கஸடோ; கோஸஜ்ஜங் கஸடங் ச²ட்³டெ³த்வா வீரியஸம்பொ³ஜ்ஜ²ங்க³ஸ்ஸ பக்³க³ஹமண்ட³ங் பிவதீதி – மண்ட³பெய்யங். ப²ரணமண்டோ³ பீதிஸம்பொ³ஜ்ஜ²ங்கோ³, பரிளாஹோ கஸடோ; பரிளாஹங் கஸடங் ச²ட்³டெ³த்வா பீதிஸம்பொ³ஜ்ஜ²ங்க³ஸ்ஸ ப²ரணமண்ட³ங் பிவதீதி – மண்ட³பெய்யங். உபஸமமண்டோ³ பஸ்ஸத்³தி⁴ஸம்பொ³ஜ்ஜ²ங்கோ³ , து³ட்டு²ல்லங் கஸடோ; து³ட்டு²ல்லங் கஸடங் ச²ட்³டெ³த்வா பஸ்ஸத்³தி⁴ஸம்பொ³ஜ்ஜ²ங்க³ஸ்ஸ உபஸமமண்ட³ங் பிவதீதி – மண்ட³பெய்யங். அவிக்கே²பமண்டோ³ ஸமாதி⁴ஸம்பொ³ஜ்ஜ²ங்கோ³, உத்³த⁴ச்சங் கஸடோ; உத்³த⁴ச்சங் கஸடங் ச²ட்³டெ³த்வா ஸமாதி⁴ஸம்பொ³ஜ்ஜ²ங்க³ஸ்ஸ அவிக்கே²பமண்ட³ங் பிவதீதி – மண்ட³பெய்யங். படிஸங்கா²னமண்டோ³ உபெக்கா²ஸம்பொ³ஜ்ஜ²ங்கோ³, அப்படிஸங்கா² கஸடோ; அப்படிஸங்க²ங் கஸடங் ச²ட்³டெ³த்வா உபெக்கா²ஸம்பொ³ஜ்ஜ²ங்க³ஸ்ஸ படிஸங்கா²னமண்ட³ங் பிவதீதி – மண்ட³பெய்யங்.
Upaṭṭhānamaṇḍo satisambojjhaṅgā, pamādo kasaṭo; pamādaṃ kasaṭaṃ chaḍḍetvā satisambojjhaṅgassa upaṭṭhānamaṇḍaṃ pivatīti – maṇḍapeyyaṃ. Pavicayamaṇḍo dhammavicayasambojjhaṅgo, avijjā kasaṭo; avijjaṃ kasaṭaṃ chaḍḍetvā dhammavicayasambojjhaṅgassa pavicayamaṇḍaṃ pivatīti – maṇḍapeyyaṃ. Paggahamaṇḍo vīriyasambojjhaṅgo, kosajjaṃ kasaṭo; kosajjaṃ kasaṭaṃ chaḍḍetvā vīriyasambojjhaṅgassa paggahamaṇḍaṃ pivatīti – maṇḍapeyyaṃ. Pharaṇamaṇḍo pītisambojjhaṅgo, pariḷāho kasaṭo; pariḷāhaṃ kasaṭaṃ chaḍḍetvā pītisambojjhaṅgassa pharaṇamaṇḍaṃ pivatīti – maṇḍapeyyaṃ. Upasamamaṇḍo passaddhisambojjhaṅgo , duṭṭhullaṃ kasaṭo; duṭṭhullaṃ kasaṭaṃ chaḍḍetvā passaddhisambojjhaṅgassa upasamamaṇḍaṃ pivatīti – maṇḍapeyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; uddhaccaṃ kasaṭaṃ chaḍḍetvā samādhisambojjhaṅgassa avikkhepamaṇḍaṃ pivatīti – maṇḍapeyyaṃ. Paṭisaṅkhānamaṇḍo upekkhāsambojjhaṅgo, appaṭisaṅkhā kasaṭo; appaṭisaṅkhaṃ kasaṭaṃ chaḍḍetvā upekkhāsambojjhaṅgassa paṭisaṅkhānamaṇḍaṃ pivatīti – maṇḍapeyyaṃ.
த³ஸ்ஸனமண்டோ³ ஸம்மாதி³ட்டி², மிச்சா²தி³ட்டி² கஸடோ; மிச்சா²தி³ட்டி²ங் கஸடங் ச²ட்³டெ³த்வா ஸம்மாதி³ட்டி²யா த³ஸ்ஸனமண்ட³ங் பிவதீதி – மண்ட³பெய்யங். அபி⁴னிரோபனமண்டோ³ ஸம்மாஸங்கப்போ, மிச்சா²ஸங்கப்போ கஸடோ; மிச்சா²ஸங்கப்பங் கஸடங் ச²ட்³டெ³த்வா ஸம்மாஸங்கப்பஸ்ஸ அபி⁴னிரோபனமண்ட³ங் பிவதீதி – மண்ட³பெய்யங். பரிக்³க³ஹமண்டோ³ ஸம்மாவாசா, மிச்சா²வாசா கஸடோ; மிச்சா²வாசங் கஸடங் ச²ட்³டெ³த்வா ஸம்மாவாசாய பரிக்³க³ஹமண்ட³ங் பிவதீதி – மண்ட³பெய்யங். ஸமுட்டா²னமண்டோ³ ஸம்மாகம்மந்தோ, மிச்சா²கம்மந்தோ கஸடோ; மிச்சா²கம்மந்தங் கஸடங் ச²ட்³டெ³த்வா ஸம்மாகம்மந்தஸ்ஸ ஸமுட்டா²னமண்ட³ங் பிவதீதி – மண்ட³பெய்யங். வோதா³னமண்டோ³ ஸம்மாஆஜீவோ, மிச்சா²ஆஜீவோ கஸடோ; மிச்சா²ஆஜீவங் கஸடங் ச²ட்³டெ³த்வா ஸம்மாஆஜீவஸ்ஸ வோதா³னமண்ட³ங் பிவதீதி – மண்ட³பெய்யங். பக்³க³ஹமண்டோ³ ஸம்மாவாயாமோ, மிச்சா²வாயாமோ கஸடோ; மிச்சா²வாயாமங் கஸடங் ச²ட்³டெ³த்வா ஸம்மாவாயாமஸ்ஸ பக்³க³ஹமண்ட³ங் பிவதீதி – மண்ட³பெய்யங். உபட்டா²னமண்டோ³ ஸம்மாஸதி, மிச்சா²ஸதி கஸடோ; மிச்சா²ஸதிங் கஸடங் ச²ட்³டெ³த்வா ஸம்மாஸதியா உபட்டா²னமண்ட³ங் பிவதீதி – மண்ட³பெய்யங். அவிக்கே²பமண்டோ³ ஸம்மாஸமாதி⁴, மிச்சா²ஸமாதி⁴ கஸடோ; மிச்சா²ஸமாதி⁴ங் கஸடங் ச²ட்³டெ³த்வா ஸம்மாஸமாதி⁴ஸ்ஸ அவிக்கே²பமண்ட³ங் பிவதீதி – மண்ட³பெய்யங்.
Dassanamaṇḍo sammādiṭṭhi, micchādiṭṭhi kasaṭo; micchādiṭṭhiṃ kasaṭaṃ chaḍḍetvā sammādiṭṭhiyā dassanamaṇḍaṃ pivatīti – maṇḍapeyyaṃ. Abhiniropanamaṇḍo sammāsaṅkappo, micchāsaṅkappo kasaṭo; micchāsaṅkappaṃ kasaṭaṃ chaḍḍetvā sammāsaṅkappassa abhiniropanamaṇḍaṃ pivatīti – maṇḍapeyyaṃ. Pariggahamaṇḍo sammāvācā, micchāvācā kasaṭo; micchāvācaṃ kasaṭaṃ chaḍḍetvā sammāvācāya pariggahamaṇḍaṃ pivatīti – maṇḍapeyyaṃ. Samuṭṭhānamaṇḍo sammākammanto, micchākammanto kasaṭo; micchākammantaṃ kasaṭaṃ chaḍḍetvā sammākammantassa samuṭṭhānamaṇḍaṃ pivatīti – maṇḍapeyyaṃ. Vodānamaṇḍo sammāājīvo, micchāājīvo kasaṭo; micchāājīvaṃ kasaṭaṃ chaḍḍetvā sammāājīvassa vodānamaṇḍaṃ pivatīti – maṇḍapeyyaṃ. Paggahamaṇḍo sammāvāyāmo, micchāvāyāmo kasaṭo; micchāvāyāmaṃ kasaṭaṃ chaḍḍetvā sammāvāyāmassa paggahamaṇḍaṃ pivatīti – maṇḍapeyyaṃ. Upaṭṭhānamaṇḍo sammāsati, micchāsati kasaṭo; micchāsatiṃ kasaṭaṃ chaḍḍetvā sammāsatiyā upaṭṭhānamaṇḍaṃ pivatīti – maṇḍapeyyaṃ. Avikkhepamaṇḍo sammāsamādhi, micchāsamādhi kasaṭo; micchāsamādhiṃ kasaṭaṃ chaḍḍetvā sammāsamādhissa avikkhepamaṇḍaṃ pivatīti – maṇḍapeyyaṃ.
240. அத்தி² மண்டோ³, அத்தி² பெய்யங், அத்தி² கஸடோ. அதி⁴மொக்க²மண்டோ³ ஸத்³தி⁴ந்த்³ரியங், அஸ்ஸத்³தி⁴யங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். பக்³க³ஹமண்டோ³ வீரியிந்த்³ரியங், கோஸஜ்ஜங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். உபட்டா²னமண்டோ³ ஸதிந்த்³ரியங், பமாதோ³ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். அவிக்கே²பமண்டோ³ ஸமாதி⁴ந்த்³ரியங், உத்³த⁴ச்சங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். த³ஸ்ஸனமண்டோ³ பஞ்ஞிந்த்³ரியங், அவிஜ்ஜா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங்.
240. Atthi maṇḍo, atthi peyyaṃ, atthi kasaṭo. Adhimokkhamaṇḍo saddhindriyaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyindriyaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo satindriyaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhindriyaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Dassanamaṇḍo paññindriyaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
அஸ்ஸத்³தி⁴யே அகம்பியமண்டோ³ ஸத்³தா⁴ப³லங், அஸ்ஸத்³தி⁴யங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். கோஸஜ்ஜே அகம்பியமண்டோ³ வீரியப³லங், கோஸஜ்ஜங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். பமாதே³ அகம்பியமண்டோ³ ஸதிப³லங், பமாதோ³ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். உத்³த⁴ச்சே அகம்பியமண்டோ³ ஸமாதி⁴ப³லங், உத்³த⁴ச்சங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். அவிஜ்ஜாய அகம்பியமண்டோ³ பஞ்ஞாப³லங், அவிஜ்ஜா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங்.
Assaddhiye akampiyamaṇḍo saddhābalaṃ, assaddhiyaṃ kasaṭo; yo tattha attharaso dhammaraso vimuttiraso – idaṃ peyyaṃ. Kosajje akampiyamaṇḍo vīriyabalaṃ, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pamāde akampiyamaṇḍo satibalaṃ, pamādo kasaṭo; yo tattha attharaso dhammaraso vimuttiraso – idaṃ peyyaṃ. Uddhacce akampiyamaṇḍo samādhibalaṃ, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Avijjāya akampiyamaṇḍo paññābalaṃ, avijjā kasaṭo; yo tattha attharaso dhammaraso vimuttiraso – idaṃ peyyaṃ.
உபட்டா²னமண்டோ³ ஸதிஸம்பொ³ஜ்ஜ²ங்கோ³, பமாதோ³ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். பவிசயமண்டோ³ த⁴ம்மவிசயஸம்பொ³ஜ்ஜ²ங்கோ³, அவிஜ்ஜா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். பக்³க³ஹமண்டோ³ வீரியஸம்பொ³ஜ்ஜ²ங்கோ³, கோஸஜ்ஜங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். ப²ரணமண்டோ³ பீதிஸம்பொ³ஜ்ஜ²ங்கோ³, பரிளாஹோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். உபஸமமண்டோ³ பஸ்ஸத்³தி⁴ஸம்பொ³ஜ்ஜ²ங்கோ³, து³ட்டு²ல்லங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். அவிக்கே²பமண்டோ³ ஸமாதி⁴ஸம்பொ³ஜ்ஜ²ங்கோ³, உத்³த⁴ச்சங் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். படிஸங்கா²னமண்டோ³ உபெக்கா²ஸம்பொ³ஜ்ஜ²ங்கோ³, அபடிஸங்கா² கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங்.
Upaṭṭhānamaṇḍo satisambojjhaṅgo, pamādo kasaṭo; yo tattha attharaso dhammaraso vimuttiraso – idaṃ peyyaṃ. Pavicayamaṇḍo dhammavicayasambojjhaṅgo, avijjā kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo vīriyasambojjhaṅgo, kosajjaṃ kasaṭo; yo tattha attharaso dhammaraso vimuttiraso – idaṃ peyyaṃ. Pharaṇamaṇḍo pītisambojjhaṅgo, pariḷāho kasaṭo; yo tattha attharaso dhammaraso vimuttiraso – idaṃ peyyaṃ. Upasamamaṇḍo passaddhisambojjhaṅgo, duṭṭhullaṃ kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo samādhisambojjhaṅgo, uddhaccaṃ kasaṭo; yo tattha attharaso dhammaraso vimuttiraso – idaṃ peyyaṃ. Paṭisaṅkhānamaṇḍo upekkhāsambojjhaṅgo, apaṭisaṅkhā kasaṭo; yo tattha attharaso dhammaraso vimuttiraso – idaṃ peyyaṃ.
த³ஸ்ஸனமண்டோ³ ஸம்மாதி³ட்டி², மிச்சா²தி³ட்டி² கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். அபி⁴னிரோபனமண்டோ³ ஸம்மாஸங்கப்போ, மிச்சா²ஸங்கப்போ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். பரிக்³க³ஹமண்டோ³ ஸம்மாவாசா, மிச்சா²வாசா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். ஸமுட்டா²னமண்டோ³ ஸம்மாகம்மந்தோ, மிச்சா²கம்மந்தோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். வோதா³னமண்டோ³ ஸம்மாஆஜீவோ, மிச்சா²ஆஜீவோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். பக்³க³ஹமண்டோ³ ஸம்மாவாயாமோ, மிச்சா²வாயாமோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். உபட்டா²னமண்டோ³ ஸம்மாஸதி, மிச்சா²ஸதி கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங். அவிக்கே²பமண்டோ³ ஸம்மாஸமாதி⁴, மிச்சா²ஸமாதி⁴ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ங் பெய்யங்.
Dassanamaṇḍo sammādiṭṭhi, micchādiṭṭhi kasaṭo; yo tattha attharaso dhammaraso vimuttiraso – idaṃ peyyaṃ. Abhiniropanamaṇḍo sammāsaṅkappo, micchāsaṅkappo kasaṭo; yo tattha attharaso dhammaraso vimuttiraso – idaṃ peyyaṃ. Pariggahamaṇḍo sammāvācā, micchāvācā kasaṭo; yo tattha attharaso dhammaraso vimuttiraso – idaṃ peyyaṃ. Samuṭṭhānamaṇḍo sammākammanto, micchākammanto kasaṭo; yo tattha attharaso dhammaraso vimuttiraso – idaṃ peyyaṃ. Vodānamaṇḍo sammāājīvo, micchāājīvo kasaṭo; yo tattha attharaso dhammaraso vimuttiraso – idaṃ peyyaṃ. Paggahamaṇḍo sammāvāyāmo, micchāvāyāmo kasaṭo; yo tattha attharaso dhammaraso vimuttiraso – idaṃ peyyaṃ. Upaṭṭhānamaṇḍo sammāsati, micchāsati kasaṭo; yo tattha attharaso dhammaraso vimuttiraso – idaṃ peyyaṃ. Avikkhepamaṇḍo sammāsamādhi, micchāsamādhi kasaṭo; yo tattha attharaso dhammaraso vimuttiraso – idaṃ peyyaṃ.
த³ஸ்ஸனமண்டோ³ ஸம்மாதி³ட்டி²… அபி⁴னிரோபனமண்டோ³ ஸம்மாஸங்கப்போ… பரிக்³க³ஹமண்டோ³ ஸம்மாவாசா… ஸமுட்டா²னமண்டோ³ ஸம்மாகம்மந்தோ… வோதா³னமண்டோ³ ஸம்மாஆஜீவோ… பக்³க³ஹமண்டோ³ ஸம்மாவாயாமோ… உபட்டா²னமண்டோ³ ஸம்மாஸதி… அவிக்கே²பமண்டோ³ ஸம்மாஸமாதி⁴.
Dassanamaṇḍo sammādiṭṭhi… abhiniropanamaṇḍo sammāsaṅkappo… pariggahamaṇḍo sammāvācā… samuṭṭhānamaṇḍo sammākammanto… vodānamaṇḍo sammāājīvo… paggahamaṇḍo sammāvāyāmo… upaṭṭhānamaṇḍo sammāsati… avikkhepamaṇḍo sammāsamādhi.
உபட்டா²னமண்டோ³ ஸதிஸம்பொ³ஜ்ஜ²ங்கோ³… பவிசயமண்டோ³ த⁴ம்மவிசயஸம்பொ³ஜ்ஜ²ங்கோ³… பக்³க³ஹமண்டோ³ வீரியஸம்பொ³ஜ்ஜ²ங்கோ³… ப²ரணமண்டோ³ பீதிஸம்பொ³ஜ்ஜ²ங்கோ³… உபஸமமண்டோ³ பஸ்ஸத்³தி⁴ஸம்பொ³ஜ்ஜ²ங்கோ³… அவிக்கே²பமண்டோ³ ஸமாதி⁴ஸம்பொ³ஜ்ஜ²ங்கோ³… படிஸங்கா²னமண்டோ³ உபெக்கா²ஸம்பொ³ஜ்ஜ²ங்கோ³.
Upaṭṭhānamaṇḍo satisambojjhaṅgo… pavicayamaṇḍo dhammavicayasambojjhaṅgo… paggahamaṇḍo vīriyasambojjhaṅgo… pharaṇamaṇḍo pītisambojjhaṅgo… upasamamaṇḍo passaddhisambojjhaṅgo… avikkhepamaṇḍo samādhisambojjhaṅgo… paṭisaṅkhānamaṇḍo upekkhāsambojjhaṅgo.
அஸ்ஸத்³தி⁴யே அகம்பியமண்டோ³ ஸத்³தா⁴ப³லங்… கோஸஜ்ஜே அகம்பியமண்டோ³ வீரியப³லங்… பமாதே³ அகம்பியமண்டோ³ ஸதிப³லங்… உத்³த⁴ச்சே அகம்பியமண்டோ³ ஸமாதி⁴ப³லங்… அவிஜ்ஜாய அகம்பியமண்டோ³ பஞ்ஞாப³லங்.
Assaddhiye akampiyamaṇḍo saddhābalaṃ… kosajje akampiyamaṇḍo vīriyabalaṃ… pamāde akampiyamaṇḍo satibalaṃ… uddhacce akampiyamaṇḍo samādhibalaṃ… avijjāya akampiyamaṇḍo paññābalaṃ.
அதி⁴மொக்க²மண்டோ³ ஸத்³தி⁴ந்த்³ரியங்… பக்³க³ஹமண்டோ³ வீரியிந்த்³ரியங்… உபட்டா²னமண்டோ³ ஸதிந்த்³ரியங்… அவிக்கே²பமண்டோ³ ஸமாதி⁴ந்த்³ரியங்… த³ஸ்ஸனமண்டோ³ பஞ்ஞிந்த்³ரியங்.
Adhimokkhamaṇḍo saddhindriyaṃ… paggahamaṇḍo vīriyindriyaṃ… upaṭṭhānamaṇḍo satindriyaṃ… avikkhepamaṇḍo samādhindriyaṃ… dassanamaṇḍo paññindriyaṃ.
ஆதி⁴பதெய்யட்டே²ன இந்த்³ரியா மண்டோ³, அகம்பியட்டே²ன ப³லா மண்டோ³, நிய்யானட்டே²ன பொ³ஜ்ஜ²ங்கா³ மண்டோ³, ஹேதுட்டே²ன மக்³கோ³ மண்டோ³, உபட்டா²னட்டே²ன ஸதிபட்டா²னா மண்டோ³, பத³ஹனட்டே²ன ஸம்மப்பதா⁴னா மண்டோ³, இஜ்ஜ²னட்டே²ன இத்³தி⁴பாதா³ மண்டோ³, தத²ட்டே²ன ஸச்சா மண்டோ³, அவிக்கே²பட்டே²ன ஸமதோ² மண்டோ³, அனுபஸ்ஸனட்டே²ன விபஸ்ஸனா மண்டோ³, ஏகரஸட்டே²ன ஸமத²விபஸ்ஸனா மண்டோ³, அனதிவத்தனட்டே²ன யுக³னத்³தா⁴ மண்டோ³, ஸங்வரட்டே²ன ஸீலவிஸுத்³தி⁴ மண்டோ³, அவிக்கே²பட்டே²ன சித்தவிஸுத்³தி⁴ மண்டோ³, த³ஸ்ஸனட்டே²ன தி³ட்டி²விஸுத்³தி⁴ மண்டோ³, முத்தட்டே²ன விமொக்கோ² மண்டோ³, படிவேத⁴ட்டே²ன விஜ்ஜா மண்டோ³, பரிச்சாக³ட்டே²ன விமுத்தி மண்டோ³, ஸமுச்சே²த³ட்டே²ன க²யே ஞாணங் மண்டோ³, படிப்பஸ்ஸத்³த⁴ட்டே²ன அனுப்பாதே³ ஞாணங் மண்டோ³, ச²ந்தோ³ மூலட்டே²ன மண்டோ³, மனஸிகாரோ ஸமுட்டா²னட்டே²ன மண்டோ³, ப²ஸ்ஸோ ஸமோதா⁴னட்டே²ன மண்டோ³, வேத³னா ஸமோஸரணட்டே²ன மண்டோ³, ஸமாதி⁴ பமுக²ட்டே²ன மண்டோ³, ஸதி ஆதி⁴பதெய்யட்டே²ன மண்டோ³, பஞ்ஞா ததுத்தரட்டே²ன மண்டோ³, விமுத்தி ஸாரட்டே²ன மண்டோ³, அமதோக³த⁴ங் நிப்³பா³னங் பரியோஸானட்டே²ன மண்டோ³தி.
Ādhipateyyaṭṭhena indriyā maṇḍo, akampiyaṭṭhena balā maṇḍo, niyyānaṭṭhena bojjhaṅgā maṇḍo, hetuṭṭhena maggo maṇḍo, upaṭṭhānaṭṭhena satipaṭṭhānā maṇḍo, padahanaṭṭhena sammappadhānā maṇḍo, ijjhanaṭṭhena iddhipādā maṇḍo, tathaṭṭhena saccā maṇḍo, avikkhepaṭṭhena samatho maṇḍo, anupassanaṭṭhena vipassanā maṇḍo, ekarasaṭṭhena samathavipassanā maṇḍo, anativattanaṭṭhena yuganaddhā maṇḍo, saṃvaraṭṭhena sīlavisuddhi maṇḍo, avikkhepaṭṭhena cittavisuddhi maṇḍo, dassanaṭṭhena diṭṭhivisuddhi maṇḍo, muttaṭṭhena vimokkho maṇḍo, paṭivedhaṭṭhena vijjā maṇḍo, pariccāgaṭṭhena vimutti maṇḍo, samucchedaṭṭhena khaye ñāṇaṃ maṇḍo, paṭippassaddhaṭṭhena anuppāde ñāṇaṃ maṇḍo, chando mūlaṭṭhena maṇḍo, manasikāro samuṭṭhānaṭṭhena maṇḍo, phasso samodhānaṭṭhena maṇḍo, vedanā samosaraṇaṭṭhena maṇḍo, samādhi pamukhaṭṭhena maṇḍo, sati ādhipateyyaṭṭhena maṇḍo, paññā tatuttaraṭṭhena maṇḍo, vimutti sāraṭṭhena maṇḍo, amatogadhaṃ nibbānaṃ pariyosānaṭṭhena maṇḍoti.
சதுத்த²பா⁴ணவாரோ.
Catutthabhāṇavāro.
மண்ட³பெய்யகதா² நிட்டி²தா.
Maṇḍapeyyakathā niṭṭhitā.
மஹாவக்³கோ³ பட²மோ.
Mahāvaggo paṭhamo.
தஸ்ஸுத்³தா³னங் –
Tassuddānaṃ –
ஞாணதி³ட்டீ² ச அஸ்ஸாஸா, இந்த்³ரியங் விமொக்க²பஞ்சமா;
Ñāṇadiṭṭhī ca assāsā, indriyaṃ vimokkhapañcamā;
க³திகம்மவிபல்லாஸா, மக்³கோ³ மண்டே³ன தே த³ஸாதி.
Gatikammavipallāsā, maggo maṇḍena te dasāti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / மண்ட³பெய்யகதா²வண்ணனா • Maṇḍapeyyakathāvaṇṇanā
