| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[194] 4. ман̣ижораж̇аад̇агаван̣н̣анаа
[194] 4. Maṇicorajātakavaṇṇanā
на санд̇и д̣̇зваа бавасанд̇и нуунаад̇и ид̣̇ам̣ сад̇т̇аа взл̣уванз вихаранд̇о вад̇хааяа барисагганд̇ам̣ д̣̇звад̣̇ад̇д̇ам̣ аараб̣бха гат̇зси. д̇ад̣̇аа бана сад̇т̇аа ‘‘д̣̇звад̣̇ад̇д̇о вад̇хааяа барисаггад̇ий’’д̇и суд̇ваа ‘‘на, бхигкавз, ид̣̇аанзва, буб̣б̣зби д̣̇звад̣̇ад̇д̇о маяхам̣ вад̇хааяа барисаггад̇иязва, барисагганд̇оби бана мам̣ вад̇хид̇ум̣ наасагкий’’д̇и вад̇ваа ад̇ийд̇ам̣ аахари.
Na santi devā pavasanti nūnāti idaṃ satthā veḷuvane viharanto vadhāya parisakkantaṃ devadattaṃ ārabbha kathesi. Tadā pana satthā ‘‘devadatto vadhāya parisakkatī’’ti sutvā ‘‘na, bhikkhave, idāneva, pubbepi devadatto mayhaṃ vadhāya parisakkatiyeva, parisakkantopi pana maṃ vadhituṃ nāsakkhī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о б̣аараан̣асид̇о авид̣̇уурз г̇аамагз г̇ахабад̇игулз ниб̣б̣ад̇д̇и. ат̇асса ваяаббад̇д̇асса б̣аараан̣асид̇о гулад̇хийд̇арам̣ аанзсум̣, саа суван̣н̣аван̣н̣аа ахоси абхируубаа д̣̇ассанийяаа д̣̇зважчараа вияа бубпалад̇аа вияа лал̣амаанаа мад̇д̇агиннарий вияа жа суж̇аад̇аад̇и наамзна бад̇иб̣б̣ад̇аа сийлаажаарасамбаннаа вад̇д̇асамбаннаа. нижжагааламбиссаа бад̇ивад̇д̇ам̣ сассувад̇д̇ам̣ сасуравад̇д̇ан̃жа гад̇амзва ход̇и, саа б̣од̇хисад̇д̇асса бияаа ахоси манаабаа. ид̇и убхоби д̇з саммод̣̇амаанаа згажид̇д̇аа самаг̇г̇аваасам̣ васим̣су.
Atīte bārāṇasiyaṃ brahmadatte rajjaṃ kārente bodhisatto bārāṇasito avidūre gāmake gahapatikule nibbatti. Athassa vayappattassa bārāṇasito kuladhītaraṃ ānesuṃ, sā suvaṇṇavaṇṇā ahosi abhirūpā dassanīyā devaccharā viya pupphalatā viya laḷamānā mattakinnarī viya ca sujātāti nāmena patibbatā sīlācārasampannā vattasampannā. Niccakālampissā pativattaṃ sassuvattaṃ sasuravattañca katameva hoti, sā bodhisattassa piyā ahosi manāpā. Iti ubhopi te sammodamānā ekacittā samaggavāsaṃ vasiṃsu.
ат̇згад̣̇ивасам̣ суж̇аад̇аа ‘‘маад̇аабид̇аро д̣̇адтугаамаамхий’’д̇и б̣од̇хисад̇д̇асса аарожзси. ‘‘саад̇ху, бхад̣̇д̣̇з, маг̇г̇абаат̇зяяам̣ бахонагам̣ бадияаад̣̇зхий’’д̇и каж̇ж̇авигад̇им̣ бажаабзд̇ваа каж̇ж̇агаад̣̇ийни яаанагз табзд̇ваа яаанагам̣ бааж̇знд̇о яаанагасса бурад̇о ахоси, ид̇араа бажчад̇о. д̇з наг̇арасамийбам̣ г̇анд̇ваа яаанагам̣ можзд̇ваа нхад̇ваа бхун̃ж̇им̣су. буна б̣од̇хисад̇д̇о яаанагам̣ яож̇зд̇ваа бурад̇о нисийд̣̇и, суж̇аад̇аа вад̇т̇аани баривад̇д̇зд̇ваа алан̇гарид̇ваа бажчад̇о нисийд̣̇и. яаанагасса анд̇онаг̇арам̣ бавидтагаалз б̣аараан̣асирааж̇аа хад̇т̇игканд̇хавараг̇ад̇о наг̇арам̣ бад̣̇агкин̣ам̣ гаронд̇о д̇ам̣ бад̣̇зсам̣ аг̇амааси. суж̇аад̇аа од̇арид̇ваа яаанагасса бажчад̇о бад̣̇асаа бааяааси. рааж̇аа д̇ам̣ д̣̇исваа д̇ассаа руубасамбад̇д̇ияаа аагад̣дхияамааналожано бадиб̣ад̣̇д̇хажид̇д̇о худ̇ваа згам̣ амажжам̣ аан̣аабзси – ‘‘г̇ажча д̇вам̣ зд̇иссаа сассаамигабхаавам̣ ваа ассаамигабхаавам̣ ваа ж̇аанаахий’’д̇и. со г̇анд̇ваа д̇ассаа сассаамигабхаавам̣ н̃ад̇ваа ‘‘сассаамигаа гира, д̣̇зва, яаанагз нисинно бурисо зд̇иссаа саамиго’’д̇и ааха.
Athekadivasaṃ sujātā ‘‘mātāpitaro daṭṭhukāmāmhī’’ti bodhisattassa ārocesi. ‘‘Sādhu, bhadde, maggapātheyyaṃ pahonakaṃ paṭiyādehī’’ti khajjavikatiṃ pacāpetvā khajjakādīni yānake ṭhapetvā yānakaṃ pājento yānakassa purato ahosi, itarā pacchato. Te nagarasamīpaṃ gantvā yānakaṃ mocetvā nhatvā bhuñjiṃsu. Puna bodhisatto yānakaṃ yojetvā purato nisīdi, sujātā vatthāni parivattetvā alaṅkaritvā pacchato nisīdi. Yānakassa antonagaraṃ paviṭṭhakāle bārāṇasirājā hatthikkhandhavaragato nagaraṃ padakkhiṇaṃ karonto taṃ padesaṃ agamāsi. Sujātā otaritvā yānakassa pacchato padasā pāyāsi. Rājā taṃ disvā tassā rūpasampattiyā ākaḍḍhiyamānalocano paṭibaddhacitto hutvā ekaṃ amaccaṃ āṇāpesi – ‘‘gaccha tvaṃ etissā sassāmikabhāvaṃ vā assāmikabhāvaṃ vā jānāhī’’ti. So gantvā tassā sassāmikabhāvaṃ ñatvā ‘‘sassāmikā kira, deva, yānake nisinno puriso etissā sāmiko’’ti āha.
рааж̇аа бадиб̣ад̣̇д̇хажид̇д̇ам̣ винод̣̇зд̇ум̣ асаггонд̇о гилзсаад̇уро худ̇ваа ‘‘згзна нам̣ убааязна маараабзд̇ваа ид̇т̇им̣ г̇ан̣хиссаамий’’д̇и жинд̇зд̇ваа згам̣ бурисам̣ ааманд̇зд̇ваа ‘‘г̇ажча, бхо, имам̣ жуул̣ааман̣им̣ вийт̇им̣ г̇ажчанд̇о вияа худ̇ваа зд̇асса бурисасса яаанагз багкибид̇ваа зхий’’д̇и жуул̣ааман̣им̣ д̣̇ад̇ваа уяяож̇зси. со ‘‘саад̇хуу’’д̇и д̇ам̣ г̇ахзд̇ваа г̇анд̇ваа яаанагз табзд̇ваа ‘‘табид̇о мз, д̣̇зваа’’д̇и ааг̇анд̇ваа аарожзси. рааж̇аа ‘‘жуул̣ааман̣и мз надто’’д̇и ааха, мануссаа згаголаахалам̣ агам̣су. рааж̇аа ‘‘саб̣б̣ад̣̇ваараани бид̣̇ахид̇ваа сан̃жаарам̣ чинд̣̇ид̇ваа жорам̣ бариязсат̇аа’’д̇и ааха, рааж̇абурисаа д̇ат̇аа агам̣су, наг̇арам̣ згасан̇кобхам̣ ахоси. ид̇аро бурисо мануссз г̇ахзд̇ваа б̣од̇хисад̇д̇асса санд̇игам̣ г̇анд̇ваа ‘‘бхо, яаанагам̣ табзхи, ран̃н̃о жуул̣ааман̣и надто, яаанагам̣ сод̇хзссаамий’’д̇и яаанагам̣ сод̇хзнд̇о ад̇д̇анаа табид̇аман̣им̣ г̇ахзд̇ваа б̣од̇хисад̇д̇ам̣ г̇ахзд̇ваа ‘‘ман̣ижоро’’д̇и хад̇т̇зхи жа баад̣̇зхи жа бот̇зд̇ваа бажчааб̣аахам̣ б̣анд̇хид̇ваа нзд̇ваа ‘‘аяам̣ ман̣ижоро’’д̇и ран̃н̃о д̣̇ассзси. рааж̇ааби ‘‘сийсамасса чинд̣̇ат̇аа’’д̇и аан̣аабзси.
Rājā paṭibaddhacittaṃ vinodetuṃ asakkonto kilesāturo hutvā ‘‘ekena naṃ upāyena mārāpetvā itthiṃ gaṇhissāmī’’ti cintetvā ekaṃ purisaṃ āmantetvā ‘‘gaccha, bho, imaṃ cūḷāmaṇiṃ vīthiṃ gacchanto viya hutvā etassa purisassa yānake pakkhipitvā ehī’’ti cūḷāmaṇiṃ datvā uyyojesi. So ‘‘sādhū’’ti taṃ gahetvā gantvā yānake ṭhapetvā ‘‘ṭhapito me, devā’’ti āgantvā ārocesi. Rājā ‘‘cūḷāmaṇi me naṭṭho’’ti āha, manussā ekakolāhalaṃ akaṃsu. Rājā ‘‘sabbadvārāni pidahitvā sañcāraṃ chinditvā coraṃ pariyesathā’’ti āha, rājapurisā tathā akaṃsu, nagaraṃ ekasaṅkhobhaṃ ahosi. Itaro puriso manusse gahetvā bodhisattassa santikaṃ gantvā ‘‘bho, yānakaṃ ṭhapehi, rañño cūḷāmaṇi naṭṭho, yānakaṃ sodhessāmī’’ti yānakaṃ sodhento attanā ṭhapitamaṇiṃ gahetvā bodhisattaṃ gahetvā ‘‘maṇicoro’’ti hatthehi ca pādehi ca pothetvā pacchābāhaṃ bandhitvā netvā ‘‘ayaṃ maṇicoro’’ti rañño dassesi. Rājāpi ‘‘sīsamassa chindathā’’ti āṇāpesi.
ат̇а нам̣ рааж̇абурисаа жад̇уггз жад̇уггз гасаахи д̇аал̣знд̇аа д̣̇агкин̣ад̣̇ваарзна наг̇араа нигкамаабзсум̣. суж̇аад̇ааби яаанагам̣ бахааяа б̣аахаа баг̇г̇аяха барид̣̇звамаанаа ‘‘саами, мам̣ ниссааяа имам̣ д̣̇угкам̣ бад̇д̇осий’’д̇и барид̣̇звамаанаа бажчад̇о бажчад̇о аг̇амааси. рааж̇абурисаа ‘‘сийсамасса чинд̣̇иссаамаа’’д̇и б̣од̇хисад̇д̇ам̣ уд̇д̇аанам̣ нибаж̇ж̇аабзсум̣. д̇ам̣ д̣̇исваа суж̇аад̇аа ад̇д̇ано сийлаг̇ун̣ам̣ ааваж̇ж̇зд̇ваа ‘‘над̇т̇и вад̇а ман̃н̃з имасмим̣ логз сийлаванд̇аанам̣ вихзтагз баабасаахасигамануссз нисзд̇хзд̇ум̣ самад̇т̇аа д̣̇звад̇аа наамаа’’д̇иаад̣̇ийни вад̇ваа батамам̣ г̇аат̇амааха –
Atha naṃ rājapurisā catukke catukke kasāhi tāḷentā dakkhiṇadvārena nagarā nikkhamāpesuṃ. Sujātāpi yānakaṃ pahāya bāhā paggayha paridevamānā ‘‘sāmi, maṃ nissāya imaṃ dukkhaṃ pattosī’’ti paridevamānā pacchato pacchato agamāsi. Rājapurisā ‘‘sīsamassa chindissāmā’’ti bodhisattaṃ uttānaṃ nipajjāpesuṃ. Taṃ disvā sujātā attano sīlaguṇaṃ āvajjetvā ‘‘natthi vata maññe imasmiṃ loke sīlavantānaṃ viheṭhake pāpasāhasikamanusse nisedhetuṃ samatthā devatā nāmā’’tiādīni vatvā paṭhamaṃ gāthamāha –
87.
87.
‘‘на санд̇и д̣̇зваа бавасанд̇и нууна, на хи нууна санд̇и ид̇ха логабаалаа;
‘‘Na santi devā pavasanti nūna, na hi nūna santi idha lokapālā;
сахасаа гаронд̇аанамасан̃н̃ад̇аанам̣, на хи нууна санд̇и бадисзд̇хид̇ааро’’д̇и.
Sahasā karontānamasaññatānaṃ, na hi nūna santi paṭisedhitāro’’ti.
д̇ад̇т̇а на санд̇и, д̣̇зваад̇и имасмим̣ логз сийлаванд̇аанам̣ ологанагаа баабаанан̃жа нисзд̇хагаа на санд̇и нууна д̣̇зваа. бавасанд̇и нуунаад̇и зваруубзсу ваа гижжзсу уббаннзсу нууна бавасанд̇и баваасам̣ г̇ажчанд̇и. ид̇ха, логабаалаад̇и имасмим̣ логз логабааласаммад̇аа саман̣аб̣раахман̣ааби сийлаванд̇аанам̣ ануг̇г̇аахагаа на хи нууна санд̇и. сахасаа гаронд̇аанамасан̃н̃ад̇аананд̇и сахасаа авиймам̣сид̇ваа саахасигам̣ д̣̇аарун̣ам̣ гаммам̣ гаронд̇аанам̣ д̣̇уссийлаанам̣. бадисзд̇хид̇аарод̇и зваруубам̣ гаммам̣ маа гарид̇т̇а, на лаб̣бхаа зд̇ам̣ гаад̇унд̇и бадисзд̇хзнд̇аа над̇т̇ийд̇и ад̇т̇о.
Tattha na santi, devāti imasmiṃ loke sīlavantānaṃ olokanakā pāpānañca nisedhakā na santi nūna devā. Pavasanti nūnāti evarūpesu vā kiccesu uppannesu nūna pavasanti pavāsaṃ gacchanti. Idha, lokapālāti imasmiṃ loke lokapālasammatā samaṇabrāhmaṇāpi sīlavantānaṃ anuggāhakā na hi nūna santi. Sahasā karontānamasaññatānanti sahasā avīmaṃsitvā sāhasikaṃ dāruṇaṃ kammaṃ karontānaṃ dussīlānaṃ. Paṭisedhitāroti evarūpaṃ kammaṃ mā karittha, na labbhā etaṃ kātunti paṭisedhentā natthīti attho.
звам̣ д̇ааяа сийласамбаннааяа барид̣̇звамаанааяа саггасса д̣̇зваран̃н̃о нисиннаасанам̣ ун̣хаагаарам̣ д̣̇ассзси, сагго ‘‘го ну ко мам̣ саггад̇д̇ад̇о жаавзд̇угаамо’’д̇и ааваж̇ж̇знд̇о имам̣ гааран̣ам̣ н̃ад̇ваа ‘‘б̣аараан̣асирааж̇аа ад̇ипарусагаммам̣ гарод̇и, сийласамбаннам̣ суж̇аад̇ам̣ гиламзд̇и, г̇анд̇ум̣ д̣̇аани мз ваддад̇ий’’д̇и д̣̇звалогаа оруяха ад̇д̇ано аанубхаавзна хад̇т̇ибидтз нисиннам̣ д̇ам̣ баабарааж̇аанам̣ хад̇т̇игканд̇хад̇о од̇аарзд̇ваа д̇хаммаг̇ан̣д̣игааяа уд̇д̇аанам̣ нибаж̇ж̇аабзд̇ваа б̣од̇хисад̇д̇ам̣ угкибид̇ваа саб̣б̣аалан̇гаарзхи алан̇гарид̇ваа рааж̇авзсам̣ г̇аахаабзд̇ваа хад̇т̇игканд̇хз нисийд̣̇аабзси. рааж̇абурисаа парасум̣ угкибид̇ваа сийсам̣ чинд̣̇анд̇аа ран̃н̃о сийсам̣ чинд̣̇им̣су, чиннагаалзязва жасса ран̃н̃о сийсабхаавам̣ ж̇ааним̣су. сагго д̣̇зварааж̇аа д̣̇иссамаанагасарийрзнзва б̣од̇хисад̇д̇асса санд̇игам̣ г̇анд̇ваа б̣од̇хисад̇д̇асса рааж̇аабхисзгам̣ гад̇ваа суж̇аад̇ааяа жа аг̇г̇амахзсидтаанам̣ д̣̇аабзси. амажжаа жзва б̣раахман̣аг̇ахабад̇игаад̣̇аяо жа саггам̣ д̣̇зварааж̇аанам̣ д̣̇исваа ‘‘ад̇хаммигарааж̇аа маарид̇о, ид̣̇аани амхзхи саггад̣̇ад̇д̇иго д̇хаммигарааж̇аа лад̣̇д̇хо’’д̇и соманассаббад̇д̇аа ахзсум̣.
Evaṃ tāya sīlasampannāya paridevamānāya sakkassa devarañño nisinnāsanaṃ uṇhākāraṃ dassesi, sakko ‘‘ko nu kho maṃ sakkattato cāvetukāmo’’ti āvajjento imaṃ kāraṇaṃ ñatvā ‘‘bārāṇasirājā atipharusakammaṃ karoti, sīlasampannaṃ sujātaṃ kilameti, gantuṃ dāni me vaṭṭatī’’ti devalokā oruyha attano ānubhāvena hatthipiṭṭhe nisinnaṃ taṃ pāparājānaṃ hatthikkhandhato otāretvā dhammagaṇḍikāya uttānaṃ nipajjāpetvā bodhisattaṃ ukkhipitvā sabbālaṅkārehi alaṅkaritvā rājavesaṃ gāhāpetvā hatthikkhandhe nisīdāpesi. Rājapurisā pharasuṃ ukkhipitvā sīsaṃ chindantā rañño sīsaṃ chindiṃsu, chinnakāleyeva cassa rañño sīsabhāvaṃ jāniṃsu. Sakko devarājā dissamānakasarīreneva bodhisattassa santikaṃ gantvā bodhisattassa rājābhisekaṃ katvā sujātāya ca aggamahesiṭṭhānaṃ dāpesi. Amaccā ceva brāhmaṇagahapatikādayo ca sakkaṃ devarājānaṃ disvā ‘‘adhammikarājā mārito, idāni amhehi sakkadattiko dhammikarājā laddho’’ti somanassappattā ahesuṃ.
саггоби аагаасз тад̇ваа ‘‘аяам̣ во саггад̣̇ад̇д̇иго рааж̇аа, ид̇о бадтааяа д̇хаммзна раж̇ж̇ам̣ гаарзссад̇и. сажз хи рааж̇аа ад̇хаммиго ход̇и, д̣̇зво агаалз вассад̇и, гаалз на вассад̇и, чаад̇абхаяам̣ рог̇абхаяам̣ сад̇т̇абхаяанд̇и имаани д̇ийн̣и бхаяаани убаг̇ад̇аанзва хонд̇ий’’д̇и овад̣̇анд̇о д̣̇уд̇ияам̣ г̇аат̇амааха –
Sakkopi ākāse ṭhatvā ‘‘ayaṃ vo sakkadattiko rājā, ito paṭṭhāya dhammena rajjaṃ kāressati. Sace hi rājā adhammiko hoti, devo akāle vassati, kāle na vassati, chātabhayaṃ rogabhayaṃ satthabhayanti imāni tīṇi bhayāni upagatāneva hontī’’ti ovadanto dutiyaṃ gāthamāha –
88.
88.
‘‘агаалз вассад̇ий д̇асса, гаалз д̇асса на вассад̇и;
‘‘Akāle vassatī tassa, kāle tassa na vassati;
саг̇г̇аа жа жавад̇и таанаа, нану со д̇аавад̇аа хад̇о’’д̇и.
Saggā ca cavati ṭhānā, nanu so tāvatā hato’’ti.
д̇ад̇т̇а агаалзд̇и ад̇хаммигаран̃н̃о раж̇ж̇з аяуд̇д̇агаалз сассаанам̣ баггагаалз ваа лааяанамад̣̇д̣̇анаад̣̇игаалз ваа д̣̇зво вассад̇и. гаалзд̇и яуд̇д̇абаяуд̇д̇агаалз вабанагаалз д̇арун̣асассагаалз г̇аб̣бхаг̇г̇ахан̣агаалз жа на вассад̇и. саг̇г̇аа жа жавад̇и таанаад̇и саг̇г̇асан̇каад̇аа таанаа д̣̇звалогаа жавад̇ийд̇и ад̇т̇о. ад̇хаммигарааж̇аа хи аббадилаабхавасзна д̣̇звалогаа жавад̇и наама, саг̇г̇зби ваа раж̇ж̇ам̣ гаарзнд̇о ад̇хаммигарааж̇аа д̇ад̇о жавад̇ийд̇иби ад̇т̇о. нану со д̇аавад̇аа хад̇од̇и нану со ад̇хаммиго рааж̇аа зд̇д̇агзна хад̇о ход̇и. ат̇а ваа згам̣саваажий зд̇т̇а ну-гааро, нзсо згам̣сзна зд̇д̇аавад̇аа хад̇о, адтасу бана махаанираязсу сол̣асасу жа уссад̣̇анираязсу д̣̇ийгхарад̇д̇ам̣ со хан̃н̃иссад̇ийд̇и аяамзд̇т̇а ад̇т̇о.
Tattha akāleti adhammikarañño rajje ayuttakāle sassānaṃ pakkakāle vā lāyanamaddanādikāle vā devo vassati. Kāleti yuttapayuttakāle vapanakāle taruṇasassakāle gabbhaggahaṇakāle ca na vassati. Saggā ca cavati ṭhānāti saggasaṅkhātā ṭhānā devalokā cavatīti attho. Adhammikarājā hi appaṭilābhavasena devalokā cavati nāma, saggepi vā rajjaṃ kārento adhammikarājā tato cavatītipi attho. Nanu so tāvatā hatoti nanu so adhammiko rājā ettakena hato hoti. Atha vā ekaṃsavācī ettha nu-kāro, neso ekaṃsena ettāvatā hato, aṭṭhasu pana mahānirayesu soḷasasu ca ussadanirayesu dīgharattaṃ so haññissatīti ayamettha attho.
звам̣ сагго махааж̇анасса оваад̣̇ам̣ д̣̇ад̇ваа ад̇д̇ано д̣̇звадтаанамзва аг̇амааси. б̣од̇хисад̇д̇оби д̇хаммзна раж̇ж̇ам̣ гаарзд̇ваа саг̇г̇абурам̣ буурзси.
Evaṃ sakko mahājanassa ovādaṃ datvā attano devaṭṭhānameva agamāsi. Bodhisattopi dhammena rajjaṃ kāretvā saggapuraṃ pūresi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси – ‘‘д̇ад̣̇аа ад̇хаммигарааж̇аа д̣̇звад̣̇ад̇д̇о ахоси, сагго ануруд̣̇д̇хо, суж̇аад̇аа раахуламаад̇аа, саггад̣̇ад̇д̇ияарааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi – ‘‘tadā adhammikarājā devadatto ahosi, sakko anuruddho, sujātā rāhulamātā, sakkadattiyarājā pana ahameva ahosi’’nti.
ман̣ижораж̇аад̇агаван̣н̣анаа жад̇уд̇т̇аа.
Maṇicorajātakavaṇṇanā catutthā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 194. ман̣ижораж̇аад̇агам̣ • 194. Maṇicorajātakaṃ
