| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[397] 2. манож̇аж̇аад̇агаван̣н̣анаа
[397] 2. Manojajātakavaṇṇanā
яат̇аа жаабо ниннамад̇ийд̇и ид̣̇ам̣ сад̇т̇аа взл̣уванз вихаранд̇о вибагкасзвагам̣ бхигкум̣ аараб̣бха гат̇зси. вад̇т̇у бана хздтаа махил̣аамукаж̇аад̇агз (ж̇аа. 1.1.26) вид̇т̇аарид̇амзва. д̇ад̣̇аа бана сад̇т̇аа ‘‘на, бхигкавз, ид̣̇аанзва, буб̣б̣збзса вибагкасзвагоязваа’’д̇и вад̇ваа ад̇ийд̇ам̣ аахари.
Yathā cāpo ninnamatīti idaṃ satthā veḷuvane viharanto vipakkhasevakaṃ bhikkhuṃ ārabbha kathesi. Vatthu pana heṭṭhā mahiḷāmukhajātake (jā. 1.1.26) vitthāritameva. Tadā pana satthā ‘‘na, bhikkhave, idāneva, pubbepesa vipakkhasevakoyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о сийхо худ̇ваа сийхияаа сад̣̇д̇хим̣ сам̣васанд̇о д̣̇вз бод̇агз лабхи – буд̇д̇ан̃жа д̇хийд̇аран̃жа. буд̇д̇асса манож̇од̇и наамам̣ ахоси, со ваяаббад̇д̇о згам̣ сийхабод̇игам̣ г̇ан̣хи. ид̇и д̇з бан̃жа ж̇анаа ахзсум̣. манож̇о ванамахим̣саад̣̇аяо вад̇хид̇ваа мам̣сам̣ аахарид̇ваа маад̇аабид̇аро жа бхаг̇инин̃жа баж̇аабад̇ин̃жа босзд̇и. со згад̣̇ивасам̣ г̇ожарабхуумияам̣ г̇ирияам̣ наама син̇г̇аалам̣ балааяид̇ум̣ аббахонд̇ам̣ урзна нибаннам̣ д̣̇исваа ‘‘гим̣, саммаа’’д̇и бужчид̇ваа ‘‘убадтаад̇угаамомхи, саамий’’д̇и вуд̇д̇з ‘‘саад̇ху, убадтахассуу’’д̇и д̇ам̣ г̇ахзд̇ваа ад̇д̇ано васанаг̇ухам̣ аанзси. б̣од̇хисад̇д̇о д̇ам̣ д̣̇исваа ‘‘д̇аад̇а манож̇а, син̇г̇аалаа наама д̣̇уссийлаа баабад̇хаммаа агижжз нияож̇знд̇и, маа зд̇ам̣ ад̇д̇ано санд̇игз гарий’’д̇и ваарзд̇ум̣ наасагки.
Atīte bārāṇasiyaṃ brahmadatte rajjaṃ kārente bodhisatto sīho hutvā sīhiyā saddhiṃ saṃvasanto dve potake labhi – puttañca dhītarañca. Puttassa manojoti nāmaṃ ahosi, so vayappatto ekaṃ sīhapotikaṃ gaṇhi. Iti te pañca janā ahesuṃ. Manojo vanamahiṃsādayo vadhitvā maṃsaṃ āharitvā mātāpitaro ca bhaginiñca pajāpatiñca poseti. So ekadivasaṃ gocarabhūmiyaṃ giriyaṃ nāma siṅgālaṃ palāyituṃ appahontaṃ urena nipannaṃ disvā ‘‘kiṃ, sammā’’ti pucchitvā ‘‘upaṭṭhātukāmomhi, sāmī’’ti vutte ‘‘sādhu, upaṭṭhahassū’’ti taṃ gahetvā attano vasanaguhaṃ ānesi. Bodhisatto taṃ disvā ‘‘tāta manoja, siṅgālā nāma dussīlā pāpadhammā akicce niyojenti, mā etaṃ attano santike karī’’ti vāretuṃ nāsakkhi.
ат̇згад̣̇ивасам̣ син̇г̇аало ассамам̣сам̣ каад̣̇ид̇угаамо манож̇ам̣ ааха – ‘‘саами, амхзхи табзд̇ваа ассамам̣сам̣ ан̃н̃ам̣ акаад̣̇ид̇абуб̣б̣ам̣ наама над̇т̇и, ассам̣ г̇ан̣хиссаамаа’’д̇и. ‘‘гахам̣ бана, самма, ассаа хонд̇ий’’д̇и? ‘‘б̣аараан̣асияам̣ над̣̇ийд̇ийрз’’д̇и. со д̇асса важанам̣ г̇ахзд̇ваа д̇зна сад̣̇д̇хим̣ ассаанам̣ над̣̇ияаа нхаанавзлааяам̣ г̇анд̇ваа згам̣ ассам̣ г̇ахзд̇ваа бидтияам̣ ааробзд̇ваа взг̇зна ад̇д̇ано г̇ухаад̣̇ваарамзва ааг̇ад̇о. ат̇асса бид̇аа ассамам̣сам̣ каад̣̇ид̇ваа ‘‘д̇аад̇а, ассаа наама рааж̇абхог̇аа, рааж̇аано жа наама анзгамааяаа гусалзхи д̇хануг̇г̇ахзхи виж̇жхаабзнд̇и, ассамам̣сакаад̣̇анасийхаа наама д̣̇ийгхааяугаа на хонд̇и, ид̇о бадтааяа маа ассам̣ г̇ан̣хий’’д̇и ааха. со бид̇у важанам̣ агад̇ваа г̇ан̣хад̇зва. ‘‘сийхо ассз г̇ан̣хаад̇ий’’д̇и суд̇ваа рааж̇аа анд̇онаг̇арзязва ассаанам̣ богкаран̣им̣ гаараабзси. д̇ад̇оби ааг̇анд̇ваа г̇ан̣хиязва. рааж̇аа ассасаалам̣ гаарзд̇ваа анд̇осаалааяамзва д̇ин̣од̣̇агам̣ д̣̇аабзси. сийхо баагаарамад̇т̇агзна г̇анд̇ваа анд̇осаалаад̇оби г̇ан̣хиязва.
Athekadivasaṃ siṅgālo assamaṃsaṃ khāditukāmo manojaṃ āha – ‘‘sāmi, amhehi ṭhapetvā assamaṃsaṃ aññaṃ akhāditapubbaṃ nāma natthi, assaṃ gaṇhissāmā’’ti. ‘‘Kahaṃ pana, samma, assā hontī’’ti? ‘‘Bārāṇasiyaṃ nadītīre’’ti. So tassa vacanaṃ gahetvā tena saddhiṃ assānaṃ nadiyā nhānavelāyaṃ gantvā ekaṃ assaṃ gahetvā piṭṭhiyaṃ āropetvā vegena attano guhādvārameva āgato. Athassa pitā assamaṃsaṃ khāditvā ‘‘tāta, assā nāma rājabhogā, rājāno ca nāma anekamāyā kusalehi dhanuggahehi vijjhāpenti, assamaṃsakhādanasīhā nāma dīghāyukā na honti, ito paṭṭhāya mā assaṃ gaṇhī’’ti āha. So pitu vacanaṃ akatvā gaṇhateva. ‘‘Sīho asse gaṇhātī’’ti sutvā rājā antonagareyeva assānaṃ pokkharaṇiṃ kārāpesi. Tatopi āgantvā gaṇhiyeva. Rājā assasālaṃ kāretvā antosālāyameva tiṇodakaṃ dāpesi. Sīho pākāramatthakena gantvā antosālātopi gaṇhiyeva.
рааж̇аа згам̣ агкан̣авзд̇хим̣ д̇хануг̇г̇ахам̣ баггосаабзд̇ваа ‘‘сагкиссаси д̇аад̇а, сийхам̣ виж̇жхид̇у’’нд̇и ааха. со ‘‘саггомий’’д̇и вад̇ваа баагаарам̣ ниссааяа сийхасса ааг̇аманамаг̇г̇з аддагам̣ гаарзд̇ваа адтааси. сийхо ааг̇анд̇ваа б̣ахисусаанз син̇г̇аалам̣ табзд̇ваа ассаг̇ахан̣ад̇т̇ааяа наг̇арам̣ багканд̣̇и. д̇хануг̇г̇ахо ааг̇аманагаалз ‘‘ад̇ид̇икин̣о взг̇о’’д̇и сийхам̣ авиж̇жхид̇ваа ассам̣ г̇ахзд̇ваа г̇аманагаалз г̇арубхаарад̇ааяа олийнавзг̇ам̣ сийхам̣ д̇икин̣зна наараажзна бажчаабхааг̇з виж̇жхи. наараажо буримагааязна нигкамид̇ваа аагаасам̣ багканд̣̇и. сийхо ‘‘вид̣̇д̇хосмий’’д̇и вирави. д̇хануг̇г̇ахо д̇ам̣ виж̇жхид̇ваа асани вияа ж̇ияам̣ бот̇зси. син̇г̇аало сийхасса жа ж̇ияааяа жа сад̣̇д̣̇ам̣ суд̇ваа ‘‘сахааяо мз д̇хануг̇г̇ахзна виж̇жхид̇ваа маарид̇о бхависсад̇и, мад̇агзна хи сад̣̇д̇хим̣ виссаасо наама над̇т̇и, ид̣̇аани мама багад̇ияаа васанаванамзва г̇амиссаамий’’д̇и ад̇д̇анаава сад̣̇д̇хим̣ саллабанд̇о д̣̇вз г̇аат̇аа абхааси –
Rājā ekaṃ akkhaṇavedhiṃ dhanuggahaṃ pakkosāpetvā ‘‘sakkhissasi tāta, sīhaṃ vijjhitu’’nti āha. So ‘‘sakkomī’’ti vatvā pākāraṃ nissāya sīhassa āgamanamagge aṭṭakaṃ kāretvā aṭṭhāsi. Sīho āgantvā bahisusāne siṅgālaṃ ṭhapetvā assagahaṇatthāya nagaraṃ pakkhandi. Dhanuggaho āgamanakāle ‘‘atitikhiṇo vego’’ti sīhaṃ avijjhitvā assaṃ gahetvā gamanakāle garubhāratāya olīnavegaṃ sīhaṃ tikhiṇena nārācena pacchābhāge vijjhi. Nārāco purimakāyena nikkhamitvā ākāsaṃ pakkhandi. Sīho ‘‘viddhosmī’’ti viravi. Dhanuggaho taṃ vijjhitvā asani viya jiyaṃ pothesi. Siṅgālo sīhassa ca jiyāya ca saddaṃ sutvā ‘‘sahāyo me dhanuggahena vijjhitvā mārito bhavissati, matakena hi saddhiṃ vissāso nāma natthi, idāni mama pakatiyā vasanavanameva gamissāmī’’ti attanāva saddhiṃ sallapanto dve gāthā abhāsi –
8.
8.
‘‘яат̇аа жаабо ниннамад̇и, ж̇ияаа жааби нигууж̇ад̇и;
‘‘Yathā cāpo ninnamati, jiyā cāpi nikūjati;
хан̃н̃ад̇з нууна манож̇о, миг̇арааж̇аа сакаа мама.
Haññate nūna manojo, migarājā sakhā mama.
9.
9.
‘‘ханд̣̇а д̣̇аани вананд̇аани, баггамаами яат̇аасукам̣;
‘‘Handa dāni vanantāni, pakkamāmi yathāsukhaṃ;
нзд̇аад̣̇исаа сакаа хонд̇и, лаб̣бхаа мз ж̇ийвад̇о сакаа’’д̇и.
Netādisā sakhā honti, labbhā me jīvato sakhā’’ti.
д̇ад̇т̇а яат̇аад̇и язнаагаарзнзва жаабо ниннамад̇и. хан̃н̃ад̇з нуунаад̇и нууна хан̃н̃ад̇и. нзд̇аад̣̇исаад̇и зваруубаа мад̇агаа сахааяаа наама на хонд̇и. лаб̣бхаа мзд̇и ж̇ийвад̇о мама сахааяо наама саггаа лад̣̇д̇хум̣.
Tattha yathāti yenākāreneva cāpo ninnamati. Haññate nūnāti nūna haññati. Netādisāti evarūpā matakā sahāyā nāma na honti. Labbhā meti jīvato mama sahāyo nāma sakkā laddhuṃ.
сийхоби згавзг̇зна г̇анд̇ваа ассам̣ г̇ухаад̣̇ваарз баад̇зд̇ваа саяамби марид̇ваа бад̇и. ат̇асса н̃аад̇агаа нигкамид̇ваа д̇ам̣ лохид̇амагкид̇ам̣ бахаарамукзхи баг̇гхарид̇алохид̇ам̣ баабаж̇анасзвид̇ааяа ж̇ийвид̇агкаяам̣ бад̇д̇ам̣ ад̣̇д̣̇асам̣су, д̣̇исваа жасса маад̇аа бид̇аа бхаг̇иний баж̇аабад̇ийд̇и бадибаадияаа жад̇ассо г̇аат̇аа бхаасим̣су –
Sīhopi ekavegena gantvā assaṃ guhādvāre pātetvā sayampi maritvā pati. Athassa ñātakā nikkhamitvā taṃ lohitamakkhitaṃ pahāramukhehi paggharitalohitaṃ pāpajanasevitāya jīvitakkhayaṃ pattaṃ addasaṃsu, disvā cassa mātā pitā bhaginī pajāpatīti paṭipāṭiyā catasso gāthā bhāsiṃsu –
10.
10.
‘‘на баабаж̇анасам̣сзвий, ажжанд̇ам̣ сукамзд̇хад̇и;
‘‘Na pāpajanasaṃsevī, accantaṃ sukhamedhati;
манож̇ам̣ басса сзмаанам̣, г̇ирияассаанусаасаний.
Manojaṃ passa semānaṃ, giriyassānusāsanī.
11.
11.
‘‘на баабасамбаван̇гзна, маад̇аа буд̇д̇зна нанд̣̇ад̇и;
‘‘Na pāpasampavaṅkena, mātā puttena nandati;
манож̇ам̣ басса сзмаанам̣, ажчаннам̣ самхи лохид̇з.
Manojaṃ passa semānaṃ, acchannaṃ samhi lohite.
12.
12.
‘‘звамаабаж̇ж̇ад̇з босо, баабияо жа ниг̇ажчад̇и;
‘‘Evamāpajjate poso, pāpiyo ca nigacchati;
яо вз хид̇аанам̣ важанам̣, на гарод̇и ад̇т̇ад̣̇ассинам̣.
Yo ve hitānaṃ vacanaṃ, na karoti atthadassinaṃ.
13.
13.
‘‘зван̃жа со ход̇и д̇ад̇о жа баабияо, яо уд̇д̇амо ад̇хамаж̇ануубасзвий;
‘‘Evañca so hoti tato ca pāpiyo, yo uttamo adhamajanūpasevī;
бассуд̇д̇амам̣ ад̇хамаж̇ануубасзвид̇ам̣, миг̇аад̇хибам̣ сараваравзг̇анид̣̇д̇худ̇а’’нд̇и.
Passuttamaṃ adhamajanūpasevitaṃ, migādhipaṃ saravaraveganiddhuta’’nti.
д̇ад̇т̇а ажжанд̇ам̣ сукамзд̇хад̇ийд̇и на жирам̣ сукам̣ лабхад̇и. г̇ирияассаанусаасанийд̇и аяам̣ зваруубаа г̇ирияассаанусаасанийд̇и г̇араханд̇о ааха. баабасамбаван̇гзнаад̇и баабзсу самбаван̇гзна баабасахааязна. ажчаннанд̇и нимуг̇г̇ам̣. баабияо жа ниг̇ажчад̇ийд̇и баабан̃жа винд̣̇ад̇и. хид̇аананд̇и ад̇т̇агаамаанам̣. ад̇т̇ад̣̇ассинанд̇и анааг̇ад̇аад̇т̇ам̣ бассанд̇аанам̣. баабияод̇и баабад̇аро. ад̇хамаж̇ануубасзвийд̇и ад̇хамаж̇анам̣ убасзвий. уд̇д̇аманд̇и сарийраб̣алзна ж̇здтагам̣.
Tattha accantaṃ sukhamedhatīti na ciraṃ sukhaṃ labhati. Giriyassānusāsanīti ayaṃ evarūpā giriyassānusāsanīti garahanto āha. Pāpasampavaṅkenāti pāpesu sampavaṅkena pāpasahāyena. Acchannanti nimuggaṃ. Pāpiyo ca nigacchatīti pāpañca vindati. Hitānanti atthakāmānaṃ. Atthadassinanti anāgataatthaṃ passantānaṃ. Pāpiyoti pāpataro. Adhamajanūpasevīti adhamajanaṃ upasevī. Uttamanti sarīrabalena jeṭṭhakaṃ.
бажчимаа абхисамб̣уд̣̇д̇хаг̇аат̇аа –
Pacchimā abhisambuddhagāthā –
14.
14.
‘‘нихийяад̇и бурисо нихийнасзвий, на жа хааязт̇а гад̣̇аажи д̇уляасзвий;
‘‘Nihīyati puriso nihīnasevī, na ca hāyetha kadāci tulyasevī;
сздтамубаг̇амам̣ уд̣̇зд̇и киббам̣, д̇асмаад̇д̇анаа уд̇д̇арид̇арам̣ бхаж̇зт̇аа’’д̇и.
Seṭṭhamupagamaṃ udeti khippaṃ, tasmāttanā uttaritaraṃ bhajethā’’ti.
д̇ад̇т̇а нихийяад̇ийд̇и бхигкавз, нихийнасзвий наама манож̇о сийхо вияа нихийяад̇и барихааяад̇и винаасам̣ баабун̣аад̇и. д̇уляасзвийд̇и сийлаад̣̇ийхи ад̇д̇анаа сад̣̇исам̣ сзвамаано на хааяад̇и, вад̣дхиязва банасса ход̇и. сздтамубаг̇аманд̇и сийлаад̣̇ийхи уд̇д̇арид̇арам̣язва убаг̇ажчанд̇о. уд̣̇зд̇и киббанд̇и сийгхамзва сийлаад̣̇ийхи г̇ун̣зхи уд̣̇зд̇и, вуд̣̇д̇хим̣ убаг̇ажчад̇ийд̇и.
Tattha nihīyatīti bhikkhave, nihīnasevī nāma manojo sīho viya nihīyati parihāyati vināsaṃ pāpuṇāti. Tulyasevīti sīlādīhi attanā sadisaṃ sevamāno na hāyati, vaḍḍhiyeva panassa hoti. Seṭṭhamupagamanti sīlādīhi uttaritaraṃyeva upagacchanto. Udeti khippanti sīghameva sīlādīhi guṇehi udeti, vuddhiṃ upagacchatīti.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз вибагкасзваго сод̇аабад̇д̇ипалз бад̇идтахи.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne vipakkhasevako sotāpattiphale patiṭṭhahi.
д̇ад̣̇аа син̇г̇аало д̣̇звад̣̇ад̇д̇о ахоси, манож̇о вибагкасзваго, бхаг̇иний уббалаван̣н̣аа, бхарияаа кзмаа бхигкуний, маад̇аа раахуламаад̇аа, бид̇аа сийхарааж̇аа бана ахамзва ахосинд̇и.
Tadā siṅgālo devadatto ahosi, manojo vipakkhasevako, bhaginī uppalavaṇṇā, bhariyā khemā bhikkhunī, mātā rāhulamātā, pitā sīharājā pana ahameva ahosinti.
манож̇аж̇аад̇агаван̣н̣анаа д̣̇уд̇ияаа.
Manojajātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 397. манож̇аж̇аад̇агам̣ • 397. Manojajātakaṃ
