| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ရာဓသံယုတ္တံ
2. Rādhasaṃyuttaṃ
၁. ပဌမဝဂ္ဂော
1. Paṭhamavaggo
၁. မာရသုတ္တံ
1. Mārasuttaṃ
၁၆၀. သာဝတ္ထိနိဒာနံ ။ အထ ခော အာယသ္မာ ရာဓော ယေန ဘဂဝာ တေနုပသင္ကမိ ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ ရာဓော ဘဂဝန္တံ ဧတဒဝောစ –
160. Sāvatthinidānaṃ . Atha kho āyasmā rādho yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā rādho bhagavantaṃ etadavoca –
‘‘‘မာရော, မာရော’တိ, ဘန္တေ, ဝုစ္စတိ။ ကိတ္တာဝတာ နု ခော, ဘန္တေ, မာရော’’တိ? ‘‘ရူပေ ခော, ရာဓ, သတိ မာရော ဝာ အသ္သ မာရေတာ ဝာ ယော ဝာ ပန မီယတိ။ တသ္မာတိဟ တ္ဝံ, ရာဓ, ရူပံ မာရောတိ ပသ္သ, မာရေတာတိ ပသ္သ, မီယတီတိ ပသ္သ, ရောဂောတိ ပသ္သ, ဂဏ္ဍောတိ ပသ္သ, သလ္လန္တိ ပသ္သ, အဃန္တိ ပသ္သ, အဃဘူတန္တိ ပသ္သ။ ယေ နံ ဧဝံ ပသ္သန္တိ တေ သမ္မာ ပသ္သန္တိ။ ဝေဒနာယ သတိ။ သညာယ သတိ။ သင္ခာရေသု သတိ။ ဝိညာဏေ သတိ မာရော ဝာ အသ္သ မာရေတာ ဝာ ယော ဝာ ပန မီယတိ။ တသ္မာတိဟ တ္ဝံ, ရာဓ, ဝိညာဏံ မာရောတိ ပသ္သ, မာရေတာတိ ပသ္သ, မီယတီတိ ပသ္သ, ရောဂောတိ ပသ္သ, ဂဏ္ဍောတိ ပသ္သ, သလ္လန္တိ ပသ္သ, အဃန္တိ ပသ္သ, အဃဘူတန္တိ ပသ္သ။ ယေ နံ ဧဝံ ပသ္သန္တိ, တေ သမ္မာ ပသ္သန္တီ’’တိ။
‘‘‘Māro, māro’ti, bhante, vuccati. Kittāvatā nu kho, bhante, māro’’ti? ‘‘Rūpe kho, rādha, sati māro vā assa māretā vā yo vā pana mīyati. Tasmātiha tvaṃ, rādha, rūpaṃ māroti passa, māretāti passa, mīyatīti passa, rogoti passa, gaṇḍoti passa, sallanti passa, aghanti passa, aghabhūtanti passa. Ye naṃ evaṃ passanti te sammā passanti. Vedanāya sati… saññāya sati… saṅkhāresu sati… viññāṇe sati māro vā assa māretā vā yo vā pana mīyati. Tasmātiha tvaṃ, rādha, viññāṇaṃ māroti passa, māretāti passa, mīyatīti passa, rogoti passa, gaṇḍoti passa, sallanti passa, aghanti passa, aghabhūtanti passa. Ye naṃ evaṃ passanti, te sammā passantī’’ti.
‘‘သမ္မာဒသ္သနံ ပန, ဘန္တေ, ကိမတ္ထိယ’’န္တိ? ‘‘သမ္မာဒသ္သနံ ခော, ရာဓ, နိဗ္ဗိဒတ္ထံ’’။ ‘‘နိဗ္ဗိဒာ ပန, ဘန္တေ, ကိမတ္ထိယာ’’တိ? ‘‘နိဗ္ဗိဒာ ခော, ရာဓ, ဝိရာဂတ္ထာ’’။ ‘‘ဝိရာဂော ပန, ဘန္တေ , ကိမတ္ထိယော’’တိ? ‘‘ဝိရာဂော ခော, ရာဓ, ဝိမုတ္တတ္ထော’’။ ‘‘ဝိမုတ္တိ ပန, ဘန္တေ, ကိမတ္ထိယာ’’တိ? ‘‘ဝိမုတ္တိ ခော, ရာဓ, နိဗ္ဗာနတ္ထာ’’။ ‘‘နိဗ္ဗာနံ ပန, ဘန္တေ, ကိမတ္ထိယ’’န္တိ? ‘‘အစ္စယာသိ 1, ရာဓ, ပဉ္ဟံ, နာသက္ခိ ပဉ္ဟသ္သ ပရိယန္တံ ဂဟေတုံ။ နိဗ္ဗာနောဂဓဉ္ဟိ, ရာဓ, ဗ္ရဟ္မစရိယံ ဝုသ္သတိ, နိဗ္ဗာနပရာယနံ နိဗ္ဗာနပရိယောသာန’’န္တိ။ ပဌမံ။
‘‘Sammādassanaṃ pana, bhante, kimatthiya’’nti? ‘‘Sammādassanaṃ kho, rādha, nibbidatthaṃ’’. ‘‘Nibbidā pana, bhante, kimatthiyā’’ti? ‘‘Nibbidā kho, rādha, virāgatthā’’. ‘‘Virāgo pana, bhante , kimatthiyo’’ti? ‘‘Virāgo kho, rādha, vimuttattho’’. ‘‘Vimutti pana, bhante, kimatthiyā’’ti? ‘‘Vimutti kho, rādha, nibbānatthā’’. ‘‘Nibbānaṃ pana, bhante, kimatthiya’’nti? ‘‘Accayāsi 2, rādha, pañhaṃ, nāsakkhi pañhassa pariyantaṃ gahetuṃ. Nibbānogadhañhi, rādha, brahmacariyaṃ vussati, nibbānaparāyanaṃ nibbānapariyosāna’’nti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. မာရသုတ္တဝဏ္ဏနာ • 1. Mārasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. မာရသုတ္တဝဏ္ဏနာ • 1. Mārasuttavaṇṇanā
