| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
10. மாதிகாகதா²
10. Mātikākathā
41. நிச்சா²தோதி நெக்க²ம்மேன காமச்ச²ந்த³தோ நிச்சா²தோ, அப்³யாபாதே³ன ப்³யாபாத³தோ நிச்சா²தோ…பே॰… பட²மேன ஜா²னேன நீவரணேஹி நிச்சா²தோ…பே॰… அரஹத்தமக்³கே³ன ஸப்³ப³கிலேஸேஹி நிச்சா²தோ.
41.Nicchātoti nekkhammena kāmacchandato nicchāto, abyāpādena byāpādato nicchāto…pe… paṭhamena jhānena nīvaraṇehi nicchāto…pe… arahattamaggena sabbakilesehi nicchāto.
மொக்கோ² விமொக்கோ²தி நெக்க²ம்மேன காமச்ச²ந்த³தோ முச்சதீதி – மொக்கோ² விமொக்கோ². அப்³யாபாதே³ன ப்³யாபாத³தோ முச்சதீதி – மொக்கோ² விமொக்கோ²…பே॰… பட²மேன ஜா²னேன நீவரணேஹி முச்சதீதி – மொக்கோ² விமொக்கோ²…பே॰… அரஹத்தமக்³கே³ன ஸப்³ப³கிலேஸேஹி முச்சதீதி – மொக்கோ² விமொக்கோ².
Mokkho vimokkhoti nekkhammena kāmacchandato muccatīti – mokkho vimokkho. Abyāpādena byāpādato muccatīti – mokkho vimokkho…pe… paṭhamena jhānena nīvaraṇehi muccatīti – mokkho vimokkho…pe… arahattamaggena sabbakilesehi muccatīti – mokkho vimokkho.
விஜ்ஜாவிமுத்தீதி நெக்க²ம்மங் விஜ்ஜதீதி விஜ்ஜா, காமச்ச²ந்த³தோ முச்சதீதி விமுத்தி. விஜ்ஜந்தோ முச்சதி, முச்சந்தோ விஜ்ஜதீதி – விஜ்ஜாவிமுத்தி. அப்³யாபாதோ³ 5 விஜ்ஜதீதி விஜ்ஜா, ப்³யாபாத³தோ விமுச்சதீதி விமுத்தி. விஜ்ஜந்தோ முச்சதி, முச்சந்தோ விஜ்ஜதீதி – விஜ்ஜாவிமுத்தி…பே॰… அரஹத்தமக்³கோ³ விஜ்ஜதீதி விஜ்ஜா, ஸப்³ப³கிலேஸேஹி முச்சதீதி விமுத்தி. விஜ்ஜந்தோ முச்சதி, முச்சந்தோ விஜ்ஜதீதி – விஜ்ஜாவிமுத்தி.
Vijjāvimuttīti nekkhammaṃ vijjatīti vijjā, kāmacchandato muccatīti vimutti. Vijjanto muccati, muccanto vijjatīti – vijjāvimutti. Abyāpādo 6 vijjatīti vijjā, byāpādato vimuccatīti vimutti. Vijjanto muccati, muccanto vijjatīti – vijjāvimutti…pe… arahattamaggo vijjatīti vijjā, sabbakilesehi muccatīti vimutti. Vijjanto muccati, muccanto vijjatīti – vijjāvimutti.
அதி⁴ஸீலங் அதி⁴சித்தங் அதி⁴பஞ்ஞாதி நெக்க²ம்மேன காமச்ச²ந்த³ங், ஸங்வரட்டே²ன ஸீலவிஸுத்³தி⁴, அவிக்கே²பட்டே²ன சித்தவிஸுத்³தி⁴, த³ஸ்ஸனட்டே²ன தி³ட்டி²விஸுத்³தி⁴. யோ தத்த² ஸங்வரட்டோ², அயங் அதி⁴ஸீலஸிக்கா² . யோ தத்த² அவிக்கே²பட்டோ², அயங் அதி⁴சித்தஸிக்கா². யோ தத்த² த³ஸ்ஸனட்டோ², அயங் அதி⁴பஞ்ஞாஸிக்கா². அப்³யாபாதே³ன ப்³யாபாத³ங் ஸங்வரட்டே²ன ஸீலவிஸுத்³தி⁴…பே॰… அரஹத்தமக்³கே³ன ஸப்³ப³கிலேஸே ஸங்வரட்டே²ன ஸீலவிஸுத்³தி⁴, அவிக்கே²பட்டே²ன சித்தவிஸுத்³தி⁴. த³ஸ்ஸனட்டே²ன தி³ட்டி²விஸுத்³தி⁴. யோ தத்த² ஸங்வரட்டோ², அயங் அதி⁴ஸீலஸிக்கா². யோ தத்த² அவிக்கே²பட்டோ², அயங் அதி⁴சித்தஸிக்கா². யோ தத்த² த³ஸ்ஸனட்டோ², அயங் அதி⁴பஞ்ஞாஸிக்கா².
Adhisīlaṃ adhicittaṃ adhipaññāti nekkhammena kāmacchandaṃ, saṃvaraṭṭhena sīlavisuddhi, avikkhepaṭṭhena cittavisuddhi, dassanaṭṭhena diṭṭhivisuddhi. Yo tattha saṃvaraṭṭho, ayaṃ adhisīlasikkhā . Yo tattha avikkhepaṭṭho, ayaṃ adhicittasikkhā. Yo tattha dassanaṭṭho, ayaṃ adhipaññāsikkhā. Abyāpādena byāpādaṃ saṃvaraṭṭhena sīlavisuddhi…pe… arahattamaggena sabbakilese saṃvaraṭṭhena sīlavisuddhi, avikkhepaṭṭhena cittavisuddhi. Dassanaṭṭhena diṭṭhivisuddhi. Yo tattha saṃvaraṭṭho, ayaṃ adhisīlasikkhā. Yo tattha avikkhepaṭṭho, ayaṃ adhicittasikkhā. Yo tattha dassanaṭṭho, ayaṃ adhipaññāsikkhā.
பஸ்ஸத்³தீ⁴தி நெக்க²ம்மேன காமச்ச²ந்த³ங் படிப்பஸ்ஸம்பே⁴தி, அப்³யாபாதே³ன ப்³யாபாத³ங் படிப்பஸ்ஸம்பே⁴தி…பே॰… அரஹத்தமக்³கே³ன ஸப்³ப³கிலேஸே படிப்பஸ்ஸம்பே⁴தி.
Passaddhīti nekkhammena kāmacchandaṃ paṭippassambheti, abyāpādena byāpādaṃ paṭippassambheti…pe… arahattamaggena sabbakilese paṭippassambheti.
ஞாணந்தி காமச்ச²ந்த³ஸ்ஸ பஹீனத்தா நெக்க²ம்மங் ஞாதட்டே²ன ஞாணங் ; ப்³யாபாத³ஸ்ஸ பஹீனத்தா அப்³யாபாதோ³ ஞாதட்டே²ன ஞாணங்…பே॰… ஸப்³ப³கிலேஸானங் பஹீனத்தா அரஹத்தமக்³கோ³ ஞாதட்டே²ன ஞாணங்.
Ñāṇanti kāmacchandassa pahīnattā nekkhammaṃ ñātaṭṭhena ñāṇaṃ ; byāpādassa pahīnattā abyāpādo ñātaṭṭhena ñāṇaṃ…pe… sabbakilesānaṃ pahīnattā arahattamaggo ñātaṭṭhena ñāṇaṃ.
த³ஸ்ஸனந்தி காமச்ச²ந்த³ஸ்ஸ பஹீனத்தா நெக்க²ம்மங் தி³ட்ட²த்தா த³ஸ்ஸனங். ப்³யாபாத³ஸ்ஸ பஹீனத்தா அப்³யாபாதோ³ தி³ட்ட²த்தா த³ஸ்ஸனங்…பே॰… ஸப்³ப³கிலேஸானங் பஹீனத்தா அரஹத்தமக்³கோ³ தி³ட்ட²த்தா த³ஸ்ஸனங்.
Dassananti kāmacchandassa pahīnattā nekkhammaṃ diṭṭhattā dassanaṃ. Byāpādassa pahīnattā abyāpādo diṭṭhattā dassanaṃ…pe… sabbakilesānaṃ pahīnattā arahattamaggo diṭṭhattā dassanaṃ.
விஸுத்³தீ⁴தி காமச்ச²ந்த³ங் பஜஹந்தோ நெக்க²ம்மேன விஸுஜ்ஜ²தி. ப்³யாபாத³ங் பஜஹந்தோ அப்³யாபாதே³ன விஸுஜ்ஜ²தி…பே॰… ஸப்³ப³கிலேஸே பஜஹந்தோ அரஹத்தமக்³கே³ன விஸுஜ்ஜ²தி.
Visuddhīti kāmacchandaṃ pajahanto nekkhammena visujjhati. Byāpādaṃ pajahanto abyāpādena visujjhati…pe… sabbakilese pajahanto arahattamaggena visujjhati.
நெக்க²ம்மந்தி காமானமேதங் நிஸ்ஸரணங், யதி³த³ங் நெக்க²ம்மங். ரூபானமேதங் நிஸ்ஸரணங், யதி³த³ங் ஆருப்பங். யங் கோ² பன கிஞ்சி பூ⁴தங் ஸங்க²தங் படிச்சஸமுப்பன்னங், நிரோதோ⁴ தஸ்ஸ நெக்க²ம்மங். ப்³யாபாத³ஸ்ஸ அப்³யாபாதோ³ நெக்க²ம்மங். தி²னமித்³த⁴ஸ்ஸ ஆலோகஸஞ்ஞா நெக்க²ம்மங்…பே॰… ஸப்³ப³கிலேஸானங் அரஹத்தமக்³கோ³ நெக்க²ம்மங்.
Nekkhammanti kāmānametaṃ nissaraṇaṃ, yadidaṃ nekkhammaṃ. Rūpānametaṃ nissaraṇaṃ, yadidaṃ āruppaṃ. Yaṃ kho pana kiñci bhūtaṃ saṅkhataṃ paṭiccasamuppannaṃ, nirodho tassa nekkhammaṃ. Byāpādassa abyāpādo nekkhammaṃ. Thinamiddhassa ālokasaññā nekkhammaṃ…pe… sabbakilesānaṃ arahattamaggo nekkhammaṃ.
நிஸ்ஸரணந்தி காமானமேதங் நிஸ்ஸரணங், யதி³த³ங் நெக்க²ம்மங். ரூபானமேதங் நிஸ்ஸரணங், யதி³த³ங் ஆருப்பங். யங் கோ² பன கிஞ்சி பூ⁴தங் ஸங்க²தங் படிச்சஸமுப்பன்னங், நிரோதோ⁴ தஸ்ஸ நிஸ்ஸரணங். காமச்ச²ந்த³ஸ்ஸ நெக்க²ம்மங் நிஸ்ஸரணங். ப்³யாபாத³ஸ்ஸ அப்³யாபாதோ³ நிஸ்ஸரணங்…பே॰… ஸப்³ப³கிலேஸானங் அரஹத்தமக்³கோ³ நிஸ்ஸரணங்.
Nissaraṇanti kāmānametaṃ nissaraṇaṃ, yadidaṃ nekkhammaṃ. Rūpānametaṃ nissaraṇaṃ, yadidaṃ āruppaṃ. Yaṃ kho pana kiñci bhūtaṃ saṅkhataṃ paṭiccasamuppannaṃ, nirodho tassa nissaraṇaṃ. Kāmacchandassa nekkhammaṃ nissaraṇaṃ. Byāpādassa abyāpādo nissaraṇaṃ…pe… sabbakilesānaṃ arahattamaggo nissaraṇaṃ.
பவிவேகோதி காமச்ச²ந்த³ஸ்ஸ நெக்க²ம்மங் பவிவேகோ …பே॰… ஸப்³ப³கிலேஸானங் அரஹத்தமக்³கோ³ பவிவேகோ .
Pavivekoti kāmacchandassa nekkhammaṃ paviveko …pe… sabbakilesānaṃ arahattamaggo paviveko .
வொஸ்ஸக்³கோ³தி நெக்க²ம்மேன காமச்ச²ந்த³ங் வொஸ்ஸஜ்ஜதீதி – வொஸ்ஸக்³கோ³. அப்³யாபாதே³ன ப்³யாபாத³ங் வொஸ்ஸஜ்ஜதீதி – வொஸ்ஸக்³கோ³…பே॰… அரஹத்தமக்³கே³ன ஸப்³ப³கிலேஸே வொஸ்ஸஜ்ஜதீதி – வொஸ்ஸக்³கோ³.
Vossaggoti nekkhammena kāmacchandaṃ vossajjatīti – vossaggo. Abyāpādena byāpādaṃ vossajjatīti – vossaggo…pe… arahattamaggena sabbakilese vossajjatīti – vossaggo.
சரியாதி காமச்ச²ந்த³ங் பஜஹந்தோ நெக்க²ம்மேன சரதி. ப்³யாபாத³ங் பஜஹந்தோ அப்³யாபாதே³ன சரதி…பே॰… ஸப்³ப³கிலேஸே பஜஹந்தோ அரஹத்தமக்³கே³ன சரதி.
Cariyāti kāmacchandaṃ pajahanto nekkhammena carati. Byāpādaṃ pajahanto abyāpādena carati…pe… sabbakilese pajahanto arahattamaggena carati.
ஜா²னவிமொக்கோ²தி நெக்க²ம்மங் ஜா²யதீதி – ஜா²னங். காமச்ச²ந்த³ங் ஜா²பேதீதி – ஜா²னங். ஜா²யந்தோ முச்சதீதி – ஜா²னவிமொக்கோ². ஜா²பெந்தோ முச்சதீதி – ஜா²னவிமொக்கோ². ஜா²யந்தீதி த⁴ம்மா. ஜா²பெந்தீதி கிலேஸே. ஜா²தே ச ஜா²பே ச ஜானாதீதி – ஜா²னஜா²யீ 7. அப்³யாபாதோ³ ஜா²யதீதி ஜா²னங். ப்³யாபாத³ங் ஜா²பேதீதி – ஜா²னங்…பே॰… ஆலோகஸஞ்ஞா ஜா²யதீதி – ஜா²னங். தி²னமித்³த⁴ங் ஜா²பேதீதி – ஜா²னங்…பே॰… அரஹத்தமக்³கோ³ ஜா²யதீதி – ஜா²னங். ஸப்³ப³கிலேஸே ஜா²பேதீதி – ஜா²னங். ஜா²யந்தோ முச்சதீதி – ஜா²னவிமொக்கோ². ஜா²பெந்தோ முச்சதீதி – ஜா²னவிமொக்கோ². ஜா²யந்தீதி – த⁴ம்மா. ஜா²பெந்தீதி – கிலேஸே. ஜா²தே ச ஜா²பே ச ஜானாதீதி – ஜா²னஜா²யீ.
Jhānavimokkhoti nekkhammaṃ jhāyatīti – jhānaṃ. Kāmacchandaṃ jhāpetīti – jhānaṃ. Jhāyanto muccatīti – jhānavimokkho. Jhāpento muccatīti – jhānavimokkho. Jhāyantīti dhammā. Jhāpentīti kilese. Jhāte ca jhāpe ca jānātīti – jhānajhāyī 8. Abyāpādo jhāyatīti jhānaṃ. Byāpādaṃ jhāpetīti – jhānaṃ…pe… ālokasaññā jhāyatīti – jhānaṃ. Thinamiddhaṃ jhāpetīti – jhānaṃ…pe… arahattamaggo jhāyatīti – jhānaṃ. Sabbakilese jhāpetīti – jhānaṃ. Jhāyanto muccatīti – jhānavimokkho. Jhāpento muccatīti – jhānavimokkho. Jhāyantīti – dhammā. Jhāpentīti – kilese. Jhāte ca jhāpe ca jānātīti – jhānajhāyī.
42. பா⁴வனா அதி⁴ட்டா²னங் ஜீவிதந்தி காமச்ச²ந்த³ங் பஜஹந்தோ நெக்க²ம்மங் பா⁴வேதீதி – பா⁴வனாஸம்பன்னோ. நெக்க²ம்மவஸேன சித்தங் அதி⁴ட்டா²தீதி – அதி⁴ட்டா²னஸம்பன்னோ. ஸ்வாயங் ஏவங் பா⁴வனாஸம்பன்னோ அதி⁴ட்டா²னஸம்பன்னோ ஸமங் ஜீவதி, நோ விஸமங்; ஸம்மா ஜீவதி, நோ மிச்சா²; விஸுத்³த⁴ங் ஜீவதி, நோ கிலிட்ட²ந்தி – ஆஜீவஸம்பன்னோ. ஸ்வாயங் ஏவங் பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோ யஞ்ஞதே³வ பரிஸங் உபஸங்கமதி – யதி³ க²த்தியபரிஸங் யதி³ ப்³ராஹ்மணபரிஸங் யதி³ க³ஹபதிபரிஸங் யதி³ ஸமணபரிஸங் – விஸாரதோ³ உபஸங்கமதி அமங்குபூ⁴தோ. தங் கிஸ்ஸ ஹேது? ததா² ஹி ஸோ பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோ.
42.Bhāvanā adhiṭṭhānaṃ jīvitanti kāmacchandaṃ pajahanto nekkhammaṃ bhāvetīti – bhāvanāsampanno. Nekkhammavasena cittaṃ adhiṭṭhātīti – adhiṭṭhānasampanno. Svāyaṃ evaṃ bhāvanāsampanno adhiṭṭhānasampanno samaṃ jīvati, no visamaṃ; sammā jīvati, no micchā; visuddhaṃ jīvati, no kiliṭṭhanti – ājīvasampanno. Svāyaṃ evaṃ bhāvanāsampanno adhiṭṭhānasampanno ājīvasampanno yaññadeva parisaṃ upasaṅkamati – yadi khattiyaparisaṃ yadi brāhmaṇaparisaṃ yadi gahapatiparisaṃ yadi samaṇaparisaṃ – visārado upasaṅkamati amaṅkubhūto. Taṃ kissa hetu? Tathā hi so bhāvanāsampanno adhiṭṭhānasampanno ājīvasampanno.
ப்³யாபாத³ங் பஜஹந்தோ அப்³யாபாத³ங் பா⁴வேதீதி – பா⁴வனாஸம்பன்னோ…பே॰… தி²னமித்³த⁴ங் பஜஹந்தோ ஆலோகஸஞ்ஞங் பா⁴வேதீதி – பா⁴வனாஸம்பன்னோ…பே॰… உத்³த⁴ச்சங் பஜஹந்தோ அவிக்கே²பங் பா⁴வேதீதி – பா⁴வனாஸம்பன்னோ…பே॰… விசிகிச்ச²ங் பஜஹந்தோ த⁴ம்மவவத்தா²னங் பா⁴வேதீதி – பா⁴வனாஸம்பன்னோ…பே॰… அவிஜ்ஜங் பஜஹந்தோ விஜ்ஜங் பா⁴வேதீதி – பா⁴வனாஸம்பன்னோ…பே॰… அரதிங் பஜஹந்தோ பாமோஜ்ஜங் பா⁴வேதீதி – பா⁴வனாஸம்பன்னோ…பே॰… நீவரணே பஜஹந்தோ பட²மங் ஜா²னங் பா⁴வேதீதி – பா⁴வனாஸம்பன்னோ…பே॰… ஸப்³ப³கிலேஸே பஜஹந்தோ அரஹத்தமக்³க³ங் பா⁴வேதீதி – பா⁴வனாஸம்பன்னோ. அரஹத்தமக்³க³வஸேன சித்தங் அதி⁴ட்டா²தீதி – அதி⁴ட்டா²னஸம்பன்னோ. ஸ்வாயங் ஏவங் பா⁴வனாஸம்பன்னோ அதி⁴ட்டா²னஸம்பன்னோ ஸமங் ஜீவதி, நோ விஸமங்; ஸம்மா ஜீவதி, நோ மிச்சா²; விஸுத்³த⁴ங் ஜீவதி, நோ கிலிட்ட²ந்தி – ஆஜீவஸம்பன்னோ. ஸ்வாயங் ஏவங் பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோ யஞ்ஞதே³வ பரிஸங் உபஸங்கமதி – யதி³ க²த்தியபரிஸங் யதி³ ப்³ராஹ்மணபரிஸங் யதி³ க³ஹபதிபரிஸங் யதி³ ஸமணபரிஸங் – விஸாரதோ³ உபஸங்கமதி அமங்குபூ⁴தோ. தங் கிஸ்ஸ ஹேது? ததா² ஹி ஸோ பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோதி.
Byāpādaṃ pajahanto abyāpādaṃ bhāvetīti – bhāvanāsampanno…pe… thinamiddhaṃ pajahanto ālokasaññaṃ bhāvetīti – bhāvanāsampanno…pe… uddhaccaṃ pajahanto avikkhepaṃ bhāvetīti – bhāvanāsampanno…pe… vicikicchaṃ pajahanto dhammavavatthānaṃ bhāvetīti – bhāvanāsampanno…pe… avijjaṃ pajahanto vijjaṃ bhāvetīti – bhāvanāsampanno…pe… aratiṃ pajahanto pāmojjaṃ bhāvetīti – bhāvanāsampanno…pe… nīvaraṇe pajahanto paṭhamaṃ jhānaṃ bhāvetīti – bhāvanāsampanno…pe… sabbakilese pajahanto arahattamaggaṃ bhāvetīti – bhāvanāsampanno. Arahattamaggavasena cittaṃ adhiṭṭhātīti – adhiṭṭhānasampanno. Svāyaṃ evaṃ bhāvanāsampanno adhiṭṭhānasampanno samaṃ jīvati, no visamaṃ; sammā jīvati, no micchā; visuddhaṃ jīvati, no kiliṭṭhanti – ājīvasampanno. Svāyaṃ evaṃ bhāvanāsampanno adhiṭṭhānasampanno ājīvasampanno yaññadeva parisaṃ upasaṅkamati – yadi khattiyaparisaṃ yadi brāhmaṇaparisaṃ yadi gahapatiparisaṃ yadi samaṇaparisaṃ – visārado upasaṅkamati amaṅkubhūto. Taṃ kissa hetu? Tathā hi so bhāvanāsampanno adhiṭṭhānasampanno ājīvasampannoti.
மாதிகாகதா² நிட்டி²தா.
Mātikākathā niṭṭhitā.
பஞ்ஞாவக்³கோ³ ததியோ.
Paññāvaggo tatiyo.
தஸ்ஸுத்³தா³னங் –
Tassuddānaṃ –
பஞ்ஞா இத்³தி⁴ அபி⁴ஸமயோ, விவேகோ சரியபஞ்சமோ;
Paññā iddhi abhisamayo, viveko cariyapañcamo;
பாடிஹாரி ஸமஸீஸி, ஸதிபட்டா²னா விபஸ்ஸனா;
Pāṭihāri samasīsi, satipaṭṭhānā vipassanā;
ததியே பஞ்ஞாவக்³க³ம்ஹி, மாதிகாய ச தே த³ஸாதி.
Tatiye paññāvaggamhi, mātikāya ca te dasāti.
மஹாவக்³கோ³ யுக³னத்³தோ⁴, பஞ்ஞாவக்³கோ³ ச நாமதோ;
Mahāvaggo yuganaddho, paññāvaggo ca nāmato;
அனந்தனயமக்³கே³ஸு, க³ம்பீ⁴ரோ ஸாக³ரூபமோ;
Anantanayamaggesu, gambhīro sāgarūpamo;
நப⁴ஞ்ச தாரகாகிண்ணங், தூ²லோ ஜாதஸ்ஸரோ யதா²;
Nabhañca tārakākiṇṇaṃ, thūlo jātassaro yathā;
கதி²கானங் விஸாலாய, யோகீ³னங் ஞாணஜோதனந்தி.
Kathikānaṃ visālāya, yogīnaṃ ñāṇajotananti.
படிஸம்பி⁴தா³மக்³க³பாளி நிட்டி²தா.
Paṭisambhidāmaggapāḷi niṭṭhitā.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / மாதிகாகதா²வண்ணனா • Mātikākathāvaṇṇanā
