| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
буг̇г̇алабан̃н̃ад̇д̇ибагаран̣а-мууладийгаа
Puggalapaññattipakaraṇa-mūlaṭīkā
1. маад̇игааван̣н̣анаа
1. Mātikāvaṇṇanā
1. д̇хаммасан̇г̇ахз д̇игад̣̇угавасзна сан̇г̇ахид̇аанам̣ д̇хаммаанам̣ вибхан̇г̇з канд̇хаад̣̇ивибхааг̇ам̣ д̣̇ассзд̇ваа д̇ат̇аасан̇г̇ахид̇авибхад̇д̇аанам̣ д̇хаад̇угат̇ааяа сан̇г̇ахаасан̇г̇ахаад̣̇иббабхзд̣̇ам̣ вад̇ваа яааяа бан̃н̃ад̇д̇ияаа д̇зсам̣ сабхаавад̇о убаад̣̇ааяа жа бан̃н̃аабанам̣ ход̇и, д̇ам̣ бабхзд̣̇ад̇о д̣̇ассзд̇ум̣ ‘‘ча бан̃н̃ад̇д̇ияо’’д̇иаад̣̇инаа буг̇г̇алабан̃н̃ад̇д̇и аарад̣̇д̇хаа. д̇ад̇т̇а яз д̇хаммз буб̣б̣аабарияабхаавзна бавад̇д̇амаанз асабхаавасамуухавасзна убаад̣̇ааяа ‘‘буг̇г̇ало, ид̇т̇ий, бурисо, д̣̇зво, мануссо’’д̇иаад̣̇игаа буг̇г̇алабан̃н̃ад̇д̇и ход̇и, д̇зсам̣ ан̃н̃зсан̃жа б̣аахираруубаниб̣б̣аанаанам̣ сасабхаавасамуухасасабхаавабхзд̣̇авасзна бан̃н̃аабанаа сабхаавабан̃н̃ад̇д̇ийд̇и канд̇хабан̃н̃ад̇д̇иаад̣̇игаа бан̃жавид̇хаа взд̣̇ид̇аб̣б̣аа. д̇ааяа д̇хаммасан̇г̇ахаад̣̇ийсу вибхад̇д̇аа сабхаавабан̃н̃ад̇д̇и саб̣б̣ааби сан̇г̇ахид̇аа ход̇и. буг̇г̇алабан̃н̃ад̇д̇и бана асабхаавабан̃н̃ад̇д̇и. д̇ааяа жа самаяавимуд̇д̇аад̣̇иббабхзд̣̇ааяа сад̇д̇асанд̇аанаг̇ад̇з барин̃н̃зяяаад̣̇исабхаавад̇хаммз убаад̣̇ааяа бавад̇д̇ид̇о бад̇хаанааяа ‘‘вихааро ман̃жо’’д̇иаад̣̇игаа жа саб̣б̣аа асабхаавабан̃н̃ад̇д̇и сан̇г̇ахид̇аа ход̇и.
1. Dhammasaṅgahe tikadukavasena saṅgahitānaṃ dhammānaṃ vibhaṅge khandhādivibhāgaṃ dassetvā tathāsaṅgahitavibhattānaṃ dhātukathāya saṅgahāsaṅgahādippabhedaṃ vatvā yāya paññattiyā tesaṃ sabhāvato upādāya ca paññāpanaṃ hoti, taṃ pabhedato dassetuṃ ‘‘cha paññattiyo’’tiādinā puggalapaññatti āraddhā. Tattha ye dhamme pubbāpariyabhāvena pavattamāne asabhāvasamūhavasena upādāya ‘‘puggalo, itthī, puriso, devo, manusso’’tiādikā puggalapaññatti hoti, tesaṃ aññesañca bāhirarūpanibbānānaṃ sasabhāvasamūhasasabhāvabhedavasena paññāpanā sabhāvapaññattīti khandhapaññattiādikā pañcavidhā veditabbā. Tāya dhammasaṅgahādīsu vibhattā sabhāvapaññatti sabbāpi saṅgahitā hoti. Puggalapaññatti pana asabhāvapaññatti. Tāya ca samayavimuttādippabhedāya sattasantānagate pariññeyyādisabhāvadhamme upādāya pavattito padhānāya ‘‘vihāro mañco’’tiādikā ca sabbā asabhāvapaññatti saṅgahitā hoti.
зд̇д̇аавад̇аа жа бан̃н̃ад̇д̇и наама виж̇ж̇амаанабан̃н̃ад̇д̇и авиж̇ж̇амаанабан̃н̃ад̇д̇и жа. д̇аа зва хи вомиссаа ид̇араа жад̇ассод̇и. д̇асмаа д̇аасам̣ д̣̇ассанзна имасмим̣ багаран̣з саб̣б̣аа бан̃н̃ад̇д̇ияо д̣̇ассид̇аад̇и взд̣̇ид̇аб̣б̣аа. канд̇хаад̣̇ибан̃н̃ад̇д̇ийсу бана часу ан̃н̃ад̇т̇а ад̣̇ассид̇аббабхзд̣̇ам̣ ид̇хзва жа д̣̇ассид̇аббабхзд̣̇ам̣ буг̇г̇алабан̃н̃ад̇д̇им̣ убаад̣̇ааяа имасса багаран̣асса буг̇г̇алабан̃н̃ад̇д̇ийд̇и наамам̣ вуд̇д̇анд̇и взд̣̇ид̇аб̣б̣ам̣. яз д̇хаммз ид̇ха бан̃н̃абзд̇угаамод̇и бан̃н̃ад̇д̇ияаа вад̇т̇убхаавзна д̣̇ассзд̇угаамод̇и ад̇хиббааяо. на хи зд̇асмим̣ багаран̣з бан̃н̃аабанам̣ гарод̇и, вад̇т̇уухи бана бан̃н̃ад̇д̇ияо д̣̇ассзд̇ийд̇и.
Ettāvatā ca paññatti nāma vijjamānapaññatti avijjamānapaññatti ca. Tā eva hi vomissā itarā catassoti. Tasmā tāsaṃ dassanena imasmiṃ pakaraṇe sabbā paññattiyo dassitāti veditabbā. Khandhādipaññattīsu pana chasu aññattha adassitappabhedaṃ idheva ca dassitappabhedaṃ puggalapaññattiṃ upādāya imassa pakaraṇassa puggalapaññattīti nāmaṃ vuttanti veditabbaṃ. Ye dhamme idha paññapetukāmoti paññattiyā vatthubhāvena dassetukāmoti adhippāyo. Na hi etasmiṃ pakaraṇe paññāpanaṃ karoti, vatthūhi pana paññattiyo dassetīti.
канд̇хаад̇и бан̃н̃аабанаад̇и ид̣̇ам̣ канд̇хаад̇и руубам̣ бат̇авийд̇иаад̣̇игаа саб̣б̣ааби сааман̃н̃аббабхзд̣̇абан̃н̃аабанаа наама ход̇и, д̇ам̣ санд̇хааяа вуд̇д̇анд̇и д̣̇адтаб̣б̣ам̣. бан̃н̃аабанаад̇и зд̇асса бана д̣̇ассанаа табанаад̇и зд̇з д̣̇вз ад̇т̇аа, д̇зсам̣ багаасанаа нигкибанаад̇и. д̇ад̇т̇а ‘‘руубагканд̇хо…бз… ан̃н̃аад̇аавинд̣̇рияам̣ самаяавимуд̇д̇о’’д̇иаад̣̇инаа ид̣̇амзвам̣наамагам̣ ид̣̇амзвам̣наамаганд̇и д̇ам̣д̇ам̣годтаасигагаран̣ам̣ б̣од̇ханамзва нигкибанаа, на бан̃н̃абзд̇аб̣б̣аанам̣ ман̃жаад̣̇ийнам̣ вияа таанасамб̣анд̇хагаран̣ам̣. яо банааяам̣ ‘‘наамабан̃н̃ад̇д̇и хи д̣̇ассзд̇и жа табзд̇и жаа’’д̇и гад̇д̇унид̣̇д̣̇зсо гад̇о, со бхаавабхууд̇ааяа гаран̣абхууд̇ааяа ваа наамабан̃н̃ад̇д̇ияаа д̇зсам̣ д̇зсам̣ д̇хаммаанам̣ д̣̇идтад̇ааяа табид̇ад̇ааяа жа д̇ам̣нимид̇д̇ад̇ам̣ санд̇хааяа гад̇од̇и взд̣̇ид̇аб̣б̣о.
Khandhātipaññāpanāti idaṃ khandhāti rūpaṃ pathavītiādikā sabbāpi sāmaññappabhedapaññāpanā nāma hoti, taṃ sandhāya vuttanti daṭṭhabbaṃ. Paññāpanāti etassa pana dassanā ṭhapanāti ete dve atthā, tesaṃ pakāsanā nikkhipanāti. Tattha ‘‘rūpakkhandho…pe… aññātāvindriyaṃ samayavimutto’’tiādinā idamevaṃnāmakaṃ idamevaṃnāmakanti taṃtaṃkoṭṭhāsikakaraṇaṃ bodhanameva nikkhipanā, na paññapetabbānaṃ mañcādīnaṃ viya ṭhānasambandhakaraṇaṃ. Yo panāyaṃ ‘‘nāmapaññatti hi dasseti ca ṭhapeti cā’’ti kattuniddeso kato, so bhāvabhūtāya karaṇabhūtāya vā nāmapaññattiyā tesaṃ tesaṃ dhammānaṃ diṭṭhatāya ṭhapitatāya ca taṃnimittataṃ sandhāya katoti veditabbo.
виж̇ж̇амаанабан̃н̃ад̇д̇ийд̇иаад̣̇инаа важанзна баал̣ияам̣ анааг̇ад̇ад̇ам̣ санд̇хааяа ‘‘баал̣имуд̇д̇агзнаа’’д̇иаад̣̇имааха. гусалаагусалассзваад̇и гусалаагусаласса вияа. виж̇ж̇амаанассаад̇и зд̇асса ад̇т̇о сад̇од̇и, д̇асса ад̇т̇о самбхууд̇ассаад̇и. виж̇ж̇амаанасса сад̇од̇и ваа виж̇ж̇амаанабхууд̇ассаад̇и ад̇т̇о. д̇амзвад̇т̇ам̣ д̣̇ассзнд̇о ааха ‘‘самбхууд̇ассаа’’д̇и. д̇зна авиж̇ж̇амаанабхаавам̣ бадигкибад̇и. д̇ат̇аа авиж̇ж̇амаанассаад̇и яат̇аа гусалаад̣̇ийни агусалаад̣̇исабхаавад̇о, пассаад̣̇аяо жа взд̣̇анаад̣̇исабхаавад̇о винивад̇д̇асабхааваани виж̇ж̇анд̇и, д̇ат̇аа авиж̇ж̇амаанасса яз д̇хаммз убаад̣̇ааяа ‘‘ид̇т̇ий, бурисо’’д̇и убалад̣̇д̇хи ход̇и, д̇з абанзд̇ваа д̇зхи винивад̇д̇асса ид̇т̇иаад̣̇исабхаавасса абхаавад̇о асамбхууд̇ассаад̇и ад̇т̇о. яам̣ банзд̇асса ‘‘д̇знаагаарзна авиж̇ж̇амаанасса ан̃н̃знаагаарзна виж̇ж̇амаанассаа’’д̇и ад̇т̇ам̣ гзжи вад̣̇анд̇и, д̇ад̇т̇а яам̣ вад̇д̇аб̣б̣ам̣, д̇ам̣ бан̃н̃ад̇д̇ид̣̇угз вуд̇д̇амзва. авиж̇ж̇амаанзби сабхаавз логанируд̇д̇им̣ ануг̇анд̇ваа анабхинивзсзна жид̇д̇зна ‘‘ид̇т̇ий, бурисо’’д̇и г̇ахан̣асаб̣бхааваа ‘‘логанируд̇д̇имад̇д̇асид̣̇д̇хассаа’’д̇и ааха. саабхинивзсзна бана жид̇д̇зна г̇аяхамаанам̣ бан̃жамасажжаад̣̇игам̣ на сабхаавад̇о, нааби сан̇гзд̇зна сид̣̇д̇ханд̇и ‘‘саб̣б̣аагаарзнаби анубалаб̣бханзяяа’’нд̇и вуд̇д̇ам̣. д̇аасу имасмим̣…бз… лаб̣бханд̇ийд̇и имасмим̣ багаран̣з саруубад̇о д̇иссаннам̣ ааг̇ад̇ад̇ам̣ санд̇хааяа вуд̇д̇ам̣.
Vijjamānapaññattītiādinā vacanena pāḷiyaṃ anāgatataṃ sandhāya ‘‘pāḷimuttakenā’’tiādimāha. Kusalākusalassevāti kusalākusalassa viya. Vijjamānassāti etassa attho satoti, tassa attho sambhūtassāti. Vijjamānassa satoti vā vijjamānabhūtassāti attho. Tamevatthaṃ dassento āha ‘‘sambhūtassā’’ti. Tena avijjamānabhāvaṃ paṭikkhipati. Tathā avijjamānassāti yathā kusalādīni akusalādisabhāvato, phassādayo ca vedanādisabhāvato vinivattasabhāvāni vijjanti, tathā avijjamānassa ye dhamme upādāya ‘‘itthī, puriso’’ti upaladdhi hoti, te apanetvā tehi vinivattassa itthiādisabhāvassa abhāvato asambhūtassāti attho. Yaṃ panetassa ‘‘tenākārena avijjamānassa aññenākārena vijjamānassā’’ti atthaṃ keci vadanti, tattha yaṃ vattabbaṃ, taṃ paññattiduke vuttameva. Avijjamānepi sabhāve lokaniruttiṃ anugantvā anabhinivesena cittena ‘‘itthī, puriso’’ti gahaṇasabbhāvā ‘‘lokaniruttimattasiddhassā’’ti āha. Sābhinivesena pana cittena gayhamānaṃ pañcamasaccādikaṃ na sabhāvato, nāpi saṅketena siddhanti ‘‘sabbākārenapianupalabbhaneyya’’nti vuttaṃ. Tāsu imasmiṃ…pe… labbhantīti imasmiṃ pakaraṇe sarūpato tissannaṃ āgatataṃ sandhāya vuttaṃ.
яат̇аавуд̇д̇асса бана адтагат̇аанаяасса авирод̇хзна аажарияаваад̣̇аа яож̇зд̇аб̣б̣аа, д̇асмаа бан̃н̃абзд̇аб̣б̣адтзна жзсаа бан̃н̃ад̇д̇ийд̇и зд̇асса сабхаавад̇о авиж̇ж̇амаанад̇д̇аа бан̃н̃абзд̇аб̣б̣амад̇д̇адтзна бан̃н̃ад̇д̇ийд̇и ад̇т̇о. бан̃н̃абзд̇аб̣б̣амби хи сасабхаавам̣ д̇аж̇ж̇абарамад̇т̇анаамалаабхад̇о на барад̇о лабхид̇аб̣б̣ам̣ бан̃н̃ад̇д̇инаамам̣ лабхад̇и, нисабхаавам̣ бана сабхааваабхаавад̇о на ад̇д̇ано сабхаавзна наамам̣ лабхад̇ийд̇и. сад̇д̇од̇иаад̣̇игзна наамзна бан̃н̃абид̇аб̣б̣амад̇д̇адтзна бан̃н̃ад̇д̇ийд̇и наамам̣ лабхад̇и, нисабхааваа жа сад̇д̇аад̣̇аяо. на хи сасабхаавасса руубаад̣̇ийхи згад̇д̇зна ан̃н̃ад̇д̇зна ваа анубалаб̣бхасабхаавад̇аа ад̇т̇ийд̇и.
Yathāvuttassa pana aṭṭhakathānayassa avirodhena ācariyavādā yojetabbā, tasmā paññapetabbaṭṭhena cesā paññattīti etassa sabhāvato avijjamānattā paññapetabbamattaṭṭhena paññattīti attho. Paññapetabbampi hi sasabhāvaṃ tajjaparamatthanāmalābhato na parato labhitabbaṃ paññattināmaṃ labhati, nisabhāvaṃ pana sabhāvābhāvato na attano sabhāvena nāmaṃ labhatīti. Sattotiādikena nāmena paññapitabbamattaṭṭhena paññattīti nāmaṃ labhati, nisabhāvā ca sattādayo. Na hi sasabhāvassa rūpādīhi ekattena aññattena vā anupalabbhasabhāvatā atthīti.
гирийдам̣ магудам̣, д̇ам̣ асса ад̇т̇ийд̇и гирийдий. зд̇асмин̃жа аажарияаваад̣̇з ануунзна лагкан̣зна бхавид̇аб̣б̣анд̇и саб̣б̣асамород̇хо гаад̇аб̣б̣о. д̣̇уд̇ияам̣ д̇ад̇ияанд̇и звам̣багаараа хи убанид̇хаабан̃н̃ад̇д̇и убанигкид̇д̇агабан̃н̃ад̇д̇и жа сан̇каад̇аб̣б̣аббад̇хаанад̇д̇аа чаби бан̃н̃ад̇д̇ияо бхаж̇ад̇ийд̇и яуд̇д̇ам̣ вад̇д̇ум̣, ид̇араа жа яат̇ааяог̇ам̣ д̇ам̣ д̇ам̣ бан̃н̃ад̇д̇инд̇и. д̣̇уд̇ияам̣ д̇ад̇ияам̣ д̣̇вз д̇ийн̣ийд̇иаад̣̇и бана сан̇каа наама гаажи над̇т̇ийд̇и д̇аасам̣ убаад̣̇аасанд̇ад̇ибан̃н̃ад̇д̇ийнам̣ авиж̇ж̇амаанабан̃н̃ад̇д̇ибхаавам̣, ид̇араасан̃жа убанид̇хаабан̃н̃ад̇д̇ийнам̣ яат̇аанид̣̇ассид̇аанам̣ авиж̇ж̇амаанзнаавиж̇ж̇амаанабан̃н̃ад̇д̇ибхаавам̣ ман̃н̃амаано ааха ‘‘сзсаа авиж̇ж̇амаанабагкан̃жзва авиж̇ж̇амаанзнаавиж̇ж̇амаанабагкан̃жа бхаж̇анд̇ий’’д̇и. д̣̇уд̇ияам̣ д̇ад̇ияам̣ д̣̇вз д̇ийн̣ийд̇иаад̣̇ийнам̣ убанид̇хааубанигкид̇д̇агабан̃н̃ад̇д̇ийнам̣ авиж̇ж̇амаанзнаавиж̇ж̇амаанабан̃н̃ад̇д̇ибхаавамзва ман̃н̃ад̇и. яан̃хи батамаад̣̇игам̣ абзгкид̇ваа яасса жзгаад̣̇игасса убанигкибид̇ваа бан̃н̃аабийяад̇и, д̇ан̃жа сан̇каанам̣ гин̃жи над̇т̇ийд̇и. д̇ат̇аа санд̇ад̇ибан̃н̃ад̇д̇ияаа жа. на хи асийд̇и аасийд̇иго жа виж̇ж̇амаанод̇и.
Kirīṭaṃ makuṭaṃ, taṃ assa atthīti kirīṭī. Etasmiñca ācariyavāde anūnena lakkhaṇena bhavitabbanti sabbasamorodho kātabbo. Dutiyaṃ tatiyanti evaṃpakārā hi upanidhāpaññatti upanikkhittakapaññatti ca saṅkhātabbappadhānattā chapi paññattiyo bhajatīti yuttaṃ vattuṃ, itarā ca yathāyogaṃ taṃ taṃ paññattinti. Dutiyaṃ tatiyaṃ dve tīṇītiādi pana saṅkhā nāma kāci natthīti tāsaṃ upādāsantatipaññattīnaṃ avijjamānapaññattibhāvaṃ, itarāsañca upanidhāpaññattīnaṃ yathānidassitānaṃ avijjamānenaavijjamānapaññattibhāvaṃ maññamāno āha ‘‘sesā avijjamānapakkhañceva avijjamānenaavijjamānapakkhañca bhajantī’’ti. Dutiyaṃ tatiyaṃ dve tīṇītiādīnaṃ upanidhāupanikkhittakapaññattīnaṃ avijjamānenaavijjamānapaññattibhāvameva maññati. Yañhi paṭhamādikaṃ apekkhitvā yassa cekādikassa upanikkhipitvā paññāpīyati, tañca saṅkhānaṃ kiñci natthīti. Tathā santatipaññattiyā ca. Na hi asīti āsītiko ca vijjamānoti.
згажжаа бхуумибан̃н̃ад̇д̇ийд̇и гаамааважараад̣̇ибан̃н̃ад̇д̇им̣ санд̇хааяааха. гаамааважараад̣̇ий хи сабхаавад̇хаммаад̇и ад̇хиббааяо. гаамод̇и бана огаасз г̇ахид̇з авиж̇ж̇амаанзнавиж̇ж̇амаанабан̃н̃ад̇д̇и зсаа бхавид̇ум̣ арахад̇и, гамманиб̣б̣ад̇д̇агканд̇хзсу г̇ахид̇зсу виж̇ж̇амаанзнавиж̇ж̇амаанабан̃н̃ад̇д̇и. яат̇аа бана важанасан̇каад̇ааяа важанасамудтаабагажзд̇анаасан̇каад̇ааяа ваа гирияааяа бхаан̣агод̇и буг̇г̇аласса бан̃н̃ад̇д̇и виж̇ж̇амаанзнаавиж̇ж̇амаанабан̃н̃ад̇д̇ибагкам̣ бхаж̇ад̇и, звам̣ гисо т̇уулод̇и руубааяад̇анасан̇каад̇зна сан̣таанзна буг̇г̇алаад̣̇ийнам̣ бан̃н̃аабанаа виж̇ж̇амаанзнаавиж̇ж̇амаанабан̃н̃ад̇д̇и бхавид̇ум̣ арахад̇и. сан̣таананд̇и ваа руубааяад̇анз аг̇г̇ахид̇з авиж̇ж̇амаанзнаавиж̇ж̇амаанабан̃н̃ад̇д̇и. руубам̣ пассод̇иаад̣̇игаа бана виж̇ж̇амаанабан̃н̃ад̇д̇и руббанаад̣̇игижжавасзна гижжабан̃н̃ад̇д̇ияам̣, бажжад̇д̇ад̇хамманаамавасзна бажжад̇д̇абан̃н̃ад̇д̇ияам̣ ваа аварод̇хзд̇аб̣б̣аа. виж̇ж̇амаанаавиж̇ж̇амаанабан̃н̃ад̇д̇ийсу жа вуд̇д̇аасу д̇аасам̣ вомиссад̇аавасзна бавад̇д̇аа ид̇арааби вуд̇д̇ааязва хонд̇ийд̇и аяамби аажарияаваад̣̇о саб̣б̣асан̇г̇аахагод̇и д̣̇адтаб̣б̣о.
Ekaccā bhūmipaññattīti kāmāvacarādipaññattiṃ sandhāyāha. Kāmāvacarādī hi sabhāvadhammāti adhippāyo. Kāmoti pana okāse gahite avijjamānenavijjamānapaññatti esā bhavituṃ arahati, kammanibbattakkhandhesu gahitesu vijjamānenavijjamānapaññatti. Yathā pana vacanasaṅkhātāya vacanasamuṭṭhāpakacetanāsaṅkhātāya vā kiriyāya bhāṇakoti puggalassa paññatti vijjamānenaavijjamānapaññattipakkhaṃ bhajati, evaṃ kiso thūloti rūpāyatanasaṅkhātena saṇṭhānena puggalādīnaṃ paññāpanā vijjamānenaavijjamānapaññatti bhavituṃ arahati. Saṇṭhānanti vā rūpāyatane aggahite avijjamānenaavijjamānapaññatti. Rūpaṃ phassotiādikā pana vijjamānapaññatti ruppanādikiccavasena kiccapaññattiyaṃ, paccattadhammanāmavasena paccattapaññattiyaṃ vā avarodhetabbā. Vijjamānāvijjamānapaññattīsu ca vuttāsu tāsaṃ vomissatāvasena pavattā itarāpi vuttāyeva hontīti ayampi ācariyavādo sabbasaṅgāhakoti daṭṭhabbo.
2. ‘‘яаавад̇аа бан̃жагканд̇хаа’’д̇иаад̣̇игасса ад̇т̇ам̣ д̣̇ассзнд̇о ‘‘яад̇д̇агзна бан̃н̃аабанзнаа’’д̇иаад̣̇имааха. д̇ад̇т̇а яаавад̇аа бан̃жагканд̇хаад̇и яаавад̇аа руубагканд̇хо…бз… вин̃н̃аан̣агканд̇ход̇и канд̇хаанам̣ канд̇хабан̃н̃ад̇д̇и, зд̇д̇аавад̇аа канд̇хаанам̣ канд̇хабан̃н̃ад̇д̇и, звам̣ баал̣ияож̇анам̣ гад̇ваа сан̇кзбаббабхзд̣̇авасзна аяам̣ ад̇т̇о вуд̇д̇од̇и взд̣̇ид̇аб̣б̣о. ‘‘яаавад̇аа бан̃жагканд̇хаа’’д̇и, ‘‘канд̇хаанам̣ канд̇хабан̃н̃ад̇д̇ий’’д̇и хи имасса ад̇т̇о ‘‘яад̇д̇агзна бан̃н̃аабанзна сан̇кзбад̇о бан̃жагканд̇хаад̇и ваа’’д̇и зд̇зна д̣̇ассид̇о, ‘‘яаавад̇аа руубагканд̇хо’’д̇иаад̣̇игасса бана ‘‘бабхзд̣̇ад̇о руубагканд̇хо’’д̇иаад̣̇игзнаад̇и. д̇ад̇т̇а руубагканд̇хо…бз… вин̃н̃аан̣агканд̇ход̇и бабхзд̣̇анид̣̇ассанамад̇д̇амзд̇ам̣. д̇зна авуд̇д̇оби саб̣б̣о сан̇г̇ахид̇о ход̇ийд̇и ‘‘д̇ад̇рааби руубагканд̇хо гаамааважаро’’д̇иаад̣̇и вуд̇д̇ам̣. аяам̣ ваа зд̇т̇а баал̣ияаа ад̇т̇аяож̇анаа – ‘‘яаавад̇аа’’д̇и ид̣̇ам̣ саб̣б̣зхи бад̣̇зхи яож̇зд̇ваа яад̇д̇агаа бан̃жагканд̇хаа, д̇ад̇д̇агаа канд̇хаанам̣ канд̇хабан̃н̃ад̇д̇и. яад̇д̇аго бан̃жаннам̣ канд̇хаанам̣ д̇аббабхзд̣̇аанан̃жа руубагканд̇хаад̣̇ийнам̣ бабхзд̣̇о, д̇ад̇д̇аго канд̇хаанам̣ канд̇хабан̃н̃ад̇д̇ияаа бабхзд̣̇од̇и багаран̣анд̇арз вуд̇д̇зна вад̇т̇убхзд̣̇зна канд̇хабан̃н̃ад̇д̇ияаа бабхзд̣̇ам̣ д̣̇ассзд̇и. зса наяо ‘‘яаавад̇аа ааяад̇анаана’’нд̇иаад̣̇ийсуби.
2. ‘‘Yāvatā pañcakkhandhā’’tiādikassa atthaṃ dassento ‘‘yattakena paññāpanenā’’tiādimāha. Tattha yāvatā pañcakkhandhāti yāvatā rūpakkhandho…pe… viññāṇakkhandhoti khandhānaṃ khandhapaññatti, ettāvatā khandhānaṃ khandhapaññatti, evaṃ pāḷiyojanaṃ katvā saṅkhepappabhedavasena ayaṃ attho vuttoti veditabbo. ‘‘Yāvatā pañcakkhandhā’’ti, ‘‘khandhānaṃ khandhapaññattī’’ti hi imassa attho ‘‘yattakena paññāpanena saṅkhepato pañcakkhandhāti vā’’ti etena dassito, ‘‘yāvatā rūpakkhandho’’tiādikassa pana ‘‘pabhedato rūpakkhandho’’tiādikenāti. Tattha rūpakkhandho…pe… viññāṇakkhandhoti pabhedanidassanamattametaṃ. Tena avuttopi sabbo saṅgahito hotīti ‘‘tatrāpi rūpakkhandho kāmāvacaro’’tiādi vuttaṃ. Ayaṃ vā ettha pāḷiyā atthayojanā – ‘‘yāvatā’’ti idaṃ sabbehi padehi yojetvā yattakā pañcakkhandhā, tattakā khandhānaṃ khandhapaññatti. Yattako pañcannaṃ khandhānaṃ tappabhedānañca rūpakkhandhādīnaṃ pabhedo, tattako khandhānaṃ khandhapaññattiyā pabhedoti pakaraṇantare vuttena vatthubhedena khandhapaññattiyā pabhedaṃ dasseti. Esa nayo ‘‘yāvatā āyatanāna’’ntiādīsupi.
7. згад̣̇зсзнзваад̇и уд̣̇д̣̇зсамад̇д̇знзваад̇и ад̇т̇о.
7. Ekadesenevāti uddesamattenevāti attho.
маад̇игааван̣н̣анаа нидтид̇аа.
Mātikāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / буг̇г̇алабан̃н̃ад̇д̇ибаал̣и • Puggalapaññattipāḷi / 1. згагауд̣̇д̣̇зсо • 1. Ekakauddeso
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 1. маад̇игааван̣н̣анаа • 1. Mātikāvaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 1. маад̇игааван̣н̣анаа • 1. Mātikāvaṇṇanā
