A World of Knowledge
    Library / Tipiṭaka / திபிடக • Tipiṭaka / சரியாபிடக-அட்ட²கதா² • Cariyāpiṭaka-aṭṭhakathā

    2. ஹத்தி²னாக³வக்³கோ³

    2. Hatthināgavaggo

    1. மாதுபோஸகசரியாவண்ணனா

    1. Mātuposakacariyāvaṇṇanā

    1. து³தியவக்³க³ஸ்ஸ பட²மே குஞ்ஜரோதி ஹத்தீ². மாதுபோஸகோதி அந்தா⁴ய ஜராஜிண்ணாய மாதுயா படிஜக்³க³னகோ. மஹியாதி பூ⁴மியங். கு³ணேனாதி ஸீலகு³ணேன, ததா³ மம ஸதி³ஸோ நத்தி².

    1. Dutiyavaggassa paṭhame kuñjaroti hatthī. Mātuposakoti andhāya jarājiṇṇāya mātuyā paṭijagganako. Mahiyāti bhūmiyaṃ. Guṇenāti sīlaguṇena, tadā mama sadiso natthi.

    போ³தி⁴ஸத்தோ ஹி ததா³ ஹிமவந்தப்பதே³ஸே ஹத்தி²யோனியங் நிப்³ப³த்தி. ஸோ ஸப்³ப³ஸேதோ அபி⁴ரூபோ லக்க²ணஸம்பன்னோ மஹாஹத்தீ² அனேகஹத்தி²ஸதஸஹஸ்ஸபரிவாரோ அஹோஸி. மாதா பனஸ்ஸ அந்தா⁴. ஸோ மது⁴ரப²லாப²லானி ஹத்தீ²னங் ஹத்தே²ஸு த³த்வா மாது பேஸேதி. ஹத்தி²னோ தஸ்ஸா அத³த்வா ஸயங் கா²த³ந்தி. ஸோ பரிக்³க³ண்ஹந்தோ தங் பவத்திங் ஞத்வா ‘‘யூத²ங் பஹாய மாதரமேவ போஸெஸ்ஸாமீ’’தி ரத்திபா⁴கே³ அஞ்ஞேஸங் ஹத்தீ²னங் அஜானந்தானங் மாதரங் க³ஹெத்வா சண்டோ³ரணபப்³ப³தபாத³ங் க³ந்த்வா ஏகங் நளினிங் உபனிஸ்ஸாய டி²தாய பப்³ப³தகு³ஹாய மாதரங் ட²பெத்வா போஸேஸி.

    Bodhisatto hi tadā himavantappadese hatthiyoniyaṃ nibbatti. So sabbaseto abhirūpo lakkhaṇasampanno mahāhatthī anekahatthisatasahassaparivāro ahosi. Mātā panassa andhā. So madhuraphalāphalāni hatthīnaṃ hatthesu datvā mātu peseti. Hatthino tassā adatvā sayaṃ khādanti. So pariggaṇhanto taṃ pavattiṃ ñatvā ‘‘yūthaṃ pahāya mātarameva posessāmī’’ti rattibhāge aññesaṃ hatthīnaṃ ajānantānaṃ mātaraṃ gahetvā caṇḍoraṇapabbatapādaṃ gantvā ekaṃ naḷiniṃ upanissāya ṭhitāya pabbataguhāya mātaraṃ ṭhapetvā posesi.

    2-3. பவனே தி³ஸ்வா வனசரோதி ஏகோ வனசரகோ புரிஸோ தஸ்மிங் மஹாவனே விசரந்தோ மங் தி³ஸ்வா. ரஞ்ஞோ மங் படிவேத³யீதி பா³ராணஸிரஞ்ஞோ மங் ஆரோசேஸி.

    2-3.Pavane disvā vanacaroti eko vanacarako puriso tasmiṃ mahāvane vicaranto maṃ disvā. Rañño maṃ paṭivedayīti bārāṇasirañño maṃ ārocesi.

    ஸோ ஹி மக்³க³மூள்ஹோ தி³ஸங் வவத்த²பேதுங் அஸக்கொந்தோ மஹந்தேன ஸத்³தே³ன பரிதே³வி. போ³தி⁴ஸத்தோபி தஸ்ஸ ஸத்³த³ங் ஸுத்வா ‘‘அயங் புரிஸோ அனாதோ², ந கோ² பனேதங் பதிரூபங், யங் ஏஸ மயி டி²தே இத⁴ வினஸ்ஸெய்யா’’தி தஸ்ஸ ஸந்திகங் க³ந்த்வா தங் ப⁴யேன பலாயந்தங் தி³ஸ்வா ‘‘அம்போ⁴ புரிஸ, நத்தி² தே மங் நிஸ்ஸாய ப⁴யங், மா பலாயி, கஸ்மா த்வங் பரிதே³வந்தோ விசரஸீ’’தி புச்சி²த்வா ‘‘ஸாமி, அஹங் மக்³க³மூள்ஹோ அஜ்ஜ மே ஸத்தமோ தி³வஸோ’’தி வுத்தே ‘‘போ⁴ புரிஸ, மா பா⁴யி, அஹங் தங் மனுஸ்ஸபதே² ட²பெஸ்ஸாமீ’’தி தங் அத்தனோ பிட்டி²யங் நிஸீதா³பெத்வா அரஞ்ஞதோ நீஹரித்வா நிவத்தி. ஸோபி பாபோ ‘‘நக³ரங் க³ந்த்வா ரஞ்ஞோ ஆரோசெஸ்ஸாமீ’’தி ருக்க²ஸஞ்ஞங் பப்³ப³தஸஞ்ஞஞ்ச கரொந்தோவ நிக்க²மித்வா பா³ராணஸிங் அக³மாஸி. தஸ்மிங் காலே ரஞ்ஞோ மங்க³லஹத்தீ² மதோ . ஸோ புரிஸோ ராஜானங் உபஸங்கமித்வா மஹாபுரிஸஸ்ஸ அத்தனோ தி³ட்ட²பா⁴வங் ஆரோசேஸி. தேன வுத்தங் ‘‘தவானுச்ச²வோ, மஹாராஜ, க³ஜோ வஸதி கானநே’’திஆதி³.

    So hi maggamūḷho disaṃ vavatthapetuṃ asakkonto mahantena saddena paridevi. Bodhisattopi tassa saddaṃ sutvā ‘‘ayaṃ puriso anātho, na kho panetaṃ patirūpaṃ, yaṃ esa mayi ṭhite idha vinasseyyā’’ti tassa santikaṃ gantvā taṃ bhayena palāyantaṃ disvā ‘‘ambho purisa, natthi te maṃ nissāya bhayaṃ, mā palāyi, kasmā tvaṃ paridevanto vicarasī’’ti pucchitvā ‘‘sāmi, ahaṃ maggamūḷho ajja me sattamo divaso’’ti vutte ‘‘bho purisa, mā bhāyi, ahaṃ taṃ manussapathe ṭhapessāmī’’ti taṃ attano piṭṭhiyaṃ nisīdāpetvā araññato nīharitvā nivatti. Sopi pāpo ‘‘nagaraṃ gantvā rañño ārocessāmī’’ti rukkhasaññaṃ pabbatasaññañca karontova nikkhamitvā bārāṇasiṃ agamāsi. Tasmiṃ kāle rañño maṅgalahatthī mato . So puriso rājānaṃ upasaṅkamitvā mahāpurisassa attano diṭṭhabhāvaṃ ārocesi. Tena vuttaṃ ‘‘tavānucchavo, mahārāja, gajo vasati kānane’’tiādi.

    தத்த² தவானுச்ச²வோதி தவ ஓபவய்ஹங் காதுங் அனுச்ச²விகோ யுத்தோ. ந தஸ்ஸ பரிக்கா²யத்தோ²தி தஸ்ஸ க³ஹணே க³மனுபச்சே²த³னத்த²ங் ஸமந்ததோ க²ணிதப்³ப³பரிக்கா²ய வா கரேணுயா கண்ணபுடேன அத்தானங் படிச்சா²தெ³த்வா கி²த்தபாஸரஜ்ஜுயா ப³ந்தி⁴தப்³ப³ஆளகஸங்கா²தஆலானேன வா யத்த² பவிட்டோ² கத்த²சி க³ந்துங் ந ஸக்கோதி, தாதி³ஸவஞ்சனகாஸுயா வா அத்தோ² பயோஜனங் நத்தி². ஸஹக³ஹிதேதி க³ஹணஸமகாலங் ஏவ. ஏஹிதீதி ஆக³மிஸ்ஸதி.

    Tattha tavānucchavoti tava opavayhaṃ kātuṃ anucchaviko yutto. Na tassa parikkhāyatthoti tassa gahaṇe gamanupacchedanatthaṃ samantato khaṇitabbaparikkhāya vā kareṇuyā kaṇṇapuṭena attānaṃ paṭicchādetvā khittapāsarajjuyā bandhitabbaāḷakasaṅkhātaālānena vā yattha paviṭṭho katthaci gantuṃ na sakkoti, tādisavañcanakāsuyā vā attho payojanaṃ natthi. Sahagahiteti gahaṇasamakālaṃ eva. Ehitīti āgamissati.

    ராஜா இமங் மக்³க³தே³ஸகங் கத்வா அரஞ்ஞங் க³ந்த்வா ‘‘இமினா வுத்தங் ஹத்தி²னாக³ங் ஆனேஹீ’’தி ஹத்தா²சரியங் ஸஹ பரிவாரேன பேஸேஸி. ஸோ தேன ஸத்³தி⁴ங் க³ந்த்வா போ³தி⁴ஸத்தங் நளினிங் பவிஸித்வா கோ³சரங் க³ண்ஹந்தங் பஸ்ஸி. தேன வுத்தங் –

    Rājā imaṃ maggadesakaṃ katvā araññaṃ gantvā ‘‘iminā vuttaṃ hatthināgaṃ ānehī’’ti hatthācariyaṃ saha parivārena pesesi. So tena saddhiṃ gantvā bodhisattaṃ naḷiniṃ pavisitvā gocaraṃ gaṇhantaṃ passi. Tena vuttaṃ –

    4.

    4.

    ‘‘தஸ்ஸ தங் வசனங் ஸுத்வா, ராஜாபி துட்ட²மானஸோ;

    ‘‘Tassa taṃ vacanaṃ sutvā, rājāpi tuṭṭhamānaso;

    பேஸேஸி ஹத்தி²த³மகங், சே²காசரியங் ஸுஸிக்கி²தங்.

    Pesesi hatthidamakaṃ, chekācariyaṃ susikkhitaṃ.

    5.

    5.

    ‘‘க³ந்த்வா ஸோ ஹத்தி²த³மகோ, அத்³த³ஸ பது³மஸ்ஸரே;

    ‘‘Gantvā so hatthidamako, addasa padumassare;

    பி⁴ஸமுளாலங் உத்³த⁴ரந்தங், யாபனத்தா²ய மாதுயா’’தி.

    Bhisamuḷālaṃ uddharantaṃ, yāpanatthāya mātuyā’’ti.

    தத்த² சே²காசரியந்தி ஹத்தி²ப³ந்த⁴னாதி³விதி⁴ம்ஹி குஸலங் ஹத்தா²சரியங். ஸுஸிக்கி²தந்தி ஹத்தீ²னங் ஸிக்கா²பனவிஜ்ஜாய நிட்ட²ங்க³மனேன ஸுட்டு² ஸிக்கி²தங்.

    Tattha chekācariyanti hatthibandhanādividhimhi kusalaṃ hatthācariyaṃ. Susikkhitanti hatthīnaṃ sikkhāpanavijjāya niṭṭhaṅgamanena suṭṭhu sikkhitaṃ.

    6. விஞ்ஞாய மே ஸீலகு³ணந்தி ‘‘ப⁴த்³தோ³ அயங் ஹத்தா²ஜானீயோ ந மந்தோ³, ந சண்டோ³, ந வோமிஸ்ஸஸீலோ வா’’தி மம ஸீலகு³ணங் ஜானித்வா. கத²ங்? லக்க²ணங் உபதா⁴ரயீதி ஸுஸிக்கி²தஹத்தி²ஸிப்பத்தா மம லக்க²ணங் ஸமந்ததோ உபதா⁴ரேஸி. தேன ஸோ ஏஹி புத்தாதி வத்வான, மம ஸொண்டா³ய அக்³க³ஹி.

    6.Viññāya me sīlaguṇanti ‘‘bhaddo ayaṃ hatthājānīyo na mando, na caṇḍo, na vomissasīlo vā’’ti mama sīlaguṇaṃ jānitvā. Kathaṃ? Lakkhaṇaṃupadhārayīti susikkhitahatthisippattā mama lakkhaṇaṃ samantato upadhāresi. Tena so ehi puttāti vatvāna, mama soṇḍāya aggahi.

    7. போ³தி⁴ஸத்தோ ஹத்தா²சரியங் தி³ஸ்வா – ‘‘இத³ங் ப⁴யங் மய்ஹங் ஏதஸ்ஸ புரிஸஸ்ஸ ஸந்திகா உப்பன்னங், அஹங் கோ² பன மஹாப³லோ ஹத்தி²ஸஹஸ்ஸம்பி வித்³த⁴ங்ஸேதுங் ஸமத்தோ², பஹோமி குஜ்ஜி²த்வா ஸரட்ட²கங் ஸேனாவாஹனங் நாஸேதுங், ஸசே பன குஜ்ஜி²ஸ்ஸாமி, ஸீலங் மே பி⁴ஜ்ஜிஸ்ஸதி, தஸ்மா ஸத்தீஹி கொட்டியமானோபி ந குஜ்ஜி²ஸ்ஸாமீ’’தி சித்தங் அதி⁴ட்டா²ய ஸீஸங் ஓனாமெத்வா நிச்சலோவ அட்டா²ஸி. தேனாஹ ப⁴க³வா ‘‘யங் மே ததா³ பாகதிகங், ஸரீரானுக³தங் ப³ல’’ந்திஆதி³.

    7. Bodhisatto hatthācariyaṃ disvā – ‘‘idaṃ bhayaṃ mayhaṃ etassa purisassa santikā uppannaṃ, ahaṃ kho pana mahābalo hatthisahassampi viddhaṃsetuṃ samattho, pahomi kujjhitvā saraṭṭhakaṃ senāvāhanaṃ nāsetuṃ, sace pana kujjhissāmi, sīlaṃ me bhijjissati, tasmā sattīhi koṭṭiyamānopi na kujjhissāmī’’ti cittaṃ adhiṭṭhāya sīsaṃ onāmetvā niccalova aṭṭhāsi. Tenāha bhagavā ‘‘yaṃ me tadā pākatikaṃ, sarīrānugataṃ bala’’ntiādi.

    தத்த² பாகதிகந்தி ஸபா⁴வஸித்³த⁴ங். ஸரீரானுக³தந்தி ஸரீரமேவ அனுக³தங் காயப³லங், ந உபாயகுஸலதாஸங்கா²தஞாணானுக³தந்தி அதி⁴ப்பாயோ. அஜ்ஜ நாக³ஸஹஸ்ஸானந்தி அஜ்ஜகாலே அனேகேஸங் ஹத்தி²ஸஹஸ்ஸானங் ஸமுதி³தானங். ப³லேன ஸமஸாதி³ஸந்தி தேஸங் ஸரீரப³லேன ஸமஸமமேவ ஹுத்வா ஸதி³ஸங், ந உபமாமத்தேன. மங்க³லஹத்தி²குலே ஹி ததா³ போ³தி⁴ஸத்தோ உப்பன்னோதி.

    Tattha pākatikanti sabhāvasiddhaṃ. Sarīrānugatanti sarīrameva anugataṃ kāyabalaṃ, na upāyakusalatāsaṅkhātañāṇānugatanti adhippāyo. Ajja nāgasahassānanti ajjakāle anekesaṃ hatthisahassānaṃ samuditānaṃ. Balena samasādisanti tesaṃ sarīrabalena samasamameva hutvā sadisaṃ, na upamāmattena. Maṅgalahatthikule hi tadā bodhisatto uppannoti.

    8. யதி³ஹங் தேஸங் பகுப்பெய்யந்தி மங் க³ஹணாய உபக³தானங் தேஸங் அஹங் யதி³ குஜ்ஜெ²ய்யங், தேஸங் ஜீவிதமத்³த³னே படிப³லோ ப⁴வெய்யங். ந கேவலங் தேஸஞ்ஞேவ, அத² கோ² யாவ ரஜ்ஜம்பி மானுஸந்தி யதோ ரஜ்ஜதோ தேஸங் ஆக³தானங் மனுஸ்ஸானங் ஸப்³ப³ம்பி ரஜ்ஜங் போதெ²த்வா சுண்ணவிசுண்ணங் கரெய்யங்.

    8.Yadihaṃ tesaṃ pakuppeyyanti maṃ gahaṇāya upagatānaṃ tesaṃ ahaṃ yadi kujjheyyaṃ, tesaṃ jīvitamaddane paṭibalo bhaveyyaṃ. Na kevalaṃ tesaññeva, atha kho yāva rajjampi mānusanti yato rajjato tesaṃ āgatānaṃ manussānaṃ sabbampi rajjaṃ pothetvā cuṇṇavicuṇṇaṃ kareyyaṃ.

    9. அபி சாஹங் ஸீலரக்கா²யாதி ஏவங் ஸமத்தோ²பி ச அஹங் அத்தனி பதிட்டி²தாய ஸீலரக்கா²ய ஸீலகு³த்தியா கு³த்தோ ப³ந்தோ⁴ விய. ந கரோமி சித்தே அஞ்ஞத²த்தந்தி தஸ்ஸ ஸீலஸ்ஸ அஞ்ஞத²த்தபூ⁴தங் தேஸங் ஸத்தானங் போத²னாதி³விதி⁴ங் மய்ஹங் சித்தே ந கரோமி, தத்த² சித்தம்பி ந உப்பாதே³மி. பக்கி²பந்தங் மமாளகேதி ஆலானத்த²ம்பே⁴ பக்கி²பந்தங், ‘‘தி³ஸ்வாபீ’’தி வசனஸேஸோ. கஸ்மாதி சே, ஸீலபாரமிபூரியா ஈதி³ஸேஸு டா²னேஸு ஸீலங் அக²ண்டெ³ந்தஸ்ஸ மே நசிரஸ்ஸேவ ஸீலபாரமீ பரிபூரெஸ்ஸதீதி ஸீலபாரமிபரிபூரணத்த²ங் தஸ்ஸ அஞ்ஞத²த்தங் சித்தே ந கரோமீதி யோஜனா.

    9.Api cāhaṃ sīlarakkhāyāti evaṃ samatthopi ca ahaṃ attani patiṭṭhitāya sīlarakkhāya sīlaguttiyā gutto bandho viya. Na karomi citte aññathattanti tassa sīlassa aññathattabhūtaṃ tesaṃ sattānaṃ pothanādividhiṃ mayhaṃ citte na karomi, tattha cittampi na uppādemi. Pakkhipantaṃ mamāḷaketi ālānatthambhe pakkhipantaṃ, ‘‘disvāpī’’ti vacanaseso. Kasmāti ce, sīlapāramipūriyā īdisesu ṭhānesu sīlaṃ akhaṇḍentassa me nacirasseva sīlapāramī paripūressatīti sīlapāramiparipūraṇatthaṃ tassa aññathattaṃ citte na karomīti yojanā.

    10. ‘‘யதி³ தே ம’’ந்தி கா³தா²யபி ஸீலரக்கா²ய த³ள்ஹங் கத்வா ஸீலஸ்ஸ அதி⁴ட்டி²தபா⁴வமேவ த³ஸ்ஸேதி. தத்த² கொட்டெய்யுந்தி பி⁴ந்தெ³ய்யுங். ஸீலக²ண்ட³ப⁴யா மமாதி மம ஸீலஸ்ஸ க²ண்ட³னப⁴யேன.

    10.‘‘Yadi te ma’’nti gāthāyapi sīlarakkhāya daḷhaṃ katvā sīlassa adhiṭṭhitabhāvameva dasseti. Tattha koṭṭeyyunti bhindeyyuṃ. Sīlakhaṇḍabhayā mamāti mama sīlassa khaṇḍanabhayena.

    ஏவங் பன சிந்தெத்வா போ³தி⁴ஸத்தே நிச்சலே டி²தே ஹத்தா²சரியோ பது³மஸரங் ஓதரித்வா தஸ்ஸ லக்க²ணஸம்பத்திங் தி³ஸ்வா ‘‘ஏஹி புத்தா’’தி ரஜததா³மஸதி³ஸாய ஸொண்டா³ய க³ஹெத்வா ஸத்தமே தி³வஸே பா³ராணஸிங் பாபுணி. ஸோ அந்தராமக்³கே³ வத்தமானோவ ரஞ்ஞோ ஸாஸனங் பேஸேஸி. ராஜா நக³ரங் அலங்காராபேஸி. ஹத்தா²சரியோ போ³தி⁴ஸத்தங் கதக³ந்த⁴பரிப⁴ண்ட³ங் அலங்கதபடியத்தங் ஹத்தி²ஸாலங் நெத்வா விசித்ரஸாணியா பரிக்கி²பாபெத்வா ரஞ்ஞோ ஆரோசேஸி. ராஜா நானக்³க³ரஸபோ⁴ஜனங் ஆதா³ய க³ந்த்வா போ³தி⁴ஸத்தஸ்ஸ தா³பேஸி. ஸோ ‘‘மாதரங் வினா கோ³சரங் ந க³ண்ஹிஸ்ஸாமீ’’தி பிண்ட³ங் ந க³ண்ஹி. யாசிதோபி அக்³க³ஹெத்வா –

    Evaṃ pana cintetvā bodhisatte niccale ṭhite hatthācariyo padumasaraṃ otaritvā tassa lakkhaṇasampattiṃ disvā ‘‘ehi puttā’’ti rajatadāmasadisāya soṇḍāya gahetvā sattame divase bārāṇasiṃ pāpuṇi. So antarāmagge vattamānova rañño sāsanaṃ pesesi. Rājā nagaraṃ alaṅkārāpesi. Hatthācariyo bodhisattaṃ katagandhaparibhaṇḍaṃ alaṅkatapaṭiyattaṃ hatthisālaṃ netvā vicitrasāṇiyā parikkhipāpetvā rañño ārocesi. Rājā nānaggarasabhojanaṃ ādāya gantvā bodhisattassa dāpesi. So ‘‘mātaraṃ vinā gocaraṃ na gaṇhissāmī’’ti piṇḍaṃ na gaṇhi. Yācitopi aggahetvā –

    ‘‘ஸா நூனஸா கபணிகா, அந்தா⁴ அபரிணாயிகா;

    ‘‘Sā nūnasā kapaṇikā, andhā apariṇāyikā;

    கா²ணுங் பாதே³ன க⁴ட்டேதி, கி³ரிங் சண்டோ³ரணங் பதீ’’தி. –

    Khāṇuṃ pādena ghaṭṭeti, giriṃ caṇḍoraṇaṃ patī’’ti. –

    ஆஹ. தங் ஸுத்வா ராஜா –

    Āha. Taṃ sutvā rājā –

    ‘‘கா நு தே ஸா மஹானாக³, அந்தா⁴ அபரிணாயிகா;

    ‘‘Kā nu te sā mahānāga, andhā apariṇāyikā;

    கா²ணுங் பாதே³ன க⁴ட்டேதி, கி³ரிங் சண்டோ³ரணங் பதீ’’தி. – புச்சி²த்வா –

    Khāṇuṃ pādena ghaṭṭeti, giriṃ caṇḍoraṇaṃ patī’’ti. – pucchitvā –

    ‘‘மாதா மே ஸா மஹாராஜ, அந்தா⁴ அபரிணாயிகா;

    ‘‘Mātā me sā mahārāja, andhā apariṇāyikā;

    கா²ணுங் பாதே³ன க⁴ட்டேதி, கி³ரிங் சண்டோ³ரணங் பதீ’’தி. –

    Khāṇuṃ pādena ghaṭṭeti, giriṃ caṇḍoraṇaṃ patī’’ti. –

    வுத்தே அஜ்ஜ ஸத்தமோ தி³வஸோ ‘‘மாதா மே கோ³சரங் ந லபி⁴த்தா²’’தி வத³தோ இமஸ்ஸ கோ³சரங் அக³ண்ஹந்தஸ்ஸ. தஸ்மா –

    Vutte ajja sattamo divaso ‘‘mātā me gocaraṃ na labhitthā’’ti vadato imassa gocaraṃ agaṇhantassa. Tasmā –

    ‘‘முஞ்சதே²தங் மஹானாக³ங், யோயங் ப⁴ரதி மாதரங்;

    ‘‘Muñcathetaṃ mahānāgaṃ, yoyaṃ bharati mātaraṃ;

    ஸமேது மாதரா நாகோ³, ஸஹ ஸப்³பே³ஹி ஞாதிபீ⁴’’தி. – வத்வா முஞ்சாபேஸி –

    Sametu mātarā nāgo, saha sabbehi ñātibhī’’ti. – vatvā muñcāpesi –

    ‘‘முத்தோ ச ப³ந்த⁴னா நாகோ³, முத்ததா³மாய குஞ்ஜரோ;

    ‘‘Mutto ca bandhanā nāgo, muttadāmāya kuñjaro;

    முஹுத்தங் அஸ்ஸாஸயித்வா, அக³மா யேன பப்³ப³தோ’’தி.

    Muhuttaṃ assāsayitvā, agamā yena pabbato’’ti.

    தத்த² கபணிகாதி வராகா. கா²ணுங் பாதே³ன க⁴ட்டேதீதி அந்த⁴தாய புத்தவியோக³து³க்கே²ன ச பரிதே³வமானா தத்த² தத்த² ருக்க²களிங்க³ரே பாதே³ன க⁴ட்டேதி. சண்டோ³ரணங் பதீதி சண்டோ³ரணபப்³ப³தாபி⁴முகீ², தஸ்மிங் பப்³ப³தபாதே³ பரிப்³ப⁴மமானாதி அத்தோ². அக³மா யேன பப்³ப³தோதி ஸோ ஹத்தி²னாகோ³ ப³ந்த⁴னா முத்தோ தோ²கங் விஸ்ஸமித்வா ரஞ்ஞோ த³ஸராஜத⁴ம்மகா³தா²ஹி த⁴ம்மங் தே³ஸெத்வா ‘‘அப்பமத்தோ ஹோஹி, மஹாராஜா’’தி ஓவாத³ங் த³த்வா மஹாஜனேன க³ந்த⁴மாலாதீ³ஹி பூஜியமானோ நக³ரா நிக்க²மித்வா தத³ஹேவ மாதரா ஸமாக³ந்த்வா ஸப்³ப³ங் பவத்திங் ஆசிக்கி². ஸா துட்ட²மானஸா –

    Tattha kapaṇikāti varākā. Khāṇuṃ pādena ghaṭṭetīti andhatāya puttaviyogadukkhena ca paridevamānā tattha tattha rukkhakaḷiṅgare pādena ghaṭṭeti. Caṇḍoraṇaṃ patīti caṇḍoraṇapabbatābhimukhī, tasmiṃ pabbatapāde paribbhamamānāti attho. Agamā yena pabbatoti so hatthināgo bandhanā mutto thokaṃ vissamitvā rañño dasarājadhammagāthāhi dhammaṃ desetvā ‘‘appamatto hohi, mahārājā’’ti ovādaṃ datvā mahājanena gandhamālādīhi pūjiyamāno nagarā nikkhamitvā tadaheva mātarā samāgantvā sabbaṃ pavattiṃ ācikkhi. Sā tuṭṭhamānasā –

    ‘‘சிரங் ஜீவது ஸோ ராஜா, காஸீனங் ரட்ட²வட்³ட⁴னோ;

    ‘‘Ciraṃ jīvatu so rājā, kāsīnaṃ raṭṭhavaḍḍhano;

    யோ மே புத்தங் பமோசேஸி, ஸதா³ வுத்³தா⁴பசாயிக’’ந்தி. (ஜா॰ 1.11.12) –

    Yo me puttaṃ pamocesi, sadā vuddhāpacāyika’’nti. (jā. 1.11.12) –

    ரஞ்ஞோ அனுமோத³னங் அகாஸி. ராஜா போ³தி⁴ஸத்தஸ்ஸ கு³ணே பஸீதி³த்வா நளினியா அவிதூ³ரே கா³மங் மாபெத்வா போ³தி⁴ஸத்தஸ்ஸ மாது சஸ்ஸ நிப³த்³த⁴ங் வத்தங் பட்ட²பேஸி . அபரபா⁴கே³ போ³தி⁴ஸத்தோ மாதரி மதாய தஸ்ஸா ஸரீரபரிஹாரங் கத்வா குரண்ட³கஅஸ்ஸமபத³ங் நாம க³தோ. தஸ்மிங் பன டா²னே ஹிமவந்ததோ ஓதரித்வா பஞ்சஸதா இஸயோ வஸிங்ஸு. தங் வத்தங் தேஸங் த³த்வா ராஜா போ³தி⁴ஸத்தஸ்ஸ ஸமானரூபங் ஸிலாபடிமங் காரெத்வா மஹாஸக்காரங் பவத்தேஸி. ஜம்பு³தீ³பவாஸினோ அனுஸங்வச்ச²ரங் ஸன்னிபதித்வா ஹத்தி²மஹங் நாம கரிங்ஸு.

    Rañño anumodanaṃ akāsi. Rājā bodhisattassa guṇe pasīditvā naḷiniyā avidūre gāmaṃ māpetvā bodhisattassa mātu cassa nibaddhaṃ vattaṃ paṭṭhapesi . Aparabhāge bodhisatto mātari matāya tassā sarīraparihāraṃ katvā kuraṇḍakaassamapadaṃ nāma gato. Tasmiṃ pana ṭhāne himavantato otaritvā pañcasatā isayo vasiṃsu. Taṃ vattaṃ tesaṃ datvā rājā bodhisattassa samānarūpaṃ silāpaṭimaṃ kāretvā mahāsakkāraṃ pavattesi. Jambudīpavāsino anusaṃvaccharaṃ sannipatitvā hatthimahaṃ nāma kariṃsu.

    ததா³ ராஜா ஆனந்தோ³ அஹோஸி, ஹத்தி²னீ மஹாமாயா, வனசரகோ தே³வத³த்தோ, மாதுபோஸகஹத்தி²னாகோ³ லோகனாதோ².

    Tadā rājā ānando ahosi, hatthinī mahāmāyā, vanacarako devadatto, mātuposakahatthināgo lokanātho.

    இதா⁴பி தா³னபாரமிஆத³யோ யதா²ரஹங் நித்³தா⁴ரேதப்³பா³. ஸீலபாரமீ பன அதிஸயவதீதி ஸா ஏவ தே³ஸனங் ஆஸ்ன்ளஹா. ததா² திரச்சா²னயோனியங் உப்பன்னோபி ப்³ரஹ்மபுப்³ப³தே³வபுப்³பா³சரியஆஹுனெய்யாதி³பா⁴வேன ஸப்³ப³ஞ்ஞுபு³த்³தே⁴னபி பஸத்த²பா⁴வானுரூபங் மாதுயா க³ருசித்தங் உபட்ட²பெத்வா ‘‘மாதா நாமேஸா புத்தஸ்ஸ ப³ஹூபகாரா, தஸ்மா மாதுபட்டா²னங் நாம பண்டி³தேன பஞ்ஞத்த’’ந்தி மனஸி கத்வா அனேகேஸங் ஹத்தி²ஸஹஸ்ஸானங் இஸ்ஸராதி⁴பதி மஹானுபா⁴வோ யூத²பதி ஹுத்வா தேஹி அனுவத்தியமானோ ஏககவிஹாரே அந்தராயங் அக³ணெத்வா யூத²ங் பஹாய ஏககோ ஹுத்வா உபகாரிகெ²த்தங் பூஜெஸ்ஸாமீதி மாதுபோஸனங், மக்³க³மூள்ஹபுரிஸங் தி³ஸ்வா அனுகம்பாய தங் க³ஹெத்வா மனுஸ்ஸகோ³சரஸம்பாபனங், தேன ச கதாபராத⁴ஸஹனங் , ஹத்தா²சரியப்பமுகா²னங் அத்தானங் ப³ந்தி⁴துங் ஆக³தபுரிஸானங் ஸமத்தோ²பி ஸமானோ ஸந்தாஸனமத்தேனபி தேஸங் பீளனா ப⁴விஸ்ஸதி, மய்ஹஞ்ச ஸீலஸ்ஸ க²ண்டா³தி³பா⁴வோதி ததா² அகத்வா ஸுத³ந்தேன ஓபவய்ஹோ விய ஸுகே²னேவ க³ஹணூபக³மனங், மாதரங் வினா ந கஞ்சி அஜ்ஜோ²ஹரிஸ்ஸாமீதி ஸத்தாஹம்பி அனாஹாரதா, இமினாபாஹங் ப³ந்தா⁴பிதோதி சித்தங் அனுப்பாதெ³த்வா ராஜானங் மெத்தாய ப²ரணங், தஸ்ஸ ச நானானயேஹி த⁴ம்மதே³ஸனாதி ஏவமாத³யோ இத⁴ மஹாபுரிஸஸ்ஸ கு³ணானுபா⁴வா விபா⁴வேதப்³பா³. தேன வுத்தங் – ‘‘ஏவங் அச்ச²ரியா ஏதே, அப்³பு⁴தா ச மஹேஸினோ…பே॰… த⁴ம்மஸ்ஸ அனுத⁴ம்மதோ’’தி.

    Idhāpi dānapāramiādayo yathārahaṃ niddhāretabbā. Sīlapāramī pana atisayavatīti sā eva desanaṃ āsnḷahā. Tathā tiracchānayoniyaṃ uppannopi brahmapubbadevapubbācariyaāhuneyyādibhāvena sabbaññubuddhenapi pasatthabhāvānurūpaṃ mātuyā garucittaṃ upaṭṭhapetvā ‘‘mātā nāmesā puttassa bahūpakārā, tasmā mātupaṭṭhānaṃ nāma paṇḍitena paññatta’’nti manasi katvā anekesaṃ hatthisahassānaṃ issarādhipati mahānubhāvo yūthapati hutvā tehi anuvattiyamāno ekakavihāre antarāyaṃ agaṇetvā yūthaṃ pahāya ekako hutvā upakārikhettaṃ pūjessāmīti mātuposanaṃ, maggamūḷhapurisaṃ disvā anukampāya taṃ gahetvā manussagocarasampāpanaṃ, tena ca katāparādhasahanaṃ , hatthācariyappamukhānaṃ attānaṃ bandhituṃ āgatapurisānaṃ samatthopi samāno santāsanamattenapi tesaṃ pīḷanā bhavissati, mayhañca sīlassa khaṇḍādibhāvoti tathā akatvā sudantena opavayho viya sukheneva gahaṇūpagamanaṃ, mātaraṃ vinā na kañci ajjhoharissāmīti sattāhampi anāhāratā, imināpāhaṃ bandhāpitoti cittaṃ anuppādetvā rājānaṃ mettāya pharaṇaṃ, tassa ca nānānayehi dhammadesanāti evamādayo idha mahāpurisassa guṇānubhāvā vibhāvetabbā. Tena vuttaṃ – ‘‘evaṃ acchariyā ete, abbhutā ca mahesino…pe… dhammassa anudhammato’’ti.

    மாதுபோஸகசரியாவண்ணனா நிட்டி²தா.

    Mātuposakacariyāvaṇṇanā niṭṭhitā.







    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சரியாபிடகபாளி • Cariyāpiṭakapāḷi / 1. மாதுபோஸகசரியா • 1. Mātuposakacariyā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact