| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
4. மெத்தகூ³ஸுத்தவண்ணனா
4. Mettagūsuttavaṇṇanā
1056. புச்சா²மி தந்தி மெத்தகு³ஸுத்தங். தத்த² மஞ்ஞாமி தங் வேத³கு³ங் பா⁴விதத்தந்தி ‘‘அயங் வேத³கூ³’’தி ச ‘‘பா⁴விதத்தோ’’தி ச ஏவங் தங் மஞ்ஞாமி.
1056.Pucchāmitanti mettagusuttaṃ. Tattha maññāmi taṃ vedaguṃ bhāvitattanti ‘‘ayaṃ vedagū’’ti ca ‘‘bhāvitatto’’ti ca evaṃ taṃ maññāmi.
1057. அபுச்ச²ஸீதி எத்த² அ-இதி பத³பூரணமத்தே நிபாதோ, புச்ச²ஸிச்சேவ அத்தோ². பவக்கா²மி யதா² பஜானந்தி யதா² பஜானந்தோ ஆசிக்க²தி, ஏவங் ஆசிக்கி²ஸ்ஸாமி. உபதி⁴னிதா³னா பப⁴வந்தி து³க்கா²தி தண்ஹாதி³உபதி⁴னிதா³னா ஜாதிஆதி³து³க்க²விஸேஸா பப⁴வந்தி.
1057.Apucchasīti ettha a-iti padapūraṇamatte nipāto, pucchasicceva attho. Pavakkhāmi yathā pajānanti yathā pajānanto ācikkhati, evaṃ ācikkhissāmi. Upadhinidānā pabhavanti dukkhāti taṇhādiupadhinidānā jātiādidukkhavisesā pabhavanti.
1058. ஏவங் உபதி⁴னிதா³னதோ பப⁴வந்தேஸு து³க்கே²ஸு – யோ வே அவித்³வாதி கா³தா². தத்த² பஜானந்தி ஸங்கா²ரே அனிச்சாதி³வஸேன ஜானந்தோ. து³க்க²ஸ்ஸ ஜாதிப்பப⁴வானுபஸ்ஸீதி வட்டது³க்க²ஸ்ஸ ஜாதிகாரணங் ‘‘உபதீ⁴’’தி அனுபஸ்ஸந்தோ.
1058. Evaṃ upadhinidānato pabhavantesu dukkhesu – yo ve avidvāti gāthā. Tattha pajānanti saṅkhāre aniccādivasena jānanto. Dukkhassajātippabhavānupassīti vaṭṭadukkhassa jātikāraṇaṃ ‘‘upadhī’’ti anupassanto.
1059. ஸோகபரித்³த³வஞ்சாதி ஸோகஞ்ச பரிதே³வஞ்ச. ததா² ஹி தே விதி³தோ ஏஸ த⁴ம்மோதி யதா² யதா² ஸத்தா ஜானந்தி, ததா² ததா² பஞ்ஞாபனவஸேன விதி³தோ ஏஸ த⁴ம்மோதி.
1059.Sokapariddavañcāti sokañca paridevañca. Tathā hi te vidito esa dhammoti yathā yathā sattā jānanti, tathā tathā paññāpanavasena vidito esa dhammoti.
1060-61. கித்தயிஸ்ஸாமி தே த⁴ம்மந்தி நிப்³பா³னத⁴ம்மங் நிப்³பா³னகா³மினிபடிபதா³த⁴ம்மஞ்ச தே தே³ஸயிஸ்ஸாமி. தி³ட்டே² த⁴ம்மேதி தி³ட்டே² து³க்கா²தி³த⁴ம்மே, இமஸ்மிங்யேவ வா அத்தபா⁴வே. அனீதிஹந்தி அத்தபச்சக்க²ங். யங் விதி³த்வாதி யங் த⁴ம்மங் ‘‘ஸப்³பே³ ஸங்கா²ரா அனிச்சா’’திஆதி³னா நயேன ஸம்மஸந்தோ விதி³த்வா. தஞ்சாஹங் அபி⁴னந்தா³மீதி தங் வுத்தபகாரத⁴ம்மஜோதகங் தவ வசனங் அஹங் பத்த²யாமி. த⁴ம்மமுத்தமந்தி தஞ்ச த⁴ம்மமுத்தமங் அபி⁴னந்தா³மீதி.
1060-61.Kittayissāmi te dhammanti nibbānadhammaṃ nibbānagāminipaṭipadādhammañca te desayissāmi. Diṭṭhe dhammeti diṭṭhe dukkhādidhamme, imasmiṃyeva vā attabhāve. Anītihanti attapaccakkhaṃ. Yaṃ viditvāti yaṃ dhammaṃ ‘‘sabbe saṅkhārā aniccā’’tiādinā nayena sammasanto viditvā. Tañcāhaṃ abhinandāmīti taṃ vuttapakāradhammajotakaṃ tava vacanaṃ ahaṃ patthayāmi. Dhammamuttamanti tañca dhammamuttamaṃ abhinandāmīti.
1062. உத்³த⁴ங் அதோ⁴ திரியஞ்சாபி மஜ்ஜே²தி எத்த² உத்³த⁴ந்தி அனாக³தத்³தா⁴ வுச்சதி, அதோ⁴தி அதீதத்³தா⁴, திரியஞ்சாபி மஜ்ஜே²தி பச்சுப்பன்னத்³தா⁴. ஏதேஸு நந்தி³ஞ்ச நிவேஸனஞ்ச, பனுஜ்ஜ விஞ்ஞாணந்தி ஏதேஸு உத்³தா⁴தீ³ஸு தண்ஹஞ்ச தி³ட்டி²னிவேஸனஞ்ச அபி⁴ஸங்கா²ரவிஞ்ஞாணஞ்ச பனுதே³ஹி, பனுதி³த்வா ச ப⁴வே ந திட்டே², ஏவங் ஸந்தே து³விதே⁴பி ப⁴வே ந திட்டெ²ய்ய. ஏவங் தாவ பனுஜ்ஜஸத்³த³ஸ்ஸ பனுதே³ஹீதி இமஸ்மிங் அத்த²விகப்பே ஸம்ப³ந்தோ⁴, பனுதி³த்வாதி ஏதஸ்மிங் பன அத்த²விகப்பே ப⁴வே ந திட்டே²தி அயமேவ ஸம்ப³ந்தோ⁴. ஏதானி நந்தி³னிவேஸனவிஞ்ஞாணானி பனுதி³த்வா து³விதே⁴பி ப⁴வே ந திட்டெ²ய்யாதி வுத்தங் ஹோதி.
1062.Uddhaṃadho tiriyañcāpi majjheti ettha uddhanti anāgataddhā vuccati, adhoti atītaddhā, tiriyañcāpi majjheti paccuppannaddhā. Etesu nandiñca nivesanañca, panujja viññāṇanti etesu uddhādīsu taṇhañca diṭṭhinivesanañca abhisaṅkhāraviññāṇañca panudehi, panuditvā ca bhave na tiṭṭhe, evaṃ sante duvidhepi bhave na tiṭṭheyya. Evaṃ tāva panujjasaddassa panudehīti imasmiṃ atthavikappe sambandho, panuditvāti etasmiṃ pana atthavikappe bhave na tiṭṭheti ayameva sambandho. Etāni nandinivesanaviññāṇāni panuditvā duvidhepi bhave na tiṭṭheyyāti vuttaṃ hoti.
1063-4. ஏதானி வினோதெ³த்வா ப⁴வே அதிட்ட²ந்தோ ஏஸோ – ஏவங்விஹாரீதி கா³தா². தத்த² இதே⁴வாதி இமஸ்மிங்யேவ ஸாஸனே, இமஸ்மிங்யேவ வா அத்தபா⁴வே. ஸுகித்திதங் கோ³தமனூபதீ⁴கந்தி எத்த² அனுபதி⁴கந்தி நிப்³பா³னங். தங் ஸந்தா⁴ய ப⁴க³வந்தங் ஆலபந்தோ ஆஹ – ‘‘ஸுகித்திதங் கோ³தமனூபதீ⁴க’’ந்தி.
1063-4. Etāni vinodetvā bhave atiṭṭhanto eso – evaṃvihārīti gāthā. Tattha idhevāti imasmiṃyeva sāsane, imasmiṃyeva vā attabhāve. Sukittitaṃ gotamanūpadhīkanti ettha anupadhikanti nibbānaṃ. Taṃ sandhāya bhagavantaṃ ālapanto āha – ‘‘sukittitaṃ gotamanūpadhīka’’nti.
1065. ந கேவலங் து³க்க²மேவ பஹாஸி – தே சாபீதி கா³தா². தத்த² அட்டி²தந்தி ஸக்கச்சங், ஸதா³ வா. தங் தங் நமஸ்ஸாமீதி தஸ்மா தங் நமஸ்ஸாமி. ஸமேச்சாதி உபக³ந்த்வா. நாகா³தி ப⁴க³வந்தங் ஆலபந்தோ ஆஹ.
1065. Na kevalaṃ dukkhameva pahāsi – te cāpīti gāthā. Tattha aṭṭhitanti sakkaccaṃ, sadā vā. Taṃ taṃ namassāmīti tasmā taṃ namassāmi. Sameccāti upagantvā. Nāgāti bhagavantaṃ ālapanto āha.
1066. இதா³னி தங் ப⁴க³வா ‘‘அத்³தா⁴ ஹி ப⁴க³வா பஹாஸி து³க்க²’’ந்தி ஏவங் தேன ப்³ராஹ்மணேன விதி³தோபி அத்தானங் அனுபனெத்வாவ பஹீனது³க்கே²ன புக்³க³லேன ஓவத³ந்தோ ‘‘யங் ப்³ராஹ்மண’’ந்தி கா³த²மாஹ. தஸ்ஸத்தோ² – யங் த்வங் அபி⁴ஜானந்தோ ‘‘அயங் பா³ஹிதபாபத்தா ப்³ராஹ்மணோ, வேதே³ஹி க³தத்தா வேத³கூ³, கிஞ்சனாபா⁴வேன அகிஞ்சனோ, காமேஸு ச ப⁴வேஸு ச அஸத்தத்தா காமப⁴வே அஸத்தோ’’தி ஜஞ்ஞா ஜானெய்யாஸி. அத்³தா⁴ ஹி ஸோ இமங் ஓக⁴ங் அதாரி, திண்ணோ ச பாரங் அகி²லோ அகங்கோ².
1066. Idāni taṃ bhagavā ‘‘addhā hi bhagavā pahāsi dukkha’’nti evaṃ tena brāhmaṇena viditopi attānaṃ anupanetvāva pahīnadukkhena puggalena ovadanto ‘‘yaṃ brāhmaṇa’’nti gāthamāha. Tassattho – yaṃ tvaṃ abhijānanto ‘‘ayaṃ bāhitapāpattā brāhmaṇo, vedehi gatattā vedagū, kiñcanābhāvena akiñcano, kāmesu ca bhavesu ca asattattā kāmabhave asatto’’ti jaññā jāneyyāsi. Addhā hi so imaṃ oghaṃ atāri, tiṇṇo ca pāraṃ akhilo akaṅkho.
1067. கிஞ்ச பி⁴ய்யோ – வித்³வா ச யோதி கா³தா². தத்த² இதா⁴தி இமஸ்மிங் ஸாஸனே, அத்தபா⁴வே வா. விஸஜ்ஜாதி வொஸ்ஸஜ்ஜித்வா. ஸேஸங் ஸப்³ப³த்த² பாகடமேவ.
1067. Kiñca bhiyyo – vidvā ca yoti gāthā. Tattha idhāti imasmiṃ sāsane, attabhāve vā. Visajjāti vossajjitvā. Sesaṃ sabbattha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய மெத்தகூ³ஸுத்தவண்ணனா நிட்டி²தா.
Suttanipāta-aṭṭhakathāya mettagūsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 4. மெத்தகூ³மாணவபுச்சா² • 4. Mettagūmāṇavapucchā
