| Library / Tipiṭaka / ཏིཔིཊཀ • Tipiṭaka / སུཏྟནིཔཱཏ-ཨཊྛཀཐཱ • Suttanipāta-aṭṭhakathā |
༤. མེཏྟགཱུསུཏྟཝཎྞནཱ
4. Mettagūsuttavaṇṇanā
༡༠༥༦. པུཙྪཱམི ཏནྟི མེཏྟགུསུཏྟཾ། ཏཏྠ མཉྙཱམི ཏཾ ཝེདགུཾ བྷཱཝིཏཏྟནྟི ‘‘ཨཡཾ ཝེདགཱུ’’ཏི ཙ ‘‘བྷཱཝིཏཏྟོ’’ཏི ཙ ཨེཝཾ ཏཾ མཉྙཱམི།
1056.Pucchāmitanti mettagusuttaṃ. Tattha maññāmi taṃ vedaguṃ bhāvitattanti ‘‘ayaṃ vedagū’’ti ca ‘‘bhāvitatto’’ti ca evaṃ taṃ maññāmi.
༡༠༥༧. ཨཔུཙྪསཱིཏི ཨེཏྠ ཨ-ཨིཏི པདཔཱུརཎམཏྟེ ནིཔཱཏོ, པུཙྪསིཙྩེཝ ཨཏྠོ། པཝཀྑཱམི ཡཐཱ པཛཱནནྟི ཡཐཱ པཛཱནནྟོ ཨཱཙིཀྑཏི, ཨེཝཾ ཨཱཙིཀྑིསྶཱམི། ཨུཔདྷིནིདཱནཱ པབྷཝནྟི དུཀྑཱཏི ཏཎྷཱདིཨུཔདྷིནིདཱནཱ ཛཱཏིཨཱདིདུཀྑཝིསེསཱ པབྷཝནྟི།
1057.Apucchasīti ettha a-iti padapūraṇamatte nipāto, pucchasicceva attho. Pavakkhāmi yathā pajānanti yathā pajānanto ācikkhati, evaṃ ācikkhissāmi. Upadhinidānā pabhavanti dukkhāti taṇhādiupadhinidānā jātiādidukkhavisesā pabhavanti.
༡༠༥༨. ཨེཝཾ ཨུཔདྷིནིདཱནཏོ པབྷཝནྟེསུ དུཀྑེསུ – ཡོ ཝེ ཨཝིདྭཱཏི གཱཐཱ། ཏཏྠ པཛཱནནྟི སངྑཱརེ ཨནིཙྩཱདིཝསེན ཛཱནནྟོ། དུཀྑསྶ ཛཱཏིཔྤབྷཝཱནུཔསྶཱིཏི ཝཊྚདུཀྑསྶ ཛཱཏིཀཱརཎཾ ‘‘ཨུཔདྷཱི’’ཏི ཨནུཔསྶནྟོ།
1058. Evaṃ upadhinidānato pabhavantesu dukkhesu – yo ve avidvāti gāthā. Tattha pajānanti saṅkhāre aniccādivasena jānanto. Dukkhassajātippabhavānupassīti vaṭṭadukkhassa jātikāraṇaṃ ‘‘upadhī’’ti anupassanto.
༡༠༥༩. སོཀཔརིདྡཝཉྩཱཏི སོཀཉྩ པརིདེཝཉྩ། ཏཐཱ ཧི ཏེ ཝིདིཏོ ཨེས དྷམྨོཏི ཡཐཱ ཡཐཱ སཏྟཱ ཛཱནནྟི, ཏཐཱ ཏཐཱ པཉྙཱཔནཝསེན ཝིདིཏོ ཨེས དྷམྨོཏི།
1059.Sokapariddavañcāti sokañca paridevañca. Tathā hi te vidito esa dhammoti yathā yathā sattā jānanti, tathā tathā paññāpanavasena vidito esa dhammoti.
༡༠༦༠-༦༡. ཀིཏྟཡིསྶཱམི ཏེ དྷམྨནྟི ནིབྦཱནདྷམྨཾ ནིབྦཱནགཱམིནིཔཊིཔདཱདྷམྨཉྩ ཏེ དེསཡིསྶཱམི། དིཊྛེ དྷམྨེཏི དིཊྛེ དུཀྑཱདིདྷམྨེ, ཨིམསྨིཾཡེཝ ཝཱ ཨཏྟབྷཱཝེ། ཨནཱིཏིཧནྟི ཨཏྟཔཙྩཀྑཾ། ཡཾ ཝིདིཏྭཱཏི ཡཾ དྷམྨཾ ‘‘སབྦེ སངྑཱརཱ ཨནིཙྩཱ’’ཏིཨཱདིནཱ ནཡེན སམྨསནྟོ ཝིདིཏྭཱ། ཏཉྩཱཧཾ ཨབྷིནནྡཱམཱིཏི ཏཾ ཝུཏྟཔཀཱརདྷམྨཛོཏཀཾ ཏཝ ཝཙནཾ ཨཧཾ པཏྠཡཱམི། དྷམྨམུཏྟམནྟི ཏཉྩ དྷམྨམུཏྟམཾ ཨབྷིནནྡཱམཱིཏི།
1060-61.Kittayissāmi te dhammanti nibbānadhammaṃ nibbānagāminipaṭipadādhammañca te desayissāmi. Diṭṭhe dhammeti diṭṭhe dukkhādidhamme, imasmiṃyeva vā attabhāve. Anītihanti attapaccakkhaṃ. Yaṃ viditvāti yaṃ dhammaṃ ‘‘sabbe saṅkhārā aniccā’’tiādinā nayena sammasanto viditvā. Tañcāhaṃ abhinandāmīti taṃ vuttapakāradhammajotakaṃ tava vacanaṃ ahaṃ patthayāmi. Dhammamuttamanti tañca dhammamuttamaṃ abhinandāmīti.
༡༠༦༢. ཨུདྡྷཾ ཨདྷོ ཏིརིཡཉྩཱཔི མཛ྄ཛྷེཏི ཨེཏྠ ཨུདྡྷནྟི ཨནཱགཏདྡྷཱ ཝུཙྩཏི, ཨདྷོཏི ཨཏཱིཏདྡྷཱ, ཏིརིཡཉྩཱཔི མཛ྄ཛྷེཏི པཙྩུཔྤནྣདྡྷཱ། ཨེཏེསུ ནནྡིཉྩ ནིཝེསནཉྩ, པནུཛྫ ཝིཉྙཱཎནྟི ཨེཏེསུ ཨུདྡྷཱདཱིསུ ཏཎྷཉྩ དིཊྛིནིཝེསནཉྩ ཨབྷིསངྑཱརཝིཉྙཱཎཉྩ པནུདེཧི, པནུདིཏྭཱ ཙ བྷཝེ ན ཏིཊྛེ, ཨེཝཾ སནྟེ དུཝིདྷེཔི བྷཝེ ན ཏིཊྛེཡྻ། ཨེཝཾ ཏཱཝ པནུཛྫསདྡསྶ པནུདེཧཱིཏི ཨིམསྨིཾ ཨཏྠཝིཀཔྤེ སམྦནྡྷོ, པནུདིཏྭཱཏི ཨེཏསྨིཾ པན ཨཏྠཝིཀཔྤེ བྷཝེ ན ཏིཊྛེཏི ཨཡམེཝ སམྦནྡྷོ། ཨེཏཱནི ནནྡིནིཝེསནཝིཉྙཱཎཱནི པནུདིཏྭཱ དུཝིདྷེཔི བྷཝེ ན ཏིཊྛེཡྻཱཏི ཝུཏྟཾ ཧོཏི།
1062.Uddhaṃadho tiriyañcāpi majjheti ettha uddhanti anāgataddhā vuccati, adhoti atītaddhā, tiriyañcāpi majjheti paccuppannaddhā. Etesu nandiñca nivesanañca, panujja viññāṇanti etesu uddhādīsu taṇhañca diṭṭhinivesanañca abhisaṅkhāraviññāṇañca panudehi, panuditvā ca bhave na tiṭṭhe, evaṃ sante duvidhepi bhave na tiṭṭheyya. Evaṃ tāva panujjasaddassa panudehīti imasmiṃ atthavikappe sambandho, panuditvāti etasmiṃ pana atthavikappe bhave na tiṭṭheti ayameva sambandho. Etāni nandinivesanaviññāṇāni panuditvā duvidhepi bhave na tiṭṭheyyāti vuttaṃ hoti.
༡༠༦༣-༤. ཨེཏཱནི ཝིནོདེཏྭཱ བྷཝེ ཨཏིཊྛནྟོ ཨེསོ – ཨེཝཾཝིཧཱརཱིཏི གཱཐཱ། ཏཏྠ ཨིདྷེཝཱཏི ཨིམསྨིཾཡེཝ སཱསནེ, ཨིམསྨིཾཡེཝ ཝཱ ཨཏྟབྷཱཝེ། སུཀིཏྟིཏཾ གོཏམནཱུཔདྷཱིཀནྟི ཨེཏྠ ཨནུཔདྷིཀནྟི ནིབྦཱནཾ། ཏཾ སནྡྷཱཡ བྷགཝནྟཾ ཨཱལཔནྟོ ཨཱཧ – ‘‘སུཀིཏྟིཏཾ གོཏམནཱུཔདྷཱིཀ’’ནྟི།
1063-4. Etāni vinodetvā bhave atiṭṭhanto eso – evaṃvihārīti gāthā. Tattha idhevāti imasmiṃyeva sāsane, imasmiṃyeva vā attabhāve. Sukittitaṃ gotamanūpadhīkanti ettha anupadhikanti nibbānaṃ. Taṃ sandhāya bhagavantaṃ ālapanto āha – ‘‘sukittitaṃ gotamanūpadhīka’’nti.
༡༠༦༥. ན ཀེཝལཾ དུཀྑམེཝ པཧཱསི – ཏེ ཙཱཔཱིཏི གཱཐཱ། ཏཏྠ ཨཊྛིཏནྟི སཀྐཙྩཾ, སདཱ ཝཱ། ཏཾ ཏཾ ནམསྶཱམཱིཏི ཏསྨཱ ཏཾ ནམསྶཱམི། སམེཙྩཱཏི ཨུཔགནྟྭཱ། ནཱགཱཏི བྷགཝནྟཾ ཨཱལཔནྟོ ཨཱཧ།
1065. Na kevalaṃ dukkhameva pahāsi – te cāpīti gāthā. Tattha aṭṭhitanti sakkaccaṃ, sadā vā. Taṃ taṃ namassāmīti tasmā taṃ namassāmi. Sameccāti upagantvā. Nāgāti bhagavantaṃ ālapanto āha.
༡༠༦༦. ཨིདཱནི ཏཾ བྷགཝཱ ‘‘ཨདྡྷཱ ཧི བྷགཝཱ པཧཱསི དུཀྑ’’ནྟི ཨེཝཾ ཏེན བྲཱཧྨཎེན ཝིདིཏོཔི ཨཏྟཱནཾ ཨནུཔནེཏྭཱཝ པཧཱིནདུཀྑེན པུགྒལེན ཨོཝདནྟོ ‘‘ཡཾ བྲཱཧྨཎ’’ནྟི གཱཐམཱཧ། ཏསྶཏྠོ – ཡཾ ཏྭཾ ཨབྷིཛཱནནྟོ ‘‘ཨཡཾ བཱཧིཏཔཱཔཏྟཱ བྲཱཧྨཎོ, ཝེདེཧི གཏཏྟཱ ཝེདགཱུ, ཀིཉྩནཱབྷཱཝེན ཨཀིཉྩནོ, ཀཱམེསུ ཙ བྷཝེསུ ཙ ཨསཏྟཏྟཱ ཀཱམབྷཝེ ཨསཏྟོ’’ཏི ཛཉྙཱ ཛཱནེཡྻཱསི། ཨདྡྷཱ ཧི སོ ཨིམཾ ཨོགྷཾ ཨཏཱརི, ཏིཎྞོ ཙ པཱརཾ ཨཁིལོ ཨཀངྑོ།
1066. Idāni taṃ bhagavā ‘‘addhā hi bhagavā pahāsi dukkha’’nti evaṃ tena brāhmaṇena viditopi attānaṃ anupanetvāva pahīnadukkhena puggalena ovadanto ‘‘yaṃ brāhmaṇa’’nti gāthamāha. Tassattho – yaṃ tvaṃ abhijānanto ‘‘ayaṃ bāhitapāpattā brāhmaṇo, vedehi gatattā vedagū, kiñcanābhāvena akiñcano, kāmesu ca bhavesu ca asattattā kāmabhave asatto’’ti jaññā jāneyyāsi. Addhā hi so imaṃ oghaṃ atāri, tiṇṇo ca pāraṃ akhilo akaṅkho.
༡༠༦༧. ཀིཉྩ བྷིཡྻོ – ཝིདྭཱ ཙ ཡོཏི གཱཐཱ། ཏཏྠ ཨིདྷཱཏི ཨིམསྨིཾ སཱསནེ, ཨཏྟབྷཱཝེ ཝཱ། ཝིསཛྫཱཏི ཝོསྶཛྫིཏྭཱ། སེསཾ སབྦཏྠ པཱཀཊམེཝ།
1067. Kiñca bhiyyo – vidvā ca yoti gāthā. Tattha idhāti imasmiṃ sāsane, attabhāve vā. Visajjāti vossajjitvā. Sesaṃ sabbattha pākaṭameva.
ཨེཝཾ བྷགཝཱ ཨིམམྤི སུཏྟཾ ཨརཧཏྟནིཀཱུཊེནེཝ དེསེསི། དེསནཱཔརིཡོསཱནེ ཙ ཝུཏྟསདིསོ ཨེཝ དྷམྨཱབྷིསམཡོ ཨཧོསཱིཏི།
Evaṃ bhagavā imampi suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
པརམཏྠཛོཏིཀཱཡ ཁུདྡཀ-ཨཊྛཀཐཱཡ
Paramatthajotikāya khuddaka-aṭṭhakathāya
སུཏྟནིཔཱཏ-ཨཊྛཀཐཱཡ མེཏྟགཱུསུཏྟཝཎྞནཱ ནིཊྛིཏཱ།
Suttanipāta-aṭṭhakathāya mettagūsuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / སུཏྟནིཔཱཏཔཱལི༹ • Suttanipātapāḷi / ༤. མེཏྟགཱུམཱཎཝཔུཙྪཱ • 4. Mettagūmāṇavapucchā
