| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
4. மெத்தஜித்தே²ரகா³தா²வண்ணனா
4. Mettajittheragāthāvaṇṇanā
நமோ ஹி தஸ்ஸ ப⁴க³வதோதி ஆயஸ்மதோ மெத்தஜித்தே²ரஸ்ஸ கா³தா². கா உப்பத்தி? ஸோ கிர அனோமத³ஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதங் பத்தோ ஸாஸனே அபி⁴ப்பஸன்னோ ஹுத்வா போ³தி⁴ருக்க²ஸ்ஸ இட்ட²காஹி வேதி³கங் சினித்வா ஸுதா⁴பரிகம்மங் காரேஸி. ஸத்தா² தஸ்ஸ அனுமோத³னங் அகாஸி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரங் புஞ்ஞானி கத்வா தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ மக³த⁴ரட்டே² அஞ்ஞதரஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி, மெத்தஜீதிஸ்ஸ நாமங் அஹோஸி. ஸோ வயப்பத்தோ காமேஸு ஆதீ³னவங் தி³ஸ்வா தாபஸபப்³ப³ஜ்ஜங் பப்³ப³ஜித்வா அரஞ்ஞே விஹரந்தோ பு³த்³து⁴ப்பாத³ங் ஸுத்வா புப்³ப³ஹேதுனா சோதி³யமானோ ஸத்து² ஸந்திகங் க³ந்த்வா பவத்தினிவத்தியோ ஆரப்³ப⁴ பஞ்ஹங் புச்சி²த்வா ஸத்தா²ரா பஞ்ஹே விஸ்ஸஜ்ஜிதே படிலத்³த⁴ஸத்³தோ⁴ பப்³ப³ஜித்வா விபஸ்ஸனங் பட்ட²பெத்வா அரஹத்தங் பாபுணி. தேன வுத்தங் அபதா³னே (அப॰ தே²ர 1.15.26-31) –
Namohi tassa bhagavatoti āyasmato mettajittherassa gāthā. Kā uppatti? So kira anomadassissa bhagavato kāle kulagehe nibbattitvā viññutaṃ patto sāsane abhippasanno hutvā bodhirukkhassa iṭṭhakāhi vedikaṃ cinitvā sudhāparikammaṃ kāresi. Satthā tassa anumodanaṃ akāsi. So tena puññakammena devaloke nibbattitvā aparāparaṃ puññāni katvā devamanussesu saṃsaranto imasmiṃ buddhuppāde magadharaṭṭhe aññatarassa brāhmaṇassa putto hutvā nibbatti, mettajītissa nāmaṃ ahosi. So vayappatto kāmesu ādīnavaṃ disvā tāpasapabbajjaṃ pabbajitvā araññe viharanto buddhuppādaṃ sutvā pubbahetunā codiyamāno satthu santikaṃ gantvā pavattinivattiyo ārabbha pañhaṃ pucchitvā satthārā pañhe vissajjite paṭiladdhasaddho pabbajitvā vipassanaṃ paṭṭhapetvā arahattaṃ pāpuṇi. Tena vuttaṃ apadāne (apa. thera 1.15.26-31) –
‘‘அனோமத³ஸ்ஸீமுனினோ, போ³தி⁴வேதி³மகாஸஹங்;
‘‘Anomadassīmunino, bodhivedimakāsahaṃ;
ஸுதா⁴ய பிண்ட³ங் த³த்வான, பாணிகம்மங் அகாஸஹங்.
Sudhāya piṇḍaṃ datvāna, pāṇikammaṃ akāsahaṃ.
‘‘தி³ஸ்வா தங் ஸுகதங் கம்மங், அனோமத³ஸ்ஸீ நருத்தமோ;
‘‘Disvā taṃ sukataṃ kammaṃ, anomadassī naruttamo;
பி⁴க்கு²ஸங்கே⁴ டி²தோ ஸத்தா², இமா கா³தா² அபா⁴ஸத².
Bhikkhusaṅghe ṭhito satthā, imā gāthā abhāsatha.
‘‘இமினா ஸுத⁴கம்மேன, சேதனாபணிதீ⁴ஹி ச;
‘‘Iminā sudhakammena, cetanāpaṇidhīhi ca;
ஸம்பத்திங் அனுபொ⁴த்வான, து³க்க²ஸ்ஸந்தங் கரிஸ்ஸதி.
Sampattiṃ anubhotvāna, dukkhassantaṃ karissati.
‘‘பஸன்னமுக²வண்ணொம்ஹி, ஏகக்³கோ³ ஸுஸமாஹிதோ;
‘‘Pasannamukhavaṇṇomhi, ekaggo susamāhito;
தா⁴ரேமி அந்திமங் தே³ஹங், ஸம்மாஸம்பு³த்³த⁴ஸாஸனே.
Dhāremi antimaṃ dehaṃ, sammāsambuddhasāsane.
‘‘இதோ கப்பஸதே ஆஸிங், பரிபுண்ணே அனூனகே;
‘‘Ito kappasate āsiṃ, paripuṇṇe anūnake;
ராஜா ஸப்³ப³க⁴னோ நாம, சக்கவத்தீ மஹப்³ப³லோ.
Rājā sabbaghano nāma, cakkavattī mahabbalo.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா ஸத்தா²ரங் தோ²மெந்தோ –
Arahattaṃ pana patvā satthāraṃ thomento –
94.
94.
‘‘நமோ ஹி தஸ்ஸ ப⁴க³வதோ, ஸக்யபுத்தஸ்ஸ ஸிரீமதோ;
‘‘Namo hi tassa bhagavato, sakyaputtassa sirīmato;
தேனாயங் அக்³க³ப்பத்தேன, அக்³க³த⁴ம்மோ ஸுதே³ஸிதோ’’தி. – கா³த²ங் அபா⁴ஸி;
Tenāyaṃ aggappattena, aggadhammo sudesito’’ti. – gāthaṃ abhāsi;
தத்த² நமோதி நமக்காரோ. ஹீதி நிபாதமத்தங். தஸ்ஸாதி யோ ஸோ ப⁴க³வா ஸமத்திங்ஸபாரமியோ பூரெத்வா ஸப்³ப³கிலேஸே ப⁴ஞ்ஜித்வா அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴, ஸக்யராஜஸ்ஸ புத்தோதி ஸக்யபுத்தோ. அனஞ்ஞஸாதா⁴ரணாய புஞ்ஞஸம்பத்தியா ச ஸம்பா⁴விதோ உத்தமாய ரூபகாயஸிரியா த⁴ம்மகாயஸிரியா ச ஸமன்னாக³தத்தா ஸிரீமா, தஸ்ஸ ப⁴க³வதோ ஸக்யபுத்தஸ்ஸ ஸிரீமதோ நமோ அத்து², தங் நமாமீதி அத்தோ². தேனாதி தேன ப⁴க³வதா. அயந்தி தஸ்ஸ த⁴ம்மஸ்ஸ அத்தனோ பச்சக்க²தாய வத³தி. அக்³க³ப்பத்தேனாதி அக்³க³ங் ஸப்³ப³ஞ்ஞுதங், ஸப்³பே³ஹி வா கு³ணேஹி அக்³க³பா⁴வங் ஸெட்ட²பா⁴வங் பத்தேன. அக்³க³த⁴ம்மோதி அக்³கோ³ உத்தமோ நவவித⁴லோகுத்தரோ த⁴ம்மோ ஸுட்டு² அவிபரீதங் தே³ஸிதோ பவேதி³தோதி.
Tattha namoti namakkāro. Hīti nipātamattaṃ. Tassāti yo so bhagavā samattiṃsapāramiyo pūretvā sabbakilese bhañjitvā anuttaraṃ sammāsambodhiṃ abhisambuddho, sakyarājassa puttoti sakyaputto. Anaññasādhāraṇāya puññasampattiyā ca sambhāvito uttamāya rūpakāyasiriyā dhammakāyasiriyā ca samannāgatattā sirīmā, tassa bhagavato sakyaputtassa sirīmato namo atthu, taṃ namāmīti attho. Tenāti tena bhagavatā. Ayanti tassa dhammassa attano paccakkhatāya vadati. Aggappattenāti aggaṃ sabbaññutaṃ, sabbehi vā guṇehi aggabhāvaṃ seṭṭhabhāvaṃ pattena. Aggadhammoti aggo uttamo navavidhalokuttaro dhammo suṭṭhu aviparītaṃ desito paveditoti.
மெத்தஜித்தே²ரகா³தா²வண்ணனா நிட்டி²தா.
Mettajittheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 4. மெத்தஜித்தே²ரகா³தா² • 4. Mettajittheragāthā
